1. Ndaga tshi Yehowa udi mutoga akombeledi enji ha gukalagala? (Tala nji gifuanesa.)

 GUDI nanyi tuajiya gutoga ukuateshi nu utuameji? Esue mujiya muabonga mvutu ya muhu owu. Tuajiya gutoga ukuateshi gudi Yehowa mu gisambu. Yehowa wana tshigina egi tutshite ngenyi. Wana tshigina egi tukhale mukombelela ‘tangua diagasue.’ (1 Tes. 5:17) Tuajiya guta maga nu Yehowa mu gisambu nu gumutoga ukuateshi mu ndaga jiagasue jia mu monyo wetu. (Ish. 3:5, 6) Yehowa wana khala nu khadilo dia guhana, hene ganago gututangela mahugo tudi naye gumukombelela.

2. Itshi tuza mumona mu longo edi?

² Tuana hana Yehowa mersi luholo watuhanele luendu lua gumukombelela. Uvi luholo tuana khala nu ndaga jiavula jia gutshita, yajiya gukhala lamba ha guheta tangua dia gutshita gisambu. Yajiya nji gutoga egi tukudise luholo luetu lua gutshita isambu. Ndaga yabonga idi egi, Biblia yajiya gutukuatesa ha gukudisa luholo luetu lua gutshita isambu. Mu longo edi tuza mumona luholo gifezegeselo gia Yesu giajiya gutukuatesa, ha guzula tangua dia gutshita gisambu. Tuza nji mumona ndaga thano jia ndando jiajiya gutukuatesa ha gukudisa luholo luetu lua gutshita gisambu.

3. Itshi Yesu wakotelesele mukunda nu gisambu?

³ Yesu wakhalele mujiya egi Yehowa wana zula isambu yetu nu ndando. Gutuama egi aze ha mavu, wakhalele mumona luholo Sh’enji wakhalele muhana mvutu gu isambu ya akombeledi enji a gujinginyina. Ha gufezegesa, Yesu wakhalele hehi nu Sh’enji  tangua diahanele muene mvutu gu isambu ya Ana ya Davidi ya Eliya nu ya akombeledi enji ako a gujinginyina. (1 Sam. 1:10, 11, 20; 1 Maf. 19:4-6; Ngi. 32:5) Hene, Yesu wawambelele alandudi enji ha gukombelela muavula nu gusha mutshima egi Nzambi mbawuhana mvutu gu isambu yawo!​—Mat. 7:7-11.

4. Isambu ya Yesu idi gutulongesa itshi?

⁴ Yesu wabembele alandudi enji gifezegeselo giabonga tangua diakhalele mutshita muene isambu. Hakhalele muene mulongesa ha mavu, wakhalele mukombelela muavula. Yesu wakhalele nu ndaga jiavula jia gutshita. Athu avula nji akhalele muya gudi muene. Uvi wakhalele muzula tangua dia gutshita gisambu. (Mako 6:31, 45, 46) Wakhalele muzuga nu gimenegena hagula wajiya guheta tangua dia gutshita gisambu. (Mako 1:35) Lusugu lumoshi, wakombelele Yehowa phipha ya mudidi gutuama egi azule desizio dimoshi dia ndando. (Luka 6:12, 13) Yesu wakombelele muavula mu phipha gutuama egi afue, hakhalele muene mutshigina gutagenesa ginemo giakola giamuhanele Nzambi.​—Mat. 26:39, 42, 44.

5. Luholo lutshi tuajiya gulandula gifezegeselo gia Yesu tangua tudi musamba?

⁵ Gifezegeselo gia Yesu gidi gutulongesa egi ikhale tudi nu ndaga jiavula jia gutshita, tudi naye guzula tangua dia gutshita gisambu. Tudi naye gukhala nu programe yabonga ya gutshita gisambu, yajiya gukhala mu gimenegena nga mu ngueze gifua muakhalele mutshita Yesu. Gula tudi mutshita ngenyi mbatumonesa diago gu meso a Yehowa egi tuana zula gisambu nu ndando. Phangi wa mukhetu Lynne udi muwunguluga luko gusuanguluga guakhalele nago muene hajiyile muene mu mbala ya thomo egi Yehowa watuhanele luendu lua gumukombelela. Udi muzuela egi: “Tangua ngajiyile egi ngajiya guzuela nu Yehowa tangua diagasue ngatshigina, yangukuatesele ha gumona egi muene udi diago futa diami wakola nu ha gukudisa nji luholo luami lua gutshita isambu.” Athu avula nji mukatshi dietu ana gudivua ngenyi. Henyaha tuzuelelenu ndaga thano jia ndando tuajiya guzuelela mu isambu yetu.

