1. Mukunda natshi Yesu watogele Yehowa ha gubamba alandudi enji?

MU PHIPHA ya gisugishilo gia lujingu luenji ha mavu, Yesu watangijile malamba alandudi enji mbaatagana nawo. Luholo Yesu wakhalele muzumba alandudi enji, watogele Sh’enji ha ‘guabamba gudi muthu wabola.’ (Yone 17:14, 15) Yesu wakhalele mujiya egi gula wavutuga mu dilu, Satana Diabulu mbawulandula guluisa muthu wagasue mbawutshigina gukombelela Yehowa. Gishina giene akombeledi a Yehowa ana khala nu funu ya ubambi.

2. Itshi idi gututshiginyisa egi Yehowa mbawuhana mvutu gu isambu yetu?

² Yehowa wahanele mvutu gu isambu ya Yesu handaga wana gumuzumba. Gula tudi mutshita yagasue ha gusuanguluisa Yehowa, muene mbawutuzumba, mbawuhana mvutu gu isambu yetu ha gutukuatesa nu mbawutubamba. Yehowa mbawulandula gudisagesa nu guzumba guagasue mukunda nu an’enji gifua luholo Mvuaji yana gudisagesa. Gutshita ngenyi guana kuatesa ha gubamba jina nga lukuma luenji.

3. Mukunda natshi tudi nu funu ya ubambi wa Yehowa mangino?

³ Mangin’owu tuana khala nu funu ya ubambi wa Yehowa muavula gubalega. Satana wana khala nu “khabu jiabala” handaga wakayewe mu dilu. (Yat. 12:12) Satana wana tuma athu ako ha gutangiza egi gula adi gutusagesa, ngenyi adi “mukalegela Nzambi mudimo wa gijila.” (Yone 16:2, NWT) Athu ako anyi anago gukombelela Nzambi ana gutusagesa handaga tuana khala ya gudisha nu athu a ha mavu awa. Ikhale ngenyi esue tushigo naye guvua woma. Mukunda natshi? Handaga Mbimbi ya Nzambi idi muzuela egi: ‘Fumu udi wagujinginyina, mbawumihana ngolo nu mbawumibamba gudi muthu wabola.’ (2 Tes. 3:3) Luholo lutshi  Yehowa wana gutubamba? Tutadilenu maluholo mbadi.

4. Ha gutadila Efeso 6:13-17, iluilo itshi Yehowa wana gutuhana ha gutubamba?

⁴ Yehowa wana gutuhana iluilo yana gutubamba mu uluishi wa Satana. (Tanga Efeso 6:13-17.) Iluilo yene ya mu nyuma yana khala nu ngolo nu yana gutukuatesa diago! Uvi gula tudi mutshigina egi iluilo yene itubambe, tudi naye guyisudiga yagasue. Gitshinyi giagasue gia iluilo yene idi mukotelesa itshi? Tuzuelelenu gitshinyi gimoshi-gimoshi gia iluilo yene.

5. a) Gusudiga giamatshidia gifua mukaba ha kete gudi mumonesa itshi? b) Mukunda natshi tudi naye gusudiga giamatshidia giene?

⁵ Gusudiga giamatshidia gifua mukaba ha kete gudi mumonesa giamatshidia gidi mu Mbimbi ya Nzambi, Biblia. Mukunda natshi tudi naye gusudiga giamatshidia giene gifua mukaba ha kete? Handaga Satana udi “sha mambo.” (Yone 8:44) Satana wana mba mambo ivo yavula yabalega gale. ‘Wana huiga athu a ha mavu a mudidi’! (Yat. 12:9) Uvi giamatshidia gidi mu Biblia giana gutubamba hagula tuhuigiwago. Luholo lutshi tuana sudiga giamatshidia gifua mukaba? Tuana gugisudiga tangua tuana longuga giamatshidia giatadila Yehowa, tangua tuana gumukombela ‘mu nyuma nu mu giamatshidia’ nu tangua tuana tshita ndaga jiagasue mu giamatshidia.—Yone 4:24; Ef. 4:25; Heb. 13:18.

6. a) Gazagu ga ita gadi mumonesa itshi? b) Mukunda natshi tudi naye gugasudiga?

