1-2. Nanyi udi nu ginemo gia gukuatesa muthu wana longuga Biblia ha gukula mu nyuma nu gubatijiwa?

PHANGI Amy wana jinga gu Fidji udi muzuela egi: “Ngakhalele muzumba ndaga akhalele gungulongesa mu Biblia, ngajiyile egi jidi jia giamatshidia. Uvi tangua ngasendesele gubalegesa tangua hamoshi nu aphangi a mala nu a akhetu, ngasombegesele, hene ngazudile desizio dia gubatijiwa.” Gifezegeselo gia Amy gidi mumonesa giamatshidia egi gia ndando. Muthu wana longuga Biblia wana kula nu wana zula desizio dia gubatijiwa tangua aphangi ako a mu hungu ana gumukuatesa.

² Phangi wagasue wajiya gukuatesa hungu ha gukula. (Ef. 4:16) Phangi mumoshi wa muvundji wa njila mu jina dia Leilani, wana jinga gu Vanuatu udi muzuela egi: “Gishima gimoshi giana zuela egi, muno umoshi wana tua ndo ina. Ngana jiya egi idi luholo lumoshi nu mudimo wa gubuisa athu alandudi. Hagula muthu akule nu abatijiwe, yana toga ukuateshi wa aphangi agasue mu hungu.” Mvuaji, enya fami, mafuta nu alongeshi a gu khalasa, mukut’awo agasue ana kuatesa mona ha gukula muabonga. Ana kalagala ngenyi ha guhana mona gikhesa nu ha gumulongesa malongo a ndando. Luholo lumoshi nji, aphangi agasue a mu hungu ajiya guhana muthu wana longuga Biblia malongo nu gikhesa nu gumuhana gifesegeselo giabonga. Gutshita ngenyi mbagukuatesa athu ana longuga Biblia ha gukula nu guzula desizio dia gubatijiwa—Ish. 15:22.

3. Malongo atshi wazula mu ndaga jiazuela phangi Ana nu Dorin nu phangi Leilani?

³ Mukunda natshi mulongeshi adi naye gukhala nu gusuanguluga tangua aphangi ako a mu hungu adi mukuatesa muthu ana longesa  muene Biblia? Phangi wa mukhetu Ana udi pionye spesiale gu Moldavie udi muzuela egi: “Yana khala lamba gudi muthu mumoshi ha gutagenesa nzala jiagasue jia muthu tuana longesa Biblia.” Dorin nji udi pionye spesiale gu Moldavie udi muzuela egi: “Matangua avula, aphangi a mu hungu ana zuela ndaga jiana kuata mitshima ya athu ngana longesa Biblia, jinyi ame ngakhalelego mutangiza.” Phangi Leilani tuazuelela gu thunda udi muzuela luko egi: “Tangua muthu yonu wana longuga Biblia wana mona luholo aphangi ana gumumonesela guzumba nu luholo ana gudisagesa mukunda nu muene, yana gumukuatesa ha gukotelesa diago egi tudi akombeledi a Yehowa.”—Yone 13:35.

4. Itshi tuza muzuelela mu longo edi?

⁴ Wajiya gudihula egi: ‘Luholo lutshi ngajiya gukuatesa muthu wana longuga Biblia ha gukula mu nyuma ngatshima ishigo ame ngana gumulongesa Biblia?’ Tutadilenu ndaga tuajiya gutshita gula phangi mumoshi watutoga ha guya gumutuala gudi muthu wana longesa muene Biblia nu ndaga tuajiya gutshita gula muthu tuana longesa Biblia wasendesa guza mu gudibungisa gua mu hungu. Tuza nji mumona luholo akulu ajiya gukuatesa athu ana longuga Biblia ha gukula mu nyuma nu ha gubatijiwa.

5. Itshi udi naye gujiya gula phangi mumoshi wagutoga ha guya gumutuala gudi muthu ana longesa Biblia?

⁵ Phangi wana longesa muthu Bilbia, muene udi thomo nu ginemo gia gukuatesa muthu muene ha gukotelesa Mbimbi ya Nzambi. Gila phangi mumoshi wa gutoga ha guya gumutuala gudi muthu wana longesa muene Biblia, udi naye gujiya egi udi hene mukunda nu gumukuatesa. (Mulo. 4:9, 10) Itshi wajiya gutshita ha gukhala mukuateshi wabonga tangua mudi mu longesa muthu Biblia?

