1. Malamba atshi akombeledi a Yehowa ana gutagana nawo?

UDI nu ndaga ya lamba idi gugusagesa ba? Yajiya gukhala egi phangi mumoshi wagukalegela ndaga yabola mu hungu, ndaga yene idi gugusagesa. (Yak. 3:2) Nga ndo muthu mumoshi muana tshita nenji mudimo nga futa diaye wa khalasa udi gugulela handaga udi Temue wa Yehowa. (1 Phet. 4:3, 4) Yajiya gukhala nji egi enya mu fami yaye adi gugutunyisa ha guya mu gudibungisa nga ha gulongesa giamatshidia. (Mat. 10:35, 36) Gula lamba dimoshi didi gugusagesa muavula diajiya nji gugutuma ha gubemba gukombelela Yehowa. Uvi wajiya gusha mutshima egi ikhale udi mutagana nu lamba dia luholo lutshi, Yehowa mbawuguhana ndunge nu ngolo jia gukolesela.

2. Ha gutadila Lomo 15:4, luholo lutshi gutanga Mbimbi ya Nzambi guajiya gutukuatesa?

² Yehowa wana gutumonesa mu Biblia mene jia athu ashigo atagana anyi ataganele nu malamba akola. Mukunda natshi? Hagula tuhete malongo. Eji ndaga Yehowa wawambelele mupostolo Phaula ha gusonega. (Tanga Lomo 15:4.) Gutanga mene eji guajiya gutuhana gikhesa nu felela. Uvi tudi naye gutshita ndaga jiko. Tudi naye gubemba egi Biblia yisombegese luholo luetu lua gutangiza nu yikuate mutshima wetu. Itshi tuajiya gutshita gula tudi nu funu ya ukuateshi gu mulonga umoshi nga mu ndaga imoshi tuatagana nayo? Tuajiya gukalegela ba metode awa nguana: (1) Gisambu, (2) Gutangiza, (3) Gutangigiza, (4) Gukalegela ndaga udi mutanga. Henyaha tuzuelelenu gale ndaga  jiene. * Gungima tuza mukalegela ba metode awa a gulonguga ha guzuelela ndaga Fumu Davidi nu mupostolo Phaula ataganele najio.

3. Itshi udi naye gutshita gutuama dia gutanga Biblia?

³ (1) Gisambu. Gutuama egi usendese gulonguga Biblia, toga Yehowa ha gugukuatesa ha guheta gubonga gua ndaga udi mutanga. Ha gufezegesa gula udi nu funu ya malongo ha gukolesela nu lamba dimoshi udi mutagana nadio, toga Yehowa agukuatese ha guheta longo dimoshi mu Biblia.—Fili. 4:6, 7; Yak. 1:5.

4. Itshi tuajiya gutshita ha gukotelesa muabonga lumene lua Biblia?

⁴ (2) Tangiza. Yehowa watuhuile ndunge jia gutangiza ndaga jiavula. Ha gukotelesa mene jia Biblia muabonga, tangiza lumene luene, tshita gifua udi ha fundo diakhalegewe ndaga yene. Tangiza ndaga muthu muene amonele nu luholo muthu muene wadivile mu tangua diene.

5. Gutangigiza gudi itshi? Luholo lutshi tuajiya gutangigiza?

⁵ (3) Tangigiza. Gutangigiza gudi itshi? Gutangigiza gudi gutangiza muavula ndaga udi mutanga nu gutema guagasue nu luholo wajiya gukalegela ndaga jiene. Guana kuatesa ha gubungisa ndaga jihe-jihe udi mutanga nu jinyi wana jiya gale ha gukotelesa muabonga ndaga udi mutanga. Gula muthu udi mutanga Biblia gutangigiza ndo, idi gifua udi nu itshinyi yagasue ya velo mukatshi dia karto. Uvi gula udi mutangigiza, idi gifua wazola itshinyi yene wayilondega yabua velo. Hagula utangigize muabonga wajiya gudihula mihu eyi: ‘Khadilo ditshi diakuatesele muthu adi muzuelela mu lumene elu? Luholo lutshi Yehowa wamukuatesele? Luholo lutshi ngajiya gukalegela malongo ngahetshi mu longo diene ha gukolesela mu malamba ngudi mutagana nawo?’ Gungima wajiya gukamba mvutu gu mihu yene.

