1. Biblia yana monesa egi guzumba gua giamatshidia guana khala luholo lutshi?

 “TSHUYA tua [guzumba] tudi mulema muavula tshuya tua Yah. Nga ene meya avula, ajiyilego gujima tshuya tua guzumba, mita yavula nji, yajiyilego nji gujima tshuya tuene.” b (Lungi. 8:6, 7) Jiji mbimbi jiabonga diago mukunda nu guzumba gua giamatshidia! Mbimbi eji jidi muhana diago gikhesa gudi athu adizudile gale mu ulo ha gulandula gudizumba muavula.

2. Itshi yala nu mukaji’enji adi naye gutshita hagula guzumba guawo gulebigo?

² Hagula yala nu mukhetu adizumbe masugu agasue mu ulo wawo muthu wagasue mukatshi diawo udi naye gutshita ngolo gukhanda yenji. Ha gufezegesa, hagula tshuya tulandule gulema, muthu udi naye gulandula gumba jikhunyi. Gula muthu gashigo mulandula gumba jikhunyi, tshuya tuana jima. Luholo lumoshi nji guzumba gua yala nu mukhetu guajiya gusala guakola, gula adi mulandula gukolesa ufuta wawo. Matangua ako, yala nu mukaji’enji ajiya gudivua gifua guzumba guawo guasendesa guleba. Ajiya gudivua ngenyi tangua adi mutagana nu lamba dia guheta mbongo, tangua adi nu misongo mu fami nga tangua adi mutagana nu lamba dia gusansa anawo. Gula muadizudile gale mu ulo, luholo lutshi muajiya gulandula gubamba “tshuya tua Yah” mu ulo wenu? Mu longo edi tuza muzuelela ndaga thathu jiza gumikuatesa ha gulandula gukolesa ufuta wenu nu ha gukhala mu gusuanguluga mu ulo wenu. c

3. Mukanda wa Mulongeshi 4:12 udi mumonesa egi luholo lutshi gukudisa ufuta nu Yehowa guajiya gukuatesa yala nu mukhetu ha gubamba guzumba guawo? (Tala nji gifuanesa.)

³ Ha gubamba “tshuya tua Yah” mu ulo, yala nu mukhetu adi naye gutshita ngolo ha gukolesa ufuta wawo nu Yehowa. Luholo lutshi gutshita ngenyi guajiya guakuatesa mu ulo wawo? Tangua yala nu mukhetu adi muzula nu ndando ufuta wawo nu Sh’awo wa mu dilu nu gukalegela malongo enji, mbayakuatesa hagutuna ndaga jiajiya gulebesa guzumba mukatshi diawo. (Tanga Mulongeshi 4:12.) Athu ana tumagela Yehowa ana tshita ngolo ha gulandula makalegelo enji gifua, gisemo, guhuiminyina nu gutotesela athu ako. (Ef. 4:32–5:1) Gula yala nu mukhetu adi mulandula makalegelo ene, yana khala yaleba gudi ene ha gulandula gukudisa guzumba guawo. Phangi wa mukhetu Lena wabalegesa gale ivo 25 mu ulo. Udi muzuela egi: “Yana khala yaleba ha guzumba nu gunemesa muthu wana tumagela Yehowa.”

4. Mukunda natshi Yehowa watombele Yozefe nu Madiya ha gubua mvuaji jia Masiya?

⁴ Tuzuelelenu gifezegeselo gidi mu Biblia. Guakhalele nu athu avula mu giphuta gia Davidi, uvi Yehowa watombele phamba Yozefe nu Madiya ha gubua mvuaji jia Masiya. Mukunda natshi? Handaga muyadi awo akhalele nu ufuta wakola nu Yehowa. Yehowa wajiyile egi mbaamusha ha fundo dia thomo mu ulo wawo. Longo ditshi athu adizudile gale mu ulo ajiya guzula gudi Yozefe nu Madiya?

