1. Itshi yana kuatesa akombeledi a Yehowa ha gulandula gumukombelela ikhale adi mutagana nu malamba?

 BIBLIA yana zuela egi tudi mujinga mu ‘matangua a lamba nu a ndaga jiakola.’ (2 Tim. 3:1) Akombeledi a Yehowa ana tagana nu malamba gifua luholo athu agasue ana tagana nawo ha mavu awa a Satana. Uvi tuana sagesewa nji handaga tuana kombelela Yehowa. Itshi yana gutukuatesa ha gulandula gukombelela Yehowa ikhale tudi mutagana nu malamba ene? Ndaga yabalega ndando yana gutukuatesa idi handaga tuana jiya egi Yehowa udi ‘Nzambi wa monyo.’​—Yel. 10:10; 2 Tim. 1:12.

2. Ndaga jitshi tudi mujiya jiatadila Yehowa jiajiya gutuhana ngolo?

² Yehowa wana mona malamba agasue tuana tagana nawo, wana khala hehi ha gutukuatesa tangua diagasue. (2 Gudi. 16:9; Ngi. 23:4) Gula tudi muwunguluga egi Yehowa udi Nzambi wa monyo yajiya gutukuatesa ha gubinga lamba diagasue tuajiya gutagana nadio. Tutadilenu luholo gujiya giamatshidia giene guakuatesele Fumu Davidi.

3. Itshi Davidi watshiginyile guzuela tangua diazuelele muene egi ‘Yehowa udi nu monyo’?

³ Davidi wakhalele mujiya Yehowa muabonga nu wakhalele gumushila mutshima. Tangua Fumu Saula nu mbalagaji jienji jiko akhalele mukamba gumushiya, watogele Yehowa ukuateshi mu gisambu. (Ngi. 18:6) Tangua Nzambi wahanele mvutu gu yisambu yenji nu wamuhuluishile, Davidi wazuelele egi: ‘Yehowa udi nu monyo!’ (Ngi. 18:46) Itshi Davidi watshiginyile guzuela diago? Referanse imoshi yazuelele egi, Davidi wakhalele mujiya muabonga egi Yehowa udi “Nzambi wa giamatshidia munu wana kuatesa akombeledi enji tangua diagasue.” Ndaga Davidi wataganele najio mu monyo wenji jia mukuatesele hagujiya egi Yehowa udi  Nzambi wa monyo, ndaga jiene jiamukuatesele nji ha gulandula gumukombelela nu gumutumbuisa.​—Ngi. 18:28, 29, 49.

4. Gubonga gutshi tuajiya guheta gula tudi mutshigina egi Yehowa udi Nzambi wa monyo?

⁴ Gula esue nji tudi mutshigina egi Yehowa udi Nzambi wa monyo, yajiya gutukuatesa ha gulandula gumukombelela nu gikhesa giagasue. Gutshita ngenyi mbagutukuatesa ha gukolesela mu malamba nu mbatudihana muavula mu mudimo wenji. Mbatuzula nji desizio dia gukolesa ufuta wetu nu Yehowa.

NZAMBI WA MONYO MBAWUGUHANA NGOLO

5. Itshi yajiya gututshiginyisa egi Yehowa mbawutukuatesa gula tuatagana nu malamba? (Filiphi 4:13)

⁵ Gula tudi mu wunguluga egi Yehowa udi Nzambi wa monyo nu wana khala hehi ha gutukuatesa, mbatukolesela mu malamba agasue tuajiya gutagana nawo. Idi yadiago egi gushigo nga lamba dimoshi didi diakola gutuama dia Nzambi wetu. Handaga muene udi Nzambi wa Ngolo Jiagasue wajiya gutuhana ngolo jia gukolesela. (Tanga Filiphi 4:13.) Tudi diago nu ndaga jidi gututuma ha gumushila mutshima tangua tudi mutagana nu malamba. Gula tudi mumona luholo Yehowa wana gutukuatesa mu malamba azonda yana gututshiginyisa egi mbawutukuatesa nji gula tuatagana nu malamba akoma.

6. Ndaga jitshi jiabuidile Davidi hakhalele muene muvuala jiamukuatesele ha gulandula gushila Yehowa mutshima?

⁶ Tutadilenu ndaga mbadi jiakuatesele Davidi ha gulandula gushila Yehowa mutshima. Tangua diakhalele muene muvuala, wakhalele mubambi wa imeme ya sh’enji; urse nu khoshi yakuatele imeme. Mu ba okazio ene agasue, Davidi walanduile shitu jiene nu gikhesa giagasue, wahuluishile imeme. Davidi gatangijilego egi wabingile shitu jiene mu ngolo jienji. Uvi wakhalele mujiya muabonga egi Yehowa wamukuatesele. (1 Sam. 17:34-37) Davidi gabuitshilego ndaga jiene mutshima nga hazonda. Gutangigiza mu ndaga jiene, guamukuatesele ha gusha mutshima egi Yehowa Nzambi wa monyo mbawumuhana ngolo jiagukolesela mu masugu adi muza.

