LONGO DIA 10
Mukunda Natshi Udi Naye Gubatijiwa?
“Muthu wagasue mukatshi dienu abatijiwe.”—MAKAL. 2:38.
LUNGIMBO 34 Je marcherai dans mon intégrité
NDAGA JIDI MU LONGO EDI a
1-2. Ndaga jitshi jiana kalegewa tangua athu ana batijiwa? Itshi tuza muzuelela mu longo edi?
WAMONELE gale athu adi mutshigina gubatijiwa gu asamble ba? Gula idi ngenyi, wana vua luholo ana hana mvutu nu gikhesa giagasue gu mihu mbadi yana guahudiwa gutuama egi abatijiwe. Wana mona nji luholo enya fami jiawo nu mafut’awo ana khala nu gusuanguluga guavula diago. Tangua muthu udi mubatijiwa wana zoga mu meya, wana mona luholo athu ana gumubundila mago nu luholo muthu muene wana khala nu gusuanguluga. Phoso nu phoso athu avula ana gudihana gudi Yehowa nu ana gubatijiwa ha gubua Matemue a Yehowa.
2 Aye giwa wabatijiwe gale ba? Gula udi mutshigina gubatijiwa, jiya egi udi nu ndando yavula ha mavu awa a Satana handaga udi ‘mukamba Yehowa.’ (Ngi. 14:1, 2) Longo edi diasonegewa mukunda nu aye udi mutshigina gubatijiwa, ikhale udi muvuala nga muthu wa gukula. Uvi diza nji mukuatesa athu abatijiwe gale ha gukolesa nzala yawo ya gukombelela Yehowa ivo nu ivo. Gudi nu ndaga jiavula jiana gututuma ha gukombelela Yehowa, uvi tuzuelelenu ndaga thathu mukatshi dia ndaga jiene.
WANA ZUMBA GIAMATSHIDIA NU NDAGA JIABONGA
Satana wana shingisa gale jina dia Nzambi sendese mualeha, udi mulandula guyikalagala uu nu mangino (Tala paragrafe 3-4)
3. Mukunda natshi akombeledi a Yehowa ana zumba ndaga jiabonga nu jia giamatshidia? (Ngimbo 119:128, 163)
3 Yehowa wawambelele akombeledi enji ha ‘guzumba giamatshidia.’ (Zak. 8:19) Yesu wawambelele alandudi enji ha gulandula gutshita ndaga jiabonga. (Mat. 5:6) Idi mukotelesa egi ndaga jiagasue jiana zuela Nzambi jiana khala jiabonga, jiatagana nu jiaphelegeta gu meso enji. Wana zumba ndaga jiabonga nu jia giamatshidia ba? Tudi nu gutshigina egi wana gujizumba. Wana tuna mambo nu ndaga jiagasue jiabola. (Tanga Ngimbo 119:128, 163.) Muthu udi mumba mambo wana landula gifezegeselo gia Satana fumi’a mavu awa. (Yone 8:44; 12:31) Satana wana tshigina gushingisa jina dia gijila dia Yehowa Nzambi. Wasendesele gale gumbila Nzambi mambo sendese mu dihia dia Edene. Watumile athu ha gutangiza egi, Nzambi wana kamba phamba gubonga guenji hakhenji, gashigo Fumu wabonga, wana tshigina egi athu amone malamba. (Gis. 3:1, 4, 5) Mambo a Satana ana tuma athu ha gutangiza ndaga jiabola mukunda nu Yehowa. Gula athu atuna “guzumba giamatshidia” Satana wajiya guatuma ha gutshita ndaga jiabola jia maluholo agasue.—Roma 1:25-31.
