MUTHU wagasue mukatshi dietu wana gutshigina ajiyiwe egi udi muthu wabonga. Uvi, mangino yakhala lamba ha gumonesa mutshima wabonga. Mukunda natshi? Handaga athu avula akhala “mbalagaji jia ndaga jiabonga.” (2 Tim. 3:3) Ana gulandula mikhuala yawo hakhawo yatadila ndaga jiabonga nu jiabola. Ana guzuela egi ‘ndaga jiabonga jidi ndaga jiabola, uvi jiabola egi ndaga jiabonga.’ (Yesh. 5:20) Yakhala nji lamba ha gumonesa mutshima wabonga handaga tushigo athu atagana, nga ndo mukunda nu ndaga jiabola athu atukalegele. Hene, tuajiya gudivua gifua Anne. * Muene udi mukombeledi wa Yehowa ivo yavula, uvi udi muzuela egi: “Ngatangijilego nga hazonda egi ngajiya gukhala muthu wabonga.”

Ndaga yawaha idi egi mukut’etu agasue tuajiya gumonesa mutshima wabonga! Nyuma ya Nzambi yana gukuatesa ha gukhala nu mutshima wabonga. Nyuma yene idi nu ngolo jiavula gubalega ndaga jiagasue jiabola jiajiya gutukanga njila ha gutshita ndaga jiabonga. Tutadilenu muabonga khadilo diene dia mutshima wabonga nu luholo tuajiya gudimonesa muavula.

Mutshima wabonga udi khadilo dia muthu udi nu matangi abonga nu wana gutshita ndaga jiawaha. Muenya mutshima wabonga wana gukamba tangua diagasue luholo lua gukuatesa athu ako nu guatshitshila ndaga jiabonga.

Athu avula ana gutshitshila enya fami jiawo nu mafuta awo ndaga jiabonga. Uvi mutshima wabonga wanago gusuga phamba ha gutshitshila athu ako ndaga jiawaha. Idi yadiago egi gushigo nu muthu wajiya gumonesa diago mutshima wabonga mu luholo luatagana, handaga Biblia idi muzuela egi ‘gushigo nu muthu mungoshi wabonga ha mavu wana gutshita tangua diagasue ndaga jiabonga uvi jiabola ndo.’ (Mulo. 7:20) Mupostolo Phaula wazuelele egi: ‘Ame ngajiya egi gushigo gima gimoshi giabonga gidi mu mutshima wami.’ (Lomo 7:18) Hene, gula tudi mutshigina gukudisa khadilo dia mutshima wabonga, tudi naye gulandula gifezegeselo gia Yehowa.

Yehowa Nzambi wana guhaga mikhuala yatadila ndaga jiabonga nu jiabola. Biblia yana guzuela mukunda nu Yehowa egi: ‘ Aye udi muenya mutshima wabonga, midimo yaye idi yabonga. Ngulongese mikhuala yaye.’ (Ngi. 119:68) Tuzuelele ndaga mbadi jiatadila mutshima wabonga wa Yehowa, jiazuelewa mu verse eyi.

Yehowa udi muenya mutshima wabonga. Gushigo nu ndaga yajiya gukanga Yehowa njila ha gukhala nu mutshima wabonga. Tuzuelele ndaga yakalegewe tangua Yehowa wawambelele Moise egi: “Mbangubalegesa gubonga guami guagasue gu phala yaye.” Tangua lutumbu lua Yehowa, nu gubonga guenji guabalegele, Moise wavuile mbimbi eji: ‘Yehowa, Yehowa, Nzambi wazala pha nu khenda nu gisemo, wana guvua ndo khabu mu phushi, wana gudijiga guzumba nu gufubidila masugu agasue, wana guvuila athu a indongo inunu nu inunu jikhenda, udi mutotesela athu gushaga guawo, gulumbuga guawo nu gubola guawo, uvi muene gajiyilego gutuna guhana ndola gudi muthu watshitshi gubola.’ (Guz. 33:19; 34:6, 7) Mbimbi jiene jidi mumonesa diago haphelo egi Yehowa udi diago muenya mutshima wabonga mu ndaga jiagasue. Yesu wakhalele muthu watagana, uvi wazuelele egi: ‘Gushigo nga muthu wabonga, phamba Nzambi.’—Luka 18:19.

