1. Mukhuala utshi wa ndando Yesu gahanele alandudi enji? (Tala gifuanesa holu dia gizula.)

GUTUAMA egi Yesu ashiyiwe, wahanele alandudi enji mukhuala umoshi wa ndando mu phipha. Wazuelele egi: ‘Gifua luholo ngamizumbile, enue nji dizumbienu.’ Wazuelele luko egi: ‘Gu ndaga eyi, athu agasue mbaajiya egi mudi alandudi ami—gula mudi nu guzumba mukatshi dienu.’—Yone 13:34, 35.

2. Mukunda natshi idi nu ndando ha guzumba athu ako?

² Yesu wazuelele egi alandudi enji a giamatshidia mbaajiyiwa muabonga gula adi nu guzumba gifua guamonesele muene. Mbimbi eyi yakhalele ya giamatshidia sendese mu siekle ya thomo uu nu mangino. Hene, idi diago nu ndando egi tuzumbe athu ako nga idi lamba!

3. Itshi tuza mumona mu longo edi?

³ Mukut’etu agasue tushigo athu atagana, hene matangua ako yana khala lamba ha guzumba athu ako. Nga idi ngenyi, tudi naye gutshita ngolo ha gulandula gifezegeselo gia Yesu. Mu longo edi, tuza mumona luholo guzumba guajiya gutukuatesa ha gukhala athu ana kamba guhuima, nu athu ashigo nu lutondo, nu ha gukhala athu ana yamba athu. Tangua udi mulonguga longo edi, dihule egi: ‘Longo ditshi ngajiya guzula mu gifezegeselo gia aphangi alandudile gumonesa guzumba gudi athu ako nga yakhalele lamba?’

4. Ha gutadila Matayo 5:23, 24, mukunda natshi tudi naye gukamba guhuima nu athu anyi adi nu ndaga nu esue?

⁴ Yesu watulongesele egi idi nu ndando ha gukamba guhuima nu phangi munu udi nu ndanga nu esue. (Tanga Matayo 5: 23, 24.) Wamonesele egi ha gusuanguluisa Nzambi, tudi naye gukhala nu ufuta wabonga nu athu ako. Yehowa wana suanguluga muavula gula tudi mutshita ngolo ha gukamba guhuima nu athu ako. Mbawutuna gikombelelo gietu gula tudi nu umbalagaji nu athu ako, nga gula tushigo mukamba guhuima nu athu ako.—1 Yone 4:20.

5. Itshi yahanele phangi mumoshi lamba ha gukamba guhuima?

⁵ Yajiya gukhala lamba ha gukamba guhuima. Mukunda natshi? Tutadile ndaga yabuidile phangi Mark. * Wavuile lamba tangua phangi mumoshi gasendesele gumusegulula nu gumufeta gudi aphangi ako mu hungu. Itshi Mark gatshitshile? Udi muzuela egi: “Ngavuile khabu jiakola, nu ngakhalelego luko mutangiza ndaga ngakhalele muzuela”. Gungima, Mark wavuile gikenene mukunda nu khadilo dienji, nu wakambele phangi muene ha gumutoga pardo nu ha guvutula guhuima. Uvi, phangi muene watunyile genji. Thomo, Mark watangijile egi, ‘Mukunda natshi ngudi mulandula gukamba guhuima gula muthu muene udi mutuna genji?’ Uvi, mutadi muwendji wawo wamukuatesele hagula gabembigo. Itshi phangi Mark gatshitshile?

6. (a) Luholo lutshi Mark galanduile gukamba guhuima? (b) Luholo lutshi Mark gakalegele mbimbi jidi mu Kolosai 3:13, 14?

⁶ Tangua Mark gatangijile muabonga, wakotelesele egi gashigo nu khadilo dia gudibulumuisa, nu wakhalele gudimona gifua wakhalele nu makalegelo abonga gubalega athu ako. Wamonele egi udi naye gusombegesa khadilo dienji. (Kol. 3:8, 9, 12) Wayile luko musanga phangi muene ha gumutoga pardo. Mark wamusonegele nji mukanda, nu wamudijigile egi ngutotesele, gula watshigina tuvutugile luko ufuta wetu. Mark wamutumile nji kado nu watangijile egi umuya musuanguluga nu kado gene. Ndaga ya gikenene idi egi, phangi muene gamutotesele ndo. Uvi, Mark walanduile gutumagela mukhuala wa Yesu wa guzumba phangi’enji nu gumutotesela. (Tanga Kolosai 3:13, 14.) Nga tuakalagala ngolo ha gukamba guhuima  nu aphangi etu, uvi ene atuna gawo, guzumba gua giamatshidia mbagututuma ha gulandula guatotesela, nu gusamba ha gukamba guhuima.—Mat. 18:21, 22; Gal. 6:9.

