1. Itshi idi gututoga Yehowa ha gukalagala?

 GUZUMBA guavula guakhala nu ndando gu meso a Yehowa. (Hosh. 6:6) Muene wana tshigina egi esue nji tuzule guzumba guene nu ndando. Mu njila ya profete Mika, Nzambi udi gututoga ha gukhala nu ‘guzumba guavula.’ (Mika 6:8) Uvi ha gukhala nu guzumba guene, tudi naye thomo gujiya gula gudi mukotelesa itshi.

2. Guzumba guavula gudi mukotelesa itshi?

² Guzumba guavula gudi mukotelesa itshi? Mu Bible Traduction du monde nouveau, mbimbi “guzumba guavula” jidi muene mbala 230. Mbimbi jiene jidi mukotelesa itshi? Jidi mukotelesa egi “Gula muthu udi nu guzumba guavula, mbawulandula guzumba athu ako, mbawukhala nji wagujinginyina gudi athu ene. Biblia yana kalegela mbimbi eji muavula ha guzuelela guzumba guakhala nago Nzambi mukunda nu athu, nu guzumba guakhala nago athu mukatshi diawo.” Yehowa udi gifezegeselo giabonga mu ndaga eyi. Hene mu longo edi, tuza muzuelela luholo Yehowa wana guzumba athu muavula. Uvi mu longo dialandula, mbatumona luholo tuajiya gulandula gifezegeselo gia Yehowa hagula tuzumbe athu ako muavula.

3. Ndaga jitshi Yehowa wawambelele Moize?

³ Tangua enya Isalele azogele mu uhiga gu Ejipitu, masugu azonda gungima, Yehowa wadimonesele gudi Moize, wamuwambelele jina dienji nu makalegelo enji. Wazuelele egi: “Yehowa, Yehowa, Nzambi wa khenda nu gisemo, ganago guvua khabu mu phushi, wazala pha nu guzumba nu giamatshidia; wana monesela inunu ya athu guzumba guavula, wana totesela athu gujimbila  guawo nu gubola nu masumu awo.” (Guz. 34:6, 7, NWT) Mbimbi eji jiabonga jidi gutumonesa egi Yehowa wawambelele Moize ndaga imoshi ya ndando yatadila guzumba guenji guavula. Ndaga itshi?

4-5. (a) Yehowa wamonesele egi udi Nzambi wa luholo lutshi? (b) Mihu itshi tuza mutadila?

⁴ Yehowa gawambelelego Moize egi udi nu guzumba; uvi wamuwambelele egi udi “wazala pha nu guzumba.” Mu Biblia, mbimbi eji “wazala pha nu guzumba” jidi mafundo avula. (Lutang. 14:18; Neh. 9:17; Ngi. 86:15; 103:8; Yow. 2:13; Yona 4:2) Mafundo agasue anyi Biblia yana kalegela mbimbi eji, jiana zuelela phamba Yehowa. Idi gutumonesa diago egi Yehowa wana zula khadilo edi nu ndando yavula. * Gishina giene Fumu Davidi wazuelele egi: “O Yehowa, guzumba guaye guavula gudi muheta uu nu mu dilu . . . O Nzambi, guzumba guaye guavula gudi nu ndando yavula! Athu ana gudisuega mu givule-vule gia mahambu aye.” (Ngi. 36:5, 7, NWT) Esue nji tuana zula guzumba guavula gua Nzambi nu ndando yavula ba?

⁵ Ha gukotelesa muabonga gula guzumba guavula gua Nzambi gudi mukotelesa itshi, tutadilenu mihu eyi mbadi. Yehowa wana monesa guzumba guavula gudi akuatshi? Gubonga gutshi tuana heta gula Yehowa watumonesela guzumba guene?

6. Yehowa wana monesa guzumba guavula gudi akuatshi?

⁶ Yehowa wana monesa guzumba guavula gudi akuatshi? Biblia idi gutumonesa egi gudi nu ima yavula inyi tuajiya guzumba, gifua “gudima mahia,” “matombe nu maji,” “ndola,” “ujiyi,” “ndunge” nu ima iko. (2 Gudi. 26:10; Ish. 12:1; 21:17; 29:3) Uvi tuajiyilego gumonesa guzumba guavula gudi ima; tuana monesa guzumba guene phamba gudi athu. Uvi Yehowa ganago gumonesa guzumba guavula gudi athu agasue. Wana monesa guzumba guene phamba gudi athu adi nu ufuta wakola nu muene. Yadiago, Yehowa Nzambi wetu wana zumba mafut’enji. Udi nu felela diabonga mukunda nu ene, muene mbagashigo guabemba nga hazonda.

