1-2. a) Ndaga itshi yasonegele muthu mumoshi? b) Itshi tuza muzuelela mu longo edi?

MANGINO athu avula ana zuela egi anasha gutshigina gudi Yesu, uvi ene ana tumagela ndo ndaga jialongesele muene. (2 Tim. 4:3, 4) Muthu mumoshi wasonegele egi: “Nga tuanakhala nu muthu mumoshi mangino mukatshi dietu wajiya guzuela ndaga gifua luholo luakhalele muzuela ‘Yesu’. . . , tuajiya gumutuna gifua luholo athu atunyile Yesu ivo 2 000 yabalega gale ba? . . . Mvutu ya athu avula yajiya gukhala egi: Ayi tuajiya gumutuna.”

² Tangua Yesu akhalele ha mavu, athu avula avuile malongo enji nu amonele ndaga jia gushimana jiakhalele mukalagala muene, uvi atunyile gusha gutshigina gudi muene. Mukunda natshi? Mu longo diabalega tuamonele ndaga nguana jiatumile athu ha gutuna Yesu mukunda nu ndaga jiakhalele muene muzuela nu gutshita. Henyaha tuzuelelenu nji ndaga jiko nguana. Tuza mumona nji mukunda natshi athu ana tuna alandudi a Yesu mangino nu luholo lutshi tuajiyilego gubemba nga gima gimoshi gitukange njila ha gukombelela Yehowa.

3. Ndaga itshi yatshitshile Yesu yatumine athu ako ha gumutuna?

³ Hakhalele Yesu ha mavu, wakhalele mubalegesa tangua nu athu a maluholo agasue. Wakhalele mudia hamoshi nu enya umonyi nu enya ngolo, wakhalele nji mubalegesa tangua nu phutu nu athu akhalele mumonega gifua athu a githuhu. Wakhalele nji gudisha ha fundo dia athu akhalele mumonega gifua ‘enya masumu.’  Athu ako akhalele gudizula nu ndando yavula akhalele mutuna Yesu mukunda nu ndaga jiakhalele mutshita muene. Ahudile alandudi a Yesu egi: “Mukunda natshi mudi mudia nu mudi munua nu afutshishi agitadi nu enya gubola?” Yesu waavutudile egi: “Athu adi muabonga, ana kambago munganga, uvi athu adi mukata, ene ana kamba munganga. Ame ngajilego ha gutamega athu abonga, uvi ngajile ha gutamega enya gubola hagula abalumune mitshima yawo.”—Luka 5:29-32, NWT.

4. Hagutadila profesi ya Yeshaya ndaga jitshi enya Yuda akhalele mujiya jiatadila Masiya?

⁴ Itshi mbimbi ya Nzambi yana zuela? Ivo yavula gutuama egi Masiya aze, profete Yeshaya wazuelele gutuama egi: ‘Athu avula mbaamutuna . . . yakhalele gifua atusuegele phala yenji, amuseguluile, tuamuzudile gifua muthu wa githuhu.’ (Yesh. 53:3) Profesi yazuelele egi “athu” mbatuna Masiya, ngenyi enya Yuda a mutangua dia Yesu akhalele mujiya egi Yesu mbawutunyiwa.

5. Luholo lutshi athu avula mangino ana tadila alandudi a Yesu?

⁵ Mangino tuana mona ndaga yene ba? Ayi. Atuameji a mangumba ana khala nu gusuanguluga guavula tangua athu ana khala nu ndando yavula nu enya umonyi nu athu ana zudiwa gifua enya ndunge a ha mavu awa anaza gudibungisa nawo mu mangumba awo. Mafumu a mangumba ana tshigina athu ene ngatshima makalegelo awo nu luholo luawo lua gujinga lushigo gudivua nu mikhuala ya Nzambi. Uvi atuameji a mangumba ana segulula Matemue a Yehowa anyi ana khala nu makalegelo abonga handaga enya ha mavu awa ana guazula gifua ashigo nu ndando. Gifua muazuelele Phaula, Nzambi watombele athu anyi ‘ana monega gifua ashigo nu ndando.’ (1 Kol. 1:26-29) Uvi gudi Yehowa akombeledi enji agasue a gujinginyina anakhala nu ndando yavula.

