1-3. (a) Ha gutadila Ngimbo 5:4-6, luholoo lutshi Yehowa wana gutadila ndaga jiabola? (b) Mukunda natshi tuajiya guzuela egi guzangela mona gushigo gudivua nu “mukhuala wa Klisto”?

YEHOWA NZAMBI wana gutuna makalegelo abola a maluholo agasue. (Tanga Ngimbo 5:4-6.) Ganago gutshigina nga hazonda egi muthu azangele mona wazonda. Guzangela mona gudi ndaga yabola gu meso enji! Esue Matemue a Yehowa, tuana gulandula gifezegeselo gia Yehowa, tuanago gutshigina khadilo dia guzangela ana, tuanago gusuanguluga nu ndaga ya luholo elu mu hungu dia Uklisto.—Lomo 12:9; Heb. 12:15, 16.

² Guzangela mona guana gudivua ndo nu “mukhuala wa Klisto”! (Gal. 6:2) Mukunda natshi tuazuela ngenyi? Luholo tuayimonyi mu longo diabalega, mukhuala wa Klisto udi mumonesa ndaga jiagasue jialongesele Yesu mu mbimbi nu mu gifegeselo—guzumba guakhala ha gishina gia mukhuala wene nu wana gumonesa nduedi. Luholo mukhuala wene wana gutuameza Aklisto a giamatshidia, wana guatuma ha gukalegela ana azonda ndaga hagula adivue egi ana guazumba nu adi mu ubambi. Uvi guzangela mona gudi ndaga yabola, guana guatuma ha gudivua gifua ashigo nu muthu wajiya guabamba nga guazumba.

³ Uvi ndaga ya gikenene idi egi khadilo dia guzangela ana didi ha mavu agasue, nu diana gubuila nji Aklisto. Mukunda natshi? “Athu abola nu enya mambo” adi avula, ako ajiya nji gungina mu hungu dia Uklisto. (2 Tim. 3:13) Luko, athu ako ana guzuela egi adi Aklisto, azangelele gale ana azonda ha gutagenesa nzala jiawo jia muila. Henyaha tukambe gujiya  mukunda natshi guzangela mona gudi gubola guakoma. Gungima tuza mumona ndaga akulu ana gutshita gula phangi mumoshi watshita gubola guakoma, gifua guzalangela mona, nu luholo mvuaji jidi naye gubamba an’awo. *

4-5. Mukunda natshi guzangela mona gudi gubola guakoma?

⁴ Guzangela mona wazonda guana gubata malamba masugu avula. Guana gubata malamba gudi mona muene nu gudi athu adi gumubamba—enya fami yenji nu aphangi a mu hungu. Guzangela mona gudi gubola guakoma diago.

⁵ Idi ndaga yabola mukunda nu mona. * Gusagesa athu ako nga guahana lamba gudi ndaga yabola. Gifua luholo mbatuyimona mu longo dialandula, muthu udi muzangela mona udi gumuhana lamba diakola. Mona wajiyilego luko gumushila mutshima, nu gajiyilego gudivua mu ubambi. Tudi naye gubamba ana gudi athu ajiya guazangela, tudi naye nji guhana gikhesa nu ukuateshi gudi athu anyi azangelewe.—1 Tes. 5:14.

6-7. Mukunda natshi guzangela mona gudi ndaga yabola mukunda nu hungu nu mafumu a leta?

⁶ Idi ndaga yabola mu hungu. Gula muthu mumoshi mu hungu wazangela mona wazonda, wana gubolesa lukuma lua hungu. (Mat. 5:16; 1 Phet. 2:12) Hungu dia Uklisto dianago gutshigina nga hazonda khadilo dia guzangela ana handaga Aklisto avula a gujinginyina ana “gulua ita mukunda nu gutshigina”! (Yuda 3) Tuana gubemba ndo athu adi mutshita ndaga jiabola mukatshi dia hungu gula abalumuinego mitshima, nu adi mubolesa lukuma lua hungu.

