1-2. (a) Ha gutadila Efeso 6:16, mukunda natshi tudi nu funu ya ‘tshibu yakoma ya gutshigina’? (b) Mihu itshi tuza mutadila?

WAKHALA nu ‘tshibu yakoma ya gutshigina’ ba? (Tanga Efeso 6:16.) Mvutu idi egi ayi. Luholo tshibu yakoma ya ita yana bamba muila, gutshigina guaye nji guana gugubamba gu ndaga jia musonyi, jia shidi, nu ndaga jiko jishigo gudivua nu gutshigina gua Nzambi.

² Uvi jiya egi, tudi mujinga mu “masugu a gisugishilo.” Hene, gutshigina guetu mbagulandula gulolewa. (2 Tim. 3:1) Luholo lutshi wajiya gujiya gula gutshigina guaye gudi guakola? Itshi wajiya gutshita ha gubamba gutshigina guakola? Tutadilenu mvutu jia mihu eyi.

3. Itshi masuta akhalele mutshita nu tshibu jiawo jia ita? Mukunda natshi?

³ Mu tangua dikulu, masuta akhalele nu tshibu jia ita jialondewe nu ilema yakola ya shitu. Masuta akhalele mukula tshibu jiawo maji ha gubamba ilema yajio nu hagula utadi wajio ubuigo ukelengenye. Gula suta diamona egi tshibu yenji yabola, wakhalele mutshita yagasue ha guyilondega hagula wajiya gukhala hehi ha guya gu ita. Luholo lutshi ndaga eyi idi mutadila nji gutshigina guetu?

4. (a) Mukunda natshi udi naye gutala nu gubamba tshibu yaye ya gutshigina? (b) Luholo lutshi wajiya guyikalagala?

⁴ Luholo lumoshi nu masuta a mu tangua dikulu, tangua diagasue udi naye gutala tshibu yaye ya gutshigina nu guyilondega hagula ukhale hehi ha gulua ita. Esue Aklisto, tuana gulua ita ya mu nyuma. Tuana gulua nu mbalagaji jiavula. Mukatshi dia mbalagaji jiene, tuajiya gutanga nji ivule yabola. (Ef. 6:10-12) Gushigo nga muthu wajiya gugulondegela tshibu yaye ya gutshigina. Luholo lutshi wajiya gujiya egi  gutshigina guaye mbagukhala guakola mu tangua mbawulolewa? Thomo, udi naye gutoga ukuateshi gudi Nzambi. Gungima, tanga Biblia hagula igukuatese ha gudimona gifua luholo Nzambi ana gugumona. (Heb. 4:12) Biblia idi muzuela gamba: ‘Zegemena gudi Yehowa nu mutshima waye wagasue. Uzemenago mu ndunge jiaye.’ (Ish. 3:5, 6) Henyaha, tangiza gale mulonga umoshi wataganele nawo masugu abalega, nu luholo watshitshile ha guwumanesela. Wataganele nu lamba diakola dia falanga ba? Mu tangua diene, watangijile mbimbi jiazuelele Yehowa mu Hebelu 13:5 egi, ‘Ame mbangugubembigo nga hazonda, mbangugutunyigo nga hazonda’? Mbimbi jiene jiaguhanele felela egi Yehowa mbawugukuatesa ba? Gula idi ngenyi, idi mumonesa egi, udi mubamba muabonga tshibu yaye ya gutshigina.

5. Gula wazula tangua dia gutala muabonga gutshigina guaye, itshi wajiya gumona?

⁵ Gula wazula tangua dia gutala muabonga gutshigina guaye, wajiya gudihula gu ndaga mbawumona. Wajiya gumona ndaga jiko jidi khenji wajiyile galego, jiajiya gulebesa gutshigina guaye. Wajiya gumona egi gudisagesa muavula gubalega, nu mambo ana gutumbila athu, nu guleba gua muila, guabolesele gale gutshigina guaye. Gula idi ngenyi, luholo lutshi wajiya gubamba gutshigina guaye hagula gubolesewago luko muavula?

