1. Ndaga jitshi tualongugile mu assemblée générale a mu givo 2023?

 MU ASSEMBLÉE générale akalegewe mu 2023, a tuahetele ukoteleshi uhe-uhe wa ndaga jiko jiatadila gutshigina guetu, atuhanele nji kominike jiko jiabonga jiatadila mudimo wetu wa gulongesa. Ha gufezegesa, tualongugile egi, athu ako ajiya guheta luendu lua gubua akombeledi a Yehowa gungima dia gushiyiwa gua Babilona Yakoma. Tuamonele nji egi mu Novembre 2023, alongeshi agasue a Ufumu mbaashigo luko muhana rapore ya ndaga jiagasue akalagala mu mudimo wa gulongesa. Ndaga eji jiagasue jidi mukotelesa egi mudimo wetu wa gulongesa ushigo luko nu ndando ba? Ndo sha!

2. Mukunda natshi lusugu nu lusugu mudimo wa gulongesa udi naye gukalegewa muphushi? (Mako 13:10)

² Lusugu nu lusugu, mudimo wetu wa gulongesa wana kalegewa muphushi gubalega luholo tuakhalele mulongesa thomo. Mukunda natshi? Handaga tangua diasala diazonda. Tutadilenu ndaga Yesu wadiangele guzuela mukunda nu mudimo wa gulongesa mu masugu a gisugishilo. (Tanga Mako 13:10.) Mu gudivua nu mbimbi jidi mu Matayo, Yesu wazuelele egi, lukuma luabonga ludi naye gulongesewa ha mavu agasue gutuama egi “gisugishilo” gize. (Mat. 24:14) Mbimbi eyi idi mumonesa gushiyiwa gua mayilago gua mavu awa a Satana. Yehowa watombele gale “lusugu nu tangua” ndaga eji mbajitagenesewa. (Mat. 24:36; 25:13; Makal. 1:7) Lusugu nu lusugu, tuana suena hehi nu tangua  diene. (Roma 13:11) Hene tudi naye gulandula gulongesa uu nu tangua gisugishilo mbagiza.

3. Ndaga itshi yana gututuma ha gulongesa?

³ Mukut’etu agasue tudi naye gudihula muhu owu wa ndando egi: Mukunda natshi tuana longesa lukuma luabonga? Tuana longesa handaga tuana zumba athu. Ndaga tuana tshita mu mudimo wa gulongesa jiana monesa diago guzumba guetu mukunda nu mudimo wene nu athu; uvi ndaga yabalega ndando idi egi tuana longesa handaga tuana zumba Yehowa nu jina dienji. Henyaha tuzuelelenu ndaga imoshi imoshi mukatshi dia ndaga jiene.

TUANA LONGESA HANDAGA TUANA ZUMBA LUKUMA LUABONGA

4. Luholo lutshi tuana gudivua gula atuwambela ndaga imoshi idi gutusuanguluisa?

⁴ Udi muwunguluga luko luholo wadivuile tangua ndaga imoshi yabonga yakalegewe mu monyo waye ba? Yajiya gukhala egi muenya fami yaye mumoshi wavualele mona nga ndo wahetele mudimo wabonga diago. Idi yadiago egi wakhalele muvua zagu-zagu egi nga wawambela gale enya fami yaye nu mafuta aye ndaga yene. Wadivuile nji ngenyi tangua wavuile lukuma luabonga lua athu agasue luatadila Ufumu wa Nzambi ba?

5. Luholo lutshi wadivuile tangua walongugile giamatshidia gidi mu Mbimbi ya Nzambi mu mbala ya thomo? (Tala nji ifuanesa.)

⁵ Tangiza gale luholo wadivuile tangua walongugile giamatshidia giatadila Mbimbi ya Nzambi mu mbala ya thomo. Walongugile egi Tata wetu wa mu dilu wana guguzumba, wana tshigina egi ubue mukombeledi wenji. Walayele ha gufuzumuna athu wakhalele muzumba anyi afuile nu gumanesela malamba agasue mu mavu ahe-ahe. (Mako 10:29, 30; Yone 5:28, 29; Roma 8:38, 39; Gumo. 21:3, 4) Giamatshidia egi giakuatele diago mutshima waye. (Luka 24:32) Wazumbile diago ndaga walongugile, hene wamonele egi wajiyilego gubamba ndaga jiene mu mutshima waye!​—Tala nji Yelemiya 20:9.