5. Malongo atshi mala ajiya guzula mu gifezegeselo gia Yozefe?

⁵ Yozefe wakhalele mulandula utuameji wa Yehowa muphushi. Ndaga yene yamukuatesele ha gukhala yala wabonga. Wahetele malongo gudi Nzambi mukunda nu fami yenji mbala thathu. Matangua ene agasue wakhalele mutumagela malongo ene ikhale yakhalele lamba. (Mat. 1:20, 24; 2:13-15, 19-21) Gutumagela malongo a Nzambi guakuatesele Yozefe ha gubamba Madiya nu ha gumukuatesa. Ndaga jiakhalele mukalagala Yozefe jiatumile Madiya ha gumuzumba nu gumunemesa luko muavula! Mala ajiya gulandula gifezegelo gia Yozefe tangua adi mukalegela malongo a Biblia ha gubamba fami jiawo. d Gula muakalagala ngolo ha gutumagela malongo ene nga tangua ishigo yaleba ha gualandula, mbamuzumba akaji’enu, mbamukolesa nji ulo wenu. Phangi mumoshi wa mukhetu gu gifutshi gia Vanuatu, watagenesa gale ivo 20 mu ulo. Udi muzuela egi: “Tangua mulumi’ami wana tshita ngolo ha gutumagela utuameji wa Yehowa, ngana gumunemesa muavula diago. Ngana gudivua muabonga, yana gungukuatesa nji ha gutumagela ba desizo enji.”

6. Malongo atshi aphangi a akhetu ajiya guzula mu gifezegeselo gia Madiya?

⁶ Madiya wakhalele nu ufuta wakola nu Yehowa. Ikhale Yozefe wakhalele mukalagala ndaga jia mu nyuma mu fami, uvi Madiya wakhalele nji muzula tangua dia gukolesa gutshigina guenji  gudi Yehowa. Wakhalele mujiya Mbimbi ya Nzambi muabonga. (Tala note d’étude idi mu Luka 1:46.) Wakhalele nji muzula tangua dia gutangigiza muabonga ndaga jiakhalele mutanga muene. (Luka 2:19, 51) Ufuta wenji nu Yehowa wamukuatesele ha gukhala diago mukhetu wabonga mu ulo. Mangino nji akhetu avula ana tshita ngolo ha gulandula gifezegeselo gia Madiya. Ha gufezegesa, phangi Emiko udi muzuela egi: “Tangua ngakhalele undumbu, ngakhalele nu programe yami ya gutshita ndaga jia mu nyuma. Uvi tangua ngazudiwe mu ulo mulumi’ami wakhalele mutshita gisambu, wakhalele nji mutuameza ndaga jiko jia mu nyuma. Ngakotelesele egi ngakhalelego luko nu programe yami hakhami ya ndaga jia mu nyuma gifua luholo ngakhalele naye thomo. Ngakhalele munengenena phamba mulumi’ami ha gutshita ndaga jiene. Ngamonele egi ngakhalele naye gukolesa ufuta wami hakhami nu Yehowa. Mangino ngana zula tangua dia gukhala hakhami nu Nzambi wami ha gutshita gisambu, gutanga Biblia nu gutangigiza ndaga jiene.” (Gal. 6:5) Aphangi a akhetu, gula mudi mulandula gukolesa ufuta wenu nu Yehowa, alumi’enu mbaakhala nu ndaga jiavula mbajiaatuma ha gusuanguluga nu enue, mbaamizumba nji luko muavula.​—Ish. 31:30.

7. Itshi yala nu mukaji’enji ajiya gulonguga mu gifezegeselo gia Yosefe nu Madiya mu ndaga yatadila gukombelela hamoshi?

⁷ Yozefe nu Madiya akhalele mutshita hamoshi ha gubamba ufuta wakola nu Yehowa. Akhalele mukotelesa egi gukombelela Yehowa hamoshi mu fami guakhalele diago nu ndando yavula. (Luka 2:22-24, 41; 4:16) Yajiya gukhala egi yakhalele lamba ha gutshita ngenyi tangua ana asendesele guvula uvi alanduile guyitshita. Gidi diago gifezegeselo giabonga mukunda nu athu adizudile gale mu ulo! Gula udi nu ana gifua luholo Yozefe nu Madiya akhalele nawo, yajiya gukhala lamba ha guya mu gudibungisa gua mu hungu nga gutshita gukombelela gua mu fami phoso nu phoso. Yajiya gukhala nji lamba hagula yala nu mukhetu azule tangua dia gulonguga nu gukombelela Yehowa hamoshi. Aphangi a mala nu a akhetu adizudile gale mu ulo, jiyenu egi gula mudi mukombelela Yehowa hamoshi, mbamukolesa ufuta wenu nu Yehowa, enue nji mbamukhala nu ufuta wakola mu ulo wenu. Khalenu mutshita yagasue ha guhaga gukombelela ha fundo dia thomo mu ulo wenu.

8. Itshi athu adizudile gale mu ulo adi mutagana nu malamba adi naye gutshita ha guheta gubonga gua gukombelela Yehowa hamoshi mu fami?

