1. Yehowa wana tuhana njila ha gutshita itshi?

YEHOWA wana tuhana njila ha gutomba ndaga tuatshigina gutshita mu lujingu luetu. Yehowa wana tulongesa luholo tuajiya guzula badesizio abonga. Luko, wana tukuatesa ha gubinga gula tuazula badesizio ana gumusuanguluisa. (Ngi. 119:173) Hene, gula tuatumagela ndaga jidi mu Biblia, mbatuzula badesizio abonga sha.—Heb. 5:14.

2. Gungima dia guzula desizio, lamba ditshi tuajiya gutagana nadio?

² Uvi, nga tuazula getu badesizio abonga, yajiya gukhala lamba ha gutagenesa ndaga tuasendesele. Tutadilenu gale ifezegeselo eyi: Phangi mumoshi wa muvuala wazula desizio dia gutanga Biblia yagasue. Wasendesa gutanga muabonga, uvi gungima dia phoso jiazonda, wabemba genji. Phangi mumoshi wa mukhetu wazula desizio dia gubua muvundji wa muhola wa tangua diagasue. Uvi udi mushipha ha gusendesa mudimo wene. Hunji dia akulu mu hungu diazula desizio hamoshi egi mbaakhala muya mutala aphangi a mu hungu ha guaahana ngolo mu nyuma. Uvi mbeji jiavula jiabalega gale khenji akalegela desizio dinyi azudile. Ifezegeselo ya aphangi awa idi ya gudisha. Uvi mukut’awo agasue akalagala gima gimoshi gia gudifuana. Asendesele gutshita ndaga uvi ajimaneselego. Aklisto a mu siekle ya thomo a mu dimbo dia Kolinto ataganele nu ndaga ya luholo elu. Tutalenu malongo tuajiya guzula mu ndaga yene.

3. Desizio ditshi diazudile Aklisto a gu Kolinto? Uvi itshi yabuile gungima?

³ Mu givo 55 gia tangua dietu, Aklisto a gu Kolinto azudile desizio dimoshi dia ndando. Avuile egi aphangi’awo a gu Yelusalema nu a gu Yudea akhalele nu malamba akola nu uphutu. Mahungu ako akhalele mukungiza falanga ha guaakuatesa. Mu khadilo diawo dia guhana, azudile desizio dia gukuatesa aphangi’awo. Hene, ahudile mupostolo Phaula ha guaaleza luholo lutshi ajiya gukuatesa aphangi’awo. Phaula waatumine malongo, watombele nji Tito ha guaakuatesa ha gukungiza falanga. (1 Kol.  16:1; 2 Kol. 8:6) Uvi gungima dia mbeji jiazonda, Phaula wavuile egi Aklisto a gu Kolinto akungijilego gawo falanga gifua luholo azuelele. Hene, bunda diawo dia falanga diakhalelego hehi ha guheta gu Yelusalema hamoshi nu mikungo ya mahungu ako.—2 Kol. 9:4, 5.

4. Ha gutadila 2 Kolinto 8:7, 10, 11, Phaula wakuatesele Aklisto a gu Kolinto ha gutshita itshi?

⁴ Aklisto a gu Kolinto azudile desizio diawaha. Phaula waashimanele mukunda nu gutshigina guawo guakola nu khadilo diawo dia guhana. Uvi waakuatesele nji ha gumanesela ndaga asendesele. (Tanga 2 Kolinto 8:7, 10, 11.) Lumene luawo ludi gutulongesa egi, nu Aklisto agujinginyina ajiya gumona lamba ha gutagenesa desizio azudile.

5. Mihu itshi tuza mutadila?

⁵ Luholo lumoshi nu Aklisto a gu Kolinto, yajiya gukhala lamba ha gutagenesa badesizio tuazudile. Mukunda natshi? Luholo tushigo athu atagana, tuajiya gushipha ha gutshita ndaga. Luko, ndaga tuakhalelego mutangiza jiajiya gutubuila. Ngenyi, yajiya gukhala lamba ha gutagenesa desizio tuazudile. (Mulo. 9:11; Lomo 7:18) Itshi tudi naye gukalagala gula tudi nu funu ya gutadila luko desizio tuazudile ha gujiya gula tuajiya gudisombegesa nga ndo? Luholo lutshi tuajiya gumanesela ndaga tuasendesele?

6. Tangua ditshi tuajiya gusombegesa desizio?

⁶ Gudi nu desizio jiko jia ndando tuajiyilego gusombegesa. Tufezegese gale. Tuajiyilego gusombegesa desizio tuazudile dia gukombelela Yehowa. Luko, tuajiyilego gusombegesa desizio tuazudile dia gusala wagujinginyina gudi mulumi’etu nga mukaji’etu. (Mat. 16:24; 19:6) Uvi, gudi nu desizio jiko jiajiya gutoga egi tusombegese. Mukunda natshi? Handaga ndaga jia lujingu jiana sombegesa. Itshi yajiya giwa gutukuatesa ha guzula badesizio awaha?