7. Luholo lutshi Yehowa wamonesele guzumba gudi athu agasue?

⁷ Yehowa wana zumba athu agasue. Yesu wawambelele Nikodemo egi: “Nzambi wazumbile athu a ha mavu muavula, wahanele Mun’enji mumoshi ha mumoshi hagula muthu wagasue washa gutshigina gudi muene, gafuigo uvi ahete monyo wa ivo nu ivo.”—Yone 3:1, 16; Mat. 5:44, 45.

8-9. (a) Mukunda natshi Yehowa wana zumba akombeledi enji muavula? (b) Itshi tuza muzuelela henyaha?

 ⁸ Gifua luholo tuayimonyi mu paragrafe 6, Yehowa wana monesa guzumba guavula phamba gudi akombeledi enji anyi adi nu ufuta wakola nu muene. Ndaga eyi idi mumonega haphelo mu mbimbi jiazuelele Fumu Davidi nu profete Danyele. Davidi wazuelele egi: ‘Guzumba guaye guavula gukhale gudi athu anyi ana gugujiya.’ ‘Guzumba guavula gua Yehowa gudi ivo nu ivo gudi athu ana gumuvuila woma.’ Danyele wazuelele egi: ‘O Yehowa Nzambi wa giamatshidia, [aye] wana monesa guzumba guaye guavula gudi athu anyi ana guguzumba nu ana tumagela mikhuala yaye.’ (Ngi. 36:10; 103:17; Dan. 9:4) Mbimbi eji jidi gutumonesa egi, Yehowa wana monesa guzumba guenji guavula gudi akombeledi enji handaga ana gumujiya, ana gumuvuila woma, ana gumuzumba, nu ana tumagela mikhuala yenji. Yadiago, Yehowa wana monesa guzumba guenji guavula gudi akombeledi enji anyi ana gumukombelela nu mutshima umoshi.

⁹ Gutuama egi tusendese gukombelela Yehowa, wakhalele gutuzumba gifua luholo luana zumba muene athu agasue. (Ngi. 104:14) Uvi tangua tuabuile akombeledi enji, wana gutumonesela nji guzumba guavula. Yehowa udi muwambela akombeledi enji egi: ‘Guzumba guami mukunda nu aye mbagukhadigo nu gisugishilo.’ (Yesh. 54:10) Davidi wazuelele egi: ‘Yehowa wana kalegela akombeledi enji ndaga mu luholo lua gudisha.’ (Ngi. 4:3) Luholo tudi mujiya egi Yehowa wana gutukuatesa, idi gututuma ha gutshita itshi? Muyimbi wa ngimbo wazuelele egi: ‘Muenya ndunge mbawutala ndaga eji, mbawutangigiza nji muabonga midimo ya guzumba guavula gua Yehowa.’ (Ngi. 107:43) Henyaha tuzuelelenu maluholo thathu adi gutumonesa luholo Yehowa wana zumba akombeledi enji muavula.

10. Luholo lutshi guzumba guavula gua Nzambi guana gutukuatesa? (Ngimbo 31:7)

¹⁰ Guzumba gua Nzambi gushigo nu gisugishilo. Mu mukanda wa Ngimbo 136, Biblia idi muzuelela guzumba guavula gua Nzambi mbala  26. Mu verse ya thomo, Biblia idi muzuela egi: ‘Hana Yehowa mersi handaga muene udi wabonga; guzumba guenji gushigo nu gisugishilo.’ (Ngi. 136:1) Verse yagasue, sendese mu verse 2 uu nu mu verse 26, adi muzuelela mbimbi “handaga guzumba guenji gushigo nu gisugishilo.” Tangua tuana tanga vese jiagasue jia Ngimbo 136, tuana suanguluga muavula ha gumona luholo Yehowa wana landula guzumba muavula akombeledi enji mu maluholo a gudisha. Luholo verse jiene jidi muvutugila mbimbi “handaga guzumba guenji gushigo nu gisugishilo,” idi gutumonesa egi guzumba gua Nzambi mukunda nu akombeledi enji guanago gusombegesa. Tudi nu gusuanguluga guavula ha gujiya egi Yehowa ganago gubemba gatshididi ha guzumba akombeledi enji! Uvi gula muene wasendesa guzumba mukombeledi wenji, ganago gumubemba, wana gumukuatesa muavula mu tangua dia lamba. Gubonga tuana heta: Gujiya egi Yehowa ganago gutubemba, guana gutusuanguluisa nu guana gutuhana ngolo jia gukolesela mu malamba nu ha gulandula gumukombelela.—Tanga Ngimbo 31:7.

