LONGO DIA 21
Yehowa Mbawuguhana Ngolo
‘Tangua ngana khala ya guleba, hene ngana khala nu ngolo.’—2 KOL. 12:10.
LUNGIMBO 73 Donne-nous de la hardiesse
NDAGA JIDI MU LONGO EDI *
1-2. Malamba atshi Matemue a Yehowa avula ana tagana nawo?
MUPOSTOLOPhaula wawambelele Timote (nu Aklisto ako) ha gutagenesa muabonga mudimo wa gulongesa. (2 Tim. 4:5) Mukut’etu agasue tudi naye guzula longo edi nu ndando yavula. Uvi matangua ako yana khala ndo yaleba. Handaga aphangi’etu avula ana guvua woma ha guya mu mudimo wa gulongesa. (2 Tim. 4:2) Tangiza gale aphangi ana jinga mu ifutshi inyi mafumu a leta atunyishile gale mudimo wetu. Ana longesa lukuma luabonga ikhale adi mujiya muabonga egi ajiya gumbiwa mu bologo!
2 Akombeledi a Yehowa ana tagana nu malamba avula ajiya gualebesa muila. Ha gufezegesa, aphangi avula ana kalagala mudimo matangua avula ha gutagenesa nzala jia enya fami jiawo. Ana tshigina gukalagala muavula mudimo wa gulongesa, uvi ana khala aguhuila gusuga ya phoso. Aphangi ako anago gukalagala mudimo wagulongesa muavula handaga adi nu ukhashi nga ndo adi athu agukola ako nji ajiyilego guzoga mu jinzo jiawo. Ako ana tangiza egi ashigo nu ndando gumeso a Yehowa. Phangi wa mukhetu Mary, * wana jinga gu Moyen-Orient udi muzuela egi: “Ngana tshita yagasue ha gukatula matangi abola anyi ana gungulebesa muila. Ndaga yene yana gungukatula gusuanguluga, handaga yana gunguzula tangua nu ngolo jiagasue ngajiya guhana mu mudimo wagulongesa.”
3. Ndaga tshi tuza muzuelela mu longo edi?
3 Ikhale malamba a luholo lutshi tudi mutagana nawo, Yehowa wajiya gutuhana ngolo jia gukolesela nu ha gulandula gumukombelela. Gutuama diaguzuelela luholo Yehowa wajiya gutukuatesa, tutadilenu gale luholo wakuatesele Phaula nu Timote ha gutagenesa muabonga mudimo wawo ikhale akhalele mutagana nu malamba.
YEHOWA WANA GUTUHANA NGOLO HA GULANDULA GUKALAGALA MUDIMO WAGULONGESA
4. Malamba atshi Phaula wataganele nawo?
4 Mupostolo Phaula wataganele nu malamba avula diago. Wakhalele nu funu ya ukuateshi wa Yehowa tangua mbalagaji jienji jia mubetele nu jia mumbile mubologo nu jiakambele gumushiya. (2 Kol. 11:23-25) Phaula gakhalelego muvua sonyi ha guzuela egi matangua ako wakhalele muleba muila. (Lomo 7:18, 19, 24) Wakhalele nu misongo yakhalele gumusagesa. Misongo yene yakhalele gifua “muiya mu muila,” wakhalele mutoga Nzambi muavula ha gumukatula nayo.—2 Kol. 12:7, 8.
Itshi yakuatesele Phaula ha gutshita mudimo wawo wa gulongesa? (Tala paragrafe 5-6) *
5. Ndaga itshi Phaula wakalegele ikhale watagenele nu malamba?
5 Yehowa wahanele Phaula ngolo ha gulandula gulongesa ikhale wataganele nu malamba avula. Tuzuelelenu gale ndaga jia kalegele Phaula. Tangua gakhalele mubologo mu inzo imoshi gu Roma, walongesele lukuma luabonga nu gikhesa giagasue gudi athu avula, yajiya nji gukhala egi wa longesele mafumu akoma. (Makal. 28:17; Fili. 4:21, 22) Wakhalele nji mulongesa masuta avula akhalele mubamba inzo ya fumu nu athu agasue akhalele muza gumutala. (Makal. 28:30, 31; Fili. 1:13) Mutangua diene, Yehowa wakuatesele Phaula ha gusonega mikanda inyi yakuatesele Aklisto a giamatshidia a mu tangua dikulu. Mikanda yene idi gutukuatesa nji uu nu mangino. Gifezegeselo gia Phaula giakolesele aphangi anyi akhalele mu hungu dia gu Roma. Ndaga yene yakuatesele aphangi ha guheta ‘gikhesa, alongesele nji Mbimbi ya Nzambi woma ndo.’ (Fili. 1:14) Ikhale matangua ako Phaula wakhalelego nu luholo lua gukalagala mudimo wa gulongesa muavula gifua luholo akhalele mutshigina, uvi wakalegele ndaga jinyi akhalele naye gukalagala. Gutshita ngenyi guakuatesele hagula ‘mudimo wa gulongesa lukuma luabonga uye gutuama.’—Fili. 1:12.
