1-2. Mukunda natshi ushigo naye guleba muila gula ushigo hehi ha gubatijiwa? (Tala gifuanesa holu dia gizula.)

 GULA wakhala nu matangi a gubatijiwa jiya egi adi matangi abonga diago. Uvi wadilondega gale ha gubatijiwa ba? Gula wazula desizio dia gubatijiwa, akulu nji atshigina egi ubatijiwe, uvigo woma ha guyitshita. Gula watshita ngenyi mbawukhala nu gusuanguluga guavula mu mudimo wa Yehowa.

² Uvi yajiya nji gukhala egi aguwambela egi udi naye gusombegesa ndaga jiko gutuama dia gubatijiwa. Nga ndo aye hakhaye wakotelesele egi gudi nu ndaga udi naye gusombegesa. Gula idi ngenyi, ulebigo muila. Ikhale udi muvuala nga muthu wa gukola wajiya gutshita ngolo ha gukula mu nyuma nu ha gubatijiwa.

3. Muhu utshi muenya gu Etiopi wahudile Filiphi? Ndaga yene idi gututuma ha gudihula egi tshi? (Makal. 8:36, 38)

³ Tanga Makalegelo 8:36, 38. Muenya gu Etiopi wahudile mulongeshi Filiphi egi: “Itshi idi gungukanga njila ha gubatijiwa?” Muthu muene wakhalele mutshigina gubatijiwa, uvi wakhalele diago ya gudilondega ha gubatijiwa ba?

4. Luholo lutshi muenya gu Etiopi wamonesele egi wakhalele nu funu ya gujiya ndaga jiavula?

⁴ Muenya gu Etiopi “wayile gu Yelusalema ha gukombelela.” (Makal. 8:27) Idi naye gukhala egi watshiginyile gikombelelo gia enya Yuda. Yajiya gukhala egi walongugile ndaga jiatadila Yehowa mu Mbimbi ya Nzambi yasonegewe mu Hebelu. Uvi wakhalele mutshigina gujiya ndaga jiavula. Tangua Filiphi wataganele nu muthu muene mu njila, wamumonele mutanga rulo ya profete Yeshaya. (Makal. 8:28) Ndaga jiakhalele mutanga muene jiakhalele giamatshidia gia ndando giana khala mu Biblia. Muthu muene gakhalelego mutshigina gujiya phamba ndaga jiazonda, uvi  wakhalele nu funu ya gujiya ndaga jiavula mu Mbimbi ya Nzambi.

5. Luholo lutshi muenya gu Etiopi wakalegele ndaga jiakhalele mulonguga muene?

⁵ Muenya gu Etiopi wakhalele nu ufumu wavula, “wakhalele mukalagala mudimo gumbo dia Kandake, fumu-mukhetu wa gu Etiopi. Wakhalele nji mutala umonyi wagasue wa fumu muene” (Makal. 8:27) Idi naye gukhala egi wakhalele nu inemo yavula ya gutagenesa. Uvi wazudile tangua dia guya mukombelela Yehowa. Muthu muene gakhalelego musuanguluga phamba ha gulonguga giamatshidia, uvi wakhalele nji mukalegela ndaga jiakhalele mulonguga muene. Gishina giene, wakatugile gu Etiopi, watshitshile vuayaje yaleha ha guya mukombelela Yehowa mu tempelo gu Yelusalema. Idi naye gukhala egi vuayaje yene yamuzudile tangua nu mbongo jiavula. Uvi watshitshile ngolo ha guya mukombelela Yehowa.

6-7. Luholo lutshi muenya gu Etiopi walanduile guzumba Yehowa muavula?