6. Malongo atshi wazula mu eksperianse ya phangi Ernest nu mukaji’enji Rose?

 ⁶ Tutadilenu eksperianse ya phangi Ernest b. Hafuile sh’enji, Ernest wakhalele nu ivo 10. Udi muzuela egi: “Ngakhalele gudihula egi: ‘Tata wayi mu dilu ba? Nga ndo wafui genji mayilago ba?’ Ngakhalele musuanguluga nu an’ako akhalele nu a sh’awo.” Ernest wakhalele muya muavula gu malumba a sh’enji, wakhalele mufugamaga nu gukombelela egi: “Tata Nzambi, ngabuba, ngudi mutshigina gujiya fundo didi tata wami.” Tangua diatagenesele muene ivo 17, Ernest watshiginyile gulonguga Biblia nu Matemue a Yehowa. Wadihudile muavula tangua diajiyile muene egi Biblia yana longesa egi athu a gufua anago gujiya nga gima, ana khala gifua adi gu tulo tuakola. Wadihudile nji ha gujiya egi Biblia yana laya egi athu a gufua mbaafuzumuga. (Mulo. 9:5, 10; Makal. 24:15) Gungima, wahetele mvutu gu muhu wakhalele gumusagesa sendese mualeha! Ernest wakhalele musuanguluga muavula nu giamatshidia giakhalele muene mulonguga mu Biblia. Gungima mukaji’enji Rose wasendesele nji gulonguga Biblia, muene nji wasuangulugile nu giamatshidia. Mukut’awo agasue abatijiwe mu 1978. Akhalele nu gusuanguluga guavula ha gulongesa enya fami yawo, mafut’awo nu athu ako giamatshidia gia ndando alongugile. Phangi Ernest nu mukaji’enji Rose akuatesele athu gubalega 70 ha gubatijiwa.

7. Gula tudi muzumba giamatshidia gidi mu Biblia, mbayitutuma ha gutshita itshi? (Luka 6:45)

⁷ Gula tudi muzumba muavula ndaga tualongugile mu Biblia, tuana khala nu gusuanguluga ha guwambela athu ako ndaga jiene. (Tanga Luka 6:45.) Tuana gudivua gifua luholo alandudi a Yesu adivile tangua azuelele egi: “Tuajiyilego gubemba guzuela ndaga tuamonele nu jinyi tuavile.” (Makal. 4:20) Tuana zumba giamatshidia muavula, hene tuana gugilongesa athu ako.

TUANA LONGESA HANDAGA TUANA ZUMBA ATHU AKO

8. Mukunda natshi tuana longesa athu ako lukuma luabonga? (Tala galuanda “ Zumba Athu​—Abuise Alandudi.”) (Tala nji gifuanesa.)

⁸ Tuana zumba athu ako handaga Yehowa nu Mun’enji Yesu ana guazumba. (Ish. 8:31; Yone 3:16) Tuana vila athu ene khenda handaga ‘ashigo nga nu felela nga nu Nzambi.’ (Ef. 2:12) Luholo ana tagana nu malamba, ajiya gudivua gifua adi mu wina dialeha. Uvi esue tudi nu shinga yajiya guazola mu wina diene, yakotelesa lukuma luabonga lua Ufumu wa Nzambi. Luholo tuana guazumba nu tuana guavila khenda, tuana tshita yagasue ha gualongesa lukuma luabonga. Lukuma elu lua ndando luajiya guahana  felela nu guakuatesa ha gukhala nu gusuanguluga sendese mangino, nu guahana luendu lua guheta “monyo wa giamatshidia” yakotelesa egi monyo wa ivo nu ivo mu mavu ahe-ahe a Nzambi.​—1 Tim. 6:19.

