1. Itshi tudi naye gujiya? Mu ndaga itshi tudi naye gusha mutshima?

 TUDI naye gujiya egi tuajiya gutagana nu umbalagaji mu mudimo wetu wa gulongesa. Mu masugu adi muza, umbalagaji wene wajiya gudivudisa luko muavula. (Dan. 11:44; 2 Tim. 3:12; Gumo. 16:21) Uvi tudi naye gusha mutshima egi Yehowa mbawutukuatesa. Mukunda natshi? Handaga Yehowa wakuatesele akombeledi enji ha gutagenesa mudimo wawo ngatshima mudimo wene wakhalele wakola. Ha gufezegesa, tutadilenu ndaga jiatagenele najio Ezekiele tangua diakhalele muene mulongesa enya Yuda akhalele mu uhiga gu Babilona.

2. Yehowa wamonesele egi athu a luholo lutshi Ezekiele wakhalele naye gulongesa? Itshi tuza muzuelela mu longo edi? (Ezekiele 2:3-6)

² Athu a luholo lutshi Ezekiele wakhalele naye gulongesa? Yehowa wamonesele egi athu ene akhalele ‘enya mito yakola,’ ‘akhalelego gumunemesa,’ nu ‘akhalele mulumbuga.’ Akhalele muhana lamba gifua miya nu akhalele musagesa gifua tuminyi-minyi. Hene Yehowa wawambelele Ezekiele mbala jiavula egi: “Uvigo woma”! (Tanga Ezekiele 2:3-6.) Ezekiele wakhalele hehi ha gutagenesa mudimo wenji handaga (1) Yehowa wamutumile, (2) nyuma ya Nzambi yamuhuile ngolo nu (3) mbimbi ya Nzambi yakolesele gutshigina guenji. Luholo lutshi ndaga eji thathu jiakuatesele Ezekiele? Luholo lutshi jiajiya gutukuatesa mangino?

3. Mbimbi jitshi jiahanele Ezekiele gikhesa? Luholo lutshi Yehowa wamutshiginyishile egi mbawumukuatesa?

³ Yehowa wawambelele Ezekiele egi: “Ngudi gugutuma.” (Ezek. 2:3, 4) Mbimbi eji jiahanele diago Ezekiele gikhesa.  Mukunda natshi? Idi naye gukhala egi Ezekiele wawungulugile egi Yehowa wawambelele Moize nu Yeshaya mbimbi jia luholo lumoshi tangua diaatombele muene ha gukhala ba profete enji. (Guz. 3:10; Yesh. 6:8) Ezekiele wakhalele nji mujiya egi Yehowa wakuatesele ba profete awa mbadi ha gulua nu malamba ataganele nawo. Hene tangua Yehowa wamuwambelele mu mbala ya mbadi egi: “Ngudi gugutuma,” Ezekiele washile diago mutshima egi Yehowa mbawumukuatesa. Wasonegele mbala jiavula mu mukanda wenji egi: ‘Yehowa wanguwambelele egi.’ (Ezek. 3:16) Wasonegele nji muavula mbimbi eji: ‘Yehowa wanguwambelele luko egi.’ (Ezek. 6:1) Ezekiele wajiyile diago egi Yehowa wamutumile. Tata wa Ezekiele wakhalele profete. Yajiya gukhala egi wamumonesele egi mu tangua dikulu Yehowa wawambelele ba profete enji egi mbawakuatesa. Yehowa wawambelele Izake nu Yakoba nu Yelemiya egi: “Ngudi nu aye.”​—Gis. 26:24; 28:15; Yel. 1:8.