⁶ Gazagu ga ita ha thulo gadi mumonesa mikhuala yatagana ya Yehowa. Mukunda natshi tudi naye gusudiga gazagu ga ita ha thulo? Gifua luholo gazagu gana bamba mutshima wa suta gu ita, gazagu ga gufuanesa gana bamba mitshima yetu gu ndaga jiabola jia ha mavu awa. (Ish. 4:23) Yehowa wana tshigina egi tumuzumbe nu tumukombelele nu mutshima wetu wagasue. (Mat. 22:36, 37) Uvi Satana wana kamba gututuma ha guzumba ima ya ha mavu awa, hagula tubembe gukombelela Yehowa nu mutshima umoshi. (Yak. 4:4; 1 Yone 2:15, 16) Uvi gula gabingilego, wana kamba gutusagesa hagula tutshite ndaga ishigo gudivua nu mikhuala ya Yehowa.

7. Luholo lutshi tuajiya gusudiga gazagu ga ita ga gufuanesa?

⁷ Tuana sudiga gazagu ga ita mu luholo lua gufuanesa tangua tuana tumagela nu tuana jinga mu gudivua nu mikhuala ya Yehowa yatadila ndaga jiabonga nu jiabola. (Ngi. 97:10) Athu ako ajiya gutangiza egi mikhuala ya Yehowa yana khala yanema ha gutumagela. Uvi gula tuabemba gutumagela mikhuala ya Biblia, tuajiya gubua gifua suta udi mukatula gazagu genji tangua ita idi muluiwa, handaga udi mutangiza egi gazagu gene gadi ganema. Gutshita ngenyi gushigo mumonesa gutema. Gula tudi muzumba Yehowa, mikhuala yenji ‘yajiyilego gutukolela,’ uvi yajiya guhuluisa mionyo yetu.—1 Yone 5:3.

8. Gusudiga gikhesa gia gulongesa lukuma luabonga gifua saphata gu malu gudi mukotelesa itshi?

⁸ Mupostolo Phaula udi gutukolesa ha gusudiga gikhesa gia gulongesa lukuma luabonga lua guhuima gifua saphata gu malu. Mbimbi eji jidi mukotelesa egi tudi naye gukhala tangua diagasue hehi ha gulongesa lukuma luabonga lua Ufumu. Tangua tuana longesa athu ako lukuma luabonga, tuana kolesa nji gutshigina guetu. Tuana heta gikhesa tangua tuana mona luholo akombeledi a Yehowa a ha mavu a mudidi mukalegela ba okazio agasue ha gulongesa lukuma luabonga mu mafundo adi ene. Ha gufezegesa, ana longesa gu mudimo nu gu khalasa, ana longesa nji inzo nu inzo nu mu mafundo a mingenda, ana longesa tangua anaya musumba ima. Ana kalegela nji ba okazio ene ha gulongesa enya fami jiawo anyi ashigo Matemue a Yehowa nu athu anyi ana gudijiya nawo.  Gula tuavua woma tuabemba gulongesa, tuajiya gubua gifua suta wakatula saphata jienji gu malu mu tangua dia ita. Ngenyi yajiya gukhala yaleba gudi muene ha gunamana gu malu. Yajiya nji gukhala ndaga yakola gudi muene ha gudibamba gudi mbalagaji nu ha gulandula utuameji wa komanda wenji.

9. Mukunda natshi tudi naye guzangula tshibu yakoma ya gutshigina?

⁹ Tshibu yakoma ya gutshigina idi mumonesa gutshigina guetu gudi Yehowa. Tuana sha mutshima egi Yehowa mbawutagenesa mafelela enji agasue. Gutshigina guene guana gutukuatesa “ha gujima mifula yagasue ya tshuya idi musonona Diabulu.” Mukunda natshi tudi naye guzangula tshibu eyi yakoma? Handaga yana gutubamba gu malongo a ba aposta hagula tuhuigiwago nu tulebigo muila tangua athu adi gutulela mukunda nu gutshigina guetu. Gutshigina guana gutuhana ngolo ha gutumagela Yehowa tangua athu ako adi gutushinjiga ha gushiya mikhuala yenji. Gutshigina guene guana gutubamba tangua diagasue ha gutuna gutshita ndaga yanago gusuanguluisa Yehowa, ikhale gu mudimo nga gu khalasa. (1 Phet. 3:15) Gutshigina guetu guana gutubamba nji tangua tuana tuna mudimo wa falanga jiavula, unuwajiyilego gutuhana njila ha gukombelela Yehowa.  (Heb. 13:5, 6) Luko, gutshigina guetu guana gutubamba tangua diagasue tuana landula gukombelela Yehowa ngatshima tudi mutagana nu umbalagaji.—1 Tes. 2:2.

