1. Ha gutadila Matayo 24:9, mukunda natshi tushigo naye gudihula gula athu adi gutusagesa?

YEHOWA watufugile nu khadilo dia gudizumba nu athu ako. Hene gula muthu mumoshi udi gutusagesa, yana gutuhana lamba. Matangua ako, yana gutuhana nji woma. Ha gufezegesa, phangi wa mukhetu Georgina wana jinga gu Europe udi muzuela egi: “Tangua ngakhalele nu ivo 14, mama wakhalele gungusagesa handaga ngakhalele gukombelela Yehowa. Ndaga yene yakhalele gungusagesa muavula, ngakhalele diago gudivua hakhami. Hene ngakhalele gudihula gula ngudi diago nu makalegelo abonga.” * Phangi wa yala Danylo wasonegele egi: “Tangua masuta angukuatele, akhadile gungushinga, akhalele nji gungukalegela ndaga jiavula jiabola handaga ngudi Temue wa Yehowa, ndaga yene yakhadile gunguhana woma nu sonyi.” Gula athu adi gutukalegela ndaga jiabola, yana gutusagesa diago, uvi tuajilego gudihula, handaga Yesu wazuelele egi athu mbatumonesa lamba.—Tanga Matayo 24:9.

2-3. Mukunda natshi alandudi a Yesu ana monesewa lamba?

² Enya ha mavu awa ana monesa alandudi a Yesu lamba. Mukunda natshi? Handaga esue nji “tushigo enya ha mavu awa” gifua Yesu. (Yone 15:17-19) Tuana nemesa mafumu a leta, uvi tuanago guakombelela nga gukombelela ba drapo awo. Tuana kombelela phamba Yehowa. Tuana jiya egi phamba Nzambi udi watagana ha guhinyina mavu, uvi Satana nu ‘athu enji’ ana tshigina ndo ndaga yene.  (Gis. 3:1-5, 15) Tuana longesa egi phamba Ufumu wa Nzambi mbawulondega ndaga jia athu a ha mavu nu gualeha ndo mbawushiya mbalagaji jienji jiagasue. (Dan. 2:44; Yat. 19:19-21) Ndaga eyi idi lukuma luabonga mukunda nu athu agudibulumuisa, uvi lukuma luabola gudi athu abola.—Ngi. 37:10, 11.

³ Athu ana gutumonesa lamba handaga tuana tumagela mikhuala ya Nzambi. Enya ha mavu awa ana mona ndaga jiana zuela Nzambi egi jidi jiabola, uvi adi mutamega ndaga jiabola jiana kalagala ene egi jidi jiawaha. Ha gufezegesa, mangino athu avula adi mutangiza egi gukalagala uthambi ishigo ndaga yabola, uvi ndaga yene, yene yatumine Nzambi ha gushiya dimbo dia Sodoma nu Gomola! (Yuda 7) Luholo tuana nemesa mikhuala ya Nzambi idi mu Biblia mu ndaga yatadila uthambi, athu avula ana gutushingana, ana zuela egi tudi ndaga jiakola!—1 Phet. 4:3, 4.

4. Makalegelo atshi ajiya gutukuatesa tangua athu adi gutusagesa?

⁴ Itshi yajiya gutukuatesa ha gukolesela mu malamba tangua athu adi gutusagesa nga gutushinga? Tudi muhaga gutshigina gudi Yehowa egi muene mbawutukuatesa. Gutshigina guajiya gutukuatesa “ha gujima mifula yagasue ya tshuya idi musonona Diabulu” gifua tshibu. (Ef. 6:16, NWT) Uvi ishigo phamba gutshigina. Tudi naye nji gukhala nu guzumba. Mukunda natshi? Handaga guzumba ‘guanago guvua khabu.’ Nguana tshigina nu guana kolesela mu malamba agasue. (1 Kol. 13:4-7, 13) Henyaha tutadile luholo guzumba guetu gudi Yehowa nu gudi aphangi’etu nga gudi mbalagaji jietu guajiya gutukuatesa tangua tudi mutagana nu malamba.

