1. Mukunda natshi wadihudile tangua wawambelele athu giamatshidia gia mu Biblia mu mbala ya thomo?

UDI muwunguluga luko tangua wakotelesele giamatshidia gidi mu Biblia ba? Ndaga walongugile mu Biblia jiakhalele jialeba diago ha gukotelesa. Wakhalele mumona gifua ndaga jiene jidi naye gusuanguluisa muthu wagasue gifua luholo jiagusuanguluishile. Wakhalele nji nu gutshigina egi ndaga jidi mu Biblia jiajiya guaakuatesa ha gukhala nu monyo wabonga mangino nu haguheta felela diatagana dia masugu adi muza. (Ngi. 119:105) Gishina giene wasuangulugile haguwambela mafuta aye nu enya fami yaye ndaga jiene jiatadila giamatshidia. Uvi gungima itshi yabuile? Wadihudile ha gumona egi avula mukatshi diawo atunyile ndaga wakhalele guawambela.

2-3. Hakhalele Yesu ha mavu luholo lutshi athu avula akhalele gumutadila? Luholo lutshi akhalele mutadila ndaga jiakhalele mulongesa muene?

² Tuajiyilego gudisagesa gula athu ako atuna ndaga tudi gualongesa. Hakhalele Yesu ha mavu watshitshile ndaga jiavula jiagushimana jiakhalele mumonesa egi Nzambi wamutumine. Uvi athu avula atshiginyilego ndaga jiakhalele mulongesa muene. Ha gufezegesa, Yesu wafuzumuine Lazalo. Yakhalele diago ndaga ya gushimana, mbalagaji jienji jiakhalelego nu luholo luagutuna ndaga yene. Uvi mafumu a enya Yuda atshiginyilego egi Yesu wakhalele Masiya. Adivile ha gushiya Yesu nu muene Lazalo!—Yone 11:47, 48, 53; 12:9-11.

³ Yesu wakhalele mujiya egi athu avula mbaashigo mutshigina egi muene wakhalele Masiya. (Yone 5:39-44) Wawambelele alandudi a Yone mubatiji egi: ‘Gusuanguluga gukhale gudi muthu  gashigo mumona nga gima gimoshi gudi ame giajiya gumukhakhuisa.’ (Mat. 11:2, 3, 6) Mukunda natshi athu avula akhalele mutuna Yesu?

4. Ndaga itshi tuza mumona mu longo edi?

⁴ Mu longo edi nu dinyi dialandula tuza mumona mukunda natshi athu avula a mu siekle ya thomo, akhalele mutuna gusha gutshigina guawo gudi Yesu. Tuza mumona nji mukunda natshi athu avula mangino ana tuna lukuma luabonga. Ndaga ya gubalega ndando idi egi tuza mulonguga ha gujiya mukunda natshi tudi naye gukhala nu gutshigina guakola gudi Yesu, hagula nga gima gimoshi gitukhakhuisago ha gubemba gukhala alandudi a Yesu.

5. Mukunda natshi athu ako akhalele mutangiza egi Yesu ajiyilego gukhala Masiya?

⁵ Athu avula akhalele mutuna Yesu mukunda nu dimbo dia kudile muene. Akhalele gawo mutshigina egi Yesu wakhalele mulongeshi wakoma nu wakhalele mukalagala ndaga jia gushimana. Uvi luholo Yesu wakhalele mun’a muenya mudimo wa mabaya nu luholo avualewe gu Nazaleta, dimbo dinyi athu akhalelego muzula nu ndando yavula, gu meso awo nji akhalele mumona egi Yesu ashigo nu ndando. Nu muene Natanayele, munu wabuile mulandudi wa Yesu gutuama egi amumone wazuelele egi: “Gima giabonga giajiya guzoga gu Nazaleta ba?” (Yone 1:46, NWT) Yajiya gukhala egi Natanayele akhalelego musuanguluga nu dimbo Yesu akudile. Nga ndo yajiya gukhala egi wakhalele mutangiza Profesi idi mu mukanda wa Mika 5:2, yana zuela egi Masiya mbawuvualewa mu dimbo dia Beteleme uvi gu Nazaleta ndo.

