LONGO DIA 18
Sha Mutshima mu Khenda jia “Nzuji wa Athu Agasue a ha Mavu”!
“Nzuji wa athu agasue a ha mavu gajiyilego gutshita ndaga yabonga ba?”—GIS. 18:25.
NDAGA JIDI MU LONGO EDI
Longo edi diza gutukuatesa ha gukotelesa muabonga khenda jia Yehowa. Tuza nji mumona luholo mbalukalagala muene ndaga jiatagana ha gufuzumuna athu abola.
1. Longo ditshi didi muhana gikhesa Yehowa wahanele Abahama?
ABALAHAMA watele maga amoshi nu Nzambi, gajimbidilego maga ene monyo wenji wagasue. Nzambi wawambelele Abalahama mu njila ya muanjelo egi, mbawushiya dimbo dia Sodoma nu Gomola. Ndaga yene yasagesele Abalahama muavula. Wahudile Nzambi egi: “Mbawushiya athu abonga hamoshi nu athu abola ba? . . . Nzuji wa athu agasue a ha mavu gajiyilego gutshita ndaga yabonga ba?” Yehowa wakuatesele futa dienji nu guhuiminyina guagasue ha guheta longo edi: Nzambi mbagashigo mushiya nga hazonda athu abonga. Longo diene diana gutuhana nji gikhesa mangino.—Gis. 18:23-33.
2. Ndaga itshi idi gututshiginyisa egi Yehowa mbawusophesa athu mu luholo luatagana nu khenda jiagasue?
2 Mukunda natshi tuajiya gusha mutshima egi Yehowa mbawusophesa athu mu luholo luatagana nu khenda jiagasue? Handaga tuana jiya egi “Yehowa wana tala ndaga jidi mu mutshima” wa muthu. (1 Sam. 16:7) Idi yadiago egi Yehowa wana jiya ‘mutshima wa muthu wagasue.’ (1 Maf. 8:39; 1 Gudi. 28:9) Idi diago ndaga ya gushimana. Yehowa udi nu ndunge jiavula gutubalega, hene tuanago gukotelesa mukunda natshi gana zula badesizio ako. Mupostolo Phaula wazuelele mukunda nu Yehowa egi: “Gushigo nga muthu wajiya gujiya diago usopheshi wenji!”—Roma 11:33.
3-4. Matangua ako mihu itshi tuajiya gudihula? Itshi tuza mumona mu longo edi? (Yone 5:28, 29)
3 Tuana jiya egi Yehowa wana tshita ndaga jiabonga. Uvi matangua ako tuajiya gudihula mihu gifua muadihudile Abalahama egi: ‘Gudi nu felela mukunda nu enya gu dimbo dia Sodoma nu Gomola ba? Athu ako mukatshi diawo ‘mbaafuzumuga gifua . . . athu abola ba?’—Makal. 24:15.
4 Tutadilenu ndaga tuana jiya gale mukunda nu gufuzumuga. Mu masugu abalega, tuahetele ukoteleshi uhe-uhe mu ndaga yatadila ‘gufuzumuga ha guheta monyo’ nu ‘gufuzumuga ha gusophesewa.’ a (Tanga Yone 5:28, 29.) Ukoteleshi wene watukuatesele ha gusombegesa ndaga jiavula tuakhalele thomo mutangiza. Mu longo edi nu dinyi dialandula, tuza muzuelela usombegeshi wene. Hagutadila luholo Yehowa wana sophesa ndaga mu luholo luatagana, tuza mutadila thomo ndaga tuanago gujiya gungima tuza muzuelela ndaga tuana jiya gale.
NDAGA TUANAGO GUJIYA
5. Ndaga itshi mikanda yetu yakhalele muzuelela mukunda nu athu anyi Yehowa washiyile gu Sodoma nu Gomola?
5 Mu masugu abalega, mikanda yetu yakhalele muzuelela ndaga mbayibuila athu anyi Yehowa wazuelele egi adi athu abola. Tuazuelele egi athu anyi Yehowa washiyile, gifua enya gu Sodoma nu Gomola, mbaashigo mufuzumuga. Uvi gungima dia gulonguga muabonga nu gutshita gisambu muavula mukunda nu ndaga yene, tuakotelesa diago egi tushigo naye guzuela ngenyi. Mukunda natshi?
6. a) Hana ifezegeselo idi mumonesa luholo Yehowa wasophesele athu abola. b) Ndaga jitshi tuanago gujiya?