7. Mukunda natshi gutadila ndaga mu luholo luko guakuatesele Davidi ha gubinga Goliyate?

⁷ Lusugu lumoshi Davidi wayile gu phundo ya masuta a enya Isalele, mu tangua diene wakhalele yowu genji muvuala khenji atagenesa ndo ivo 20. Wamonele luholo masuta a enya Isalele akhalele muvua woma handaga gingunji gimoshi gia enya Filistiya giakhalele mutamegewa egi Goliyate giazogele ha ‘guhana masuta a enya Isalele musonyi.’ (1 Sam. 17:10, 11) Masuta a enya Isalele avuile woma handaga akhalele mutala phamba gitala nu gukoma gua Goliyate nu ndaga jiakhalele muene muzuela. (1 Sam. 17:24, 25) Uvi Davidi wakhalele mutadila ndaga yene mu luholo luko. Wakhalele mujiya egi tangua Goliyate wakhalele musegulula masuta a enya Isalele, wakhalele mushinga “masuta a Nzambi wa monyo.” (1 Sam. 17:26) Davidi wakhalele mutangigiza nu gushila Yehowa mutshima egi, mbawumukuatesa ha gubinga Goliyate gifua luholo wamukuatesele hakhalele muene mubambi wa imeme. Yadiago Davidi washile mutshima mu ukuateshi wa Yehowa, waluile nu Goliyate nu wamushiyile!​—1 Sam. 17:45-51.

8. Itshi yajiya gugukuatesa ha gulandula gushila Yehowa mutshima tangua udi mutagana nu malamba? (Tala nji gifuanesa.)

⁸ Esue nji tuajiya gubinga malamba tudi mutagana nawo, gula tudi muwunguluga egi Yehowa Nzambi wa monyo wana khala hehi ha gutukuatesa. (Ngi. 118:6) Tuajiya gukolesa gutshigina guetu gudi muene gula tudi mutangigiza ndaga jiatukalegele muene mu masugu abalega. Khala mutanga mene jidi mu Biblia jiajiya gugukuatesa ha gumona luholo Yehowa wahuluishile akombeledi enji a mu tangua dikulu. (Yesh. 37:17, 33-37) Khala mutanga nga gutala ndaga jidi mu site jw.org jidi mumonesa luholo Yehowa wana kuatesa aphangi a mala nu a akhetu a mu tangua dietu. Wunguluga nji luholo Yehowa wagukuatesele tangua wataganele nu malamba.  Yajiya gukhala egi udi mutangiza egi Yehowa gakalegelego nga ndaga imoshi ya gushimana ha guguhuluisa mu malamba adi gifua khoshi nga urse. Ujimbilago egi Yehowa wakalegele gale ndaga jiavula mu monyo waye! Wagunanele ha gukuata n’enji ufuta. (Yone 6:44) Gula wana landula gumukombelela uu nu mangino, idi handaga wana gugukuatesa. Mutoge a gukuatese ha guwunguluga luholo ahanele mvutu gu isambu yaye nu luholo wagukuatesele mu tangua diatagana nga luholo waguhuluishile gu lamba diakola watagenele nadio. Gutangigiza ndaga eji jiagasue guajiya gugukuatesa ha gumushila mutshima egi mbawulandula gugukuatesa.

9. Ndaga itshi tudi naye guwunguluga tangua tudi mutagana nu malamba? (Ishima 27:11)

⁹ Tangua tudi mutagana nu malamba, tudi naye gusha matangi etu mu ndaga yabelega ndando. Handaga Diabulu wazuelele egi gula tuatagana nu malamba, mbatubemba gukombelela Yehowa. Hene ndaga tuana tshita gula malamba atubuila jiajiya gusuanguluisa Yehowa nga gumuhana gikenene. (Yobo 1:10, 11; tanga Ishima 27:11.) Uvi tangua tudi mukolesela mu malamba ene nu tudi mutshita yagasue ha guabinga, tuana monesa egi tuana zumba Yehowa; tuana monesa nji egi Diabulu udi muenya mambo. Yajiya gukhala egi mafumu a leta adi gugusagesa, udi mutagana nu lamba dia makuta, athu ashigo musuanguluga nu lukuma luabonga udi gualongesa nga ndo udi mutagana nu malamba ako ba? Gula idi ngenyi, wunguluga egi malamba ene adi guguhana njila ya gusuanguluisa Yehowa. Ujimbilago nji egi Yehowa mbagashigo muhana njila egi ndaga inyi wajiyilego gukolesela igubuile. (1 Kol. 10:13) Mbawuguhana ngolo ha gukolesela.