7. (a) Itshi Yesu gatuwambelele ha gutshita? (b) Ndaga itshi ya lamba yatagenele naye phangi mumoshi ya mukhetu?

⁷ Yesu wazuelele egi, tudi naye gutshitshila athu ako ndaga gifua luholo tudi mutshigina egi ene nji atukalegele. Wazuelele luko egi tushigo naye guzumba phamba athu adi gutuzumba. (Luka 6:31-33) Uvi itshi wajiya gutshita gula phangi mumoshi ya mu hungu gashigo guguhana lumene nu udi gugutuna? Ndaga ya luholo elu yabuidile phangi Lara. Udi muzuela egi: “Phangi mumoshi wangutunyile, ngakhalelego mujiya mukunda natshi. Ndaga eyi yanguhanele diago lamba, ngakhalelego luko muvua nzala ya guya mu gudibungisa gua mu hungu.” Thomo, Lara wazuelele egi: ‘Gubola gushigo guami. Athu agasue mu hungu adi gudihula mukunda nu khadilo dia phangi owu wa mukhetu.’

8. Itshi Lara gatshitshile ha guvutula guhuima, nu longo ditshi tuajiya guzula mu gifezegeselo gienji?

⁸ Lara watshitshile yagasue ha guvutula guhuima. Wasambele Yehowa nu wazudile desizio dia guta maga nu phangi muene. Muyadi awo tshima azuelele mulonga wene, adiyambele, nu avutuile guhuima. Ndaga jiagasue jiabongele. Lara udi muzuela egi: “Uvi gungima, phangi muene wavutugile luko makalegelo enji gakhalele nawo thomo. Muila wangulebele.” Thomo, Lara watangijile egi mbawuheta gusuanguluga phamba gula phangi muene wasombegesa khadilo dienji. Uvi gungima, Lara wakotelesele egi idi ndaga yabonga ha gulandula gumonesela phangi’enji guzumba nu ‘gumutotesela.’ (Ef. 4:32–5:2) Lara wajiyile egi, guzumba gua giamatshidia “guana haga ndo umbalagaji. Guana tshuiga ndaga jiagasue, guana tshigina ndaga jiagasue, guana gudifelela mu ndaga jiagasue, guana kolesela mu ndaga jiagasue.” (1 Kol. 13:5, 7) Lara wahetele guhuima gua mu matangi. Gungima, phangi muene wa mukhetu wavutudile luko ufuta n’enji. Tangua udi mukamba guvutula guhuima nu aphangi nu udi mulandula guazumba, jiya egi “Nzambi wa guzumba nu wa guhuima mbawukhala [nu aye].”—2 Kol. 13:11.

9. Ha gudivua nu Makalegelo 10:34, 35, mukunda natshi tushigo naye gukhala nu lutondo?

⁹ Yehowa gakhala ndo muenya lutondo. (Tanga Makalegelo 10:34, 35.) Gula tushigo nu lutondo, idi mumonesa egi tudi diago an’enji. Tuana tumagela mukhuala wana gututuma ha guzumba athu ako gifua luholo esue tuana gudizumba, nu tuana bamba guhuima mu fami yetu ya Uklisto.—Lomo 12:9, 10; Yak. 2:8, 9.

10-11. Luholo lutshi phangi mumoshi wa mukhetu gabingile ha gukatula matangi enji abola?

¹⁰ Ishigo ndaga yaleba gudi athu ako ha gutuna khadilo dia gutomba-tomba. Tutadilenu gifezegeselo gia phangi Ruth. Hakhalele muene muvuala, muthu mungoshi ya gifutshi giko watshitshile ndaga yabola mu fami yawo. Ruth wadivuile gikuatshi? Udi muzuela egi: “Ngana tshigina ndo nga gima gimoshi gia mu gifutshi gia muthu muene. Ngakhalele mutangiza egi, athu agasue a mu gifutshi giene, nu ene Matemue a Yehowa akhala luholo lumoshi.” Luholo lutshi phangi Ruth gabingile matangi awa abola?