4. Luholo lutshi Yehowa wamonesele egi udi “Nzambi wa giamatshidia”? (Tala nji gifuanesa.)
4 Yehowa udi “Nzambi wa giamatshidia” wana longesa giamatshidia giene gudi athu agasue ana gumuzumba. (Ngi. 31:5) Ngenyi wana guakuatesa hagula ahuigiwago gudi Satana. Yehowa wana kuatesa nji akombeledi enji ha guzuela giamatshidia nu gutshita ndaga jiabonga. Gutshita ngenyi guana guakuatesa ha gudinemesa mukatshi diawo nu ha gukhala mu guhuima. (Ish. 13:5, 6) Yehowa wa gukalegele nji ndaga eji tangua wakhalele mulonguga Biblia ba? Walongugile egi ndaga jiagasue jiana tshita Yehowa jiana khala mukunda nu gubonga guaye nu mukunda nu gubonga gua athu agasue. (Ngi. 77:13) Gishina giene, aye nji udi mutshigina gutshita ndaga jiabonga gu meso a Nzambi. (Mat. 6:33) Udi nji mutshigina gulongesa athu ako giamatshidia ha gumonesa egi ndaga Satana wana zuela mukunda nu Yehowa Nzambi wetu jidi jia mambo. Luholo lutshi wajiya guyitshita?
5. Luholo lutshi wajiya gumonesa egi wana zumba ndaga jiabonga nu jia giamatshidia?
5 Wajiya gumonesa mu ndaga udi mutshita mu monyo waye egi udi mutuna mambo a Satana nu udi mutshigina giamatshidia. Wajiya nji gumonesa mu makalegelo aye egi udi mutshigina egi Yehowa agutuameze; udi nji mutshigina egi ndaga jiagasue jiana zuela muene jidi jiatagana. Luholo lutshi wajiya guyitshita? Dihane gudi Yehowa mu gisambu, muwambela egi udi mutshigina gumukalegela monyo waye wagasue. Gungima udi naye gubadijiwa ha gumonesa gudi athu agasue egi wadihanyi gale gudi Yehowa. Gula udi muzumba ndaga jiabonga nu jia giamatshidia mbayigukuatesa ha guzula desizio diabonga dia gubatijiwa.
WANA ZUMBA YESU KLISTO
6. Ndaga jitshi jidi mu mukanda wa Ngimbo 45:4 jidi gugutuma ha guzumba Yesu Klisto?
6 Mukunda natshi wana zumba Yesu Klisto? Tala ndaga jiabonga jiana gututuma ha guzumba Yesu jidi mu Ngimbo 45:4. (Tanga.) Yesu wana zumba ndaga jiabonga nu jia giamatshidia, wana khala nji nu khadilo dia gudibulumuisa. Gula aye nji wana zumba giamatshidia nu ndaga jiabonga, idi mumonesa egi wana zumba nji Yesu Klisto. Tangiza luholo Yesu walongesele giamatshidia nu ndaga jiabonga nu gikhesa giagasue. (Yone 18:37) Luholo lutshi Yesu wana monesa egi wana khala nu khadilo dia gudibulumuisa?
7. Ndaga itshi yana gugusuanguluisa mu khadilo dia gudibulumuisa dia Yesu?
7 Yesu wana monesa khadilo dia gudibulumuisa mu ndaga jiana tshita muene. Ha gufezegesa, wana hana lutumbu luagasue gudi Sh’enji. (Mako 10:17, 18; Yone 5:19) Wana gudivua luholo lutshi tangua wana mona khadilo dia gudibulumuisa dia Yesu? Ndaga yene yana gugutuma ha guzumba Mun’a Nzambi nu ha gulandula gifezegeselo gienji? Mukunda natshi Yesu wana khala nu khadilo dia gudibulumuisa? Handaga wana zumba Sh’enji nu wana landula khadilo dienji dia gudibulumuisa. (Ngi. 18:35; Heb. 1:3) Wana zumba Yesu handaga muene wana landula muabonga makalegelo a Yehowa.
