MU TANGUA dikulu, mubambi wa ima wakhalele mubamba inzo nga ima ya muthu muko. Matangua ako, mbimbi ya zuelelo dia Hebelu nu dia Greki ana kalegela ha guzuelela “mubambi wa ima,” yana kotelesa egi gaphita.

Tangua Yozefe, mun’a Yakobo, akhalele muhiga gu Egypte, wabuile mubambi wa ima monzo ya fumi’enji. Fumi’enji “wabembele ima yenji yagasue mu mago a Yozefe ha guyibamba.” (Gis. 39:2-6) Gungima, Yozefe wabuile fumu wakoma mu Egypte. Muene nji watombele muthu muko ha gukhala mubambi wa ima ya monzo yenji.—Gis. 44:4.

Tangua diakhalele Yesu ha mavu, athu anyi akhalele nu itshinyi yawo ya mavu, akhalele mujinga gualeha nu ferme jiawo. Hene, akhalele mutomba abambi a ima ha gutala midimo yakhalele mutshita adimi a mahia lusugu nu lusugu mu ferme.

Nanyi wakhalele naye gutombewa ha gukhala mubambi wa ima? Musonegi mumoshi wa muenya Roma, mu jina dia Columelle wazuelele egi, muhiga wakhalele mutombewa ha gukhala mubambi wa ima nga gaphita, wakhalele naye gukhala “muthu wajiya gale gutshita mudimo muabonga.” Wakhalele naye gukhala muthu udi nu “makalegelo abonga, gashigo muenya shidi.” Wazuelele luko egi: “Mubambi wa ima gashigo naye gukhala muthu wana tangiza egi wajiya gutshita ima yesue. Uvi, udi naye gukhala nu nzala ya gujiya gutshita ima iko.”

Biblia yana zuelela mubambi wa ima nu mudimo wenji, ha gumonesa midimo yana kalegewa mu hungu dia Uklisto. Ha gufezegesa, mupostolo Phetelo wakolesele Aklisto ha gukalegela guhua guaahanele Nzambi, ha ‘gutshitshila ako mudimo gifua abambi abonga a ima a guhua gua Nzambi.’—1 Phet. 4:10.

Mu mukanda wa Luka 16:1-8, Yesu hakhenji wahanele gifezegeselo gia mubambi wa ima. Luko, mu profesi idi muzuelela gijiyishilo gia gukhala guenji gifua Fumu, Yesu walezele alandudi enji egi, muene mbawutomba ‘muhiga wafubidila nu watema,’ nga ndo “mubambi wafubidila.” Ginemo giakoma gia mubambi muene gidi, gia guhana alandudi a Klisto ima ya gudia ya mu nyuma mu masugu awa a gisugishilo. (Mat. 24:45-47; Luka 12:42) Tudi nu gusuanguluga luholo tudi mukatshi dia athu ana heta mikanda yana zola mubambi wafubidila ha mavu agasue. Mikanda yene yana kolesa lume gutshigina guetu.