4. Mbimbi jitshi jiahanele Ezekiele ngolo ha gutagenesa mudimo wenji?

⁴ Itshi enya Isalele avula akalegele tangua avile ndaga jiaalongesele Ezekiele? Yehowa wazuelele egi: ‘Uvi nga muthu mumoshi mukatshi dia enya Isalele mbagashigo guguvila, handaga ame nji ana gunguvila ndo.’ (Ezek. 3:7) Tangua atunyile guvila Ezekiele, amonesele egi atunyi nji guvila Yehowa. Mbimbi eji, jiakuatesele Ezekiele ha gujiya egi gula athu atuna gumuvila, ishigo mukotelesa egi gatshitshilego mudimo wenji muabonga. Yehowa wakuatesele Ezekiele ha gujiya egi, tangua ndaga jidi muzuela muene mbajitagana, athu ‘mbaajiya egi profete wakhalele mukatshi diawo.’ (Ezek. 2:5; 33:33) Mbimbi eji jiahanele diago Ezekiele ngolo ha gutagenesa mudimo wenji.

5. Luholo lutshi ndaga jidi mu Yeshaya 44:8, jiajiya gutuhana gikhesa?

⁵ Esue nji tuana heta ngolo handaga tuana jiya egi Yehowa wana gututuma ha guya mulongesa. Wana gutuhana diago lutumbu luholo luana gututamega muene egi “matemue” enji. (Yesh. 43:10) Idi diago ndaga ya gusuanguluga! Yehowa wawambelele Ezekiele egi: “Uvigo woma.” Wana gutuwambela nji esue mangino egi: “Mudigitago.” Mukunda natshi tushigo naye guvila mbalagaji jietu woma? Gifua Ezekiele, esue nji Yehowa wana gututuma nu wana gutukuatesa.​—Tanga Yeshaya 44:8.

6. (a) Luholo lutshi Yehowa wana monesa egi wana gutukuatesa? (b) Ndaga itshi yana gutuhana ngolo?

⁶ Yehowa wana gutulaya egi mbawutukuatesa. Ha gufezegesa, gutuama dia guzuela egi: ‘mudi matemue ami,’ wazuelele thomo egi: ‘Tangua mbawubalega mu meya aleha, mbangukhala naye, mita nji mbayiguminyigo. Tangua mbawuwenda holu dia tshuya, mbawushigo muhia, madimi a tshuya mbaashigo gu gukonda.’ (Yesh. 43:2) Tangua tuana tshita mudimo wa gulongesa, tuana tagana nu malamba anyi tuajiya gufuanesa nu meya avula, nga nu tshuya. Uvi Yehowa wana gutukuatesa ha gulandula gulongesa. (Yesh. 41:13) Mangino, athu avula ana tshigina ndo lukuma luabonga gifua mu masugu a Ezekiele. Tudi naye gujiya egi gula athu adi mutuna gututegelela, ishigo mukotelesa egi tuana longesa muabola. Tuana heta diago gikhesa tangua tuana jiya egi Yehowa wana suanguluga tangua tuana landula gulongesa mbimbi yenji. Mupostolo Phaula wazuelele egi: “Muthu nu muthu mbawuheta gishimbigo gienji gifua mudi mudimo udi muene mukalagala.” (1 Kol. 3:8; 4:1, 2) Phangi mumoshi wa mukhetu udi muvundji wa njila masugu avula, udi muzuela egi: “Ngana suanguluga diago muavula ha gujiya egi Yehowa wana gutukuatesa mu mudimo wetu.”

7. Ezekiele wakhalele gudivua gikuatshi hakhalele muene mutangiza vizio yamonele muene? (Tala gifuanesa holu dia gizula.)

⁷ Ezekiele wamonele diago ngolo jia nyuma ya Nzambi. Ndaga jiamonele muene mu vizio jiamukuatesele ha gukotelesa egi, nyuma ya Nzambi yakhalele mukuatesa anjelo nu yakhalele muwendesa pine jia phusu-phusu ya mu dilu. (Ezek. 1:20, 21) Itshi Ezekiele wakalegele? Wasonegele ndaga yene. Wazuelele egi: ‘Tangua ngayimonele, ngabuile phala mu mavu.’ Ezekiele wavile woma, hene wabuile mu mavu. (Ezek. 1:28) Gungima, tangua diagasue diakhalele mutangiza muene vizio yene, wakhalele musha mutshima egi, nyuma ya Nzambi mbayimukuatesa ha gutagenesa mudimo wenji.