⁷ Idi ndaga yabola gudi mafumu a leta. Aklisto adi naye ‘gutumagela mafumu a leta.’ (Lomo 13:1) Tuana guatumagela tangua tuana gunemesa mikhuala ya gifutshi. Gula muthu mumoshi washiya mukhuala wa leta, gifua guzangela mona, watshita gubola gudi mafumu a leta. (Fuanesa nu Makalegelo 25:8.) Akulu ashigo nu ufumu wa guhana ndola gudi athu adi mushiya mukhuala wa leta, uvi ashigo naye gusuega muthu wazangela mona gudi mafumu a leta ha gumuhana ndola. (Lomo 13:4) Muthu watshitshi gubola udi naye guzula ndola ya gubola guenji.—Gal. 6:7.

8. Luholo lutshi Yehowa wana gudivua gula athu akalegela athu ako gubola?

⁸ Idi diago ndaga yabola gudi Nzambi. (Ngi. 51:4) Gula muthu wakalegela muthu muko gubola, yakotelesa egi udi mukalegela nji Yehowa. Tuzuelelenu Mikhuala Nzambi wahanele enya Isalele. Mukhuala wakhalele muzuela egi gula muthu watambula nga wasuega gima gia ngane gutoga ndo, gakhalelego luko ‘yagujinginyina gudi Yehowa.’ (Levi 6:2-4) Yadiago gula muthu mumoshi mu hungu wazangela mona wazonda—wana gutshita egi mona gadivuigo mu ubambi—ngenyi gashigo luko yagujinginyina gudi Yehowa. Muthu muene wana gushingisa diago jina dia Yehowa. Hene, muthu wagasue wazangela mona wazonda udi naye guhanewa ndola, handaga watshita ndaga yabola gu meso a Nzambi.

9. Malongo atshi atadila guzangela mona organizasio wa Yehowa wahanele mu ivo yabalega, nu mukunda natshi?

 ⁹ Ivo yavula yabalega, organizasio wa Yehowa wazolele mikanda yavula idi muzuelela khadilo diabola dia guzangela ana. Ha gufezegesa, malongo azolele Inzo Yaleha ya Mutaledi nu Réveillez-vous! ana gumonesa ndaga yajiya gukuatesa athu azangelewe ha gubinga gikenene ana guvua. Ana gumonesa nji luholo athu ako ajiya guakuatesa nu guahana gikhesa, nu luholo mvuaji jidi naye gubamba an’awo. Organizasio wana guhana akulu malongo adi mumonesa ndaga adi naye gutshita gula phangi mumoshi wazangela mona wa zonda. Uu nu mangino organizasio wana gulandula gutadila luholo akulu ana gusambesa ndaga yene. Mukunda natshi? Ha gujiya gula luholo luetu lua gusambesa ludi gudivua nu Mukhuala wa Klisto.

10-12. (a) Itshi akulu ashigo naye gujimbila tangua adi musambesa phangi mumoshi watshitshi gubola, luko, itshi adi naye gukamba gujiya? (b) Ha gutadila Yakoba 5:14, 15 itshi akulu adi naye gutshita?

¹⁰ Tangua akulu adi musambesa phangi wakalagala gubola, ashigo naye gujimbila mukhuala wa Klisto udi mutoga gusambesa gimeme nu guzumba guagasue, nu gutshita ndaga jiabonga nu jia nduedi gu meso a Nzambi. Hene adi naye gutangiza muabonga gula a awambela egi muthu mumoshi watshitshi gubola. Ndaga yabalega ndando akulu adi naye gutshita idi gutumbuisa nu gubamba lutumbu lua jina dia Nzambi. (Levi 22:31, 32; Mat. 6:9) Ndaga iko ya ndando adi naye gutshita idi gukuatesa aphangi a mu hungu ha gusala ya gujinginyina gudi Yehowa nu guhana gikhesa nu ukuateshi gudi athu akalegewe ndaga jiabola.

¹¹ Luko, gula muthu watshitshi gubola udi phangi mu hungu, akulu adi naye gukamba gujiya gula wabalumuna mutshima hagula amukuatese ha guvutugila ufuta wenji nu Yehowa. (Tanga Yakoba 5:14, 15.) Muklisto wagasue watshita gubola ha gutagenesa nzala jienji jia muila wana gubua mukhashi mu nyuma. Yakotelesa egi gashigo luko nu ufuta wabonga nu Yehowa. * Ngenyi, akulu ana gubua minganga ya mu nyuma. Ana gukamba luholo lua ‘gusaga mukhashi’ yakotelesa muthu yonu watshitshi gubola. Ajiya gumuhana malongo a Biblia hagula avutugile ufuta wenji nu Nzambi, uvi hagula amukuatese, udi naye gubalumuna mutshima mu giamatshidia giagasue.—Makal. 3:19; 2 Kol. 2:5-10.

