LONGO DIA 10
Guzumba nu guhana Yehowa mersi mbagugutuma ha gubatijiwa
‘Itshi idi gungukanga njila ha gubatijiwa?’—MAKAL. 8:36.
LUNGIMBO 37 Je veux te servir de toute mon âme
NDAGA JIDI MU LONGO EDI *
1-2. Luholo Makalegelo 8:27-31, 35-38 ayimonesa, itshi yatumile muenya gu Etiopia ha gubatijiwa?
WANA tshigina gubatijiwa ha gubua mulandudi wa Klisto ba? Guzumba nu khadilo dia guhana mersi, diakuatesele athu avula ha guzula desizio dia gubatijiwa. Tutadile gifezegeselo gia muthu mungoshi wakhalele mutshita mudimo gumbo dia fumu mukhetu wa gu Etiopia.
2 Tangua muenya gu Etiopia galongugile ndaga jiakhalele mu mukanda wa Nzambi, wazudile desizio dia gubatijiwa mbala imoshi. (Tanga Makalegelo 8:27-31, 35-38.) Itshi yamutumine ha gutshita ngenyi? Wasuangulugile nu mbimbi ya Nzambi; wakhalele mutanga mukanda wa profete Yeshaya hakhalele muene mu phusu-phusu yenji. Tangua Filipho gatele n’enji maga, muthu muene wasuangulugile diago nu ndaga yatshitshile Yesu mukunda nu muene. Uvi mukunda natshi muthu muene gayile gu Yelusalema? Wayile handaga wakhalele muzumba Yehowa. Tuayijiya gikuatshi? Wayile mukombelela Yehowa gu Yelusalema. Yajiya gukhala egi muthu muene wabembele gikombelelo gienji, nu wayile gu gifutshi gia athu ana kombelela Nzambi wa giamatshidia. Ndaga yatumile muthu owu ha guzula desizio edi dia ndando ha gubatijiwa nu ha gubua mulandudi wa Klisto idi guzumba guenji mukunda nu Yehowa.—Mat. 28:19.
3. Itshi yajiya gukanga muthu njila ha gubatijiwa? (Tala galuanda “ Wakhala Muthu wa Luholo Lutshi mu Mutshima Waye?”)
3 Guzumba Yehowa guajiya gugutuma ha guzula desizio dia gubatijiwa. Uvi guzumba guajiya nji gugukanga njila ha gubatijiwa. Luholo lutshi? Tutadile gale ifezegeselo eyi. Yajiya gukhala egi wana zumba muenya fami yaye mumoshi muavula nga futa diaye wa mutshima, nu wana guvua woma egi mbaagutuna gula wabatijiwa. (Mat. 10:37) Nga ndo, wana zumba muavula ndaga jinyi jiana tuna Nzambi, nu wana mona lamba ha gubemba ndaga jiene. (Ngi. 97:10) Nga ndo, wana kalagala fete jidi gudivua nu ikombelelo ya mambo. Wajiya gusendesa gutangiza ndaga wakhalele mutshita masugu abalega gu fete jiene. Ngenyi, yajiya gukhala lamba ha gubemba gukalagala ndaga jiana tuna Yehowa. (1 Kol. 10:20, 21) Wajiya gudihula egi: “Ndaga itshi, nga ndo nanyi ngana zumba muavula gubalega?”
MUTHU TUDI NAYE GUZUMBA MUAVULA
4. Ndaga itshi ya thomo mbayigutuma ha gubatijiwa?
4 Wana khala nu ndaga jiavula wana zumba nu jiana gugusuanguluisa. Yajiya gukhala egi, gutuama egi usendese gulonguga nu Matemue a Yehowa, wakhalele munemesa Biblia muavula. Gungima, wakudishile guzumba guaye mukunda nu Yesu. Henyaha, tangua wajiya Matemue a Yehowa, wasendesa gubalegesa nawo tangua hamoshi. Uvi guzumba ndaga eji, mbagushigo diago gugutuma giphungu gimoshi ha gudihana gudi Yehowa nu ha gubatijiwa. Ndaga ya thomo mbayigutuma ha gubatijiwa idi guzumba guaye mukunda nu Yehowa Nzambi. Gula udi muzumba Yehowa muavula, gushigo nga gima gimoshi, nga muthu mumoshi wajiya gugukanga njila ha gumukombelela. Guzumba Yehowa mbagugutuma ha gubatijiwa, nu mbagugukuatesa ha gusala wa gujinginyina gungima dia gubatijiwa.
