1. Mvuaji jiana khala nu funu ya gutshita itshi mukunda nu an’awo?

 MVUAJI, tudi mujiya egi mudi diago nu funu ya gukuatesa an’enu ha gujiya Yehowa nu ha gumuzumba. Uvi Nzambi gana monega ndo. Luholo lutshi muajiya gukuatesa an’enu ha gujiya egi Nzambi wakhala diago guene nu ha gukuata n’enji ufuta?​—Yak. 4:8.

2. Luholo lutshi mvuaji jiajiya gulongesa an’awo makalegelo a Yehowa?

² Luholo luabonga lua gukuatesa an’enu ha gukuata ufuta nu Yehowa ludi gualongesa Biblia. (2 Tim. 3:14-17) Uvi Biblia idi mumonesa luholo luko mavuala ajiya gulonguga ndaga jiatadila Yehowa. Mukanda wa Ishima udi muzuelela tata mumoshi udi muhana mun’enji wa yala malongo hagula gajimbilago makalegelo a Yehowa ana monega mu ima yafugile muene. (Ish. 3:19-21) Tuza mumona maluholo mvuaji jiajiya gukalegela ima yafugile Nzambi ha gukuatesa an’awo ha gujiya makalegelo a Yehowa.

3. Luholo lutshi mvuaji jiajiya gukuatesa an’awo?

³ Biblia idi muzuela egi ‘makalegelo a Nzambi anyi ajiyilego gumonewa nu meso, nu ngolo jienji jia ivo nu ivo nu Unzambi wenji yana monega muabonga mu ima yafugile muene.’ (Roma 1:20) Mvuaji, yajiya gukhala egi muana suanguluga gubalegesa tangua hamoshi nu an’enu hanze. Khalenu mukalegela tangua diene ha gukuatesa an’enu ha gumona luholo “ima yafugile Nzambi” yana monesa makalegelo enji. Henyaha tuzuelelenu malongo mvuaji jiajiya guzula mu gifezegeselo gia Yesu.

4. Luholo lutshi Yesu wakalegele ima yafugile Nzambi ha gulongesa alandudi enji? (Luka 12:24, 27-30)

 ⁴ Tutalenu luholo Yesu wakalegele ima yafugile Nzambi ha gulongesa. Lusugu lumoshi wawambelele alandudi enji ha gutala ikuanga nu iyaji. (Tanga Luka 12:24, 27-30.) Ha fundo dia guhana gifezegeselo gia shitu nga gia mutshi uko, Yesu wahanele gifezegeselo gia gikuanga nu iyaji handaga alandudi enji akhalele guyijiya muabonga. Yajiya gukhala egi alandudi a Yesu akhalele mumona luholo ikuanga yakhalele mubalega gosa nu luholo iyaji yakhalele muzoga mu temu. Tangizenu luholo Yesu wakhalele mumiga ikhuanga nu iyaji yene muino hakhalele muene muzuela. Itshi Yesu watshitshile gungima dia guhana gifezegeselo egi? Waalongesele longo dimoshi dia ndando diatadila khadilo dia Yehowa dia guhana nu dia gisemo. Wamonesele egi Yehowa mbawuhana akombeledi enji ima ya gudia nu milele gifua luholo luana disa muene ikhuanga nu luana sudigisa muene iyaji ya mu temu.

5. Ima itshi yafugile Yehowa mvuaji jiajiya gukalegela ha gulongesa an’awo makalegelo enji?

⁵ Mvuaji, luholo lutshi wajiya gulandula gifezegeselo gia Yesu tangua udi mulongesa an’aye? Wajiya guwambela mun’aye gima gimoshi giafugile Yehowa ginyi giana gugusuanguluisa. Yajiya gukhala mutshi nga shitu. Tangua udi gumuwambela, mukotelesele ndaga gima giene gidi gutulongesa mukunda nu Yehowa. Wajiya nji gumuhula ha guguwambela shitu nga mutshi wana zumba muene muavula. Gula udi muzuelela gima giana suanguluisa mun’aye muavula tangua udi gumulongesa ndaga jiatadila Yehowa, mbawugutegelela diago muabonga.