8-9. (a) Itshi yabuidile Ezekiele tangua Yehowa wamuwambelele ha guzuga mu molu? (b) Luholo lutshi Yehowa wahanele Ezekiele gikhesa mukunda nu terituare yakhalele naye gulongesa muene?

⁸ Yehowa wawambelele Ezekiele egi: ‘Mun’a muthu, zuga mu molu nguguwambele.’ Mbimbi eji nu nyuma ya Nzambi yahanele Ezekiele ngolo ha guzuga mu molu. Ezekiele wasonegele egi: ‘Nyuma yajile gudi ame, yangukuatesele ha guzuga mu molu.’ (Ezek. 2:1, 2) Gungima, tangua Ezekiele wakhalele mulongesa, “koko” gua Nzambi, yakotelesa nyuma ya Nzambi, yamukuatesele. (Ezek. 3:22; 8:1; 33:22; 37:1; 40:1) Nyuma ya Nzambi yakuatesele Ezekiele ha gutagenesa ginemo gienji gia gulongesa athu a mu terituare yenji. Athu ene akhalele ‘enya mito yakola nu ‘akhalelego munemesa’ Nzambi. (Ezek. 3:7) Yehowa wamuwambelele egi: ‘Ngabuishile phala yaye yakola gifua phala jiawo, muto waye wakola gifua mito yawo. Ngakolesele muto waye gubalega diama. Uvilago alumbugi ene  woma.’ (Ezek. 3:8, 9) Yakhalele gifua Yehowa wakhalele gumuwambela egi: ‘Ulebigo muila mukunda nu athu awa adi mito yakola. Mbanguguhana ngolo.’

⁹ Gungima nyuma ya Nzambi yabatele Ezekiele mu terituare yakhalele naye gulongesa muene. Ezekiele wasonegele egi: “Koko gua Yehowa guakhalele gungukuata nu ngolo jiagasue.” Profete wakalegele phoso imoshi ha gulonguga nu ha gukotelesa muabonga lukuma luakhalele naye gulongesa muene, hagula wajiya gulongesa nu gikhesa. (Ezek. 3:14, 15) Yehowa wamuwambelele ha guya mubaba. Hayile muene guene ‘nyuma ya Nzambi yanginyile mukatshi’ dienji. (Ezek. 3:23, 24) Ezekiele wakhalele giwa hehi ha gusendesa mudimo wenji wa gulongesa.

10. Itshi tuana khala nayo funu ha gukalagala mudimo wa gulongesa? Mukunda natshi?

¹⁰ Itshi tuana khala nayo funu ha gukalagala mudimo wa gulongesa? Ha guheta mvutu, tuwungulugenu ndaga yabuidile Ezekiele. Gutuama dia gusendesa mudimo wenji wa gulongesa, nyuma ya Nzambi yamukuatesele. Mangino nji, nyuma ya Nzambi yana gutukuatesa ha gukalagala mudimo wa gulongesa. Mukunda natshi? Handaga Satana wana gutuluisa hagula tubembe gukalagala mudimo wene. (Gumo. 12:17) Athu avula ana tangiza egi, tuajiyilego gubinga Satana handaga udi nu ngolo jiavula. Uvi luholo tuana kalagala mudimo wa gulongesa, tuana gumubinga! (Gumo. 12:9-11) Mu luholo lutshi? Tangua tuana longesa tuana monesa egi, tuanago guvua woma wa ndaga jiana kalagala Satana. Tangua diagasue tuana longesa, Satana ganago gubinga. Itshi tuana kotelesa tangua tuana jiya egi, tuajiya gulandula gukalagala mudimo wa gulongesa ngatshima tudi mutagana nu usageshi? Tuana kotelesa egi nyuma ya Nzambi yana gutuhana ngolo, Yehowa wana suanguluga nu esue.​—Mat. 5:10-12; 1 Phet. 4:14.

