LONGO DIA 22
Landula Guwenda mu ‘Njila ya Gijila’
‘Mbagukhala nu njila yakoma, . . . Njila ya Gijila.’—YESH. 35:8.
LUNGIMBO 31 Marche avec Dieu!
NDAGA JIDI MU LONGO EDI a
1-2. Mukanda wa Ezela 1:2-4 udi mumonesa egi desizio ditshi dia ndando enya Yuda anyi akhalele gu Babilona akhalele naye guzula?
ENYA Yuda atshitshile ivo 70 mu uhiga gu Babilona, gungima Fumu waahanele njila ha guvutuga gumbo diawo gu Isalele. (Tanga Ezela 1:2-4.) Phamba Yehowa wakhalele naye guakuatesa ha guzoga mu uhiga. Tuazuela ngenyi handaga enya gu Babilona akhalelego nu khadilo dia gubemba ahiga awo ha guvutuga gumbo diawo. (Yesh. 14:4, 17) Uvi tangua enya Mede nu Phelese abingile Babilona, Fumu muhe-muhe wahanele njila egi enya Yuda avutuge mu gifutshi giawo. Mutangua diene, muenya Yuda wagasue wakhalele naye guzula desizio dia guvutuga gumbo diawo nga dia gusala gu Babilona. Mafumu a fami akhalele nu ginemo giakola diago. Uvi yakhalelego ndaga yaleba ha guzula desizio. Mukunda natshi?
2 Mukatshi diawo guakhalele nu athu ako agukola, yakhalele lamba mukunda nu ene ha guwenda mu njila yaleha. Enya Yuda avula avualewe gu Babilona, akhalele khenji ajingile galego mu gifutshi giko. Mukunda nu ene Isalele yakhalele dimbo dia akhakh’awo. Yajiya gukhala egi enya Yuda ako akhalele nu umonyi wavula gu Babilona ngenyi yakhalele lamba mukunda nu ene ha gubemba jinzo jiawo jiabonga nu midimo yawo, ha guya mu gifutshi ginyi akhalelego mujiya.
3. Gubonga gutshi enya Yuda anyi akhalele mutshigina guvutuga gu Isalele akhalele naye guheta?
3 Enya Yuda anyi akhalele mukombelela Yehowa nu mutshima umoshi ajiyile egi, guvutuga gu Isalele gudi nu ndando yavula gubalega ima yagasue. Mukunda nu ene, gikombelelo gia giamatshidia giakhalele nu ndando yavula gubalega. Gu Babilona guakhalele nu tempelo jia aphagano gubalega 50. Uvi guakhalelego nga tempelo imoshi ya Yehowa mu dimbo diene. Guakhalelego nga nu giwotshielo gimoshi hagula enya Isalele ajiya guhana milambu gifua luholo mukhuala wa Moize wakhalele mutoga. Guakhalelego nji nu nganga-nzambi ha guhana milambu yene. Athu anyi akhalele mukombelela nzambi jia mambo akhalele avula gubalega athu akhalele mukombelela Yehowa. Hene enya Yuda avula anyi akhalele muzumba Yehowa akambele luholo lua guvutuga mu gifutshi giawo ha guya muvutula gikombelelo gia giamatshidia.
4. Itshi Yehowa walayele enya Yuda anyi akhalele mutshigina guvutuga gu Isalele?
4 Ha gukatuga gu Babilona ha guya gu Isalele akhalele naye gutshita mbeji nguana, uvi Yehowa waalayele egi mbawukatula ima yagasue yajiya guaakanga njila ha guvutuga gu Isalele. Profete Yeshaya wasonegele egi: ‘Londenu njila ya Yehowa! Londenu njila yakoma mu mavu a luselenga mukunda nu Nzambi wetu. . . . Shishigisenu milundu nu mababa.’ (Yesh. 40:3, 4) Tangiza gale egi njila yakoma yalondewa mu mavu a luselenga, milundu yashishigishiwa. Athu akhalele naye guwenda mu njila yene akhalele naye diago gusuanguluga! Yakhalele naye gukhala diago yaleba mukunda nu ene ha guwenda mu njila eyi yakoma yagushishigisa muabonga, ha fundo diaguya nu gukanduga milundu nu gubulumuga mababa, njila yene yakhalele naye nji guakuatesa ha guwenda muabonga.
5. Njila yakoma ya gifuanesa yakhalele mukatuga gu Babilona ha guya gu Isalele yakhalele mutamegewa egi itshi?
5 Mangino athu ana jiya njila jiavula jiakoma handaga njila jiene jiana khala nu majina nga ba numero. Njila yakoma ya gifuanesa idi mu mukanda wa Yeshaya, yakhalele nji nu jina. Biblia idi muzuela egi: ‘Mbagukhala nu njila yakoma mbayitamegewa egi njila ya gijila. Muenya usala mbagayigo mu njila yene.’ (Yesh. 35:8) Ndaga yene yakhalele mukotelesa itshi mukunda nu enya Yuda anyi avutugile gu Isalele? Idi mukotelesa itshi mukunda nu esue mangino?