⁸ Itshi muajiya gutshita gula mudi mutagana nu malamba mu ulo wenu? Mutangua diene yajiya gukhala lamba ha gutshita gukombelela gua mu fami hamoshi. Gula idi ngenyi, muajiya gusendesa guzuelela ndaga yazonda yana gumisuanguluisa inyi muyadi’enu mudi mutshigina guzuelela. Ndaga yene yajiya gumikuatesa ha gudizumba muavula nu gutshigina luko gukombelela Yehowa hamoshi mu ulo wenu.

9. Mukunda natshi yala nu mukhetu adi naye gubalegesa tangua hamoshi?

⁹ Mala nu akhetu adizudile gale mu mulo, hagula guzumba guenu gukhale guakola khalenu mubalegesa tangua hamoshi. Gula watshita ngenyi, mbayigukuatesa ha gujiya muabonga matangi a mulumi’aye nga mukaji’aye nu luholo ludi gudivua muene. (Gis. 2:24) Tutadilenu ndaga yabuidile phangi Lilia nu Ruslan masugu azonda gungima dia gudizula mu ulo. Ivo 15 yabalega gale sendese ndaga yene yaabuidile. Udi muzuela egi: “Tuakotelesele egi tuakhalelego mubalegesa tangua diavula hamoshi gifua luholo tuakhalele mutangiza. Lusugu nu lusugu tuakhalele nu ndaga jiavula jia gutshita gifua, guya gu mudimo, gulondega inzo nu ginemo gia ana. Tuamonele egi gula tushigo mubalegesa tangua hamoshi mbatushigo mukhala nu ufuta wakola.”

10. Luholo lutshi yala nu mukaji’enji ajiya gukalegela longo didi mu Efeso 5:15, 16?

¹⁰ Itshi yala nu mukhetu adi naye gutshita ha gubalegesa tangua hamoshi? Ajiya gulonda programe ha gukhala mubalegesa tangua hamoshi. (Tanga Efeso 5:15, 16.)  Phangi wa yala Uzondu gu Nigeria udi muzuela egi: “Tangua ngana londa programe ya midimo yami, ngana nginyisa nji tangua ngudi naye gubalegesa hamoshi nu mukaji’ami. Ngana haga ndaga yene ha fundo dia thomo.” (Fili. 1:10) Tutadilenu luholo phangi Anastasia mukaji’a mutadi muwendji gu Moldova wana kalegela tangua dienji muabonga. Udi muzuela egi: “Tangua mulumi’ami wana khala nu midimo yavula ya gutshita, ngana kalegela tangua diene ha gutshita midimo yami hakhami. Gutshita ngenyi guana gutukuatesa ha gubalegesa tangua hamoshi gungima.” Uvi itshi muajiya gutshita gula programe yenu ishigo gumikuatesa ha gubalegesa tangua hamoshi?

11. Midimo itshi Aquila nu Priscilla akhalele mutshita hamoshi?

¹¹ Athu adizudile gale mu ulo ajiya gulandula gifezegeselo gia Aquila nu Priscilla anyi aklisto a mu siekle ya thomo akhalele munemesa. (Roma 16:3, 4) Biblia ishigo muzuelela ndaga jiavula jiatadila ulo wawo. Uvi idi mumonesa egi akhalele mutshita mudimo hamoshi akhalele nji mulongesa nu gukuatesa athu ako hamoshi. (Makal. 18:2, 3, 24-26) Gishina giene, mafundo agasue Biblia yana zuelela Aquila nu Priscilla, yana guazuelela hamoshi.