6. Gifezegeselo gia mama wa Christopher gidi gutulongesa itshi?

⁶ Mvuaji jishigo naye guzula tangua diavula dia guya nu gukamba shitu nga mitshi gutuama dia gulongesa an’awo ndaga ima yene idi gualongesa mukunda nu Yehowa. Yesu gakoteleselego alandudi enji ndaga jiavula-vula jiatadila luholo ikuanga yana dia nu luholo iyaji yana gukula. Ikhale mun’enu wana tshigina gujiya ndaga jiavula jiatadila ima yafugile Nzambi, uvi gula muamuwambela najio mu luholo lualeba wajiya gujikotelesa muabonga. Phangi Christopher udi muwunguluga luko ndaga mvuaji jienji jiakhalele mukalagala hakhalele muene mona wazonda. Udi muzuela egi: “Mama wakhalele muzuela ndaga mu luholo lualeba ha gutukuatesa ha gusuanguluga nu ima yafugile Nzambi tuakhalele mumona. Ha gufezegesa, tangua tuakhalele muheta hehi nu mulundu, wakhalele muzuela egi: ‘Talenu mulundu unu, udi waleha, wabonga diago! Yehowa wawufugile mu luholo lua gushimana.’ Gula tuaheta hehi nu muta wakoma, wakhalele muzuela egi: ‘Talenu luholo matshipha-tshipha adi muza nu ngolo jiagasue! Adi mumonesa diago ngolo jia Yehowa.’ Mbimbi jiene jialeba jiakhalele gututuma ha gutangigiza.”

7. Luholo lutshi muajiya gulongesa an’enu ha gutangigiza muavula mukunda nu ima yafugile Nzambi?

⁷ Tangua ana adi mukula, khalenu gualongesa ha gutangigiza muavula ima yafugile Nzambi nu malongo ima yene idi gualongesa mukunda nu Yehowa. Muajiya guzuelela gima gimoshi giafugile Nzambi gungima muhudi an’enu egi: “Gima giene gidi gumilongesa itshi mukunda nu Yehowa?” Muajiya gudihula diago ha gumona luholo an’enu adi muzuela ndaga jiabonga mukunda nu gima giene.​—Mat. 21:16.

8. Ba okazio atshi enya Isalele akhalele nawo tangua akhalele muwenda nu an’awo ‘mu njila’?

⁸ Yehowa wawambelele enya gu Isalele ha gulongesa an’awo mikhuala yenji tangua akhalele muwenda ‘mu njila.’ (Mikh. 11:19) Gula muthu udi muwenda mu njila jia gu Isalele, wajiya gumona shitu nu tunjila nu iyaji ya luholo nu  luholo. Tangua enya Isalele akhalele muwenda nu an’awo mu njila jiene, akhalele muheta ba akazio a guta nawo maga ha guawambela ima yafugile Yehowa. Mangino mvuaji jiana heta nji ba okazio a luholo lumoshi a gukalegela ima yafugile Nzambi ha gulongesa an’awo. Tutadilenu luholo mvuaji jiko jiakalegele ndaga yene.

9. Malongo atshi mvuaji jiajiya guzula mu gifezegeselo gia phangi Punitha nu Katya?

⁹ Mama mumoshi jina dienji Punitha wana jinga mu dimbo dimoshi diakoma gu Inde. Udi muzuela egi: “Tuana heta okazio wa gulongesa an’etu ima yafugile Yehowa tangua tuana tshita vuayaje ha guya mutala enya fami yetu. Ngudi mumona egi an’ami ana kotelesa muabonga ima yafugile Nzambi tangua tuana khala mu vuayaje gubalega tangua tuana khala mu ville.” Mvuaji, jiyenu egi an’enu mbaashigo mujimbila nga hazonda tangua muabalegesele nawo ha fundo dimoshi diabonga. Phangi Katya wa gu Moldavie, udi muzuela egi: “Ngana jimbilago nga hazonda mafundo tuakhalele muya nu mvuaji jiami ha gubalegesa tangua hamoshi tangua ngakhalele mona wazonda. Ngudi guahana mersi avula luholo angulongesele sendese ulenge wami ha gutala ima yafugile Yehowa nu ndaga ima yene idi gungulongesa mukunda nu muene.”

10. Ndaga jitshi mvuaji jiajiya gukalagala gula ashigo nu luholo lua guya fundo diko ha gutala ima yafugile Nzambi? (Tala galuanda “ Ndaga Jiajiya Gukuatesa Mvuaji.”)

¹⁰ Itshi wajiya gutshita gula ushigo nu luholo lua guya fundo diko ha gutala ima yafugile Nzambi? Phangi Amol wa gu Inde udi muzuela egi: “Fundo ngana jinga mvuaji jiana tshita mudimo matangua avula, yana toga gukhala nu makuta avula ha guya fundo diko ha gutala ima ima yafugile Nzambi. Uvi tuajiya guya gu Park nga guzoga hanze ha gumona ima yafugile Yehowa nu guzuelela makalegelo enji.” Gula watala muabonga ha fundo muana jinga, wajiya gumona ima yavula yafugile Nzambi wajiya guwambela an’aye. (Ngi. 104:24) Wajiya gumona tunjila nu tunjinji nu tuyikhululu nu mitshi nga ima iko yavula. Phangi Karina wa gu Allemagne, udi  muzuela egi: “Mama wana zumba iyaji muavula. Tangua ngakhalele mona wazonda, wakhalele gungutalesa nayo fundo diagasue tuakhalele muwenda n’enji.” Mvuaji, muajiya gukalegela video jiavula nu mikanda yana zuelela ima yafugile Nzambi, yana zola ulondegi wa Yehowa ha gulongesa an’enu. Ikhale muana jinga fundo ditshi, muajiya gukuatesa an’enu ha gumona ima yafugile Nzambi. Henyaha tuzuelelenu makalegelo a Yehowa wajiya gulongesa an’aye mu ima yafugile muene.

