Wana Guyijiya Ba?
Gula tuakatula Biblia, ijiyishilo itshi iko idi mumonesa egi enya Isalele akhalele diago mu uhiga gu Égypte?
Biblia idi muzuela gamba, tangua enya gu madiana adigile (asumbishile) Yozefe gu Égypte, sh’enji Yakobo nu fami yenji akatugile gu Kana nu ayile gu Égypte. Atungile gu dimbo dia Goshene ha fundo muta wa Nile wana gungina mu kianga gia Mediterane. (Gis. 47:1, 6) Enya Isalele ‘avudile nu abuile enya ngolo.’ Hene, enya gu Égypte avile woma wavula nu a abuishile ahiga awo gu ngolo.—Guz. 1:7-14.
Enya ndunge ako akhalele muzuela ndaga jiabola mukunda nu lumene elu lua Biblia, nu akhalele mumona egi ludi gishima gia mambo. Uvi, gudi nu ijiyishilo idi gutumonesa gamba enya mu giphuta gia Sheme * akhadile mu uhiga mu Égypte ya ginono.
Ha gufezegesa, ba archéologue ahetele ijiyishilo gu makhulu a gu Nord ya Égypte. Dr. John Bimson udi muzuela egi, mu gitshinyi giene gia Nord ya Égypte mudi nu makhulu 20 nu holu a enya mu giphuta gia Sheme. Luko, muthu mumoshi wana longuga ndaga jia mualeha jia gu Égypte mu jina dia James K. Hoffmeier wazuelele gamba: “Mu sungi ya ivo 1 800 uu nu mu 1 540 G.T.D., enya giphuta gia Sheme akhalele mukatuga gu Ouest ya Asie ha guya gu Égypte handaga guakhalele guawaha.” Wazuelele luko gamba: “Sungi yene idi gudivua nu tangua dia mafumu a iphuta a mu ginono inyi tudi mutanga mu mukanda wa Gisendeselo.”
Gudi nu ijiyishilo iko yahetewe gu Sud ya Égypte. Mikanda ya ginono (papyrus) ya mu ivo 2 000 uu nu mu 1 600 G.T.D., idi nu ma jina a ahiga akhadile mukalegela athu midimo gu Sud ya Égypte. Majina 40 nu holu a athu ene, akhalele enya mu giphuta gia Sheme. Ahiga ene akhalele nu midimo yavula ya gutshita gifua: Gutelega, gutunga milele, nu gudima mahia. Hoffmeier yonu tuazuelela guthunda udi muzuela luko egi: “Enya giphuta gia Sheme gubalega 40 akhalele mutshita mudimo mu inzo imoshi gu dimbo dia Thébaïde [gu sud ya Égypte], Enya giphuta gia Sheme adivudishile diago gu Égypte.”
Archéologue David Rohl wasonegele gamba, majina ako a ahiga ene “adi luholo lumoshi nu majina tudi mutanga mu Biblia.” Ha gufezegesa, itshinyi iko ya mikanda yene idi nu majina a gudifuana nu majina awa Isakale, Asele, nu Shifela. (Guz. 1:3, 4, 15) Rohl udi musugisa egi: “Ijiyishilo eyi idi mumonesa diago egi enya Isalele akhalele mu uhiga gu Égypte.”
Dr. Bimson udi muzuela egi: “Lumene lua Biblia lua ahiga gu Égypte nu lua guzoga guawo ludi diago nu ijiyishilo ya giamatshidia.”
^ par. 4 Sheme wakhalele mun’a Nowa. Mu giphuta gia Sheme, muakhalele nu enya Elama, enya Asiliya, enya Kaldeya, enya Hebelu, enya Siliya, nu iphuta yavula ya enya Alaba.