6. Tangua udi gudilondega ha guya mulongesa muthu Biblia, luholo lutshi wajiya gukalegela longo didi mu Ishima 20:18?

⁶ Dilondege muabonga gutuama dia gulonguga nu muthu Biblia. Thomo, hula phangi wa gutogi ha guya gumutuala ndaga jiatadila muthu ana longesa Biblia. (Tanga Ishima 20:18.) Wajiya guhula phangi muene egi: “Muthu muene udi nu ivo gutshi nga ndo udi muenya gikombelelo gitshi? Longo ditshi muya mulonguga? Malongo atshi udi mutshigina egi muthu muene azule mu gulonguga guenu? Gudi nu gima ngajiya guzuela nga ginyi ngajiyilego guzuela tangua mudi mulonguga ba? Luholo lutshi ngajiya gumuhana gikhesa hagula akule mu nyuma?” Phangi munu wana longesa muthu muene Biblia ashigo naye guzuelela ndaga jia gisuegi jiatadila muthu ana longesa Biblia. Uvi gula phangi muene waguwambela ndaga jiene gutuama, jiajiya gugukuatesa ha gudilondega muabonga. Misionere mumoshi mu jina dia Joy wana kalegela ndaga eji tuazuelela gila watamega phangi mumoshi ha guya gumutuala gudi muthu ana longesa Biblia. Udi muzuela egi: “Guwambela aphangi ndaga jiatadila muthu ngana longesa Biblia gutuama, jiana guakuatesa ha gujiya ndaga adi naye guzuela tangua tudi mulonguga nu muthu muene Biblia.”

7. Mukunda natshi tudi naye gudilondega gutuama gula tudi mutshigina guya mutuala phangi mumoshi ha gulonguga Biblia nu muthu?

⁷ Gula phangi mumoshi wa gutamega ha guya  mulonguga nu muthu Biblia, udi naye gulondega gutuama longo muya muzuelela. (Ez. 7:10) Phangi Dorin tuazuelela guthunda udi muzuela egi: “Ngana khala nu gusuanguluga gula phangi munu wayi gungutuala ha gulonguga nu muthu Biblia wadilondega gutuama. Gutshita ngenyi guana gumukuatesa ha guhana matangi enji.” Luko, muthu wana gulonguga Biblia mbawukotelesa egi mukut’enu agasue muadilondega. Mbayimuhana nji gifezegeselo giabonga. Ngatshima wahetelego tangua dia gudilondega muabonga, wajiya guzula tangua dia gukamba matangi a ndando.

8. Itshi wajiya gukalagala hagula gisambu giaye gikuatese muthu wana longesa Biblia?

⁸ Gukalagala gisambu gudi nu ndando gula mudi mu longuga Biblia nu muthu. Hene, udi naye gudilondega gutuama gula agutoga ha gukalagala gisambu. Gutshita ngenyi mbagugukuatesa ha gukalagala gisambu giabonga. (Ngi. 141:2) Phangi Hanae wana jinga gu Japon wana wunguluga isambu yakalegele phangi mumoshi wa mukhetu wayile nu muthu wakhalele gumulongesa Biblia. Udi muzuela egi: “Isambu yene yangukuatesele ha gukolesa ufuta wami nu Yehowa. Ngazudile nji desizio dia gulandula gifezegeselo gia phangi muene wa mukhethu. Ngamonele diago egi ana gunguzumba handaga watangele jina diami mu gisambu.”

