1. Malamba atshi athu avula ana tagana nawo?

 WADIHAGELE gale felela dia mu nyuma uvi nu guditagenesago ba? b Gula idi ngenyi ushigo hakhaye. Ha gufezegesa, Philip wakhalele mutshigina gutshita isambu muavula nu gulondega isambu yene muabonga, uvi gakhalelego muheta tangua dia gutshita isambu. Erika wadihagele felela dia guya tangua diabonga mu gudibungisa mukunda nu mudimo wa gulongesa, uvi matangua agasue gakhalelego muheta mu tangua diabonga. Tomáš watshitshile ngolo mbala jiavula ha gutanga Biblia ya mudidi. Udi muzuela egi: “Uvi ngakhalelego musuanguluga gutanga Biblia. Ngatshitshile ngenyi mbala thathu, uvi matangua agasue ngakhalele mutanga, gula ngaheta mu mukanda wa Levi, ngakhalele mubemba.”

2. Mukunda natshi tushigo naye guleba muila gula tuadihagela felela uvi khenji tuditagenesa ndo?

² Gula udi nu felela dimoshi, uvi khenji udi tagenesa galego, ulebigo muila. Ha gutagenesa felela, ikhale diazonda, yana toga tangua nu gutshita ngolo. Gula aye gaye mutshigina gutagenesa felela diaye, idi mumonesa egi wana zula ufuta waye nu Yehowa nu ndando nu wana tshigina gumukalegela nu ngolo jiaye jiagasue. Yehowa wana suanguluga luholo wana tshita ngolo. Yehowa ganago gugutoga ndaga inyi wajiyilego gutshita. (Ngi. 103:14; Mika 6:8) Udi naye gudihagela mafelela anyi wajiya gutagenesa. Gula wadihagela felela diene, itshi wajiya gutshita ha guditagenesa? Tuzuelelenu ndaga jiajiya gugukuatesa.

3. Mukunda natshi gukhala nu nzala yakola ya gutagenesa felela diaye gudi nu ndando?

³ Gukudisa nzala yakola ya gutagenesa mafelela a mu nyuma gudi nu ndando yavula. Gula udi nu nzala yakola ya gutagenesa felela diaye  mbawutshita yagasue ha guditagenesa. Tuajiya gufuanesa nzala yakola ya gutagenesa felela diaye, nu muhehe wakola wana bata wato ha guheta ha fundo udi muya. Gula muhehe walandula gubalega, muthu udi muwendesa wato wajiya guheta ha fundo adi muya. Gula muhehe udi wakola wajiya guheta muphushi fundo adi muya. Luholo lumoshi nji gula tudi nu nzala yakola ya gutagenesa mafelela etu, mbatuatagenesa. Phangi David gu El Salvador udi muzuela egi: “Gula udi nu nzala yakola ya gutagenesa felela diaye, mbawutshita yagasue ha guditagenesa.” Udi muzuela nji egi: “Mbawutshita nji yagasue ha gula nga ndaga imoshi igukangigo njila ya gutagenesa felela diene.” Itshi wajiya gutshita ha gukhala nu nzala ya gutagenesa mafelela aye?

4. Mukunda nu ndaga itshi tuajiya gutshita gisambu? (Filiphi 2:13) (Tala nji gifuanesa.)

⁴ Khala mutshita gisambu ha guheta nzala yakola ya gutagenesa felela diaye. Yehowa wajiya gugukuatesa mu njila ya nyuma yenji ha gukudisa nzala ya gutagenesa felela diaye. (Tanga Filiphi 2:13.) Matangua ako tuana gudihagela mafelela handaga tuana jiya egi tuajiya guatagenesa. Gutshita ngenyi gudi ndaga yabonga diago. Uvi matangua ako yajiya gukhala egi tushigo nu nzala ya gutagenesa felela diene. Ndaga eyi yabuidile phangi mumoshi wa mukhetu gu Uganda mu jina dia Norina. Wakhalele nu felela dia gulonguga Biblia nu athu, uvi gakhalelego nu nzala yakola ya gutagenesa felela diene. Handaga wakhalele mutangiza egi gashigo mulongeshi wabonga. Itshi yamukuatesele? Udi muzuela egi: “Ngasendesele gutoga Yehowa lusugu nu lusugu ha gungukuatesa ha gukudisa nzala yami ya gutuameza ulongugi wa Biblia. Ngakalegele ndaga gifua luholo ngakhalele mutoga Yehowa. Ngasendesele gukalegela ikadigilo ya gulongesela. Gungima dia mbeji jiazonda ngakotelesele egi ngabuile nu nzala yakola ya gutuameza ulongugi wa Biblia. Mu givo giene ngasendesele gutuameza ulongugi wa Biblia gudi athu mbadi.”