11. Luholo lutshi mvuaji jiajiya gukuatesa an’awo ha gumona guzumba gua Yehowa?

¹¹ Ha gukuatesa an’aye ha gumona guzumba gua Yehowa, wajiya guawambela luholo shitu jiavula jiana bamba an’awo. (Mat. 23:37) Wajiya guawambela nji ima yabonga ya maluholo agasue yafugile Yehowa inyi tuana suanguluga nawo. Phangi Karina tuazuelela gu thunda, udi muzuela egi: “Tangua tuakhalele muwenda nu mama, wakhalele gunguwambela ha gumagana ha gutala luholo iyaji yagasue yakhala ya gudisha nu iyaji iko nu luholo gubonga gua iyaji yene guana monesa guzumba gua Yehowa. Gungima dia ivo yavula, ngasendesele gutala iyaji, ngakotelesele egi iyaji yagasue yakhalago luholo lumoshi, yakhala nji nu mikubu ya gudisha. Ndaga yene yana gunguwunguluisa uu nu mangino egi Yehowa wana gutuzumba muavula.”

12. Luholo lutshi mvuaji jiajiya gukuatesa an’awo ha gumona ndunge jia Yehowa? (Ngi. 139:14) (Tala nji gifuanesa.)

¹² Kuatesa an’aye ha gumona ndunge jia Nzambi. Yehowa wakhala nu ndunge jiavula gubalega athu agasue. (Roma 11:33) Ha gufezegesa, wajiya guwambela an’aye luholo meya ana kanduga gosa ha gubua matuta nu luholo matuta ana bata meya ene ha fundo diko. (Yobo 38:36, 37) Wajiya nji guawambela luholo muila wa muthu walondewe mu luholo lua gushimana diago. (Tanga Ngimbo 139:14.) Tutalenu luholo tata mumoshi mu jina dia Vladimir wakalegele ndaga yene. Udi muzuela egi: “Lusugu lumoshi mun’etu wa yala wabuile tangua diakhalele muene muwendesa velo, wanamenele. Gungima dia masugu azonda phuta yayile. Ame nu mukaji’ami tuamukuatesele ha gujiya egi Yehowa wafugile muila wetu mu luholo luabonga. Gula muila wanamana, wajiya gudilonda wene hakhenji. Tuamuwambelele egi gushigo nga gima gimoshi gialondele gale muthu giajiya gudilondega  giene hakhenji gula giabola. Ha gufezegesa, gamiyo gajiyilego gudilondega hakhawo gula gatshita aksida. Ndaga yene yakuatesele mun’etu ha gujiya egi Yehowa udi nu ndunge jiavula.”

13. Luholo lutshi mvuaji jiajiya gukuatesa an’awo ha gumona ngolo jia Nzambi? (Yeshaya 40:26)

¹³ Yehowa udi gututoga ha gutala mu dilu nu gutangiza luholo ngolo jienji jia gushimana jiana magenesa themua gosa. (Tanga Yeshaya 40:26.) Wajiya gutoga an’aye ha gutala gosa mu dilu nu gutangigiza ndaga adi mumona. Phangi wa mukhetu Tingting wa gu Taiwan udi muzuela egi: “Tangua ngakhalele mona wazonda, tuakhalele muya nu mama hanze ya dimbo ha gutala themua mu phipha, handaga mu dimbo mienda yakhalele gutukanga njila ya gujimona. Mu tangua diene ngakhalele gudisagesa mukunda nu usageshi ngakhalele mutagana nawo gu khalasa. Ngakhalele gudihula gula ngajiya gusala wagujinginyina gudi Yehowa. Mama wanguwambelele ha gutangiza luholo Yehowa wakalegele ngolo jienji ha gufuga themua jiagasue. Wanguwambelele nji egi Yehowa wajiya gukalegela ngolo jiene ha gungukuatesa ha gubinga usageshi wagasue ngudi mutagana nawo. Gutala ima yafugile Nzambi guangukuatesele ha gumujiya muabonga; guangukuatesele nji ha guzula desizio dia gumukombelela.”

