LONGO DIA 22
Kudisa Luholo Luaye lua Gulonguga!
‘Kambenu gujiya ndaga jiabalega ndando.’—FILI. 1:10.
LUNGIMBO 35 ‘Kambenu Gujiya Ndaga Jiabalega Ndando’
NDAGA JIDI MU LONGO EDI *
1. Mukanda natshi aphangi ako anago gutshigina gulonguga?
MANGINO, athu avula ana gutshita mudimo wakola ha guheta makuta a gujingila. Aphangi etu avula ana gutshita matangua avula gu mudimo ha guheta ima ya gujingila mukunda nu fami jiawo. Ako ana gubalegesa nji matangua avula masugu agasue ha guya gu mudimo nu ha guvutuga gu inzo. Ha gukuatesa fami jiawo, ako ana gutshita midimo ya mago yakola. Mu ngueze, aphangi ene a mala nu a akhetu ana gukhala a guhuila muavula! Luholo ana guhuila, anago gukhala luko nu ngolo ha gulonguga.
2. Kumbi ditshi wana guheta tangua dia gulonguga?
2 Tudi naye gukamba tangua dia gulonguga—gulonguga muabonga—Mbimbi ya Nzambi nu mikanda yetu. Gulonguga guetu hakhetu mbagutukuatesa ha gukhala nu ufuta wabonga nu Yehowa, nu ha guheta monyo wa mayilago! (1 Tim. 4:15) Athu ako ana guzuga nu gimenegena giagasue tangua matululu ashigo, nu tangua muto udi ula tuluu. Uvi ako ana gutomba fundo dishigo nu matululu mu ngueze ha gulonguga nu gutangigiza ndaga jia mu nyuma mu minuta yazonda.
3-4. Usombegeshi utshi watshitshiwe gu mutango wa malongo ana guzola Muhiga, nu mukunda natshi?
3 Yadiago, wajiya guzuela egi idi ndaga yabonga ha guheta tangua dia gulonguga. Uvi itshi tudi naye gulonguga? Wajiya guzuela egi ‘malongo a gutanga adi avula. Ishigo yaleba ha guatanga agasue.’ Aphangi ako azudile desizio dia gutanga malongo agasue a mu nyuma, uvi ako anago guheta tangua dia guatanga. Hunji dia Akulu Atuameji diana gujiya ndaga eyi muabonga. Gishina giene, azudile desizio dia guzondesa mutango wa malongo a gulonguga ana guzolewa mu mikanda nu mu Internet.
4 Ha gufezegesa, Annuaire des Témoins de Jéhovah anago guzoga luko, handaga ba eksperianse a gikhesa akhalele muzoga muene ana guzolewa mu jw.org® nu mu programe ya Fili. 1:10) Tuzuelelenu ndaga tuajiya guhaga ha fundo dia thomo nu gubonga tuajiya guheta gula tudi mulonguga hakhetu.
JW Télédiffusion®. Inzo Yaleha ya Mutaledi nu Réveillez-vous ! ya athu agasue yana guzolewa phamba mahugo thathu mu givo. Usombegeshi owu wakalegewego hagula tuhete tangua diavula dia gutshita midimo yetu hakhetu. Azudile desizio diene ha gutubembela tangua diavula hagula tushite ‘ndaga jiabalega ndando.’ (NDAGA UDI NAYE GUSHA HA FUNDO DIA THOMO
5-6. Mikanda tshi tudi naye gulonguga muabonga?
5 Ndaga jitshi tudi naye thomo gulonguga? Tudi naya gulonguga Mbimbi ya Nzambi lusugu nu lusugu. Mutango wa verse jia gulonguga Biblia mu gudibungisa gua mukatshi dia phoso wazondesewe hagula tuhete tangua diavula dia gutangigiza mu ndaga tuatangi nu gutshita ba recherche. Felela dietu dishigo naye gukhala dia gutanga ha gumanesela verse jiahanewa mu phoso yene, uvi tudi naye gubemba egi, malongo a Biblia akuate mitshima yetu, nu tusuene hehi nu Yehowa.—Ngi. 19:14.
6 Ndaga itshi iko tudi naye gulonguga muabonga? Yadiago, tudi naye gulondega Inzo Yaleha ya Mutaledi, nu gulonguga gua Biblia mu hungu nu ndaga jiko jia mu gudibungisa gua mukatshi dia phoso. Tudi naye nji gutanga malongo agasue adi mu Inzo Yaleha ya Mutaledi ya athu agasue nu mu Réveillez-vous !
