1. Mihu itshi tuajiya gudihula?

 WANA guvua woma tangua wana tangiza ndaga jidi naye gubua mu masugu adi muza, gifua—gushiyiwa gua ikombelelo ya mambo, uluishi wa Goga wa gu Magoga nga ita ya Alemagedona ba? Wadihudile gale egi: ‘Tangua ndaga jiene mbajibua, mbangusala diago yagujinginyina gudi Yehowa ba?’ Gila idi ngenyi, ndaga jiazuelele Yesu mu verse yakuata maga a longo edi jiajiya diago gugukuatesa. Yesu wawambelele alandudi enji egi: ‘Mudisagesago mu mitshima yenu. Khalenu nu gutshigina.’ (Yone 14:1) Gutshigina guakola mbagutukuatesa ha gukhala nu gikhesa mu masugu adi muza.

2. Itshi yajiya gutukuatesa ha gukolesa gutshigina guetu? Itshi tuza mumona mu longo edi?

² Gutangiza ndaga tuana tshita tangua tuana tagana nu malamba, guajiya gutukuatesa ha gujiya luholo lua gukolesa gutshigina guetu. Gutangiza ndaga jiene guajiya gutukuatesa ha gujiya ndaga tudi naye gutshita ha gukolesa gutshigina guetu. Tangua diagasue tuana gulua nu malamba, gutshigina guetu guana kola. Ndaga yene mbayitukuatesa ha gulua nu malamba mu masugu adi muza. Mu longo edi, tuza mumona ndaga nguana jiataganele najio alandudi a Yesu. Ndaga jiene jiamonesele diago egi akhalele naye gukolesa luko gutshigina guawo. Gungima tuza mumona luholo ndaga jiabuidile alandudi ene jiajiya nji gutubuila esue, nu luholo ndaga jiene jiajiya gutukuatesa ha gulua nu malamba adi muza.

3. Mbimbi jia Yesu jidi mu Matayo 6:30, 33 jidi gutukuatesa ha gukotelesa itshi?

³ Tata wagasue wana tshita ngolo ha gukambela mukaji’enji nu an’enji ima ya gudia, nu milele, nu fundo dia gubanda. Ishigo ndaga yaleba ha guheta ima eyi yagasue mu masugu awa a lamba. Aphangi’etu ako Aklisto ashigo luko nu midimo. Adi mutshita ngolo ha  gukamba midimo uvi ashigo guyiheta. Aphangi ako ahetele midimo, uvi ayitunyile handaga yakhalelego midimo Aklisto ajiya gukalagala. Tangua tuana tagana nu malamba a luholo elu, yana toga egi tukhale nu gutshigina guakola egi Yehowa mbawutukuatesa ha guheta ima tudi naye funu mu fami yetu. Yesu wamonesele ndaga yene haphelo mu Diskur dienji dia Holu dia Mulundu. (Tanga Matayo 6:30, 33.) Gila tudi diago nu gutshigina egi Yehowa mbagashigo gutubemba, mbayituhana ngolo jia gusha matangi’etu agasue mu mudimo wenji. Gumona luholo Yehowa udi gutukuatesa ha guheta ima tudi nayo funu, mbagutukuatesa ha gusuena hehi n’enji. Ngenyi, gutshigina guetu nji mbagukola.

4-5. Itshi yakuatesele enya fami imoshi tangua ataganele nu lamba dia mbongo nu ima ya gudia?

⁴ Enya fami imoshi gu gifutshi gia Venezuela akhalele mu lamba dia guheta makuta nu ima ya gudia. Uvi tala luholo Yehowa waakuatesele. Phangi Miguel Castro nu enya fami yenji akhalele mutshita mudimo mu ferme yawo, yakhalele guakuatesa ha guheta makuta nu ima ya gudia. Uvi lusugu lumoshi, mbundudi jiajile nu mata, jiatambudile ferme yene, gungima jiakayele phangi muene nu fami yenji. Phangi Miguel Castro udi muzuela egi: “Phangi mumoshi watuhanele gagilanga gazonda ha gudima, gene gadi gutukuatesa masugu awa. Gimenegena giagasue ngana toga Yehowa egi atukuatese ha guheta ima tudi naye funu mukunda nu lusugu lua mangino.” Phangi Miguel Castro nu fami yenji adi diago mu lamba, uvi ana tshigina nu mutshima umoshi egi Tata wetu waguzumba mbawuakuatesa diago ha guheta ima adi naye funu. Gishina giene phoso nu phoso, phangi muene nu fami yenji ana guya mu gudibungisa gua mu hungu, ana longesa nji mbimbi ya Nzambi. Ana gusha mudimo wa Yehowa ha fundo dia thomo mu monyo wawo. Yehowa nji wana guakuatesa ha guheta ima adi naye funu.