6. Mu masugu a Yesu, ndaga itshi yakhalele naye gukuatesa athu ha gujiya egi muene udi Masiya?

⁶ Itshi Mbimbi ya Nzambi Yana Zuela? Profete Yeshaya wazuelele egi mbalagaji jia Yesu mbaashigo gudisagesa mukunda nu ndaga ‘jiatadila gindongo gia Masiya.’ (Yesh. 53:8) Ndaga jiavula jiadiangele guzuelewa gutuama. Nga athu ene azudile tangua dia gulonguga ndaga jiene, ngaajiyile egi Yesu wavualewe gu Beteleme mu giphuta gia Fumu Davidi. (Luka 2:4-7) Fundo diavualewe Yesu, diazuelewe gutuama mu mukanda wa Mika 5:2. Na mulonga wakhalele gui? Mulonga wakhalele egi akhalelego mujiya giamatshidia giatadila ndaga jiagasue akhalele muzuela. Akhalelego nji nu ijiyishilo yagasue. Gishina giene akhalele mutuna Yesu.

7. Mukunda natshi athu avula ana tuna akombeledi a Yehowa?

⁷ Mangino Tuana Mona Ndaga Yena Ba? Ayi. Athu avula ana tangiza egi akombeledi avula a Yehowa anyi ana khalago nu ima yavula ya gujingila adi ‘athu agithuhu nu alongugilego.’ (Makal. 4:13) Athu avula ana tangiza egi Matemue a Yehowa ashigo naye gulongesa Biblia handaga anginyilego makhalasa a théologie. Athu ako ana zuela egi Matemue a Yehowa ana khala “enya gikombelelo gia gua Amerika.” Uvi ndaga ya giamatshidia idi egi akombeledi avula a Yehowa ana jinga ndo gu États-Unis. Athu ako ana zuela egi esue Matemue a Yehowa tuana sha ndo gutshigina gudi Yesu. Ivo yavula yabalega gale athu avula akhalele gututamega egi “Athu a Bola,”ako egi “Enya Gikombelelo gia gu Amerika,” ako luko egi “enya ndaga jiakola.” Gishina giene athu avula ana tuna gubua akombeledi a Yehowa, handaga anavua ndaga eji nu ana jiya ndo giamatshidia giatadila akombeledi a Yehowa.

8. Hagutadila Makalegelo 17:11, ndaga itshi athu adi naye gutshita gula adi mutshigina gujiya akombeledi a Nzambi mu masugu etu?

⁸ Itshi yajiya gukuatesa muthu hagula gutshina guenji gulebigo? Athu adi naye gukamba gujiya giamatshidia. Yene ndaga yakalegele mulandudi Luka tangua diasonegele muene lukuma luabonga luatadila Yesu. Wakalegele ngolo ha gujiya giamatshidia, nu wakambele muabonga ‘ndaga jiagasue jiakalegewe sadige gu gisendeselo.’ Wakhalele mutshigina egi athu mbatanga lumene luasonegele muene ajiye egi ndaga  jiavile ene mukunda nu Yesu ‘jidi jia giamatshidia.’ (Luka 1:1-4) Enya gu Bereya akhalele nji mutshita gifua Luka. Tangua avile lukuma luatadila Yesu mu giphungu giathomo, akambele gujiya giamatshidia mu Mbimbi ya Nzambi ha gujiya gula ndaga jiawambelewe jiakhalele jia giamatshidia (Tanga Makalegelo 17:11.) Luholo lumoshi nji, mangino athu adi naye gukamba gujiya giamatshidia. Adi naye nji gukamba gujiya ndaga Nzambi wana gutulongesa mu njila ya akombeledi enji gula jidi gudivua nu ndaga jidi mu Biblia. Adi naye nji gulonguga ndaga jiatshitshile akombeledi a Yehowa a mutangua dietu. Gula adi mulonguga giamatshidia muabonga, mbaashigo mubemba egi ndaga jiabola (préjugé) adi mutangiza jibolese gutshigina guawo.