 Midimo ya Yehowa idi yabonga. Midimo yagasue Yehowa wana gutshita, yakhala yabonga. ‘Yehowa udi muenya mutshima wabonga gudi athu agasue, khenda jienji jidi muya uu nu gu ima yagasue yafugile muene.’ (Ngi. 145:9) Luholo Yehowa udi muenya mutshima wabonga nu ganago gukhaphumuna, wana guhana monyo gudi athu agasue nu ima adi nawo funu ha gujinga. (Makal. 14:17) Mutshima wenji wabonga wana gumonega nji tangua ana gututotesela gubola. Muyimbi wa ngimbo wasonegele egi: “O Yehowa, aye udi muenya mutshima wabonga, wakhala hehi ha gutotesela gubola.” (Ngi. 86:5, NWT) Tudi naye gusha mutshima egi ‘Yehowa ganatunyisago nga gima gimoshi giabonga gudi athu adi agujinginyina gudi muene.’—Ngi. 84:11.

Nzambi watufugile mu gifuanesa gienji. Hene, esue nji tuajiya gukhala nu mutshima wabonga nu gutshita ndaga jiawaha gifua muene. (Gis. 1:27) Uvi, khadilo diene dianago gudijila hakhenji. Yehowa udi gutuwambela egi tudi naye ‘gulonguga gutshita ndaga jiabonga.’ (Yesh. 1:17) Luholo lutshi tuajiya gukudisa khadilo dia gutshita ndaga jiabonga? Tutadile maluholo thathu tuajiya guyitshita.

Luholo lua thomo ludi egi, tudi naye gutshita gisambu ha gutoga nyuma ya Nzambi. Nyuma yene yajiya gukuatesa Aklisto ha gukhala athu abonga gu meso a Nzambi. (Gal. 5:22) Nyuma ya Nzambi yajiya gutukuatesa ha guzumba ndaga jiabonga nu ha gutuna ndaga jiabola. (Lomo 12:9) Biblia idi muzuela egi Yehowa ‘mbawutuhana ngolo ha gutshita ndaga jiabonga mu midimo nu mu mbimbi.’—2 Tes. 2:16, 17.

Luholo lua mbadi ludi egi, tudi naye gutanga Mbimbi ya Nzambi. Gula tudi mutanga Biblia, Yehowa mbawutulongesa ha “gutshita ndaga jidi jiabonga” nu mbatukhala agudilonda ha “gutshita mudimo wabonga.” (Ish. 2:9; 2 Tim. 3:17) Mitshima yetu idi gifua mushete wa gubambela umonyi. Gula tudi mutanga Biblia nu gutangigiza ndaga tuatangi, mbatuzalesa mutshima wetu nu ima yabonga. Ngenyi, idi gifua tudi muzalesa mushete wetu nu ima ya ndando mbayitukuatesa gungima.—Luka 6:45; Ef. 5:9.

Luholo lua thathu ludi egi, tudi naye gukalagala ngolo ha ‘gulandula ndaga jidi jiabonga.’ (3 Yone 11) Biblia idi nu ifezegeselo ya athu tuajiya gulandula. Gifezegeselo giabalega gubonga tuajiya gulandula gidi gia Yehowa nu Yesu. Uvi tuajiya nji guzuelela athu ako akhalele nu mutshima wabonga. Mukatshi dia athu ene, tuajiya gutanga Tabita nu Barnabas. (Makal. 9:36; 11:22-24) Gula watanga ndaga Biblia idi muzuela mukunda nu athu ene, wajiya guheta malongo awaha. Tangua udi mutanga mene jiawo, kamba gujiya ndaga atshitshile ha gukuatesa athu ako. Gungima, tangiza luholo wajiya gudilonda ha gukuatesa enya fami yaye nga aphangi a mu hungu diaye. Luko, kamba gujiya gubonga guahetele Tabita nu Barnabas luholo amonesele mutshima wabonga gudi athu ako. Gutanga nu gutangigiza lumene luawo mbagugukuatesa muavula lume.

Tuajiya nji guzuelela ifezegeselo ya aphangi adi mutshita ndaga jiabonga mangino. Tangiza gale mudimo wakola akulu ana gutshita mu hungu.  Biblia idi muzuela egi, akulu ana ‘guzumba ndaga jiabonga.’ Tujimbilago nga hazonda aphangi’etu a akhetu ana ‘gulongesa ndaga jiabonga’ mu mbimbi nu mu midimo yawo. (Tito 1:8; 2:3) Phangi mumoshi wa mukhetu mu jina dia Roslyn, udi muzuela egi: “Futa diami wana gukalagala ngolo ha gukuatesa aphangi a mu hungu nu guahana gikhesa. Wana gutangiza malamba awo nu wana guahana ba kado azonda-zonda, wana guakuatesa nji mu luholo luko. Ngana gujiya egi futa diami wakhala nu mutshima wabonga.”

Yehowa wana gutoga akombeledi enji ha “gukamba ndaga jiabonga.” (Am. 5:14) Gutshita ngenyi mbagutukuatesa ha guzumba mikhuala ya Yehowa, mbagutukuatesa nji ha gulandula gukalagala ndaga jiabonga.