⁵ Fami ya phangi muene yataganele diago nu lamba, uvi muene nu mukaji’enji Yurai, ana wunguluga (yabuluka) luholo Yehowa waakuatesele. Matangua ako, Yehowa wakhalele mukalegela aphangi a mu hungu ha guakuatesa nu tuma tuazonda-zonda. Aphangi ene akhalele nji mukuatesa phangi Miguel ha guheta mudimo. Matangua ako Yehowa wakhalele guakuatesa ha guheta ima akhalele naye funu. Aphangi a gu Betele akhalele gututumina ima mu mahungu. Yehowa gabembelego nga hazonda. Mangino gutshigina gua enya fami yene gudi diago guakola. Mun’awo wa Somi Yoseline wamonesele luholo Yehowa waakuatesele, udi muzuela egi: “Idi diago ndaga ya gushimana ha gumona koko dia Yehowa haphelo ngegi. Yehowa udi diago futa diami wa mutshima, mbagashigo gungubemba. Malamba tuatagana nawo mu fami yetu, atukuatesa ha gukolesela mu malamba akola mbaatubuila mu masugu adi muza.”

6. Luholo lutshi wajiya gukolesa gutshigina guaye gila udi nu lamba dia guheta mbongo?

⁶ Udi nu lamba dia guheta mbongo ba? Gila idi ngenyi, udi diago mu tangua dia lamba. Uvi wajiya gukalegele tangua diene dia lamba ha gukolesa gutshigina guaye. Kombelela Yehowa, tanga nji ndaga jiazuelele Yesu mu Matayo 6:25-34, gungima tangigiza ndaga jiene. Tadila nji ifezegeselo ya aphangi a masugu awa; idi momonesa egi Yehowa wana kuatesa akombeledi enji.  (1 Kol. 15:58) Gutshita ngenyi mbagutukuatesa ha gusha mutshima egi luholo Tata wetu wa mu dilu wakuatesele aphangi ako akhalele mu lamba, mbawutukuatesa nji gila tuatagana nu malamba a luholo luene. Wana jiya ima tudi naye funu, uvi wana jiya nji luholo lua gutuhana naye. Gila Yehowa wagukuatesa mu monyo waye, gutshigina guaye mbagukola diago; mbawuheta ngolo jia gulua nu malamba akola mu masugu adi muza.—Hab. 3:17, 18.

7. Ha gutadila Matayo 8:23-26, luholo lutshi “funji yakola” yalolele gutshigina gua alandudi a Yesu?

⁷ Tangua Yesu nu alandudi enji akhalele mu wato, funji yakola yajile mu gisagumuisa. Yesu wakalegele tangua diene ha guakuatesa ha gujiya egi adi naye gukolesa gutshigina guawo. (Tanga Matayo 8:23-26.) Funji yene yanginyishile meya mu wato, uvi Yesu wakhalele genji mubanda. Alandudi avile woma wavula; tangua azugishile Yesu gu tulo ha gumutoga ukuateshi, Yesu waahudile nu gisemo giagasue egi: “Itshi mudi muvila woma ngenyi, enue enya gutshigina guazonda?” Yajiya gukhala egi alandudi akotelesele egi Yehowa wakhalele diago nu ngolo jia gubamba Yesu nu athu akhalele n’enji. Ndaga eyi idi gutulongesa itshi? Gutshigina guakola guajiya gutukuatesa ha gukolesela mu malamba akola, nga mu ndaga jidi gifua “funji yakola diago.”

8-9. Ndaga itshi ya lamba yabuidile phangi Anel? Itshi yamukuatesele ha gukolesa gutshigna guenji?

⁸ Tala luholo gutshigina guakola guakuatesele phangi wa mukhetu Anel, wa gu gifutshi gia Porto Rico, ha gubinga ndaga yalamba yamubuidile. Wataganele nu lamba diakola diakhalele gifua “funji yakola.” Lamba dienji diasendesele mu 2017 tangua gikudi giakola giabuishile inzo yenji. Mudimo wenji nji wafuile mukunda nu gikudi giene. Phangi Anel wazuelele egi: “Mu masugu ene ngakhalele nu gikenene diago, uvi gakhalele musha mutshima wagasue gudi Yehowa mu njila ya gisambu. Ngabembelego egi gikenene giene gingulebese ha gutshita ndaga jiko.”