¹² Yadiago, akulu adi diago nu ginemo giavula. Ana gutalela muabonga imeme yaahanele Nzambi ha gubamba. (1 Phet. 5:1-3) Ana gutshigina egi aphangi ajiye egi hungu didi fundo dia guhuima. Hene, akulu ana gutshita ndaga mu phushi gula a awambela egi muthu mumoshi watshita ndaga yabola gifua guzangela mona wazonda. Tutadilenu mihu idi gugisendeselo gia  paragrafe 13,  15, nu  17.

13-14. Akulu ana gutumagela mikhuala ya leta idi mutoga ha guwambela mafumu gula muthu wazangela mona ba? Kotelesa.

 ¹³ Akulu ana gutumagela mikhuala ya leta idi mutoga ha guwambela mafumu gula muthu wazangela mona wazonda ba? Ayi. Mu mafundo anyi mikhuala ya luholo elu yana gukhala, akulu adi naye guwambela mufumu a leta gula ndaga ya luholo elu yakalegewa. (Lomo 13:1) Mukhuala wene ushigo mushiya mukhuala wa Nzambi. (Makal. 5:28, 29) Hene, gula akulu  avua egi muthu mumoshi wazangela mona, adi naye gutamega betele muphushi ha gujiya luholo lua gutadila ndaga yene.

¹⁴ Akulu adi naye guwambela mona wazangelewa, nu fami yenji nu athu ako adi mujiya ndaga yene ha gufunda nga ndo. Uvi itshi yajiya gubua gula phangi watshitshi ndaga yene, gungima yajiyiwa gudi athu agasue? Muklisto wafundji ndaga yene wajiya guvua gikenene egi washingisa Nzambi ba? Ndo sha. Muthu wazangela mona, muene washingisa jina dia Nzambi.

15-16. (a) Mu gudivua nu 1 Timote 5:19, mukunda natshi akulu adi naye gutegelela matemue mbadi gutuama egi alonde komite ya gusambesa? (b) Itshi akulu adi naye gutshita gula avua egi muthu mumoshi mu hungu wazangela mona wazonda?

 ¹⁵ Mukunda natshi akulu adi naye gutegelela matemue mbadi gutuama dia gusambesa muthu watshitshi gubola? Adi naye gutshita ngenyi handaga mikhuala ya Biblia idi mutoga ngenyi. Gula phangi muene gajilego muzuela ndaga yabola yatshitshi muene, hagula akulu alonde komite ya gumusambesa, adi naye gutegelela thomo matemue mbadi. (Mikh. 19:15; Mat. 18:16; tanga 1 Timote 5:19.) Yakotelesa egi matemue mbadi adi naye gukhala hene ha guwambela mafumu a leta egi muthu mumoshi wabungisa muila nu mona wazonda gu ngolo ba? Ndo sha. Ha guwambela leta ndaga yabola yatshitshi muthu, yanago gutoga matemue mbadi.

¹⁶ Gula akulu avua egi muthu mumoshi mu hungu wazangela mona, ha gutumagela mikhuala ya leta, adi naye guwambela mafumu ndaga yene, gungima akambi giwa gujiya gula adi naye gulonda komite ya gusambesa. Gula phangi muene wadituna, akulu adi naye gutegelela matemue. Gula matemue mbadi—yakotelesa yonu wafundji nu muthu muko udi mujiya muabonga ndaga yatadila muthu wazangela mona—aza muta lumene, akulu ajiya giwa gulonda komite ya gusambesa. * Gula temue wa mbadi gashigo, ishigo mukotelesa egi muthu wafundi udi mumba mambo. Ikhale gushigo temue wa mbadi udi mumonesa egi phangi muene wazangela mona, akulu adi naye gujiya egi guajiya gukhala ndaga yabola muthu muene watshitshi idi musagesa athu ako. Akulu adi naye gulandula guhana gikhesa nu ukuateshi gudi aphangi anyi amonesewe lamba. Luko, akulu adi naye gukangula meso ha gubamba hungu mukunda nu athu ajiya guzangela ana.—Makal. 20:28.

17-18. Kotelesa mudimo komite ya gusambesa yana gutshita.