6. Luholo lutshi tuajiya gukalegela ndaga tudi mulonguga?

⁶ (4) Gukalegela ndaga udi mutanga. Yesu wazuelele egi gula muthu gashigo mukalegela ndaga jidi muene mulonguga udi gifua yala munu watungile inzo yenji ha gishegele. Watshitshile mudimo wakola, uvi ngolo jienji jiagasue jiayile mu meya. Mukunda natshi? Handaga gikudi giabundile inzo yene yabuile nu yamuanganele yagasue. (Mat. 7:24-27) Luholo lumoshi nji gula tuatshita gisambu, tuatangiza nu tuatangigiza, uvi nu gukalegela ndo ndaga tualonguga, ngolo jietu mbajiya genji mu meya. Hene gula tuatagana nu malamba nga usageshi, gutshigina guetu guajiya guleba. Uvi gula tualonguga Biblia, tuakalegela nji ndaga tudi mulonguga, mbayitukuatesa ha guzula ba desizio abonga, ha gukhala nu guhuima nu ha gukolesa gutshigina guetu. (Yesh. 48:17, 18) Henyaha tutalenu luholo tuajiya gukalegela ndaga eji nguana tuatanga, tangua tudi mulonguga lumene lua Fumu Davidi.

7. Lumene lutshi lua Biblia tuza mulonguga?

⁷ Futa diaye mumoshi nga muenya fami yaye mumoshi waguwambelele gale ndaga jiagusagesele mukunda nu giamatshidia ba? Gula idi ngenyi lumene lua Fumu Davidi luza gugukuatesa ha gumona luholo mun’enji Abasaloma wamukalegele ndaga jiabola nu luholo akambele gumutambula ufumu.—2 Sam. 15:5-14, 31; 18:6-14.

8. Ndaga itshi wajiya gukalagala ha guheta ukuateshi wa Yehowa?

⁸ (1) Gisambu. Ha udi muwunguluga ndaga watangi mu lumene luene, wambela Yehowa mu gisambu luholo udi gudivua mukunda nu ndaga jiabola jidi gugukalegela athu. (Ngi. 6:6-9)  Muwambele ndaga jiagasue jidi mu mutshima waye. Gungima mutoge hagula agukuatese ha guheta malongo ajiya gugukuatesa ha gubinga lamba diene.

9. Ndaga jitshi jiabuidile Davidi nu Abasaloma?

⁹ (2) Tangiza. Tangiza ndaga adi muzuelela mu lumene luene nu luholo jiasagesele Fumu Davidi. Abasaloma watshitshile ngolo ivo yavula hagula athu akhale gu muzumba. (2 Sam. 15:7) Tangua Abasaloma wamonele egi athu asendesa gumuzumba, watumine athu ha gubungisa enya Isalele hagula amutshigine ha gukhala fumu wawo. Wawambelele Ahitofele futa dia Davidi wakola munu wakhalele gumuhana malongo ha guya gukhanda yenji. Ahitofele watshiginyile ha guya gukhanda ya Abasaloma ha gutshita gubola. Gungima Abasaloma wadibuishile fumu, wakhalele mukamba luholo lua gushiya Davidi. Yajiya gukala egi mutangua diene Davidi wakhalele mukata muavula. (Ngi. 41:1-9) Tangua Davidi wavuile lumene luene, walengele gu Yelusalema. Gungima masuta a Abasaloma aluishile masuta a Davidi. Uvi masuta a Abasaloma abingilego, Abasaloma nji washiyiwe mu ita yene.

10. Malamba ataganele nawo Fumu Davidi akhalele naye gumutuma ha gukalagala itshi?

¹⁰ Tangiza gale luholo Davidi adivuile tangua ndaga eji jiagasue jiamubuidile. Wakhalele muzumba Abasaloma, wakhalele nji mushila Ahitofele mutshima. Uvi mukut’awo agasue mbadi amukalegele ndaga jiabola. Amusagesele diago muavula, akambele nji gumushiya. Ndaga eji jiakhalele naye gutuma Davidi ha gutuna gushila mafuta enji mutshima nu gutangiza egi ene nji adi gukhanda ya Abasaloma. Nga gumutuma ha gutangiza phamba gubonga guenji nu gukamba gulenga hakhenji. Nga ndo wakhalele naye guleba muila nu gubua tunga-tunga. Uvi Davidi atshitshilego ngenyi, wabingile malamba awa agasue. Itshi yamukuatesele?

11. Ndaga itshi Davidi akalegele tangua ataganele nu malamba?

¹¹ (3) Gutangigiza. Malongo atshi wajiya guzula mu lumene elu? Wajiya guhana mvutu gu muhu owu: “Ndaga itshi Davidi atshitshile ha gudikuatesa?” Davidi avuilego woma, gazudilego desizio mu luholo luabola. Alebelego nji muila, gazuelelego nji egi ngushigo mumona ndaga ya gutshita. Uvi watogele ukuateshi gudi Yehowa. Watogele nji ukuateshi gudi mafuta enji, gungima wazudile desizio dia ndaga akhalele naye gutshita nu wajikalegele muphushi. Ngatshima Davidi wataganele nu malamba awa agasue ahagelego athu ako umbalagaji mu mutshima, uvi washile mutshima wenji wagasue gudi Yehowa nu gudi mafut’enji.