⁶ Muenya gu Etiopi walogugile ndaga jiko jihe-jihe gudi Filiphi. Wajiyile egi Yesu wakhalele Masiya. (Makal. 8:34, 35) Idi naye gukhala egi wasuangulugile tangua wajiyile ndaga Yesu wakalegele mukunda nu muene. Itshi muthu muene wakalegele? Wakhalele naye gulandula gunemesa malongo a enya Yuda gifua luholo luakhalele muene mutshita thomo. Uvi wasendesele guzumba Yehowa nu Yesu muavula. Wazudile desizio dia ndando dia gubatijiwa ha gubua mulandudi wa Yesu Klisto. Tangua diamonele Filiphi egi muthu muene wakhalele hehi ha gubatijiwa, wamubatijile.

⁷ Aye nji wajiya gudilondega ha gubatijiwa gula walandula gifezegeselo gia muenya gu Etiopi. Gula watshita ngenyi, wajiya guzuela nu gikhesa giagasue egi: “Itshi idi gungukanga njila ha gubatijiwa?” Tutalenu luholo wajiya gulandula gifezegeselo gia muenya gu Etiopi. Wakhalele mulonguga nu gukalegela ndaga jiakhalele mulonguga muene. Walanduile guzumba Nzambi.

8. Yone 17:3 idi muzuela egi udi naye gutshita itshi?

⁸ Tanga Yone 17:3. Mbimbi eji jia Yesu jiene jiagutumile ha gusendesa gulonguga Biblia ba? Jiakuatesele nji athu avula mukatshi dietu ha gusendesa gulonguga Biblia. Mbimbi jiene jidi mumonesa nji egi tudi naye gulandula gulonguga. Mbatuladula gulonguga ‘ha gujiya . . . Nzambi mumoshi wa giamatshidia.’ (Mulo. 3:11) Mbatulandula gulonguga ndaga jiatadila Nzambi mayilago. Gula tudi mulonguga muavula mbatusuena hehi nu Yehowa.​—Ngi. 73:28.

9. Itshi tudi naye gutshita gula tualonguga malongo aleba adi mu Biblia?

⁹ Tangua tuana sendesa gulongua ndaga jiatadila Yehowa, tuana longuga phamba ndaga jialeba jiana khala mu Biblia. Mupostolo  Phaula watamegele ndaga jiene mu mukanda wa Hebelu egi “malongo aleba.” Gazuelelego egi “malongo a thomo” akhalelego nu ndando, uvi wazuelele egi malongo ene akhalele gifua mele ana gunua mona wa gitebe. (Heb. 5:12; 6:1) Wawambelele Aklisto agasue ha gubemba malongo ene a gisendeselo ha gulonguga giamatshidia gia ndando giakhalele mu Mbimbi ya Nzambi. Wana tshigina gulonguga ndaga jiavula jiana khala mu Biblia? Udi mutshigina gulandula gukula mu nyuma ba? Udi mutshigina gulonguga ndaga jiatadila Yehowa nu mafelela enji ba?

10. Mukunda natshi yanago gukhala yaleba gudi athu ako ha gulonguga?

¹⁰ Athu avula ana mona egi ishigo ndaga yaleba ha gulonguga. Aye nji wana tangiza ngenyi ba? Yajiya gukhala egi gu khalasa wakhalelego nu khadilo dia gutanga nu dia gulonguga muabonga. Yajiya gukhala nji egi wakhalelego musuaguluga gutanga nu gukamba gujiya ndaga jiavula. Nga ndo yajiya gukhala egi wakhalele mutangiza egi aye diago wajiyilego gulonguga mikanda. Gula idi ngenyi, ushigo hakhaye. Uvi Yehowa wajiya gugukuatesa, handaga udi muthu watagana. Udi nji Mulongeshi wabalega alongeshi agasue.

