LONGO DIA 22
LUNGIMBO 127 Quel genre de personne je dois être!
Ndaga Jiajiya Gumikuatesa ha Gubinga Tangua Mudi mu Sungi ya Guditala ha Gujiya Gula Muajiya Gudizula mu Ulo
‘Gubonga gua mu mutshima . . . gudi nu ndando yavula.’—1 PHET. 3:4.
NDAGA JIDI MU LONGO EDI
Mu longo edi tuza mumona ndaga jiajiya gukuatesa athu adi mutshigina gudizula mu ulo haguzula badesizio abonga nu luholo athu ako mu hungu ajiya guakuatesa.
1-2. Luholo lutshi athu ako ana gudivua tangua ana balegesa sungi ya guditala ha gujiya gula ajiya gudizula mu ulo?
SUNGI ya guditalela ha gudizula mu ulo, yajiya gukhala sungi yabonga diago. Gula aye nji udi mu sungi yene, yajiya gukhala egi udi mutshigina nji gukhala nu gusuanguluga. Mala nu akhetu ako avula abalegesele gale sungi yene ana zuela egi yana khala sungi ya gusuanguluga diago. Phangi Tsion, a gu Ethiopie udi muzuela egi: “Sungi ya guditala ha gujiya gula tuajiya gudizula mu ulo nu mulumi’ami yakhalele sungi yagusuanguluga diago mu monyo wami. Tuakhalele muta maga a ndando, tuakhalele nji mulela. Ngakhalele nu gusuanguluga tangua ngakotelesele egi ngahetele yala wakhalele gunguzumba, ame nji ngakhalele gumuzumba.”
2 Phangi Alessio gu Pays-Bas, wazuelele egi: “Ngakhalele nu gusuanguluga ha gujiya makalegelo a mukaji’ami tangua tuakhalele mu sungi ya guditala ha gujiya gula tuajiya gudizula mu ulo, uvi tuakhalele nji mutagana nu malamba.” Mu longo edi tuza muzuelela malamba athu adi mutshigina gudizula mu ulo ajiya gutagana nawo nu luholo malongo ako adi mu Biblia ajiya guakuatesa ha guzula badesizio abonga. Tuza nji mumona luholo aphangi ako mu hungu ajiya gukuatesa athu adi mutshigina gudizula mu ulo.
MUKUNDA NATSHI IDI NU NDANDO HA GUBALEGESA SUNGI YA GUDITALA HA GUJIYA GULA MUAJIYA GUDIZULA MU ULO?
3. Mukunda natshi idi nu ndando ha gubalegesa sungi ya guditala ha gujiya gula muajiya gudizula mu ulo? (Ishima 20:25)
3 Sungi ya aguditala ha gujiya gula muajiya gudizula mu ulo yajiya gusuanguluisa, uvi idi nji sungi ya ndando yajiya gumikuatesa ha gujiya ndaga muajiya gukalagala ha gumibata gu ulo. Mu lusugu lua ulo wawo, ana gudiloga gu meso a Yehowa egi mbaalandula gudizumba nu gudinemesa monyo wawo wagasue. Tudi naye gutangigiza muabonga gutuama dia gudiloga. (Tanga Ishima 20:25.) Idi diago ndaga ya ndando gula tudi mutshigina gudiloga mukunda nu ulo. Sungi ya guditala ha gujiya gula muajiya gudizula mu ulo, yana kuatesa yala nu mukhetu ha gudijiya nu ha guzula badesizio abonga. Matangua ako ajiya guzula desizio dia gudizula mu ulo nga dia gudituna. Gula yala nu mukhetu adituna, ishigo mukotelesa egi akalagala ndaga yabola. Tujimbilago egi sungi yene yana gukuatesa yala nu mukhetu ha gujiya gula ajiya gudizula mu ulo nga ndo.
4. Mukunda natshi tudi naye gukhala nu matangi abonga mukunda nu sungi ya guditala ha gujiya gula muajiya gudizula mu ulo?