11. Ngimbo 86:5 idi mumonesa egi itshi yana tuma Yehowa ha gutotesela athu gubola?

¹¹ Guzumba guavula gua Nzambi guana gumutuma ha gututotesela. Gula muthu wakalagala gubola nu wazula desizio dia gubalumuna mutshima nu dia gubemba makalegelo enji, Yehowa wana mona. Guzumba guenji guavula guana gumutuma ha gutotesela muthu muene. Muyimbi wa ngimbo Davidi wazuelele mukunda nu Yehowa egi: ‘Muene ganago gutukalegela ndaga gifua mudi gubola guetu; ganago nji gutuhana ndola tudi naye guheta gifua mudi gubola guetu.’ (Ngi. 103:8-11) Davidi wakhalele mujiya luholo luana gudivua muthu gula wakalagala gubola. Uvi wakhalele mujiya luko egi Yehowa udi ‘hehi ha gutotesela’ athu gubola. Itshi yana tuma Yehowa ha gutotesela athu gubola? Ngimbo 86:5 idi gutuhana mvutu. (Tanga.) Gifua luholo luayimonesa Davidi mu gisambu, Yehowa wana totesela athu agasue ana gumububila handaga udi wazala pha nu guzumba.

12-13. Itshi yajiya gutukuatesa gula tudi gudisagesa muavula mukunda nu gubola tuakalegele?

¹² Gula tuavua gikenene mukunda nu gubola tuakalagala, idi ndaga yawaha. Handaga  yajiya gututuma ha gubalumuna mutshima nu gusombegesa khadilo dietu diabola. Uvi akombeledi ako a Nzambi ana gudisagesa muavula gubalega mukunda nu gubola akalegele mu masugu abalega. Ana tangiza egi Yehowa mbagashigo guatotesela nga hazonda ikhale abalumuna mutshima luholo lutshi. Gula aye nji wana gudivua luholo elu, mbawuheta ukuateshi gula wakotelesa egi Yehowa wana guguzumba muavula.

¹³ Gubonga tuana heta: Tuana kombelela Yehowa nu mutshima waphelegeta, ikhale tushigo athu atagana. Tuana gumukombelela nu mutshima waphelegeta handaga ‘mahatshi a Mun’enji Yesu ana phelegetesa masumu etu agasue.’ (1 Yone 1:7) Hene gula waleba muila mukunda nu gubola wakalegele, jiya egi Yehowa wakhala hehi ha gutotesela muthu wabalumuna mutshima. Davidi wamonesele gudivua gudi mukatshi dia guzumba guavula gua Yehowa nu khadilo dienji dia gutotesela athu gubola. Wasonegele egi: ‘Gifua mudi dilu gualeha nu mavu, guzumba guenji gudi guavula mukunda nu athu ana gumunemesa. Gifua mudi mazogelo a kumbi gualeha nu mayilo a kumbi, muene wana katula nji gubola guetu gualeha nu esue.’ (Ngi. 103:11, 12) Yadiago, Yehowa wana ‘totesela athu nu mutshima umoshi.’—Yesh. 55:7.

14. Luholo lutshi Davidi wamonesele luholo guzumba guavula gua Nzambi guana gutubamba?

¹⁴ Guzumba guavula gua Nzambi guana gutubamba mu nyuma. Davidi wawambelele Yehowa mu gisambu egi: ‘Aye udi fundo diami dia gulengela; aye mbawungubamba mu tangua dia lamba. Mbawungujietesa nu matululu a gusuanguluga ha gunguhuluisa. . . . Muthu udi musha mutshima gudi Yehowa, mbawubambewa mu guzumba guenji guavula.’ (Ngi. 32:7, 10) Membo a mu tangua dikulu akhalele nu ibayi (ibindji) yakhalele guabamba hagula mbalagaji jinginyigo. Luholo lumoshi nji, guzumba guavula gua Yehowa guana gutubamba mu ndaga jiagasue jiajiya gubolesa ufuta wetu nu muene. Luko, guzumba guavula gua Yehowa guana gutukuatesa ha gusuena hehi nu muene.—Yel. 31:3.