10. Gifulu gia guhuluga gidi itshi? Mukunda natshi tudi naye gugisudiga?

¹⁰ Gifulu gia guhuluga gidi felela diana gutuhana Yehowa. Felela diene didi egi Yehowa mbawutuhuluisa gu gufua nu mbawushimbiga athu agasue ana gutshita gutshigina guenji. (1 Tes. 5:8; 1 Tim. 4:10; Tito 1:1, 2) Gifua luholo gifulu giana bamba muto wa suta, felela dietu dia guhuluga diana gutukuatesa ha gukhala nu matangi abonga. Mu luholo lutshi? Diana gutukuatesa ha guhaga matangi mu mafelela a Nzambi, diana gutukuatesa nji ha gutuna guleba muila tangua tudi mutagana nu malamba. Luholo lutshi tuana sudiga gifulu gia guhuluga? Tuana gugisudiga tangua tuana tadila ndaga luholo Nzambi wana tadila. Ha gufezegesa, tuanago gusha felela dietu mu umonyi wa ha mavu awa, uvi tuana gudisha gudi Nzambi.—Ngi. 26:2; 104:34; 1 Tim. 6:17.

11. a) Phogo ya khusa ya mu nyuma idi itshi? b) Mukunda natshi tudi naye guyikalegela?

¹¹ Phogo ya khusa ya mu nyuma idi Mbimbi ya Nzambi, Biblia. Phogo yene idi nu ngolo jia gumonesa mambo agasue haphelo nu ha gukatula athu agasue mu uhiga wa malongo a mambo nu makalegelo ako abola. (2 Kol. 10:4, 5; 2 Tim. 3:16, 17; Heb. 4:12) Gulonguga guetu hakhetu nu formasio tuana heta mu organizasio wa Nzambi yana gutukuatesa ha gukalegela phogo yene muabonga. (2 Tim. 2:15) Yehowa wana gutuhana gima giko ha gutubamba. Gima gitshi giene?

12. Itshi iko tudi naye funu nu mukunda natshi?

¹² Suta udi nu eksperianse yavula wana jiya egi gajiyilego gubinga ita mu ngolo jienji hakhenji, uvi wana khala nu funu ya ukuateshi wa masuta ako. Luholo lumoshi nji, tuajiyilego gubinga Satana nu bademo enji mu ngolo jietu hakhetu, uvi tudi nu funu ya ukuateshi wa aphangi a mala nu a akhetu. Yehowa watuhanele ‘aphangi a mala nu a akhetu’ a ha mavu a mudidi ha gutukuatesa.—1 Phet. 2:17.

13. Ha gutadila Hebelu 10:24, 25, gubonga gutshi tuana heta tangua tuana guya mu gudibungisa?

¹³ Tuana heta ukuateshi tangua tuana guya mu gudibungisa guetu gua mu hungu. (Tanga Hebelu 10:24, 25.) Matangua ako mukut’etu agasue tuana guleba muila, uvi gudibungisa gua mu hungu guana gutuhana ngolo. Tuana heta nji gikhesa mu ba komantere abonga ana hana aphangi a mala nu a akhetu. Ba diskur nu demonstrasio ana kalagala aphangi ana gutuhana ngolo jiavula jia gukalegela Yehowa. Maga tuana guta gutuama nga gungima dia gudibungisa ana gutukolesa. (1 Tes. 5:14) Gudibungisa gua mu hungu guana gutukuatesa nji ha guheta gusuanguluga gua gukuatesa athu ako. (Makal. 20:35; Lomo 1:11, 12) Gudibungisa guetu gua mu hungu guana gutukuatesa nji mu maluholo ako. Guana gutukuatesa ha gulongesa lukuma luabonga mu luholo luatagana. Ha gufezegesa, tuana gulonguga luholo lua gukalegela muabonga Ikadigilo ya Gulongesela Biblia. Gishina giene, tudi naye gulondega gudibungisa gua mu hungu. Tangua tudi mu gudibungisa, khala mutegelela muabonga. Khala mukalegela formasio wana zula mu gudibungisa gua mu hungu. Gutshita ngenyi mbagugukuatesa ha gukhala ‘suta diabonga dia Klisto Yesu.’—2 Tim. 2:3.