6. Ha gutadila 2 Kolinto 12:9, 10, itshi yakuatesele Phaula ha gulandula gutagenesa muabonga mudimo wenji?
6 Mupostolo Phaula wakhalele mujiya egi ndaga jiagasue akhalele mukalagala mu mudimo wa Yehowa jiakhalelego mu ngolo jienji uvi, jiakhalele mu ukuateshi wa Nzambi. Wazuelele egi ngolo jia Nzambi ‘jiabuile jiatagana hakhalele muene [Phaula] waguleba.’ (Tanga 2 Kolinto 12:9, 10.) Ikhale Phaula wataganele nu usageshi, wambiwe mu bologo nga malamba ako avula atagenele nawo, Yehowa wamukuatesele mu njila ya nyuma yenji yabonga ha gulandula gutagenesa muabonga mudimo wenji.
Itshi yakuatesele Timote ha gutshita mudimo wawo wa gulongesa? (Tala paragrafe 7) *
7. Malamba atshi Timote wabingile ha gutagenesa muabonga mudimo wenji?
7 Timote wakhalele futa dia Phaula wa mudimo. Muene nji washile mutshima wenji mu ngolo jia Nzambi ha gutagenesa muabonga mudimo wenji. Timote wakalegele nji ba vuayaje avula mu mudimo wa gimisionere hamoshi nu Phaula. Phaula watumine nji Timote mahugo avula ha guya mutala mahungu nu guahana gikhesa. (1 Kol. 4:17) Yajiya gukhala egi Timote wadivuile egi ashigo watagana ha gutagenesa ginemo giene. Yajiya gukhala nji egi gishina giene Phaula wa muwambelele egi: ‘Ubembigo egi nga muthu mumoshi asegulule ulenge waye.’ (1 Tim. 4:12) Luko, mutangua diene, Timote wakhalele nu ‘misongo yakhalele gumukata tangua diagasue’ misongo yene yakhalele gifua muiya mu muila. (1 Tim. 5:23) Uvi Timote wakhalele mujiya egi nyuma ya Yehowa mbayimuhana ngolo adi najio funu ha gulandula gukalagala mudimo wa gulongesa nu ha gukuatesa aphangi’enji.—2 Tim. 1:7.
YEHOWA WANA GUTUHANA NGOLO JIA GUSALA YA GUJINGINYINA IKHALE TUDI MUTAGANA NU MALAMBA
8. Itshi Yehowa ana kalagala ha guhana akombeledi’enji ngolo mangino?
8 Mangino, Yehowa wana hana akombeledi enji ‘ngolo jiabalega ngolo jia athu’ hagula ajiya gulandula gumukombelela nu gujinginyina guagasue. (2 Kol. 4:7) Henyaha tutadilenu ima nguana Yehowa wana gukadigila ha gutuhana ngolo nu ha gutukuatesa ha gusala ya gujinginyina gudi muene. Ya thomo, gisambu, ya mbadi Biblia, ya thathu, gubalegesa tangua hamoshi nu aphangi’etu a Aklisto ya nguana mudimo wa gulongesa.
Yehowa wana gutuhana ngolo mu njila ya gisambu (Tala paragrafe 9)