8. Mukunda natshi tuana zumba Fumu wetu Yesu?
8 Tuana zumba Fumu wetu Yesu, handaga udi Mutuameji wabalega gubonga. Yehowa muene hakhenji wamuhanele formasio nu wamutombele ha gutuameza. (Yesh. 50:4, 5) Tangiza nji luholo Yesu wamonesele egi wana gutuzumba. (Yone 13:1) Tudi naye guzumba Yesu handaga udi Fumu wetu. Wana tamega athu agasue ana gumuzumba egi mafut’enji. Athu ene ana monesa egi ana gumuzumba tangua ana tumagela mikhuala yenji. (Yone 14:15; 15:14, 15) Gukhala futa dia mun’a Nzambi gudi diago luendu luakoma!
9. Mu luholo lutshi gubatijiwa gua Aklisto gudi luholo lumoshi nu gua Klisto?
9 Yesu wahanele mukhuala egi alandudi enji adi naye gubatijiwa. (Mat. 28:19, 20) Muene hakhenji watuhanele gifezegeselo. Gubatijiwa guenji gudi gua gudisha nu gua alandudi enji. (Tala galuanda “ Gudisha Gudi Mukatshi dia Gubatijiwa gua Yesu nu gua Alandudi Enji.”) Uvi gubatijiwa gua Yesu gudi nji luholo lumoshi nu gua alandudi enji mu luholo luko. Luholo lutshi? Tangua Yesu wabatijiwe wadihanele gudi Yehowa ha gutshita gutshigina guenji. (Heb. 10:7) Luholo lumoshi nji, tangua alandudi a Klisto ana batijiwa ana monesa ha meso a athu avula egi adihanyi gudi Yehowa ha gumukalegela monyo wawo wagasue. Ana gudihana muavula ha gutshita gutshigina gua Yehowa. Ana landula gifezegeselo gia Fumu wawo Yesu.
10. Mu luholo lutshi guzumba Yesu guajiya gugutuma ha gubatijiwa?
10 Wana tshigina egi Yesu udi Mona mumoshi ha mumoshi wa Nzambi, muene Yehowa watombele ha gututuameza. Wana jiya egi Yesu wana khala nu khadilo dia gudibulumuisa; wana landula nji muabonga gifezegeselo gia Sh’enji. Walogugile egi Yesu wahanele ima ya gudia gudi athu akhalele nu nzala, wakolesele athu akhalele a guleba muila, wasagele nji athu akhalele nu misongo. (Mat. 14:14-21) Wana mona nji luholo Yesu wana tuameza hungu dienji mangino. (Mat. 23:10) Wana jiya nji egi Yesu mbawutshita ndaga jiavula jiabonga mu Ufumu wa Nzambi. Luholo lutshi wajiya gumonesa egi wana gumuzumba? Gula udi mulandula gifezegeselo gienji. (Yone 14:21) Wajiya gumonesa egi udi mulandula gifezegeselo gienji, gula wadihana gudi Yehowa nu wazula desizio dia gubatijiwa.
WANA ZUMBA YEHOWA NZAMBI
11. Ndaga itshi yabalega ndando idi naye gugutuma ha gubatijiwa? Mukunda natshi?
11 Ndaga itshi yabalega ndando idi naye gugutuma ha gubatijiwa? Yesu wamonesele mukhuala wabalega gukoma wa Nzambi hazuelele muene egi: “Zumba Yehowa Nzambi waye nu mutshima waye wagasue nu monyo waye wagasue nu matangi aye agasue nu ngolo jiaye jiagasue.” (Mako 12:30) Gula watshita ndaga eji mbawumonesa diago egi wana zumba Nzambi muavula.
Yehowa wana gutuhana ima yagasue yabonga tuana suanguluga nayo mangino. Mbawutuhana nji ima yabonga mu masugu adi muza (Tala paragrafe 12-13)
12. Mukunda natshi wana zumba Yehowa? (Tala nji gifuanesa.)
12 Gudi nu ndaga jiavula jiana gugutuma ha guzumba Yehowa. Ha gufezegesa wakotelesele egi ‘Yehowa wafugile monyo,’ muene udi muhanyi wa “khapho diagasue diabonga nu gima giagasue giatagana.” (Ngi. 36:9; Yak. 1:17) Ima yagasue yabonga wana suanguluga nawo, yana katuga gudi Nzambi wetu wa guzumba.