⁹ Khadilo dia gutumaga nji diakuatesele phangi Anel ha gukolesela mu tangua diene dia lamba. Wazuelele egi: “Gutumagela ndaga jiakhalele gutuwambela ulondegi wa Yehowa guangukuatesele ha gutulula mutshima. Yehowa wangukuatesele mu njila ya aphangi a mu nyuma. Anguhanele gikhesa mu mbimbi jiawo, uvi agunguhanele nji ima ngakhalele naye funu. Yadiago, Yehowa wanguhanele ima yavula gubalega inyi ngakhalele naye funu. Ndaga yene yakolesele diago gutshigina guami.”

10. Itshi udi naye gukalagala tangua udi mutangana nu lamba diakola?

¹⁰ Tangua diko udi mutagana nu lamba didi gifua “funji yakola.” Yajiya gukhale egi gikudi giakola nga ndaga iko gifua misongo yakola idi gugusagesa. Tangua diko ushigo mujiya ndaga ya gutshita handaga misongo yene yagulebesa muila. Matangua ako ndaga yene yajiya guguhana gikenene, uvi ubembigo egi gikenene giene gigukange njila ha gushila Yehowa mutshima. Khala mutshita isambu yakola ha gusuena hehi nu Yehowa. Ha gukolesa gutshigina guaye, khala mutangigiza luholo Yehowa wagukuatesele gale mu masugu abalega. (Ngi. 77:11, 12) Jiya egi Yehowa mbagashigo gugubemba nga hazonda.

11. Mukunda natshi tudi naye guzula desizio dia gutumagela aphangi adi gututuameza mu nyuma?

 ¹¹ Ndaga itshi iko yajiya gugukuatesa ha gukolesela mu tangua dia lamba? Phangi Anel wazuelele egi gutumaga guamukuatesele. Gudi nu athu Yehowa nu Yesu ana shila mutshima, aye nji khala mushila athu ene mutshima. Matangua ako, aphangi adi gututuameza mu nyuma ajiya gutuwambela ha gutshita ndaga imoshi, uvi mu matangi etu tushigo musuanguluga nu ndaga yene. Tujimbilago egi Yehowa wana suanguluisa athu ana tumaga. Mene jia Biblia nu ndaga jiataganele najio akombeledi ako a Yehowa, jidi gutumonesa egi gutumaga guakuatesele gale athu avula ha guhuluisa mionyo yawo. (Guz. 14:1-4; 2 Gudi. 20:17) Tangigiza mene eji. Gutangigiza guene mbagugukuatesa ha gutumagela ndaga jidi muzuela ulondegi wa Yehowa mangino, uvi mbagugukuatesa nji ha gutumaga mu masugu adi muza. (Heb. 13:17) Hakiene, mbawushigo mukhala nu woma wa lamba diakola mbaditubuila mu masugu adi muza.—Ish. 3:25.

12. Ha gutadila Luka 18:1-8, gudivua gutshi gudi mukatshi dia gukolesela mu malamba nu gukhala nu gutshigina?

¹² Yesu wajiyile egi gutshigina gua alandudi enji guajiya guleba gila athu a akalegela ndaga jiabola. Gishina giene, waahanele gifezegeselo gimoshi ha guakuatesa ha gukolesela. Gifezegeselo giene gidi mu mukanda wa Luka. Yesu waatele lumene lua mukhetu mumoshi wa gafunda. Mukhetu muene wakhalele mutoga nzuji mumoshi wa mutshima wabola hagula amukuatese gu mulonga wenji. Wakhalele gudifelela egi nzuji muene mbawumukuatesa gula walandula gumutoga. Gu gisugishilo, nzuji muene wamukuatesele. Ndaga yene yatulongesa itshi? Yehowa gashigo nu mutshima wabola. Yesu wahudile egi: ‘Nzambi mbagashigo musophesa mu luholo luatagana athu atombele muene, adi gumudidila phipha nu muanya ba?’ (Tanga Luka 18:1-8.) Gungima Yesu wazuelele luko egi: ‘Tangua mbadiza Mun’a muthu, mbawusanga diago gutshigina gua luholo elu ha mavu ba?’ Gila athu atukalegela ndaga jiabola, tudi naye gumonesa khadilo dia guhuiminyina nu dia gukolesela. Ngenyi mbatumonesa egi tudi nu gutshigina kuakola gifua gua mukhetu wa gafunda, yonu adi muzuelela mu mukanda wa Luka. Gutshigina gua luholo elu mbagutukuatesa ha gusha mutshima egi Yehowa mbawutukuatesa diago. Tudi naye nji gukhala nu gutshigina egi gisambu giana kuatesa ha guheta ngolo jiavula. Matangua ako Yehowa wajiya guhana mvutu gu isambu yetu mu luholo tushigo mutangiza.