 ¹⁷ Mudimo wa komite ya gusambesa udi itshi? Mbimbi eyi “gusambesa” ishigo mukotelesa egi akulu adi manzuji, nga ndo mafumu; uvi gula muthu wazangela mona wazonda, leta udi naye gumuhana ndola handaga washiyi mukhuala. Akulu ana gukalegela ndo mukhuala wa leta ha guhana athu ndola; uvi ana gubemba ndaga yene ha mago a mafumu a leta. (Lomo 13:2-4; Tito 3:1) Akulu ana gusambesa, nga ndo ana gukamba gujiya gula muthu wajiya gusala mu hungu nga ndo.

¹⁸ Tangua akulu ana gukhala mu komite ya gusambesa, ana gusambesa phamba ndaga jia mu nyuma. Ana gukalegela Biblia ha gujiya gula muthu muene wabalumuna mutshima nga ndo. Gula gabalumuinego mutshima, wana guzolewa mu hungu, gungima akulu ana guhana kominike mu hungu. (1 Kol. 5:11-13) Gula phangi muene wabalumuna mutshima, anago gumuzola mu hungu. Uvi akulu adi naye gumuwambela egi mbagashigo mukhala nu luendu  lua guheta ginemo mu hungu ivo yavula nga ndo lujingu luenji luagasue. Handaga akulu adi nu ginemo gia gubamba ana, adi naye guwambela mvuaji mu hungu egi an’awo adi naye gumonesa gutema tangua adi hehi nenji. Gula akulu atemesa mvuaji, ashigo naye gutanga majina a athu ako muthu muene wazangelele.

19-22. Itshi mvuaji jidi naye gutshita ha gubamba an’awo? (Tala gifuanesa holu dia gizula.)

¹⁹ Akuatshi adi thomo nu gimemo gia gubamba ana hagula a athitshigo gubola? Mvuaji. * Ana adi kado ga ndando, ‘gishimbigo Yehowa wana guhana.’ (Ngi. 127:3) Enue mvuaji, Yehowa wamihanele ginemo gia gubamba an’enu. Itshi mudi naye gutshita ha gubamba an’enu, hagula athu a azangela ndo?

²⁰ Thomo, kamba gujiya ndaga jiatadila milonga ya guzangela ana. Kamba gujiya gula athu atshi ana guzangela ana, nu maluholo ana gukalegela. Kangula meso gu ingonza yajiya gubuila ana. (Ish. 22:3; 24:3) Jiya egi mu mahugo avula athu ana guzangela ana akhala athu mona wana gujiya muabonga.

²¹ Ya mbadi, khala muta maga muabonga nu an’aye. (Mikh. 6:6, 7) Yakotelesa egi udi naye guategelela muabonga. (Yak. 1:19) Jiya egi ana anyi azangelewe ana guvua woma ha guwambela athu ndaga jiawo. Ana guvua woma egi athu mbashigo mutshigina egi amukuatshi gu ngolo, nga ndo muthu wa mukuatshi gu ngolo wamutunyisa ha guzuela. Gula wamona gifua ndaga imoshi yabola yabuila an’aye, ahule mihu mu luholo luabonga, ategelele tangua adi muzuela.

²² Ya thathu, longesa an’aye. Awambele ndaga yatadila gubungisa muila mu gudivua nu ivo yawo. Awambele ndaga adi naye guzuela nu gutshita gula muthu mumoshi waakuata mu luholo luabola. Kalegela malongo organizasio wa Yehowa wana guhana adi mumonesa luholo lua gubamba ana.—Tala galuanda “ Dilongese Aye Hakhaye, Longesa nji An’aye.”

23. Luholo lutshi tuana gutadila khadilo dia guzangela mona? Longo dialandula mbadihana mvutu gu muhu utshi?

²³ Esue Matemue a Yehowa, tuana gutadila khadilo dia guzangela mona gifua ndaga yabola nu ya khuta. Luholo tuana gutuamezewa gu mukhuala wa Klisto, tuana gubamba ndo muthu udi naye gukuatewa nga guhanewa ndola mukunda nu khadilo dia guzangela ana. Uvi, itshi tudi naye gutshita ha gukuatesa phangi mumoshi wa yala nga wa mukhetu wazangelewe? Mbatuheta mvutu ya muho owu mu longo dialandula.