6. Hagutadila Gumonesa 4:10, 11, Yehowa udi watagana ha guheta itshi?

⁶ Gutumbuisa Yehowa. Mupostolo Yone wamonele mu vizio akulu 24 mutumbuisa Yehowa mu dilu. Akhalele mutumbuisa Nzambi handaga akhalele mujiya egi muene udi watagana ha guheta “lutumbu nu ginemua nu  ngolo.” (Tanga Gumonesa 4:10, 11.) Anjelo agujinginyina nji, ana khala nu ndaga jiavula jiana guatuma ha gutumbuisa Yehowa. Luholo ana khala nenji mu dilu, ana gumujiya muabonga. Ana mona makalegelo enji mu ndaga jiana tshita muene. Ndaga jiana kalagala Yehowa jiana guatuma ha gumutumbuisa.​—Yobo 38:4-7.

7. Ndaga jitshi jiajiya gututuma ha gutumbuisa Yehowa?

⁷ Esue nji tudi naye gutumbuisa Yehowa mu isambu yetu. Tudi naye gumuwambela ndaga jiana gututuma ha gumuzumba nu ha gumunemesa. Tangua udi mutanga nu gulonguga Biblia, tshita ngolo ha gujiya makalegelo a Yehowa ana gugusuanguluisa. (Yobo 37:23; Roma 11:33) Gungima, muwambele luholo wana gudivua mukunda nu makalegelo ene. Tuajiya gutumbuisa nji Yehowa handaga wana gutukuatesa nu wana kuatesa nji aphangi’etu Aklisto a ha mavu a mudidi. Wana gudisagesa muavula mukunda nu esue nu wana gutubamba.​—1 Sam. 1:27; 2:1, 2.

8. Ndaga tshi jiana gututuma ha guhana Yehowa mersi? (1 Tesalonike 5:18)

⁸ Guhana Yehowa mersi. Tuana khala nu ndaga jiavula jiana gututuma ha guhana Yehowa mersi mu isambu. (Tanga 1 Tesalonike 5:18.) Tuajiya guhana Yehowa mersi mukunda nu ima yagasue yabonga tuana khala nayo handaga khapho diagasue diabonga diana katuga gudi muene. (Yak. 1:17) Hagufezegesa, tuajiya gumuhana mersi mukunda nu ima yabonga nu ya gushimana yafugile muene ha mavu. Tuajiya nji gumuhana mersi mukunda nu monyo watuhanele muene, enya fami yetu nu mafut’etu nu felela dietu. Tuana tshigina nji guhana Yehowa mersi luholo luatuhanele muene luendu lua gukuata ufuta n’enji.

9. Mukunda natshi idi nu ndando egi tukudise khadilo dia guhana Yehowa mersi?

⁹ Tudi naye gutshita ngolo ha gutangiza ndaga jiana gututuma ha guhana Yehowa mersi. Ha mavu awa tudi mujinga, athu avula anago guhana mersi. Ana tangiza phamba guheta ima adi nayo funu. Uvi ana tangiza ndo luholo ajiya guhana mersi. Gula esue nji tualandula khadilo dia luholo elu, isambu yetu mbayikhala phamba ya gutoga ima tudi nayo funu. Hagula ndaga yene itubuilago, tudi naye gulandula gukudisa khadilo dia guhana Yehowa mersi mukunda nu ima yana gutuhana muene.​—Luka 6:45.

10. Luholo lutshi guhana Yehowa mersi guakuatesele phangi mumoshi wa mukhetu ha gukolesela mu malamba? (Tala nji gifuanesa.)

¹⁰ Khadilo dia guhana mersi diajiya gutukuatesa ha gukolesela mu malamba. Tuzuelelenu lumene lua phangi wa mukhetu Kyung-sook, luazogele mu Inzo Yaleha Ya Mutaledi ya 15 Janvier 2015 ya Français. Minganga yamuwambelele egi udi nu misongo ya cancer. Wazuelele egi: “Misongo yene yangulebesele diago muila. Ngakhalele muvua gifua ngatotesa ima yagasue, ngakhalele muvua nji woma.” Itshi yamukuatesele ha gukolesela? Udi muzuela egi, gutuama egi abande, wakhalele muya mu veranda ya gosa nu wakhalele musamba mu dijui diakola mukunda nu ima thano yabonga yakhalele  muene mumona mu lusugu ha guhana Yehowa mersi. Gutshita gisambu guamukuatesele ha guzumba Yehowa nu ha gutuna guvua gikenene giavula. Phangi muene wakhalele mumona luholo Yehowa wakhalele mukuatesa akombeledi enji agujinginyina akhalele mutagana nu malamba. Wakotelesele egi, ikhale esue nji tudi mutagana nu malamba, Yehowa wana gutukuatesa. Idi yadiago egi tuana tagana nu malamba, uvi tudi nu ndaga jiavula jiajiya gututuma ha guhana Yehowa mersi gifua muatshitshile phangi Kyung-sook. Gula tudi muhana Yehowa mersi mu isambu, yajiya gutukuatesa ha gukolesela nu ha gubamba gusuanguluga guetu.