5. Ndaga jitshi tudi naye gutangigiza ha gukolesa nzala ya gutagenesa felela dietu?

⁵ Khala mutangigiza ndaga Yehowa wakalegele mukunda nu aye. (Ngi. 143:5) Mupostolo Phaula wakhalele mutangigiza luholo Yehowa wamumonesele khenda jiavula. Gutshita ngenyi guamukuatesele ha gukalagala mudimo wa Yehowa muavula. (1 Kol. 15:9, 10; 1 Tim. 1:12-14) Luholo lumoshi nji, gula udi mutangigiza ndaga Yehowa wakalegele mukunda nu aye, mbayigukuatesa ha gukhala nu nzala yakola ya gutagenesa felela diaye. (Ngi. 116:12) Tuzuelelenu ndaga yakuatesele phangi mumoshi wa mukhetu gu Honduras ha gutagenesa felela dienji dia gubua muvundji wa njila wa tangua diagasue. Udi muzuela egi: “Ngakhalele mutangiza luholo Yehowa wana gunguzumba. Wangukuatesele ha gukhala mukatshi dia akombeledi enji. Wana gungukuatesa nu wana gungubamba. Gutangiza ngenyi guangukuatesele ha gukolesa guzumba guami gudi Yehowa. Guangukuatesele nji ha gutshita ngolo ha gusendesa mudimo wami wa muvundji wa njila.”

6. Ndaga itshi iko yajiya gutukuatesa ha gukudisa nzala ya gutagenesa felela dietu?

⁶ Khala mutangiza gubonga mbawuheta gula watagenesa felela diaye. Tala ndaga yakuatesele phangi Erika tuazuelela guthunda, ha gutagenesa felela dienji dia guheta mu tangua diabonga mu gudibungisa mukunda nu mudimo wagulongesa. Udi muzuela  egi: “Ngakotelesele egi luholo ngakhalelego muya mu tangua diabonga, ngakhalele gudifula ndaga jiavula. Uvi guya mu tangua diabonga guakhalele gungukuatesa ha gumenega aphangi a mala nu a akhetu nu gubalegesa nawo tangua. Guangukuatesele nji ha gutegelela muabonga malongo ajiya gungukuatesa ha gukalagala muabonga mudimo wa gulongesa.” Luholo Erika wakhalele mutangiza gubonga gua guya mu tangua diabonga mu gudibungisa mukunda nu mudimo wa gulongesa, guamukuatesele ha gutagenesa felela dienji. Aye giwa gubonga gutshi wajiya gutangigiza? Gula felela diaye didi dia gulondega luholo luaye lua gutanga Biblia nu lua gutshita gisambu, tangiza luholo ndaga yene mbayigukuatesa ha gukolesa ufuta waye nu Yehowa. (Ngi. 145:18, 19) Gula felela diaye didi dia gukudisa makalegelo a Uklisto, tangiza luholo ndaga yene mbayigukuatesa ha gukolesa ufuta waye nu athu ako. (Kol. 3:14) Wajiya gusonega ndaga jidi gugutuma ha gutagenesa felela diaye. Gungima khala nu khadilo dia gutanga ndaga jiene. Tomáš tuazuelela guthunda udi muzuela egi: “Gula gudi nu ndaga jiavula jidi gungutuma ha gutagenesa felela diami, ngana tshita ngolo ha gujitagenesa.”

7. Itshi yakuatesele phangi Julio nu mukaji’enji ha gutagenesa felela diawo?

⁷ Khala mubalegesa tangua nu athu adi guguhana gikhesa ha gutagenesa felela diaye. (Ish. 13:20) Tala ndaga yakuatesele phangi Julio nu mukaji’enji ha gutagenesa felela diawo dia gulongesa muavula. Udi muzuela egi: “Tuatombele mafuta akhalele gutuhana gikhesa ha gutagenesa felela dietu, tuakhalele nji muzuelela nawo felela diene. Avula mukatshi diawo, akhalele atagenesa gale mafelela a luholo lumoshi, hene atukuatesele muavula. Mafuta etu ene akhalele gutuhula gula ndaga jidi mubalega luholo lutshi. Hene tangua tuakhalele nu funu ya ukuateshi, akhalele gutuhana gikhesa.”