6 Tutadilenu ifezegeselo idi mu Biblia. Mu Biblia mudi nu mene jiavula tuana jiya jiatadila luholo Yehowa wasophesele athu abola. Ha gufezegesa, tuana jiya egi Yehowa washiyile athu agasue gu Mvula Yakola, wabembele phamba Nowa nu fami yenji. Watumile enya Isalele ha gushiya ifutshi 7 ya athu anyi akhalele mujinga mu Mavu a Gutendelela. Watumile nji muanjelo mumoshi ha gushiya masuta 185 000 a enya Asiliya mu phipha imoshi. (Gis. 7:23; Mikh. 7:1-3; Yesh. 37:36, 37) Biblia idi gutuwambela haphelo egi Yehowa wazudile desizio dia gushiya athu ene mayilago nu mbagashigo guafuzumuna ba? Ndo, ishigo ngenyi. Mukunda natshi tuazuela ngenyi?
7. Ndaga jitshi tushigo mujiya mukunda nu athu anyi Yehowa washiyile gu Mvula Yakola nga athu anyi akhalele mujinga gu Kanana? (Tala holu dia gizula.)
7 Tushigo mujiya luholo Yehowa wasophesele muthu wagasue mukatshi diawo. Tushigo nji mujiya gula athu anyi ashiyiwe ahetele luendu lua gulongunga ndaga jiatadila Yehowa nu gubalumuna mutshima. Tangua Biblia yana zuelela sungi ya Mvula Yakola, yana monesa egi, ‘Nowa wakhalele mulongeshi wa ndaga jiabonga.’ (2 Phet. 2:5) Uvi yanago guzuela egi tangua Nowa wakhalele mutunga masuwa, walongesele athu agasue akhalele ha mavu gutuama egi Mvula Yakola yisendese. Tushigo nji mujiya gula athu agasue abola akhalele mujinga gu Kanana ahetele luendu lua gulonguga ndaga jiatadila Yehowa nu gusombegesa makalegelo awo.
Nowa nu enya fami yenji adi mutshita mudimo wakola wa gutunga masuwa. Tushigo mujiya gula Nowa walongesele athu agasue akhalele ha mavu tangua diakhalele muene mutunga masuwa gutuama egi Mvula Yakola inoge (Tala paragrafe 7)
8. Ndaga jitshi jiatadila enya Sodoma nu Gomola tushigo mujiya?
8 Itshi tuajiya guzuela giwa mukunda nu athu anyi afuile tangua Yehowa washiyile dimbo dia Sodoma nu Gomola? Lota wakhalele muthu wabonga, uvi wakhalele mujinga mukatshi dia athu ene gu Sodoma. Uvi tushigo mujiya gula Lota walongesele athu ene agasue. Akhalele gawo athu abola, uvi muthu wagasue mukatshi diawo wakhalele mujiya gukhaphumuna ndaga jiabonga nu jiabola ba? Yajiya gumonega gifua ishigo ngenyi, uvi tujimbilago egi Biblia yana zuela egi athu avula a mu dimbo diene ajietele inzo ya Lota ha gubungisa muila nu athu akhalele mukatshi. Biblia yana zuela egi mukatshi dia athu ene ayile mujieta inzo ya Lota, guakhalele nu “ana azonda nu athu a gukola.” (Gis. 19:4; 2 Phet. 2:7) Tuajiya diago gutangiza egi Yehowa Nzambi wakhenda wazudile desizio egi nga muthu mumoshi mukatshi dia athu ene mbagashigo mufuzumuga ba? Ndo, tuajiyilego guzuela ngenyi. Idi yadiago egi Yehowa wawambelele Abalahama egi dimbo diene diakhalelego nga nu athu 10 abonga. (Gis. 18:32) Akhalele athu abola gishina giene Yehowa waashiyile mukunda nu ndaga jiabola akhalele mukalagala. Tuajiya diago guzuela egi nga muthu mumoshi mukatshi diawo mbagashigo luko mu fuzumuga tangua “athu abola mbaafuzumuga” ba? Ndo, tuajiyilego diago guzuela ngenyi!