12. Ndaga itshi Yehowa akalegele ha gukuatesa Davidi?

¹² Luholo lutshi Yehowa wakuatesele Davidi? Gula watshita ba recherche mbawumona diago egi Yehowa wahanele Davidi ngolo ha gukolesela mu malamba enji. (Ngi. 3:1-8) Yehowa wakuatesele Davidi luholo azudile ba desizio abonga. Wakuatesele nji mafuta a Davidi luholo amukuatesele mu tangua dia lamba.

13. Ha gutadila Matayo 18:15-17, luholo lutshi tuajiya gulandula gifezegeselo gia Davidi gula muthu watukalegela gubola?

¹³ (4) Kalegela ndaga udi mutanga. Dihule egi: ‘Luholo lutshi ngajiya gulandula gifezegeselo gia Davidi?’ Udi naye gulondega ndaga muphushi ha gulondega mulonga. Ha gutadila mulonga udi mutagana nawo, wajiya gukalegela longo dia Yesu didi mu Matayo mukhapho 18. (Tanga Matayo 18:15-17.) Uvi ushigo naye guzula desizio muphushi tangua udi nu khabu. Udi naye gutoga ndunge jia Yehowa mu gisambu hagula agukuatese ha gumonesa khadilo dia guhuiminyina nu ha gujiya ndaga wajiya gutshita tangua watagana nu mulonga. Ubembigo gushila mafuta aye mutshima, uvi tshigina nu gusuanguluga guagasue luholo adi gugukuatesa. (Ish. 17:17) Ndaga ya gubalega ndando idi egi  udi naye gulandula malongo a Yehowa adi mu Mbimbi yenji.—Ish. 3:5, 6.

14. Ndaga jitshi jiajiya gugutuma ha gutanga mukanda wa 2 Timote 1:12-16; 4:6-11, 17-22?

¹⁴ Enya fami yaye ana gugusagesa luholo wana gukombelela Yehowa ba? Nga ndo wana khala mu gifutshi ginyi mudimo wetu wana tunyishiwa ba? Gula idi ngenyi, wajiya guheta gikhesa tangua udi mutanga mukanda wa 2 Timote 1:12-16 nu 4:6-11, 17-22. * Phaula wasonegele mikanda eyi hakhalele muene mu bologo.

15. Ndaga jitshi tuajiya gutoga Yehowa mu gisambu?

¹⁵ (1) Gisambu. Gutuama egi utange verse eji, wambela Yehowa mu gisambu malamba agasue udi mutagana nayo nu luholo udi gudivua. Muwambele ndaga jiagasue jidi mu mutshima waye. Gungima toga Yehowa agukuatese ha guheta malongo adi mu lumene lua Phaula, luholo ataganele nu malamba, yajiya gugukuatesa ha gubinga malamba udi mutagana nawo.

16. Malamba atshi abuidile Phaula?

¹⁶ (2) Tangiza. Dihage ha fundo dia Phaula udi mu bologo gu Roma. Wambiwe gale mu bologo hugo dia thomo, uvi henyaha idi mumonega egi udi naye gushiyiwa. Muila wa muleba, mafut’enji ako amulenga.—2 Tim. 1:15.

17. Malamba a Phaula akhalele naye gumutuma ha gutangiza itshi?

¹⁷ Malamba avula abuidile Phaula akhalele naye gumutuma ha gutangiza egi, gula nga abuilego Muklisto nga henyaha ashigo mu bologo. Wakhalele naye nji guvuila mafut’enji a gu Asie khabu luholo amubembele mutangua dia lamba nga gutuna guashila mutshima. Uvi Phaula atshitshilego ngenyi. Itshi yamukuatesele ha gulandula gushila mafut’enji mutshima nu gusha nji mutshima egi Yehowa mbawumukuatesa?

18. Ndaga itshi Phaula wakalegele mukunda nu malamba akhalele mutagana nawo?

¹⁸ (3) Tangigiza. Hana mvutu gu muhu owu: “Luholo lutshi Phaula adikuatesele?” Ngatshima Phaula wakhalele mujiya egi guasala matangua azonda udi mufua, walanduile gutumbuisa Yehowa. Wakhalele mutangiza luholo ajiya gukolesa aphangi ako. Wakhalele mutshita isambu yavula ha gumonesa egi wakhalele mushila Yehowa mutshima. (2 Tim. 1:3) Ha fundo dia gutangiza phamba mafut’enji anyi amubembele mu tangua dia lamba, wahanele mersi gudi mafut’enji anyi akhalele agujinginyina gudi muene nu luholo amukuatesele mu tangua dia lamba. Luko, Phaula walanduile gulonguga Mbimbi ya Nzambi. (2 Tim. 3:16, 17; 4:13) Ndaga ya gubalega ndando idi egi Phaula wakhalele musha mutshima egi Yehowa nu Yesu ana gumuzumba. Yehowa nu Yesu amubembelego mu tangua dia lamba. Wakhalele musha mutshima egi mbaamufuta mukunda nu mudimo wenji wakola wakalegele muene.