NZAMBI WA MONYO MBAWUGUSHIMBIGA

10. Ndaga itshi Nzambi wa monyo wana kalegela akombeledi enji?

¹⁰ Yehowa wana shimbiga akombeledi enji agasue. (Heb. 11:6) Wana gutuhana guhuima nu wana gutukuatesa ha gukhala nu gusuanguluga sendese mangino nu mbawutuhana monyo wa mayilago mu masugu adi muza. Tuajiya gusha mutshima mu felela diana gutuhana Yehowa handaga udi nu nzala nu ngolo ha gutushimbiga. Ndaga yene yana gututuma ha gudihana muavula  mu mudimo wenji gifua luholo akombeledi enji a gujinginyina a mu tangua dikulu akhalele gudihana. Yene ndaga Timote watshitshile.​—Heb. 6:10-12.

11. Itshi yakuatesele Timote ha gudihana muavula mu mudimo wa Yehowa? (1 Timote 4:10)

¹¹ Tanga 1 Timote 4:10. Timote wakhalele nu gutshigina guakola egi Nzambi mbawumushimbiga. Gishina giene wadihanele muavula mu mudimo wa Yehowa nu ha gukuatesa athu ako. Mu luholo lutshi? Mupostolo Phaula wamuhanale gikhesa ha gukula mu nyuma nu gubua mulongeshi wabonga wa Mbimbi ya Nzambi. Timote wabembele nji gifezegeselo giabonga gudi Aklisto a mavuala nu athu agukola. Wakhalele naye nji gutagenesa inemo iko yakola, gifua guhana lubelo gudi athu akhalele nu funu ya ukuateshi nu guzumba guagasue. (1 Tim. 4:11-16; 2 Tim. 4:1-5) Athu ako akhalelego muzula nu ndando mudimo Timote wakhalele mutshita nga gumuhana mersi, uvi wakhalele mujiya egi Yehowa mbawumushimbiga.​—Roma 2:6, 7.

12. Itshi yajiya gukuatesa akulu ha gudihana muavula mu mudimo wa Yehowa? (Tala nji gifuanesa.)

¹² Mangino nji akulu ajiya gusha mutshima egi, Yehowa wana mona nu wana zula nu ndando mudimo wabonga ana kalagala. Katula mudimo wa gubamba imeme, wagulongesa mu hungu nu mudimo wa gubuisa athu alandudi, akulu avula ana hana mago mu mudimo wa gutunga Jinzo jia Ufumu nu wa gukuatesa athu abuila ndaga imoshi ya lamba. Ako ana gutshita gu Groupe de visite aux malades nga gu Comité de liaison hospitalier. Akulu ana jiya muabonga egi hungu didi dia Yehowa uvi dishigo ulondegi wa athu. Gujiya ndaga yene guana guakuatesa ha gutagenesa inemo yawo muabonga nu gushila Yehowa mutshima egi mbawashimbiga.​—Kol. 3:23, 24.

13. Luholo lutshi Yehowa wana gudivua mukunda nu mudimo tuana gumukalegela?

¹³ Athu agasue ajiyilego gubua akulu. Uvi mukut’etu agasue tudi nu ima tuajiya guhana Yehowa. Wana suanguluga muavula tangua tuana gudihana mu mudimo wenji. Wana mona misomo tuana hana ha gukuatesa mudimo wagulongesa  ha mavu agasue ikhale misomo yene idi yazonda. Yehowa wana suanguluga nji muavula luholo tuana tshita ngolo ha guhana komantere mu gudibungisa ikhale tudi enya musonyi. Wana suanguluga nji gula tudi mutotesela athu atukalagala gubola. Ikhale udi mutangiza egi wajiyilego gudihana muavula mu mudimo wa Yehowa, sha mutshima egi Yehowa wana zula nu ndando ndaga jinyi wajiya gutshita. Wana guguzumba mukunda nu ndaga jiene nu mbawugushimbiga.​—Luka 21:1-4.