13. Luholo lutshi gisambu giakuatesele enya fami imoshi ataganele nu ndaga ya lamba?

¹³ Tuzuelele ndaga yabuidile phangi Vero wa gu République Démocratique du Congo. Mulumi’enji gakhalelego Temue wa Yehowa. Lusugu lumoshi, muene nu phangi Vero nu mun’awo wa mukhetu wa ivo 15 akhalele mulenga dimbo diawo handaga masuta abudile ita guene. Khanda alengele, ayile musanga masuta akangi gale njila. Masuta ene azuelele egi adi guashiya. Phangi Vero wasendesele gukaluluga, uvi mun’awo wa mukhetu wasendesele gutshita gisambu mu dijui diakola hagula gin’enji atulule mutshima.  Mu gisambu giene, watangele jina dia Yehowa muavula. Tangua mona muene wamanesele, fumu wa masuta wamuhudile egi: “Mona, nanyi wagulongesele gutshita gisambu?” Wamuvutudile egi: “Mama wangulongesele ha gulandula gifezegeselo gia ndaga jidi mu Matayo 6:9-13.” Fumu muene wa masuta wamulezele egi: “Mona, ndenu mu guhuima nu mvuaji jiaye. Yehowa amibambe!”

14. Ndaga itshi yajiya gulola gutshigina guetu? Itshi yajiya gutukuatesa ha gukolesela?

¹⁴ Lumene elu ludi gutukuatesa ha gujiya egi gisambu gidi nu ndando yavula diago. Uvi itshi wajiya gukalagala gula ushigo muheta mvutu mu isambu yaye mu phushi, ngando gula Yehowa gaguhanelego mvutu yene mu luholo lua gushimana? Landula gifezegeselo gia mukhetu wa gafunda wazuelele Yesu. Ubembigo gukombelela. Khala nu gutshigina egi Nzambi wetu mbagashigo gugubemba. Muene udi mujiya tangua nu luholo lua guhana mvutu gu gisambu giaye. Landula gutoga Yehowa aguhane nyuma yenji. (Fili. 4:13) Ujimbilago egi gualeha ndo Yehowa mbawugusuanguluisa muavula diago. Mbawushigo muwunguluga luko malamba wataganele nawo. Gila udi mutoga Yehowa agukuatese ha gukolesela mu malamba, mbawuheta nji ngolo jia gukolesela malamba a mu masugu adi muza.—1 Phet. 1:6, 7.

15. Mukanda wa Matayo 17:19, 20 udi mumonesa egi alandudi a Yesu ataganele nu lamba ditshi?

¹⁵ Yesu walongesele alandudi enji egi gutshigina mbaguakuatesa ha gubinga malamba. (Tanga Matayo 17:19, 20.) Akhalele mukaya bademo, uvi gudi nu lusugu lumoshi abingilego ha gukaya demo dimoshi. Mukunda natshi? Yesu waawambelele egi akhalele naye gukolesa luko gutshigina guawo. Waawambelele egi gila adi nu gutshigina guavula, ajiya gukolesela nga mu malamba akola adi gifua milundu yaleha! Esue nji mangino, tuajiya gutagana nu malamba ako adi mumonega gifua tuajiyilego guabinga.

16. Luholo lutshi gutshigina guakuatesele Geydi ha gukolesela tangua ashiyile mulumi’enji?

¹⁶ Tuzuelele gifezegeselo gia phangi Geydi, wa gu Guatemala. Phangi muene akatugile mu gudibungisa gua mu hungu nu mulumi’enji Edi. Tangua akhalele muvutuga, mulumi’enji washiyiwe mu njila. Phangi Geydi wakhalele nu gikenene giavula, uvi luholo lutshi gutshigina guamukuatesele ha gukolesela? Udi muzuela egi: “Ngakhalele mutshita gisambu ha gubemba ginemo giami giagasue ha mago a Yehowa. Yakhalele gunguhana guhuima.Yehowa wana gungukuatesa mu njila ya enya fami yami nu aphangi a mu hungu. Gudihana muavula mu mudimo wa Yehowa guana gungukuatesa ha gulebesa gikenene giami, nu ha gutuna gudisagesa mukunda nu ndaga mbajibua hamene. Luholo ngakolesela mu ndaga eyi ngatagana nayo, yangukuatesa ha gukotelesa egi lamba dia luholo luagasue diajiya gungubuila, uvi Yehowa nu Yesu nu aphangi’ami a mu nyuma, mbaangukuatesa ha gukolesela.”