6. a) Ndaga jitshi jiazuelele Yesu mu Matayo 11:25, 26? b) Luholo lutshi tuajiya gulandula gifezegeselo gienji?

⁶ Itshi yajiya gutukuatesa hagula gutshigina guetu gulebigo? (Tanga Matayo 11:25, 26.) Tushigo naye gubemba egi luholo athu a ha mavu awa ana tadila akombeledi a Nzambi, lutulebese muila. Tudi naye gujiya egi Yehowa wana kalegela phamba athu a gudibulumuisa ha gutshita gutshigina guenji. (Ngi. 138:6) Tudi naye gutangigiza ndaga jiavula jiakalegele Yehowa mu njila ya athu anyi enya ha mavu awa ana mona gifua ashigo atema nu ashigo enya ndunge.

7. a) Mukunda natshi Yesu watamegele Afalese egi adi enya mambo? b) Ndaga itshi Afalese akalegele?

⁷ Yesu wamonesele nu gikhesa giagasue ndaga jia mambo jiakhalele mukalagala mafumu a ikombelelo a musugu yenji. Ha gufezegesa, wamonesele mambo a Afalese haphelo handaga ene akhalele gudisagesa muavula mu ndaga yatadila guweva mago hafundo dia gukuatesa mvuaji jiawo. (Mat. 15:1-11) Yajiya gukhala egi alandudi a Yesu a dihudile mukunda nu mbimbi jiazuelele muene. Hene amuhudile egi: “Udi mujiiya egi ndaga wazuedi jiahanyi Afalese khabu ba? Yesu waavutudile egi: ‘Mutshi wagasue udi wakunyiwego gudi Tata wami wa mu dilu mbawuvujiwa. Abembenu! Ene adi atuameji a ifofo. Gula gifofo gidi mutuameza gifofo na muko muyadi awo mbaabua mu wina.’ (Mat. 15:12-14) Ngatshima mafumu a mangumba avidile Yesu khabu, uvi muene gabembelego gulongesa giamatshidia.

8. Luholo lutshi Yesu wamonesele egi Nzambi wanago gutshigina ikombelelo yagasue?

⁸ Yesu wamonesele nji haphelo malongo a mambo a mafumu a ikombelelo. Yesu gazuelelego egi Nzambi wana tshigina ikombelelo yagasue. Wazuelele egi athu avula mbalandula njila yakoma idi mubata gu gufua, uvi phamba athu azonda mbalandula njila yakama idi mubata gu monyo. (Mat. 7:13, 14) Wamonesele  haphelo egi athu ako mbazuela egi ana kombelela Nzambi uvi mu guzuela guabonga anago gumukombelela. Wazuelele luko egi: “Temenyenu baprofete a mambo adi muza gudi enue gifua imeme, uvi mukatshi ene adi mbulu jidi nu nzala yakola. Mbamuajiyila gu mabundu awo.”—Mat. 7:15-20, NWT.

9. Malongo atshi a mambo Yesu wamonesele haphelo?

⁹ Itshi Mbimbi ya Nzambi yana zuela? Profesi ya Biblia yadiangele guzuela egi, Masiya mbawukhala nu gikhesa giavula mukunda nu inzo ya Yehowa. (Ngi. 69:9; Yone 2:14-17) Gikhesa giene giatumine Yesu ha gumonesa malongo nu ndaga jia mambo jiakhalele muzuela mafumu a ikombelelo. Ha gufezegesa, Afalese akhalele mutshigina egi monyo wana gufua ndo, uvi Yesu walongesele egi athu a gufua anakhala gifua athu adi gutulo. (Yone 11:11) Asadoke akhalele muzuela egi gufuzumuga guana khala ndo guene. Uvi Yesu wafuzumuine futa dienji Lazalo. (Yone 11:43, 44; Makal. 23:8) Afalese akhalele muzuela egi ndaga jiagasue jiana gutubuila nga tuana kalagala, jiana tuamezewa gu ngolo jimoshi ngenyi tuajiyilego gumona nga ndo Nzambi wana gujituameza. Uvi Yesu walongesele egi athu ene hakhawo ajiya gutomba ha gukombelela Nzambi nga ndo.—Mat. 11:28.