9. Hagutadila Yakoba 1:19, itshi tuajiya gukalagala ha gukhala mukuateshi wabonga tangua tudi mulongesa muthu Biblia?

⁹ Kuatesa phangi mudi nenji tangua mudi mulongesa muthu Biblia. Pionye spesiale mumoshi mu jina dia Omamuyovbi wana jinga gu Nigeria udi muzuela egi: “Phangi munu wayi gugutuala, udi naye gulandula muabonga tangua mudi mulonguga nu muthu Biblia. Phangi wanaya mutuala mulongeshi muko wana kuatesa muavula uvi ashigo naye guzuela muavula. Udi naye gujiya egi phangi udi mutuameza ulongugi wa Biblia muene udi naye guzuela muavula.” Tangua ditshi nu luholo lutshi wajiya guhana matangi aye tangua phangi adi mutuameza ulongugi wa Biblia? (Ish. 25:11) Udi naye gutegelela muabonga tangua mulongeshi adi mutuameza ulongugi wa Biblia. (Tanga Yakoba 1:19.) Ngenyi mbawujiya tangua diabonga dia guzuela. Udi naye nji gutangigiza gutuama dia guzuela. Ushigo naye guzuela muavula nga gubatula matangi a phangi udi mutuameza ulongugi wa Biblia nga gulezela ndaga jiko jishigo gudivua nu longo mudi mulonguga. Uvi wajiya guhana komantere ya hihia, gifezegeselo nga guhula muhu wajiya gukuatesa ha guzola matangi a ndando. Matangua ako wajiya gumona egi ushigo nu ndaga jiko jia gulezela. Uvi gila washimana muthu muene nu wadisha ha fundo dienji, mbayimukuatesa ha gukula mu nyuma.

10. Luholo lutshi eksperianse yaye yajiya gukuatesa muthu wana longesa Biblia?

¹⁰ Khala muwambela athu wana longesa Biblia eksperianse yaye. Gula luholo ludi guene, wajiya guwambela muthu wana longesa Biblia mu guhihia luholo wajiyile giamatshidia, luholo wabingile lamba watagenele nadio nga luholo Yehowa ana gugukuatesa mu monyo waye. (Ngi. 78:4, 7) Athu tuana longesa Biblia ana khala nu funu ya mene jia luholo elu. Ndaga jiene jiana guakuatesa ha gukolesa gutshigina guawo, ha gukhala nu gikhesa nu ha guzula desizio dia gubatijiwa. Mbajiakuatesa  nji ha gubinga gula atagana nu malamba. (1 Phet. 5:9) Muvundji wa njila mumoshi mujina dia Gabriel wana jinga gu Brésil, udi muwunguluga gubonga ahetele hakhalele muene mulonguga Biblia. Udi muzuela egi: “Tangua aphangi akhalele gungutela mene jiawo, ngakotelesele diago egi Yehowa wana mona malamba tuana tagana nawo. Ngajiyile egi luholo aphangi ana binga malamba ene, ame nji mbangumubinga.”

11-12. Mukunda natshi tudi naye gusuanguluga nu athu ana longuga Biblia tangua adi muza mu gudibungisa?

¹¹ Hagula muthu tuana longesa Biblia akule mu nyuma nu azule desizio dia gubatijiwa, udi naye guza mu gudibungisa gua mu hungu phoso nu phoso ha guheta ukuateshi wa aphangi ako. (Heb. 10:24, 25) Mulongeshi udi naye gutamega muthu ana longesa Biblia ha guza mu gudibungisa. Gula waza mu gudibungisa, mukut’etu agasue tudi naye gumukolesa ha gulandula guza mu gudibungisa gua mu hungu. Luholo lutshi tuajiya guyikalagala?

¹² Khala musuanguluga nu athu tuana longesa Biblia gula aza mu gudibungisa gua mu hungu. (Lomo 15:7) Gila tudi musuanguluga nu athu tuana longesa Biblia tangua adi muza mu gudibungisa gua mu hungu, mbayakuatesa ha gulandula guza mu gudibungisa guene. Hagula adivue muabonga, tudi naye guahana lumene nu gisemo nu guadijiga gudi aphangi ako. Tudi naye gulandula guta nawo maga handaga phangi wana gumulongesa Biblia wajiya gukhala khenji aza ndo nga ndo udi nu midimo iko mu Inzo ya Ufumu. Tudi naye gutegelela muabonga ndaga adi muzuela nu gudihaga ha fundo diawo. Luholo lutshi muthu wana longuga Biblia mbawudivua gula tuamukalegela ndaga eji tuatanga? Tutadilenu lumene lua phangi Dmitrii. Sendese ha batijiwe muene ivo yazonda yabalega gale uvi, mangino udi mukuateshi wa mudimo mu hungu. Udi muzuela egi: “Lusugu lua thomo ngayile mu gudibungisa gua mu hungu, phangi mumoshi wangumonele mumagana hanze gudisagesa. Gungima wanguzudile hene tuanginyile mu Inzo ya Ufumu. Aphangi avula ajile gunguhana lumene. Ngadihudile diago. Ngasuangulugile muavula. Ngazuelele egi, nga gudibungisa guene guana khala lusugu luagasue. Ndaga ngamonele guene ngakhelele khenji ngujimonele ndo mu mafundo ako.”

