LONGO DIA 46
Aphangi Akatuga Gudizula mu Ulo—Dihanenu Muavula mu Mudimo wa Yehowa
‘Yehowa udi ngolo jiami . . . Ngana gumushila mutshima.’—NGI. 28:7.
LUNGIMBO 131 “Ce que Dieu a uni”
NDAGA JIDI MU LONGO EDI *
1-2. (a) Mukunda natshi athu akatuga gudizula mu ulo adi naye gushila Yehowa mutshima? (Ngimbo 37:3, 4) (b) Itshi tuza muzuelela mu longo edi?
MUDI mutshigina gudizula mu ulo ba? Muakatuga gudizula mu ulo ba? Gula idi ngenyi, idi mumonesa egi udi mutshigina gukhala nu gusuangula nu mulumi’aye nga nu mukaji’aye wana guzumba muavula. Uvi gula athu adizula mu ulo, ana tagana nu malamba avula, adi naye nji guzula badesizio akoma. Hene ndaga mudi mukalagala tangua mudi mutagana nu malamba ene nu badesizo mudi muzula, yene mbayimonesa gula mbamukhala nu gusuanguluga mu ulo wenu nga ndo. Uvi gula muashila Yehowa mutshima, mbamuzula badesizio abonga, mbamukhala nji nu gusuanguluga nu gudivua guabonga mu ulo wenu. Gula mushigo mutumagela mikhuala ya Nzambi, mbamumona malamba mu ulo wenu, mbamushigo mukhala nu gusuanguluga nga hazonda.—Tanga Ngimbo 37:3, 4.
2 Longo edi didi muzuelela muavula athu akatuga gudizula mu ulo. Uvi diza muzuelela nji malamba anyi athu agasue adizudile gale mu ulo ana tagana nawo. Tuza mumona malongo tuajiya guzula mu ifezegeselo ya mala nu akhetu a mu tangua dikulu. Ifezegeselo yawo idi gutulongesa ndaga jiavula tuajiya gukalegela mu monyo wetu nu mu ulo wetu. Tuza mumona nji luholo tuajiya gulandula ifezegeselo ya aphangi’etu a mangino adizudile gale mu ulo.
MALAMBA ATSHI APHANGI AKATUGA GUDIZULA MU ULO AJIYA GUTAGANA NAWO?
Ndaga jitshi jiajiya gukanga athu akatuga gudizula mu ulo njila ha gudihana muavula mu mudimo wa Yehowa? (Tala paragrafe 3-4)
3-4. Malamba atshi aphangi akatuga gudizula mu ulo ajiya gutagana nawo?
3 Athu ako ajiya guwambela aphangi akatuga gudizula mu ulo ha gutshita ndaga gifua luholo athu avula ana kalagala. Ha gufezegesa, mvuaji nu athu ako a mu fami ajiya gusendesa guashinjiga ha guvuala ana mu phushi. Luko, mafut’awo nu aphangi’awo ako ajiya guashinjiga ha gusumba luphango nu ima iko yavula-vula.
4 Hene gula aphangi akatugala gudizula mu ulo atemenego, ajiya gudinginyisa mu mikudi. Ajiya nji gusendesa gutshita midimo matangua avula ha gufuta mikudi yene. Ngenyi midimo yene yajiya guazula tangua diagasue dia gulonguga Biblia, dia gukombelela gua mu fami nu dia guya mu mudimo wa gulongesa. Ajiya nji gulenga guya mu gudibungisa gua mu hungu ha gukalagala mudimo hagula ahete makuta avula nga hagula akatudiwago gu mudimo wene. Gula atshita ngenyi, mbaashigo muheta luendu lua gukalagala ndaga jiko jiabonga mu mudimo wa Yehowa.
5. Gifezegeselo gia phangi Klaus nu Marisa giagulongesa itshi?
5 Ifezegeselo yavula idi mumonesa egi gukamba ima yavula-vula ya ha mavu awa guanago gubatela athu gusuanguluga. Tutadilenu gifezegeselo gia phangi Klaus nu mukaji’enji Marisa. * Akhalele mukalagala mudimo matangua avula hagula ajiya guheta makuta avula nu ima iko. Uvi akhalelego nu gusuanguluga gua giamatshidia. Phangi Klaus udi muzuela egi: “Tuakhalele nu ima yagasue tuakhalele nayo funu, uvi tuakhalelego gudihana muavula mu mudimo wa Yehowa. Mu guzuela guabonga, tuakhalelego nu gusuanguluga.” Yajiya gukhala egi aye nji wadihanele ha gukamba ima yavula ya ha mavu awa, uvi wahetelego gusuanguluga. Gula idi ngenyi, ulebigo muila. Gula walandula ifezegeselo yabonga ya akombeledi a Yehowa, mbayigukuatesa ha gusombegesa. Thomo, tutalenu malongo aphangi a mala ajiya guzula mu gifezegeselo gia Fumu Yosafata.
