1. Ndaga itshi athu ana mona tangua anaza mbala ya thomo mu gudibungisa guetu? (Tala nji gifuanesa.)

 TANGIZA gale egi yala mumoshi nu mukaji’enji aza mu gudibungisa gua mu hungu mbala ya thomo. Adihula muavula ha gumona luholo aphangi adi guayamba nu gikhesa giagasue nu luholo aphangi adi gudimonesela guzumba mukatshi diawo. Tangua akatuga mu gudibungisa ha guvutuga gu inzo, mukaji’enji wamuwambela egi: ‘Matemue a Yehowa adi diago a gudisha nu athu ako, ngasuanguluga gukhala mukatshi diago.’

2. Mukunda natshi athu ako abembele gukombelela Yehowa?

² Guzumba guana khala mukatshi dia akombeledi a Yehowa guana monega diago haphelo. Uvi Matemue a Yehowa ashigo athu atagana. (1 Yone 1:8) Tangua tudi mubalegesa tangua hamoshi nu aphangi a mu hungu ha guajiya muabonga, tuajiya nji gusendesa gumona makalegelo awo ako abola. (Roma 3:23) Ndaga ya gikenene idi egi, athu ako abembele gale gukombelela Yehowa mukunda nu makalegelo abola amonele gudi aphangi ako.

3. Luholo lutshi athu ajiya gujiya Aklisto a giamatshidia? (Yone 13:34, 35)

³ Tanga luko muto wa lumene wa longo edi. (Tanga Yone 13:34, 35.) Luholo lutshi athu ajiya gujiya Aklisto a giamatshidia? Biblia ishigo muzuela egi Aklisto a giamatshidia mbaakhala athu atagana, uvi idi muzuela egi mbaakhala nu guzumba mukatshi diawo. Yesu gazuelelego egi: Mbamujiya egi mudi alandudi ami.’ Uvi wazuelele egi: “Athu agasue mbaajiya egi mudi alandudi ami.” Yesu wamonesele egi ishigo phamba alandudi enji akhalele naye gujiya ndaga yene, uvi nu athu anyi akhalelego Aklisto akhalele naye gujiya alandudi enji a giamatshidia gula adi nu guzumba mukatshi diawo.

4. Ndaga itshi athu avula ajiya gukamba gujiya mukunda nu Aklisto a giamatshidia?

⁴ Athu anyi ashigo Matemue a Yehowa ajiya guhula egi: ‘Luholo  lutshi guzumba guajiya gutukuatesa ha gujiya Aklisto a giamatshidia? Luholo lutshi Yesu wamonesele apostolo enji guzumba? Luholo lutshi athu ajiya gulandula gifezegeselo gia Yesu mangino?’ Ikhale esue Matemue a Yehowa, tudi naye nji gutangigiza gu mvutu jia mihu eyi. Gutshita ngenyi guajiya gutukuatesa ha gudimonesela guzumba guavula mukatshi dietu ikhale athu ako adi mutshita ndaga jishigo gutusuanguluisa.​—Ef. 5:2.

5. Hana ukoteleshi wa mbimbi jia Yesu jidi mu Yone 15:12, 13.

⁵ Yesu wamonesele haphelo egi athu mbaajiya muabonga alandudi enji gula adi nu guzumba gua giamatshidia mukatshi diawo. (Tanga Yone 15:12, 13.) Yesu wahanele alandudi enji mukhuala egi: “Dizumbenu gifua luholo ngamizumbile.” Idi mukotelesa itshi? Yesu wamonesele egi idi guzumba athu ako muavula gubalega esue hakhetu. Guzumba guene guajiya gututuma ha gufua mukunda nu aphangi’etu. b

6. Luholo lutshi Biblia yana monesa egi guzumba gudi nu ndando yavula?

⁶ Biblia yana longesa egi guzumba gudi nu ndando yavula. Ha gufezegesa, athu avula ana suanguluga nu verse eji jia Biblia: 1 Yone 4:8: “Nzambi udi guzumba.” Matayo 22:39: “Zumba muthu na mukuenu gifua luholo wana zumba muila waye.” 1 Phetelo 4:8: “Guzumba guana tshuiga masumu avula.” 1 Kolinto 13:8: “Guzumba guanago guhua.” Verse eji nu verse jiko jia Biblia jiana monesa diago haphelo egi guzumba athu ako gudi nu ndando yavula.