‘NJILA YA GIJILA’ MU TANGUA DIKULU NU MUTANGUA DIETU
6. Mukunda natshi njila yene yakhalele mutamegewa egi njila ya gijila?
6 Njila yakoma yakhalele nu jina diabonga diago akhalele guyitamega egi ‘Njila ya Gijila’! Mukunda natshi akhalele guyitamega ngenyi? Enya Yuda anyi akhalele ‘athu a usala’ yakotelesa egi athu akhalele mukita uthambi, mukombelela isongo, nga gutshita gubola guko guakoma, akhalego naye guvutuga gu Isalele. Athu anyi akhalele naye guvutuga gu Isalele akhalele naye gubua athu a gijila gu meso a Nzambi wawo. (Mikh. 7:6) Enya Yuda anyi asalele gu Babilona akhalele naye nji gusombegesa ha gusuanguluisa Yehowa.
7. Usombegeshi utshi enya Yuda ako akhalele naye gutshita? Hana gifezegeselo.
7 Gifua luholo tuayimonyi guthunda enya Yuda avula avualewe gu Babilona, yajiya gukhala egi avula mukatshi diawo akhalele mutshita ndaga gifua enya gu Babilona, akhalele nji mulandula mikhuala yawo. Tangua enya Yuda a thomo avutugile gu Isalele gungima dia ivo yavula, Ezela wavuile egi ako mukatshi diawo adizudile mu ulo nu akhetu anyi akhalele mukombelela nzambi jia mambo. (Guz. 34:15, 16; Ez. 9:1, 2) Gungima guvelenele Nehemiya wadihudile muavula tangua diajiyile muene egi ana avualewe gu Isalele akhalelego mujiya guzuela zuelelo dia enya Yuda. (Mikh. 6:6, 7; Neh. 13:23, 24) Luholo ana ene akhalelego mujiya guzuela Hebelu, yakhalele naye gukhala lamba gudi ene ha guzumba Yehowa nu ha gumukombelela, handaga Mbimbi ya Nzambi yasonegewe mu Hebelu. (Ez. 10:3, 44) Enya Yuda ene akhalele naye gukalagala usombegeshi, uvi yakhalele ndaga yaleba mukunda nu ene ha gusombegesa handaga akhalele mujinga gu Isalele fundo akhalele muvutula gikombelelo gia giamatshidia mage mage.—Neh. 8:8, 9.
Sendese mu 1919 G.Y., athu avula, mala nu akhetu nu ana ana zoga mu Babilona Yakoma ha gusendesa guwenda mu ‘Njila ya Gijila’ (Tala paragrafe 8)
8. Mukunda natshi ndaga jiakalegewe ivo yavula yabalega gale jidi nu ndando mukunda nu esue mangino? (Tala gifuanesa holu dia gizula.)
8 Athu ako ajiya guzuela egi ‘Idi ndaga yabonga, uvi ndaga jiabuidile enya Yuda sendese mualeha jidi gututadila esue mangino ba?’ Ayi jidi gututadila nji esue, handaga ndaga tuana tshita mangino jiajiya gufuanesewa nu guwenda mu ‘Njila ya Gijila.’ Ikhale tudi Aklisto ambiwe maji mu nyuma nga “imeme iko,” tudi naye gulandula guwenda mu ‘Njila ya Gijila,’ handaga mbayitukuatesa ha gulandula gukombelela Yehowa mangino, nu mu masugu adi muza tangua Ufumu wenji mbawubata gubonga ha mavu. b (Yone 10:16) Sendese mu 1919 G.Y, athu avula, mala nu akhetu nu ana ana bemba Babilona Yakoma, yakotelesa ikombelelo ya mambo ha guwenda mu njila ya gifuanesa. Aye nji wajiya gukhala mukatshi dia athu ene. Athu asendesele guwenda mu njila yene ivo 100 yabalega gale, uvi gudi nu athu ako asendesele gulonda njila yene ivo yavula gutuama.
GULONDEGA NJILA
9. Luholo Yeshaya 57:14 idi guyimonesa, mu luholo lutshi alondele ‘Njila ya Gijila’?
9 Yehowa watshisthile yagasue ha gukatula ikhakhuishilo yagasue mu njila mukunda nu enya Yuda anyi akatugile gu Babilona ha guya gu Isalele. (Tanga Yeshaya 57:14.) Itshi tuajiya guzuela giwa mukunda nu ‘Njila ya gijila’ ya mu masugu etu? Ivo yavula gutuama dia givo 1919, Yehowa wasendesele gukalegela athu akhalele gumutumagela ha gukuatesa athu ako ha guzoga mu Babilona Yakoma. (Fuanesa nu Yeshaya 40:3.) Atshitshile ngolo ha gulondega njila ya gifuanesa ha gukuatesa enya mitshima yabonga ha gukatuga mu ikombelelo ya mambo, ha guza mukombelela Yehowa hamoshi nu athu enji mu gikombelelo gia giamatshidia. Luholo lusthi alondele njila yene? Tutadilenu ndaga akalegele ha gulondega njila yene.