14. Gui tuana heta nji ukuateshi uko?

¹⁴ Tuana heta nji ukuateshi gudi anjelo avula. Tangiza ndaga yajiya gukalagala muanjelo phamba mumoshi! (Yesh. 37:36) Henyaha tangiza ndaga anjelo avula ajiya gukalagala. Gushigo nga muthu, ikhale demo wajiya gubinga ita nu masuta a Yehowa. Yehowa udi nu ngolo jiavula. Hene, gula tudi gu khanda yenji, tuana  khala nu ngolo jiavula gubalega mbalagaji jietu, ngatshima adi guvula gutshi. (Manz. 6:16) Tushigo naye gujimbila ndaga eji gula futa dietu dia mudimo nga wa khalasa, nga muenya fami yetu yonu gashigo Temue wa Yehowa wazuela nga wakalagala ndaga yatuhua woma. Ujimbilago egi ushigo hakhaye. Udi mulandula utuameji wa Yehowa.

15. Ha gutadila Yeshaya 54:15, 17, mukunda natshi gushigo nga muthu wajiya gukanga akombeledi a Nzambi njila ha gulandula gulongesa lukuma luabonga?

¹⁵ Mavu awa adi mutuamezewa gudi Satana adi nu ndaga jiavula jiana guatuma ha gutuhagela umbalagaji. Tuana gudinginyisago mu ndaga jia politike, tuanago nji gungina mu ndaga jia ita ya ha mavu awa. Tuana longesa jina dia Nzambi. Tuana longesa egi phamba Ufumu wa Nzambi mbawubatela athu guhuima. Tuana tumagela nji mikhuala yenji yatagana. Tuana longesa nji athu egi muthu udi mutuameza mavu awa udi muenya khuta. (Yone 8:44) Tuana longesa nji egi gualeha ndo mavu awa a Satana mbaashiyiwa. Hene, Satana nu athu enji mbashigo gutukanga njila ya gulongesa lukuma luabonga nga hazonda. Uvi mbatulandula gutumbuisa Yehowa mu maluholo agasue. Ngatshima Satana udi nu ngolo, mbagashigo mukanga njila egi lukuma luabonga lua Ufumu lulongesewe ha mavu agasue. Tuana kalagala ndaga eji jiagasue mu ukuateshi wa Yehowa.—Tanga Yeshaya 54:15, 17.

16. Luholo lutshi Yehowa mbawuhuluisa athu enji mu sungi ya lamba diakoma?

¹⁶ Ndaga tshi jidi gutunengena gutuama? Mu sungi ya lamba diakoma, Yehowa mbawutuhuluisa mu maluholo mbadi a gushimana. Thomo, Yehowa mbawuhuluisa akombeledi enji a gujinginyina tangua mbakalegela mafumu a ha mavu awa ha gushiya Babilone Yakoma, yakotelesa egi ikombelelo ya mambo. (Yat. 17:16-18; 18:2, 4) Gungima, mu ita ya Alemagedona, Yehowa mbawuhuluisa athu enji tangua mbaashiya athu ako a ha mavu awa a Satana.—Yat. 7:9, 10; 16:14, 16.

17. Gubonga tshi mbatuheta gula tudi nu ufuta wakola nu Yehowa?

¹⁷ Gula tudi mulandula gukhala nu ufuta wakola nu Yehowa, Satana gashigo nu gima gia gutukita. Uvi muene mbawushiyiwa mayilago. (Lomo 16:20) Hene, tulandulenu gusudiga iluilo yagasue yana gutuhana Nzambi, tushigo naye guyibemba! Ukambigo gulua ita mu ngolo jiaye hakhaye. Khala mukuatesa aphangi’aye a mala nu a akhetu. Landula utuameji wa Yehowa. Gula watshita ngenyi, Tata waye wa mu dilu mbawuguhana ngolo nu mbawugubamba.—Yesh. 41:10.