8. Itshi yajiya gutubuila gula tudi mutshigina egi tutagenese felela dietu phamba tangua tudi nu nzala ya guyitshita? (Tala nji gifuanesa.)

⁸ Mu guzuela guabonga, matangua ako mukut’etu agasue tuanago gukhala nu nzala ya gutagenesa mafelela etu. Ndaga yene ishigo mukotelesa egi tuajiyilego gutagenesa felela dietu. Ha gufezegesa, muhehe wajiya gukhala ngolo jiakola jidi mubata wato fundo adi muya. Idi yadiago egi muhehe wanago gukhala wakola tangua diagasue. Masugu ako wajiya gukhala wakola uvi masugu ako ndo. Idi mukotelesa egi muthu udi muwendesa wato gajiyilego gulandula guya ba? Ndo sha. Ha gufezegesa, mawato ako ana khala nu motere uvi ako ana khala nu khayi. Muthu udi muwendesa wato wajiya gukalegela motere nga khayi ha guheta fundo adi muya. Tuajiya gufuanesa nzala ya gutagenesa felela nu muhehe. Handaga matangua ako nzala yene yajiya gukhala yakola uvi matangua ako ndo. Yajiya gukhala egi masugu ako tuana khala ndo nu nzala ya gutagenesa felela dietu. Gula tudi mutshigina egi tutagenese felela dietu phamba tangua tudi nu nzala ya guyitshita, yajiya gukhala egi mbatutagenesago felela diene. Gifua luholo muthu wana wendesa wato wana kalegela maluholo ako ha guheta fundo adi muya, esue nji tuajiya gutshita ngolo ha gutagenesa mafelela etu ikhale mu tangua tushigo nu nzala ya  guyitshita. Ndaga yene yajiyilego gukhala yaleba, uvi mbawusuanguluga gula watagenesa felela diene. Gutuama dia guzuelela ndaga tuajiya gutshita, tutadilenu gale muhu umoshi tuajiya gudihula.

9. Idi ndaga yabola ha gutshita ngolo ha gutagenesa felela dimoshi ngenyi ikhale tushigo nu nzala ya guyitshita? Kotelesa.

⁹ Yehowa wana tshigina egi tumukombelele nu mutshima umoshi mu gusuanguluga. (Ngi. 100:2; 2 Kol. 9:7) Uvi tudi naye gulandula gutshita ngolo ha gutagenesa felela dietu dia mu nyuma gula tushigo mutshigina guyitshita ba? Tuzuelelenu gifezegeselo gia mupostolo Phaula. Wazuelele egi: “Ngudi mubeta muila wami makhome nu ngudi guwubata gifua muhiga.” (1 Kol. 9:25-27) Ikhale Phaula wakhalelego nu nzala yagutshita ndaga Yehowa wakhalele gumutoga, uvi wakhalele mutshita ngolo ha guyitagenesa. Yehowa wakhalele musuanguluga nu mudimo wakhalele mutshita Phaula. Wamukuatesele nji.​—2 Tim. 4:7, 8.

10. Gubonga gutshi tuajiya guheta gula tudi mutshita ngolo ha gutaganesa felela dietu ikhale tushigo nu nzala ya guyitshita?

¹⁰ Luholo lumoshi nji, Yehowa wana suanguluga gutumona mutshita ngolo ha gutagenesa felela dietu ikhale tushigo nu nzala ya guyitshita. Wana suanguluga handaga wana jiya egi ikhale tushigo nu nzala ya gutshita ndaga yene, uvi tuana guyitshita handaga tuana gumuzumba. Gula tudi mutshita ngolo mbawutukuatesa nji gifua muakuatesele muene Phaula. (Ngi. 126:5) Gula tuamona egi Yehowa udi gutukuatesa, tuajiya gukudisa nzala ya gutagenesa felela dietu. Phangi wa mukhetu Lucyna wana jinga gu Pologne udi muzuela egi: “Matangua ako ngana tshigina ndo guya mu mudimo wa gulongesa gula ngudi ya guhuila.” Uvi gusuanguluga ngana heta gula ngaya guana khala diago guavula. Henyaha tutadilenu ndaga tuajiya gutshita gula tushigo nu nzala ya gutagenesa felela dietu.