Ivo yavula gutuama athu akhalele mutumagela Nzambi akuatesele athu ako ha guzoga mu Babilona Yakoma (Tala paragrafe 10-11)
10-11. Luholo lutshi gubalumuna Biblia nu guyizola guakuatesele athu ha gujiya giamatshidia gidi mu Biblia? (Tala nji gifuanesa.)
10 Guzola mikanda. Uu nu mu givo 1450 athu akhalele mutshita ba kopi a Biblia nu mago. Mudimo wene wakhalele muzula tangua diavula. Kopi jia Biblia jiakhalelego mumonega, jiakhalele mudigiwa mu ndando yakola. Tangua azolele mashinyi ha guzolela mikanda, yakhalele yaleba ha guzola Biblia jiavula nu ha gujikaphela athu.
11 Gubalumuna mikanda. Ivo yavula Biblia yakhalele yagusonega mu Latin, phamba athu alongugile makhalasa akhalele guyikotelesa. Uvi tangua asendesele guzola mikanda yavula, athu akhalele muvuila Nzambi woma, asendesele gubalumuna Biblia mu mazuelelo anyi athu avula akhalele mukotelesa. Athu akhalele mutanga Biblia, amonele giwa luholo lua gufuanesa ndaga mafumu a ikombelelo akhalele gualongesa nu jinyi Biblia yana longesa diago.
Athu akhalele mutumagela Nzambi akuatesele athu ako ha guzoga mu Babilona Yakoma (Tala paragrafe 12-14) c
12-13. Hana gifezegeselo gidi mumonesa luholo mu 1835 athu akhalele mulonguga Biblia asendesele gumonesa haphelo malongo a ikombelelo ya mambo.
12 Ikadigilo yana kuatesa ha gulonguga Biblia. Athu akhalele mulonguga Biblia muabonga amonele gudisha mu ndaga a alongesele nu jinyi akhalele mutanga mu Biblia. Mafumu a ikombelelo avuile khabu jiavula tangua athu akhalele mulonguga Biblia asendesele guwambela athu ako ndaga akhalele mulonguga. Ha gufezegesa, mu givo 1835 athu ako akhalele mulonguga Biblia, asendesele guzola ba trakte akhalele mumonesa haphelo malongo a mambo anyi enya ikombelelo akhalele mulongesa.
13 Hehi nu givo 1835 phangi mumoshi wakhalele muvila Nzambi woma jina dienji Henry Grew, wazolele trakte imoshi yakhalele muzuelela ndaga yana buila muthu gula wafua. Mu ukuateshi wa Biblia, phangi muene wamonesele mu trakte yene egi, phamba Yehowa wajiya guhana muthu monyo wunu wajiyilego gufua. uvi muthu muene hakhenji gajiyilego guvualewa nu monyo wunu wajiyilego gufua gifua luholo ikombelelo yavula yakhalele mulongesa. Mu 1837 George Storrs wamonele kopi imoshi ya trakte yene mukatshi dia train. Wayitangele nu watshiginyile diago egi waheta giamatshidia. Wazudile desizio diaguwambela athu ako ndaga jialongugile muene. Mu 1842 watshitshile ba diskur akhalele nu muto wa lumene egi: “Athu Abola Ajiyilego Gufua ba?” Ndaga jiasonegele phangi George Storrs jiakuatesele phangi Charles Taze Russell hakhalele muene muvuala.
14. Mu luholo lutshi phangi Russell nu mafuta enji ahetele gubonga mu mudimo wagulondega njila ya gifuanesa wakalegewe ivo yavula gutuama? (Tala nji gifuanesa.)
14 Mu luholo lusthi phangi Russell nu mafuta enji ahetele gubonga mu mudimo wa gulondega njila ya gifuanesa wakalegewe ivo yavula gutuama? Tangua akhalele mulonguga akhalele mukalegela ba lexique, ba concordances, nu Biblia jiagudisha. Ima eyi yagasue yalondewe gutuama egi ene asendese mudimo wawo. Ahetele nji gubonga mu ba recherche a Biblia atshitshile phangi Henry Grew, George Storrs, nu athu ako. Phangi Russell nu mafuta enji ahanele mago mu mudimo wa gulondega njila ya gifuanesa, luholo azolele mikanda yavula nu ba trakte akhalele muzuelela ndaga Biblia yana longesa.