9. Luholo lutshi gisambu giajiya gutukuatesa?
9 Yehowa wana gutuhana ngolo mu njila ya gisambu. Mupostolo Phaula udi gutuwambela mu mukanda wa Efeso 6:18 ha gukombelela Nzambi ‘tangua diagasue.’ Nzambi wana hana kueteya gu isambu yetu, luholo ana gutuhana ngolo. Phangi Jonnie wana khala gu Bolivie udi muzuela egi, Yehowa wa mukuatesele tangua ataganele nu malamba. Mukaji’enji nu mvuaji jienji akatele muavula mu tangua dimoshi. Yakhalele lamba gudi phangi Jonnie ha guakuatesa mukuta awo agasue thathu. Gungima ginenji wafuile, yazudile nji tangua diavula hagula mukaji’enji nu sh’enji avue muabonga. Phangi Jonnie udi muzuela egi: “Tangua ngana tangiza ndaga jiagasue jiangubuidile, ngana guzuela egi, tangua ngakhalele gudisagesa muavula, ngakhalele mukombelela Yehowa nga khalele nji gumuwambela luholo ngakhalele gudivua. Ndaga yene yakhalele ngungukuatesa.” Yehowa wahanele phangi Jonnie ngolo akhalele najio funu ha gukolesela mu malamba ene agasue. Phangi Ronald udi mukulu Bolivie, wavuile egi ginenji udi mukata misongo ya cancer. Uvi gungima dia mbeji jiazonda, mama wenji muene wafuile genji. Itshi ya mukuatesele ha gukolesela mu tangua diene? Udi muzuela egi: “Tangua ngana gukombelela Yehowa, ngana gumuwambela ndaga jiagasue jidi gungusagesa. Ngudi mujiya egi Yehowa wana gungujiya muabonga gubalega athu agasue. Wana gungukotelesa nji kiawaha gubalega ame hakhami.” Matangua ako tuajiya gudivua egi tushigo nu ngolo jia gukolesela mu malamba nga ndo tushigo mujiya ndaga tuajiya gutoga Yehowa mu gisambu. Uvi Yehowa udi gututoga ha gumukombelela ikhale idi lamba gudi esue ha gumuwambela luholo tudi gudivua.—Lomo 8:26, 27.
Yehowa wana gutuhana ngolo mu njila ya Biblia (Tala paragrafe 10)
10. Ha gutadila Hebelu 4:12, mukunda natshi gutanga Biblia nu gutangigiza ndaga jiene gudi nu ndando yavula?
10 Yehowa wana gutuhana ngolo mu njila ya Biblia. Mupostolo Phaula wakhalele mutanga Mbimbi ya Nzambi ha guheta ngolo, esue nji tuajiya gulandula gifezegeselo gienji. (Lomo 15:4) Gula tudi mutanga Biblia nu tudi muzula tangua dia gutangigiza ndaga jiene muabonga, Yehowa wajiya gukadigila nyuma yenji ha gutukuatesa ha gukotelesa luholo Biblia yajiya gutukuatesa mu mulonga tudi mutagana nawo. (Tanga Hebelu 4:12.) Phangi Ronald tuazuelela guthunda udi muzuela egi: “Ngudi nu gusuanguluga guavula luholo ngakhalele nu khadilo dia gutanga Biblia phipha yagasue. Ngana gutangigiza muavula makalegelo a Yehowa, nu luholo ana kadigila akombeledi’enji ndaga nu guzumba nguagasue. Gutshita ngenyi guana gunguhana ngolo.”
11. Luholo lutshi Biblia yahanele ngolo gudi phangi mumoshi wa mukhetu wakhalele gudisagesa muavula?
11 Gula tudi mutangigiza ndaga tudi mutanga mu Mbimbi ya Nzambi, yajiya gutukuatesa ha gutadila malamba adi gutubuila mu luholo lua waha. Tutadilenu luholo Biblia yakuatesele phangi wa mukhetu mumoshi wakhalele gudisagesa muavula tangua mulumi’enji afuile. Mukulu mumoshi wa muwambelele egi, wajiya guheta malongo ajiya gumukuatesa gula udi mutanga mukanda wa Yobo. Tangua akhalele mutanga mukanda wene, wasendesele guzuela egi matangi a Yobo akhalele abola. Tangua akhalele mutangigiza ndaga jiene, wakhalele muwambela Yobo egi: “Yobo! Ukhadigo mutangiza phamba malamba aye!” Gungima wakotelesele egi muene nji wakhalele nu matangi gifua a Yobo. Ndaga yene yamukuatesele ha gusombegesa matangi enji, yamuhanele nji ngolo jia gukolesela mu lamba dia gufuisa mulumi’enji.