11. Luholo lutshi Yehowa wana monesa egi udi “Mulongeshi Wakoma”?

¹¹ Yehowa udi muzuela egi udi “Mulongeshi waye Wakoma.” (Yesh. 30:20, 21) Wana khala nu khadilo dia guhuiminyina nu gisemo. Wana gutukotelesa nji muabonga. Wana mona ndaga jiabonga tuajiya gukalagala. (Ngi. 130:3) Yehowa ganago gututoga ha gutshita ndaga jinyi tuajiyilego gukalagala. Ujimbilago egi Yehowa waguhanele wongo khapho dimoshi dia ndando. (Ngi. 139:14) Tuana khala nu nzala yakola ya gulonguga. Mufugi wetu wana tshigina egi tulandule gulonguga mayilago, tusuanguluge nji nu ndaga tudi mulonguga. Hene idi nu ndando egi tukhale nu “nzala yakola” ya giamatshidia gidi mu Biblia sendese mangino. (1 Phet. 2:2) Khala gudishila mafelela anyi wajiya gutagenesa, khala nji mutanga nu gulonguga Biblia lusugu nu lusugu. (Yosh. 1:8) Yehowa mbawugukuatesa ha gusuanguluga nu ndaga udi mutanga. Mbawugukuatesa nji ha gulonguga muavula ndaga jiamutadila.

12. Mukunda natshi tudi naye gulonguga ndaga jiakalegele Yesu?

¹² Khala muzula tangua dia gutangigiza ndaga jiakalegele Yesu tangua diakhalele muene ha mavu nu luholo luakhalele muene mukalagala mudimo wa gulongesa. Idi nu ndando egi tulandule mubonga gifezegeselo gia Yesu, gula tudi mutshigina gukombelela Yehowa mu tangua edi dia lamba. (1 Phet. 2:21) Yesu wawambelele alandudi enji egi mbaatagana nu malamba. (Luka 14:27, 28) Uvi wakhalele mujiya egi alandudi enji a giamatshidia ajiya gusala yagujinginyina gudi Nzambi gifua muene. (Yone 16:33) Khala mulonguga ndaga jiakalegele Yesu tangua diakhalele muene ha mavu, zula nji desizio dia gulandula gifezegeselo gienji lusugu nu lusugu.

13. Itshi tudi naye gutoga Yehowa mu gisambu? Mukunda natshi?

¹³ Uvi tushigo naye gusuga phamba ha gulonguga. Tuana longuga ha gujiya ndaga jiavula jiatadila Yehowa nu gukudisa makalegelo gifua gumuzumba nu gumonesa gutshigina gudi muene. (1 Kol. 8:1-3) Tangua udi mulonguga khala mutoga Yehowa ha guguhana gutshigina guavula. (Luka 17:5) Yehowa wana hana mvutu gu isambu ya luholo elu. Gula tudi mulonguga ha gujiya ndaga jiatadila Nzambi gutshigina guetu mbagukola. Ngenyi mbayitukuatesa ha gukula mu nyuma.​—Yak. 2:26.

14. Luholo lutshi mupostolo Phetelo wamonesele egi idi nu ndando ha gukalegela ndaga tudi mulonguga? (Talal nji gifuanesa.)

¹⁴ Mupostolo Phetelo wamonesele egi idi nu ndando yavula egi alandudi a Klisto alandule gukalegela  ndaga adi mulonguga. Wazuelediele nji lumene lua Nowa ludi mu Biblia. Yehowa wawambelele Nowa egi mbawunogesa mvula ha gushiya athu abola akhalele mujinga mu tangua diene. Gujiya egi Yehowa wakhalele mutshigina gunogesa mvula, guakhalelego naye guhuluisa Nowa nu enya Fami yenji. Uvi Phetelo wazuelele ndaga jiakalegele Nowa gutuama egi mvula yakola inoge “hakhalele mutungiwa masuwa.” (1 Phet. 3:20) Nowa nu fami yenji atungile masuwa ha gutumagela ndaga jiazuelele Nzambi. (Heb. 11:7) Phetelo wafuanesele ndaga jiakalegele Nowa nu gubatijiwa, wasonegele egi: “Ndaga eyi idi gifuanesa gia gubatijiwa gudi gumihuluisa luenyelu.” (1 Phet. 3:21) Tuajiya gufuanesa ndaga udi mutshita lunyelu ha gudilondega mukunda nu gubatijiwa nu mudimo wakalegele Nowa nu enya fami yenji ivo yavula ha gutunga masuwa. Ndaga tshi udi naye gutshita ha gudilondega ha gubatijiwa?