15. Ndaga itshi ya ndando yakalegewe mu 1919?
15 Mu 1919, akombeledi a Nzambi azogele mu uhiga wa Babilona Yakoma. Mu givo giene, “muhiga wafubidila nu watema” wasendesele gutshita mudimo hagula athu adi nu mitshima yabonga, ajiya gusendesa guwenda mu ‘Njila ya Gijila.’ (Mat. 24:45-47) Mudimo wakalegele athu ako ha gulondega njila yene sendese mualeha, wakuatesele athu asendesele guwenda mu njila yene yakoma ha gulonguga ndaga jiavula jiatadila Yehowa nu mafelela enji. (Ish. 4:18) Yaakuatesele nji ha gujinga mu gudivua nu mikhuala ya Yehowa. Yehowa gatangijilego egi akombeledi enji adi naye gusombegesa mu mbala imoshi. Uvi wakuatesele akombeledi enji ha gusombegesa mage-mage. (Tala galuanda “ Yehowa Wana Kuatesa Akombeledi Enji ha Gusombegesa Mage-mage.”) Mbatukhala diago nu gusuanguluga guavula tangua mukut’etu agasue mbatukhala musuanguluisa Yehowa mu ndaga jiagasue tuana tshita!—Kol. 1:10.
UU NU MANGINO ‘NJILA YA GIJILA’ YANA KHALA GUENE
16. Sendese mu 1919, mudimo utshi wana tshitshiwa ha gulondega ‘Njila ya Gijila’? (Yeshaya 48:17; 60:17)
16 Hagula njila yikhale yabonga idi naye gulondewa tangua diagasue. Sendese mu 1919, mudimo wagulonda ‘Njila ya Gijila’ wana landula gukalegewa hagula athu avula azoge mu Babilona Yakoma. Muhiga wafubidila nu watema atombele, wasendesele gutshita mudimo. Hene mu 1921, azolele gikadigilo gimoshi giagulongugila Biblia mukunda nu athu akhalele musendesa gulonguga giamatshidia gidi mu Biblia. Mukanda wene wakhalele mutamegewa egi La Harpe de Dieu, azolele mukanda wene ba kopi hehi nu 6 million mu mazuelelo 36, athu avula alongugile giamatshidia mu mukanda wene. Mangino tudi nu mukanda wabonga uhe-uhe, Heta Monyo wa Ivo nu Ivo! Wana gutukuatesa ha gulonguga Biblia nu athu. Mu masugu awa a gisugishilo Yehowa udi mukalegela ulondegi wenji ha gutuhana malongo abonga adi mu Mbimbi yenji, hagula mukut’etu agasue tuajiya gulandula guwenda mu ‘Njila ya Gijila.’—Tanga Yeshaya 48:17; 60:17.
17-18. ‘Njila ya Gijila’ mbayitubata gui?
17 Tuajiya guzuela egi ikhale mutangua disthi muthu watshigina gulonguga Biblia, wana heta luendu lua gusendesa guwenda mu ‘Njila ya Gijila.’ Athu ako ana wenda phamba ndambo mu njila yene yakoma, gungima abembi gawo. Uvi ako ana landula guwenda mu njila yene uu nu tangua mbaheta gu gisugishilo. Gisugishilo giene gidi isthi?
18 Mukunda nu athu adi nu felela dia guya mu dilu, ‘Njila ya Gijila’ mbayaabata mu “phaladiso ya Nzambi” mu dilu. (Gumo. 2:7) Mukunda nu athu anyi adi nu felela dia gujinga ha mavu njila yene yakoma mbayatuameza ha gubua athu atagana gu gisugishilo gia uhinyinyi wa ivo 1 000. Gula mangino udi muwenda mu njila yene yakoma utadigo gungima. Hene landula guwenda mu njila yene uu nu tangua mbawuheta mu mavu ahe-ahe. Tudi gumitoga ha gulandula guwenda muabonga mu njila yene.
LUNGIMBO 24 Zenu gu Mulundu wa Yehowa
a Yehowa watamegele njila yakoma ya gifuanesa yakhalele mukatuga gu Babilona muya gu Isalele egi: ‘Njila ya Gijila.’ Mangino gudi nji nu njila ya gifuanesa mukunda nu akombeledi a Yehowa. Sendese mu 1919 G.Y., athu avula ana bemba Babilona Yakoma ha guza muwenda mu ‘Njila ya Gijila.’ Mukut’etu agasue tudi naye gulandula guwenda mu njila yene uu nu gu gisugishilo.
c UKOTELESHI WA GIFUANESA: Phangi Russell nu mafuta enji adi mukalegela ikadigilo yagulongugila Biblia yalondewe gutuama egi ene asendese mudimo.
