Profesi jiko jidi mu tablo edi jidi muzuelela ndaga jiakalegewe mu tangua dimoshi diene. Jiana gumonesa diago egi tudi mujinga mu ‘masugu a gisugishilo.’—Dan. 12:4.

• Ba Verse Yat. 11:7; 12:13, 17; 13:1-8, 12

  Profesi: ‘shitu ya gishitu’ yana hinyina athu ha mavu ivo gubalega 3 000. Mu masugu a gisugishilo, muto wenji wa sambadi wanamenesewe. Gungima, muto wene wawelugile, “athu agasue a ha mavu” alanduile shitu yene. Satana wakalegele shitu eyi ‘ha guluisa enya gijila anyi asalele.’

  Gutagenesewa: Gungima dia mvula ya Noa, ba guvernema a athu asendesele gulumbugila Yehowa. Gungima dia ivo 3 000 nu holu, guvernema umoshi wa ngolo jiavula mu jina dia Angleterre, watotesele ngolo jienji mu tangua dia Ita ya thomo ya ha Mavu agasue. Wadibungishile nu États-Unis ha guheta luko ngolo. Hene, mu masugu a gisugishilo, Satana wakalegele ba guvernema agasue a politiki a ha mavu ha guluisa akombeledi a Nzambi.

• Ba Verse Dan. 11:25-45

  Profesi: Mu masugu a gisugishilo, fumu ya gu nord nu fumu ya gu sud ana gudiluisa.

  Gutagenesewa: Allemagne akhalele muluisa Angleterre nu États-Unis. Mu 1945 Union Soviétique nu ifutshi yakhalele guyikuatesa, yabuile fumu ya gu nord. Mu 1991, Union Soviétique yabuile, gungima Russie nu ifutshi yana gumukuatesa yabuile fumu ya gu nord.

• Ba Verse Yesh. 61:1; Mal. 3:1; Luka 4:18

  Profesi: Yehowa watumine “mutumiwi” ha ‘gulonda njila’ gutuama egi Ufumu wa Masiya usendese guhinyina. Athu ene asendesele ‘gulongesa lukuma luabonga gudi athu a gudibulumuisa.’

  Gutagenesewa: Sendese mu 1870, C. T. Russell nu mafut’enji, alongugile Biblia muavula ha gujiya diago ndaga Biblia yana gulongesa. Mu 1881, akotelesele egi idi diago nu ndando egi akombeledi a Nzambi alongese lukuma luabonga. Asonegele mene jiavula mu mikanda gifua eji: “Recherchons 1 000 prédicateurs” nu “Oints pour prêcher.”

• Ba Verse Mat. 13:24-30, 36-43

  Profesi: Mbalagaji yakunyile mayiji abola mu dihia dia ble, mayiji ene akudile nu ashitshile ble uu nu hajile tangua dia gumuna; gungima, akhaphumuine mayiji abola nu ble.

  Gutagenesewa: Sendese mu 1870, tuasendesele gumona gudisha guakhalele mukatshi dia Aklisto a giamatshidia nu a mambo. Mu masugu a gisugishilo, Aklisto a giamatshidia akhala a gudibungisa mu hungu nu adikhaphele gale nu gikombelelo gia mambo.

• Ba Verse Dan. 2:31-33, 41-43

  Profesi: Ikanzo ya utadi nu wuma ya gisongo ginyi giakalegewe nu utadi wa maluholo a gudisha.

  Gutagenesewa: Wuma udi mumonesa athu agasue a ha mavu ana gutuamezewa gudi Puissance Mondiale Anglo-Américaine nu anago guyitumagela. Mukunda nu athu ene, ba guvernema awa anago gukhala nu luholo lua gukalegela ngolo jiawo gifua utadi.

• Ba Verse Mat. 13:30; 24:14, 45; 28:19, 20

  Profesi: ‘Ble’ idi mubungishiwa mu “mukala”, nu ‘muhiga wafubidila nu watema’ wahagewa holu dia ‘enya mudimo.’ Mudimo wa gulongesa “lukuma luabonga lua Ufumu” wasendesa gukalegewa ‘ha mavu agasue.’

  Gutagenesewa: Mu 1919 muhiga wafubidila wahagewe holu dia akombeledi a Nzambi. Sendese mu tangua diene, alongogi a Biblia akalegele mudimo wa gulongesa muavula lume. Mangino, Matemue a Yehowa adi mulongesa mu ifutshi gubalega 200 nu adi muzola mikanda yana gukotelesa Biblia mu mazuelelo gubalega 1 000.