15. Luholo lutshi tuajiya gumonesa egi tuabalumuna diago mutshima?

¹⁵ Ndaga ya thomo tudi naye gutshita idi gubalumuna mutshima mu gubola guetu. (Makal. 2:37, 38) Gula tuabalumuna diago mutshima wetu mbayitukuatesa ha gusombegesa makalegelo etu. Wabembele gale ndaga jiabola jianago gusuanguluisa Yehowa gifua gutshita uthambi, gunua makaya nga guzuela ndaga jia musonyi? (1 Kol. 6:9, 10; 2 Kol. 7:1; Ef. 4:29) Gula khenji ubembele galego makalegelo ene tshita ngolo ha gusombegesa. Toga ukhuateshi gudi muthu wana gugulongesa Biblia nu gudi akulu a mu hungu. Gula udi muvuala, wana jinga inzo imoshi nu mvuaji jiaye khala guatoga ukuateshi hagula wajiya gubemba makalegelo abola anyi ajiya gugukanga njila ha gubatijiwa.

16. Itshi tudi naye gutshita gula tudi mutshigina gukombelela Yehowa muavula?

¹⁶ Idi nji nu ndando ha gulandula gutshita ndaga jia mu nyuma, gifua guya mu gudibungisa gua mu hungu nu guhana ba komantere. (Heb. 10:24, 25) Gula watagenesa ndaga jiana togewa ha gusendesa gulongesa lukuma luabonga, tshita ngolo ha gulongesa muavula. Gula udi gudihana muavula mu mudimo wa gulongesa mbawusuanguluga diago nu mudimo wene. (2 Tim. 4:5) Gula udi muvuala, wana jinga inzo imoshi nu mvuaji jiaye dihule egi: ‘Mvuaji jiami jiana gungushinjiga ha guya mu gudibungisa nga mu mudimo wa gulongesa ba? Nga ame hakhami ngana guyitshita?’ Gula udi mushita ngenyi  mbawumonesa egi udi nu gutshigina, wana zumba Yehowa Nzambi nu wana gumuhana mersi mukunda nu ima yagasue yabonga yaguhanele muene. Gukhala “yagujinginyina gudi Nzambi” gudi khapho diabonga wajiya gumuhana. (2 Phet. 3:11; Heb. 13:15) Nzambi wana suanguluga nu ima yagasue tuana gumuhana nu mutshima umoshi. (Fuanesa nu 2 Kolinto 9:7.) Tuana tshita ngenyi handaga tuana suanguluga tangua tuana hana Yehowa ima yetu yabonga.

17-18. Khadilo ditshi mbadigukuatesa ha gukula mu nyuma nu gubatijiwa? Mukunda natshi? (Ishima 3:3-6)

¹⁷ Jiya egi tangua udi gudilondega ha gubatijiwa mbawutagana nji nu malamba. Athu ako ajiya gugusegulula nga gugusagesa mukunda nu gutshigina guaye. (2 Tim. 3:12) Yajiya gukhala egi udi mutshita ngolo ha gubemba khadilo dimoshi diabola, uvi matangua ako wasendesa guvutugile luko khadilo diene. Matangua ako wajiya gutotesa khadilo dia guhuiminyina nga guvua khabu handaga ushigo mutagenesa felela diaye. Itshi yajiya gugukuatesa ha gukolesela? Idi guzumba guaye gudi Yehowa.

¹⁸ Guzumba guaye gudi Yehowa gudi diago khadilo diabonga. (Tanga Ishima 3:3-6.) Guzumba Nzambi muavula guajiya gutukuatesa ha gukolesela gula tuatagana nu malamba. Matangua avula Biblia yana zuela egi, Yehowa wana zumba akombeledi enji muavula. Idi mukotelesa egi gajiyilego gubemba akombeledi enji nga hazonda. (Ngi. 100:5) Aye wafugiwe mu gifuanesa gia Nzambi. (Gis. 1:26) Luholo lutshi wajiya gulandula guzumba gua Yehowa?

