LONGO DIA 11
Tegelela Yehowa
‘You udi mun’ami . . . Mutegelelenu.’—MAT. 17:5.
LUNGIMBO 89 L’obéissance est bénie
NDAGA JIDI MU LONGO EDI *
1-2. (a) Luholo lutshi Yehowa wawambelele athu matangi enji mu tangua dikulu? (b) Itshi tuza mulonguga mu longo edi?
YEHOWA wana gusuanguluga ha guwambela athu matangi enji. Mu tangua dikulu, Yehowa wawambelele athu matangi enji mu njila ya baprofete, ya anjelo nu ya Mun’enji Yesu. (Am. 3:7; Gal. 3:19; Yat. 1:1) Mangino Yehowa wana gukalegela Biblia ha guwambela athu matangi enji. Watuhanele Biblia hagula tujiye matangi enji nu maluholo enji a gutshita ndaga.
2 Yehowa wazuelele hakhalele Yesu ha mavu mu mahugo thathu. Mu longo edi tumuza mulonguga ndaga jiazuelele Yehowa ha gujiya: 1) Longo ditshi tuajiya guheta gu ndaga jiene? 2) Luholo lutshi ndaga jiene jiajiya gutukuatesa?
‘AYE UDI MUN’AMI, NGANA GUGUZUMBA’
3. Ha gutadila Mako 1:9-11, itshi Yehowa wazuelele habatijiwe Yesu? Ndaga jitshi jia ndando mbimbi jiene jiamonesele mukunda nu Yesu?
3 Mukanda wa Mako 1:9-11 udi mumonesa hugo dia thomo diazuelele Yehowa hakhalele Yesu ha mavu. (Tanga.) Wazuelele egi: ‘Aye udi mun’ami, ngana guguzumba, wana gungusuanguluisa.’ Idi mumonega diago egi Yesu wasuangulugile ha guvua Yehowa mumonesa haphelo egi wana gumuzumba nu wana gumushila mutshima! Mbimbi jia Yehowa jiamonesele ndaga thathu jia ndando mukunda nu Yesu. Ndaga ya thomo: Yesu udi Mun’enji. Ya ngiadi: Yehowa wana gumuzumba. Ya thathu: Yehowa wana gusuanguluga n’enji. Tuzuelelenu muabonga ndaga jiene thathu.
4. Mu luholo lutshi Yesu wabuile luko Mun’a Nzambi?
4 “Aye udi Mun’ami.” Mbimbi eji jia Yehowa jiamonesele egi Yesu mbawuheta mudimo uhe-uhe wa gutshita. Yesu wakhalele mun’a Nzambi sendese mu dilu gutuama dia guza ha mavu. Uvi habatijiwe muene, wabuile mun’a Nzambi mu luholo luko. Mu tangua diene, wambiwe maji mu nyuma nu wahetele felela dia guvutuga mu dilu hagula Nzambi amubuise Fumu nu Nganga-nzambi Wakoma. (Luka 1:31-33; Heb. 1:8, 9; 2:17) Gishina giene Yehowa wazuelele habatijiwe Yesu egi: “Aye udi Mun’ami.”—Luka 3:22.
Tuana gusuanguluga gula athu ako atushimana nga atuhana gikhesa (Tala paragrafe 5) *
5. Luholo lutshi tuajiya gulandula gifezegeselo gia Yehowa ha guzumba aphangi nu guahana gikhesa?
5 ‘Ngana Guguzumba.’ Luholo Yehowa wamonesele guzumba nu gusuanguluga guenji gudi Yesu, ludi gutukuatesa ha guhana aphangi ako gikhesa. (Yone 5:20) Gila tuakuatesa muthu, gungima watumonesela guzumba nga watushimana, yana gutusuanguluisa muavula. Luholo lumoshi nji, tudi naye ya guzumba nu guhana gikhesa gudi aphangi’etu a mu hungu nu a mu fami. Gushimana aphangi’etu a mu hungu guana gukolesa gutshigina guawo, guana guakuatesa nji ha gukombelela Yehowa nu gujinginyina guagasue. Mvuaji jidi naye guhana an’awo gikhesa. Gula mvuaji jidi muzumba nu mushimana an’awo nu mutshima umoshi, ana ene mbaasuanguluga muavula.