9. Ndaga jitshi tushigo mujiya mukunda nu Salomo?
9 Biblia yana zuelela nji athu akhalele nu makalegelo abonga uvi gungima abuile athu abola. Fumu Salomo udi mukatshi dia athu ene. Wakhalele mujiya Yehowa nu luholo luakhalele naye muene gumukombelela. Yehowa wamushimbigile nji muavula, uvi gungima wasendesele gukombelela nzambi jia isongo. Gubola guenji guahanele Yehowa khabu jiakola nu guabatele nji enya Isalele malamba ivo yavula. Uvi Biblia idi muzuela egi hafuile Salomo, ‘amufundjile hamoshi nu akhakha enji,’ nu athu akhalele yagujinginyina gudi Nzambi gifua Fumu Davidi. (1 Maf. 11:5-9, 43; 2 Maf. 23:13) Uvi luholo luafundiwe muene hamoshi nu athu ene, idi mumonesa egi Yehowa mbawumufuzumuna ba? Biblia yanago guyizuelela. Athu ako ajiya gutangiza egi Salomo mbawufuzumuga handaga Biblia yana zuela egi “gula muthu wafua, wana futa mukudi wa gubola guenji.” (Roma 6:7) Uvi ndaga yene ishigo mukotelesa egi athu agasue afuile gale mbaafuzumuga gawo, handaga gula muthu wafua ishigo mukotelesa egi wahetshi mbala imoshi luendu lua gufuzumuga luko. Gufuzumuga gudi khapho diana katuga gudi Nzambi. Wana hana kapho diene gudi athu anyi ana tshigina muene guhana luendu lua gumukombelela mayilago. (Yobo 14:13, 14; Yone 6:44) Salomo nji mbawuheta kapho diene ba? Yehowa udi mujiya, esue tushigo mujiya. Uvi ndaga tudi mujiya idi egi, Yehowa mbawutshita ndaga jiabonga.
NDAGA TUANA JIYA
10. Luholo lutshi Yehowa wana gudivua mukunda nu gushiyiwa gua athu abola? (Ezekiele 33:11) (Tala nji gifuanesa.)
10 Tanga Ezekiele 33:11. Biblia yana gutuwambela luholo Yehowa wana gudivua mukunda nu gufua gua athu abola. Gifua luholo Ezekiele wasonegele, mupostolo Phetelo wasonegele nji egi: “Yehowa . . . gana tshiginago egi nga muthu mumoshi afue.” (2 Phet. 3:9) Mbimbi eji jidi gutuhana gikhesa ha gujiya egi, ikhale Yehowa udi nu ndaga jidi gumutuma ha gushiya athu abola; uvi ganago guzula desizio diene mu phushi. Udi Nzambi wa khenda jiavula, wana vila athu khenda jiene gula watshigina.
Tangua athu abola mbaafuzumuga, athu a maluholo agudisha mbaaheta luendu lua gulonguga ndaga jiatadila Yehowa (Tala paragrafe 10)
11. Akuatshi mbaashigo mufuzumuga? Luholo lutshi tuajiya ndaga yene?
11 Ndaga jitshi tuana jiya mukunda nu athu anyi mbaashigo mu fuzumuga? Biblia yana zuelela ifezegeselo phamba ya zonda ya athu ene. b Yesu wazuelele egi Yudasa Isakaliote mbagashigo mufuzumuga. (Mako 14:21; tala nji Yone 17:12 nu note d’étude.) Yudasa wajiyile muabonga egi ndaga yakalegele muene yakhalele yabola gu meso a Yehowa nu Yesu uvi wayitshitshile nu mutshima umoshi. (Tala Mako 3:29 nu note d’étude.) Yesu wazuelele nji mukunda nu mafumu a ikombelelo akhalele mutuna ndaga jiakhalele gualongesa muene egi, gula afua mbaashigo mufuzumuga. (Mat. 23:33; tala Yone 19:11 nu note d’étude.) Mupostolo Phaula wazuelele egi ba aposta anyi abalumuinego mutshima mbaashigo mufuzumuga.—Heb. 6:4-8; 10:29.
12. Ndaga jitshi tudi mujiya mukunda nu khenda jia Yehowa? Hana gifezegeselo.
12 Uvi ndaga jitshi tudi mujiya mukunda nu khenda jia Yehowa? Luholo lutshi Yehowa wana monesa egi “gana tshiginago egi nga muthu mumoshi afue”? Tutadilenu luholo lua monesele muene khenda jiene gudi athu anyi akalegele gubola guakoma. Fumu Davidi wakalegele gubola guakoma, wakalegele uthambi, washiyile nji muthu. Uvi wabalumuine diago mutshima, hene Yehowa wamuvidile khenda nu wamutotesele. (2 Sam. 12:1-13) Fumu Manase watshitshile ndaga jiavula jiabola mu monyo wenji. Ikhale Manase wakalegele ndaga jiabola uvi Yehowa wamuvidile khenda nu wamutotesele handaga wabalumuine mutshima. (2 Gudi. 33:9-16) Ifezegeselo eyi idi mumonesa egi Yehowa wana vila athu khenda gula wamona egi gudi nu ndaga jidi gumutuma ha guyitshita. Mbawufuzumuna athu a luholo elu handaga atshiginyile gubola guawo nu abalumuine mutshima.