7. Mukunda natshi Satana gajiyilego gubungisa athu hamoshi ha gukhala nu guzumba gua giamatshidia mukatshi diawo?

⁷ Athu avula ana hula egi: ‘Luholo lutshi ngajiya gujiya gikombelelo gia giamatshidia? Ikombelelo yagasue yana zuela egi yana longesa giamatshidia, uvi mukut’awo agasue ana longesa  ndo ndaga jia luholo lumoshi mukunda nu Nzambi.’ Satana wazolele gale ikombelelo yavula ya mambo ha gula ikhale lamba gudi athu avula ha gujiya gikombelelo gia giamatshidia. Uvi gajiyilego gubungisa athu a ha mavu a agasue hamoshi hagula akhale gudizumba. Phamba Yehowa wajiya gutshita ndaga yene. Tudi muzuela ngenyi handaga guzumba guana katuga gudi Yehowa. Phamba athu anyi Yehowa wana kuatesa nu ana hana muene nyuma yenji, ajiya gudimonesela guzumba gua giamatshidia mukatshi diawo. (1 Yone 4:7) Gishina giene Yesu wazuelele egi phamba alandudi enji mbaakhala nu guzumba gua giamatshidia.

8-9. Ndaga itshi athu avula azuelele tangua amonele guzumba guana khala mukatshi dia Matemue a Yehowa?

⁸ Gifua luholo Yesu wayizuelele, athu avula ajiyile Aklisto a giamatshidia tangua amonele guzumba gua giamatshidia mukatshi diawo. Ha gufezegesa, phangi mumoshi wa yala jina dienji Ian, yowu muwunguluga luko tangua diayile muene mbala ya thomo gu asamble a masugu thathu a Matemue a Yehowa, akalegewe mu stade hehi nu inzo yenji. Phangi Ian wakhalele mu stade yene mbeji jiazonda gutuama ha gutala saga yakhalele mukalegewa guene. Udi muzuela egi: “Athu ngamonele gu asamble ene, akhalele diago a gudisha nu athu ngamonele tangua ngayile mutala saga. Matemue a Yehowa akhalele munemesa athu ako, asudigile muabonga, an’awo akhalele nu makalegelo abonga. Mukut’awo agasue akhalele diago nu gusuanguluga, akhalele nji mu guhuima. Yene ndaga ngakhalele mutshigina mu monyo wami. Ngana wungulugago luko ndaga alongesele mu lusugu luene, uvi ame muwunguluga makalegelo abonga ngamonele gudi Matemue a Yehowa.” c Tuana khala nu makalegelo awa abonga handaga tuana gudimonesela guzumba gua giamatshidia mukatshi dietu. Tuana zumba aphangi’etu a mala nu a akhetu, hene tuana guamonesela gisemo nu tuana guanemesa.

⁹ Phangi John wadihudile nji tangua diayile muene mbala ya thomo mu gudibungisa gua Matemue a Yehowa. Udi muzuela egi: “Ngadihudile luholo athu agasue akhalele diago gudivua muabonga . . . Akhalele mumonega gifua ana tshitago nga ndaga imoshi yabola. Tangua ngamonele guzumba gua giamatshidia guakhalele mukatshi diawo, ngamonele diago egi ngaheta gikombelelo gia giamatshidia.” d Ifezegeselo yiyi tuazuelela nu iko tuana mona lusugu nu lusugu idi mumonesa diago egi Matemue a Yehowa adi Aklisto a giamatshidia.

10. Tangua ditshi tuana heta luendu lua gumonesa aphangi’etu Aklisto egi tuana guazumba? (Tala mbimbi goshi’a diyiji.)

¹⁰ Gifua luholo tuayimonyi gu thunda, aphangi’etu Aklisto ashigo athu atagana, matangua ako ajiya guzuela nga gutshita ndaga yajiya gutuhana khabu. e (Yak. 3:2) Gula ndaga yene yatubuila, tudi naye gujiya egi idi gutuhana luendu lua guakalegela nga guawambela ndaga jidi mumonesa egi tuana guazumba. Luholo lutshi gifezegeselo gia Yesu giajiya gutukuatesa?​—Yone 13:15.

11. Makalegelo atshi abola Yakoba nu Yone amonesele? (Tala nji gifuanesa.)

¹¹ Yesu wakhalele mujiya egi alandudi enji ashigo athu atagana. Gishina giene waakuatesele nu guzumba guagasue ha gula asombegese makalegelo awo abola ha gusuanguluisa Yehowa. Lusugu lumoshi, apostolo enji muyadi Yakoba nu Yone, atumile gin’awo gudi Yesu ha gumutoga hagula a ahage muko gu koko dienji dia madia  muko gu koko dienji dia mahidi mu Ufumu wa Nzambi. (Mat. 20:20, 21) Ndaga yene yamonesele diago egi Yakoba nu Yone akhalele nu lulendo, akhalele mukamba luholo lua gukhala nu lutumbu luavula gubalega athu ako.​—Ish. 16:18.