4 Mukunda natshi idi nu ndando ha gukhala nu matangi abonga mukunda nu sungi ya guditala ha gujiya gula muajiya gudizula mu ulo? Muklisto udi nu matangi abonga gajiyilego gusendesa guta maga a ulo nu muthu gula gashigo nu funu ya gumuzula. Ishigo phamba Aklisto adi khenji adizudile ndo mu ulo adi naye gukhala nu matangi abonga, uvi mukut’etu agasue tudi naye gukudisa matangi ene. Ha gufezegesa, athu ako ana tangiza egi gula yala nu mukhetu adi mu sungi ya guditala ha gujiya gula ajiya gudizula mu ulo, phamba adi naye gudizula. Luholo lutshi gutangiza ngenyi guajiya gusagesa athu adi undumbu? Phangi Melissa gu États-Unis khenji gazudiwe galego mu ulo, wazuelele egi: “Gula phangi wa yala nu wa mukhetu adi mu sungi ya guditala ha gujiya gula ajiya gudizula mu ulo, aphangi ako ana tangiza egi phamba adi naye gudizula mu ulo. Gishina giene mala nu akhetu ako anago guzula desizio dia gudikhapha ngatshima ndaga jishigo muyila muabonga mu sungi yene. Ndaga yene yana tuma athu ako adi undumbu ha gutuna gubalegesa sungi ya guditala ha gujiya gula ajiya gudizula mu ulo nga ndo. Yajiya nji guahana gikenene giavula.”
KAMBA GUJIYA MUABONGA MUTHU UDI MUTSHIGINA GUDIZULA N’ENJI MU ULO
5-6. Ndaga jitshi yala nu mukhetu adi mutshigina gudizula mu ulo adi naye gujiya gudi muthu wagasue mukatshi diawo? (1 Phetelo 3:4)
5 Gula udi mu sungi ya guditala ha gujiya gula muajiya gudizula mu ulo, ndaga itshi yajiya gugukuatesa ha guzula desizio dia gudizula mu ulo nga ndo? Kamba gujiya muabonga muthu udi mutshigina gudizula n’enji mu ulo. Yajiya gukhala egi wajiyile ndaga jiko jiatadila muthu muene gutuama egi musendese sungi ya guditala ha gujiya gula muajiya gudizula mu ulo. Uvi henyaha udi nu luendu lua gujiya “gubonga gua mu mutshima” wa muthu muene. (Tanga 1 Phetelo 3:4.) Idi mukotelesa, gujiya muabonga makalegelo a muthu muene nu luholo luenji lua gutangiza nu gujiya gula udi nu ufuta wabonga nu Yehowa. Gungima, wajiya guhana mvutu gu mihu eyi: ‘Muthu muene mbawukhala yala nga mukhetu wabonga mukunda nu ame ba?’ (Ish. 31:26, 27, 30; Ef. 5:33; 1 Tim. 5:8) ‘Mbangumuzumba nu gumutagenesela nzala jienji gifua luholo ludi muene mutshigina ba? Muene nji mbawutshita ngenyi gudi ame ba? Mbayikhala yaleba gudi ame ha gumutotesela gubola ba?’ b (Roma 3:23) Ujimbilago egi ndaga yabalega ndando ishigo luholo mudi yagudifuana mu ndaga jiko, uvi idi luholo wajiya gujidila n’enji.
6 Ndaga jitshi jiko udi naye gujiya tangua mudi guditadila gula muajiya gudizula mu ulo nga ndo? Gutuama dia gukolesa guzumba guaye mukunda nu muthu udi mutshigina guzula mu ulo, muajiya guzuelela ndaga jiko jia ndando gifua mafelela enji. Uvi itshi tuajiya guzuela mukunda nu ndaga yatadila sante, mbongo nga ndaga jiko jiakalegele muene jiana landula gumusagesa? Ishigo nu ndando ha guzuelela ndaga jiagasue mu gisendeselo gia sungi ya guditala ha gujiya gula muajiya gudizula mu ulo. (Tala nji Yone 16:12.) Gula wamona egi tangua diatagana ha guhana mvutu gu mihu ya ndaga jiko jiagutadila, muwambele. Ujimbilago egi gungima dia masugu, muthu udi mutshigina guzula mu ulo mbawukhala nu funu ya gujiya ndaga jiene hagula wajiya guzula desizio diabonga. Hene idi nu ndando ha gumuwambela ndaga jiene nu giamatshidia giagasue.