11. Luholo lutshi Yehowa wajiya gutukuatesa ha gukudisa khadilo dietu dia gudikanda?

¹¹ Khala mutoga ukuateshi gudi Yehowa ha gukhala nu khadilo dia gudikanda. Mbimbi eyi yana kotelesa, gudikanda ha gutuna gutshita ndaga yabola. Tuana khala nji nu funu ya gudikanda ha gutshita ndaga yabonga. Khadilo diene diana gutukuatesa nji gula idi lamba nga gula tushigo nu nzala ya gutagenesa felela dietu. Uvi jiya egi khadilo dia gudikanda, didi mukatshi dia mabundu a nyuma. Hene, toga Yehowa nyuma yenji ha gugukuatesa ha gukudisa khadilo edi dia ndando. (Luka 11:13; Gal. 5:22, 23) David tuazuelela guthunda udi mumonesa luholo gisambu giamukuatesele. Wakhalele mutshigina gutshita muavula gulonguga guenji hakhenji. Udi muzuela egi: “Ngatogele Yehowa ha gungukuatesa ha gukudisa khadilo dia gudikanda. Wangukuatesele ha gukhala nu programe yabonga ya gulonguga hakhami nu guyibamba.”

12. Luholo lutshi longo didi mu mukanda wa Mulongeshi 11:4 diajiya gutukuatesa ha gutagenesa mafelela etu a mu nyuma?

¹² Ukhadigo munengena egi ndaga jiagasue jiyile muabonga. Idi mumonega egi tuajiyilego gunengena egi ndaga jiagasue jiyile muabonga ha mavu awa. Gula tuanengena egi ndaga jiagasue jiyile muabonga mbatushigo mutagenesa nga hazonda felela dietu. (Tanga Mulongeshi 11:4.) Phangi wa yala Dayniel udi muzuela egi: “Ndaga jiagasue jiajiyilego guyila mu luholo lua tagana. Tushigo naye gunengena, uvi tudi naye guzula desizio dia gusendesa gutshita ngolo ha gutagenesa felela dietu.” Phangi Paul gu Uganda udi muzuelela ndaga iko yajiya gutukuatesa ha gutuna guvutula ndaga gungima. Udi muzuela egi: “Gula tuasendesa gutshita ngolo ha gutagenesa felela dietu ikhale idi lamba, Yehowa mbawutukuatesa.”​—Mal. 3:10.

13. Gubonga gutshi wajiya guheta gula wasendesa gudihagela mafelela azonda-zonda?

¹³ Khala musendesa nu ndaga jiazonda-zonda. Tuajiya gutotesa nzala ya gutagenesa mafelela etu, gula tudi mumona egi adi akola ha gutagenesa. Gula idi ngenyi mukunda nu aye, wajiya gusendesa gutshita ndaga jiazonda-zonda ha gutagenesa felela diaye. Gula udi nu felela dia gukudisa khadilo dimoshi ngenyi, wajiya gusendesa gumonesa khadilo diene mu ndaga jiazonda-zonda. Gula felela diaye  didi dia gutanga Biblia ya mudidi, wajiya gulondega programe hagula usendese gutanga mukunda nu tangua diazonda. Tomáš tuazuelela guthunda, gatageneselego felela dienji dia gutanga Biblia mu givo. Udi muzuela egi: “Ngakotelesele egi thomo ngakhalele mutanga Biblia phushi-phushi. Ngazudile desizio dia gusendesa luko, uvi ngazuelele egi henyaha lusugu nu lusugu, ngudi naye gutanga gitshinyi gia mukhapho nu gutangigiza ndaga jiene. Ndaga yene yangukuatesele ha gusendesa gusuanguluga nu gutanga gua Biblia.” Luholo Tomáš wasendesele gusuanguluga nu gutanga Biblia, wasendesele gutanga matangua avula. Gungima wamanesele gutanga Biblia yamudidi. c

14. Ndaga jitshi jiajiya gutukanga njila ha gutagenesa felela dietu?

¹⁴ Ndaga ya gikenene idi egi, ikhale tudi nu nzala yakola ya gutagenesa felela dietu, tuajiya gutagana nu ndaga imoshi yajiya gutukanga njila. Hagufezegesa, ndaga inyi ‘tuatangijilego’ yajiya gutubuila nu gutuzula tangua diagutagenesa felela dietu. (Mulo. 9:11) Tuajiya gutagana nu ndaga imoshi ya lamba yajiya gutulebesa muila. (Ish. 24:10) Luholo tushigo athu atagana, tuajiya gutshita ndaga imoshi yabola inyi yajiyilego gutukuatesa ha gutagenesa felela dietu. (Roma 7:23) Nga ndo, tuajiya guhuila. (Mat. 26:43) Itshi yajiya gutukuatesa ha gubinga ndaga jiene?