Ha gukhala nu mutshima wabonga, yana gutoga ndo phamba guhana athu ima yakoma nga ya ndando yavula. Tufezegese: Hagula mutshi ukule muabonga, tuanago guwumbila meya avula phamba hugo dimoshi. Uvi tuana guwumbila meya azonda-zonda mahugo avula. Luholo lumoshi nji, gula tudi mukalegela athu ako ndaga jiazonda-zonda mahugo avula ha guakuatesa, mbatumonesa egi tudi athu a mutshima wabonga.

Biblia idi gututoga ha “gudilondega” nu ha gukhala “hehi” ha gutshitshila athu ako ndaga jiabonga. (2 Tim. 2:21; Tito 3:1) Gula tudi mukamba gujiya ndaga jidi mubuila athu ako, tuajiya gumona luholo tuajiya guasuanguluisa ‘mukunda nu gubonga guawo, nu ha guakudisa mu gutshigina.’ (Lomo 15:2) Yakotelesa egi, tuajiya guahana ima tudi nawo. (Ish. 3:27) Tuajiya nji guatamega gumbo dietu ha gudia nawo nga ha guahana gikhesa. Gula tuajiya egi muthu mumoshi udi mukata, tuajiya gumusonegela mukanda ha gumuhana gikhesa, tuajiya guya gumutala nga ndo gumutamega gu telefone. Yadiago, tuajiya guheta ba okazio avula a guzuela ‘mbimbi jidi jiatagana jiajiya gukuatesa athu ako ha gukula mu gutshigina, nu jidi muhana athu adi gujitegelela ima adi nayo funu.’—Ef. 4:29.

Luholo lumoshi nu Yehowa, tuana gukamba maluholo a gutshitshila athu agasue ndaga jiabonga. Hene, tuanago gukhala nu khadilo dia gukhaphumuna. Luholo luabonga lua gukalegela athu ako ndaga jiabonga gifua Yehowa ludi, gualongesa lukuma luabonga lua Ufumu. Gifua muazuelele Yesu, tuana gutshita ndaga jiabonga ikhale gudi athu adi nu esue umbalagaji. (Luka 6:27) Gukhala nu gisemo nu khadilo dia gutshitshila athu ako ndaga jiawaha idi ndaga yabonga handaga ‘gushigo nu mukhuala wana gutunyisa ndaga eji.’ (Gal. 5:22, 23) Gula tudi mukalagala ndaga jiabonga ikhale tangua athu ako adi gututshitshila ndaga jiabola nga gutusagesa, yajiya gutuma athu ako ha gutshigina giamatshidia nu gutumbuisa Nzambi.—1 Phet. 3:16, 17.

‘Muthu wabonga wana guheta gishimbigo gia ndaga jiabonga jiana gutshita muene.’ (Ish. 14:14) Ishimbigo itshi tuajiya guheta? Gula tudi mutshitshila athu ako ndaga jiabonga, ene nji mbaatukalegela ndaga jiabonga. (Ish. 14:22) Ikhale athu ako ashigo gututshitshila ndaga jiabonga, tudi naye gulandula guakalegela ndaga jiabonga. Gutshita ngenyi guajiya guatuma ha gusombegesa khadilo diawo nu ha gututshitshila nji ndaga jiabonga.—Lomo 12:20.

Athu avula ana guzuela egi ahetele mbuto yabonga tangua akalegele athu ako ndaga jiabonga nu abembele gutshita ndaga jiabola. Tuzuelele gifezegeselo gia Nancy. Muene udi muzuela egi: “Tangua ngakhalele mukula, ngakhalelego mukamba gubonga gua athu ako, ngakhalele mutshita uthambi, nu ngakhalelego munemesa athu ako. Uvi tangua ngalongugile Biblia, nu gutumagele ndaga ngakhalele mulonguga, ngasendesele gusuanguluga. Mangino ngudi nu lukuma luabonga.”

Gishina giakoma tuana gukudisa khadilo dia mutshima wabonga gidi egi khadilo diene diana gusuanguluisa Yehowa. Ikhale athu avula anago gumona ndaga jiabonga tuana gutshita, Yehowa wana gujimona. Muene wana gujiya nji matangi etu nu ndaga jiagasue jiabonga tuana gutshita tangua diagasue. (Ef. 6:7, 8) Luholo lutshi Yehowa wana gutushimbiga? Biblia idi muzuela egi: “Yehowa wana gusuanguluga nu athu abonga.” (Ish. 12:2, NWT) Hene, tulandulenu gukudisa khadilo dia mutshima wabonga. Yehowa udi muhana laji egi, ‘mbawuhana gutumbuga nu ginemua nu guhuima gudi athu agasue adi mutshita ndaga jiabonga.’—Lomo 2:10.