9. Ndaga itshi tudi naye gutshita ha gutemesa athu mukunda nu masugu adi muza? Mukunda natshi? (Ezekiele 33:7, 8)

⁹ Guzumba tuana khala nago mukunda nu athu ako guana gututuma ha guatemesa egi gisugishilo gia mavu awa abola giasuena hehi. (Tanga Ezekiele 33:7, 8.) Tuana vila athu agasue khenda nu enya fami yetu anyi ashigo akombeledi a Yehowa. Handaga avula mukatshi diawo anago gujiya egi “lamba diakola mbadikhala guene, sadige gu gisendeselo gia mavu lamba dia luholo elu khenji diabuilegalego nu mbadibuigo luko.” (Mat. 24:21) Tuana tshigina egi athu ene ajiye ndaga mbajikalegewa mu sungi ya usopheshi. Thomo gikombelelo gia mambo mbagishiyiwa, gungima athu agasue abola mbaashiyiwa gu Ita ya Alemagedona. (Gumo. 16:14, 16; 17:16, 17; 19:11, 19, 20) Tuana kombelela hagula athu avula atshigine lukuma luene nu azule desizio dia gukombelela Yehowa hamoshi nu esue. Uvi itshi giwa tuajiya guzuela mukunda nu enya fami yetu nu athu ako anyi ana tuna gutegelela lukuma luabonga?

10. Mukunda natshi idi nu ndando ha gulandula guwambela athu ndaga mbajibua mu masugu adi muza?

¹⁰ Gifua luholo tuayimonele mu longo diabalega, yajiya gukhala egi Yehowa wana tshigina guhuluisa athu anyi mbaasombegesa makalegelo awo tangua mbaamona gushiyiwa gua Babilona Yakoma. Gula idi ngenyi, idi diago nu ndando ha gulandula guwambela athu ene ndaga jiene sendese mangino. Tujimbilago egi: Yajiya gukhala egi mbaalandula guwunguluga ndaga tuana gualongesa mangino uu nu mu tangua dia lamba diakola. (Tala nji Ezekiele 33:33.) Yajiya nji gukhala egi mbaawunguluga ndaga jiene nu mbaazula desizio dia gukombelela Yehowa hamoshi nu esue gutuama egi ikhale lamba gudi ene ha guyitshita. Gifua luholo mubambi wa bologo wasombegesele makalegelo enji gungima dia ‘gudigita gua mavu,’ yajiya nji gukhala egi gungima dia gushiwa gua Babilona Yakoma athu anyi ana tuna lukuma luabonga, mbaasombegesa makalegelo awo.​—Makal. 16:25-34.

TUANA LONGESA HANDAGA TUANA ZUMBA YEHOWA NU JINA DIENJI

11. Luholo lutshi tuana hana Yehowa lutumbu, ginemua nu ngolo jietu? (Gumonesa 4:11) (Tala nji ifuanesa.)

¹¹ Ndaga yabalega ndando yana gututuma ha gulongesa lukuma luabonga idi handaga tuana zumba Yehowa Nzambi nu jina dienji dia gijila. Mudimo wa gulongesa wana gutuhana luendu lua gutumbuisa Nzambi wetu tuana zumba. (Tanga Gumonesa 4:11.) Tuana tshigina mbimbi eji nu mutshima umoshi egi: Yehowa Nzambi wetu, udi watagana ha guheta lutumbu  nu ginemua nu ngolo. Tuana gumutumbuisa nu gumunemesa tangua tuana kuatesa athu ako ha gutshigina egi muene “wafugile ima yagasue,” tuana khala nji nu monyo handaga muene watuhanele nawo. Tuana hana Yehowa ngolo jietu gula tudi mukalegela tangua dietu nu ngolo jietu nu ima tudi nayo ha gudihana muavula mu mudimo wa gulongesa. (Mat. 6:33; Luka 13:24; Kol. 3:23) Ndaga yabalega ndando idi egi tuana tshigina guzuelela Nzambi wetu tuana zumba. Tuana suanguluga muavula ha guwambela athu ako ndaga jiatadila jina dienji nu makalegelo enji. Mukunda natshi?

