1-2. (a) Itshi yana tukuatesa ha gukolesela malamba lusugu nu lusugu? Kotelesa. (b) Itshi tuza muzuelela mu longo edi?

“GULA ngatangiza luko malamba anyi ngataganele nawo, ngana zuela egi ngaabingilego nu ngolo jiami hakhami.” Aye nji watangijile gale luholo elu ba? Athu avula atangijile gale ngenyi. Yajiya gukhala egi wakatele misongo imoshi yakola, nga ndo wafishile muthu wakhalele muzumba. Tangua wana tanginza lamba diene, wana mona egi gima giagukuatesele ha gukolesela gidi nyuma ya Yehowa. Nyuma ya Yehowa yaguhanele “ngolo jinyi jiabalega ngolo jia athu.”—2 Kol. 4:7-9, NWT.

² Luko, tuakhala nu funu ya nyuma ya Nzambi hagula itukuatese ha gulua nu mavu awa a Satana. (1 Yone 5:19) Tudi naye luko gulua nu “ngolo jia ivule yabola.” (Ef. 6:12) Henyaha, tuza mumona maluholo mbadi nyuma ya Nzambi yana tukuatesa. Tuza mumona luko ndaga tuajiya gukalagala ha guheta ukuateshi wa nyuma ya Nzambi.

3. Luholo lutshi Yehowa ana gutukuatesa ha gukolela malamba?

³ Nyuma ya Yehowa yana gutukuatesa. Luholo lutshi? Yana gutuhana ngolo jia gutagenesa inemo yetu ikhale nga tudi mutagana nu malamba. Mupostolo Phaula wataganele nu malamba. Uvi, walanduile gukalegela Yehowa mudimo handaga washile mutshima wenji mu “ngolo jia Klisto.” (2 Kol. 12:9) Mu vuayaje yenji ya mbadi ya mudimo wa gimisionere, Phaula wabalegesele matangua avula ha gulongesa. Uvi wakalegele nji mudimo wakola ha guheta falanga jia gudikuatesa najio. Wasalele gu Kolinto gumbodia Akila nu Prisile. Akhalele mutshita mudimo wa gutunga matenta. Luholo Phaula gakhalele nji mutungi wa matenta, masugu ako wakhalele mutshita nawo mudimo hamoshi. (Makal. 18:1-4) Nyuma ya Nzambi yahanele Phaula ngolo jia gulongesa mbimbi ya Nzambi nu jia gutshita mudimo wenji wa mago.

4. Ha gutadila 2 Kolinto 12:7b-9, ndaga itshi yakhalele nayo Phaula?

 ⁴ Tanga 2 Kolinto 12:7b-9. Mu verse eji, Phaula wazuelele egi wakhalele mulua nu misongo yakola yakhalele gifua “muya mu muila.” Itshi gatshiginyile guzuela? Gula muya wangina muthu mu muila, wana hana lamba diakola sha. Phaula wakhalele muzuela egi misongo akhalele nayo yakhalele gifua muya udi mu muila wa muthu. Wazuelele egi, yakhalele gifua ‘muanjelo wa Satana’ wakhalele ‘gumubeta.’ Yajiya gukhala egi, Satana nu bademo enji akhalelego diago ha gishina gia misongo ya Phaula. Yakotelesa egi, ishigo ene amumbile muya wene mu muila. Uvi tangua ajiyile egi Phaula wakhalele nu “muya” mu muila, yajiya gukhala egi avuile nzala ya guwushinjiga luko mangololo hagula misongo yenji ikole. Itshi Phaula gakalegele?

5. Luholo lutshi Yehowa gahanele mvutu gu gutoga gua Phaula?

⁵ Thomo, Phaula watshiginyile egi Yehowa amukatule misongo yene. Wazuelele egi: ‘Ngatogele Fumu [Yehowa] iphungu thathu hagula angukatule mu lamba edi.’ Uvi, misongo ya Phaula yakatudiwego. Yakotelesa egi Yehowa gahanelego mvutu gu gutoga gua Phaula ba? Ndo sha. Wamuhanele mvutu. Idi yadiago egi Yehowa gakatudilego misongo ya Phaula. Uvi wamuhanele ngolo jia gukolesela nu misongo yene. Yehowa wazuelele egi: ‘Ngolo jiami jidi mudijiga midimo yajio tangua udi waguleba.’ (2 Kol. 12:8, 9) Nzambi wakuatesele Phaula. Hene, Phaula wabambele gusuanguluga nu guhuima guenji!—Fili. 4:4-7.

6. (a) Luholo lutshi Yehowa ajiya guhana mvutu gu gutoga guetu? (b) Mbimbi jitshi jia verse jidi mu paragrafe eyi jiaguhana ngolo?