13. a) Mukunda natshi Yehowa wavidile enya gu Ninive khenda? b) Ndaga itshi Yesu wazuelele gungima mukunda nu enya gu Ninive?
13 Tudi nji mujiya luholo Yehowa wavidile enya gu Ninive khenda. Nzambi wawambelele Yona egi: ‘Gubola gua enya Ninive guaheta uu nu gu meso ami.’ Uvi tangua abalumuine mutshima, Yehowa waatotesele nu mutshima umoshi. Waavidile khenda jiavula gubalega Yona. Yona wakhalele muvua khabu, hene Nzambi wamuwunguluishile egi enya gu Ninive ‘akhalelego mujiya nga hazonda gukhaphuna ndaga jiabonga nu jiabola.’ (Yona 1:1, 2; 3:10; 4:9-11) Gungima Yesu wahanele gifezegeselo giene ha gumonesa egi Yehowa wana kalalagala ndaga mu luholo luatagana nu wana vila athu khenda. Yesu wazuelele egi enya gu Ninive anyi abalumuine mutshima mbaafuzumuga “mu lusugu lua gusophesa.”—Mat. 12:41.
14. Luholo Biblia yana zuela egi enya gu Ninive ‘mbaafuzumuga mu lusugu lua gusophesa’ idi mukotelesa itshi?
14 Luholo Biblia yana zuela egi enya gu Ninive ‘mbaafuzumuga mu lusugu lua gusophesa’ idi mukotelesa itshi? Yesu wazuelele egi mu masugu adi muza athu ako “mbaafuzumuga ha gusophesewa.” (Yone 5:29) Wakhalele muzuelela Uhinyinyi wenji wa Ivo 1 000, sungi inyi “athu abonga nu athu abola” mbaafuzumuga. (Makal. 24:15) Athu abola “mbaafuzumuga ha gusophesewa.” Yakotelesa egi Yehowa nu Yesu mbaatala gula athu ene adi mutumagela ndaga adi mulonguga. Gula muenya gu Ninive munu mbawufuzumuga watuna gukombelela Yehowa, mbagashigo muheta luendu lua gujinga mayilago. (Yesh. 65:20) Uvi athu agasue ana kombelela Yehowa nu mutshima umoshi, mbaaheta luendu lua gujinga mayilago!—Dan. 12:2.
15. a) Mukunda natshi tushigo naye guzuela egi enya gu dimbo dia Sodoma nu Gomola mbaashigo mufuzumuga? b) Luholo lutshi tuajiya gukotelesa mbimbi jidi mu Mukanda wa Yuda 7? (Tala galuanda, “ Ndaga Jitshi Yuda Watshiginyile Guzuela?”)
15 Tangua Yesu wakhalele muzuelela enya gu dimbo dia Sodoma nu Gomola, wamonesele egi mu “Lusugu lua Gusophesa,” ndaga mbajikhala jia leba mukunda nu ene gubalega athu anyi amutunyile nu atunyile malongo enji. (Mat. 10:14, 15; 11:23, 24; Luka 10:12) Itshi Yesu watshiginyile guzuela? Matangua ako tuajiya gutangiza egi wakhalele mubalegesa. Uvi ishigo ngenyi, ikhale tangua diakhalele muene muzuelela enya gu Ninive, wazuelele ndaga mbajitagenesewa. Idi naye gukhala egi Yesu wakhalele mujiya muabonga ndaga jiazuelele muene mukunda nu enya gu Sodoma nu Gomola. “Lusugu lua Gusophesa” luakhalele muene muzuelela mukunda nu enya mu membo ene agasue luakhalele luene lumoshi. Enya gu Ninive akhalele mukalagala ndaga jiabola gifua enya gu dimbo dia Sodoma nu Gomola. Uvi enya gu Ninive ahetele luendu lua gubalumuna mutshima. Tujimbilago nji ndaga jiazuelele Yesu mukunda nu athu “mbaafuzumuga ha gusophesewa.” Mukatshi dia athu ene mbagukhala athu “anyi akalegele ndaga jiabola.” (Yone 5:29) Enya gu Sodoma nu Gomola ajiya gukhala nu felela mukunda nu masugu adi muza. Athu ako mukatshi diawo ajiya gufuzumuga mu lusugu luene, ngenyi tuajiya guheta luendu lua gualongesa ndaga jiatadila Yehowa nu Yesu Klisto.