12. Luholo lutshi tuana tumbuisa jina dia Yehowa mu mudimo wa gulongesa?

¹² Tuana tumbuisa jina dia Yehowa handaga tuana gumuzumba. (Mat. 6:9) Yakotelesa egi tuana tshigina guwambela athu ako egi ndaga jiabola jiazuelele Satana mukunda nu Yehowa jishigo jia giamatshidia. (Gis. 3:1-5; Yobo 2:4; Yone 8:44) Tangua tuana guya mu mudimo wa gulongesa, tuana suanguluga muavula ha guta maga nu athu agasue ana tshigina gujiya Yehowa nu makalegelo enji. Tuana tshigina egi athu agasue ajiye egi khadilo dienji diabalega gukoma didi guzumba, nu luholo luenji lua guhinyina ludi luatagana; gualeha ndo Ufumu wenji mbawusugisa malamba agasue nu mbawubatela athu guhuima nu gusuanguluga. (Ngi. 37:10, 11, 29; 1 Yone 4:8) Tangua tuana longesa athu ndaga jiatadila Yehowa, tuana tumbuisa jina dienji. Tuana suanguluga nji handaga tuana kalagala ndaga Yehowa wana tshigina egi tutshite. Mukunda natshi tuazuela ngenyi?

13. Mukunda natshi tuana suanguluga ha gutamegewa egi Matemue a Yehowa? (Yeshaya 43:10-12)

¹³ Yehowa watutombele ha gukhala ‘Matemue enji.’ (Tanga Yeshaya 43:10-12.) Ivo yavula gungima, aphangi a gu Hunji dia Akulu Atuameji asonegele mukanda wakhalele muzuela egi: “Ndaga yajiya gusuanguluisa muthu wagasue mukatshi dietu muavula idi gujiya egi  wana tamegewa egi Temue wa Yehowa.” c Mukunda natshi tuazuela ngenyi? Tutadilenu gifezegeselo egi gialandula. Tangiza gale egi agumbila mambo egi wakalagala ndaga yabola. Udi mutshigina egi muthu mumoshi awambele athu egi wajiyilego gukalagala ndaga ya luholo elu, udi muthu wabonga. Nanyi udi naye gutomba? Idi yadiago egi mbawutomba muthu wana jiya muabonga, munu wana shila mutshima hagula athu atshigine ndaga mbajizuela muene. Yehowa nji wana gututomba ha gukhala Matemue enji handaga wana gutujiya muabonga nu wana gutushila mutshima ha guwambela athu ako egi phamba muene udi Nzambi wa giamatshidia. Tudi nu gusuanguluga ha gukhala Matemue enji, hene gula tuaheta okazio tuana longesa jina dienji nu gumonesa egi ndaga jiagasue jiazuelele Satana mukunda nu muene, jidi jia mambo. Ngenyi, tuana kalagala ndaga Yehowa wana tshigina egi tushite handaga tudi Matemue enji!​—Ngi. 83:18; Roma 10:13-15.

MBATULANDULA GULONGESA UU NU GUGISUGISHILO

14. Ndaga jitshi jidi musuanguluisa jiajiya gubua mu masugu adi muza?

¹⁴ Tudi diago nu gusuanguluga ha gujiya ndaga jiajiya gubua mu masugu adi muza! Tudi musha mutshima egi Yehowa mbawutukuatesa ha gumona luholo athu avula mbaabua akombeledi enji gutuama egi lamba diakola disendese. Tudi nji nu gusuanguluga guavula ha gujiya egi ikhale tangua malamba mbaadivudisa mu tangua dia lamba diakola, athu avula mbaazula desizio dia gukombelela Yehowa hamoshi nu esue!​—Makal. 13:48.

15-16. Ndaga itshi mbatulandula gukalagala? Uu nu mu tangua ditshi?

¹⁵ Uvi tudi nu mudimo wa ndando wa gutshita, unu mbatushigo mutshita luko. Mudimo wene udi gulongesa lukuma luabonga lua Ufumu wa Nzambi ha mavu agasue. Tudi nji nu ginemo gia gulandula gutemesa athu mukunda nu ndaga mbajibua mu masugu adi muza. Athu adi naye nji gujiya egi gisugishilo gia mavu awa abola giasuena hehi. Ngenyi tangua athu mbaasophesewa, mbaawunguluga egi ndaga tuakhalele gualongesa jiakhalele mukatuga gudi Yehowa Nzambi.​—Ezek. 38:23.

¹⁶ Desizio ditshi tudi naye guzula? Tudi naye guzula desizio dia gulandula gulongesa nu gikhesa giagasue handaga tuana zumba mudimo wene nu athu uvi ndaga yabalega ndando idi egi tuana longesa handaga tuana zumba Yehowa Nzambi nu jina dienji. Mbatulandula gulongesa uu nu tangua Yehowa mbawuzuela egi “Guahui!”