7. Itshi yajiya gukuatesa yala nu mukhetu adi mutshigina gudizula mu ulo ha gudijiya muabonga? (Tala nji galuanda, “ Gula Muthu udi Mutshigina Gudizula N’enji mu Ulo udi Gualeha nu Aye.”) (Tala nji ifuanesa.)
7 Itshi yajiya gugukuatesa ha gujiya muabonga muthu udi mutshigina guzula mu ulo? Ha gumujiya muabonga, wajiya gumuhula mihu nu gumutegelela muabonga nu guta n’enji maga nu giamatshidia giagasue. (Ish. 20:5; Yak. 1:19) Ndaga yajiya gumikuatesa ha guta n’enji maga muabonga idi gutshita ndaga hamoshi gifua, gudia fundo dimoshi, guya mu mafundo a athu avula nu gulongesa hamoshi. Wajiya nji gujiya muthu muene muabonga gula mudi mubalegesa n’enji tangua hamoshi nu mafuta enu nu enya fami yenji. Wajiya gulondega programe ya gutshita nenji ndaga ha gumona luholo muthu muene wana kalegela athu ako ndaga. Tala ndaga yakalegele phangi Aschwin nu mukaji’enji Alicia gu Pays-Bas tangua akhalele mu sungi ya guditala ha gujiya gula ajiya gudizula mu ulo. Wazuelele egi: “Tuakhalele mukalagala ndaga jiakhalele gutukuatesa ha gudijiya muabonga. Tuakhalele mukalagala ndaga jiazonda-zonda gifua, gutshita ima ya gudia nga midimo iko hamoshi. Gutshita ngenyi guatukuatesele ha gumona makalegelo abonga nu guleba gua muthu wagasue mukatshi dietu.”
Gula yala nu mukhetu adi mutshigina gudizula mu ulo adi mutshita ndaga jidi guahana njila ha guta maga, yajiya guakuatesa ha gudijiya muabonga (Tala paragrafe 7-8)
8. Gubonga gutshi yala nu mukhetu adi mutshigina gudizula mu ulo ajiya guheta gula adi mulonguga ndaga jia Yehowa hamoshi?
8 Muajiya nji gudijiya muabonga gula mudi mutshita ndaga jia mu nyuma hamoshi. Tangua mbamudizula mu ulo, mbayikhala nu ndando ha guzula tangua dia gutshita gukombelela gua mu fami, hagula Nzambi amikuatese mu ulo wenu. (Mulo. 4:12) Hene idi nu ndando ha gukhala nu programe ya gulonguga hamoshi tangua mudi guditadila ha gujiya gula muajiya gudizula mu ulo nga ndo. Idi yadiago egi, phangi wa yala nu phangi wa mukhetu adi guditadila khenji abua galego fami, mu tangua diene phangi wa yala gashigo fumu wa phangi wa mukhetu. Uvi tangua mudi mulonguga phoso nu phoso hamoshi, muajiya gujiya gula muthu wagasue mukatshi dienu udi nu ufuta wabonga nu Yehowa nga ndo. Phangi Max nu mukaji’enji Laysa gu États-Unis a hetele nji gubonga. Wazuelele egi: “Tangua tuasendesele guditadila hagujiya gula tuajiya gudizula mu ulo, tuakhalele mutanga mikanda yakhalele muzuelela athu adi mutshigina gudizula mu ulo, anyi adizudile gale mu ulo nu luholo lua gujinga mu fami. Luholo tuatangele mikanda yene, yatukuatesele ha guzuelela ndaga jiavula jia ndando jinyi jiakhalele naye gukhala lamba ha gusendesa gujizuelela.”
NDAGA JIKO MUAJIYA GUTADILA
9. Ndaga jitshi athu adi mutshigina gudizula mu ulo adi naye gutadila tangua adi mutomba athu ajiya guwambela ndaga yene?