KHALA YAGUJINGINYINA GUDI NZAMBI WA MONYO

14. Luholo lutshi gukhala nu ufuta wakola nu Yehowa guajiya gutukuatesa ha gusala yagujinginyina? (Tala nji gifuanesa.)

¹⁴ Gula tudi nu ufuta wakola nu Yehowa, mbayishigo mukhala lamba ha gusala yagujinginyina gudi muene. Yene ndaga Yozefe wakalegele. Luholo luakhalele muene nu ufuta wakola nu Yehowa, yamukuatesele ha gutuna gukalagala uthambi nu gutshita ndaga yajiya gusagesa Yehowa. (Gis. 39:9) Ha gukuata ufuta wakola nu Yehowa, tudi naye guzula tangua dia gutshita gisambu nu gulonguga Mbimbi yenji. Gula tuatshita ngenyi mbatukolesa ufuta wetu n’enji. Gula tudi nu ufuta wakola nu Yehowa gifua Yozefe, mbatushigo mukalagala nga ndaga imoshi yajiya gumusagesa.​—Yak. 4:8.

15. Malongo atshi tuajiya guzula mu ndaga yabuidile enya Isalele mu mavu a luselenga? (Hebelu 3:12)

¹⁵ Athu anyi anago luko gushila Yehowa mutshima, ajiya gubemba gumukombelela. Tutadilenu ndaga enya Isalele akalegele tangua akhalele mu mavu a luselenga. Akhalele mujiya muabonga egi Yehowa wana khala guene, uvi amushidilego mutshima egi mbawahana ima akhalele nayo funu. Asendesele gudihula egi: “Yehowa udi mukatshi dietu nga ndo?” (Guz. 17:2, 7) Ndaga yene yaatumine ha gulumbugila Nzambi. Tudi naye gutshita ngolo ha gutuna gulandula gifezegeselo giawo giabola.​—Tanga Hebelu 3:12.

16. Ndaga itshi yajiya gulola gutshigina guetu?

¹⁶ Makalegelo a athu a ha mavu awa, ajiya gutukanga njila ha gusala yagujinginyina gudi Yehowa. Athu avula anago gutshigina egi Nzambi  wana khala guene. Mbala jiavula, athu ana tuna gutumagela mikhuala ya Yehowa ana monega gifua adi nu lujingu luabonga. Ndaga yene yajiya gulola gutshigina guetu. Ikhale tudi musha gutshigina egi Nzambi wana khala guene, tuajiya gusendesa gudihula gula mbawutagenesa diago nzala jietu. Muthu wasonegele Ngimbo mukhapho 73 wakhalele nji gudihula mihu yene. Wakhalele mumona athu anyi akhalelego mutumagela mikhuala ya Yehowa nu lujingu luabonga. Ndaga yene yamutumile ha gudihula gula yakhalele diago nu ndando gudi muene ha gukombelela Yehowa.​—Ngi. 73:11-13.

17. Ndaga itshi yajiya gutukuatesa ha gusala yagujinginyina gudi Yehowa?

¹⁷ Ndaga itshi yakuatesele muyimbi wa Ngimbo muene ha gusombegesa matangi enji? Wakhalele mutangiza ndaga mbajibuila athu anyi abembele gushila Yehowa mutshima. (Ngi. 73:18, 19, 27) Wakhalele nji mutangigiza gubonga athu ana kombelela Yehowa ana heta. (Ngi. 73:24) Esue nji, tuajiya gutangigiza ima yagasue yabonga Yehowa watuhanele gale. Tutangizenu gale luholo monyo wetu wakhalele naye gukhala gula nga tuanago gukombelela Yehowa. Gutshita ngenyi guajiya gutukuatesa ha gusala yagujinginyina gudi Yehowa nu guzuela gifua luholo muyimbi wa Ngimbo wazuelele egi: ‘Uvi mukunda nu ame gukhala hehi nu Nzambi gudi ndaga yabonga.’​—Ngi. 73:28.

18. Mukunda natshi tushigo naye guvua woma mukunda nu masugu adi muza?

¹⁸ Tuajiya gubinga malamba agasue tuajiya gutagana nawo mu masugu awa a gisugishilo handaga tudi “ahiga a Nzambi wa monyo.” (1 Tes. 1:9) Nzambi wetu wana gutuhana ima tudi nayo funu, mbawulandula gutagenesa nzala jietu. Mu tangua dikulu wakuatesele akombeledi enji, mangino nji wana gutukuatesa. Guasala hazonda mbatutagana nu lamba diakola mbadibua ha mavu agasue. Uvi mbatushigo mukhala hakhetu, handaga Yehowa mbawutukuatesa. (Yesh. 41:10) Hene mukutu’etu agasue tuzuelenu nu “gikhesa giagasue egi: ‘Yehowa udi mukuateshi wami; mbangushigo muvua woma.’”​—Heb. 13:5, 6.