19. Luholo lutshi Yehowa wakuatesele Phaula?

¹⁹ Yehowa wawambelele Phaula gutuama egi, muene mbawutagana nu malamba gula wabua Muklisto. (Makal. 21:11-13) Luholo lutshi Yehowa wakuatesele Phaula? Wahanele mvutu gu isambu yenji, wakhalele nji gumuhana ngolo tangua diagasue. (2 Tim. 4:17) Yehowa wawambelele Phaula egi mbawuheta gubonga gula wakalagala muabonga mudimo wamuhanewe. Wamutumidile nji mafut’enji ha gumukuatesa.

20. Ha gutadila Lomo 8:38, 39, luholo lutshi tuajiya gulandula gifezegeselo gia Phaula?

²⁰ (4) Kalegela ndaga udi mulonguga. Dihule egi: ‘Luholo lutshi ngajiya gulandula gifezegeselo gia Phaula?’ Esue nji tudi naye gujiya egi luholo tudi Matemue a Yehowa, mbatutagana nu malamba gifua Phaula. (Mako 10:29, 30) Ha gusala ya gujinginyina gudi Yehowa tangua tudi  mutagana nu malamba, tudi naye gukhala nu khadilo dia gutshita gisambu muavula nu gulandula gulonguga Mbimbi yenji lusugu nu lusugu. Mukut’etu agasue tudi naye gujiya egi ndaga yabalega ndando tudi naye gutshita idi, gutumbuisa Yehowa. Tudi naye gujiya egi Yehowa gajiyilego gutubemba nga hazonda. Gushigo nga muthu wajiya gubolesa ufuta wetu n’enji.—Tanga Lomo 8:38, 39; Heb. 13:5, 6.

21. Ndaga jitshi jiakuatesele phangi Aya nu Hector ha gubinga malamba akhalele mutagana nawo?

²¹ Ifezegeselo idi mu Biblia yajiya gutukuatesa tangua tudi mutagana nu malamba. Phangi Aya, muvundji wa njila gu Japon udi muzuela egi lumene lua Yona luamukuatesele ha gutuna guvua woma tangua adi mulongesa ha fundo dia athu avula. Phangi Hector udi muvuala wana khala gu Indonesie. Mvuaji jienji jianago gukombelela Yehowa. Udi muzuela egi gifezegeselo gia Luta giamukuatesele ha gulonguga ndaga jiavula jiatadila Yehowa nu ha gusendesa gumukombelela.

22. Luholo lutshi wajiya guheta gubonga tangua udi mutanga mene jia Biblia nga tangua udi mutanga mukanda “Imitez leur foi”?

²² Gui wajiya guheta ifezegeselo ya Biblia yajiya gugukolesa? Ba video nu ba drame etu agutegelela nu mukanda “Imitez leur foi” yana gutukuatesa ha gukotelesa Biblia muabonga. * Gutuama dia gutala, dia gutegelela nga dia gutanga lumene lua Biblia, toga Yehowa agukuatese ha guheta malongo wajiya gukadigila mu monyo waye. Dihage ha fundo dia muthu adi muzuelela mu lumene luene nu luholo Yehowa waakuatesele ha gubinga malamba ene. Gungima kalegela malongo ene mu ndaga udi mutagana najio. Hana Yehowa mersi luholo wana gugukuatesa, khala mukamba ba okazio a guhana athu ako gikhesa nu guakuatesa. Gutshita ngenyi mbagumonesa egi udi muhana Yehowa mersi mu ndaga agukalegele.

23. Ha gutadila Yeshaya 41:10, 13, Yehowa udi gutulaya egi mbawutukalegela itshi?

²³ Ha mavu awa a Satana, lujingu ludi diago lamba. Matangua ako yana khala lamba ha gujiya ndaga tudi naye gutshita. (2 Tim. 3:1) Uvi tushigo naye gudisagesa nga guvua woma. Yehowa wana jiya ndaga jitshi tudi mutagana najio. Udi gutulaya egi gula tuabua, muene mbawutuzugisa nu ngolo jiagasue gu koko dienji dia madia. (Tanga Yeshaya 41:10, 13.) Tudi musha diago mutshima egi Yehowa mbawutukuatesa. Biblia mbayituhana ngolo ha gukolesela ngatshima tudi mutagana nu lamba dia luholo lutshi.