Yehowa wana gutuhana ngolo mu njila ya Aphangi a Aklisto (Tala paragrafe 12)
12. Luholo lutshi Yehowa wana gukadigila aphangi’etu a Aklisto ha gutuhana ngolo?
12 Yehowa wana gutuhana ngolo tangua tuana balegesa tangua hamoshi nu aphangi’etu a Aklisto. Yehowa wana kalegela nji aphangi’etu a Aklisto ha gutuhana ngolo. Mupostolo Phaula wasonegele egi wakhalele muvua uhote wa gudimona nu aphangi’enji a Aklisto ‘ha gudikolesa hamoshi.’ (Lomo 1:11, 12) Phangi Mary tuazuelela guthunda, wana gusuanguluga nji gubalegesa tangua hamoshi nu aphangi’enji a mala nu a akhetu. Udi muzuela egi: “Yehowa wakalegele aphangi a mala nu a akhetu ha gungukuatesa ikhale ene akhalelego mujiya ndaga jiakhalele gungusagesa. Akhalele muzuela ndaga jianguhanele gikhesa, akhalele nji gungusonegela mikanda. Ndaga eji, jiene ngakhalele diago najio funu. Gubalegesa tangua nu aphangi guangukuatesele ha guta maga nu aphangi ako a akhetu anyi atagenele nu malamba gifua ame. Ngahetele nji malongo avula mu ba eksperianse awo, akulu nji angukuatesele ha gudivua egi ngana khala nu ndando yavula mu hungu.”
13. Luholo lutshi tuajiya gudihana gikhesa mu gudibungisa gua mu hungu?
13 Gudibungisa gua mu hungu gudi nji mukatshi dia maluholo tuajiya gudihana gikhesa mukut’etu agasue. Tangua tuana guya mu gudibungisa gua mu hungu, tuajiya guhana aphangi’etu ngolo gula tudi guawambela egi tuana guazumba nu tudi guahana mersi mukunda nu ndaga ana gukalagala. Ha gufezegesa, mukulu mumoshi mu jina dia Peter wawambelele phangi mumoshi wa mukhethu munu mulumi’enji gashigo Temue wa Yehowa gutuama dia gudibungisa egi: “Tuana khala nu gusuanguluga guavula luholo wana guza tangua diagasue mu gudibungisa gua mu hungu. Wana guza tangua diagasue mu gudibungisa nu anaye 6, muana londega nji komantere jienu muabonga.” Phangi muene wasuangulugile muavula wazolele masoji gumeso, wawambelele mukulu muene egi: “Mbimbi jiaye jiangukuatesa diago mersi avula.”
Yehowa wana gutuhana ngolo mu njila ya mudimo wa gulongesa (Tala paragrafe 14)
14. Luholo lutshi gukalagala mudimo wa gulongesa guana gutukuatesa?
14 Yehowa wana gutuhana ngolo tangua tuana kalagala mudimo wa gulongesa. Tangua tuana gulongesa giamatshidia gidi mu Biblia gudi athu ako, tuana gudivua kiawaha lume ikhale athu ene atutegelela nga ndo. (Ish. 11:25) Phangi wa mukhetu Stacy wakotelesele nji luholo mudimo wa gulongesa wajiya gutuhana ngolo. Tangua phangi’enji mumoshi wazolewe mu hungu, wakhalele nu gikenene giavula hene asendesele gudihula egi, ‘itshi ngakhalele naye gukalagala ha gumukuatesa?’ Phangi Stacy walanduile nji gutangiza ndaga yene tangua diagasue. Uvi mudimo wa gulongesa wamukuatesele ha gubinga mulonga wene. Tangua akhalele gudihana muavula mu mudimo wa gulongesa, yakhalele gumutuma ha gutangiza athu adi nu funu ya ukuateshi mu terituate yenji. Udi muzuela egi: “Mu tangua diene, Yehowa wangukuatesele ha guheta muthu wa gulongesa Biblia, muthu muene wakhalele mukula muabonga mu nyuma. Ndaga yene yangusuanguluishile diago. Mudimo wa gulongesa wana gungukuatesa muavula mu monyo wami.”
15. Longo ditshi wazula mu eksperianse ya phangi Mary?
15 Aphangi ako ajiya gutangiza egi ajiyilego gukalagala mudimo wa gulongesa muavula, mukunda nu ndaga adi mutagana najio. Gula aye nji wana gudivua ngenyi, ujimbilago egi Yehowa wana suanguluga gula udi mukalagala yagasue wajiya gukalagala mu mudimo wenji. Tutadilenu luko gifezegeselo gia phangi Mary. Tangua ayile mulongesa mu fundo dinyi athu ana zuela zuelelo diko, wadivuile diago egi ashigo nu ndando. Udi muzuela egi: “Tangua ngahetele guene, ngakhalele mujiya phamba guhana komantere ya hihia, gutanga verse ya Biblia nga ndo phamba guhana trakte mu mudimo wa gulongesa.” Wakhalele gudifuanesa nu athu ana guzuela zuelelo diene muabonga hene akhalele mutangiza egi muene ashigo nu ndando. Uvi gungima wasombegesele matangi’enji. Wakotelesele gamba Yehowa wajiya gumukadigila ikhale ashigo mujiya guzuela zuelelo diene muabonga. Udi muzuela luko egi: “Giamatshidia gidi mu Biblia giakhala gialeba, giajiya nji gusombegesa mionyo ya athu.”