5. Mihu itshi tuza mutadila mu longo edi?
5 Yesu wazuelele egi tudi naye guzumba Yehowa nu mutshima wetu wagasue, nu monyo wetu wagasue, nu matangi etu agasue nu ngolo jietu jiagasue. (Mako 12:30) Luholo lutshi wajiya guzumba nu gunemesa Yehowa muavula? Gula watangiza luholo Yehowa gana gutuzumba, aye nji mbawumuzumba muavula. (1 Yone 4:19) Ndaga jitshi jiko wajiya gutshita ha gukudisa guzumba guaye mukunda nu Yehowa? *
6. Ha gutadila Lomo 1:20, mu luholo lutshi wajiya gujiya Yehowa muabonga?
6 Longuga ha gujiya Yehowa mu njila ya ima yafugile muene. (Tanga Lomo 1:20; Yat. 4:11) Tangigiza ima yafugile Yehowa gifua mitshi nu shitu, nu luholo yana monesa gutema guenji. Tangiza nji luholo muila waye wafugiwe mu luholo lua gushimana. (Ngi. 139:14) Luko, tangiza ngolo jinyi Yehowa gambile mu kumbi (tangua). Jiya nji egi, kumbi diakhala mukatshi dia ba milliard a jitemua gosa. * (Yesh. 40:26) Gula watangiza ima yafugile Yehowa, mbawumunemesa muavula diago. Hene, gujiya egi Yehowa wakhala nu gutema, nu ngolo jiavula, guene guajiya gugutuma ha gukolesa ufuta waye n’enji. Ha gukolesa guzamba guaye mukunda nu Yehowa, udi naye gujiya ndaga jiavula jiamutadila muene.
7. Ha guzumba Yehowa muavula, ndaga itshi udi naye gujiya?
7 Udi naye gujiya egi Yehowa wana gudisagesa muavula mukunda nu aye. Yana khala lamba gudi aye ha gutshigina egi mufugi wa dilu nu mavu wana gugujiya nu wana gudisagesa mukunda nu aye ba? Gula idi ngenyi, jiya egi Yehowa ‘gana khalago gualeha gudi muthu wagasue mukatshi dietu.’ (Makal. 17:26-28) Muene wana ‘tala mitshima yagasue,’ nu udi gugulaya, gifua luholo Davidi gawambelele Solomo egi ‘gula aye wamukamba, muene mbawumonega gudi aye.’ (1 Gudi. 28:9) Uvi, gishina udi mulongugila Biblia gidi egi Yehowa wana ‘gugunana gudi muene’ gifua luholo gawambelele profete wenji Yelemiya. (Yel. 31:3) Gula udi musuanguluga nu ima yafugile Yehowa, guzumba guaye mukunda nu muene mbaguvula diago.
8. Luholo lutshi wajiya gumonesa egi wana hana mersi mukunda nu guzumba gua Yehowa?
8 Ha gumonegesa egi udi muhana mersi mukunda nu guzumba gua Yehowa, udi naye gumusamba. Guzumba guaye mukunda nu Nzambi mbagukula gula udi gumuwambela ndaga jidi gugusagesa, nu udi gumuhana mersi mukunda nu ndaga gagukalegele. Ufuta waye nu Yehowa mbawukola gula udi mumona luholo gadi muhana mvutu mu isambu yaye. (Ngi. 116:1) Mbawutshigina diago egi Yehowa wana gugukotelesa muabonga. Uvi ha gusuena hehi nu Yehowa, udi naye gujiya ndaga jiana tshigina muene nu jinyi gana tuna. Udi naye gujiya ndaga Yehowa gana tshigina egi utshite. Ha gukhala nu ujiyi wavula, udi naye gulonguga Mbimbi yenji, Biblia.
Luholo luabonga lua gusuena hehi nu Yehowa ludi gutanga Biblia ha gujiya ndaga jidi mutshigina muene (Tala paragrafe 9) *
9. Luholo lutshi wajiya gumonesa egi wana suanguluga nu Biblia?
9 Khala muhana mersi mukunda nu Biblia. Phamba Biblia yana zuela giamatshidia giatadila Yehowa nu felela dienji mukunda nu aye. Ha gumonesa egi wana suanguluga nu Biblia, udi naye guyitanga lusugu nu lusugu, nu gulondega gutuama malongo mbamulonguga nu mulongeshi, nu gukalegela ndaga udi mulonguga. (Ngi. 119:97, 99; Yone 17:17) Wana khala nu programe ya lutango lua Biblia ba? Wana landula muabonga programe yene, ha gujiya gula wana guyitanga lusugu nu lusugu ba?