¹¹ Ruth udi muzuela egi watshitshile ngolo jiavula ha gukatula matangi ene abola. Watangele mene jiavula jia aphangi a mu gifutshi giene mu Annuaire. Udi muzuela egi: “Ngatshitshile ngolo jiavula ha gukatula matangi abola mukunda nu athu a mu gifutshi giene. Ngasendesele gumona egi aphangi a mala nu a akhetu a mu gifutshi giene akhalele nu gikhesa mukunda nu Yehowa. Ngajiyile diago egi, ene nji adi mukatshi dia aphangi etu a ha mavu a mudidi.” Gungima, phangi Ruth wakotelesele egi wakhalele naye gumonesa guzumba. Udi muzuela egi: “Gula ngatagana nu aphangi a mu gifutshi giene, ngana tshita ngolo ha gukuata nawo ufuta. Ngana guta nawo maga ha guajiya muabonga.” Mbuto tshi yazolele? Ruth udi muzuela egi: “Gungima dia matangua, matangi ami abola ahuile.”

12. Ndaga itshi yataganele naye phangi Sarah?

¹² Athu ako ana khala nu lutondo uvi ana jiya ndo. Ha gufezegesa, Sarah wakhalele mutangiza egi gashigo muenya lutondo, handaga gakhalelego muzuela ndaga jiabola mukunda nu athu a gilema giko, mukunda nu umonyi adi nawo, nga mukunda nu inemo athu ako adi naye mu hungu. Uvi udi muzuela egi: “Ngajile mukotelesa egi ngakhalele muenya lutondo.” Mu luholo lutshi? Sarah nu enya fami yenji alongugile muavula, nu wakhalele mukuata ufuta phamba nu athu alongugile gifua muene. Wawambelele futa dienji wa yala egi: “Ngana kuata ufuta phamba nu aphangi anyi alongugile muavula gifua ame. Ngana tshigina ndo anyi alongugile ndo muavula.” Idi yadiago egi, yakhalele mutoga egi Sarah asombegese khadilo dienji. Luholo lutshi?

13. Longo ditshi tuajiya guzula mu luholo Sarah gasombegesele khadilo dienji?

¹³ Mutadi muwendji mumoshi wakuatesele Sarah ha gusombegesa khadilo dienji. Sarah udi muzuela egi: “Wangushimanele mukunda nu mudimo ngana kalegela Yehowa, mukunda nu mvutu jiami jiabonga mu hungu, nu luholo ngana jiya Biblia muabonga. Wazuelele luko egi luholo tudi muya nu gujiya ndaga jiavula, tudi naye nji gukudisa makalegelo a Uklisto gifua gudibulumuisa, nu gutotesela athu ako.” Sarah wakalegele ndaga jiamuwambelele mutadi muwendji. Udi muzuela egi: “Ngakotelesele egi ndaga ya gubalega ndando idi gukhala nu gisemo nu guzumba.” Ndaga eyi yakuatesele Sarah ha gutadila aphangi mu luholo luabonga. Udi muzuela egi: “Ngakambele gujiya makalegelo abonga ana khala nu aphangi ana tshita egi, Yehowa asuanguluge nawo.” Uvi esue giwa? Tushigo naye gutangiza egi tuabalega athu ako handaga tualongugile muavula! Gula tudi nu ‘guzumba guavula mukunda nu aphangi etu a ha mavu agasue,’ mbatukhadigo nu lutondo.—1 Phet. 2:17.

14. Ha gudivua nu Hebelu 13:16, luholo lutshi Yehowa gana gudivua gula tudi muyamba athu ako?

¹⁴ Yehowa wana suanguluga gula tudi mumonesa khadilo dia guyamba athu. (Tanga Hebelu 13:16.) Wana mona egi, guyamba guakhala mukatshi dia ndaga tuana tshita ha gumukombelela, gula tudi mukuatesa athu adi nu funu ya ukuateshi. (Yak. 1:27; 2:14-17) Hene, Biblia yana gututoga ha ‘gukhala nu khadilo dia guyamba.’ (Lomo 12:13) Gula tudi nu khadilo dia guyamba, mbatumonesa diago egi tuana khala hehi ha gukuatesa athu, tuana guazumba nu tuana tshigina gubua mafuta awo. Yehowa wana suanguluga gula tudi muhana athu ako ima tudi nayo gifua ima ya gudia, ya gunua, gubalegesa nawo tangua, nu guazumba. (1 Phet. 4:8-10) Uvi, gudi nu ndaga jiajiya gutukanga njila ha gumonesa khadilo dia guyamba.