⁶ Aye nji watogele gale Yehowa ha gugukatula mu lamba dimoshi ngenyi ba? Yajiya gukhala egi, wakombelele iphungu yavula mukunda nu lamba diene, uvi diahuilego. Tangua diko diadivudishile. Ngenyi wajiya gutangiza egi, Yehowa wagubuita mutshima. Gula idi ngenyi, tangiza gifezegeselo gia Phaula. Luholo Yehowa gahanele mvutu gu gutoga gua Phaula, jiya egi mbawuhana nji mvutu gu isambu yaye! Matangua ako, Yehowa gajiyilego gukatula lamba diene. Uvi, mbawuguhua nyuma yenji. Nyuma yene mbayiguhua ngolo udi najio funu ha gukolesela nu lamba diene. (Ngi. 61:3, 4) Wajiya “gubuishiwa hashi,” uvi jiya egi Yehowa mbaagubembigo.—2 Kol. 4:8, 9; Fili. 4:13.

7-8. (a) Luholo lutshi nyuma ya Nzambi idi gifua muhehe holu dia muta? (b) Zuelela luholo mupostolo Phetelo gamonesele egi nyuma ya Nzambi yana tshita mudimo.

⁷ Luholo lutshi luko nyuma ya Nzambi yana tukuatesa? Tuajiya gufuanesa nyuma ya Nzambi nu muhehe holu dia muta udi nu gikudi giakola. Muhehe wajiya gutuameza masuwa gu khanda yabonga, ikhale nga meya adi nu gikudi giakola. Luholo lumoshi nji, nyuma ya Nzambi yana tukuatesa ha gulandula gukombelela Yehowa uu nu mu mavu ahe-ahe ngatshima tudi mutagana nu malamba avula.

⁸ Mupostolo Phetelo wakhalele mulowi wa jishui. Hene, wakhalele mujiya muabonga guwenda mu muta. Wakadigidile mbimbi jiatadila guwenda mu muta ha guzuelela luholo nyuma ya Nzambi yana tshita mudimo. Wasonegele egi: ‘Gushigo mbimbi nga imoshi ya Nzambi yajile mu gutshigina gua muthu mumoshi. Uvi nyuma yabonga yakhalele mutuameza athu azuelele mu ngolo jia Nzambi.’—2 Phet. 1:21.

9. Tangua mupostolo Phetelo azuelele egi, nyuma yabonga yakhalele “mutuameza” athu, itshi gatshiginyile egi athu akotelese?

⁹ Tangua mupostolo Phetelo azuelele egi, nyuma yabonga yakhalele “mutuameza” athu, itshi gatshiginyile egi athu akotelese? Mu mukanda wa Makalegelo wasonegele Luka, wakadigidile nji mbimbi ya luholo lumoshi ya zuelelo dia Greki, ha guzuelela masuwa ‘ahungumuiwe’ gu gikudi. (Makal. 27:15) Mulongogi mumoshi wa Biblia wazuelele egi, tangua Phetelo  gasonegele egi nyuma ya Nzambi ‘yatuamezele’ asonegi a Biblia, “wafuanesele ndaga yene” nu luholo muhehe wakhalele mutuameza masuwa mu muta. Phetelo wakhalele muzuela egi: luholo lumoshi nu muhehe wakhalele mutuameza masuwa gu khanda akhalele naye guya, nyuma ya Nzambi yatuamezele asonegi a Biblia ha gutagenesa ginemo giaahuile Nzambi. Mulongogi wa Biblia yonu tuazuelela gutuama, wazuelele egi: “Asonegi a Biblia akhalele gifua masuwa akanguile milele yawo.” Akhalele hehi ha gutshita mudimo nyuma ya Nzambi yaatuamezele ha gukalagala. Yehowa watshitshile khapho dienji. Waahuile “muhehe,” yakotelesa egi waahuile nyuma yenji. Asonegi a Biblia nji atshitshile khapho diawo. Alanduile utuameji wa nyuma ya Nzambi.

10-11. Ima itshi mbadi tudi naye gutshita ha gujiya egi tudi mutuamezewa gudi nyuma ya Nzambi? Fezegesa.

¹⁰ Mangino, Yehowa ganago guhana athu nyuma yenji hagula asonege mikanda ya Biblia. Uvi, wana hana akombeledi enji nyuma yenji hagula yaatuameze. Yehowa udi mulandula gutshita khapho dienji. Uvi, luholo lutshi tuajiya gujiya egi nyuma ya Nzambi idi gututuameza? Tudi naye gukamba gujiya gula tudi mulandula gutshita khapho dietu. Luholo lutshi?