5. Luholo lutshi guzumba gua Yesu gudi Sh’enji guamukuatesele ha gukolesela mu malamba?

⁵ Mu phipha ya gisugishilo gutuama egi mbalagaji jishiye Yesu, wawambelele alandudi enji anyi asalele agujingiyina egi: “Ngana zumba Tata, [hene] ngana kalagala ndaga jiangutogele Tata ha gutshita.” (Yone 14:31, NWT) Luholo Yesu akhadile muzumba Yehowa, yamukuatesele ha gukolesela mu malamba akhadile mutagana nawo. Esue nji gula tudi muzumba Yehowa, mbayitukuatesa ha gukolesela mu malamba mbatutagana nawo.

6. Ha gutadila Lomo 5:3-5, luholo lutshi akombeledi a Yehowa ana gudivua tangua ana tagana nu malamba?

⁶ Guzumba Nzambi guakuatesele gale akombeledi a Yehowa avula ha gukolesela mu malamba nu usageshi. Ha gufezegesa, tangua tribinale yakoma ya enya Yuda yatunyishile apostolo ha gulongesa, guzumba guawo gudi Nzambi guaatumine ha “gutumagela Nzambi uvi athu ndo.” (Makal. 5:29; 1 Yone 5:3) Guzumba guakola gudi Yehowa guana kuatesa nji aphangi’etu mangino ha gusala ya gujinginyina tangua athu adi guakalegela ndaga jia khuta nu mu usageshi wa mafumu a leta. Uvi ngatshima athu a ha mavu awa adi gutusagesa, tuana leba ndo muila, tuana khala nu gusuanguluga.—Makal. 5:41; tanga Lomo 5:3-5.

7. Itshi tudi naye gukalagala gula enya fami yetu adi gutuluisa?

⁷ Yajiya gukhala lamba ha gukolesela gula usageshi tudi mutagana nawo udi mukatuga gudi enya fami yetu. Gula tuasendesa gulonguga giamatshidia, enya mu fami ako ajiya gutangiza egi tudi muhuigiwa. Ako nji ajiya gutangiza egi muto wetu ushigo luko mukalagala muabonga. (Tala nji Mako 3:21.) Ngenyi ajiya gusendesa gutuluisa. Tushigo naye gudihula mukunda nu makalegelo awo abola, handaga Yesu wazuelele egi: “Mbalagaji jia muthu mbajikhala enya fami yenji.” (Mat. 10:36, NWT) Ikhale enya fami yetu adi gutukalegela ndaga jiabola, tushigo naye guabuisa mbalagaji jietu. Ndaga yabonga idi egi, luholo tuana monesa guzumba guavula gudi Yehowa, tuana monesa nji guzumba gudi athu agasue. (Mat. 22:37-39) Uvi mbatushigo mubemba gutumagela mikhuala ya Nzambi nu malongo enji adi mu Biblia mukunda nu gusuanguluisa athu.

8-9. Itshi yakuatesele phangi mumoshi wa mukhetu ha gukolesela mu malamba akhalele mutagana nawo?

⁸ Phangi Georgina tuazuelela guthunda, wasadile wagujinginyina gudi Yehowa ngatshima mama  wenji wakhalele gumusagesa. Udi muzuela egi: “Ame nu mama tuasendesele gulonguga Biblia nu Matemue a Yehowa. Gungima dia mbeji samano, ngazudile desizio dia gusendesa guya mu gudibungisa, uvi mama wasendesele gungusagesa. Ngakotelesele egi mama wakhadile nu ufuta nu ba aposta, hene akhalele mukalegela malongo awo abola ha gungutunyisa ha guya mu gudibungisa. Wakhalele gungushinga, gungunana mu sanga, gunguwambela ndaga jiakhalele gungusagesa, gunguwambela mbimbi jiabola nu wakhadile nji mu bishila mikanda yami. Ngabatijiwe tangua ngataganesele ivo 15. Mama wakhalele mutshita yagasue hagula ngubembe gukombelela Yehowa, hene wangutumine ha guya mujinga mu jinzo jinyi akhadile mutuma mavuala anyi akhala nu mito yakola gudi mvuaji jiawo. Mavuala ngasangela guene akhadile munua ima yabala (drogue), ako akhadile mukalagala ndaga jiabola. Yana khala lamba ha gukolesela gula muthu udi gugusagesa muene udi nu ginemo gia guguzumba nu gia gugubamba.”