11. Luholo lutshi nyuma ya Nzambi mbayitukuatesa? Luholo lutshi tuajiya gulandula guheta nyuma yene?

 ¹¹ Tudi mujiya egi Yehowa wahanele Ezekiele ngolo ha gukalagala mudimo wa gulongesa. Gujiya ngenyi gudi gututuma ha gusha mutshima mu ndaga itshi? Nyuma ya Nzambi mbayituhana ngolo tudi najio funu ha gubinga malamba tuajiya gutagana nawo mu mudimo wa gulongesa. (2 Kol. 4:7-9) Itshi tudi naye gutshita ha gulandula guheta nyuma ya Nzambi? Tudi naye gulandula gusamba Yehowa ha gumutoga nyuma yenji nu gusha mutshima egi mbawututegelela. Yesu wawambelele alandudi enji egi: “Landulenu gutoga, . . . landulenu gukamba, . . . landulenu gukokola.” Yehowa “mbawuhana nyuma yenji gudi athu adi gumutoga nayo.”​—Luka 11:9, 13; Makal. 1:14; 2:4.

12. Ha gutadila Ezekiele 2:9–3:3, rulo yakatugile gui? Itshi yakhalele mukatshi dia rulo yene?

¹² Nyuma ya Nzambi yahanele Ezekiele ngolo. Mbimbi ya Nzambi yakolesele nji gutshigina guenji. Ezekiele wamonele koko mukuata rulo mu vizio. (Tanga Ezekiele 2:9–3:3.) Rulo yene yakatugile gui? Itshi yakhalele mukatshi? Luholo lutshi yakolesela gutshigina gua Ezekiele? Tutadilenu ndaga yene. Rulo yene yakatugile gu nguasa ya Ufumu ya Nzambi. Idi naye gukhala egi, Yehowa watumile muanjelo mumoshi mukatshi dia anjelo nguana anyi Ezekiele wamonele, ha gumuhana rulo. (Ezek. 1:8; 10:7, 20) Rulo yene yakhalele nu mbimbi ya Nzambi, yakotelesa lukuma lua usopheshi. Ezekiele wakhalele naye gulongesa lukuma luene gudi athu akhalele mu uhiga anyi akhalelego mutumagela Nzambi. (Ezek. 2:7) Lukuma luene luakhalele lua gusonega mu rulo khanda nu khanda.

13. Itshi Yehowa wawambelele Ezekiele ha gutshita? Mukunda natshi rulo yene yakhalele yambemba?

¹³ Yehowa wawambelele profete wenji ha gudia rulo nu ‘ha guzalesa vumo [dienji] nu rulo yene.’ Ezekiele watumagele Yehowa, wadile rulo yene yagasue. Ndaga yene idi mukotelesa itshi? Ezekiele wakhalele naye gukotelesa muabonga lukuma luakhalele naye gulongesa muene. Wakhalele naye gusha gutshigina mu lukuma luene hagula wajiya gulongesa nu gikhesa. Gungima ndaga imoshi ya gushimana yakalegewe. Ezekiele wakotelesele egi rulo yene ‘yakhalele yambemba gifua wigi.’ (Ezek. 3:3) Mukunda natshi? Handaga Ezekiele wakotelesele egi ginemo gia muhanele Yehowa giakhalele nu ndando. (Ngi. 19:8-11) Wasuangulugile muavula luholo Yehowa wamutombele ha gukhala profete wenji.

14. Itshi yakuatesele Ezekiele ha gutagenesa ginemo gienji?

¹⁴ Gungima, Yehowa wawambelele Ezekiele egi: ‘Tegelela mbimbi jiagasue ngudi guguwambela, ujikuate mu muto.’ (Ezek. 3:10) Yehowa wawambelele Ezekiele ha gukuata mu muto ndaga jiakhalele jia gusonega mu rulo nu gujitangigiza. Gutshita ngenyi guamukuatesele ha gukolesa gutshigina guenji nu ha guwambela athu ndaga jiene nu gikhesa. (Ezek. 3:11) Tangua Ezekiele wakotelesele muabonga ndaga jiamuwambelele Yehowa, wakhalele hehi ha gutagenesa ginemo gienji.​—Fuanesa nu Ngimbo 19:14.