7. Tudi naye guleba muila gula tushigo nu luholo lua guheta malongo adi gutuhanewa mu njila ya site Internet yetu nu mu JW Télédiffusion?
7 Wajiya guzuela egi, ayi tuajiya guyitanga ‘uvi itshi tuajiya guzuela mukunda malongo ana guzoga mu site jw.org, nu mu JW Télédiffusion? Adi avula diago!’ Tufezegese: Restaurant imoshi idi nu ima ya gudia yabonga nu yavula. Uvi athu adi musumba ajiyilego gulola ima yagasue idi mudigiwa. Adi naye gutomba phamba ima idi gutuama diawo. Luholo lumoshi, gula ushigo nu luholo lua guheta ima ya gudia ya mu nyuma yagasue idi gutuhanewa mu njila ya Internet, ulebigo muila. Wajiya gutala nga gutanga malongo udi nawo. Henyaha tuzuelelenu gula gulonguga guakotelesa itshi, nu ndaga tuajiya gutshita hagula tuhete gubonga gua gulonguga guetu hakhetu.
TUDI NAYE GUSHA NGOLO HA GULONGUGA!
8. Itshi tudi naye gutshita ha gulondega Inzo Yaleha ya Mutaledi, nu luholo lutshi gutshita ngenyi mbagugubatela gubonga?
8 Tangua udi mulonguga, haga matangi mu ndaga udi mutanga hagula uzule malongo. Utangigo muphushi hagula umanesele nga ha guhaga mifundunda fundo didi mvutu. Tangua udi mulonda Inzo Yaleha ya Mutaledi, tanga thomo mbimbi jidi ha fundo diasonegewa egi ndaga jidi mu longo edi. Luko, tanga muto wa lumene wa longo diene, nu tumito tua mene nu mihu ya guvutugila. Gungima tanga longo diene muabonga, mage-mage. Tala muabonga mbimbi jidi mu paragrafe jidi mumonesa ndaga paragrafe idi muzuelela, mbimbi jiene jiana gukhala muavula mu gisendeselo gia paragrafe. Tangua udi mutanga longo diene dia mudidi, kamba gujiya gudivua gudi mukatshi dia paragrafe nu tumito tua mene nu ndaga longo diene didi muzuelela. Sonega mbimbi nu malongo anyi khenji wajiyilego muabonga hagula utshite ba recherche gungima.
9. (a) Mukunda natshi nu luholo lutshi tudi naye gutala muabonga verse tangua tudi mulonguga Inzo Yaleha ya Mutaledi? (b) Ha gutadila Yoshua 1:8, itshi tudi naye nji gutshita tangua tudi mutanga verse?
9 Gulonguga Inzo Yaleha ya Mutaledi mu gudibungisa guetu gua mu hungu, guana Yoshua 1:8.
gutukuatesa ha gukotelesa malongo a Biblia. Hene, tanga verse jia Biblia jiahanewa, uvi tala muabonga jinyi mbajitangewa tangua mbamulonguga longo diene. Tala muabonga gudivua gudi mukatshi dia matangi a ndando a paragrafe nu matangi a verse jia Biblia jiahanewa ha gutanga. Luko, tangigiza muavula verse udi mutanga, nu tangigiza nji luholo wajiya gujikalegela mu monyo waye.—TangaMvuaji, dijigenu an’enu luholo lua gulonguga (Tala paragrafe 10) *
10. Ha gutadila Hebelu 5:14, mukunda natshi mvuaji jidi naye gulongesa an’awo luholo lua gulonguga nu gutshita ba recherche tangua adi mutshita gukombelela gua mu fami?