6. Zuelela maluholo abonga a gudisagesa.

⁶ Gudisagesa guagasue guakhala ndo guabola. Tudi naye gudisagesa ha gutshita ndaga jidi musuanguluisa Yehowa nu Yesu. (1 Kol. 7:32) Gula tuatshita gubola guakoma, tuana gudisagesa mukunda nu ufuta wetu nu Nzambi. Hene, tuana kamba gulondega ufuta wene. (Ngi. 38:18) Tuana gudisagesa nji ha gusuanguluisa mulumi’etu nga mukaji’etu. Luko, tuana gudisagesa mukunda nu enya fami yetu nu aphangi’etu Aklisto.—1 Kol. 7:33; 2 Kol. 11:28.

7. Ha gutadila Ishima 29:25, mukunda natshi tushigo naye guvua woma wa athu?

⁷ Uvi, gudisagesa muavula gubalega guajiya gubolesa gutshigina guetu. Tufezegese gale. Tuana gudisagesa muavula mukunda nu ima ya gudia nu milele ya gusudiga ba? (Mat. 6:31, 32) Gula idi ngenyi, yajiya gututuma ha gudihana muavula ha gukamba falanga. Tuajiya nji gusendesa gukudisa khadilo dia guzumba falanga. Gula tuabemba egi ndaga ya luholo elu itubuile, gutshigina guetu gudi Yehowa mbaguleba, mbayibolesa nji ufuta wetu nu muene. (Mako 4:19; 1 Tim. 6:10) Luko, tuana gudisagesa muavula ha gukamba gusuanguluisa athu ba? Gula idi ngenyi, tuajiya gusendesa guvua woma egi athu ajiya gutusegulula nga gutumonesa lamba. Woma wa luholo elu wajiya guvula gubalega woma tudi naye guvuila Yehowa. Ha gudibamba gu ndaga ya luholo elu, tudi naye gutoga Yehowa atuhane gutshigina nu ngolo hagula tuvuigo woma wa athu.—Tanga Ishima 29:25; Luka 17:5.

8. Itshi tudi naye gukalagala gula athu adi muzuela ima ya mambo mukunda nu Yehowa nu aphangi’etu Aklisto?

⁸ Satana, “sha mambo,” wana tuma athu enji ha guzuela ima ya mambo mukunda nu Yehowa nu aphangi’etu Aklisto. (Yone 8:44) Tufezegese gale. Ba apostats anazuela ima ya mambo mu televizio, mu radio, mu internet nu mu mazulunalu mukunda nu organizasio wa Yehowa. Mambo a luholo elu adi mukatshi dia ‘mifula ya tshiuya’ yana tusonona Satana. (Ef. 6:16) Itshi tudi naye gukalagala gula muthu wasendesa gutuwambela ima ya mambo mukunda nu Yehowa nu aphangi’etu Aklisto?  Tushigo naye gumutegelela! Mukunda natshi? Handaga tudi nu gutshigina gudi Yehowa, nu tuana gushila aphangi’etu Aklisto mutshima. Luko, tudi naye gutuna guta maga a maluholo agasue nu ba apostats. Tushigo naye guzuela nawo nga gima gimoshi, ikhale ndaga adi muzuelela idi mumonega gifua yawaha.

9. Guleba muila guajiya gutukalagala itshi?

⁹ Guleba muila guajiya gulebesa gutshigina guetu. Tudi nu milonga yavula yana gutusagesa. Tutshitshigo gifua tushigo getu nu ndaga. Matangua ako, milonga yene yana gutulebesa muila. Uvi, tushigo naye tangua diagasue gutangiza milonga tudi nayo. Gula tuatshita ngenyi, tuajiya gubuita mutshima gu ima yagasue yabonga yatulayile Yehowa. (Yat. 21:3, 4) Guleba muila guajiya gulebesa ngolo jietu, guajiya nji gututuma ha gubemba gukombelela Yehowa. (Ish. 24:10) Uvi tuajiya gutshita egi ndaga ya luholo elu itubuilago.