⁹ Itshi yakuatesele phangi Georgina ha gukolesela? Udi muzuela egi: “Tangua mama asendesele gungusagesa, ngakhalele ngamanesa gale gutanga Biblia yagasue. Ngakhalele diago nu gutshigina egi ngakhala mu giamatshidia, ngakhalele nu ufuta yabonga nu Yehowa. Yehowa wakhalele gungutegelela tangua ngakhalele gumukombelela. Tangua ngakhalele mujinga gu inzo inyi mama angutumine, phangi mumoshi wa mukhetu wangutamegele gumbo dienji, tuasendesele gulonguga Biblia hamoshi nenji. Mu tangua diene, aphangi a mala nu akhetu akhalele gunguhana gikhesa tangua tuakhalele muya gu Inzo ya Ufumu. Ngakhadile gifua muenya mu fami jiawo. Ngamonele diago egi Yehowa udi nu ngolo gubalega mbalagaji jietu, ene ajiyilego gututshita nga gima.”

10. Mu ndaga itshi tuajiya gushila Yehowa mutshima?

¹⁰ Mupostolo Phaula wasonegele egi gushigo nga nu gima giajiya “gutukhaphumuna mu guzumba gua Nzambi mu Klisto Yesu Fumu wetu.” (Lomo 8:38, 39) Ngatshima tudi mutagana nu malamba mangino, Yehowa mbawukhala tangua diagasue ha gutukuatesa nu gutuhana ngolo. Luholo eksperianse ya phangi Georgina yayimonesa, Yehowa wana gutukuatesa mu njila ya aphangi’etu a mu hungu.

11. Luholo lutshi guzumba Yesu adi muzuelela mu Yone 15:12, 13 guakuatesele alandudi enji? Fezegesa.

¹¹ Mu phipha ya gisugishilo gutuama egi Yesu afue, wawambelele alandudi enji ha gudizumba. (Tanga Yone 15:12, 13.) Yesu wajiyile egi gula alandudi enji adi gudizumba, mbayakuatesa ha gujinga hamoshi nu ha gukolesela mu malamba a ha mavu awa. Tutadilenu gifezegeselo gia hungu  dia gu Tesalonike. Tangua hungu dia gu Tesalonike diazolewe, aphangi a mu hungu diene amonesewe lamba. Uvi gungima, aphangi a mala nu a akhetu a mu hungu diene akhadile gifezegeselo giabonga giatadila gujinginyina nu gumonesa guzumba. (1 Tes. 1:3, 6, 7) Phaula waakolesele ha ‘gulandula gumonesa guzumba.’ (1 Tes. 4:9, 10) Khadilo dia guzumba diakhalele naye guakuatesa ha guhana gikhesa gudi athu akhalele mutagana nu malamba nu gukuatesa athu anyi akhalele a guleba muila. (1 Tes. 5:14) Alanduile malongo anyi Phaula waahanele mu mukanda wenji wa mbadi waasonegele muene gungima dia givo gimoshi. Mupostolo Phaula waawambelele egi: ‘Guzumba mudi nago mukatshi dienu gudi gudivudisa.’ (2 Tes. 1:3-5) Guzumba guaakuatesele ha gukolesela mu malama nu mu umbalagaji akhelele mutagana nawo.