10 Yadiago, mvuaji jiana gutshigina egi phoso yagasue Gukombelela gua mu Fami gukhale tangua dia gusuanguluga mukunda nu an’awo. Ngatshima mvuaji jidi naye gulondega ndaga imoshi ngenyi mbaazuelela mu Gukombelela gua mu Fami, uvi ashigo naye gukamba gulondega ndaga jiakoma jia gutshita phoso jiagasue. Mu tangua diene, muajiya gutala programe ya JW Télédiffusion nga gutshita ndaga iko gifua gufezegesa gutunga masuwa a Nowa, uvi idi nji nu ndando egi ana ajiye luholo adi naye gulonguga. Ha gufezegesa, adi naye gulonguga luholo lua gulondega gudibungisa gua mu hungu, nu luholo lua gutshita ba recherche gu mihu yana guahudiwa gu khalasa. (Tanga Hebelu 5:14.) Gula adi muheta tangua dia gulonguga gu inzo, mbayishigo mukhala lamba gudi ene ha gulandula malongo a mu gudibungisa gua mu hungu, a gu ba asamble anyi anago gukhala nu jivideo. Mvuaji jidi naye gutadila ivo ya ana nu umuthu wawo ha gujiya gula matangua gutshi adi naye gubalegesa nawo ha gulonguga.
11. Mukunda natshi idi nu ndando ha gumonesa athu tuana gulongesa Biblia luholo lua gulonguga muabonga ene hakhawo?
11 Athu tuana gulongesa Biblia adi naye nji gujiya luholo lua gulonguga. Tangua ana gusendesa gulonguga Biblia, tuana gusuanguluga ha gumona luholo ana gudilondega ha gulonguga Biblia gifua gusha mifundunda mu mvutu nga gulondega gudibungisa gua mu hungu. Uvi tudi naye guakotelesela luholo adi naye gutshita ba recherche nu luholo lua gulonguga muabonga gula adi hakhawo. Ngenyi, gula atagana nu ndaga, ha fundo dia gutoga muphushi ukuateshi gudi aphangi ako mu hungu, ene hakhawo mbatshita ba recherche mu mikanda yetu ha guheta malongo abonga ajiya guakuatesa.
JIYA MUKUNDA NATSHI UDI MULONGUGA
12. Mafelela tshi tuajiya gukhala nawo tangua tudi mulonguga?
12 Gula wanago gutshigina gulonguga,
utangizago egi mbawushigo musuanguluga nga hazonda nu gulonguga. Uvi wajiya gusuanguluga. Wajiya gusendesa gulonguga phamba tangua diazonda, gungima wasendesa gulezela matangua mage-mage. Jiya mukunda natshi udi mulonguga. Tangua tudi mulonguga, felela dietu dia thomo didi naye gukhala dia gusuena hehi nu Yehowa. Ndaga tuajiya gutshita muphushi idi guhana mvutu gu muhu muthu mumoshi watuhudile nga ndo gutshita ba recherche gu ndaga imoshi tudi mutagana nayo.13. (a) Monesa ndaga muvuala udi naye gutshita ha gukotelesa gutshigina guenji gu khalasa. (b) Luholo lutshi wajiya gukalegela longo didi mu Kolosai 4:6?
13 Gula udi muvuala nu wana guya gu khalasa, yajiya gukhala egi mafuta aye a khalasa ana gutshigina longo dia évolution. Luholo Biblia yana gulongesa, wajiya gukhala nu funu ya guakotelesela egi Nzambi watufigile, uvi ushigo mujiya luholo lua guyitshita. Ndaga yene idi mutoga egi ulonguge! Wajiya gudishila mafelela mbadi: (1) gukolesa gutshigina guaye egi Nzambi wafugile ima yagasue nu (2) gukudisa luholo luaye lua gulongesa muabonga giamatshidia gia Biblia. (Lomo 1:20; 1 Phet. 3:15) Wajiya gudihula egi: ‘Ndaga jitshi mafuta a khalasa ana guzuela jidi mumonesa egi ana gutshigina longo dia évolution?’ Gungima tshita ba recherche muabonga mu mikanda yetu. Ngenyi, yajiya gukhala ndaga yaleba ha gukotelesa gutshigina guaye gubalega luholo wakhalele mutangiza. Athu avula ana gutshigina longo dia évolution handaga a alongesele nadio gudi athu ana gunemesa ene. Gula waheta gijiyishilo gimoshi nga iyadi ya guamonesa egi mufugi wakhala guene, wajiya guyikalegela ha gukuatesa muthu udi mutshigina gujiya giamatshidia.—Tanga Kolosai 4:6.
KUDISA NZALA YAYE YA GULONGUGA
14-16. (a) Itshi wajiya gutshita ha gulonguga ndaga jiavula jiatadila mukanda wa Biblia wanago gujiya muabonga? (b) Kotelesa luholo verse jiahanewa mu références marginales jiajiya gugukuatesa ha gukotelesa muabonga mukanda wa Amosa. (Tala nji galuanda “ Malongo a Biblia adi a Giamatshidia!”)
