LONGO DIA 21
Luholo Yehowa Wana Hana Mvutu gu Isambu Yetu
“Tudi mujiya egi mbatuheta ima yagasue tuana lomba handaga tuamulombi naye.”—1 YONE 5:15.
LUNGIMBO 41 Ô Dieu, entends ma prière
NDAGA JIDI MU LONGO EDI a
1-2. Itshi tuajiya gudihula mu ndaga yatadila isambu yetu?
WADIHUDILE gale ha gujiya gula Yehowa wana hana mvutu gu isambu yaye ba? Gula idi ngenyi, ushigo hakhaye. Aphangi avula a mala nu a akhetu ana gudihula nji muhu owu tangua ana tagana nu malamba. Gula esue nji tudi mutagana nu malamba, yajiya gukhala lamba ha gujiya luholo Yehowa wana hana mvutu gu isambu yetu.
2 Tuza mumona mukunda natshi tudi naye gusha mutshima egi Yehowa wana hana mvutu gu isambu ya akombeledi enji. (1 Yone 5:15) Tuza nji muheta mvutu gu mihu eyi: Mukunda natshi matangua ako yajiya gumonega gifua Yehowa gashigo muhana mvutu gu isambu yetu? Mu maluholo atshi Yehowa wana hana mvutu gu isambu yetu mangino?
YEHOWA WAJIYA GUHANA MVUTU GU ISAMBU YETU MU LUHOLO TUATANGIJILEGO
3. Mukunda natshi Yehowa wana tshigina egi tumukombelele?
3 Biblia yana gutushiginyisa egi Yehowa wana gutuzumba muavula nu tuana khala nu ndando gu meso enji. (Hag. 2:7; 1 Yone 4:10) Hene wana gutuwambela egi, tumutoge ukuateshi mu gisambu. (1 Phet. 5:6, 7) Wana tshigina gutukuatesa ha gukhala nu ufuta wakola n’enji nu ha gukolesela tangua tudi mutagana nu malamba.
Yehowa wahanele Davidi mvutu gu isambu yenji ha muhuluishile muene ha mago a mbalagaji jienji (Tala paragrafe 4)
4. Luholo lutshi tudi mujiya egi Yehowa wana hana mvutu gu isambu ya akombeledi’enji? (Tala nji gifuanesa.)
4 Tangua tuana tanga Biblia, tuana kotelesa egi Yehowa wahanele mvutu gu isambu ya akombeledi enji. Gifezegeselo gia nanyi gidi gugujila mu matangi? Yajiya gukhala egi udi mutangiza gifezegeselo gia Fumu Davidi. Mbalagaji jiavula jiakhalele mukamba gumushiya. Hene, mbala jiavula wakhalele mutoga ukuateshi gudi Yehowa mu gisambu. Mutangua dimoshi ngenyi wabubile Yehowa egi: ‘O Yehowa, vua gisambu giami; tegelela tangua ngudi gugutoga ukuateshi. Aye udi watagana nu wa giamatshidia, nguhane mvutu.’ (Ngi. 143:1) Yehowa wahanele mvutu gu isambu yakhalele mutshita Davidi ha gumuhuluisa. (1 Sam. 19:10, 18-20; 2 Sam. 5:17-25) Davidi wazuelele nu mutshima wagasue egi: ‘Yehowa wana khala hehi nu athu anyi ana gumutamega.’ Esue nji tudi naye gutshigina ndaga yene.—Ngi. 145:18.
Yehowa wahanele nji mvutu gu isambu ya Phaula luholo wamuhanele ngolo wakhalele najio funu ha gukolesela (Tala paragrafe 5)
5. Akombeledi a Yehowa a mutangua dikulu akhalele muheta mvutu gu isambu yawo tangua diagasue gifua luholo akhalele mutangiza ba? Hana gifezegeselo. (Tala nji gifuanesa.)