19. Luholo lutshi wajiya guhana Yehowa mersi mukunda nu ndaga jiagasue jia gukalegele muene? (Galatiya 2:20)

¹⁹ Khala muhana Nzambi mersi. (1 Tes. 5:18) Khala gudihula lusugu nu lusugu egi: ‘Luholo lutshi Yehowa wangumonesela guzumba?’ Tangua udi mutshita gisambu, khala muhana Yehowa mersi. Khala nji gumuwambela ndaga jinyi udi mutshigina egi agukalegele. Khala mujiya egi Yehowa wana gugukalegela ndaga jiabonga handaga wana guguzumba, gifua luholo mupostolo Phaula wayikotelesele. (Tanga Galatiya 2:20.) Dihule egi: ‘Ame nji nganatshigina gumonesa egi ngana zumba Yehowa ba?’ Gula tudi muzumba Yehowa mbayitukuatesa ha gukolesela gula tualolewa nga gula tuatagana nu malamba. Mbayigukuatesa ha gukombelela Yehowa muavula nu ha gumonesa egi wana gumuzumba lusugu nu lusugu.

20. Itshi udi naye gutshita ha guhana monyo waye gudi Yehowa? Mukunda natshi desizio diene didi nu ndando?

²⁰ Guzumba guaye gudi Yehowa mbagugutuma  ha gutshita gisambu gimoshi gia ndando yavula. Mbawudihana gudi Nzambi. Jiya egi gula wadihana gudi Yehowa mbawuheta felela dimoshi dia ndando dia gujinga mayilago. Gula wahana monyo waye gudi Yehowa idi mukotelesa egi wamulaya egi mbawumukombelela ikhale mu tangua dia gusuanguluga nga mu tangua dia lamba. Mbawukhadigo luko nu tangua dia gusombegesa ndaga wamulayele. Idi ya diago egi gula wadihana gudi Nzambi wazula desizio dimoshi diakoma. Jiya egi mbawuzula ba desizio avula mu monyo waye, ako mbaakhala abonga diago. Uvi gushigo nga desizio dimoshi mbadikhala diabonga gubalega desizio gudihana gudi Yehowa. (Ngi. 50:14) Satana wana tshigina gubolesa guzumba guaye gudi Tata waye wa mu dilu hagula usadigo yagujinginyina gudi muene. Umubembelago tangua! (Yobo 27:5) Guzumba guaye gudi Yehowa mbagugukuatesa ha gutagenesa laji wahanele egi mbawumukombelela mayilago. Mbagugukuatesa nji ha gukhala nu ufuta wakola nu Sh’aye wa mu dilu.

21. Mukunda natshi tudi muzuela egi gubatijiwa gushigo gisugishilo uvi gudi gisendeselo?

²¹ Gula wadihanyi gale gudi Yehowa, wambela akulu a mu hungu dienu egi udi mutshigina gubatijiwa. Jiya egi gubatijiwa gushigo gisugishilo, uvi gudi gisendeselo gia gukombelela Yehowa mayilago. Hene, khala mukudisa guzumba guaye gudi Yehowa sendese mangino. Khala gudishila mafelela ajiya gugukuatesa ha gukudisa guzumba guaye gudi Yehowa lusugu nu lusugu. Gutshita ngenyi mbagugutuma ha guzula desizio dia gubatijiwa. Lusugu luaye lua gubatijiwa mbalukhala diago lusugu lua gusuanguluga. Uvi mbawukhala nu ndaga jiko jiavula jia gutshita. Tudi mutshigina egi guzumba guaye gudi Yehowa nu gudi Mun’enji gulandule gukula mayilago!