10. Mukanda wasonegele phangi mumoshi wa mukhetu udi gutulongesa itshi?

¹⁰ Tutadilenu gifezegeselo gia phangi’etu mumoshi wa mukhetu wa gu États-Unis. Wana bamba gutshigina guakola ikhale mulumi’enji wanakata misongo yakola. Mu mukanda gasonegele siège mondial, wazuelele egi: “Matangua ako, misongo ya mulumi’ami yana tuhana gikenene giavula nu yana tulebesa muila. Uvi gutshigina guetu gudi guakola. Ngudi muhana Yehowa mvudi yavula mukunda nu ima yagasue ana gutuhana ha gukolesa gutshigina guetu nu ha gukhala nu ngolo. Tudi lume nu funu ya lubelo luenji nu ngolo jienji. Yana tukuatesa ha gulandula gukombelela Yehowa, nu gukolesela malamba Satana ana kadigila ha gutulebesa muila.” Mbimbi jia phangi’etu wa mukhetu jidi gutulongesa egi, tuajiya gubinga gula muila watuleba! Luholo lutshi? Khala mutadila malamba aye gifua gulolewa gudi mukatuga gudi Satana. Sha mutshima egi Yehowa mbawuguhana ngolo. Luko, suanguluga nu ima ya mu nyuma yana gutuhana Yehowa.

11. Mihu itshi tudi naye gudihula ha gujiya gula gutshigina guetu gudi guakola?

¹¹ Udi mumona egi, udi naye gukolesa gutshigina guaye mu ndaga jiko ba? Mu mbeji eji jiabalega, watunyile gudisagesa muavula gubalega ba? Watunyile gutegelela ima ya mambo yana zuela ba apostats nga guta nawo  maga ba? Wabingile ndaga imoshi yatshiginyile gugulebesa muila ba? Gula idi ngenyi, jiya egi gutshigina guaye gudi guakola lume. Uvi tudi naye gutema handaga Satana udi nu iluilo iko ana kalegela ha gutuluisa. Tuzuelele giluilo gimoshi mukatshi diayo.

12. Itshi yajiya gutubuila gula tudi muzumba falanga nu ima iko yavula-vula?

¹² Gula tudi muzumba falanga nu ima iko yavula-vula, gutshigina guetu mbaguleba. Luko, mbatudihanyigo muavula mu mudimo wa Yehowa. Mupostolo Phaula wazuelele egi: ‘Muthu udi mutshita mudimo wa gisuta gashigo naye gudinginyisa mu ndaga jia ungenda gula muene watshigina gusuanguluisa fumi’enji.’ (2 Tim. 2:4) Masuta a enya Roma akhalele nu mukhuala wa gutuna gutshita midimo iko. Itshi yajiya gubuila suta gula ganemeselego mukhuala wene?

13. Mukunda natshi masuta ashigo naye gudinginyisa mu ndaga jia ungenda?

¹³ Tangiza gale ndaga eyi. Mu gimenegena, masuta adi mulonguga luholo lua gulua ita nu phogo jiawo jia khusa, uvi suta dimoshi dishigo hene. Diaya gui? Diaya musumbisa ima gu zando. Mu ngueze, masuta adi mutala mata awo ha guaalondega, adi muvuiga nji phogo jiawo jia ita. Uvi mu tangua diene, suta dinyi diana sumbisa ima, didi mulondega ima yenji mbaasumbisa hamene. Uvi mu gimenegena, mbalagaji jiaazogela mu gisagumuisa, jiasendesa guaaluisa. Mukatshi dia masuta awa, suta ditshi mbadikhala hehi ha gulua ita, nu mbadisuanguluisa fumi’enji? Suta ditshi mbawutshigina egi dikhale hehi nu aye? Dinyi diakhalele gudilondega ha gulua ita, nga ndo dinyi diakhalele gudihana ha gusumbisa ima?

14. Esue masuta a Klisto, itshi tuana zula nu ndando yavula?

¹⁴ Esue Aklisto tudi gifua masuta anyi abonga. Gima gidi nu ndando yavula gudi esue gidi, gusuanguluisa fumi’etu Yehowa nu Yesu. Gusuanguluisa Yehowa nu Yesu gudi nu ndando yavula gubalega ima yagasue tuajiya guheta ha mavu awa a Satana. Hene, tudi  naye gukalagala yagasue ha guheta tangua nu ngolo ha gukombelela Yehowa, nu gubamba muabonga tshibu yetu ya gutshigina, nu iluilo yetu iko ya mu nyuma.