12. Phamba Yakoba nu Yone amonesele makalegelo abola ba? Kotelesa.

¹² Ishigo phamba Yakoba nu Yone amonesele makalegelo abola mu lusugu luene. Biblia idi muzuela egi: “Tangua alandudi ako kumi avuile ndaga yatshitshile alandudi anyi mbadi, avuile khabu.” (Mat. 20:24) Idi mumonega gifua Yakoba nu Yone nu apostolo ako amanele. Yajiya gukhala egi apostolo ako ahudile Yone nu Yakoba egi: ‘Enue mudi akhuatshi hagula mutoge amihage muko gu koko dia madia muko gu koko dia mahidi mu Ufumu wa Nzambi? Mukut’etu agasue tuatshitshi mudimo wakola nu Yesu. Esue nji tudi tuatagana ha guheta luendu muayi mutoga gudi Yesu!’ Ikhale azuelele ngenyi nga ndo, uvi mu tangua diene amoneselego guzumba nu gisemo mukatshi diawo.

13. Itshi Yesu wakhalele mutshita tangua diakhalele mumona muene alandudi enji mutshita ndaga jiabola? (Matayo 20:25-28)

¹³ Itshi Yesu wakalegele mu tangua diene? Yesu gavilego khabu, gaawambelelego egi ngudi muya mukamba athu ako adi nu gudibulumuisa guavula nu ana landula gudimonesela guzumba mukatshi diawo hagula abue apostolo ami. Ndo gatshitshilego ngenyi, uvi waalongesele nu guhuiminyina guagasue handaga wakhalele mujiya egi ana tshita ngolo ha gukalagala ndaga jiabonga. (Tanga Matayo 20:25-28.) Yesu wajiyile  egi apostolo akhalele mumana mbala jiavula mukatshi diawo ha gujiya gula nanyi udi wabalega gukoma mukatshi diawo. Uvi walanduile guakalegela ndaga nu guzumba guagasue nu gisemo.​—Mako 9:34; Luka 22:24.

14. Ndaga itshi jiakhalele mukalegewa mu mafundo akudile apostolo a Yesu?

¹⁴ Idi mumonega egi Yesu wakhalele mujiya muabonga mafundo apostolo enji akudile nu ndaga jiakhalele mukalegewa mu mafundo ene. (Yone 2:24, 25) Mu mafundo ene mafumu a ikombelelo akhalele mulongesa egi hagula muthu akhale nu ndando udi naye gukhala nu lutumbu luavula. (Mat. 23:6) Mafumu a ikombelelo a enya Yuda akhalele mumona egi adi athu abonga gubalega athu ako. f (Luka 18:9-12) Yesu wakotelesele egi apostolo enji nji ajiya gulandula makalegelo abola a mafumu a ikombelelo yene nu gutangiza egi abalega athu ako. (Ish. 19:11) Yesu wakhalele mujiya egi apostolo enji ajiya nji gujimbila, hene gakhalelego guabalela gula ajimbila gutshita ndaga imoshi. Wakhalele mujiya egi apostolo enji akhalele mutshigina gutshita ndaga jiabonga. Waakuatesele nu guhuiminyina guagasue ha gubemba khadilo dia gutangiza egi abalega athu ako, ha gukhala nu khadilo dia gudibulumuisa nu gudimonesela guzumba mukatshi diawo.