5 Yehowa wajiya guhana mvutu gu isambu yetu mu luholo tuatangijilego. Ndaga yene yabuidile nji mupostolo Phaula. Watogele Nzambi ha gumukatula “muya mu muila.” Phaula watogele Nzambi mu gisambu mbala thathu ha gumukatula muya wene. Yehowa wahanele mvutu gu isambu yene ba? Ayi, uvi yakhalelego mu luholo Phaula wakhalele mutangiza. Yehowa gamukatudilego muya wene mu muila, uvi wamuhanele ngolo jia gulandula gumukombelela nu mutshima umoshi.—2 Kol. 12:7-10.
6. Matangua ako mukunda natshi tuajiya gumona egi Yehowa gashigo muhana mvutu gu isambu yetu?
6 Esue nji matangua ako tuajiya guheta mvutu gu isambu yetu mu luholo tuakhalelego mutangiza. Tudi naye sha mutshima egi Yehowa wana jiya muabonga luholo lua gutukuatesa. Wajiya nji “gutukalegela ndaga jiavula diago gubalega ima yagasue tuana gumutoga nu tuana tangiza.” (Ef. 3:20) Gishina giene, wajiya guhana mvutu gu isambu yetu mutangua nga mu luholo tuakhalelego mutangiza.
7. Mukunda natshi matangua ako tuajiya gusombegesa ndaga tudi mutoga Yehowa mu gisambu? Hana gifezegeselo.
7 Tuajiya gusombegesa ndaga tudi mutoga Yehowa, gula tudi mukotelesa muabonga gutshigina guenji. Tuzuelelenu Gifezegeselo gia phangi Martin Poetzinger. Matangua azonda gungima dia guzula mukaji’enji mu ulo, phangi Poetzinger wambiwe mu bologo gu camp de concentration nazi. Thomo watogele Yehowa ha guzoga mu bologo ha guya mukuatesa mukaji’enji nu hagulandula gulongesa lukuma luabonga. Uvi gungima dia phoso mbadi, gakhalelego mumona nga gima gimoshi giakhalele gumujiyisa egi Yehowa udi gumukuatesa ha guzoga mu bologo. Wasendesele gukombelela egi: “Yehowa ngabuba nguwambele ndaga udi mutshigina egi ngutshite.” Gungima wasendesele gutangiza luholo aphangi ako akhalele mukolesela mu bologo diene. Aphangi avula mukatshi diawo akhalele gudisagesa mukunda nu akaji’awo nu anawo. Gungima phangi Poetzinger wakombelele egi: “Yehowa, mersi mukunda nu mudimo wami uhe-uhe. Ngukuatese ha gukolesa aphangi’ami nu guahana gikhesa.” Phangi Poetzinger watshitshile ivo 9 mu bologo. Mu ivo yene yagasue, wakhalele muhana aphangi ako gikhesa!
8. Itshi tudi naye gujiya tangua tudi mutshita gisambu?
8 Tudi naye gujiya egi Yehowa mbawutagenesa ndaga jiagasue jialayele muene mu tangua diatombele muene. Ha gufezegesa, mbawumanesela ndaga jiana gutusagesa mangino gifua, misongo, gufua, nga malamba ako. Yehowa mbawutagenesa ndaga jiatulayele muene mu Ufumu wenji. (Dan. 2:44; Gumo. 21:3, 4) Uvi Yehowa wabembele egi Satana ahinyine gale mavu. b (Yone 12:31; Gumo. 12:9) Gula Yehowa wamanesela malamba adi mutagana nawo athu mangino, mbayimonega gifua Satana udi mutuameza mavu muabonga. Ikhale tudi munengenena gutagenesewa gua ndaga jiko jiatulayele Yehowa, ishigo mukotelesa egi muene ganago gutukuatesa. Tuzuelelenu maluholo Yehowa wana gutukuatesa.