15. Mukunda natshi Davidi wafuanesele guzumba guavula gua Yehowa nu fundo dia gulengela nu ngolo?

¹⁵ Davidi wamonesele luko luholo Nzambi wana bamba akombeledi enji. Wasonegele egi: ‘Nzambi udi fundo diami diabonga dia gulengela, wana gunguzumba muavula.’ Davidi wazuelele luko mukunda nu Yehowa egi: ‘Nzambi udi guzumba guami gua mayilago, udi ngolo jiami, udi fundo diami diabonga dia gulengela, muhuluishi wami, tshibu yami ya ita, udi nji mubambi wami.’ (Ngi. 59:17; 144:2) Mukunda natshi Davidi wafuanesele guzumba guavula gua Yehowa nu fundo dia gulengela nu ngolo? Handaga tudi mujiya egi fundo diagasue tudi, Yehowa mbawutubamba hagula tukhale nu ufuta wakola nu muene, handaga tudi akombeledi enji. Ngimbo 91 idi muzuelela nji ndaga yene. Muyimbi wa lungimbo luene wazuelele egi: “Mbanguwambela Yehowa egi: ‘Aye udi fundo diami dia gulengela, udi ngolo jiami.’” (Ngi. 91:1-3, 9, 14, NWT) Moize wamonesele nji egi Yehowa udi fundo dietu dia gulengela. (Ngi. 90:1) Matangua azonda gutuama dia gufua guenji, wasonegele egi: ‘Nzambi udi fundo dia gulengela sendese mu tangua dikulu; muene udi gumibata ha mago enji a mayilago.’ (Mikh. 33:27) Mbimbi eji “muene udi gumibata ha mago enji a mayilago” jidi gutumonesa itshi mukunda nu Yehowa?

16. Mu maluholo atshi mbadi Yehowa wana gutukuatesa? (Ngimbo 136:23)

¹⁶ Gula tudi mushila Yehowa mutshima egi mbawutubamba, mbatudivua muabonga sha. Uvi matangua ako muila wajiya gutuleba masugu avula. Itshi Yehowa wajiya gukalagala mu tangua diene? (Tanga Ngimbo 136:23.) Mbawusununa  koko dienji ha gutukuatesa nu ha gutuhana ngolo hagula tulebigo muila. (Ngi. 28:9; 94:18) Gubonga tuana heta: Gujiya egi tangua diagasue tuajiya guzegemena gudi Nzambi, guana gutukuatesa mu maluholo mbadi. Thomo, tudi mujiya egi fundo diagasue tudi Yehowa mbawutubamba. Ya mbadi, tata wetu wa mu dilu wana gutuzumba muavula.

17. Luholo Nzambi wana gutuzumba muavula, tudi naye gusha mutshima egi mbawutukalegela itshi? (Ngimbo 33:18-22)

¹⁷ Gifua luholo tuayimonyi, gula tuagana nu malamba, tudi naye gusha mutshima egi Yehowa mbawutukuatesa ha gusala agujinginyina gudi muene. (2 Kol. 4:7-9) Profete Yelemiya wazuelele egi: ‘Tuafilego handaga Yehowa watuzumbile muavula; khenda jienji mbajisala ivo nu ivo.’ (Is. 3:22) Tudi naye gusha mutshima egi Yehowa mbawutuzumba muavula, handaga muyimbi wa ngimbo wazuelele egi: ‘Meso a Yehowa ana tala athu ana gumuvuila woma, athu anyi ana gudifuelela egi muene a amonesele guzumba guenji guavula.’—Tanga Ngimbo 33:18-22.

18-19. (a) Itshi tushigo naye gubuita mutshima? (b) Itshi mbatumona mu longo dialandula?

¹⁸ Tushigo naye gubuita mutshima egi gutuama egi tusendese gukombelela Yehowa, wakhalele gutuzumba gifua luholo luana zumba muene athu agasue. Uvi tangua tuabuile akombeledi enji, wana gutuzumba nji muavula. Guzumba guene guana gumutuma ha gutubamba. Mbawulandula gutukuatesa ha gusuena hehi nenji, mbawutagenesa nji ndaga jiagasue jialayile muene. Yehowa wana tshigina egi tukhale mafut’enji ivo nu ivo! (Ngi. 46:1, 2, 7) Hene, ikhale tuatagana nu malamba a luholo lutshi, Yehowa mbawutuhana ngolo ha gusala yagujinginyina gudi muene.

¹⁹ Mu longo edi, tuamona luholo Yehowa wana guzumba akombeledi enji muavula. Muene wana tshigina egi esue nji tuzumbe aphangi’etu Aklisto muavula. Luholo lutshi? Longo dialandula mbadizuelela ndaga yene.