11. Mukunda natshi alandudi a Yesu akhalele nu funu ya gikhesa tangua Yesu wavutugile mu dilu?

¹¹ Toga Yehowa haguguhana gikhesa tangua udi mu mudimo wa gulongesa. Gutuama egi Yesu avutuge mu dilu, wawunguluishile alandudi enji egi, adi nu ginemo gia gulongesa lukuma lua mutadila muene gu “Yelusalema nu gu Yudea yagasue nu gu Samaliya uu nu mu mafundo a gualeha a ha mavu.” (Makal. 1:8; Luka 24:46-48) Matangua azonda gungima, mafumu a enya Yuda akuatele mupostolo Phetelo nu Yone, a abatele gu Sanedrene awambelele egi ashigo naye gulongesa luko a asagesele nji muavula. (Makal. 4:18, 21) Itshi Phetelo nu Yone akalegele?

12. Makalegelo 4:29, 31, adi mumonesa egi itshi alandudi atshitshile?

¹² Phetelo nu Yone awambelele mafumu a ikombelelo ya enya Yuda egi: “Gula idi ndaga yabonga gumeso a Nzambi ha gumitegelela enue ha fundo dia gutegelela Nzambi, enue hakhenu batulenu milonga. Uvi esue tuajiyilego gubemba guzuela ndaga tuamonele nu jinyi tuavile.” (Makal. 4:19, 20) Tangua abembele Phetelo nu Yone, alandudi agasue akombelele Yehowa ha gumuhana mersi luholo lua akuatesele muene ha gutshita gutshigina guenji. Akombelele egi: “Kuatesa ahiga aye hagula alandule gulongesa mbimbi yaye woma ndo.” Yehowa wahanele mvutu gu gisambu giawo.​—Tanga Makalegelo 4:29, 31.

13. Gifezegeselo gia phangi Jin-hyuk gidi gutulongesa itshi?

¹³ Tuajiya gulandula gifezegeselo gia alandudi a Yesu, gula tualandula gulongesa ikhale mafumu leta atunyisa mudimo wetu. Tuzuelelenu gifezegeselo gia phangi wa yala Jin-hyuk. Wambiwe mu bologo handaga watunyile gutshita mudimo wa gisuta. Hakhalele muene mu bologo, amuhanele ginemo gia guhana enya bologo ako ima ya gudia nu ima iko. Amuwambelele egi udi naye guta nawo maga phamba mukunda nu ima akhalele nayo funu, uvi gualongesa ndo ndaga yatadila Biblia. Wakombelele Yehowa ha gumuhana gikhesa gia gulongesa lukuma luabonga mu ba okazio agasue akhalele mutagana nawo. (Makal. 5:29) Udi muzuela egi: “Yehowa wahanele mvutu gu isambu yami. Wanguhanele gikhesa nu ndunge jia gusendesa gulonguga Biblia nu athu avula. Tuakhalele mulonguga nu athu ene Biblia ha mifulo ya mabologo awo minuta phamba 5. Mu phipha, ngakhalele musonega mikanda ha guhana athu akhalele mu bologo mu lusugu lualandula.” Esue nji tuajiya gutoga Yehowa ha gutuhana gikhesa nu ndunge ha gutagenesa mudimo watuhanele muene wa gulongesa gifua muatshitshile phangi Jin-hyuk.

14. Itshi yajiya gutukuatesa tangua tudi mutagana nu malamba? (Ngimbo 37:3, 5)

¹⁴ Toga Yehowa agukuatese ha gukolesela mu malamba. Athu avula mukatshi dietu adi mutagana nu malamba gifua, gufuisa muthu akhalele muzumba, malamba a mu fami, usageshi nga malamba ako. Gula misongo ya gisambugila nga ita yabua, yana bata luko malamba avula ngenyi yana khala lamba ha gukolesela. Khala muwambela Yehowa luholo udi gudivua.  Muwambele ndaga udi mutagana najio gifua luholo wajiya guwambela futa diaye wakola. Sha mutshima egi Yehowa ‘mbawugukuatesa.’​—Tanga Ngimbo 37:3, 5.

