1. Itshi muthu gadi naye gutshita gutuama dia gusendesa gutunga inzo?

TANGIZA muthu mungoshi wazula desizio dia gutunga inzo. Yowu mujiya gula inzo ya luholo lutshi gadi naye gutunga. Muthu muene udi naye guya mu phushi gu zando ha gusumba ima ya gutungila nu gusendesa gutunga ba? Ndo. Gudi nu ndaga ya ndando gadi naye gukalagala gutuama egi asendese gutunga: Udi naye gutangiza gula inzo yene idi muzula makuta guvula gutshi. Mukunda natshi? Handaga udi naye gujiya gula udi nu makuta a gumanesela inzo yene nga ndo. Gula wajiya gutuama guvula gua makuta inzo yene mbayizula, mbawuyimanesela muphushi.

2. Ha gutadila Luka 14:27-30, itshi udi naye gutangiza muabonga gutuama dia gubatijiwa?

² Guzumba guaye mukunda nu Yehowa nu khadilo dia gumuhana mersi diagutumile gale ha gutangiza ndaga yatadila gubatijiwa ba? Gula idi ngenyi, jiya egi desizio diaye didi luholo lumoshi nu muthu udi mutshigina gutunga inzo. Mukunda natshi tuazuela ngenyi? Tala mbimbi jia Yesu jidi mu Luka 14:27-30. (Tanga.) Yesu wamonesele ndaga mbajibuila athu adi naye gubua alandudi enji. Ha gubua mulandudi wenji, tudi naye gukolesela mu malamba avula nu gubemba gutshita ndaga jiko. (Luka 9:23-26; 12:51-53) Gutuama egi ubatijiwe, udi naye gutangiza ndaga mbajigubuila gula wabua mulandudi wa Yesu. Hene, udi naye gudilondega muabonga ha gulandula gukombelela Yehowa nu gujinginyina gifua Muklisto wabatijiwe gale.

3. Itshi tuza mutadila mu longo edi?

³ Gubatijiwa ha gubua mulandudi wa Yesu guana toga gukolesela mu malamba nu gubemba ndaga jiko ba? Ayi, idi ngenyi! Gubatijiwa mbagugubatela gubonga guavula sendese mangino uu nu mu masugu adi muza. Henyaha, tutadilenu mihu eyi ya ndando  yatadila gubatijiwa. Gutshita ngenyi mbagugukuatesa ha guhana mvutu gu muhu owu: “Ngudi hehi ha gubatijiwa ba?”

4. (a) Gudihana guakotelesa itshi? (b) Luholo mukanda wa Matayo 16:24 udi guyimonesa, ‘gudituna’ gudi mukotelesa itshi?

⁴ Gudihana guakotelesa itshi? Gutuama egi ubatijiwe, udi naye gudihana gudi Yehowa. Ha gudihana, udi naye gumuwambela mu gisambu egi, mbawumukombelela monyo waye wagasue ivo nu ivo. Tangua wadihana gudi Nzambi, udi naye ‘gudituna’. (Tanga Matayo 16:24.) Henyaha, wabua muthu wa Yehowa, ndaga eyi idi diago luendu luabonga. (Lomo 14:8) Wamuwambela egi, sendese mangino, mbangugukombelela aye nu mbangushigo mukamba gudisuanguluisa. Gudihana guaye gudi laji walayi Nzambi. Yehowa gana gutushinjiga ndo ha gumuhana laji edi. Uvi gula tuamulaya, muene wana tshigina egi tutagenese laji diene.—Ngi. 116:12, 14.

5. Luholo lutshi gudihana guakhala gua gudisha nu gubatijiwa?

⁵ Luholo lutshi gudihana guakhala gua gudisha nu gubatijiwa? Gudihana guana kalegewa phamba gudi muthu muene hakhenji; gushigo nu muthu muko wana jiya, phamba Yehowa. Gubatijiwa guana kalegewa gu meso a athu agasue, yajiya gukhala gu asamble a lusugu lumoshi nga a masugu thathu. Gula wabatijiwa, mu tangua diene wana monesa athu ako egi wadihanyi gale gudi Yehowa. * Hene, gubatijiwa guaye guana monesa athu ako egi wana zumba Yehowa Nzambi nu mutshima waye wagasue, nu monyo waye wagasue, nu matangi aye agasue, nu ngolo jiaye jiagasue; idi mumonesa egi wazudi desizio dia gumukombelela mayilago.—Mako 12:30.

6-7. Mu gudivua nu 1 Phetelo 3:18-22, ndaga jitshi mbadi jiana tshita egi gubatijiwa gukhale nu ndando?