13. Mukunda natshi tudi muzuela egi gibawu gidi khapho diabonga?
13 Gibawu gidi khapho diabonga diatuhanele Yehowa. Mukunda natshi? Tangiza ufuta Yehowa nu Mun’enji ana khala nawo. Yesu wazuelele egi: “Tata wana gunguzumba,” ame nji “ngana zumba Tata.” (Yone 10:17; 14:31) Ufuta wawo wakolele diago tangua abalegesele ivo yavula hamoshi. (Ish. 8:22, 23, 30) Henyaha tangiza luholo Nzambi wavuile lamba gu mutshima hatshiginyile muene egi Mun’enji amone lamba nu afue. Yehowa wana guguzumba, wana zumba nji athu agasue. Gishina giene wahanele mun’enji wa guzumba gifua mulambu hagula aye nu athu ako mujinge mayilago. (Yone 3:16; Gal. 2:20) Ndaga yene idi naye gututuma ha guzumba Nzambi.
14. Desizio ditshi diabonga wajiya guzula mu monyo waye?
14 Wasendesele guzumba Yehowa tangua walongugile ndaga jiavula jiamutadila. Yadiago udi mutshigina gukuata ufuta n’enji mayilago. Wajiya diago guyitshita. Udi gungutoga ha gusuanguluisa mutshima wenji. (Ish. 23:15, 16) Tushigo naye guyizuela phamba gu mbimbi, uvi tudi naye guyimonesa mu makalegelo etu. Ndaga wana kalagala mu monyo waye mbajimonesa diago gula wana zumba Yehowa. (1 Yone 5:3) Diene desizio diabonga wajiya guzula mu monyo waye.
15. Luholo lutshi wajiya gumonesa egi wana zumba Yehowa?
15 Luholo lutshi wajiya gumonesa egi wana zumba Yehowa? Thomo, udi naye gutshita gisambu gimoshi gia ndando gidi mumonesa egi wadihanyi diago gudi Nzambi wa giamatshidia. (Ngi. 40:8) Gungima, udi naye gubatijiwa ha meso a athu agasue ha gumonesa egi wadihanyi gudi Nzambi. Gifua luholo tuayimonyi gu thunda, gubatijiwa guaye mbagusuanguluisa athu avula, mbagukhala nji ndaga ya gubalega ndando mu monyo waye. Mbawukalagalago luko ndaga ha gudisuanguluisa, uvi mbawusendesa gusuanguluisa Yehowa. (Roma 14:8; 1 Phet. 4:1, 2) Wajiya gutangiza egi didi diago desizio diakoma ha guzula, ayi idi ngenyi. Uvi desizio diene mbadigukuatesa hagukhala nu gusuanguluga mu monyo waye. Luholo lutshi?
16. Ngimbo 41:12 idi muzuela egi Yehowa mbawutshita itshi gudi athu ana gumukombelela?
16 Yehowa wakhala wahana gubalega athu agasue. Jiya egi muene mbawuguhana ima yavula gubalega gima giagasue wajiya gumuhana mangino. (Mako 10:29, 30) Mbawugukuatesa ha gukhala nu gusuanguluga guavula ha mavu awa abola nu mu masugu adi muza. Uvi guahuilego, gula wabatijiwa mbawuheta luendu lua gukombelela Tata waye wa guzumba mayilago. Mbawusendesa guzumba Yehowa muavula diago. Mbawukhala nu luendu lua gujinga mayilago gifua muene.—Tanga Ngimbo 41:12.
17. Gima gitshi wajiya guhana Yehowa ginyi khenji umuhanele galego?
17 Gula wadihana gudi Yehowa nu wabatijiwa, jiya egi wahana Tata waye wa mu dilu gima gimoshi gia ndando yavula. Yehowa waguhanele gale ima yagasue yabonga, wana gugukuatesa nji ha gukhala nu gusuanguluga. Aye nji wajiya guhana Mufugi wa dilu nu mavu gima gimoshi ginyi khenji umuhanele galego. Gima giene gidi monyo waye ha gumukalegela. (Yobo 1:8; 41:11; Ish. 27:11) Idi diago ndaga yabonga wajiya gukalagala mu monyo waye. Ndaga ya ndando idi egi udi naye gubatijiwa handaga wana zumba Yehowa.