9 Nanyi muajiya guwambela egi mudi guditadila hagujiya gula muajiya gudizula mu ulo? Enue hakhenu mudi naye gutomba athu a guwambela ndaga yene. Mu gisendeselo gia ufuta wenu, muajiya guwambela phamba athu azonda. (Ish. 17:27) Gula muatshita ngenyi, athu mbaashigo gumihula mihu yavula nga gumishinjiga ha guzula desizio. Uvi gula muawambelelego nga muthu mumoshi muajiya gusendesa guta maga mu gisuegi nu guvua woma egi athu ayijiyigo. Gutshita ngenyi guajiya gukhala gingonza. Mbayikhala ndaga yabonga gula muawambela athu azonda, ajiya gumikuatesa nu gumihana malongo. (Ish. 15:22) Ha gufezegesa muajiya guwambela athu ako mu fami, mafuta a gukula mu nyuma nga akulu.
10. Itshi yajiya gukuatesa yala nu mukhetu ha gutumbuisa Nzambi mu sungi ya guditala ha gujiya gula ajiya gudizula mu ulo? (Ishima 22:3)
10 Itshi yajiya gumikuatesa hagula sungi ya guditala ha gujiya gula muajiya gudizula mu ulo itumbuise Nzambi? Luholo mudi muta maga muavula, mbamusendesa gudizumba muavula. Itshi yajiya gumikuatesa ha gutuna gubua mu gubola? (1 Kol. 6:18) Mukhadigo muta maga a usala, mukhadigo nji mukhala hakhenu nga gunua matombe avula. (Ef. 5:3) Gutshita ngenyi guajiya gumituma ha gukudisa nzala ya gubungisa muila, yajiya nji gukhala lamba ha gutshita ndaga jiabonga. Khalenu muzuelela muavula ndaga jiajiya gumikuatesa ha gudinemesa nu gunemesa mikhuala ya Yehowa. (Tanga Ishima 22:3.) Tutadilenu ndaga yakuatesele phangi Dawit nu mukaji’enji Almaz gu Ethiopie. Azuelele egi: “Tuakhalele mubalegesa tangua hamoshi mu mafundo a athu avula nga nu mafuta etu. Tuakhalelego mukhala muyadi’etu mu gamiyo nga monzo. Gutshita ngenyi guatukuatesele ha gutuna ndaga jiajiya gututuma ha gubua mu gubola.”
11. Ndaga jitshi yala nu mukhetu adi mutshigina gudizula mu ulo adi naye gutadila tangua adi gudimonesela guzumba?
11 Yala nu mukhetu adi mutshigina gudizula mu ulo adi naye gudimonesela guzumba guakola ba? Luholo ufuta wenu udi mukula, muajiya gutomba ha gudimonesela guzumba mu luholo luabonga. Uvi gula nzala jia gubungisa muila jiakola, mbayikhala lamba gudi enue ha guzula desizio diabonga. (Lungi. 1:2; 2:6) Gula mudi gudimonesela guzumba guakola yajiya gukhala yaleba ha gubua mu gubola, ngenyi muayilego gusuanguluisa Yehowa. (Ish. 6:27) Hene gu gisendeselo gia ufuta wenu dihagelenu mididilo idi gudivua nu malongo a Biblia. c (1 Tes. 4:3-7) Muajiya gudihula egi: ‘Athu tuana jinga nawo ana zuela itshi mu luholo luetu lua gudimonesela guzumba? Luholo luetu lua gudimonesela guzumba guene, luajiya guzugisa nzala jia gubungisa muila gudi muthu mumoshi mukatshi dietu ba?’
12. Ndaga itshi yala nu mukhetu adi mutshigina gudizula mu ulo adi naye gujiya gula adi mumana muavula nga ashigo gudivua?