9. Ndaga itshi yakalegewe tangua Yesu watunyile guhana athu gijiyishilo gia mu dilu?

⁹ Mu masugu a Yesu athu ako akhalelego mutshigina egi Yesu udi Masiya phamba mukunda nu malongo enji. Uvi akhalele nji nu funu ya ndaga jiko. Amutogele haguahana “gijiyishilo gia mudilu” ha gumonesa gula udi diago Masiya. (Mat. 16:1, NWT) Yajiya gukhala egi akhalele gumutoga gijiyijilo handaga akhalelego mukotelesa mbimbi jidi mu mukanda wa Danyele 7:13, 14. Uvi yakhalelego tangua diahagele Yehowa hagula Profesi yene itagenesewe. Ndaga jiakhalele gualongesa Yesu jiakhalele naye guatshiginyisa egi wakhalele diago Masiya. Uvi tangua diatunyile Yesu ha guahana gijiyishilo ene amutunyile gawo.—Mat. 16:4.

10. Luholo lutshi Yesu watagenesele ndaga jiasonegele Yeshaya mukunda nu Masiya?

¹⁰ Itshi Mbimbi ya Nzambi Yana Zuela? Profete Yeshaya wasonegele mukunda nu Masiya egi: “Muene mbagambigo milolo nga mbagathuphulago dijui dienji nga mbagatshigo mikanda mukatshi dia milongo ya dimbo.” (Yesh. 42:1, 2) Yesu gakhalelego mukamba egi athu amujiye tangua diakhalele muene mulongesa. Yesu gatungilego tempelo ha guyitugisa athu, gakhalele nji ndo musudiga milele enya ikombelelo akhalele musudiga, akambelego nji egi athu amuzule nu ndando yavula. Tangua Yesu ataganele nu lamba gatshitshilego ndaga imoshi ya gushimana mukunda nu gusuanguluisa Fumu Helode, ngatshima  monyo wenji wakhalele mu gingoza. (Luka 23:8-11) Idi yadiago egi Yesu wakalegele ndaga jiko jia gushimana, uvi mudimo wa gulongesa lukuma luabonga wakhalele nu ndando yavula mukunda nu muene. Wawambelele alandudi’enji egi: ‘Handaga yene ngajidile.’—Mako 1:38.

11. Matangi atshi abola athu ako anakhala nawo mangino?

¹¹ Mangino tuana mona ndaga yene ba? Ayi. Athu avula mangino ana yituga ha gumona jinzo jiakoma jia ikombelelelo jia gulondewa muabonga, nu luholo mafumu a mangumba ana khala nu ba titre a koma. Ana yituga nji mukunda nu cérémonies jiana kalegewa jinyi athu avula abuitshile gale mutshima. Uvi athu anaya mugudibungisa mu ikombelelo yene, anago gujiya ndaga jiavula jiatadila Nzambi nu mafelela enji. Uvi athu anaya mu gudibungisa guetu gua mu hungu anajiya ndaga jiavula jiana gututoga Yehowa ha gutshita mugudivua nu gutshigina guenji. Jinzo jietu jia Ufumu jiana khala jiaphelegeta. Jiana gutukuatesa ha gudibungisa uvi jiana khala ndo jia gulondega nu ima yavula-vula ha gunana matangi a athu. Aphangi ana tuameza anasudiga ndo milele ya ndando ya vula-vula gubalega ha gudisha nu athu ako, ana khala ndo nji nu ba titre akoma. Ndaga tuana longesa nu tuana tshigina jianakatuga mu Biblia. Ikhale ngenyi, athu avula ana tuna lukuma luabonga tuana longesa handaga tuana kalagala ndo cérémonies jiavula-vula. Luko, ndaga tuana longesa jiana gudivua ndo nu ndaga ene ana tshigina gutegelela.

12. Ha gutadila Hebelu 11:1, 6, ndaga itshi yajiya gutukuatesa ha gukhala nu gutshigina guakola?

¹² Itshi yajiya gutukuatesa hagula gutshigina guetu gulebigo? Mupostolo Phaula wawambelele Aklisto a gu Roma egi: “Gutshigina guana guza gula muthu wavua mbimbi. Uvi wana vua mbimbi yene gula muthu wamulongesa ndaga jiatadila Klisto.” (Lomo 10:17, NWT) Hene, ndaga yajiya gutukuatesa ha gukolesa gutshigina guetu idi gulonguga mbimbi ya Nzambi. Uvi ishigo gudinginyisa mu ndaga jia ikombelelo jishigo gudivua nu Biblia, ngatshima jidi mumonega gifua jidi jiabonga. Tudi naye gukolesa gutshigina guetu mu ujiyi wa giamatshidia handaga ‘gula muthu ashigo nu gutshigina, gajiyilego gusuanguluisa Nzambi.’ (Tanga Hebelu 11:1, 6.) Luko, tushigo naye gukamba gumona gijiyishilo gia mu dilu hagula tukotelese egi tudi mu  giamatshidia. Gulonguga muabonga ndaga jidi mu Biblia mbagututshiginyisa egi tuana khala diago mu giamatshidia nu mbagutukuatesa ha gutuna gukhala nu ba dute.