¹¹ Tufezegese gale. Gula muwendeshi wa masuwa watshigina egi muhehe umukuatese, udi naye gutshita ima mbadi. Thomo, udi naye gutuameza masuwa enji gu khanda idi muza muhehe. Uvi, masuwa enji ajiyilego guwenda gula muene wamagana gu khulo, gualeha nu khanda idi muza muhehe. Hene, udi naye gutshita ndaga ya mbadi. Udi naye gukangula milele yagasue ya masuwa. Uvi masuwa enji ajiyilego guya gutuama gula muhehe ushigo mukuata milele ya masuwa. Luholo lumoshi nji, mbatukolesela mu mudimo wa Yehowa phamba gula tudi nu ukuateshi wa nyuma yenji. Uvi ha guheta ukuateshi wa nyuma yene, tudi naye gukalagala ima mbadi. Thomo, tudi naye gukalagala midimo nyuma ya Nzambi yana tuameza akombeledi enji ha gutshita. Ya mbadi, tudi naye “gukangula milele yetu ya masuwa.” Yakotelesa  egi, tudi naye gudihana muavula mu midimo yene, mu gudivua nu ngolo jietu. (Ngi. 119:32) Gula tuakalagala ndaga eji mbadi, nyuma ya Nzambi mbayituhana ngolo jia gukolesela malamba nu gulandula gukalegela Yehowa mudimo uu nu mu phaladiso.

12. Itshi tuza mutadila henyaha?

¹² Tuamona egi nyuma ya Nzambi yajiya gutukuatesa mu maluholo mbadi. Yana tuhana ngolo nu yana tukuatesa ha gusala agujinginyina gudi Yehowa mu tangua dia malamba. Luko, yana tukuatesa ha guya gutuama, nu ha gusala mu njila idi mubata gu monyo wa mayilago. Henyaha, tutadilenu ima nguana tudi naye gukalagala ha guheta ukuateshi wa nyuma ya Nzambi.

13. (a) Ha gutadila 2 Timote 3:16, 17, gubonga gutshi Biblia yajiya gutubatela? (b) Uvi itshi tudi naye gukalagala?

¹³ Thomo: longuga Biblia. (Tanga 2 Timote 3:16, 17.) Mu njila ya nyuma yenji, Nzambi “wambile” matangi enji mu mito ya asonegi a Biblia. Tangua tudi mutanga Biblia nu tudi mutangigiza ndaga tudi mutanga, malongo a Nzambi ana ngina mu matangi nu mu mitshima yetu. Matangi a Nzambi adi mu Biblia, ana tutuma ha gusombegesa makalegelo etu hagula tusuanguluise Yehowa. (Heb. 4:12) Uvi hagula tuhete ukuateshi wa nyuma ya Nzambi, tudi naye guzula tangua dia gulonguga Biblia lusugu nu lusugu, nu gutangigiza muavula ndaga tuatangi. Ngenyi, Mbimbi ya Nzambi mbayitutuameza mu ndaga jiagasue tudi muzuela nu tudi mutshita.

14. (a) Mukunda natshi tuajiya guzuela egi tuana heta nyuma ya Nzambi mu gudibungisa gua mu hungu? (b) Itshi mbayitukuatesa ha guheta ukuateshi wa nyuma ya Nzambi mu gudibungisa gua mu hungu?

¹⁴ Ya mbadi: kombelela Yehowa hamoshi nu aphangi’aye Aklisto. (Ngi. 22:22) Tuana heta nyuma ya Nzambi mu gudibungisa gua mu hungu. (Yat. 2:29) Mukunda natshi tuazuela ngenyi? Tangua tuana dibungisa mu hungu, tuana toga Yehowa atuhane nyuma yenji. Tuana yimba nji ngimbo jia Ufumu jiakatuga mu mbimbi ya Nzambi. Luko, tuana tegelela malongo a Biblia ana hanewa gudi aphangi’etu a mala atombewe mu ukuateshi wa nyuma ya Nzambi. Nyuma ya Nzambi yana kuatesa nji aphangi’etu a akhetu ha gudilondega nu gutshita badevuare. Uvi ha guheta ukuateshi wa nyuma ya Nzambi mu gudibungisa gua mu hungu, tudi naye gudianga gudilondega hagula tuhane komantere mu gudibungisa. Ngenyi gula tuaza mu gudibungisa, mbatukhala hehi ha guheta nyuma ya Nzambi, gifua masuwa adi nu “milele ya gukangula.”