12. Luholo lutshi aphangi a mu gifutshi gimoshi amonesele guzumba mukatshi diawo mutangua dia ita?

¹² Tutadilenu gifezegeselo gia phangi Danylo nu mukaji’enji yonu tuazuelela guthunda. Tangua ita yajile mu dimbo diawo, akhalele mulandula guya mu gudibungisa, akhalele mulongesa lukuma luabonga, akhalele nji muhana ima ya gudia gudi aphangi’awo a mala nu a akhetu. Phangi Danylo udi muzuelela egi: “Lusugu lumoshi masuta ajile gumbo diami nu mata. Anguwambelele egi ngubembe gukombelela Yehowa. Uvi tangua ngatunyile angubetele mangololo, akambele gungushiya nu wuta. Gutuama egi aye, akambele nji gubungisa muila gu ngolo nu mukaji’ami. Gungima aphangi atumbile muphushi mu train ha gutulengesa mu dimbo diko. Mbangujimbilago nga hazonda guzumba guatumonesele aphangi. Tangua tuahetele gu dimbo diene, aphangi atukuatesele ha guheta ima ya gudia. Atukuatesele nji ha guheta inzo nu mudimo! Atukuatesele nji ha gukhala mu ubambi hamoshi nu aphangi ako anyi alengele ita mu mafundo ako.” Mene jia luholo elu jidi mumonesa egi guzumba aphangi’etu a Aklisto mbagutukuatesa ha gukolesela mu malamba.

13. Luholo lutshi nyuma ya Nzambi yajiya gutukuatesa ha gulandula gukombelela Yehowa ngatshima athu adi gutusagesa?

¹³ Yesu wawambelele alandudi enji ha guzumba mbalagaji jiawo. (Mat. 5:44, 45) Guzumba mbalagaji jietu gudi ndaga yaleba ba? Ndo sha! Uvi nyuma ya Nzambi yajiya gutukuatesa ha guazumba. Guzumba, guhuiminyina, gisemo, gutuluga nu gudikanda gudi mukatshi dia bundu dia nyuma ya Nzambi. (Gal. 5:22, 23) Makalegelo awa ana gutukuatesa ha gukolesela gula tudi mutagana nu malama. Mbalagaji jietu jiavula jiasombegesele gale makalegelo awo handaga yajiya gukhala egi alumi’awo, akaji’awo, na’awo nga athu ana jinga  nawo hehi akhalele guamonesela makalegelo awa abonga. Athu ako anyi akhalele mbalagaji jietu abuile gale aphangi’etu Aklisto. Gula udi mumona egi idi lamba ha guzumba muthu munu wana gugusagesa luholo wana kombelela Yehowa, toga nyuma ya Yehowa mu gisambu. (Luka 11:13) Sha mutshima egi gutumagela Nzambi gudi ndaga yabonga udi naye gukalagala.—Ish. 3:5-7.

14-15. Luholo lutshi Lomo 12:17-21 yakuatesele phangi Yasmeen ha gumonesela mulumi’enji guzumba ngatshima wakhalele gumusagesa?

¹⁴ Tutadilenu gifezegeselo gia Yasmeen, wa gu Moyen-Orient. Tangua Yasmeen wabuile Temue wa Yehowa, mulumi’enji wakhalele mutangiza egi mukaji’enji wahuigiwa. Wasendesele gumutunyisa ha gukombelela Nzambi. Mulumi’enji wakhalele gumushinga, wawambelele enya fami ya Yas meen nu fumu wa dingumba nu nganga imoshi ha guwambela Yasmeen egi mbaamutshita gubola gula ashigo mubemba gukombelela Yehowa. Wakhalele muzuela nji egi Yasmeen udi mumuanga fami! Yala muene wakhalele muya mushinga aphangi mu gudibungisa. Yasmeen wakhalele mudila muavula handaga mulumi’enji akhalelego gumukalegela ndaga nu gisemo.

¹⁵ Aphangi akhalele gumuhana Yasmeen gikhesa mu Inzo ya Ufumu. Akulu akhalele gumuwambela ha gukalegela longo didi mu Lomo 12:17-21. (Tanga.) Phangi Yasmeen udi muzuela egi: “Yakhalelego ndaga yaleba. Ngakhalele mutoga Yehowa ha gungukuatesa, gungima ngakhalele mutshita yagasue ha gukalegela malongo a Biblia. Mulumi’ami wakhalele gungumbila mvindu mu gikhukhu nu shidi yagasue uvi ngakhalele guyikatula muphushi. Gula wangushinga, ngakhalele gumuhana mvutu nu guhuiminyina guagasue. Gula wakata ngakhalele gumukuatesa nu gisemo giagasue.”

16-17. Longo ditshi wazula mu gifezegeselo gia phangi Yasmeen?