12 Luholo lutshi muajiya gulonda milonga mudi mutagana nayo? Itshi muajiya gutshita gula tangua diagasue mushigo gudivua? Idi mukotelesa egi mushigo muatagana ha gudizula mu ulo ba? Ishigo diago ngenyi, handaga athu agasue adizudile gale mu ulo matangua ako anago gudivua mu ndaga jiko. Ulo wabonga wana bungisa athu mbadi ana gudinemesa nu ana khala hehi ha gutshigina matangi a muthu muko. Hene luholo mudi mulondega milonga yenu mangino ludi mumonesa luholo mbamukhala mukalagala ndaga tangua mbamudizula mu ulo. Muajiya gudihula egi: ‘Tuajiya guzuelela mulonga umoshi mu guhuima nu ginemua giagasue ba? Tuana khala hehi ha gutshigina gubola guetu nu gutshita ngolo ha gusombegesa ba? Tuana khala hehi ha gutshigina matangi a athu ako, gutoga pardo nu guditotesela ba?’ (Ef. 4:31, 32) Mujimbilago egi gula mushigo gudivua nu mudi mumana muavula mu sungi ya guditala ha gujiya gula muajiya gudizula mu ulo, yajiya gukhala egi tangua mbadimudizula mu ulo mbamulandula gumana. Gula wamona egi muthu muene gashigo yala nga mukhetu wabonga mukunda nu aye, wajiya guzula desizio dia gudituna n’enji. d
13. Ndaga jitshi jiajiya gukuatesa yala nu mukhetu ha gujiya gula sungi ya guditala ha gujiya gula ajiya gudizula mu ulo yajiya guazula matangua guvula gutshi?
13 Sungi ya guditala ha gujiya gula muajiya gudizula mu ulo idi naye guzula matangua guvula gutshi? Mbala jiavula gula muthu wazula badesizio muphushi yana gumubatela malamba. (Ish. 21:5) Hene sungi yene idi naye gukhala yaleha hagula ujiye muabonga muthu udi mutshigina guzula mu ulo. Uvi mushigo naye gulaba gulehesa sungi yene gula gushigo nu gima gidi gumikanga njila. Biblia yana zuela nji egi: ‘Gula wahetelego gima wakhalele gudifelela, yana hana gikenene.’ (Ish. 13:12) Gula sungi yene idi nji muzula matangua avula, yajiya gumituma ha gukalagala uthambi. (1 Kol. 7:9) Ha fundo dia gukamba gujiya gula matangua guvula gutshi muabalegesa gale mu sungi yene, wajiya gudihula egi: ‘Ndaga itshi iko yasala ha gujiya gudi muthu muene hagula nguzule desizio?’
LUHOLO LUTSHI ATHU AKO AJIYA GUKUATESA ATHU ADI MU SUNGI YA GUDITALA HA GUJIYA GULA AJIYA GUDIZULA MU ULO?
14. Mu maluholo atshi tuajiya gukuatesa athu adi mutshigina gudizula mu ulo? (Tala nji gifuanesa.)
14 Gula tudi mujiya aphangi mbadi adi mu sungi ya guditala ha gujiya gula ajiya gudizula mu ulo, luholo lutshi tuajiya guakuatesa? Tuajiya guatamega ha gudia nawo, gutshita nawo gukombelela gua mu fami nga gubalegesa nawo tangua hamoshi. (Roma 12:13) Gutshita ngenyi, guajiya guakuatesa ha gudijiya muabonga. Yajiya gukhala egi adi nu funu ya shapero wajiya guakuatesa ha gungina nawo mu gamiyo nga mu mafundo ajiya gukhala ene muyadi ha guta maga. Gula idi ngenyi tuajiya guakuatesa. (Gal. 6:10) Phangi Alicia tuazuelela gu thunda udi muwunguluga ndaga jiakhalele guasuanguluisa nu mulumi’enji Aschwin. Wazuelele egi: “Tuakhalele musuanguluga muavula luholo aphangi akhalele gutuwambela egi gula tudi mutshigina gudimona tuajiya guya gumbo diawo uvi gukhala hakhetu ndo.” Gula aphangi agutoga ha gukhala shapero wawo, izule gifua luendu lua ndando lua guakuatesa. Monesa gutema, wabembigo diago hakhawo, uvi gula udi mutshigina guabembela tangua dia guzuelela ndaga jidi guatadila monesa nji gutema.—Fili. 2:4.