KHALA MUSHILA YEHOWA MUTSHIMA, GIFUA FUMU YOSAFATA
6. Tangua masuta ajile ha guluisa Yosafata nu athu enji, luholo lutshi Yosafata walanduile longo didi mu Ishima 3:5, 6?
6 Aphangi a mala, yajiya gukhala egi matangua ako muana gudisagesa ha gutagenesa inemo yenu. Gula idi ngenyi, gifezegeselo gia Fumu Yosafata giajiya gumikuatesa. Fumu Yosafata wakhalele nu ginemo gia gubamba gifutshi giagasue gia Yuda! Itshi yakalegele muene ha gutagenesa ginemo giene? Yosafata watshitshile yagasue ha gubamba enya gu Yuda. Watungile ibayi ya membo a gu Yuda, wabungishile masuta gubalega 1 160 000. (2 Gudi. 17:12-19) Uvi gungima Yosafata wataganele nu lamba diakola. Masuta avula a enya Amona nu enya Moaba nu athu a mu membo a gu milundu ya Seyile, ajile ha gumuluisa nu fami yenji nu athu a mu gifutshi gienji. (2 Gudi. 20:1, 2) Itshi yakalegele Yosafata? Watogele Yehowa ha gumukuatesa nu ha gumuhana ngolo. Ndaga yakalegele muene idi gudivua nu longo didi mu Ishima 3:5, 6. (Tanga.) Mukanda wa 2 Gudilanduluila 20:5-12 udi mumonesa egi Yosafata wakombelele Yehowa nu gudibulumuisa guagasue. Ngenyi wamonesele egi washile mutshima wenji wagasue gudi Yehowa. Luholo lutshi Yehowa wahanele mvutu gu gisambu gia Yosafata?
7. Luholo lutshi Yehowa wahanele mvutu gu gisambu gia Yosafata?
7 Yehowa watumine muenya Levi mumoshi jina dienji Yahaziele, ha guwambela Yosafata egi: ‘Maganenu hanyinyi, mudinyigisago, talenu luholo Yehowa mbawumihuluisa.’ (2 Gudi. 20:13-17) Mu guzuela guabonga, gula athu aya mulua ita, anago gutshita ngenyi! Uvi tujimbilago egi mbimbi eji jiakatugile gudi Yehowa hakhenji. Yosafata wakhalele mushila Nzambi mutshima, hene wakalegele diago gifua luholo luamuwambelele muene. Tangua muene nu athu enji ahetele ha fundo akhalele naye gulua ita nu mbalagaji, wazanguile ayimbi a ngimbo, waahagele gu tuama. Ayimbi a ngimbo ene akhalelego mujiya gulua ita. Uvi Yehowa gabembelego Yosafata nu athu enji, waakuatesele ha gubinga mbalaji jiawo.—2 Gudi. 20:18-23.
Gula aphangi akatuga gudizula mu ulo atshigina gudihana muavula mu mudimo wa Yehowa, adi naye gukombelela, gulonguga Biblia (Tala paragrafe 8, 10)
8. Luholo lutshi gifezegeselo gia Yosafata giajiya gukuatesa aphangi a mala?
8 Aphangi a mala, gifezegeselo gia Yosafata giajiya gumikuatesa. Tudi mujiya egi mudi nu ginemo giakola gia gubamba enya fami jienu. Hene muana kalagala ngolo ha guakuatesa. Uvi gula watagana nu malamba, wajiya gumona gifua aye hakh’aye wajiya guamanesela. Uvi ushigo mutshima mu ngolo jiaye hakh’aye. Tangua udi hakh’aye, toga Yehowa ha gugukuatesa. Tangua udi nji nu mukaji’aye, wambela Yehowa ndaga jiagasue jidi mu mutshima waye. Tanga Biblia nu mikanda yetu iko ha gukamba utuameji wa Yehowa; kalegela nji ndaga udi mutanga. Athu ako ajiyilego gusuanguluga nu badesizio abonga udi muzula. Ajiya guguwambela egi wasaluga. Ajiya guguwambela luko egi makuta nu ima iko yavula-vula yene mbayibamba diago fami yaye. Uvi ujimbilago gifezegeselo gia Yosafata. Washile mutshima wenji gudi Yehowa; wayimonesele nji mu makalegelo enji. Yehowa gabembelego Yosafata; aye nji mbagashigo gugubemba nga hazonda. (Ngi. 37:28; Heb. 13:5) Uvi itshi yala nu mukaji’enji ajiya gukalagala luko ha gukhala nu gusuanguluga mu ulo wawo?