13. Itshi yakhalele mutuma athu avula hagutuna Yesu?

¹³ Hakhalele Yesu ha mavu, alandudi a Yone mubatiji a dihudile luholo alandudi a Yesu atunyilego gudia ha gukombelela. Yesu wazuelele egi alandudi enji ajiyilego gutuna gudia ha gukombelela tangua diakhalele muene nu monyo ha mavu. (Mat. 9:14-17) Ikhale ngenyi Afalese nu mbalagaji jiko jia Yesu amufundile egi muene akhalelego mu landula kutime jiawo. Amuvuidile khabu tangua diasagele muene athu mu Lusugu lua Guhuluguga. (Mako 3:1-6; Yone 9:16) Akhalele gudishimana egi ana nemesa lusugu lua guhululuga, uvi ene akhalele mutshita midimo yawo mu tempelo mu lusugu luene. Uvi tangua akhalele mutshita midimo mu lusugu lua guhululuga mu tempelo, akhalelego mumona egi idi ndaga yabola. Tangua Yesu wamonesele gubola guawo haphelo ene avile khabu. (Mat. 21:12, 13, 15) Athu Yesu akhalele mulongesa mu sinagoga ya gu Nazaleta avile khabu jiavula, tangua Yesu wahanele gifezegeselo gia lumene lua enya Isalele ha guamonesa egi akhalele mukamba phamba gubonga guawo nu akhalelego nu gutshigina. (Luka 4:16, 25-30) Athu avula atunyile Yesu handaga gakalegelego ndaga jiakhalele ene mutangiza.—Mat. 11:16-19.

14. Mukunda natshi Yesu wakhalele mutuna kutime jia athu?

¹⁴ Itshi Mbimbi ya Nzambi yana zuela? Yehowa wazuelele mu njila ya Profete Yeshaya egi: ‘Athu awa adi mu suena hehi nu ame khuta mu mbimbi ene adi gungunemesa khuta gu kano, uvi mitshima yawo idi gualeha nu ame. Gulenga gudi ene gungulega gudi guagituhu. Adi gungulenga mukunda nu mikhuala yaalongesewe gudi athu.’ (Yesh. 29:13) Yesu watunyile kutime jia athu handaga jiakhalelego gudivua nu Mbimbi ya Nzambi. Athu anyi akhalele mutangiza egi mikhuala nu kutime jia athu jiakhalele nu ndando yavula gubalega Biblia, akhalele nji mutuna Yehowa nu Masiya.

15. Mukunda natshi athu avula mangino ana suanguluga ndo nu Matemue a Yehowa?

¹⁵ Mangino tuana mona ndaga yene ba? Ayi. Mangino athu avula anasuanguluga ndo tangua Matemue a Yehowa ana tuna gudinginyisa mu kutime jianago gudivua nu Biblia, gifua fete ya lusugu lua guvualewa nu Nowele. Athu ako anavua khabu tangua Matemue a Yehowa ana tuna gudinginyisa mu fete jia ifutshi nga tangua ana tuna kutime jia mafua jinyi jiana gudivua ndo nu Mbimbi ya Nzambi. Athu awa ana vuila Matemue a Yehowa khabu mukunda nu ndaga eji tuazuela ajiya diago gutangiza egi Nzambi wana tshigina luholo luawo lua gumukombelela. Uvi ene ajiyilego gusuanguluisa Nzambi gula adi mulandula kutime jia ha mavu awa ha fundo dia gulandula malongo a Biblia.—Mako 7:7-9.