LUHOLO YEHOWA WANA HANA MVUTU GU ISAMBU YETU
9. Luholo lutshi Yehowa wajiya gutukuatesa tangua tudi nu funu ya guzula ba desizio? Hana gifezegeselo.
9 Yehowa wana gutuhana ndunge. Wana gutuhana ndunge tudi najio funu ha guzula ba desizio abonga. Tuana khala nu funu ya ndunge jia Nzambi, tangua tuana zula ba desizo ajiya gusombegesa monyo wetu, gifua tangua tuana zula desizio dia gusala undumbu nga dia gudizula mu ulo. (Yak. 1:5) Tuzuelelenu lumene lua phangi wa mukhetu Maria c wakhalele undumbu. Wakhalele mutshita mudimo wa muvundji wa njila nu gusuanguluga guagasue. Gungima phangi mumoshi wa yala wamuhudile ulo. Udi muzuela egi: “Tuabuile diago mafuta akola, tuasendesele nji gudizumba muavula. Ngakhalele mujiya egi ngudi naye guzula desizio. Ngakombelele muavula mukunda nu ndaga yene. Ngakhalele nu funu ya utuameji wa Yehowa, uvi ngakhalele mujiya egi ishigo muene mbawunguzudila desizio.” Phangi Maria wakotelesele egi Yehowa wamuhanele ndunge gakhalele mutoga mu isambu. Luholo lutshi? Watshitshile ba recherche mu mikanda yetu, yamukuatesele ha guheta mvutu gu mihu yakhalele gudihula muene. Walanduile nji malongo abonga amuhanele gin’enji. Malongo ene amukuatesele ha gutadila luko ndaga yene muabonga. Gungima wazudile desizio diabonga.
Luholo lutshi Yehowa wana gutuhana ngolo jia gukolesela? (Tala paragrafe 10)
10. Luholo Filiphi 4:13, idi guyimonesa, itshi Yehowa wana tshita ha gukuatesa akombeledi enji? Hana gifezegeselo. (Tala nji gifuanesa.)
10 Yehowa wana gutuhana ngolo jia gukolesela. Mbawutuhana ngolo tudi najio funu ha gukolesela mu malamba, gifua luholo lua tshitshile muene gudi mupostolo Phaula. (Tanga Filiphi 4:13.) Tutadilenu luholo Yehowa wakuatesele phangi Benjamin ha gukolesela mu malamba. Muene nu enya fami yawo, akhalele mu jinga mu camps de réfugiés gu Afrique hakhalele muene muvuala. Phangi Benjamin udi muzuela egi: “Ngakhalele mutshita gisambu mbala jiavula ha gutoga Yehowa ngolo jia gutshita ndaga jidi gumusuanguluisa. Yehowa wahanele mvutu gu isambu yami, wangukuatesele ha gukhala mu guhuima, wanguhanele gikhesa gia gulandula gutshita mudimo wa gulongesa, mikanda yetu nji yangukuatesele ha gukhala nu ufuta wakola nenji.” Udi muzuela luko egi: “Gutanga mene jia akombeledi a Yehowa nu gujiya luholo Yehowa waakuatesele ha gukolesela mu malamba, guangukuatesele ha gusala yagujinginyina gudi muene.”
Wamonele gale luholo Yehowa wakalegele aphangi’etu a mala nu a akhetu ha gugukuatesa? (Tala paragrafe 11-12) d
11-12. Luholo lutshi Yehowa wajiya gukalegela aphangi etu aklisto ha guhana mvutu gu isambu yetu? (Tala nji gifuanesa.)
11 Yehowa wana kalegela aphangi’etu a mala nu a akhetu ha gutukuatesa. Yesu wakombelele muavula mu phipha ya gisugishilo gutuama egi afue. Wabubidile Yehowa hagula gabembigo egi athu ako atangize egi udi mbundudi. Uvi Yehowa watumile muanjelo wenji mumoshi ha gumuhana ngolo. (Luka 22:42, 43) Yehowa wana gutukuatesa nji mu njila ya aphangi etu a mala nu a akhetu. Ha gufezegesa, phangi mumoshi wajiya gututamega gu telefone nga guza gututala ha gutuhana gikhesa. Mukut’etu agasue tuajiya gukamba ba okazio a guwambela aphangi’etu aklisto ‘mbimbi jiabonga.’—Ish. 12:25.