15. Luholo lutshi mupostolo Phaula adi gututemesa? Mukunda natshi?

¹⁵ Tudi naye gukhala atema tangua diagasue! Mukunda natshi? Mupostolo Phaula watemesele Aklisto egi: ‘Athu atshigina gukhala enya umonyi, mbaatotesa gutshigina guawo.’ (1 Tim. 6:9, 10) Mbimbi “gutotesa,” idi mumonesa egi gukamba gukhala nu ima yavula-vula itushigo nayo funu, guajiya gutuwunganesa mu nyuma. Guajiya gututuma ha gukudisa ‘ngina jiavula jiaheya nu jiabola’ mu mitshima yetu. Uvi, tudi naye gujiya egi Satana wana kalegela ngina jiene gifua iluilo ha gulebesa gutshigina guetu.

16. Lumene ludi mu Mako 10:17-22 ludi naye gututuma ha gudihula mihu itshi?

¹⁶ Tutangize gale. Yajiya gukhala egi tudi getu nu falanga jia gusumba ima yavula-vula tuatshigina. Hene, tuajiya guzuela egi, idi ndaga yabola gula tuasumba getu ima yatusuanguluisa, nga tushigo nayo diago funu ba? Ishigo diago ndaga yabola ndo. Uvi tutangize gale mihu eyi: Tudi diago nu tangua nu ngolo jia gukalegela nu gulondega ima yene ba? Tuajiya gusendesa guzumba ima yene muavula gubalega ba? Guzumba guetu mukunda nu  ima yene, guajiya gututuma ha gutshita gifua muatshitshile muvuala wa yala watunyine lubelo lua Yesu lua gumulandula ba? (Tanga Mako 10:17-22.) Idi nu ndando lume egi tulebese lujingu luetu, tukadigile tangua dietu nu ngolo jietu ha gukalagala gutshigina gua Nzambi!

17. Itshi tushigo naye gubuita mutshima?

¹⁷ Tubuitshigo mutshima egi tudi mulua ita, nu tudi naye gukhala hehi ha gulua ita yene lusugu nu lusugu. (Yat. 12:17) Aphangi’etu Aklisto ajiyilego gutubambela tshibu yetu ya gutshigina. Phamba esue hakhetu tudi naye gubamba gutshigina guetu guakola.

18. Mukunda natshi masuta a mu tangua dikulu akhalele mukuata tenyi tshibu jiawo jia ita?

¹⁸ Mu tangua dikulu, masuta akhalele muhanewa lutumbu gula amonesa gikhesa mu ita. Uvi yakhalele ndaga ya musonyi gula suta diavutuga gu ita mago a gituhu, tshibu ndo. Historien mumoshi wa enya Roma, mu jina dia Tacite, wasonegele egi: “Gula suta diabemba tshibu yenji gu ita, yakhalele ndaga ya musonyi diago.” Gishina giene masuta akhelele mukuata tenyi tshibu jiawo jia ita.

19. Luholo lutshi tuajiya gukuata tenyi tshibu yetu ya gutshigina?

¹⁹ Luholo lutshi tuajiya gukuata tenyi tshibu yetu ya gutshigina? Tuana guyikuata tenyi gula tudi muya phoso yagasue mu gudibungisa gua mu hungu, nu gula tudi mulongesa athu ndaga jia Yehowa nu Ufumu wenji. (Heb. 10:23-25) Tuana guyikuata luko gula tudi mutanga Biblia lusugu nu lusugu, nu gula tudi mutoga Yehowa atukuatese ha gutumagela mikhuala yenji mu ndaga jiagasue. (2 Tim. 3:16, 17) Hene, gushigo nga giluilo gimoshi gia Satana mbagitukalagala gubola mayilago. (Yesh. 54:17) ‘Tshibu yetu yakoma ya gutshigina’ mbayitubamba. Mbatutshita mudimo nu aphangi’etu a mala nu a akhetu nu ngolo jiagasue. Mbatubinga ita tuana gulua lusugu nu lusugu ha gubamba gutshigina guetu guakola. Luko, mbatuheta luendu lua gukhala gu khanda ya Yesu tangua mbaabinga ita ya Satana nu athu enji.—Yat. 17:14; 20:10.