16. Hagutadila Ngimbo 119:97, 113, 163-165, itshi tudi naye gutshita? Itshi tushigo naye gutshita?

¹⁶ Itshi yajiya gutukuatesa hagula gutshigina guetu gulebigo? Tudi naye gukudisa guzumba guetu mukunda nu mikhuala nu malongo a Yehowa. (Tanga Ngimbo 119:97, 113, 163-165.) Gula tudi muzumba Yehowa, mbatutuna kutime jiagasue jianago gumusuanguluisa. Mbatubembigo nga ndaga imoshi yibolese guzumba guetu mukunda nu Yehowa.

17. Ndaga jitshi enya Yuda avula a mutangua dia Yesu akhalele munengenena egi Masiya akalagale?

¹⁷ Mu masugu a Yesu athu akhalele mutshigina egi muene asombegese ndaga mu guvernema. Akhalele gudifelela egi Masiya mbawaazola mu uhiga wa uhinyinyi wa enya Roma. Uvi Yesu watunyile genji tangua akambele gumubuisa fumu. (Yone 6:14, 15) Nganga-nzambi nu athu ako akhalele muvua woma egi Yesu wajiya  gusombegesa guvernema, ngenyi enya Roma ajiya guvua khabu nu atambula ufumu ahanele ene gudi nganga-nzambi. Enya Yuda avula atunyile Yesu handaga akhalele gudisagesa mukunda nu ndaga jia politike.

18. Profesi jitshi jiatadila Masiya athu avula akhalele mujimbila?

¹⁸ Itshi Mbimbi ya Nzambi yana zuela? Profesi jiavula jia diangele guzuela egi Masiya mbawubinga uvi jiko jiamonesele egi udi naye thomo gufua mukunda nu gubola guetu. (Yesh. 53:9, 12) Na mukunda natshi enya Yuda akhalele nu matangi abola mukunda nu Masiya? Handaga avula mukatshi diawo ajimbidile profesi jiakhalele muzuela egi, Masiya akhalelego naye gumanesela malamba awo mu tangua dinyinyi.—Yone 6:26, 27.

19. Matangi atshi abola ana tuma athu avula ha gutuna lukuma luetu?

¹⁹ Mangino tuana mona ndaga yene ba? Ayi. Mangino athu avula ana gututuna handaga tuanago gudinginyisa mu ndaga jia politike. Ana tangiza egi tudi naye gu vote mu tangua dia ba eleksio. Uvi gula tuatomba muthu mumoshi ha gubua fumu wetu, ngenyi tudi mutuna Yehowa. (1 Sam. 8:4-7) Athu ajiya gutangiza nji egi tudi naye gutunga makhalasa nu ba opitale mukunda nu gukuatesa athu. Ana gututuna handaga tuana longesa lukuma luabonga, uvi tuana tshita ndo ndaga ha gukatula malamba adi mutagana nawo mangino.

20. Hagutadila mbimbi jiazuelele Yesu mu Matayo 7:21-23, mu ndaga itshi tudi naye thomo gudihana?

²⁰ Itshi yajiya gutukuatesa hagula gutshigina guetu gulebigo? (Tanga Matayo 7:21-23.) Tudi naye thomo gudihana ha gukalagala mudimo watuhanele Yesu ha gutshita. (Mat. 28:19, 20) Tushigo naye guwunganesa matangi etu mu ndaga jia politike nga ha gutshita ndaga ha gukatula malamba athu adi mutagana nawo mangino ha mavu. Tuana zumba athu, nu tuana gudisagesa tangua ana tagana nu malamba. Uvi tuana jiya egi luholo luabonga lua guakuatesa ludi gualongesa Ufumu wa Nzambi nu guakuatesa ha gukudisa ufuta wakola nu Yehowa.

21. Desizio ditshi tudi naye guzula?

²¹ Mu longo edi, tuazuelela ndaga guana jiatumine atu avula ha gutuna Yesu mu siekle ya thomo. Tuazuelela nji ndaga jiana tuma athu ha gutuna alandudi a Yesu mangino. Uvi ndaga tuazuelela mu longo edi jiene phamba tudi naye gutuna ba? Ndo sha. Mu longo dialandula mbatuzuelela ndaga jiko nguana jiajiya gukhakhuisa athu. Tubembigo nga ndaga imoshi itutume ha gutuna Yesu nu tulandulenu gukolesa gutshigina guetu!