15. Gula ndaga imoshi yagukanga njila ha gutagenesa felela diaye, idi mukotelesa egi wabingilego ba? Kotelesa. (Ngimbo 145:14)

¹⁵ Gula ndaga imoshi yagukanga njila ha gutagenesa felela diaye, ishigo mukotelesa egi wabingilego. Biblia yana zuela egi tuajiya gutagana nu malamba mbala jiavula. Yana zuela nji egi Yehowa wajiya gutukuatesa ha gutagenesa felela dietu. (Tanga Ngimbo 145:14.) Phangi Philip tuazuelela guthunda udi muzuela egi: “Gula ngatageneselego felela diami, nganago gutangiza ndaga yene muavula, uvi ngana sha matangi ami mu tangua ngabalegesele ha gutagenesa luko felela diami.” David tuazuelela gu  thunda udi muzuela egi: “Gula ndaga imoshi yangukanga njila ha gutagenesa felela diami nganago guyimona gifua gikhakhuishilo, uvi ngana mona egi idi luendu lua gumonesa guzumba guami gudi Yehowa.” Gula udi mulandula gutshita ngolo ha gutagenesa felela diaye ikhale ishigo yaleba, mbawumonesa egi udi mutshigina diago gusuanguluisa Yehowa. Yehowa mbawusuanguluga muavula gula udi mumona egi udi mulandula gutshita ngolo ha gutagenesa felela diaye!

16. Longo ditshi wajiya guzula gula ndaga imoshi yagukanga njila ha gutagenesa felela diaye?

¹⁶ Khala muzula malongo mu ndaga jidi gugukanga njila ha gutagenesa felela diaye. Tangiza ndaga yagukangi njila. Dihule egi, ‘gudi nu ndaga ngajiya gusombegesa hagula lamba diene dingubuilago luko ba?’ (Ish. 27:12) Matangua ako gula udi mumona egi wadihagela felela dimoshi diakola, yajiya gumonega gifua ishigo yaleba ha gutagenesa felela diene. Gula ndaga eyi idi gugutadila aye nji, wajiya gutangiza luko ha gujiya gula udi diago hehi ha gutagenesa felela diene. d Yehowa mbagazuedigo egi wabingilego luholo wataganeselego felela dinyi diakhadi diakola mukunda nu aye.​—2 Kol. 8:12.

17. Mukunda natshi tudi naye gutangiza ndaga tuataganesele gale?

¹⁷ Khala mutangiza mafelela anyi wataganesele gale. Biblia yana zuela egi, “Nzambi gashigo muthu wabola ha gujimbila mudimo muakalegele.” (Heb. 6:10) Aye nji ushigo naye gujimbila ndaga wakalegele. Gula udi mutangiza ndaga watagenesele gale, mbayigukuatesa ha gukolesa ufuta waye nu Yehowa, guwambela athu ako ndaga yene nu gubatijiwa. Gifua luholo watagenesele gale mafelela aye a mu nyuma, wajiya gulandula gutshita ngolo ha gutagenesa felela udi nadio mangino.​—Fili. 3:16.

18. Ithi tushigo naye gujimbila gula tudi mutshita ngolo ha gutagenesa felela dietu? (Tala nji gifuanesa.)

¹⁸ Gifua luholo muthu udi muwendesa wato wana heta nu gusuanguluga guagasue fundo adi muya, Yehowa nji wajiya gugukuatesa ha gutagenesa felela diaye. Uvi ujimbilago egi athu ana wendesa wato, ana suanguluga nu vuayaje. Luholo lumoshi nji, khala mutshita yagasue ha gumona luholo Yehowa udi gugukuatesa, ngenyi mbawukhala nu gusuanguluga tangua udi mutshita ngolo ha gutagenesa mafelela aye. (2 Kol. 4:7) Gula walebelego muila, mbawuheta gubonga guavula.​—Gal. 6:9.