14. Luholo lutshi mvuaji jiajiya gukalegela ima yafugile Nzambi ha gukuatesa an’awo ha gujiya egi Yehowa udi Nzambi wa gusuanguluga?

¹⁴ Ima yafugile Yehowa yana monesa egi muene udi Nzambi wa gusuanguluga, wana tshigina nji egi tukhale nu gusuanguluga. Enya ndunge ana zuela egi shitu jiavula nu tunjila nu jishui jiana kena. (Yobo 40:20) An’aye ana lela tangua ana mona shitu mukena ba? Yajiya gukhala egi amonele gale luholo phombo yana kena nu athu nga luholo tuna tua khombo tuana gudikenesa. Lusugu luko gula mun’aye watala shitu imoshi walela, muwunguluisenu egi tuana kombelela Nzambi wa gusuanguluga.​—1 Tim. 1:11.

15. Itshi yajiya gukuatesa mvuaji ha gujiya ndaga jidi mu mitshima ya an’awo? (Ishima 20:5) (Tala nji gifuanesa.)

¹⁵ Matangua ako, mvuaji jiajiya gumona egi idi lamba ha guta maga nu an’awo mukunda nu ndaga adi mutagana najio. Gula aye nji udi mutagana nu ndaga ya luholo elu, kamba  gujiya ndaga jidi mu mitshima ya an’aye. (Tanga Ishima 20:5.) Mvuaji jiko jiana mona egi yana khala yaleba ha guta maga nu an’awo mukunda nu ndaga adi mutagana najio tangua ana tala nawo hamoshi ima yafugile Nzambi. Mukunda natshi? Handaga mvuaji jiana balegesago tangua diavula nu an’awo hamoshi. Tata mumoshi mu jina dia Masahiko gu Taiwan udi muzuela egi: “An’etu ana gudivua diago muabonga tangua tuana balegesa nawo tangua ha gukanduga milundu nu ha guwenda hehi nu mita. Gutshita ngenyi guana gutukuatesa ha guta nawo maga nu ha gujiya ndaga jidi mu mitshima yawo.” Phangi Katya tuazuelela gu thunda, udi muzuela egi: “Tuakhalele muya nu mama mutala park imoshi yabonga gula ngakatuga gu khalasa. Ha tuakhalele mubalegesa n’enji tangua hamoshi, yakhalelego lamba gudi ame ha gumuwambela ndaga ngatagana najio gu khalasa nu ndaga jidi gungusagesa.”

16. Itshi enya fami ajiya gutshita ha gubalegesa tangua nu gusuanguluga tangua adi mutala ima yafugile Nzambi?

¹⁶ Gula mvuaji jidi mubalegesa tangua hamoshi nu an’awo mu fami ha gutala ima yafugile Yehowa, mbaakhala nu gusuanguluga guavuala. Gutshita ngenyi mbaguakuatesa nji ha gukhala nu guzumba mukatshi diawo. Biblia idi muzuela egi gudi nu ‘tangua dia gulela nu tangua dia gukina ulumbu.’ (Mulo. 3:1, 4,) Yehowa wafugile mafundo abonga ha mavu anyi tuajiya gutshita ndaga tuana zumba. Fami jiavula jiana tshigina gubalesa tangua hamoshi ha gutala ima yafugile Nzambi mu gishitu, mu milundu, mu temu, nga mu mita. Ana ako ana tshigina guya mukena gu park ha gutala shitu, nga ha guya muzua meya mu muta. Tudi diago nu ba okazio avula a gutala ima yafugile Yehowa!

17. Mukunda natshi mvuaji jidi naye gukuatesa an’awo ha gusuanguluga nu ima yafugile Yehowa?

¹⁷ Mu mavu ahe-ahe mvuaji mbajibalegesa tangua diavula nu an’awo ha gutala ima yafugile Yehowa gubalega mangino. Mu tangua diene, mbatushigo mukhala luko nu woma wa shitu; jiene nji mbajishigo mukhala gutuvila woma. (Yesh. 11:6-9) Mbatukhala nu gusuanguluga ha gutala ima yafugile Yehowa mayilago. (Ngi. 22:26) Uvi mvuaji jishigo naye gunengenena mavu ahe-ahe ha gukuatesa an’awo ha gusuanguluga nu ima yafugile Yehowa. Gula mudi mukalegela ima yene ha gulongesa an’enu makalegelo enji, ene nji mbaazuela gifua muazuelele Fumu Davidi egi: ‘O Yehowa, gushigo nu muthu muko wajiya gutshita ndaga gifua aye.’​—Ngi. 86:8.