15. Luholo lutshi nyuma ya Nzambi yana gutukuatesa mu mudimo wa gulongesa?

¹⁵ Ya thathu: longesa lukuma luabonga. Tangua tuana kalegela Biblia mu mudimo wa gulongesa, tuana hana nyuma ya Nzambi njila hagula itukuatese mu mudimo wene. (Lomo 15:18, 19) Uvi ha guheta ukuateshi wa nyuma ya Nzambi mu mudimo wa gulongesa, tudi naye guya mu mudimo wene tangua diagasue. Tudi naye nji gukalegela Biblia gula luholo ludi guene. Ha gulondega luholo luaye lua guta maga nu athu mu mudimo wa gulongesa, landula maluholo a guta maga nu athu, adi mu mukanda Lujingu nu Mudimo wa Uklisto.

16. Luholo lutshi tuajiya guheta nyuma ya Nzambi giphungi gimoshi?

¹⁶ Ya nguana: kombelela Yehowa. (Mat. 7:7-11; Luka 11:13) Luholo lua guheta nyuma ya Nzambi giphungu gimoshi ludi gutoga Yehowa mu gisambu hagula atuhane nyuma yenji. Gushigo nga gima giajiya gukanga njila egi gutoga guetu guhete gudi Yehowa. Luko, gushigo nga gima giajiya gukanga njila egi tuhete nyuma ya Nzambi. Nyuma ya Nzambi yajiya gutukuatesa ikhale nga tudi mu bologo. Satana gajiyilego gutukanga njila ha guheta nyuma ya Nzambi. (Yak. 1:17) Luholo lutshi tudi naye gukombelela ha guheta lume ukuateshi wa nyuma ya Nzambi? Ha guheta mvutu, tutadilenu  gifezegeselo gidi phamba mu evanjile ya Luka, gidi muzuelela muavula gisambu. *

17. Gifezegeselo giahanele Yesu mu Luka 11:5-9, 13 gidi gutulongesa itshi mukunda nu gisambu?

¹⁷ Tanga Luka 11:5-9, 13. Gifezegeselo giahanele Yesu gidi mumonesa luholo tudi naye gukombelela ha gutoga nyuma ya Nzambi. Yala adi muzuelela mu gifezegeselo giene, wahetele gima akhalele nagio funu handaga ‘wafubidile mu gutoga guenji.’ Yala muene gavuilego woma wa gutoga ukuateshi gudi futa dienji ngatshima yakhalele mukatshi dia phipha. (Luka 11:8) Yesu wazuelele egi, gifezegeselo egi gidi gutulongesa itshi mukunda nu gisambu? Wazuelele gamba: “Landulenu gutoga, mbaamihana; landulenu gukamba, mbamumona; landulenu gubunda, mbaamizuluila gijidigo.” Idi gutulongesa itshi? Idi gutulongesa egi, ha guheta ukuateshi wa nyuma ya Nzambi, tudi naye guyitoga nu gufubidila guagasue.

18. Ha gutadila gifezegeselo giahanele Yesu, mukunda natshi tudi naye gusha mutshima egi Yehowa mbawutuhana nyuma yenji?

¹⁸ Gifezegeselo giahanele Yesu gidi gutukuatesa luko ha gumona mukunda natshi Yehowa mbaatuhana nyuma yenji. Yala adi muzuelela mu gifezegeselo giene watshiginyile gukuatesa ngenji yajile gumbo dienji mukatshi dia phipha. Wamonene egi, wakhalele naye gumuhana ima ya gudia. Yesu wazuelele egi futa dienji wamuhanele mapha handaga yala muene wakhalele mutoga nu gufubidila guagasue. Itshi Yesu galongesele? Yala owu gakhalelego muthu watagana. Uvi watshiginyile gukuatesa futa dienji wakhalele mutoga nu gufubidila guagasue. Idi mumonesa egi Sh’etu wa mu dilu, wazala pha nu guzumba, mbawukuatesa muavula athu adi gumutoga nyuma yenji nu gufubidila guagasue! Hene, tudi naye gusha mutshima egi gula tuatoga Yehowa nyuma yenji, mbawutuhana nayo.—Ngi. 10:17; 66:19.

19. Mukunda natshi tudi naye gusha mutshima egi mbatubinga?

¹⁹ Tudi naye gusha mutshima egi mbatubinga gukolesela ngatshima Satana watuluisa luholo lutshi. Mukunda natshi? Handaga nyuma ya Nzambi yana tukuatesa mu maluholo mbadi. Thomo, yana tuhana ngolo tudi najio funu ha gukolesela malamba. Ya mbadi, nyuma ya Nzambi idi ngolo jiana tukuatesa ha gulandula gukombelela Yehowa uu nu tangua mbatungina mu phaladiso. Hene, zula desizio dia guheta gubonga gua ukuateshi wa nyuma ya Nzambi!