15. Itshi tudi naye ‘gukuata mu muto’ ha gukolesela mu mudimo wa gulongesa?

¹⁵ Esue nji tudi naye gulandula gulonguga mbimbi ya Nzambi ha gukolesa gutshigina guetu. Ngenyi mbayitukuatesa ha gukolesela mu mudimo wa gulongesa. Tudi naye  ‘guwunguluga’ ndaga jiana gutuwambela Yehowa. Mangino Yehowa wana gutuwambela ndaga mu njila ya Biblia. Luholo lutshi tuajiya gubemba egi mbimbi ya Nzambi ilandule gutuameza matangi’etu nu ndaga tudi mukalagala?

16. Itshi tudi naye gutshita ha gukotelesa Mbimbi ya Nzambi muabonga?

¹⁶ Tangua tuana dia, tuana hululuga ndambo ha guheta ngolo. Luholo lumoshi nji tangua tuana longuga mbimbi ya Nzambi nu tuana tangigiza ndaga jiene, tuana kolesa gutshigina guetu. Tushigo naye gujimbila ndaga yatadila rulo. Yehowa wana tshigina egi ‘tuzalese vumo [dietu]’ nu Mbimbi yenji, yakotelesa egi tudi naye guyilonguga muabonga. Ha gukotelesa mbimbi ya Nzambi muabonga tudi naye gutshita gisambu, gutanga nu gutangigiza. Thomo, tudi naye gutshita gisambu ha gulondega muabonga mutshima wetu. Gungima tudi naye gutanga Biblia. Gula tuamanesela gutanga, tudi naye guzula tangua dia gutangigiza ndaga jiene. Gubonga gutshi mbatuheta? Gula tudi mutangigiza muavula, mbatukotelesa muabonga mbimbi ya Nzambi nu mbatukolesa gutshigina guetu.

17. Mukunda natshi idi nu ndando ha gutangigiza ndaga tudi mutanga mu Biblia?

¹⁷ Mukunda natshi idi nu ndando ha gutanga Biblia nu ha gutangigiza? Handaga gutshita ngenyi guana gutuhana ngolo jia gulongesa lukuma luabonga lua Ufumu. Mbagutukuatesa nji ha gulongesa lukuma lua usopheshi wakola mu masugu adi muza. Gula tudi mutangigiza nji makalegelo a Yehowa, mbatukolesa diago ufuta wetu n’enji. Gutshita ngenyi mbagutukuatesa ha gukhala mu guhuima nu gusuanguluga.​—Ngi. 119:103.

18. Ndaga itshi enya mu terituare yetu mbaakotelesa? Mukunda natshi?

¹⁸ Ezekiele wakhalele profete, uvi esue tushigo ba profete. Ikhale ngenyi, tuana landula gulongesa lukuma luabonga ludi mu Biblia uu nu tangua Yehowa mbawuzuela egi mudimo wa gulongesa wahua. Mu tangua dia usopheshi, enya mu terituare yetu mbaambigo mambo egi tuaalongeselego. (Ezek. 3:19; 18:23) Uvi mbaakotelesa egi lukuma tuakhalele gualongesa, luakhalele mukatuga gudi Nzambi.

19. Itshi yajiya gutukuatesa ha gukalagala muabonga mudimo wetu wa gulongesa?

¹⁹ Itshi yajiya gutukuatesa ha gukalagala muabonga mudimo wetu wa gulongesa? Ndaga thathu jiakuatesele Ezekiele, jiajiya nji gutukuatesa. Tuana landula gulongesa handaga tuana jiya egi Yehowa watutumine, nyuma yenji yana gutuhana ngolo, mbimbi yenji yana gutukuatesa ha gukolesa gutshigina guetu. Yehowa mbawutukuatesa ha gulandula gukalagala mudimo wa gulongesa uu “nu gu gisugishilo.”​—Mat. 24:13.