6. Mukunda n’atshi tudi naye gusha mutshima gudi Yesu Klisto?
6 ‘Wana Gungusuanguluisa.’ Mbimbi eji jiamonesele egi Yehowa wahagele mutshima egi Yesu mbawutshita gutshigina guenji nu gujinginyina guagasue. Yehowa wahagele mutshima gudi Yesu, esue nji tuajiya gusha mutshima egi Yesu mbawutaganesa laji diagasue dia Yehowa nu gujinginyina guagasue. (2 Kol. 1:20) Gutangigiza ndaga jiatshitshile Yesu, mbagutukuatesa ha gulandula gifezegeselo gienji. Yehowa washile mutshima gudi Yesu, wana gusha nji mutshima egi akombeledi enji mbalandula gifezegeselo gia Mun’enji.—1 Phet. 2:21.
‘MUTEGELELENU’
7. Mu okazio utshi Yehowa wazuelele ndaga jidi mu Matayo 17:1-5? Wazuelele itshi?
7 Tanga Matayo 17:1-5. Yehowa wazuelele hugo dia mbadi mu ‘vizio ya lutumbu lua Yesu.’ Yesu watamegele Phetelo nu Yakoba nu Yone ha guya gumutuala gu mulundu. Tangua ahetele guene, amonele ndaga yagushimana. Phala ya Yesu nu milele yenji yasendesele guhenya. Athu mbadi azogele akhalele gifua Moise nu Eliya, asendesele guzuela nu Yesu ndaga yatadila gufua nu gufuzumuga guenji. Apostolo ene thathu akhalele nu “tulo tuavula gu meso,” uvi tangua amonele vizio yene tulo tuaahuile. (Luka 9:29-32) Gungima, tuta dila kedi-kedi diaatshuigile, apostolo avile dijui dia Nzambi mu tuta diene! Yehowa wavutugidile luko mbimbi jiazuelele muene habatijiwe Yesu egi: ‘You udi mun’ami, ngana gumuzumba, wana gungusuanguluisa.’ Uvi mu hugo edi Yehowa walundile luko egi: ‘Mutegelelenu.’
8. Luholo lutshi vizio ya lutumbu yakuatesele Yesu nu alandudi enji?
8 Vizio yene yadiangele gumonesa lutumbu nu ngolo jia Yesu tangua mbadihinyina muene mu Ufumu wa Nzambi. Idi naye gukhala egi ndaga yene yahanele Yesu ngolo nu gikhesa gia gukolesela mu malamba nu gufua guakhalele gumunengenena. Vizio yene yakolesele nji gutshigina gua alandudi. Yaakuatesele ha gudilondega mukunda nu malamba akhalele naye guabuila, nu mukunda nu mudimo akhalele naye gutshita. Ivo hehi nu 30 gungima, Phetelo wazuelele luko ndaga yatadila vizio yene. Ndaga yene yamonesele egi wakhalele muwunguluga vizio yene uu nu mu tangua diene.—2 Phet. 1:16-18.
9. Ndaga jitshi jia ndando Yesu wawambelele alandudi enji?
9 ‘Mutegelelenu.’ Yehowa wamonesele haphelo egi wana gutshigina egi tutegelele ndaga jiazuelele Yesu nu tujitumagele. Ndaga jitshi Yesu wazuelele hakhalele muene ha mavu? Wazuelele ndaga jiavula jia ndando! Ha gufezegesa, walongesele alandudi enji nu guzumba guagasue luholo lua gulongesa lukuma luabonga, waawambelele mahugo avula ha gukhala ya gudimuga (ya gutema). (Mat. 24:42; 28:19, 20) Waawambelele luko ha gutshita ngolo hagula akolesele nu alebigo muila. (Luka 13:24) Yesu wamonesele alandudi enji egi adi naye gudizumba, nu gudivua mu katshi diawo, nu gutumagela mikhuala yenji. (Yone 15:10, 12, 13) Waahanele malongo abonga diago! Malongo ene adi nu ndando uu nu mangino.
10-11. Luholo lutshi tuajiya gumonesa egi tuana gutegelela Yesu?
10 Yesu wazuelele egi: ‘Muthu wagasue udi gukhanda ya giamatshidia wana gutegelela mbimbi yami.’ (Yone 18:37) Ha gumonesa egi tudi mutegelela mbimbi ya Yesu, tudi naye ‘gulandula gukolesela nu guditotesela gubola.’ (Kol. 3:13; Luka 17:3, 4) Tuana gumonesa luko egi tudi mutegelela mbimbi ya Yesu gula tudi mulongesa lukuma luabonga nu gikhesa giagasue ‘mu matangua abonga nga a lamba.’—2 Tim. 4:2.