14 Tangiza gale egi mu gudibungisa gua mu hungu gua phoso idi muza, mbatulonguga mukanda umoshi mukatshi dia tumikanda tuazonda-zonda tua ba profete. Ndaga ya thomo wajiya gutshita idi gukudisa nzala yaye ya gujiya ndaga jiavula jiasonegele profete muene. Luholo lutshi wajiya guyitshita?
15 Wajiya thomo gudihula egi: ‘Ndaga itshi ngudi mujiya mukunda nu muthu wasonegele mukanda owu? Wakhalele nanyi, Wakhalele mujinga gui nu mudimo utshi gakhalele mutshita?’ Gula wajiya nji lujingu lua muthu wasonegele mukanda wene, wajiya gukotelesa mukunda natshi profete muene watombele mbimbi nu ifezegeselo idi mu mukanda wenji. Ha udi mutanga Biblia, kamba mbimbi jiajiya gugukuatesa ha gujiya gula muthu wasonegele mukanda wene wakhalele muthu wa luholo lutshi.
16 Ya mbadi, gujiya tangua mukanda wene wasonegewe mbagugukuatesa muavula. Ha gujiya, tala “Mulongo wa Majina a Mikanda ya Biblia” idi gungima dia gizula gia La Bible. Traduction du monde nouveau. Luko wajiya gutala tablo didi mumonesa majina a ba profete nu mafumu mu Appendice A6. Gula mukanda wa Biblia udi mulonguga udi muzuelela profesi, kamba gujiya luholo athu akhalele mujinga hasonegewe mukanda wene. Makalegelo tshi abola profete wawambelele athu ha gubemba? Akuatshi ajingile sungi imoshi nu profete muene? Ha gukotelesa ndaga eji jiagasue muabonga, udi naye gutanga mikanda iko ya Biblia. Tufezegese gale. Ha gukotelesa ndaga jiakalegewe mu sungi ya profete Amosa, udi naye gutanga verse jia mikanda ya 2 Mafumu nu 2 Gudilanduluila jidi jia gusonega mu références marginales ya Amosa 1:1. Luko, wajiya gutala ndaga jiasonegele Hoshea, wajingile sungi imoshi nu Amosa. Gula watanga mikanda iko ya Biblia, mbawukotelesa muabonga luholo athu akhalele mujinga mu sungi ya profete Amosa.—2 Maf. 14:25-28; 2 Gudi. 26:1-15; Hosh. 1:1-11; Am. 1:1.
KAMBA GUJIYA MUABONGA NDAGA JIAZONDA-ZONDA
17-18. Hana ifezegeselo idi mu paragrafe nga giaye hakhaye, idi mumonesa egi gutshita ba recherche mu ndaga jidi mumonega gifua jiazonda-zonda guajiya gugusuanguluisa muavula tangua udi mulonguga.
17 Tangua tudi mutanga Biblia, tudi naye gukhala nu nzala yakola ya gujiya ndaga jiavula. Tangiza gale egi udi mutanga profesi idi mu mukanda wa Zakaliya mukhapho 12 udi muzuelela gufua gua Masiya. (Zak. 12:10) Verse 12 idi muzuela egi: ‘Fami ya Natana’ mbayidila nu mbayivua gikenene giavula tangua Masiya mbawufua. Ha fundo dia gubalega ndaga jiene mu phushi, wajiya gudihula egi: ‘Gudivua gutshi gudi mukatshi dia inzo ya Natana nu Masiya? Itshi ngajiya gutshita ha gujiya ndaga jiavula?’ Wajiya gutshita ba recherche. Référence marginale yagutuma mu 2 Samuele 5:13, 14, fundo adi muzuela egi Natana wakhalele muna Fumu Davidi. Iko idi gugutuma mu Luka 3:23, 31, idi mumonesa egi Yesu wakhalele mujigulu wa Natana yago wakhalele khakha wa Mariya. (Tala note jia gulonguga jia “Yozefe, muna Heli,” jidi mu Luka 3:23.) Gutshita ngenyi guajiya gugusuanguluisa! Wana gujiya egi profesi jiazuelele egi Yesu mbawuvalewa mu fami ya Davidi. (Mat. 22:42) Uvi Davidi wakhalele nu ana gubalega 20. Wajiyilego guyituga luholo Zakaliya wazuelele egi enya fami ya Natana akhalele naye gudila muavula mukunda nu gufua gua Yesu ba?