10. Mukunda natshi ndaga tuana longesa jiana tuma athu avula ha guvua khabu?

¹⁰ Mangino tuana mona ndaga yene ba? Ayi. Athu avula anago gututshigina handaga tuana kalegela Biblia ha gumonesa haphelo malongo a mambo ana longesa mafumu a mangumba. Mafumu a mangumba ana longesa egi Nzambi wana bishila athu abola mu kianga gia tshuya ha guahana ndola. Ana kalegela longo edi dia mambo ha guhinyina athu. Uvi esue akombeledi a Yehowa tuanakombelela Nzambi waguzumba. Tuana kuatesa athu ha gukotelesa egi longo edi diana khala dia mambo. Enya ikombelelo eyi ya mambo ana longesa nji egi monyo wana gufua ndo. Gula nga longo edi diana khala dia giamatshidia nga tuana khala ndo nu funu ya gufuzumuga. Gishina giene tuana kalegela Biblia ha gumonesa egi longo edi diana khala dia mambo. Ikombelelo ya mambo yana longesa egi ndaga jiagasue tuana kalagala jiadiangele gale gutombewa gudi Nzambi nga gudi ngolo jimoshi  ngenyi tuajiyilego gumona. Uvi esue tuana longesa egi muthu wagasue udi nu luendu luaguzula desizio dia gukombelela Nzambi nga ndo. Itshi mafumu a mangumba ana kalagala tangua tuana monesa malongo awa a mambo haphelo? Anavua khabu!

11. Hagutadila mbimbi jia Yesu jidi mu Yone 8:45-47, ndaga jitshi Nzambi ana toga akombeledi enji?

¹¹ Itshi yajiya gutukuatesa hagula gutshigina guetu gulebigo? Gula tudi muzumba giamatshidia, tudi naye gutshigina ndaga jianazuela Nzambi. (Tanga Yone 8:45-47.) Tushigo naye gubemba giamatshidia ngahazonda gifua muabembele Satana Diabulu. Tushigo naye gutshita nga ndaga imoshi ishigo gudivua nu Biblia. (Yone 8:44) Nzambi wana toga akombeledi’enji ha ‘gutuna ndaga jiabola’ nu ha ‘gujinginyina gu ndaga jiabonga’ gifua muatshitshile Yesu.—Lomo 12:9; Heb. 1:9.

12. Mukunda natshi gufua gua Yesu guatumine enya Yuda avula ha gumutuna?

¹² Ndaga itshi iko yatumine enya Yuda ako ha gutuna Yesu? Phaula wazuelele egi: ‘Esue tudi mulongesa ndaga yatadila Klisto washiyiwe ha mutshi wa lamba. Mbimbi eyi idi gikhakhuishilo gudi enya Yuda.’ (1 Kol. 1:23) Mukunda natshi enya Yuda avula atunyile Yesu luholo afuile ha mutshi wa lamba? Handaga mukunda nu ene, gufua gua Yesu ha mutshi wa lamba guamubuishile gifua nzangi nga muenya masumu, uvi ndo gifua Masiya.—Mikh. 21:22, 23.

13. Ndaga itshi athu atunyile Yesu akhalelego mujiya?

¹³ Enya Yuda anyi atunyile Yesu ajiyilego egi Yesu gatshitshilego nga ndaga imoshi yabola, amumbidile mambo nu amukalegele ndaga mu luholo luabola. Athu akhalele musophesa Yesu, amukalegelego ndaga mu luholo luatagana. Manzuji a tribunale ya koma ya enya Yuda adibungishile muphushi ha gusophesa Yesu. Atumagelego mikhuala yatadila gusophesa muthu. (Luka 22:54; Yone 18:24) Tangua manzuji avuile ndaga jiakhalele muzuela athu mukunda nu Yesu, ene nji asendesele guzuela ndaga jiabola mukunda nu muene. Hene ‘akambele luholo lua gumushiya’ uvi akhalelego mumona nga gishina gimoshi gia gumushiyila. Hene nganga-nzambi wakoma wa mbidile Yesu mambo egi wakhalele  mbundudi. Ndaga jiagasue jiakhalele muzuela ene jiakhalelego gudivua nu mukhuala. (Mat. 26:59; Mako 14:55-64) Tangua Yesu wafuzumugile gugufua, mafumu a nganga-nzambi ahanele ‘makuta avula a utadi wa siliva’ gudi masuta a enya Roma anyi akhalele mutadila malumba a Yesu. Aawambelele ha guzuela ndaga jia mambo ha gujiya mukunda natshi malumba akhalele awuhululu.—Mat. 28:11-15.