DIHANENU MUAVULA MU MUDIMO WA YEHOWA, GIFUA PROFETE YESHAYA NU MUKAJI’ENJI
9. Itshi tuajiya guzuela mukunda nu profete Yeshaya nu mukaji’enji?
9 Profete Yeshaya nu mukaji’enji adihanele muavula mu mudimo wa Yehowa. Yeshaya wakhalele profete. Yajiya gukhala egi mukaji’enji wakhalele nji ‘profete.’ (Yesh. 8:1-4) Yeshaya nu mukaji’enji ashile mudimo wa Yehowa ha fundo dia thomo mu monyo wawo. Adi diago gifezegeselo giabonga mukunda nu aphangi adizudile gale mu ulo!
10. Luholo lutshi gulonguga profesi jia Biblia guajiya gukuatesa yala nu mukaji’enji ha gudihana muavula mu mudimo wa Yehowa?
10 Mangino, aphangi anyi adizudile gale mu ulo ajiya gutshita nji yagasue ha gudihana muavula mu mudimo wa Yehowa. Gula adi mulonguga hamoshi profesi jia Biblia nu adi mumona luholo jidi mutagenesewa, yajiya guakuatesa ha gushila Yehowa mutshima muavula. * (Tito 1:2) Ajiya gutangiza ndaga adi naye gukalagala ha gutagenesa profesi jiko jia Biblia. Ha gufezegesa, ajiya gudihana ha gutagenesa profesi yazuelele Yesu egi, lukuma luabonga lua Ufumu ludi naye gulongesewa ha mavu agasue gutuama egi gisugishilo gize. (Mat. 24:14) Gula yala nu mukaji’enji adi nu gutshigina egi profesi jia Biblia jidi mutagenesewa, mbaadihana muavula mu mudimo wa Yehowa.
KAMBENU THOMO UFUMU WA NZAMBI, GIFUA PRISILE NU AKILA
11. Ndaga itshi Prisile nu Akila akalegele? Mukunda natshi?
11 Aphangi akatuga gudizula mu ulo ajiya guzula malongo mu gifezegeselo gia Prisile nu Akila, enya Yuda anyi akhalele mu dimbo dia Roma. Avuile lukuma luabonga luatadila Yesu, gungima abuile Aklisto. Akhalele nu gusuanguluga mu monyo wawo. Uvi ndaga jiawo jiasombegesele mbala imoshi tangua Fumu Klode wawambelele enya Yuda agasue ha gukatuga gu Roma. Yakhalele lamba diago mukunda nu Akila nu Prisile. Handaga akhalele naye gukatuga ha fundo ajidila gale, ha guya mu dimbo dihe-dihe ha gusendesa luko mudimo wawo wa gutunga matenta. Uvi lamba ataganele nadio diakangele njila ha gusha mudimo wa Yehowa ha fundo dia thomo ba? Ndo sha. Handaga tangua ahetele gu Kolinto, adihanele muavula ha gukuatesa hungu. Akalegele mudimo hamoshi nu Phaula ha gukolesa aphangi a mu hungu diene. Gungima akatugile gu Kolinto, ayile mu membo ako akhalele nu funu ya alongeshi a Ufumu. (Makal. 18:18-21; Lomo 16:3-5) Prisile nu Akila akhalele nu gusuanguluga guavula mu ulo wawo!