10. Ndaga itshi imoshi yana tshita egi Biblia ikhale yagudisha nu mikanda iko?
10 Ndaga imoshi yana tshita egi Biblia ikhale ya gudisha idi egi, yasonegewe gudi athu amonele Yesu. Phamba yene yana kotelesa muabonga ndaga jiatshitshile Yesu mukunda nu aye. Gula walonguga ndaga jiazuelele nu jiatshitshile Yesu, mbawukhala nu ufuta wakola n’enji.
11. Itshi yajiya gugukuatesa ha guzumba Yehowa?
11 Gula udi Muzumba Yesu, Mbawuzumba nji Yehowa muavula diago. Mukunda natshi? Handaga Yesu walanduile diago muabonga makalegelo a Sh’enji. (Yone 14:9) Gula walonguga muabonga ndaga jiatadila Yesu, mbawujiya Yehowa muabonga nu mbawumuhana mersi. Tangiza gale khenda jiamonesele Yesu gudi athu akhalele mumonewa gifua athu a gituhu: Phutu, akhashi, nu athu aleba. Tangiza nji malongo ahanele muene ha gukalegela lusugu nu lusugu, nu luholo lujingu luaye luana bonga tangua wana tumagela malongo ene.—Mat. 5:1-11; 7:24-27.
12. Gulonguga ndaga jiatadila Yesu mbagugutuma ha gutshita itshi?
12 Guzumba guaye mukunda nu Yesu, mbagukola diago gula udi mutangiza mulambu wahanele muene ha gututotesela gubola. (Mat. 20:28) Gula wajiya diago egi Yesu wafile mukunda nu aye, mbayigutuma ha gubalumuna mutshima nu gutoga Yehowa hagula agugutotesele. (Makal. 3:19, 20; 1 Yone 1:9) Gula wazumba Yesu nu Yehowa, mbawukuata ufuta wakola nu athu ana guazumba.
13. Mu njila ya itshi Yehowa mbawugukuatesa?
13 Zumba athu anyi ana zumba Yehowa. Enya fami yaye nu mafuta anyi ashigo Matemue a Yehowa, ajiyilego gukotelesa gishina udi gudihana gudi Yehowa. Ajiya gugutunyisa ha gukombelela Yehowa. Uvi Yehowa mbawugukuatesa mu njila ya fami yetu ya mu nyuma. Gula wasala ya gujinginyina nu fami yene ya mu nyuma, mbaadi guguzumba nu gugukuatesa. (Mako 10:29, 30; Heb. 10:24, 25) Gungima, enya fami yaye ajiya nji gusendesa gukombelela Yehowa nu gutumagela mikhuala yenji.—1 Phet. 2:12.
14. Luholo 1 Yone 5:3 yayimonesa, itshi wakotelesele mu ndaga yatadila mikhuala ya Yehowa?
14 Khala Muhana Yehowa mersi nu gutumagela mikhuala yenji. Gutuama egi ujiyile Yehowa, aye hakhaye wakhalele muzula desizio dia gukhaphumuna ndaga jiabonga nu jiabola, uvi henyaha wakotelesa egi mikhuala ya Yehowa idi diago yabonga. (Ngi. 1:1-3; tanga 1 Yone 5:3.) Tangiza malongo a Biblia atadila mala, nu akhetu, mvuaji nu ana. (Ef. 5:22–6:4) Fami yaye yahetele gale gubonga tangua muatumagele malongo awa ba? Gutumagela malongo a Yehowa atadila gutomba mafuta nu gutema guagasue, guabongesele gale makalegelo aye ba? Wakhala nu khadilo dia gusuanguluga ba? (Ish. 13:20; 1 Kol. 15:33) Mvutu jia mihu eyi jiajiya gukhala egi ayi.
15. Itshi udi naye gutshita gula udi mutshigina gukalegela mikhuala ya Biblia udi mulonguga?
15 Matangua ako, yajiya gukhala lamba ha gujiya luholo lua gukalegela mikhuala ya Biblia udi mulonguga. Gishina giene Yehowa gana kalegela ulondegi wenji ha gutuhana mikanda idi mukotelesa Biblia, hagula itukuatese ha gukhaphumuna ndaga jiabonga nu jiabola. (Heb. 5:13, 14) Tangua udi mutanga nu gulonguga mikanda yene, mbawumona egi idi yatagana nu yabonga, nu mbawusuanguluga gukhala mu ulondegi wa Yehowa.