⁶ Gubatijiwa guakhala diago nu ndando ba? Tutadile mbimbi jidi mu 1 Phetelo 3:18-22. (Tanga.) Masuwa atungile Nowa akhalele mumonesa haphelo egi wakhalele nu gutshigina, luholo lumoshi nji, gubatijiwa guaye guana monesa egi wadihanele gale gudi Yehowa. Uvi, gubatijiwa guakhala diago nu ndando ba? Ayi. Phetelo wamonesele haphelo ndando ya gubatijiwa. Thomo, guana ‘guguhuluisa.’ Gubatijiwa guajiya gutuhuluisa gula tudi mutshita ndaga jidi mumonesa egi tudi nu gutshigina gudi Yesu, nu tuana tshigina egi wafuile mukunda nu esue, nu wafuzumugile ha guya mu dilu, nu henyaha udi ‘gu koko dia madia dia Nzambi.’

⁷ Ndaga ya mbadi, gubatijiwa guana gutukuatesa ha gukhala nu ‘mutshima wa phelegeta.’ Gula tuadihana gudi Nzambi nu tuabatijiwa, tuana gubua mafuta enji akola. Gula tuabalumuna diago mutshima nu tuahaga gutshigina gu gibawu gia Yesu, Nzambi wana gututotesela gubola guetu. Ngenyi, tuajiya gukhala nu mutshima wa phelegeta gutuama dienji.

8. Gima gia thomo gidi naye gugutuma ha gubatijiwa gidi itshi?

⁸ Itshi yajiya gugutuma ha guzula desizio dia gubatijiya? Mu gulonguga guaye gua Bilbia, walongugile ndaga jiavula jiatadila Yehowa, gifua ndaga jiana zumba muene nu luholo gana gujitshita. Ndaga jia Yehowa walongugile jiakuatele mutshima waye nu jiagutumile ha gumuzumba muavula diago. Gima gia thomo gidi naye gugutuma ha gubatijiwa gidi guzumba guaye mukunda nu Yehowa.

9. Gubatijiwa mu jina dia Tata nu dia mona nu dia nyuma yabonga adi muzuelela mu Matayo 28:19, 20 guakotelesa itshi?

⁹ Ndaga iko idi naye gugutuma ha gubatijiwa idi egi, wana tshigina giamatshidia ginyi walongugile mu Biblia. Tala ndaga jiazuelele Yesu tangua gahanele mukhuala wa gubuisa athu  alandudi. (Tanga Matayo 28:19, 20.) Ha gutadila mbimbi jia Yesu, athu adi naye gubatijiwa mu ‘jina dia Tata nu dia Mona nu dia nyuma yabonga.’ Yakotelesa itshi? Udi naye gutshigina nu mutshima waye wagasue giamatshidia gia Biblia giatadila Yehowa, nu mun’enji; nu giatadila nyuma yabonga. Giamatshidia egi giakhala diago nu ngolo jiavula nu giajiya gukuata mutshima waye. (Heb. 4:12) Tutadilenu giamatshidia giene.

10-11. Giamatshidia gitshi giatadila Tata walongugile nu watshiginyile?

¹⁰ Tangiza gale tangua walongugile giamatshidia giatadila Tata: ‘Jina dienji Yehowa,’ wakhala wa ‘gudinyinyiga holu dia mavu agasue,’ nu muene hakhenji udi ‘Nzambi wa giamatshidia.’ (Ngi. 83:18; Yesh. 37:16) Muene watufugile, ‘guhuluga guana katuga gudi Yehowa.’ (Ngi. 3:8; 36:9) Walondele ndaga ha gutuhuluisa mu uhiga wa gubola nu wa gufua, nu watuhanele felela dia gujinga mayilago. (Yone 17:3) Gudihana guaye nu gabatijiwa guaye mbagumonesa egi wabui Temue wa Yehowa. (Yesh. 43:10-12) Mbawungina mukatshi dia fami yakoma ya akombeledi anyi ana suanguluga ha gutamegewa mu jina dia Nzambi, nu ana longesa jina diene gudi athu ako.—Ngi. 86:12.

¹¹ Tudi diago nu luendu luakoma luholo tudi mukotelesa malongo awa a Biblia atadila Tata! Gula watshigina malongo awa a ndando, mutshima waye mbawugutuma ha gudihana gudi Yehowa nu ha gubatijiwa.

12-13. Giamatshidia gitshi giatadila Yesu walongugile nu watshiginyile?