• Ba Verse Dan. 12:11; Yat. 13:11, 14, 15

  Profesi: Shitu ya gishitu ya mbinga mbadi idi mutuma athu ha gulonda ‘gisongo gia shitu ya gishitu’ nu idi guyihana ‘muhehe wa monyo.’

  Gutagenesewa: Puissance Mondiale Anglo-Américaine yazolele Société des Nations. Ifutshi iko yanginyinyine nji mu organizasio yene. Sendese mu 1926 uu nu mu 1933, fumu ya gu nord wakhalele nji mukatshi dia ifutshi yakhalele mu Société des Nations. Athu akhalele mutangiza egi Société des Nations yajiya guvutula guhuima ha mavu, ndaga idi phamba Ufumu wa Nzambi wajiya gutshita; nu ana gutangiza nji ngenyi mukunda nu Nations Unies (ONU).

• Ba Verse Dan. 8:23, 24

  Profesi: Fumu mumoshi wana monega gu meso gifua wabala udi ‘mushiya athu mu luholo lua gushimana.’

  Gutagenesewa: Puissance Mondiale Anglo-Américaine yashiyile gale athu avula nu yazangelele gale ima yavula. Tufezegese gale, mu tangua dia Ita ya mbadi ya ha Mavu agasue, États-Unis yambile bombe mbadi mu ifutshi yakhalele nu umbalagaji nu Angleterre nu États-Unis, bombe jiene jiazangelele diago ima yavula gubalega.

• Ba Verse Dan. 11:31; Yat. 17:3, 7-11

  Profesi: Shitu ya ‘benga’ ya gishitu idi nu mbinga kumi idi muzoga mu wina ushigo nu gisugishilo, nu yene idi fumu ya nage. Mukanda wa Danyele udi mutamega fumu muene egi ‘gima gia usala gidi mubata gufua.’

  Gutagenesewa: Société des Nations yabuile mu tangua dia Ita ya mbadi ya ha Mavu agasue. Gu ngima dia ita yene, ONU “wazolewe.” Athu ana guhana lutumbu gudi ONU gifua muakhalele ene muhana Société des Nations, ha fundo dia guhana Ufumu wa Nzambi. ONU wene mbawushiya ikombelelo yagasue.

• Ba Verse 1 Tes. 5:3; Yat. 17:16

  Profesi: Ifutshi mbayizuela egi ‘tudi mu guhuima nu ubambi,’ nu “mbinga kumi” nu “shitu ya gishitu” mbajiluisa “mukhetu wa thambi” nu mbajimushiya. Gu ngima, ifutshi yagasue mbayishiyiwa.

  Gutagenesewa: Ifutshi mbayitangiza egi yahaga guhuima nu ubambi ha mavu. Ifutshi idi mukuatesa ONU, mbayishiya ndaga jiatadila gikombelelo gia mambo. Ndaga eyi mbayikhala gisendeselo gia lamba dia kola. Lamba diene dia kola mbadisuga tangua mavu a Satana mbaashiyiwa gu Armaguédon.

• Ba Verse Ezek. 38:11, 14-17; Mat. 24:31

  Profesi: Gogi mbawungina mu gifutshi gia akombeledi a Nzambi. Gungima, anjelo mbaabungisa ‘athu atombewe.’

  Gutagenesewa: Fumu ya gu nord mbawudibungisa hamoshi nu ba guvernema a ha mavu ha guluisa akombeledi a Nzambi. Tangua ita eyi mbayisendesa, Aklisto ambiwe maji mu nyuma anyi mbaakhala hashi mbaabungishiwa mu dilu.

• Ba Verse Ezek. 38:18-23; Dan. 2:34, 35, 44, 45; Yat. 6:2; 16:14, 16; 17:14; 19:20

  Profesi: “Muthu wakhalele holu” dia ‘gabalu gaphega’ mbawuzoga ‘ha gubinga’ nu gushiya Gogi nu masuta enji. ‘Shitu ya gishitu mbayimbiwa mu kianga gia tshuya.’ Seso diakoma mbadimuanga gisongo giakoma.

  Gutagenesewa: Yesu, Fumu ya Ufumu wa Nzambi, mbawuza hamoshi nu Aklisto 144 000 ambiwe maji mu nyuma, nu anjelo ha guhuluisa akombeledi a Nzambi, nu ha gushiya ifutshi yagasue. Mbayikhala gisugishilo gia mavu awa a Satana.