15. Malongo atshi tuajiya guzula mu ndaga yakalegele Yakoba nu Yone?

¹⁵ Tuajiya guzula malongo avula mu ndaga yakalegele Yakoba nu Yone. Yakoba nu Yone atshitshile diago ndaga yabola luholo atogele egi Yesu a ahage muko gu koko dienji dia madia, muko gu koko dienji dia mahidi mu Ufumu wa Nzambi. Uvi apostolo ako atshitshile nji ndaga yabola luholo abembele egi ndaga yene ibolese gudivua guabonga akhalele nago mukatshi diawo. Uvi Yesu wamonesele gisemo nu guzumba gudi apostolo enji agasue 12. Idi gutulongesa itshi? Matangua avula gula muthu watukalegela ndaga imoshi yabola, tuana tala phamba gubola guene, uvi tudi naye nji gutala ndaga tudi mutshigina gukalagala mukunda nu ndaga yene. Itshi yajiya gutukuatesa? Gula tuavuila phangi mumoshi khabu mukunda nu ndaga yatukalegela muene, tudi naye gudihula egi: ‘Mukunda natshi ndaga yakalagala phangi muene idi gungusagesa muavula? Ndaga yene idi mumonesa egi ame nji ngudi nu khadilo dimoshi diabola ngudi naye gusombegesa ba? Yajiya gukhala egi phangi muene watshitshi ngenyi handaga udi mutagana nu ndaga imoshi ya lamba ba? Ikhale ngudi nu gishina gia guvuila khabu, uvi ngajiya gumonesela phangi muene guzumba ha gumutotesela ba?’ Gula tudi mukalegela athu ndaga nu guzumba guagasue, mbatumonesa diago egi tudi Aklisto a giamatshidia.

16. Gifezegeselo gia Yesu gidi gutulongesa luko itshi?

¹⁶ Gifezegeselo gia Yesu gidi gutulongesa nji egi tudi naye gutshita ngolo ha gukotelesa aphangi’etu muabonga. (Ish. 20:5) Yesu wakhalele mujiya ndaga jiakhalele mu mitshima ya athu. Uvi esue tuana jiya ndo. Ikhale ngenyi, tuajiya gumonesa khadilo dia guhuiminyina gula aphangi’etu atukalegela ndaga imoshi yabola. (Ef. 4:1, 2; 1 Phet. 3:8) Gula tudi mujiya aphangi’etu muabonga, mbayishigo mukhala lamba ha guamonesela khadilo dia guhuiminyina. Tutadilenu gifezegeselo gimoshi.

17. Gubonga gutshi guahetele mutadi muwendji mumoshi tangua diakambele muene gujiya phangi mumoshi muabonga?

¹⁷ Mutadi muwendji mumoshi wakhalele mutala mahungu a gu Afrique de l’Est, wakhalele mutangiza egi phangi mumoshi gakhalelego nu gisemo.  Itshi mutadi muwendji muene akalegele? Udi muzuela egi: “Ngatunyilego phangi muene, uvi ngazuelele egi ngudi naye gukamba gumujiya muabonga.” Tangua mutadi muwendji wabalegesele tangua hamoshi nu phangi muene, wamujiyile kiawaha, wakotelesele mukunda natshi phangi muene wakhalele ngenyi. Udi muzuela egi: “Tangua ngakotelesele egi phangi muene wakhalele mutshita ngolo ha gusombegesa makalegelo enji, ngasendesele gumunemesa muavula. Gungima tuabuile mafuta akola.” Gula tudi mutshita ngolo ha gujiya muabonga aphangi’etu a mala nu a akhetu, mbayikhala yaleba ha guazumba.

18. Mihu itshi tuajiya gudihula gula phangi mumoshi watukalegela ndaga yabola? (Ishima 26:20)

¹⁸ Matangua ako gula phangi mumoshi watukalegela ndaga yabola, tuajiya gutangiza egi tudi naye guya gumumona ha gumuwambela gubola guenji. Uvi gutuama dia guya, tudi naye gudihula egi: ‘Ngudi mujiya diago mulonga wene muabonga ba?’ (Ish. 18:13) ‘Phangi muene watshitshi ndaga yene nu matangi abola ba?’ (Mulo. 7:20) ‘Ame nji ngatshitshile gale ndaga ya luholo elu ba?’ (Mulo. 7:21, 22) ‘Gula ngaya mumona phangi muene, ngushigo mubolesa luko ndaga muavula gubalega ba?’ (Tanga Ishima 26:20.) Gula tuazula tangua dia gutangigiza mihu eyi, tuajiya gumona egi tudi naye gubuita mulonga wene mutshima handaga tuana zumba phangi muene.

19. Desizio ditshi wazula?

¹⁹ Matemue a Yehowa ana monesa egi adi Aklisto a giamatshidia handaga ana gudizumba. Uvi muthu wagasue mukatshi dietu wajiya gumonesa egi udi Muklisto wa giamatshidia gula udi muzumba aphangi agasue nu mutshima umoshi ikhale amukalegela ndaga yabola. Gula tudi nu guzumba gua giamatshidia mukatshi dietu, mbayituma athu ako ha gujiya gikombelelo gia giamatshidia nu ha gukombelela Yehowa Nzambi wa guzumba, hamoshi nu esue. Hene tulandulenu gukhala nu guzumba mukatshi dietu handaga guene guana monesa egi tudi Aklisto a giamatshidia.