11 Yesu wazuelele egi: ‘Imeme yami yana guvua dijui diami.’ (Yone 10:27) Alandudi a Yesu anago gusuga phamba ha gutegelela mbimbi yenji, uvi ana guyimonesa nji mu midimo yawo. ‘Malamba’ ana tagana nawo anago guawunganesa matangi. (Luka 21:34) Alandudi a Yesu ana gutshita yagasue ha gumutumagela ikhale mu matangua a malamba akola. Aphangi’etu avula ana gutagana nu malamba akola gifua usageshi wa mbalagaji, uphutu wakola, gudigita gua mavu nu ndaga jiko jiabola. Uvi ana gusala yagujinginyina gudi Yehowa nga malamba ene adi akola luholo lutshi. Gishina giene Yesu wazuelele egi: “Muthu udi mubamba mikhuala yami nu udi guyitumaga, muene wanguzumba ame. Yago wanguzumba ame, mbawuzumbiwa gudi Tata.”—Yone 14:21.
Mudimo wa gulongesa wana gutukuatesa ha gulandula gutegelela Yesu (Tala paragrafe 12) *
12. Itshi tuajiya gutshita luko ha gumonesa egi tuana gutegelela Yesu?
12 Ha gumonesa luko egi tuana gutegelela Yesu, tudi naye gutumagela athu atombele muene ha gututuameza. (Heb. 13:7, 17) Organizasio wa Nzambi wasombegesa ndaga jiavula jiatadila ima tudi naye gukalegela ha gulongesa nu bametode a gulongesela. Wasombegesa nji gudibungisa gua mukatshi dia phoso, nu bametode a gutungila, a gulondega nu a gubambela mafundo a gudibungisa. Tuana gusuanguluga diago nu utuameji wene wabonga! Tudi naye gukhala nu felela egi Yehowa mbawutukuatesa ha gulandula utuameji wa organizasio wenji.
13. Luholo lutshi gutegelela ndaga jiazuelele Yesu guajiya gutukuatesa?
13 Gutegelela ndaga jiagasue jialongesele Yesu guana gutukuatesa muavula. Yesu wawambelele alandudi enji egi ndaga jialongesele muene mbajiahana gikhesa. Wazuelele egi: ‘Mbamuheta gikhesa handaga muhitu wami udi waleluga, ginemo giami gidi gialeba.’ (Mat. 11:28-30) Mukatshi dia mikanda ya Biblia, mudi nji nu ba evanjile nguana ana guta lumene lua Yesu nu midimo yenji. Malongo adi mu Biblia ana gutuhana gikhesa nu ngolo jia mu nyuma, ana gutukuatesa ha gutema. (Ngi. 19:7; 23:3) Yesu wazuelele egi: ‘Athu adi muvua mbimbi ya Nzambi nu adi guyitumagela, adi nu gusuanguluga!’—Luka 11:28.
‘MBANGUTUMBUISA JINA DIAMI’
14-15. (a) Ha gutadila Yone 12:27, 28 mu okazio utshi Yehowa wazuelele hugo dia thathu hakhalele Yesu ha mavu? (b) Mukunda natshi tuajiya guzuela egi mbimbi jiazuelele Yehowa jiahanele Yesu gikhesa nu ngolo?
14 Tanga Yone 12:27, 28. Mukanda wa Yone udi mumonesa hugo dia thathu diazuelele Yehowa tangua diakhalele Yesu ha mavu. Masugu azonda gutuama dia gufua guenji, Yesu wayile gu Yelusalema mukunda nu Wano wa Pake. Wazuelele egi: ‘Ngumuvua gikenene.’ Gungima watshitshile gisambu egi: ‘Tata tumbuisa jina diaye.’ Sh’enji wahanele mvutu egi: “Ngaditumbuishile gale, mbanguditumbuisa nji luko.”
15 Yesu wakhalele nu ginemo giakola gia gusala yagujinginyina gudi Yehowa, ndaga yene yamuhanele gikenene giavula. Yesu wakhalele mujiya muabonga egi mbaamukhuphula mangololo gungima mbawufua gufua gua lamba. (Mat. 26:38) Uvi ndaga ya ndando mukunda nu Yesu yakhalele gutumbuisa jina dia Sh’enji. Mbalagaji jiafundile Yesu egi washingile Nzambi, Yesu wavile gikenene egi ndaga yene mbayishingisa Nzambi. Mbimbi jiazuelele Yehowa jiakuatesele diago Yesu! Jiamumonesele diago egi jina dia Yehowa mbaditumbuishiwa. Idi naye gukhala egi mbimbi jiene jia Yehowa jiahanele Yesu gikhesa gia gukolesela mu malamba akhalele naye gumubuila. Yajiya gukhala egi phamba Yesu wakotelesele ndaga jiazuelele Sh’enji mu tangua diene, uvi Yehowa wahanele njila egi jisonegewe mu Biblia ha gutukuatesa mangino.—Yone 12:29, 30.
