MU GIVO hehi nu 670 gutuama dia tangua dietu, Asiliya yabuile empire akoma a ha mavu a mudidi. Site internet ya Musée ya gu Britanique idi muzuela egi: “Empire yene yakhalele muhinyina sendese gu weste ya Chypre uu nu gu Est ya gu Iran. Mu ivo iko, akhalele nji muhinyina gifutshi gia Ejipitu.” Kapitale genji gakhalele Ninive. Ninive yakhalele dimbo dimoshi diakoma ha mavu a mudidi. Diakhalele nu ba monima akoma nu mafundo awaha nu jinzo jiabonga nu ba biblioteke akoma. Isona yakhalele ya gusonega mu gibayi gia Ninive ikulu yakhalele mumonesa egi Fumu Ashurbanipal wakhalele gifua mafumu ako a gu Asiliya, handaga wakhalele guditamega egi “fumu wa ha mavu a mudidi.” Idi mumonega egi mu uhinyinyi wenji, guakhalelego nga nu muthu mumoshi wajiya gutambula Asiliya nu Ninive.

Uvi, tangua Asiliya yabuile nu ngolo jiavula diago, Yehowa watumile profete Sefanya ha guzuela egi: “[Yehowa] . . . Mbawushiya Asiliya, mbawubuisa dimbo dia Ninive makhulu gifua temu dilandu.” Yehowa wawambelele nji profete Nahuma ha guzuela egi: “Kuyenu makuta a utadi wa siliva, kuyenu wolo! . . . Dimbo dia Ninive diashiyiwa, diabua makhulu, diasala githuhu! . . . Muthu wagasue mbawugumona mbawulenga nu mbawuzuela egi, ‘dimbo dia Ninive diafua!’” (Sef. 2:13; Nah. 2:9, 10; 3:7) Yajiya gukhala egi tangua athu avuile mbimbi eji, adihudile egi: ‘Ndaga eyi yajiya diago gukalegewa ba? Asiliya yajiya diago gushiyiwa ba?’ Yajiya gukhala egi athu akhalelego mutshigina ndaga yene.

Profesi yene yatagenesewe. Matangua azonda gutuama dia givo 600 gutuama dia tangua dietu, masuta a gu Babilona nu a gu Mede ashiyile Asiliya. Dimbo dia Ninive diabuile makhulu, athu adijimbidile diago! Mukanda umoshi wa Musée ya gu New York udi muzuela egi: “Gungima dia ivo yavula, dimbo dia Ninive diabuile makhulu, diatotele diago. Athu ana jiya lumene lua dimbo diene phamba mu Biblia.” Société imoshi yana longuga ndaga jia Biblia (The Biblical Archaeology Society) idi muzuela egi, “gushigo nga muthu mumoshi wakhalele mujiya gula Ninive yakhalele diago guene.” Uvi mu 1845, muenya ndunge mumoshi, jina dienji Austen Henry Layard wasendesele gukamba fundo diakhalele dimbo dia Ninive. Ndaga jiamonele muene jiamonesele egi Ninive yakhalele dimbo dimoshi dia lutumbu diago.

Gutagenesewa gua profesi jiatadila Ninive gudi mukolesa gutshigina guetu egi profesi jia Biblia jiatadila gushiyiwa gua mafumu a politike a mangino mbajitagenesewa.—Dan. 2:44; Yat. 19:15, 19-21.