12 Tuzuelelenu lumene lua phangi Miriam. Phoso jiazonda gungima dia gufua gua mulumi’enji, phangi Miriam wakhalele muvua gikenene hakhalele muene monzo hakhenji. Wakhalele gudivua hakhenji, wakhalele nji mudila muavula; gakhalelego nu muthu waguta n’enji maga. Udi muzuela egi: “Ngakhalelego nu ngolo jia gutamega nga muthu mumoshi, hene ngakombelele Yehowa. Tangua ngakhalele mudila nu gukombelela, telefone yami yadidile. Mukulu mumoshi wakhalele gungutamega.” Mukulu muene nu mukaji’enji amuhanele gikhesa. Miriam wakotelesele diago egi Yehowa watumile phangi muene ha gumutamega.
Luholo lutshi Yehowa wajiya gukalegala athu ako ha gutukuatesa? (Tala paragrafe 13-14)
13. Hana gifezegeselo gidi mumonesa luholo Yehowa wajiya gukalegela athu anyi anago gumukombelela ha guhana mvutu gu isambu yetu.
13 Yehowa wajiya gukalegela athu anyi anago gumukombelela ha guhana mvutu gu isambu yetu. (Ish. 21:1) Matangua ako Yehowa wana kalegela athu anyi anago gumukombelela ha guhana mvutu gu isambu ya akombeledi enji. Ha gufezegesa, Yehowa wakalegele Fumu Aletakelesese ha guhana mvutu gu isambu ya Nehemiya ha guvutuga gu Yelusalema hagula wajiya gutunga luko dimbo. (Neh. 2:3-6) Mangino nji Yehowa wajiya gukalegela athu anyi anago gumukombelela ha gutukuatesa mutangua dia lamba.
14. Ndaga itshi yagusuanguluisa mu lumene lua phangi Soo Hings? (Tala nji gifuanesa.)
14 Phangi wa mukhetu Soo Hing wakotelesele egi Yehowa wakalegele munganga wakhalele guasaga ha guakuatesa. Mun’enji wa yala wakhalele mukata misongo yakola ya muto. Mun’awo muene wa yala watshitshile aksida akola. Hene phangi Soo nu mulumi’enji abembele mudimo ha guya gumukuatesa. Mulonga wene waabatele lamba dia makuta. Phangi Soo Hing udi muzuela egi, wamonele gifua gajiyilego gukolesela mu malamba ene. Wawambelele Yehowa ndaga jiagasue jiakhalele mu mutshima wenji, wamutogele ukuateshi. Munganga wakhalele guasaga, wakambele luholo lua guakuatesa. Gishina giene guvernema yaakuatesele, a ahanele nji fundo dia gukhala. Phangi Soo Hing udi muzuela egi: “Yehowa watukuatesele diago mu ndaga yene. Yehowa wana ‘vua diago isambu yetu.’”—Ngi. 65:2.
GUKHALA NU GUTSHIGINA MBAGUTUKUATESA HA GUKAMBA NU GUTSHIGINA MVUTU JIANA GUTUHANA YEHOWA
15. Itshi yakuatesele phangi mumoshi wa mukhetu ha gujiya egi Yehowa wakhalele muhana mvutu gu isambu yenji?
15 Yehowa ganago guhana mvutu gu isambu yetu yagasue gifua luholo tuakhalele mutangiza. Uvi mvutu tuana heta mu isambu yetu, jiana gutukuatesa ha gusala ya gujinginyina gudi Sh’etu wa mu dilu. Hene, khala mukamba gujiya luholo Yehowa wana hana mvutu gu isambu yaye. Phangi wa mukhetu Yoko wakhalele mumona egi Yehowa gakhalelego muhana mvutu gu isambu yenji. Uvi gungima, wasendesele gusonega ndaga jiakhalele mutoga muene Yehowa. Gungima dia masugu, phangi muene wakhalele mutala ndaga jiakhalele musonega muene, wakotelesele egi Yehowa wakhalele muhana mvutu gu isambu yenji ikhale mu ndaga jinyi muene wakhalele wajimbila gale. Lusugu nu lusugu, tudi naye guzula tangua dia gutangiza luholo Yehowa wana hana mvutu gu isambu yetu.—Ngi. 66:19, 20.