18 Tuzuelele gifezegeselo giko. Mukhapho wa thomo wa Luka udi muzuela egi muanjelo Gabriele wayile mutala Mariya ha gumuwambela ndaga jiatadila mona Mariya mbawuvuala: ‘Muene mbawukhala wakoma, mbawutamegewa egi Mun’a Nzambi wa Gudinyinyiga, nu Yehowa Nzambi mbawumuhua nguasa ya ufumu ya sh’enji Davidi, muene mbawuhinyina gifua Fumu mu giphuta gia Yakoba ivo nu ivo.’ (Luka 1:32, 33) Yajiya gukhala egi tuana gutadila phamba mbimbi jia thomo jia Gabriele, jidi mumonesa egi Yesu mbawutamegewa egi “Mun’a Nzambi wa Gudinyinyiga.” Uvi Gabriele wazuelele luko egi Yesu ‘mbawuhinyina gifua Fumu.’ Hene tuajiya gudihula egi luholo lutshi Mariya wakotelesele mbimbi jia Gabriele. Watangijile egi Gabriele wazuelele egi Yesu mbawubua fumu gu Isalele ha fundo dia Fumu Helode, nga ha fundo dia mafumu ako mbaaza gungima dia Helode ba? Gula Yesu mbawubua fumu yakotelesa egi, Mariya mbawubua gin’a fumu, luko enya fami yenji mbajinga gu inzo ya ufumu. Uvi Biblia yanago guzuela egi Mariya wawambelele Gabriele ndaga ya luholo elu; khenji tutangele ndo egi Mariya watogele fundo dia lutumbu mu Ufumu, luholo alandudi mbadi a Yesu amutogele. (Mat. 20:20-23) Ndaga eji jiagasue jidi gutukuatesa ha gujiya egi Mariya wakhalele mukhetu wagudibulumuisa!
19-20. Luholo Yakoba 1:22-25 nu 4:8 idi guyimonesa, mafelela atshi tudi naye gukhala nawo tangua tudi mulonguga?
19 Tujimbilago egi, tuana gulonguga Mbimbi ya Nzambi nu mikanda yetu hagula tusuene hehi nu Yehowa. Tuana gutshigina nji gujiya gula tudi ‘athu a luholo lutshi’ nu usombegeshi utshi tudi naye gutshita ha gusuanguluisa Nzambi. (Tanga Yakoba 1:22-25; 4:8.) Gula tuatshigina gusendesa gulonguga, tudi naye gutoga Yehowa nyuma yenji ha gutukuatesa. Tudi naye gumutoga ukuateshi hagula tuhete gubonga gua ndaga tudi mutanga nu ha gujiya usombegeshi tudi naye gutshita mu lujingu luetu.
20 Mukut’etu agasue tukhale gifua muthu wa Nzambi udi muzuelewa gudi muyimbi wa ngimbo egi: ‘Wana gusuanguluga ha gutumagela mikhuala ya Yehowa, wana gutanga mikhuala Yenji phipha nu muanya. . . . Ndaga jiagasue jidi mutshita muene mbajibinga.’—Ngi. 1:2, 3.
LUNGIMBO 88 Ngudijige Njila Jiaye
^ par. 5 Yehowa wana gutuhana nu gisemo giagasue malongo avula a gutanga, a gulonguga, nu a gutala mu njila ya video. Longo edi diza gutukuatesa ha gujiya itshi tudi naye gulonguga, diza luko mumonesa ndaga tuajiya gutshita ha guheta gubonga tangua tudi mulonguga hakhetu.
^ par. 61 UKOTELESHI WA IFUANESA: Mvuaji jidi mulongesa ana luholo lua gulondega Inzo Yaleha ya Mutaledi ya gulonguga mu gudibungisa gua mu phoso.
^ par. 63 UKOTELESHI WA IFUANESA: Phangi mumoshi wa yala udi mutshita ba recherche atadila Amosa. Hadi muene mutanga nu gutangigiza mene jia Biblia, udi mumona ifuanesa ya mene jiene mu matangi enji.