16. Ndaga jitshi Yehowa wana tala ha gujiya gula mbawufuzumuna muthu nga ndo? (Yelemiya 17:10)
16 Tanga Yelemiya 17:10. Verse eyi idi gutukuatesa ha gujiya luholo Yehowa wana sophesa athu. Wana ‘kamba mu mutshima wa muthu, ‘wana tala nji matangi adi a gudisuega.’ Tangua mbadizula muene desizio mukunda nu athu anyi mbaafuzumuga, ‘mbawushimbiga muthu wagasue mugudivua nu ndaga jiakalegele muene.’ Yehowa mbawuvila athu khenda gula watshigina, uvi mbawasophesa mu luholo luatagana. Hene gula tushigo mujiya ndaga jiavula jiana zuela Biblia mukunda nu gufuzumuga gua athu, tushigo naye guzuela egi athu ako mbaashigo mufuzumuga!
“NZUJI WA ATHU AGASUE A HA MAVU” ‘MBAWUTSHITA NDAGA JIABONGA’
17. Ndaga itshi mbayibuila athu anyi afuile gale?
17 Sendese tangua Adama nu Eva alumbugidile Yehowa Nzambi luholo alanduile ndaga jiaawambelele Satana, athu avula ana gufua. Gufua gudi diago “mbalagaji” yagisugishilo! (1 Kol. 15:26) Ndaga jitshi mbajibuila athu ene agasue? Athu phamba 144 000 mbaafuzumuga ha guya mu dilu nu mbaashigo luko mufua. (Gumo. 14:1) Uvi athu ako avula ana zumba Yehowa mbaafuzumuga tangua “athu anyi akalegele ndaga jiabonga, . . . mbaafuzumuga.” Mbaajinga mayilago ha mavu gula asala yagujinginyina gudi Yehowa mu Uhinyinyi wa Klisto wa Ivo 1 000 mu tangua dia gulolewa gua gisugishilo. (Dan. 12:13; Heb. 12:1) Mu sungi yene ya Ivo 1 000, “athu abola” nu athu anyi khenji akombelelego Yehowa nga “anyi akalegele ndaga jiabola” mbaaheta luendu lua gusombegesa makalegelo awo ha gubua akombeledi a Yehowa a gujinginyina. (Luka 23:42, 43) Uvi athu ako akhalele diago athu abola, akhalele mulumbugila Yehowa nu gutuna malongo enji, mbaashigo mufuzumuga nga hazonda.—Luka 12:4, 5.
18-19. a) Mukunda natshi tudi naye gushila Yehowa mutshima mu luholo mbalusophesa muene athu afile gale? (Yeshaya 55:8, 9) b) Itshi mbatuzuelela mu longo dialandula?
18 Tudi diago nu ndaga jidi gututuma ha gusha mutshima egi Yehowa mbawusophesa athu mu luholo luabonga ba? Ayi! Abalahama wakotelesele ndaga yene muabonga, wazuelele egi Yehowa udi Nzambi watagana, udi nu ndunge jiavula nu wana vila athu khenda, udi nji “Nzuji wa athu agasue a ha mavu.” Wahanele Mun’enji formasio nu ginemo gia gusophesa muthu wagasue. (Yone 5:22) Yehowa nu Yesu ana jiya ndaga jidi mu mutshima wa muthu. (Mat. 9:4) Hene tangua mbaasophesa muthu wagasue, ‘mbaayitshita mu luholo lubonga’!
19 Mukut’etu agasue tulandulenu gusha mutshima egi Yehowa wana gutujiya muabonga. Tudi mujiya egi gusophesa athu ako gushigo ginemo gietu uvi gidi gienji! (Tanga Yeshaya 55:8, 9.) Hene tuana shila Yehowa nu Mun’enji mutshima ha gusophesa ndaga jiagasue. Tuana jiya nji egi Fumu wetu Yesu mbawulandula muabonga gifezegeselo gia Sh’enji. (Yesh. 11:3, 4) Uvi itshi tuajiya guzuela mu luholo Yehowa nu Yesu mbaasophesa athu mu tangua dia lamba diakola? Ndaga jitshi tuanago gujiya? Ndaga jitshi tuana gujiya? Mu longo dialandula mbatuheta mvutu jia mihu eyi.
LUNGIMBO 57 Tulongese Athu a Maluholo Agasue
b Ha gujiya ndaga jiko jiatadila Adama nu Eva nu Gayino tala Inzo Yaleha ya Mutaledi ya 1 Janvier 2013 diyiji 12 ya français nu mbimbi goshi’a diyiji.