13. Luholo lutshi gifezegeselo giaye giajiya gukuatesa muthu wana longuga Biblia?

¹³ Khala gifezegeselo giabonga. Makalegelo aye ajiya gukuatesa muthu wana longuga Biblia ha gukotelesa egi tudi diago mu giamatshia. (Mat. 5:16) Phangi Vitalii udi muvundji wa njila gu Moldavie udi muzuela egi: “Ngamonele luholo Matemue a Yehowa ana gudikalegela ndaga nu makalegelo awo abonga. Ndaga eyi yangukuatesele ha gumona diago egi Matemue a Yehowa ana kombelela diago Nzambi wa giamatshidia.”

14. Luholo lutshi gifezegeselo giaye giajiya gukuatesa athu ako ha gukula mu nyuma?

¹⁴ Gutuama egi muthu wana longuga Biblia abatijiwe, udi naye gukalegela ndaga adi mulonguga uvi yana khala ndo yaleba. Gila muthu wana longuga Biblia wamona gubonga ana heta tangua ana kalegela malongo a Biblia, mbayimutuma ha gulandula gifezegeselo giaye. (1 Kol. 11:1) Tutadilenu eksperianse  ya phangi Hanae tuazuelela gu thunda. Udi muzuela egi: “Aphangi a mala nu a akhetu akhalele gifezegeselo giabonga mukunda nu ame. Gifezegeselo giawo gia ngukuatesele ha gukhala nu gikhesa, gutotesela athu ako gubola nu gumonesa khadilo dia guzumba. Tangua diagasue, aphangi ene akhalele muzuela ndaga jiabonga mukunda nu athu ako. Ngatshiginyile diago gulandula gifezegeselo giawo.”

15. Hagutadila Ishima 27:17 mukunda natshi tudi naye gukuata ufuta nu muthu wana longuga Biblia yonu wana landula guza mu gudibungisa?

¹⁵ Khala mukuata ufuta nu athu ana longuga Biblia. Gula muthu wana longuga Biblia udi mulandula guza mu gudibungisa, khala mumonesa egi wana gudisha ha fundo dienji. (Fili. 2:4) Wajiya guta nenji maga ha gumujiya muabonga. Wajiya gumushimana luholo adi mulandula gukula mu nyuma, gumuhula ndaga jiatadila gulonguga guenji, fami yawo, nga mudimo wenji. Gula mudi muta maga a luholo elu, mbamubua diago mafuta akola. Gula wabua futa dia muthu wana longuga Biblia, mbayimukuatesa ha guzula desizio dia gubatijiwa. (Tanga Ishima 27:17.) Hanae tuazelela gu thunda mangino udi muvundji wa njila. Udi muzuela egi: “Tangua ngayile mu gudibungisa gua mu hungu lusugu lua thomo, ngakuatele mafuta, ngasendesele guzumba gudibungisa guene muavula, ngakhalele muya ngatshima ngudi yaguhuila. Ngakhalele musuanguluga nu mafuta ami ahe-ahe. Yangukuatesele ha gubemba ufuta nu athu anyi akhalelego mukombelela Yehowa. Ngakhalele mutshita ngenyi ha gukolesa ufuta wami gudi Yehowa nu gudi aphangi a mala nu a akhetu. Hene ngazudile desizio dia gubatijiwa.”

16. Ndaga itshi iko tuajiya gukalagala ha gukuatesa muthu wana longuga Biblia ha gukhala nu gusuanguluga mu hungu?

¹⁶ Gula muthu wana longuga Biblia udi mulandula gukula mu nyuma, wajiya gumukuatesa ha gudivua egi udi mukatshi dia aphangi a mala nu akhetu. Wajiya gumumonesela khadilo dia guyamba. (Heb. 13:2) Denis wana jinga gu Moldavie udi muzuela egi: “Tangua ngakhalele mulonguga Biblia, matangua avula aphangi akhalele gungutamega nu mukaji’ami ha gubalegesa nawo tangua hamoshi. Akhalele gutuwambela luholo Yehowa waakuatesele mu monyo wawo. Yatuhanele diago gikhesa. Gubalegesa nawo tangua guatukuatesele ha guzula desizio dia gukalegela Yehowa. Tuajiyile egi gula tuatshita ngenyi mbatukhala nu lujingu luabonga.” Gula muthu wana longuga Biblia wabua mulongeshi, wajiya nji gumutamega ha guya nenji mu mudimo wa gulongesa. Phangi Diego gu Brésil udi muzuela egi: “Aphangi avula akhalele gungutamega ha guya nawo mu mudimo wa gulongesa. Yakhalele diago okazio wabonga ha gudijiya nawo muabonga. Gutshita ngenyi guangukuatesele ha gulonguga ndaga jiavula nu gukolesa ufuta wami nu Yehowa nu Yesu.”