Gula tudi mujiya athu adi mutshigina gudizula mu ulo, tuajiya gukamba maluholo a guakuatesa (Tala paragrafe 14-15)
15. Ndaga jitshi jiko mafuta adi naye gutshita ha gukuatesa athu adi mutshigina gudizula mu ulo? (Ishima 12:18)
15 Tuajiya gukuatesa athu adi mu sungi ya guditala ha gujiya gula ajiya gudizula mu ulo mu ndaga tudi muzuela nu jinyi tushigo naye guzuela. Matangua ako yajiya gutoga egi tumonese khadilo dia gudikanda. (Tanga Ishima 12:18.) Ha gufezegesa, tuajiya guvua mutshima zagu-zagu ha guwambela athu ako egi aphangi mbadi asendesa gale guta maga a ulo, uvi yajiya gukhala ndaga yabonga gula ene hakhawo ayiwambela athu ako. Tushigo naye gufeta athu adi mutshigina gudizula mu ulo nga guzuela ndaga jiabola mukunda nu milonga ya atadila. (Ish. 20:19; Roma 14:10; 1 Tes. 4:11) Tushigo naye nji guzuela nga guahula mihu yajiya guatuma ha gudivua gifua adi guashinjiga ha gudizula mu ulo muphushi. Phangi Elise nu mulumi’enji azuelele egi: “Tuakhalele khenji tuzuelela gale ndo tangua mbatukalagala wano wa ulo wetu, uvi luholo aphangi akhalele gutuhula mihu yatadila wano wene tuakhalelego musuanguluga.”
16. Itshi tudi naye gutshita gula yala nu mukhetu adi mu sungi ya guditala ha gujiya gula ajiya gudizula mu ulo azula desizio dia gudituna?
16 Itshi tuajiya gukalagala gula yala nu mukhetu adi mu sungi ya guditala ha gujiya gula ajiya gudizula mu ulo azula desizio dia gudituna? Tushigo naye guahula mihu nga gubela muthu muko egi mukunda natshi watunyi mukuenu. (1 Phet. 4:15) Phangi wa mukhetu Lea wazuelele egi: “Ngavuile egi aphangi ako akhalele gutufeta mukunda nu ndaga yatutumile ha guzula desizio dia gudituna. Ndaga yene yangusagesele diago muavula.” Gifua luholo tuayimonyi guthunda, gula athu adi mu sungi ya guditala ha gujiya gula ajiya gudizula mu ulo azula desizio dia gudituna, ishigo mukotelesa egi azudi desizio diabola. Uvi gula adituna idi mukotelesa egi tangua akhadi muta maga a ulo amonyi egi ashigo atagana ha gudizula mu ulo, maga ene a akuatesa ha guzula desizio diabonga. Ikhale ngenyi, ajiya gulandula guvua gikenene nu gudivua hakhawo. Hene, tuajiya gutshita yagasue ha guakuatesa.—Ish. 17:17.
17. Ndaga itshi athu adi guditadila hagujiya gula ajiya gudizula mu ulo adi naye gulandula gutshita?
17 Gifua luholo tuayimonyi, sungi ya guditala ha gujiya gula muajiya gudizula mu ulo yana khala nu malamba, uvi yajiya nji gusuanguluisa. Phangi Jessica wazuelele egi: “Muguzuela guabonga, sungi yene yana khala nu ndaga jiavula jia gutshita. Uvi yana khala ndaga yabonga ha guzula tangua nu gutshita ngolo ha gudijiya muabonga mu sungi yene.” Gula enue nji mudi mu sungi ya guditala ha gujiya gula muajiya gudizula mu ulo, tshitenu ngolo ha gudijiya muabonga. Gula muatshita ngenyi, mbayimikuatesa ha guzula desizio diabonga.
LUNGIMBO 49 Jéhovah, nous réjouirons ton coeur
a Mu longo edi, majina ako asombegesewe.
b Ha gujiya ndaga jiavula tala mukanda, Les jeunes s’interrogent. Réponses pratiques (volume 2) diyiji 39-40.
c Gula muthu udi mukena nu itshinyi ya gubungishila muila ya muthu muko, idi luholo luko lua gutshita uthambi, hene akulu mu hungu adi naye gumukuatesa. Akulu ajiya nji gukuatesa athu adi gudikuata mele nga adi guditumila ba mesaje a ndaga jia usala mu telefone.
d Ha gujiya ndaga jiko jiavula, tala “Mihu Yana Guhula Athu Ana Gutanga Mikanda Yetu” mu Inzo Yaleha ya Mutaledi ya 15 Aout 1999 ya français.