12. Mukunda natshi yala nu mukaji’enji adi naye guzuelela gutuama ndaga mbaakalagala mu mudimo wa Yehowa?
12 Mangino nji aphangi anyi adizudile gale mu ulo ajiya gulandula gifezegeselo gia Prisile nu Akila gula adi mukamba thomo Ufumu wa Nzambi. Tangua diabonga yala nu mukhetu adi naye guzuelela ndaga jia mu nyuma mbaakalagala, didi tangua adi mutshigina gudizula mu ulo. Gula yala nu mukhetu azuelela ndaga adi naye gukalegela ha gudihana muavula mu mudimo wa Yehowa nu atshita ngolo ha gujitagenesa, Yehowa mbawakuatesa. (Mulo. 4:9, 12) Tutadilenu gifezegeselo gia phangi Russell nu Elizabeth. Phangi Russell udi muzuela egi: “Gutuama egi tudizule mu ulo, tuadiangele guzuelela ndaga mbatukalagala mu mudimo wa Yehowa.” Phangi Elizabeth udi muzuela egi: “Tuadiangele guzuelela ndaga jiene gutuama hagula egi tangua mbatuzula badesizio ako akoma, atukangigo njila ha gudihana muavula mu mudimo wa Yehowa.” Hene Phangi Russell nu Elizabeth akatugile gu Micronésie, ayile fundo diakhalele nu funu ya alongeshi a Ufumu.
Gula aphangi akatuga gudizula mu ulo atshigina gudihana muavula mu mudimo wa Yehowa, adi naye guzuelela ndaga adi naye gutshita (Tala paragrafe 13)
13. Ha gutadila Ngimbo 28:7, gubonga gutshi mbatuheta gula tudi mushila Yehowa mutshima?
13 Gudi nji nu aphangi ako avula adizudile gale mu ulo azudile desizio dia gudihana muavula mu mudimo wa Yehowa. Gula yala nu mukaji’enji adiangela guzuelela ndaga mbaakalagala mu mudimo wa Yehowa nu atshita ngolo ha gutagenesa ndaga jiene, mbaakhala nu gusuanguluga guavula. Yehowa mbawakuatesa, mbaakolesa gutshigina guawo gudi muene, nu mbaakhala nu gusuanguluga gua giamatshidia.—Tanga Ngimbo 28:7.
SHENU MUTSHIMA MU NDAGA JIALAYILE YEHOWA, GIFUA MUPOSTOLO PHETELO NU MUKAJI’ENJI
14. Luholo lutshi mupostolo Phetelo nu mukaji’enji amonesele egi ashile gutshigina mu laji didi mu Matayo 6:25, 31-34?
14 Aphangi adizudile gale mu ulo ajiya nji guheta malongo mu gifezegeselo gia mupostolo Phetelo nu mukaji’enji. Tangua mupostolo Phetelo wataganele nu Yesu mbala ya thomo, mbeji samano gungima, wakhalele naye guzula desizio dimoshi dia ndando. Phetelo wakhalele mutshita mudimo wa gulowa jishui ha gudisa fami yenji. Hene tangua diamutamegene Yesu ha guya n’enji mu mudimo wa tangua diagasue, Phetelo wakhalele naye gutangiza mukaji’enji gutuama egi azule desizio dia gulandula Yesu. (Luka 5:1-11) Phetelo wazudile desizio diabonga dia guya nu Yesu. Idi mumonega egi mukaji’enji wasuangulugile nu desizio diene. Biblia idi mumonesa egi gungima dia gufuzumuga gua Yesu, mukaji’a Phetelo wakhalele muya nu guwenda nu mulumi’enji mu mudimo wa gulongesa. (1 Kol. 9:5) Idi naye gukhala egi mukaji’a Phetelo wakhalele nu makalegelo abonga, handaga tangua Yehowa wawambelele Phetelo ha gusonegela Aklisto adizudile gale mu ulo, Phetelo gavuilego musonyi ha guasonegela. (1 Phet. 3:1-7) Yadiago, Phetelo nu mukaji’enji ashile mutshima mu ndaga yalayile Yehowa egi mbagashigo guabemba gula asha Ufumu ha fundo dia thomo.—Tanga Matayo 6:25, 31-34.
15. Gifezegeselo gia phangi Tiago nu Esther gidi gutulongesa itshi?
15 Gula muadizudile gale mu ulo ivo yavula, luholo lutshi muajiya gukudisa nzala ya gudihana muavula mu mudimo wa Yehowa? Muajiya gulandula ifezegeselo ya aphangi ako adizudile gale mu ulo. Ha gufezegesa, muajiya gutanga malongo adi nu muto wa lumene egi “Ils se sont offerts volontairement.” Malongo ene akuatesele phangi Tiago nu mukaji’enji Esther, a gu Brésil, ha gukudisa nzala ya guya fundo diakhalele nu funu ya alongeshi a Ufumu. Phangi Tiago udi muzuela egi: “Tangua tuatangele mene jia aphangi ako, tuamonele luholo Yehowa wakuatesele akombeledi enji a mu tangua dietu. Yatuhanele nzala ya gutshita gifua ene hagula esue nji Yehowa atukuatese.” Gungima, ayile gu Paraguay. Guene ana longesa sendese mu 2014 mu terituare ya athu ana zuela portugais. Phangi Esther udi muzuela egi: “Tuana zumba muavula mukanda wa Efeso 3:20. Matangua avula, tuana mona gutagenesewa gua mbimbi jia verse eyi mu mudimo wetu.” Mu verse yene, Phaula walayile egi Yehowa mbawutuhana ima yavula gubalega yinyi tuana gumutoga. Yehowa wana taganesa laji edi matangua avula!