14. Ndaga itshi Mbimbi ya Nzambi yadiangele guzuela mukunda nu gufua gua Masiya?

¹⁴ Itshi Mbimbi ya Nzambi yana zuela? Enya Yuda a mutangua dia Yesu atangijilego nga hazonda egi Masiya udi naye gufua. Uvi Profesi yadiangele guzuela egi: ‘Muene wahanele monyo wenji, watangewe mukatshi dia athu abola. Wazanguile ginemo gia gubola gua athu avula, waazuelele ha gula gubola guawo gutotesewe.’ (Yesh. 53:12) Guakhalelego nga nu gima gimoshi giakhalele naye gutuma enya Yuda hagutuna Yesu ngatshima amufundjile egi wakalegele ndaga yabola diago nu luholo amushiyile.

15. Ndaga tshi Matemue a Yehowa ana tagana najio jinyi jiana tuma athu avula ha gututuna?

¹⁵ Mangino tuana mona ndaga yene ba? Ayi! Yesu wafundjiwe egi wakhalele mukalagala ndaga jiabola nu wakhalele mbundudi. Mangino nji Matemue a Yehowa adi mutagana nu ndaga jia luholo lumoshi. Tutadilenu gale ifezegeselo eyi. Gu États-Unis, sendese mu ivo 1930 uu nu mu 1950 tuasophele gale milonga yavula gu ba tribinale hagula tukhale mukombelela Nzambi mu guhuima. Manzuji ako akhalele muzuela ndaga jia mambo mukunda nu esue. Gu Québec mu gifutshi gia Canada mafumu a ikombelelo adibungishile ha gutshita yagasue hagula mudimo wetu wagulongesa ukangewe. Alongeshi avula akhalele mumbiwa mu mabologo handaga akhalele mulongesa lukuma luabonga luatadila Ufumu wa Nzambi. Gu Allemagne guvernema Nazi, yashiyile mavuala a mala avula akhalele nu gutshigina guakola. Mu ivo eyi yabalega, aphangi’etu avula a gu Russie ambiwe mu bologo handaga mafumu a leta ana zuela egi: Tudi enya “ndaga jiako kola” luholo tuana longesa athu Biblia. La Bible. Traduction du monde nouveau ya muzuelelo dia Russe ya tunyishiwe nu yana tamegewa egi mukanda wa “ndaga jiakola-kola” handaga yana khala nu jina dia Yehowa mukatshi.

16. Hagutadila 1 Yone 4:1, mukunda natshi tushigo naye guleba muila mu ndaga jia mambo jiana zuela athu mukunda nu Matemue a Yehowa?

¹⁶ Itshi yajiya gutukuatesa hagula gutshigina guetu gulebigo? Zula longo mu ndaga udi mutanga. Mu diskur dia Yesu holu dia mulundu, wawambelele athu akhalele gumutegelela egi: ‘Athu mbaamimbila mambo a luholo nu luholo.’ (Mat. 5:11) Mambo ene ana katuga gudi Satana. Wana tuma mbalagaji jietu ha guzuela ndaga jia mambo mukunda nu athu ana zumba giamatshidia. (Yat. 12:9, 10) Tudi naye gutuna ndaga jia mambo jiana zuela mbalagaji jietu. Tushigo naye gubemba egi mambo a luholo elu atulebese muila, atukange njila ha gukombelela Nzambi nga abolese gutshigina guetu.—Tanga 1 Yone 4:1.