¹² Wadivile gikuatshi tangua walongugile giamatshidia giatadila Mun’enji? Yesu udi muthu wa mbadi wabalega ndando gosa nu hashi. Wahanele monyo wenji gifua mulambu mukunda nu esue. Gula tuamonesa mu makalegelo etu egi tudi nu gutshigina mu mulambu wenji, Nzambi mbawututotesela gubola guetu, mbatukuata ufuta wakola n’enji, nu mbatujinga ivo nu ivo. (Yone 3:16) Yesu udi Nganga-nzambi Wakoma. Wana gutukuatesa ha guheta gubonga gua mulambu, nu ha gukhala nu ufuta wakola nu Yehowa. (Heb. 4:15; 7:24, 25) Luholo gadi fumu wa Ufumu wa Nzambi, phamba muene Yehowa mbagakalegela ha gutumbuisa jina dienji, ha gukatula gubola, nu ha gubata gubonga gua mayilago mu Phaladiso idi muza. (Mat. 6:9, 10; Yat. 11:15) Yesu udi gifezegeselo tudi naye gulandula. (1 Phet. 2:21) Watubembele gifezegeselo luholo gahanele monyo wenji ha gutshita gutshigina gua Nzambi.—Yone 4:34.

¹³ Gula watshigina ndaga jiana longesa Biblia mukunda nu Yesu, mbawuzumba diago Mun’a Nzambi muavula. Guzumba guene mbagugutuma ha guhana lujingu luaye ha gutshita gutshigina gua Nzambi, gifua muatshitshile Yesu. Ngenyi, mbawukhala hehi ha guhana monyo waye gudi Yehowa nu mbawuzula desizio dia gubatijiwa.

14-15. Giamatshidia gitshi giatadila nyuma yabonga walongugile nu watshiginyile?

¹⁴ Wadivile gikuatshi tangua walongugile giamatshidia giatadila nyuma yabonga? Nyuma ishigo muthu, uvi idi ngolo jia Nzambi. Yehowa wakalegele nyuma yenji yabonga ha gutuma athu ha gusonega Biblia, nyuma yene yana gutukuatesa nji ha gukotelesa nu ha gukalegela ndanga tuana tanga mu Biblia. (Yone 14:26; 2 Phet. 1:21) Mu njila ya nyuma yenji, Yehowa wana gutuhana “ngolo jiabalega gukoma.” (2 Kol. 4:7) Nyuma yabonga yana gutuhana ngolo jia gulongesa lukuma luabonga, jia gulenga ndaga jiana lola (kukika) gutshigina guetu, ha gukolesela nu ndaga jiana gutulebesa muila, nu ha gulua nu malamba. Yana gutukuatesa ha gumonesa makalegelo abonga adi mukatshi dia ‘bundu dia nyuma yabonga.’ (Gal. 5:22) Nzambi wana hana nyuma yenji gudi athu ana gumuhagela mutshima nu ana gumutoga naye.—Luka 11:13.

 ¹⁵ Yana gutuhana ngolo nu gikhesa ha gujiya egi, akombeledi a Yehowa adi naye gusha mutshima gu ukuateshi wa nyuma ya Nzambi ha gumukombelela! Gula watshigina giamatshidia giatadila nyuma yabonga walongugile, mbawukhala hehi ha gudihana gudi Nzambi nu ha gubatijiwa.

16. Ndaga jitshi tualonguga mu longo edi?

¹⁶ Ndaga ya ndando udi naye gutshita idi guzula desizio dia gudihana gudi Nzambi nu gubatijiwa. Gifua luholo tuayimonyi, tudi naye gukhala hehi ha gukolesela mu malamba avula, nu gubemba gutshita ndaga jiko. Uvi gubonga mbatuheta gudi guavula gubalega malamba tudi mumona. Gubatijiwa guajiya guguhuluisa, nu guana kuatesa ha gukhala nu mutshima wa phelegeta gutuama dia Nzambi. Gima gia thomo gidi naye gugutuma ha gubatijiwa gidi guzumba guaye mukunda nu Yehowa Nzambi. Udi naye gutshigina nu mutshima waye wagasue giamatshidia walongugile giatadila Tata, Mona, nu nyuma yabonga. Gungima dia gutadila ndaga tuazuelela mu longo edi, wajiya guhana mvutu ya muhu owu: “Ngudi hehi ha gubatijiwa ba?”