¹⁶ Phangi Yasmeen wakhalele nu gusuanguluga luholo akhalele mumonesela mulumi’enji guzumba. Udi muzuela egi: “Mulumi’ami wasendesele gungushila mutshima muavula handaga wakotelesele egi ngakhalele gumuwambela tangua diagasue giamatshidia. Wasendesele gungutegelela nu ginemua giagasue tangua ngakhalele gumuwambela ndaga jiatadila gikombelelo gietu. Watshiginyile egi tuvutule guhuima mu inzo yetu. Mangino, wana gunguwambela nu gusuanguluga guagasue ha guya mu gudibungisa. Mangino ame nu mulumi’ami tudi diago bobobo, tudi nji mujinga mu guhuima mu fami yetu. Felela diami didi egi mulumi’ami nji wajiya gubua Temue wa Yehowa mu masugu adi muza. Muyadi etu tshima, mbatulandule gukombelela Yehowa.”

¹⁷ Gifezegeselo gia phangi Yasmeen gidi mumonesa egi guzumba ‘guana tshuiga ndaga jiagasue, guana gudifelela mu ndaga jiagasue, guana kolesela  mu ndaga jiagasue.’ (1 Kol. 13:4, 7) Tuajiya guvua gikenene gula tudi mutagana nu umbalagaji uvi gula tudi muzumba athu ako, ajiya gubemba makalegelo awo abola. Gutshita ngenyi guana suanguluisa Yehowa. Uvi tuajiya gukhala nu gusuanguluga ngatshima mbalagaji jietu jidi mulandula gutusagesa. Luholo lutshi?

18. Mukunda natshi tudi naye gukhala nu gusuanguluga gula tudi mumonesewa lamba?

¹⁸ Yesu wazuelele egi: “Khalenu nu gusuanguluga gula athu adi nenu umbalagaji.” (Luka 6:22, NWT) Tuana tshigina ndo egi athu atumonese lamba mukunda nu gutshigina guetu. Luholo lutshi tuajiya gukhala nu gusuanguluga gula athu adi gutumonesa lamba? Tutadilenu ndaga eji thathu. Ya thomo, tuana suanguluisa mutshima wa Nzambi tangua tuana kolesela. (1 Phet. 4:13, 14) Ya mbadi, gutshigina guetu guana kola diago. (1 Phet. 1:7) Ya thathu, mbatuheta gubonga gua monyo wa ivo nu ivo mu masugu adi muza.—Lomo 2:6, 7.

19. Mukunda natshi apostolo akhalele nu gusuanguluga gungima dia gubetewa?

¹⁹ Yesu wawambelele alandudi enji egi mbaakhala nu gusuanguluga. Ndaga yene yamonegele gungima dia gufua guenji. Tangua a abetele, awambelele nji egi mushigo naye lulongesa luko. Uvi ene akhalele nu gusuanguluga. Mukunda natshi? ‘Handaga ene amonele egi idi yatagana ha guseguluishiwa mukunda nu jina dia Yesu.’ (Makal. 5:40-42) Akhalele muzumba fumu wawo muavula, hene akhalelego muvuila mbalagaji jiawo woma. Amonesele guzumba guawo luholo “abembelego” gulongesa lukuma luabonga. Mangino, aphangi’etu avula ana landula gukalegela Yehowa nu gutshigina guagasue, ikhale adi mutagana nu malamba. Ana jiya egi Yehowa mbajimbilago mudimo wawo nu guzumba ana monesa mukunda nu jina dienji.—Heb. 6:10.

20. Itshi mbatumona mu longo dialandula?

²⁰ Luholo tudi mujinga mu masugu awa a gisugishilo, enya ha mavu awa mbaalandula gutumonesa lamba. (Yone 15:19) Uvi tushigo naye guvua woma. Mu longo dialandula mbatumona luholo Yehowa “mbawukolesa” nu “mbawubamba” akombeledi enji a gujinginyina. (2 Tes. 3:3) Aphangi; tulandulenu guzumba Yehowa, tuzumbenu aphagi’etu a mala nu a akhetu, tuzumbenu nji mbalagaji jietu. Gula tualandula longo edi, mbatujinga hamoshi nu aphangi etu, mbatukolesa gutshigina guetu, mbatutumbuisa Yehowa, mbatumonesa diago egi guzumba guabalega umbalagaji.