16. Luholo lutshi tuajiya gumonesa gutshigina tangua tudi musamba? (Hebelu 11:6)
16 Tuana sha gutshigina gudi Yehowa tangua tuana gumukombelela nu tuana tshigina mvutu jiana gutuhana muene mu isambu yetu ikhale mu luholo lutshi. (Tanga Hebelu 11:6.) Tutadilenu gifezegeselo gia phangi Mike nu mukaji’enji Chrissy. Akhalele mutshigina gukalegela Yehowa gu Betele. Phangi Mike udi muezuela egi: “Ame nu mukaji’ami tuatshitshile ngolo ivo yavula, tuakombelele Yehowa ha gutagenesa felela diene, “uvi atutamegelego.” Phangi Mike nu mukaji’enji Chrissy akhalele nu gutshigina egi Yehowa wakhalele mujiya luholo luabonga lua guakalegela mu mudimo wenji. Alanduile gudihana muavula mu mudimo wa Yehowa, akhalele mutshita mudimo wa muvunji wa njila fundo diakhalele nu funu ya alongeshi. Akhalele nji muhana mago mu mudimo wa gutunga. Mangino adi mutshita mudimo wa mutadi muwendji. Phangi Mike udi muzuela egi: “Yehowa gahanelego mvutu gu isambu yetu gifua luholo tuakhalele mutangiza, uvi watuhanele mvutu mu luholo luko lunu tuatangijilego.”
17-18. Ha gutadila Ngimbo 86:6, 7, mu ndaga itshi tudi naye gusha mutshima?
17 Tanga Ngimbo 86:6, 7. Muyimbi wa ngimbo Davidi wakhalele nu gutshigina egi Yehowa wakhalele mutegelela isambu yenji, wakhalele nji muhana mvutu gu isambu yene. Aye nji wajiya gukhala nu gutshigina gifua Davidi. Ifezegeselo tuamona mu longo edi yatukuatesa ha gutshigina egi Yehowa wajiya gutuhana ndunge nu ngolo tudi najio funu ha gukolesela mu malamba. Wajiya gukalegela aphangi’etu a mala nu a akhetu nga athu anyi anago gumukombelela mangino, ha gutukuatesa mu maluholo a gudisha.
18 Ikhale Yehowa wahanelego mvutu gu isambu yetu gifua luholo tuakhalele mutangiza, uvi tuana jiya egi mbawutuhana mvutu. Mbawutuhana ima tudi nayo funu mu tangua diatagana. Landula gukombelela, sha mutshima egi Yehowa mbawugukuatesa nu ‘mbawutagenesa nzala ya ima yagasue idi nu monyo’ mu mavu ahe-ahe.—Ngi. 145:16.
LUNGIMBO 46 Merci, Jéhovah
a Yehowa udi gututshiginyisa egi mbawuhana mvutu gu isambu yetu gula idi gudivua nu gutshigina guenji. Gula tuatagana nu malamba, tuajiya gusha mutshima egi mbawutukuatesa ha gusala yagujinginyina gudi muene. Tutadilenu luholo Yehowa wana hana mvutu gu isambu yetu.
b Ha gujiya mukunda natshi Yehowa wahanele Satana njila ya guhinyina mavu, tala longo, “Ne perds pas de vue la question la plus importante” mu Inzo Yaleha ya Mutaledi ya Juin 2017 ya Français.
c Mu longo edi majina ako asombegesewe.
d UKOTELESHI WA GIFUANESA: Mama mumoshi nu mun’enji wa mukhetu, aheta mu gifutshi gihe-gihe. Aphangi a mala nu a akhetu adi guayamba nu gisemo giagasue, adi guakuatesa nji.