17. Ndaga jitshi udi naye gutshita gutuama dia gubatijiwa?

¹⁷ Gula udi mumona egi udi hehi ha gubatijiwa, idi mumonesa egi watagenesa gale ndaga jiavula ha gukolesa ufuta waye nu Yehowa. * Luholo walonguga gale Biblia muavula, wajiyi gale ndaga jiavula jiatadila Yehowa nu Yesu. Wakudisa gale gutshigina guaye. (Heb. 11:6) Wana haga diago mutshima gu ndaga jialayele Yehowa mu Biblia. Wana gutshigina egi mulambu wa Yesu wajiya guguhuluisa mu gubola nu mu gufua. Wabalumuna gale mutshima mu gubola guaye, nu wana gudisagesa mu mutshima mukunda nu gubola watshitshile, nu wana toga Yehowa ha gugutotesela gubola guene. Wasombegesa makalegelo aye; wakatula ndaga jiagasue jiabola jia mualeha, nu wasendesa gujinga mu luholo luana suanguluisa Nzambi. (Makal. 3:19) Udi hehi ha guwambela athu ako ndaga jiatadila gutshigina guaye. Watagenesa ndaga ana toga ha gubua mulongeshi khenji gabatijiwa ndo, nu wasendesa gulongesa hamoshi nu hungu. (Mat. 24:14) Yehowa udi nu gusuanguluga guavula mukunda nu aye luholo watshita ndaga eji jia ndando. Wamusuanguluisa diago muavula.—Ish. 27:11.

18. Ndaga jitshi jiko udi naye gutshita gutuama dia gubatijiwa?

¹⁸ Gudi nu ndaga jiko udi naye gutshita, gutuama dia gubajiwa. Gifua luholo tuayimonyi, aye hakhaye udi naye gudihana gudi Nzambi. Tshita gisambu gudi Yehowa nu mutshima umoshi tangua udi hakhaye, nu mulaye egi mbawukalagala gutshigina guenji lujingu luaye luagasue. (1 Phet. 4:2) Gungima, wambela mutuameji wa hunji dia akulu egi udi mutshigina gubatijiwa. Muene mbawutoga akulu mbadi ha guza muta naye maga. Uvuigo woma gula  aza gugutala. Aphangi ene ana gugujiya nu ana guguzumba. Mbamutadila nawo malongo a thomo a Biblia anyi walongugile. Ana kamba gujiya gula wakotelesele malongo ene nu udi mukotelesa funu ya gudihana nu gubatijiwa. Gula amona egi udi hehi, mbaadi gugudijiga egi wajiya gubatijiwa gu asamble adi muza gutuama.

19-20. Itshi udi naye gutshita gungima dia gubatijiwa guaye, nu luholo lutshi wajiya guyitshita?

¹⁹ Gula wabatijiwa, ndaga jitshi udi naye gutshita gungima? * Ujimbilago egi gudihana guaye gudi Yehowa gudi laji. Muene mbawusuanguluga gila walandula gunemesa laji diene. Hakiene, gungima dia gubatijiwa, udi naye gujinga mu gudivua nu laji diene. Luholo lutshi wajiya guyitshita?

²⁰ Khala wa gujinginyina nu hungu diaye. Luholo wabua Muklisto wabatijiwe gale, henyaha wangina mukatshi dia fami ya ‘aphangi a ha mavu agasue.’ (1 Phet. 2:17) Aphangi a mala nu a akhetu a mu hungu dienu ene adi fami yaye ya mu nyuma. Gula udi muya mu gudibungisa gua mu hungu tangua diagasue, mbawukolesa ufuta waye nawo. Tanga nu tangigiza Mbimbi ya Nzambi udi mutanga lusugu nu lusugu. (Ngi. 1:1, 2) Gula watanga Biblia, zula tangua dia gutangigiza ndaga watangi. Ngenyi, mbimbi yene mbayikuata mutshima waye. ‘Kombelela tangua diagasue.’ (Mat. 26:41) Isambu yaye ya giamatshidia mbayigukuatesa ha gusuena hehi nu Yehowa. ‘Landula . . . gukamba thomo Ufumu.’ (Mat. 6:33) Wajiya gutshita ngenyi tangua udi muhaga mudimo wa gulongesa ha fundo dia thomo mu lujingu luaye. Gula udi mulongesa muavula, mbawukolesa gutshigina guaye, nu wajiya gukuatesa athu ako ha guheta felela dia gujinga ivo nu ivo.—1 Tim. 4:16.

21. Gubatijiwa guaye mbagugukangudila njila ya ndaga itshi?

²¹ Ndaga ya ndando udi naye gutshita mu lujingu luaye idi guzula desizio dia gudihana gudi Yehowa nu gubatijiwa. Idi yadiago egi mbawutagana nu malamba. Gutshita ngenyi gudi nu funu ba? Ayi! Malamba agasue udi mutagana nawo ha mavu awa adi ‘a tangua diazonda nu adi aleluga.’ (2 Kol. 4:17) Uvi, gubatijiwa guaye mbagugukangudila njila ya guheta lujingu luabonga mangino nu ‘lujingu lua giamatshidia’ mu masugu adi muza. (1 Tim. 6:19) Hene, tangiza muabonga nu kombelela muavula gu mvutu ya muhu owu: “Ngudi hehi ha gubatijiwa ba?”