15. Luholo lutshi gisambu giajiya gutukuatesa ha “gukolesela mu malamba”? Hana gifezegeselo.

¹⁵ Gutshita gisambu muavula mbagutukuatesa ha ‘gukolesela mu malamba.’ (Roma 12:12) Yehowa wana jiya ndaga akombeledi enji ana tagana najio, ‘wana vua tangua ana dila ha gutoga ukuateshi.’ (Ngi. 145:18, 19) Phangi Kristie udi nu ivo 29 udi nji muvundji wa njila; wakotelesele diago egi ndaga tuazuela idi ya giamatshidia. Wasendesele gukata misongo yakola. Hene wakatele misongo ya matangi. Gungima, ginenji wakatele misongo yakola yakhalele naye gumushiya. Phangi wa mukhetu Kristie udi muzuela egi: “Ngakhalele mukombelela Yehowa muavula ha gunguhana ngolo lusugu nu lusugu. Ngakhalele mutshita ngolo ha gulandula gukalagala ndaga jia mu nyuma gifua, guya mu gudibungisa gua mu hungu, nu gukalagala gulonguga guami hakhami.” Udi muzuela luko egi: “Gisambu giangukuatesele ha gukolesela mu tangua dia lamba. Ngakhalele mujiya egi Yehowa udi nu ame. Ndaga yene yangukuatesele ha gutuna gudisagesa muavula. Ngatshima misongo yami yahuilego muphushi, uvi Yehowa wahanele mvutu gu isambu yami. Wangukuatesele ha gukhala mu guhuima.” Tushigo naye gujimbila nga hazonda egi, “Yehowa wana jiya luholo lua guhuluisa athu adi a gujinginyina gudi muene tangua adi mutagana nu malamba.”​—2 Phet. 2:9.

16. Mukunda natshi tudi nu funu ya ukuateshi wa Yehowa ha gutuna gubua mu gubola?

¹⁶ Toga Yehowa agukuatese ha gutuna gubua mu gubola. Luholo tushigo athu atagana, matangua ako matangi a gutshita ndaga jiabola ajiya gutujila. Satana wana tshita yagasue hagula tukalagale ndaga jiabola. Hagufezegesa, Satana wana kalegela saga jia musonyi ha gubolesa matangi’etu. Saga jia luholo elu jiajiya gututuma ha gusendesa gutangiza ndaga jiabola  nu ha gututuma ha gutshita gubola guakoma.​—Mako 7:21-23; Yak. 1:14, 15.

17. Gula tuatshita gisambu ha gutoga ukuateshi gudi Yehowa, itshi tudi naye gutshita gungima ha gutuna gubua mu gubola? (Tala nji gifuanesa.)

¹⁷ Tuana khala nu funu ya ukuateshi wa Yehowa, hagula tukolesele ha gutuna gubua mu gubola. Yesu wazuelele mbimbi eji mu gisambu gia gifezegeselo egi: “Ubembigo egi tubue mu gubola, uvi tuhuluise ha mago a muthu wabola.” (Mat. 6:13) Yehowa wana khala nu funu ya gutukuatesa, uvi esue tudi naye gumutoga ukuateshi wene. Gula tuatoga Yehowa ukuateshi, esue gukhanda yetu tudi naye gutuna gutshita ndaga jiajiya gututuma ha gubua mu gubola. Tudi naye gutshita ngolo ha gutuna gulandula matangi abola a athu a ha mavu awa a Satana. (Ngi. 97:10) Tudi naye gubalegesa tangua ha gutanga nu gulonguga Biblia, handaga gutshita ngenyi mbagutukuatesa ha gukhala nu matangi abonga. Guya mu gudibungisa gua mu hungu nu guya mu mudimo wa gulongesa, mbagutukuatesa nji ha gukhala nu matangi abonga. Yehowa udi gutulaya egi, mbagashigo mubemba egi, ndaga inyi tuajiyilego gukolesela itubuile.​—1 Kol. 10:12, 13.

18. Itshi mukut’etu agasue tudi naye gutshita?

¹⁸ Mukut’etu agasue tudi naye gukombelela muavula, ha gusala a gujinginyina gudi Yehowa mu malamba tudi mutagana nawo mu masugu awa a gisugishilo. Lusugu nu lusugu, khala muzula tangua dia gutshita gisambu. Yehowa wana tshigina egi ‘tumuwambele ndaga jiagasue jidi mu mutshima wetu’ mu gisambu. (Ngi. 62:8) Khala mutumbuisa Yehowa nu gumuhana mersi mukunda nu ima yagasue yana gutukalegela muene. Mutoge aguhane gikhesa ha gutshita mudimo wa gulongesa. Mububile ha gugukuatesa ha gukolesela mu malamba nu hagutuna gubua mu gubola. Ubembigo egi nga gima gimoshi gigukange njila ha gukombelela Yehowa lusugu nu lusugu. Uvi luholo lutshi Yehowa wana hana mvutu gu isambu yetu? Mbatuheta mvutu ya muhu owu mu longo dia landula.