17. Luholo lutshi akulu ajiya gukuatesa athu ana longuga Biblia?

¹⁷ Khalenu mukamba tangua dia gukuatesa athu ana longuga Biblia. Akulu, gula mudi muzumba athu ana longuga Biblia nu mudi gudisha ha fundo  diawo, mbayakuatesa ha guzula desizio dia gubatijiwa. Muajiya guta nawo maga mahugo avula tangua anaza mu gudibungisa. Mbaakotelesa diago egi muana gudisha ha fundo diawo gula mudi mujiya majina awo tangua adi musendesa guhana komantere mu gudibungisa. Wajiya gulondega programe yaye ha guya mutuala phangi mumoshi tangua adi mutuameza ulongugi wa Biblia ba? Wajiya gukuatesa muthu wana longuga Biblia mu luholo watangijilego. Phangi Jackie udi muvundji wa njila gu Nigeria udi muzuela egi: “Athu avula ngana longesa Biblia ana gudihula diago gula ngaya gualongesa nu mukulu. Muthu mumoshi ngana longesa Biblia wazuelele egi: ‘Pastere wami gajiyilego gukalagala ndaga eyi nga hazonda. Wanaya mutala phamba enya umonyi hagula amuhane makuta!’” Mangino muthu muene wanaza gale mu gudibungisa gua mu hungu.

18. Ha gudivua nu ndaga jidi mu Makalegelo 20:28 luholo lutshi akulu ajiya gutagenesa ginemo giawo?

¹⁸ Hana formasio, kolesa nji aphangi. Akulu, mudi nu ginemo giakola gia gukuatesa aphangi ha gukalagala muabonga mudimo wa gulongesa. (Tanga Makalegelo 20:28.) Gula phangi mumoshi udi muvua musonyi ha gulonguga Biblia nu muthu tangua mudi nenji, wajiya gutuameza gulonguga. Phangi Jackie tuazuelela guthunda udi muzuela egi: “Akulu ana gunguhula muavula athu ngana longesa Biblia. Gula ngatagana nu lamba tangua ngudi mulongesa muthu Biblia, akulu ana gungukuatesa.” Akulu adi naye gutshita yagasue ha gukuatesa aphangi mu malamba adi mutagana nawo mu mudimo wa gulongesa nu guahana gikhesa. (1 Tes. 5:11) Phangi muene udi muzuela luko egi: “Ngana suanguluga tangua akulu ana gunguhana gikhesa nu tangua ana gunguwambela nji egi ana suanguluga nu mudimo ngana kalagala. Mbimbi jiawo jiana gungukuatesa ha gudivua muabonga gifua luholo muthu wana gudivua tangua ana nua meya ala tuluu gula muanya udi wabala. Mbimbi jiawo jia gisemo jiana gungukuatesa ha gujiya egi ngana kalagala muabonga mudimo wa gulongesa athu Biblia, yana gungusuanguluisa nji muavula.”—Ish. 25:25.

19. Gusuanguluga gutshi mukut’etu agasue tuana khala nago?

¹⁹ Ikhale henyaha tushigo nu muthu wa gulongesa Biblia, uvi tuajiya gukuatesa muthu wana longuga Biblia nu phangi muko ha guzula desizio dia gubatijiwa. Ikhale tushigo muzuela muavula, uvi komantere jietu jiabonga tuana londega jiajiya gukuatesa phangi tangua adi mulongesa muthu Biblia. Tuajiya gukuata ufuta nu muthu wana longuga Biblia tangua adi muza mu Inzo ya Ufumu. Tuajiya nji gukhala gifezegeselo giabonga mukunda nu muene. Akulu ajiya guhana athu ana longuga Biblia gikhesa gula adi muta nawo maga. Ajiya nji guhana aphangi formasio nu guashimana mukunda nu mudimo wa gulongesa ana kalagala. Tuana khala nu gusuanguluga gula tuakuatesa muthu ha guzumba Yehowa nu ha guzula desizio dia gumukalegela!