12. Itshi yala nu mukaji’enji adi naye gutshita ha gubalegesa tangua diavula hamoshi? (Tala nji gifuanesa.)

¹² Luholo lutshi athu adizudile gale mu ulo ajiya gulandula gifezegeselo gia Aquila nu Priscilla? Tangiza ndaga jiavula muajiya gutshita. Mukatshi dia ndaga jiene gudi nu ndaga jinyi muajiya gutshita hamoshi nu mulumi’aye nga nu mukaji’aye jinyi wana tshita hakhaye ba? Ha gufezegesa, Aquila nu Priscilla akhalele mulongesa hamoshi. Aye nji wana longesa hamoshi nu mulumi’aye nga nu mukaji’aye ba? Akhalele nji mutshita mudimo hamoshi. Yajiya gukhala egi aye nu mulumi’aye muanago gutshita mudimo umoshi. Uvi muajiya gutshita midimo ya monzo hamoshi ba? (Mulo. 4:9) Gula mudi gudikuatesa ha gutshita mudimo hamoshi, mbamudivua gifua athu ana tshita mudimo hamoshi, mbayimikuatesa nji ha guta maga muavula. Phangi Robert nu Linda atagenesa gale ivo 50 sendese adizudile mu ulo. Udi muzuela egi: “Ndaga yadiago idi egi, tuana khala ndo nu tangua diavula dia gubalegesa hamoshi ha guhuluguga. Uvi gula ngudi muwovua malonga, mukaji’ami wanaza gungukuatesa ha guadipha. Nga gula ngudi mutshita mudimo mu luphango, wanaza nji gungukuatesa; ngana gudivua diago muabonga. Gutshita ndaga hamoshi guana kolesa ufuta wetu. Guana kudisa nji guzumba guetu.”

13. Itshi yala nu mukaji’enji ajiya gutshita ha gukhala hamoshi?

¹³ Jiyenu egi gukhala hamoshi gushigo mukotelesa egi mbamukolesa ufuta wenu. Phangi mumoshi wa mukhetu gu Brésil udi muzuela egi: “Mangino gudi nu ndaga jiavula jiajiya gubalegesa tangua dietu. Ngenyi yajiya gututuma ha gutangiza egi luholo tuana khala inzo imoshi idi mukotelesa egi tuana balegesa tangua hamoshi. Ngajiyile egi gukhala hamoshi gudi mukotelesa, gutshita ndaga jiko jiavula. Mukatshi dia ndaga jiene, ngudi naye nji gumonesela mulumi’ami gisemo.” Tutalenu  ndaga phangi Bruno nu mukaji’enji Tays ana kalagala ha gudimonesela gisemo. Udi muzuela egi: “Mutangua dietu dia guhuluguga, tuana kanga telefone jietu ha gubalegesa tangua hamoshi.”

14. Itshi yala nu mukaji’enji ajiya gutshita gula ashigo musuanguluga gubalegesa tangua hamoshi?

¹⁴ Uvi itshi yala nu mukaji’enji ajiya gutshita gula ashigo musuanguluga gubalegesa tangua hamoshi? Yajiya gukhala egi muana zumba ndo ndaga jia luholo lumoshi nga ndo muana gudihana khabu. Gula idi ngenyi itshi muajiya gutshita? Tuvutugilenu gifezegeselo gia tshuya tuamonyi guthunda. Gula wahaga tshuya, tuana gudivudisa ndo mbala yimoshi. Udi naye gulandula gumba khunyi jiakoma hazonda-zonda hagula tshuya tuene tuvule. Luholo lumoshi nji, lusugu nu lusugu wajiya gusendesa gubalegesa tangua diazonda hamoshi nu mulumi’aye nga nu mukaji’aye. Tshitenu ndaga jiajiya gumisuanguluisa muyadi’enu. Uvi mutshitshigo ndaga yajiya guhana muthu muko khabu. (Yak. 3:18) Gula muasendesa gutshita ndaga jiazonda-zonda, mbayimikuatesa ha gukudisa guzumba guenu.

15. Mukunda natshi gudinemesa gudi diago nu ndando yavula mu ulo?

¹⁵ Gudinemesa gudi diago nu ndando yavula mu ulo. Gudi gifua muhehe wana kuatesa tshuya ha gulema muavuala. Gula muhehe wene ushigo, tshuya tuana jima. Luholo lumoshi nji gula gudinemesa gushigo mu ulo, guzumba gua yala nu mukhetu guajiya guleba. Mu guzuela guko, gula yala nu mukhetu adi gudinemesa mu ulo, ana kolesa guzumba guawo. Uvi jiya egi gula udi mutangiza egi wana nemesa mulumi’aye nga mukaji’aye idi ndaga yabonga. Uvi ndaga yabalega gubonga idi egi, mulumi’aye nga mukaji’aye udi naye gudivua egi wana gumunemesa. Phangi Penny nu mukaji’enji Aret atagenesa gale ivo 25 mu ulo. Udi muzuela egi: “Luholo tuana gudinemesa, yana gutukuatesa ha gudizumba luko muavula. Yana khala yaleba ha guzola matangi tudi nawo, handaga tuana zula matangi a muthu wagasue mukatshi dietu nu ndando.” Itshi wajiya gutshita ha gukuatesa mulumi’aye nga mukaji’aye ha gudivua egi wana gumunemesa? Tuzuelelenu gifezegeselo gia Abalahama nu Sara.