16. Luholo lutshi Yehowa gahagele ulondegi mukatshi dia akombeledi enji?
16 Khala muzumba nu gukuatesa ulondegi wa Yehowa. Yehowa wabungishile akombeledi enji mu mahungu; Mun’enji Yesu muene wana tuameza mahungu agasue. (Ef. 1:22; 5:23) Yesu watombele gahunji gazonda ga Aklisto ambiwe maji mu nyuma ha gutuameza mudimo wana tshigina muene egi ukalegewe mangino. Yesu watamegele gahunji ga Aklisto ene ambiwe maji mu nyuma egi ‘muhiga wafubidila nu watema.’ Aklisto ene ana zula ginemo giawo nu ndando ha gugudisa nu gugubamba mu nyuma. (Mat. 24:45-47) Muhiga wafubidila wana gugukuatesa tangua gana tomba athu ana tagenesa ndaga jiana togewa ha gubua akulu ha gututuameza. (Yesh. 32:1, 2; Heb. 13:17; 1 Phet. 5:2, 3) Akulu adi hehi ha gutshita yagasue mukunda nu aye, ha guguhana ngolo nu ha gugukuatesa ha gukolesa ufuta waye nu Yehowa. Uvi ndaga yagubalega ndando akulu ajiya gutshita mukunda nu aye idi gugukuatesa hagula ulongese athu ako lukuma lua Yehowa.—Ef. 4:11-13.
17. Ha gutadila Lomo 10:10, 13, 14, mukunda natshi tudi naye gulongesa athu ako lukuma lua Yehowa?
17 Kuatesa athu ako ha guzumba Yehowa. Yesu watumile alandudi enji ha gulongesa athu ako lukuma lua Yehowa. (Mat. 28:19, 20) Tudi naye gutumagela mukhuala owu handaga tuana gumunemesa. Gula guzumba guaye mukunda nu Yehowa guavula, mbawudivua gifua muadivile mupostolo Phetelo nu Yone tangua azuelele egi: ‘Tuajiyilego gubemba guzuela ndaga eji tuamonele nu eji tuavuile.’ (Makal. 4:20) Gushigo nu ndaga yana suanguluisa muavula gifua gukuatesa muthu ha guzumba Yehowa. Tangiza gusuanguluga guavile mulongeshi Filipho tangua gakuatesele muenya gu Etiopia ha gulonguga giamatshidia gia Mbimbi ya Nzambi, nu ha gubatijiwa! Gula walandula gifezegeselo gia Filipho, nu watumagela mukhuala wa Yesu wa gulongesa, mbawumonesa diago egi udi Temue wa Yehowa. (Tanga Lomo 10:10, 13, 14.) Mu ndaga eyi, wajiya gudihula muhu gifua muadihudile muenya gu Etiopia egi: ‘Itshi idi gungukanga njila ha gubatijiwa?’—Makal. 8:36.
18. Itshi mbatutadila mu longo dialandula?
18 Ndaga ya gubalega ndando wajiya gutshita mu lujingu luaye idi, guzula desizio dia gubatijiwa. Udi naye gujiya muabonga ukoteleshi wa gubatijiwa, handaga didi desizio dia gubalega ndando udi naye guzula. Ndaga tshi yatadila gubatijiwa udi naye gujiya? Itshi udi naye gutshita gutuama nu gungima dia gubatijiwa? Longo dialandula mbadihana mvutu jia mihu eyi.
LUNGIMBO 2 Ton nom est Jéhovah
^ par. 5 Athu ako ana zumba Yehowa ana khala nu ba dute ha gujiya gula adi hehi ha gubatijiwa nu ha gubua Matemue wa Yehowa. Gula aye nji wana gudivua ngenyi, longo edi diza gugukuatesa ha gutangiza luko ndaga wajiya gutshita ha guzula desizio dia gubatijiwa.
^ par. 5 Athu akhala a gudisha, ako ajiya gukalegela ndaga jiazuelewa mu longo edi mu luholo lua gudisha.
^ par. 6 Ha gujiya ifezegeselo iko yavula, tala tumikanda La vie a-t-elle été créée? nu Cinq questions à se poser sur l’origine de la vie.
^ par. 61 UKOTELESHI WA IFUANESA: Phangi wa mukhetu mumoshi udi muhana trakte gudi mukhetu mumoshi wa muvuala atagana n’enji gu zando.