UDI HEHI HA GUBATIJIWA BA?
18. Mihu itshi wajiya gudihula?
18 Mvutu itshi wana hana tangua ana guguhula egi, udi mutshigina gubatijiwa ba? Phamba aye wajiya guhana mvutu gu muhu wene. Ndaga yene yajiya gugutuma ha gudihula egi ‘itshi ngudi munenga ha gubatijiwa?’ (Makal. 8:36) Aye muwunguluga luko ndaga thathu tuazuelela gu thunda. Thomo wana zumba ndaga jiabonga nu jia giamatshidia. Dihule egi: ‘Ngana nengenena gumona lusugu athu agasue mbazuele giamatshidia nu gukalagala ndaga jiabonga?’ Ya mbadi, wana zumba Yesu Klisto. Dihule egi: ‘Ngana tshigina egi Mun’a Nzambi akhale Fumu wami? Ngana tshigina nji gulandula gifezegeselo gienji ba?’ Ndaga ya thathu ya gubalega ndando idi egi, wana zumba Yehowa. Dihule egi: ‘Ngana tshigina gukombelela Yehowa Nzambi wami ha gusuanguluisa mutshima wenji ba?’ Gula mvutu jiaye gu mihu eyi jidi egi ayi, na itshi idi gugukanga njila ha gubatijiwa? Itshi udi munenga?—Makal. 16:33.
19. Mukunda natshi ushigo naye guvua woma ha gubatijiwa? Hana gifezegeselo. (Yone 4:34)
19 Gula udi muvua woma ha gubatijiwa, tangiza gifezegelo giahanele Yesu. (Tanga Yone 4:34.) Yesu wafuanesele gutshita gutshigina gua Sh’enji nu ima ya gudia. Mukunda natshi? Handaga ima ya gudia yakhala yabonga mukunda nu esue. Yesu wajiyile egi ndaga jiagasue Yehowa wana gututoga ha gutshita jiana khala mukunda nu gubonga guetu. Yehowa ganago gutshigina egi tutshite ndaga imoshi yajiya gutubatela malamba. Yehowa wana tshigina egi, ubatijiwe ba? Ayi. (Makal. 2:38) Jiya egi gula watumagela mukhuala wa gubatijiwa mbawuheta guabonga. Gula wanago guvua woma ha gudia ima yafula, mukunda natshi giwa udi muvua woma ha gubatijiwa?
20. Longo dialandula mbadihana mvutu gu muhu utshi?
20 Itshi udi munenga? Athu avula ajiya guzuela egi: “Ngushigo hehi ha gubatijiwa.” Uvi jiya egi desizio dia gudihana gudi Yehowa nu gubatijiwa didi desizio dimoshi diabalega ndando wajiya guzula mu monyo waye. Udi naye gutangiza muabonga mukunda nu desizio diene. Mbayitoga tangua nu ngolo ha gula wajiya gubua hehi ha gubatijiwa. Uvi gula udi diago mutshigina gubatijiwa itshi wajiya gutshita sendese mangino ha gudilondega? Longo dialandula mbadihana mvutu gu muhu wuwu.
LUNGIMBO 28 Ufuta nu Yehowa
a Gubatijiwa guana khala nu ndando yavula gudi athu agasue ana longuga Biblia. Itshi yajiya gutuma muthu wana longuga Biblia ha gubatijiwa? Idi guzumba. Guzumba mukunda nu ndaga itshi nu gudi nanyi? Longo edi diza muhana mvutu gu mihu eyi. Tuza nji mumona gubonga tuajiya guheta gula tuabatijiwa ha gubua Aklisto.