16. Longo ditshi mala ajiya guzula mu gifezegeselo gia Abalahama? (1 Phetelo 3:7) (Tala nji gifuanesa.)

¹⁶ Abalahama wakhalele munemesa Sara. Wakhalele mutegelela Sara muabonga, wakhalele nji mutshita yagasue ha gukotelesa luholo Sara wakhalele gudivua. Lusugu lumoshi Sara wakhalele nu gikenene. Wawambelele Abalahama luholo gakhalele gudivua. Wazuelele nji egi gubola guakhalele gua Abalahama. Abalahama gamuvuidilego khabu, gamuwambelelego nji ndaga jiabola. Wajiyile egi Sara wakhalele gumutumagela, wakhalele nji gumukuatesa mu ba desizio enji. Abalahama wamutegelele, wakambele nji gulondega mulonga wene. (Gis. 16:5, 6) Longo ditshi tuajiya guzula? Aphangi a mala, mudi nu ginemo gia guzula ba desizio mu fami jienu. (1 Kol. 11:3) Ha gumonesa egi wana zumba mukaji’aye, udi naye gutoga matangi enji gutuama dia guzula desizio gula ndaga yene idi mutoga egi muene nji ajiye. (1 Kol. 13:4, 5) Matangua  ako mukaji’aye wajiya guvua gikenene nu wajiya gukhala nu funu ya guguwambela luholo adi gudivua. Wana gumutegelela muabonga ha gumonesa egi udi gumunemesa ba? (Tanga 1 Phetelo 3:7.) Phangi Angela nu Dmitry atagenesa gale ivo hehi nu 30 mu ulo. Phangi Angela udi mumonesa luholo mulumi’enji wana gumunemesa. Udi muzuela egi: “Dmitry wana khala hehi ha gungutegelela gula ngudi nu gikenene nga ngudi phamba nu funu ya guzuela. Wana gungumonesela guhuiminyina ikhale ngudi muzuela muavula.”

17. Malongo atshi aphangi akhetu ajiya guzula mu gifezegeselo gia Sara? (1 Phetelo 3:5, 6)

¹⁷ Sara wamonesele egi wakhalele munemesa Abalahama, hakhalele muene mutumagela ba desizio enji. (Gis. 12:5) Lusugu lumoshi, Abalahama wazudile desizio dia guyamba ngenji nu guahana ima ya gudia. Watogele Sara ha gubemba mudimo wakhalele mutshita muene ha gulonda mapha avula mukunda nu athu ene. (Gis. 18:6) Sara watshitshile muphushi ndaga ya mutogele Abalahama. Aphangi akhetu, muajiya gulandula gifezegeselo gia Sara, gula mudi mutumagela ba desizio awo. Gutshita ngenyi mbagukolesa guzumba guenu mu ulo. (Tanga 1 Phetelo 3:5, 6.) Phangi Dmitry tuazuelela mu paragrafe ya guthunda, udi mumonesa luholo mukaji’enji wana gumunemesa. Udi muzuela egi: “Ngana suanguluga luholo Angela wana tshita ngolo ha gutumagela ba desizio ami ikhale matangua ako ashigo gumusuanguluisa. Ikhale ndaga jiabalegelego muabonga, ganago guzuela ndaga jiabola mukunda nu ame.” Idi diago ndaga yaleba ha guzumba muthu wana gugunemesa!

18. Luholo lutshi athu adizudile gale mu ulo ajiya guheta gubonga gula adi mutshita ngolo ha gukolesa guzumba guawo?

¹⁸ Mangino Satana wana tshigina egi Aklisto adizudile gale mu ulo abembe gudizumba. Wana jiya egi gula ashigo luko gudizumba, ajiya gusendesa gutuna Yehowa. Uvi guzumba gua giamatshidia guanago guhua! Tudi mutshigina egi guzumba gudi mu ulo wenu gukhale gifua guzumba gudi muzuelewa mu Lungimbo lua Salomo. Zulenu desizio dia guhaga Yehowa ha fundo dia thomo mu ulo wenu, khalenu mubalegesa tangua hamoshi, khalenu nji gudinemesa nu gudikuatesa. Gula mudi mutshita ngenyi, ulo wenu mbawutumbuisa Yehowa Nzambi wa guzumba gua giamatshidia gifua luholo tshuya tudi tuagulondega muabonga tuana landula gulema, guzumba guenu nji mbagulandula gukola.