7. Itshi tudi naye gutoga Yehowa? Mukunda natshi?

⁷ Kombelela ha guheta ndunge. Yehowa wahanele Yakoba nyuma yenji ha gusonega egi: ‘Gula muthu mungoshi mukatshi dienu gashigo nu jindunge, alandule gujitoga gudi Nzambi, handaga Nzambi wana hana athu agasue ima nu gusuanguluga guagasue.’ (Yak. 1:5) Gudi nu ndaga jiko, mukut’etu agasue tuana ‘khalago nu jingunge’ ha gujitshita. Hene, toga Yehowa agukuatese tangua udi muzula desizio, nga tangua udi mutshigina gusombegesa desizio wazudile. Yehowa mbawugukuatesa ha guzula badesizio abonga.

8. Itshi tudi naye gukamba gutuama egi tuzule desizio?

⁸ Kamba muabonga matangi a Nzambi. Luholo lutshi? Tanga Biblia nu mikanda yana zola ulondegi wa Yehowa. Luko, toga lubelo gudi aphangi wana shila mutshima. (Ish. 20:18) Gutshita ngenyi gudi nu ndando gutuama egi uzule desizio dia gusombegesa mudimo, dia gukatuga fundo udi mujinga, nga gutomba formasio wajiya gukalagala ha gudikuatesa ha gulandula gukalegela Yehowa mudimo.

9. Gubonga gutshi mbatuheta gula tudi muzula desizio nu matangi abonga?

⁹ Tadila muabonga matangi adi gugutuma ha guzula desizio. Yehowa wana guzula matangi etu nu ndando. (Ish. 16:2) Yehowa wana tshigina egi tukhale nu matangi abonga mu ndaga jiagasue. Hene, tangua tudi muzula desizio, tudi naye gukamba gujiya gula matangi adi gututuma ha guzula desizio adi diago abonga. Athu ako nji adi naye gumona ngenyi. Gula tushigo nu matangi abonga, mbayikhala lamba ha gutagenesa desizio tuazudile. Tangiza gale egi phangi mumoshi wa muvuala wazula desizio dia gubua muvundji wa muhola wa tangua diagasue. Gungima, gashigo luko mutagenesa matangua ana togewa gudi avundji a mihola. Wajiya gutuna gukhala nu gusuanguluga mu mudimo wene. Wajiya gutangiza egi wabuile muvundji wa muhola mukunda nu  gusuanguluisa Yehowa. Uvi yajiya gukhala egi gima giamutumine diago ha gubua muvundji wa muhola giakhalele, gusuanguluisa mvuaji jienji nga muthu muko.

10. Itshi yana tukuatesa ha gusombesa makalegelo abola?

¹⁰ Tangiza gale muthu mumoshi udi mulonguga Biblia, wazula desizio dia gubemba gunua makaya. Thomo, watuna gunua makaya phoso imoshi nga mbadi, ikhale idi lamba gudi muene. Uvi gungima, wanua luko makaya. Gu gisugishilo, wabinga gubemba gunua makaya! Guzumba guenji gua Yehowa nu felela dienji dia gumusuanguluisa, yene yamukuatesele ha gubinga gunua makaya.—Kol. 1:10; 3:23.

11. Mukunda natshi udi naye gujiya ndaga udi naye gutshita?

¹¹ Khala mujiya ndaga udi naye gutshita. Gula udi mujiya lume ndaga udi naye gutshita, mbayikhadigo lamba ha guyikalaga. Tangiza gale egi wazudile desizio dia gutanga Biblia muavula. Uvi gula ushigo diago nu programe ha guyitanga, yajiya gukhala lamba egi utagenese desizio wazudile. * Akulu a mu hungu ajiya guzula desizio dia guya mutala aphangi muavula. Uvi gungima dia masugu, akotelesa egi ataganeselego desizio dinyi azudile. Hene, adi naye gudihula egi: “Tuasonegele lume majina a aphangi a mala nu a akhetu anyi tudi naye gutala ba? Tuadivuile tangua tudi naye guya guaatala ba?”

12. Itshi tuajiya gukalagala? Mukunda natshi?

¹² Tshigina ndaga luholo jidi. Gushigo nga muthu mumoshi mukatshi dietu udi nu tangua, nu umonyi nga nu ngolo jia gutshita yagasue gatshigina gukalagala. Hene, tushigo naye gukhala nu milonga yakola-kola. Matangua ako, yajiya gutoga egi usombegese desizio udi mumona egi ushigo nu luholo lua guditagenesa luko. (Mulo. 3:6) Henyaha, itshi wajiya gukalagala gula watadila luko desizio diaye muabonga, nu wamona egi wajiya guditagenesa? Ndaga eji thano jiajiya gugukuatesa ha gumanesela ndaga wasendesele.

13. Luholo lutshi wajiya guheta ngolo udi najio funu ha gutagenesa desizio diaye?

¹³ Toga Yehowa aguhane ngolo jia gutumagela desizio diaye. Nzambi wajiya guguhana ‘ngolo jia gutshita ndaga’ ha gutagenesa desizio diaye. (Fili. 2:13) Ngenyi, mutoge nyuma yenji yabonga iguhane ngolo udi najio funu. Landula gukombelela ngatshima udi mutangiza egi mvutu ya gisambu giaye idi mushipha. Yesu wazuelele egi: ‘Landulenu gulomba, bamuheta [nyuma ya bonga.]’—Luka 11:9, 13.