17. Itshi tuajiya gukalagala gila tuatagana nu lamba diakola?

¹⁷ Aye nji udi nu gikenene mukunda nu gufua gua muthu mumoshi wakhalele muzumba ba? Ha gukolesa gutshigina guaye mu felela dia gufuzumuga, khala mutanga mene jia athu afuzumugile  jidi mu Biblia. Udi nu gikenene handaga muenya fami yaye wazolewe mu hungu ba? Tanga Biblia nu mikanda yetu iko hagula ukotelese muabonga egi, gila Nzambi wahana muthu ndola, idi mukunda nu gukuatesa muthu muene. Ndaga yagasue idi gugusagesa, yikalegele ha gukolesa gutshigina guaye. Wambela Yehowa ndaga jiagasue udi najio mu mutshima. Usendesago gudikhalela hakhaye, uvi tshita yagasue ha gukhala hehi nu aphangi ako. (Ish. 18:1) Khala mukalagala ndaga jidi gugukuatesa ha gukolesela, ngatshima gutangiza ndaga jiagubuila gudi gugudidisa. (Ngi. 126:5, 6) Ubembigo khadilo dia guya mu gudibungisa gua mu hungu, nu dia gulongesa mbimbi ya Nzambi, nu dia gutanga Biblia. Khala mutangiza ndaga jiabonga Yehowa mbawugukalegela mu masugu adi muza. Gumona luholo Yehowa udi gugukuatesa mbagukolesa muavula gutshigina guaye.

18. Itshi udi naye gukalagala gila wakotelesa egi gutshigina guaye gushigo diago guakola?

¹⁸ Gila malamba watagana nawo agutuma ha gutangiza egi gutshigina guaye gushigo guakola, ulebigo muila. Kalegela tangua diaye ha gukolesa gutshigina guaye. Toga Yehowa gifua luholo apostolo atogele Yesu egi: “Tuhane gutshigina guavula.” (Luka 17:5) Tangiza nji ifezegeselo tuamona mu longo edi. Wunguluga matangua agasue Yehowa wagukuatesele mu masugu abalega, gifua luholo phangi Miguel nu phangi Yurai akhalele mutangiza. Khala mukalagala gisambu giakola, gifua muakalegele mun’a phangi Vero nu phangi Anel. Kalagala ndaga yene tangua diagasue udi mu lamba diakola. Landula nji gifezegeselo gia phangi Geydi, ujimbilago egi Yehowa wajiya gukalegela enya fami yetu nga aphangi’etu a mu nyuma ha gutukuatesa. Gila wahana Yehowa njila ya gugukuatesa mu malamba udi nawo, mbawukhala nu gutshigina egi Nzambi wetu wajiya gugukuatesa ha gubinga malama agasue wajiya gutagana nawo mu masugu adi muza.

19. Ndaga itshi Yesu wakhalele mutshigina nu mutshima wenji wagasue? Aye nji ndaga itshi wajiya gutshigina nu mutshima waye wagasue?

¹⁹ Yesu wakuatesele alandudi enji ha gujiya ndaga jiakhalele mumonesa egi gutshigina guawo guakhalelego guakola, uvi wakhalele mutshigina nu mutshima wenji wagasue egi Yehowa uza guakuatesa ha gubinga malamba ene. (Yone 14:1; 16:33) Wakhalele nji mujiya egi gutshigina guakola mbagukuatesa thundu yakoma ya athu ha guhuluishiwa mu tangua dia lamba diakola. (Yat. 7:9, 14) Mbawukhala mukatshi dia athu ene ba? Gila udi mukalegela lamba diagasue udi mutanga nadio mangino ha gukolesa gutshigina guaye, Yehowa mu khenda jienji mbawugukuatesa ha gukhala mukatshi dia thundu yene yakoma ya athu!—Heb. 10:39.