Gula aphangi akatuga gudizula mu ulo atshigina gudihana muavula mu mudimo wa Yehowa, adi naye gutoga ukuateshi gudi Aklisto a gukula mu nyuma (Tala paragrafe 16)
16. Itshi aphangi akatuga gudizula mu ulo adi naye gukalagala gula adi mutshigina gudihana muavula mu mudimo wa Yehowa?
16 Aphangi anyi akatuga gudizula mu ulo ajiya guzula malongo gudi aphangi ako ana gushila Yehowa mutshima. Aphangi ako adizudile gale mu ulo atshita gale ivo yavula mu mudimo wa tangua diagasue. Gula enue nji mudi mutshigina gudihana muavula mu mudimo wa Yehowa, muajiya guatoga ukuateshi. Ngenyi mbamumonesa egi mudi mushila Yehowa mutshima. (Ish. 22:17, 19) Akulu nji ajiya gukuatesa aphangi akatuga gudizula mu ulo ha gudihana muavula mu mudimo wa Yehowa.
17. Itshi yabuidile phangi Klaus nu Marisa? Ndaga yene idi gutulongesa itshi?
17 Matangua ako tuajiya guzula desizio dia gudihana muavula mu mudimo umoshi ngenyi wa Yehowa, uvi muene atutuameza mu luholo luko. Tutadilenu gifezegeselo gia phangi Klaus nu Marisa anyi tuazuelela mu paragrafe 5. Ivo thathu gungima dia gudizula mu ulo, ayile muhana mago mu mudimo wa gutunga jinzo jia Ufumu gu Betele ya Finlande. Uvi gungima a awambelele egi adi naye gukalagala phamba mbeji samano. Ndaga yene yaalebesele muila. Uvi matangua azonda gungima, a atamegele ha gulonguga zuelelo dia Arabe. Mangino adi nu gusuanguluga, handaga adi mulongesa mu gifutshi giko mu terituare ya athu ana zuela Arabe. Gula phangi Marisa watangiza ndaga yene, wana zuela egi: “Yakhalele lamba ha gubemba ima tuakhalele nayo nu ha gushila Yehowa mutshima. Uvi tangua ngana mona luholo Yehowa wana gutukuatesa mu luholo lua gushimana, yana gungutuma ha gumushila luko mutshima muavula.” Gifezegeselo egi gidi mumonesa egi gula tuasha mutshima wetu wagasue gudi Yehowa, muene mbawutukuatesa diago.
18. Itshi yala nu mukhetu adi naye gutshita ha gulandula gushila Yehowa mutshima?
18 Ulo udi kado ga Yehowa. (Mat. 19:5, 6) Yehowa wana tshigina egi aphangi anyi adizudile gale mu ulo akhale nu gusuanguluga mu ulo wawo. (Ish. 5:18) Enue aphangi muakatuga gudizula mu ulo, tadilenu muabonga ndaga muana kalagala mu monyo wenu. Muana monesa egi muana suanguluga muavula nu kado gamihanele Yehowa ba? Kombelelenu Yehowa ha gumutoga ukuateshi. Tangenu Biblia ha guheta malongo ajiya gumikuatesa. Gungima, tumagelenu malongo ene. Yadiago, gula yala nu mukhetu adihana muavula mu mudimo wa Yehowa, mbaakhala nu gusuanguluga guavula mu ulo wawo!
LUNGIMBO 132 Désormais, nous ne faisons qu’un
^ par. 5 Badesizio ako tuana guzula, ana gumonesa luholo tuajiya gukalegela tangua nu ngolo jietu mu mudimo wa Yehowa. Athu akatuga gudizula mu ulo, ana zula badesizio ajiya guabatela gusuanguluga nga malamba mu monyo wawo. Longo edi diza mukuatesa aphangi anyi akatuga gudizula mu ulo ha guzula badesizio abonga ajiya guabatela gusuanguluga monyo wawo wagasue.
^ par. 5 Mu longo edi, majina ako asombegesewe.