14. Luholo lutshi longo didi mu Ishima 21:5 diajiya gugukuatesa ha gutagesa desizio diaye?

¹⁴ Sonega ndaga watshigina gukalagala. (Tanga Ishima 21:5.) Ha gutagenesa ndaga yagasue udi mutshigina gukalagala, isonege. Hangima, ikalagale gifua luholo wayisonegele. Luholo lumoshi nji, gula wazula desizio dimoshi ngenyi, sonega ima udi naye gutshita ha gutagenesa desizio diene. Gula desizio diene didi mutoga egi utshite ndaga jiavula, wajiya gujikhaphumuna mu itshinyi yazonda-zonda. Ngenyi, wajiya gujikalagala nu gujimanesela muabonga. Phaula walezele Aklisto a gu Kolinto ha gubamba ndambo ya falanga ‘phoso yagasue,’ ha fundo dia gunengena phamba guza guenji ha ene gukungiga falanga jiawo. (1 Kol. 16:2) Gutshita ndaga jiavula mu itshinyi yazonda-zonda, guajiya gugukuatesa ha gutagenesa desizio wazudile.

15. Gungima dia gusonega ndaga, itshi udi naye gutshita?

¹⁵ Gusonega ndaga udi mutshigina gutshita guajiya gugukuatesa ha gutagenesa muabonga desizio diaye. (1 Kol. 14:40) Mahunji a akulu ana togewa ha gutomba mukulu mumoshi, ha gusonega badesizio agasue adi ene muzula.  Mukulu muene udi naye gusonega majina a aphangi atombewa ha gutshita ndaga adivui, nu masugu adi naye gujimanesela. Akulu ana tshita ndaga luholo elu, ana tagenesa badesizio awo muabonga. (1 Kol. 9:26) Aye nji, wajiya gulandula gifezegeselo giawo tangua udi mutshita ndaga jiaye. Sonega ndaga watshigina gutshita mu lusugu, nu dilondege ha gujitagenesa. Gutshita ngenyi mbagugukuatesa ha gumanesela ndaga wasendesele nu ha gutshita ndaga jiavula mu tangua diazonda.

16. (a) Gungima dia guzula desizio, itshi udi naye luko gukalagala? (b) Luholo lutshi Lomo 12:11 idi mu monesa ndaga yene?

¹⁶ Kalagala ngolo. Udi naye gukalagala ngolo ha gutshita ndaga gifua luholo wajisonegele, nu ha gumanesela ndaga wasendesele. (Tanga Lomo 12:11.) Mupostolo Phaula walezele Timote ha ‘gudihana’ nu ha ‘gulandula gutshita ndaga’ hagula abue mulongeshi wa watagana. Tuajiya gukalegela lubelo lua Phaula mu ndaga yagasue tuatshigina gutshita mukunda nu Yehowa.—1 Tim. 4:13, 16.

17. Luholo lutshi tuajiya gukalegela Efeso 5:15, 16 ha gutagenesa desizio dietu?

¹⁷ Kalegela tangua diaye kiawaha. (Tanga Efeso 5:15, 16.) Tomba tangua mbawutagenesa desizio wazudile. Usombegesago tangua diene. Unengenago egi uhete tangua diabalega gubonga hagula usendese giwa gutshita ndaga wazuelele ha gukalagala. Mbawuhetshigo tangua dia luholo elu. (Mulo. 11:4) Ubembigo egi ima ishigo nu ndando yavula iguzule tangua diaye nu iguhuidise ha gutshita ima yabalega ndando. (Fili. 1:10) Gula luholo ludi guene, tomba gukalagala ndaga jiaye mu tangua diatagana dinyi athu ako ajiyilego gugusagesa. Jiyisa athu ako egi, agusagesago tangua udi mutshita ndaga jiaye. Kanga telephone yaye, nga ndo tomba tangua diko wajiya gutanga ba message aye nga gungina mu internet. *

18-19. Itshi yajiya gugukuatesa ha gumanesela ndaga wasendesele, nga watagana nu malamba?

¹⁸ Haga matangi aye gu gubonga mbawuheta. Gubonga mbawuheta gu badesizio aye gudi gifua fundo udi mukamba guheta tangua udi mutshita vuayaje. Gula watshigina lume guheta ha fundo diene, udi naye gulandula guwenda ngatshima njila yakangewa, nu yatoga egi usombegese njila iko. Luholo lumoshi, gula tuahaga matangi etu gugubonga mbatuheta gu badesizio etu, mbatuvutugago gungima nga tuatagana getu nu malamba.—Gal. 6:9.

¹⁹ Guzula badesizio abonga guakhalago mulonga waleba. Luko, guaatagenesa guajiya gukhala lamba. Uvi Yehowa wajiya gugukuatesa. Wajiya guguhana jindunge nu ngolo udi najio funu ha gumanesela ndaga wasendesele.