Yehowa mbawutumbuisa jina dienji nu mbahuluisa akombeledi enji (Tala paragrafe 16) *
16. Matangua ako, itshi yajiya gutuhana gikenene mu ndaga yatadila jina dia Nzambi?
16 Luholo lumoshi nu Yesu, esue nji tuajiya guvua gikenene luholo athu ana gushinga jina dia Yehowa. Yajiya gukhala egi athu ana gutukalegela nji ndaga jiabola luholo atshitshile gudi Yesu. Mbalagaji jietu jiajiya nji gumuanga ndaga jia mambo mukunda nu esue. Tuajiya gumona gifua ndaga jiene jiagasue mbajishingisa jina dia Yehowa nga organizasio wenji. Mu tangua diene, guwunguluga mbimbi jiazuelele Yehowa gudi Yesu, guajiya gutukuatesa. Tushigo naye gulaba gudisagesa muavula gila athu adi mushinga jina dia Yehowa nu organizasio wenji. Uvi, tudi naye guwunguluga egi: ‘Guhuima gua Nzambi gudi guabalega ndunge jiagasue jia muthu, mbagubamba mitshima yetu nu matangi’etu mu njila ya Yesu Klisto.’ (Fili. 4:6, 7) Yehowa mbawulandula gutumbuisa jina dienji; mbawukalegela Ufumu wenji ha gusugisa malamba agasue Satana nu mavu enji ana gubatela akombeledi a Yehowa.—Ngi. 94:22, 23; Yesh. 65:17.
GUTEGELELA YEHOWA MANGINO
17. Ha gutadila Yeshaya 30:21, luholo lutshi Yehowa wana gutuwambela matangi enji mangino?
17 Yehowa wana landula guwambela athu matangi enji uu nu mangino. (Tanga Yeshaya 30:21.) Yadiago, mangino tuajiyilego gutegelela Yehowa muzuela mu dilu. Uvi, wasonegesele mbimbi jienji mu Biblia ha gutulongesa. Luko, nyuma ya Yehowa yana gukuatesa ‘muhiga watema nu wafubidila’ ha gulandula guhana akombeledi a Yehowa ima ya gudia mu nyuma. (Luka 12:42) Ha gukolesa gutshigina guetu, tuana guheta ima ya gudia mu nyuma mu njila ya mikanda, ya Internet, ya ba video, nga ya mikanda iko ya gutegelela mu radio.
18. Luholo lutshi mbimbi jia Yehowa jiana gukolesa gutshigina guawe nu jiana guguhana gikhesa?
18 Tujimbilago mbimbi jiazuelele Yehowa hakhalele Yesu ha mavu! Luholo mbimbi jiene jiasonegewe mu Biblia, jitukuatese ha gusha mutshima egi Yehowa wana gujiya ndaga jiagasue nu mbawusugisa malamba agasue Satana nu mavu enji ana gutubatela. Hene, tuzule desizio dia gutegelela muabonga mbimbi ya Yehowa. Gula tuatshita ngenyi, mbatukolesela mu malamba agasue ajiya gutubuila mangino nu anyi mbatubuila mu masugu adi muza. Biblia idi gutuwunguluisa egi: ‘Mudi naye gukolesela, ha gutagenesa ndaga Nzambi wana gutshigina nu hagula muhete ndaga jiamilayele muene.’—Heb. 10:36.
LUNGIMBO 4 “ Jéhovah est mon Berger ”
^ par. 5 Hakhalele Yesu ha mavu Yehowa wazuelele mahugo a tatu. Ha gufezegesa, lusugu lumoshi Yehowa watogele alandudi ha gutegelela Yesu Klisto. Mangino Yehowa wana guzuela nu athu mu njila ya Biblia; mu Biblia muene mudi nji malongo a Yesu. Wana guzuela nji nu athu mu njila ya organizasio wenji. Mu longo edi tumuza mumona egi gutegelela Yehowa nu Yesu guana gutukuatesa.
^ par. 52 UKOTELESHI WA IFUANESA: Mukulu mumoshi udi mutala luholo mukuateshi wa mudimo udi mukomba Inzo ya Ufumu nu guhana mikanda. Gungima mukulu muene udi gumushimana.
^ par. 54 UKOTELESHI WA IFUANESA: Phangi mumoshi nu mukaji’enji adi muhana imvitasio ya guya mu gudibungisa gudi yanga mumoshi wa jishui mu gifutshi gia Sierra Leone.
^ par. 56 UKOTELESHI WA IFUANESA: Matemue a Yehowa adi mu gifutshi giatunyishiwa mudimo wetu, adi mutshita gudibungisa mu gisuegi monzo. Asudiga milele mu luholo luajiyilego gutuma athu ako ha gujiya ndaga adi mutshita.