17. Mu luholo lutshi ndaga jiabalegele gutuama egi Yesu afue jiatumine athu ako ha gumutuna?

¹⁷ Gutuama egi Yesu afue, wadigiwe gudi mupostolo wenji mumoshi mukatshi dia apostolo enji 12. Mu ngueze gutuama egi ashiyiwe apostolo enji agasue amulengele. (Mat. 26:14-16, 47, 56, 75) Yesu gadisageselego mukunda nu ndaga eyi handaga wadiangele guzuela gutuama egi ndaga jiene mbajikalegewa ngenyi. (Yone 6:64; 13:21, 26, 38; 16:32) Luholo apostolo a Klisto akalegele ndaga eji, yajiya gukhala egi athu ako azudile desizio dia ‘gutuna gubua alandudi a Klisto.’

18. Profesi jitshi jiatagenesewe gutuama egi Yesu afue?

¹⁸ Itshi Mbimbi ya Nzambi yana zuela? Ivo yavula gutuama egi Yesu aze ha mavu, Yehowa wadiangele guzuela mu mbimbi yenji egi Masiya  mbawudigiwa mu falanga 30 jia utadi wa siliva. (Zak. 11:12, 13) Wazuelele nji egi muthu mbawudiga Yesu mbawukhala mukatshi dia mafuta enji akola. (Ngi. 41:9) Profete Zakaliya wasonegele nji egi “shiya mubambi wa imeme, imeme imuangane.” (Zak. 13:7) Ndaga ya giamatshidia idi egi athu a mitshima yatagana ajiyilego gutuna Yesu mukunda nu ndaga eji jiakalegewe. Uvi adi naye gukolesa gutshigina guawo ha gumona luholo profesi eji jidi mutagenesewa.

19. Ndaga itshi akombeledi a giamatshidia ana jiya?

¹⁹ Mangino tuana mona ndaga yene ba? Ayi! Mu masugu etu, athu ako abembele gale gukombelela Yehowa ha gubua ba aposta. Ana tshita nji yagasue ha guzola athu ako mu giamatshidia. Ana zuela ndaga jiabola nu jia mambo mukunda nu Matemue a Yehowa mu internet, mu ba radio nga mu televizio. Akombeledi a giamatshidia ana bemba ndo egi ahuigiwe mu ndaga eji jia mambo, uvi ana jiya egi Biblia yadiangele guzuela egi ndaga jia luholo elu mbajikalegewa.—Mat. 24:24; 2 Phet. 2:18-22.

20. Hagutadila 2 Timote 4:4, 5 luholo lutshi tuajiya gutuna gubua mu muheto wa gulandula athu anyi abembele gale giamatshidia?

²⁰ Itshi yajiya gutukuatesa hagula gutshigina guetu gulebigo? Ha gukolesa gutshigina guetu, tudi naye gutanga Biblia lusugu nu lusugu, gusamba tangua diagasue nu gutshita mudimo watuhanele Yehowa. (Tanga 2 Timote 4:4, 5.) Gula tudi nu gutshigina, mbatuvuigo woma gula tuavua athu muzuela ndaga jiabola mukunda nu Matemue a Yehowa. (Yesh. 28:16) Guzumba guetu mukunda nu Yehowa, mukunda nu mbimbi yenji nu mukunda nu aphangi’etu a mala nu a akhetu, mbagutukuatesa ha gutuna gubua mu muheto wa gulandula athu anyi abembele gale giamatshidia.

21. Ngatshima athu avula mangino anatuna lukuma luabonga, uvi ndaga itshi tuajiya gushila mutshima?

²¹ Tangua diakhalele Yesu ha mavu, athu avula amutunyile uvi ako amutshiginyile. Mukatshi dia athu amutshiginyile guakhalele nji nu muenya Tribinale ya Koma ya enya Yuda nu ‘nganga-nzambi jiavula.’ (Makal. 6:7; Mat. 27:57-60; Mako 15:43) Mangino nji athu avula ana zula desizio dia gubua alandudi a Yesu. Mukunda natshi? Handaga ana jiya nu ana zumba giamatshidia gidi mu mbimbi ya Nzambi. Mbimbi ya Nzambi idi muzuela egi: ‘Athu ana zumba mikhuala yaye ana khala nu guhuima guavula gushigo nga gima giajiya gua khakhuisa.’—Ngi. 119:165.