15-16. (a) Mukunda natshi athu ako ana guvua musonyi nga ba dute ha guyamba athu? (b) Luholo lutshi phangi Edit gabingile musonyi wenji ha guyamba athu?

¹⁵ Tuajiya guvua musonyi nga gukhala nu ba dute ha guyamba athu, mukunda nu ndaga tuana tagana najio. Tuzuelele gifezegeselo gia phangi Edit, yonu udi mukhetu wa gafunda. Gutuama egi abue Temue wa Yehowa, gakhalelego musuanguluga gubalegesa tangua diavula nu athu ako. Edit wakhalele mutangiza egi gashigo nu ima ya guyambela athu gifua idi naye athu ako.

¹⁶ Gungima dia gubua Temue wa Yehowa, Edit wasombegesele utangijilo wenji. Watshitshile ngolo ha gusendesa guyamba athu. Udi muzuela egi: “Tangua akhalele mutunga Inzo yetu ya Ufumu, mukulu mungoshi wanguwambelele egi, phangi mumoshi nu mukaji’enji adi naye guza gutukuatesa gu mudimo wene, nu wangutogele ha guakambela fundo dia gubanda mukunda nu phoso mbadi. Ngatangijile luholo Yehowa gashimbigile mukhetu wa gafunda wa gu dimbo dia Salefata.” (1 Maf. 17:12-16) Edit watshiginyile, hene gayambele aphangi ene. Wahetele ishimbigo ba? Udi muzuela egi: “Ha fundo dia gutshita phoso mbadi, tuatshitshile nawo mbeji mbadi. Tuakuatele diago ufuta wakola nawo mu tangua tuabalegesele nawo.” Edit wakuatele  nji mafuta abonga mu hungu. Mangino udi muvundji wa muhola, nu wana suanguluga nu mafuta anyi gana longesa nawo tangua ana guza gumutala gumbo dienji. Udi muzuela egi: “Khadilo dia guhana diangubatela gubonga! Mu guzuela guabonga, ngahetele ishimbigo yavula diago.”—Heb. 13:1, 2.

17. Ndaga itshi Luke nu mukaji’enji ajile mukotelesa gungima?

¹⁷ Tuajiya gukhala hehi tangua diagasue ha guyamba athu, uvi tuajiya gukudisa khadilo diene ba? Tuzule gifezegeselo gia phangi Luke nu mukaji’enji. Ana yamba diago athu muavula. Mbala jiavula akhalele mutamega mvuaji jiawo, enya fami yawo, mafuta awo, nu mutadi muwendji nu mukaji’enji ha guza mudia gumbo diawo. Uvi Luke udi muzuela egi: “Tuakotelesele egi tuakhalele mutamega phamba athu a gujiya.” Luholo lutshi Luke nu mukaji’enji akudishile khadilo dia guyamba?

18. Luholo lutshi Luke nu mukaji’enji akudishile khadilo diawo dia guyamba?

¹⁸ Luke nu makaji’enji asombegesele khadilo diawo tangua atangigijile mbimbi eji jia Yesu: ‘Gula mudi muzumba phamba athu anyi adi gumizumba enue, gishimbigo gitshi mbamuheta?’ (Mat. 5:45-47) Akotelesele diago egi adi naye gulandula gifezegeselo gia Yehowa, yonu wana hana ima gudi athu agasue. Hene, azudile desizio dia gutamega aphangi anyi khenji atamegele ndo. Luke udi muzuela egi: “Mukut’etu agasue tuana suanguluga muavula gubalegesa tangua hamoshi. Yana kolesa ufuta mukatshi dietu nu gudi Yehowa.”

19. Luholo lutshi tuajiya gumonesa egi tudi alandudi a Yesu, nu desizio itshi wazula?

¹⁹ Tuamona luholo guzumba aphangi muavula guajiya gutukuatesa ha gukamba guhuima mukatshi dietu, ha gutuna gukhala enya lutondo, nu ha guyamba athu ako. Tuajiya gubinga matangi agasue abola nu tuajiya guzumba aphangi etu nu mutshima wagasue. Gula tuatshita ngenyi, mbatukhala nu gusuanguluga guavula nu mbayimonesa egi tudi diago alandudi a Yesu.—Yone 13:17, 35.