16. Itshi yajiya gukuatesa aphangi anyi anago guzoga gu mbodi’awo ha guheta luko ngolo?
16 Yehowa wana gujiya gamba aphangi ako mukatshi dietu ana tshigina gukalagala mudimo wa gulongesa, uvi anago gukhala nu luholo lua guzoga gu mbodi’awo. Wajiya guakuatesa ha gulongesa lukuma luabonga gudi athu ana guabamba nga gudi minganga. Gula tudi nu khadilo dia gufuanesa tangua diagasue luholo tuakhalele mukalagala mudimo wa gulongesa mualeha, nu luholo tudi guwukalagala mangino, tuajiya guleba muila. Uvi gula tudi mukotelesa luholo Yehowa ana gutukuatesa mangino, tuajiya guheta ngolo tudi najio funu ha gukolesela mu malamba agasue tudi mutagana nawo nu gusuanguluga guagasue.
17. Gifua luholo Mulongeshi 11:6 idi guyimonesa, mukunda natshi tudi naye gulandula gukalagala mudimo wa gulongesa ikhale athu avula ashigo gututegelela?
17 Tushigo mujiya diago gula akhuatshi mukatshi dia athu tuana longesa Biblia mbaatshigina giamatshidia ha gukula mu nyuma. (Tanga Mulongeshi 11:6.) Ha gufezegesa, phangi Barbara udi nu ivo gubadiga 80 wana gulongesa tangua diagasue mu telefone nu mu njila ya mikanda. Lusugu lumoshi wasonegele mukanda, wanginyishile mukanda wene mu Inzo Yaleha ya Mutaledi ya 1 mars, 2014 ya Français, yakhadile nu longo diakhadile muzuela egi: “Ce que Dieu a fait pour vous.” Phangi muene wa mukhetu akhalelego mujiya egi athu ahetele mukanda wene akhalele yala mumoshi nu mukaji’enji anyi akhalelego luko Matemue a Yehowa. Athu ene atangele zulunalu yene muavula diago. Yala muene wadivuile egi yakhalele gifua Yehowa hakhenji wakhalele muzuela nenji. Wasendesele luko guya mu gudibungisa nu mukaji’enji, gungima avutugile mu hungu gungima dia ivo gubalegesa 27. Phangi Barbara wakhalele nu gusuanguluga guavula ha gujiya gamba mukanda wene wakuatesele muavula yala mumoshi nu mukaji’enji, wahetele nji ngolo.
Yehowa wana gutuhana ngolo mu njila ya (1) gisambu, (2) Biblia, (3) Aphangi a Aklisto nu (4) mudimo wa gulongesa (Tala paragrafe 9-10, 12, 14)
18. Itshi tuajiya gutshita ha guheta ngolo jia Nzambi?
18 Yehowa wana gukadigila ima yavula ha gutuhana ngolo gifua: Gisambu, Biblia, gubalegesa tangua hamoshi nu aphangi’etu Aklisto nu mudimo wa gulongesa. Gula tudi mukalegela ima yene, mbatumonesa diago egi tudi musha mutshima egi Yehowa udi nu ngolo jia gutukuatesa nu udi mutshigina diago gutukuatesa. Tangua diagasue, tudi naye gusha mutshima gudi Sh’etu wa mu dilu. Wana suanguluga ‘gumonesa ngolo jienji gudi athu ana gumutshigina nu mutshima wawo wagasue.’—2 Gudi. 16:9.
LUNGIMBO 61 Témoins, en avant!
^ par. 5 Tudi mutagana nu malamba avula mangino uvi Yehowa wana gutukuatesa ha gukolesela mu malamba ene. Mu longo edi tuza muzuelela luholo Yehowa wakuatesele mupostolo Phaula nu Timote ha gulandula gukalagala mudimo wawo ikhale ataganele nu malamba. Tuza mu zuelela nji ima nguana yatuhanele Yehowa yana gutukuatesa ha gukolesela mangino.
^ par. 2 Mu longo edi majina ako asombegesewa.
