1. Luholo lutshi tudi mujiya egi Yehowa wana tshigina egi tusuene hehi n’enji?

 YEHOWA udi gututoga ha gusuena hehi n’enji. (Yak. 4:8) Wana tshigina egi akhale Nzambi wetu, Tata wetu, nu Futa dietu. Wana hana mvutu gu isambu yetu nu wana gutukuatesa mu tangua dia lamba. Wana kalegela ulondegi wenji ha gutulongesa nu ha gutubamba. Itshi tudi naye gutshita ha gusuena hehi nu Yehowa?

2. Luholo lutshi tuajiya gusuena hehi nu Yehowa?

² Tuajiya gusuena hehi nu Yehowa gula tudi mutshita gisambu, tudi mutanga Biblia nu tudi mutangigiza ndaga jiene. Gula tuatshita ngenyi, mbatumuzumba muavula nu mbatumuhana mersi. Tudi naye gumutumagela nu gumutumbuisa handaga muene udi naye gutumbuishiwa. (Gumo. 4:11) Mbatushila Yehowa mutshima nu organizasio watombele muene ha gutukuatesa gula tuatshita yagasue ha gumujiya muabonga.

3. Luholo lutshi Diabulu wana kamba gutukhaphumuna nu Yehowa? Itshi mbayitukuatesa ha gusala ya gujinginyina gudi Nzambi nu mu organizasio wenji? (Ngimbo 31:13, 14)

³ Uvi Diabulu wana kamba gutukhaphumuna nu Yehowa tangua tuana tagana nu malamba. Ba metode atshi ana kalegela muene? Wana tshita yagasue ha gula tuajiya gubemba gushila Yehowa nu ulondegi wenji mutshima. Uvi tuajiya gutuna gubua mu miheto yenji. Gula tudi nu gutshigina guakola nu tudi mulandula gushila Yehowa mutshima, mbatusala ya gujinginyina gudi muene nu mu organizasio wenji.​—Tanga Ngimbo 31:13, 14.

4. Itshi tuza mumona mu longo edi?

 ⁴ Mu longo edi, tuza mumona malamba thathu ajiya gukatuga gudi athu ashigo Matemue a Yehowa. Malamba ene ajiya gutshita egi tubembe gushila Yehowa mutshima nu organizasio wenji. Luholo lutshi malamba ene ajiya gutukhaphumuna nu Yehowa? Uvi itshi tuajiya gutshita ha gutuna gubua mu miheto ya Satana?

5. Luholo lutshi malamba ajiya gututuma ha gubemba gushila Yehowa nu organizasio wenji mutshima?

⁵ Matangua ako tuana tagana nu malamba akola, gifua usageshi mu fami nga ndo tushigo luko nu mudimo. Luholo lutshi malamba a luholo elu ajiya gututuma ha gubemba gushila organizasio wa Yehowa mutshima nu gubemba gumukombelela? Tuajiya guleba muila nga gutotesa felela dietu tangua tudi mutagana nu malamba. Satana wana kalegela ba okazio a luholo elu ha gututuma ha gutangiza egi Yehowa ganago gutuzumba. Wana tshigina tutangize egi malamba tuana tagana nawo ana katuga gudi Yehowa nga mu organizasio wenji. Ndaga yene yabuidile nji enya Isalele ako gu Ejipitu. Thomo akhalele diago nu gutshigina egi Yehowa watombele Moize nu Alona ha guazola mu uhiga. (Guz. 4:29-31) Uvi tangua Farao waamonesele lamba diakola, azuelele egi idi gubola gua Moize nu Alona. Awambelele Moize nu Alona egi: ‘Farao nu enya mudimo wenji ashigo gututshigina mukunda nu enue, muahaga phogo ya khusa ha mago awo ha gutushiya.’ (Guz. 5:19-21) Azuelele ndaga jiabola mukunda nu akombeledi a Nzambi agujinginyina. Yakhalele diago ndaga ya gikenene! Gula udi nu lamba dimoshi diana gugusagesa sendese mualeha, luholo lutshi wajiya gulandula gushila Yehowa mutshima nu ulondegi wenji?

6. Longo ditshi tuazula mu lumene lua profete Habakuka mu ndaga yatadila gukolesela mu malamba? (Habakuka 3:17-19)

⁶ Wambela Yehowa mu gisambu ndaga jiagasue jidi mu mutshima waye, sha mutshima egi mbawugukuatesa. Profete Habakuka wataganele nu malamba avula. Ndaga yene yamutumile ha gudihula gula Yehowa wana gudisagesa diago mukunda nu muene. Wawambelele Yehowa mu gisambu ndaga jiagasue jiakhalele mu mutshima wenji. Wazuelele egi: ‘Yehowa uu nu tangua ditshi ngudi naye gudila ha gutoga ukuateshi, uvi aye guvua ndo? . . . Mukunda natshi udi mubemba egi athu asagesewe?’ (Hab. 1:2, 3) Yehowa wahanele mvutu gu gisambu gia Habakuka. (Hab. 2:2, 3) Habakuka wahetele gusuanguluga guavula handaga watangijile luholo Yehowa wahuluishile akombeledi enji. Wakotelesele egi Yehowa wana gudisagesa mukunda nu muene nu mbawumukuatesa ha gukolesela mu malamba. (Tanga Habakuka 3:17-19.) Longo ditshi tuajiya guzula? Gula watagana nu lamba, kombelela Yehowa, muwambele luholo udi gudivua. Khala musha mutshima egi mbawuguhana ngolo jia gukolesela mu malamba ene. Mbawukolesa diago gutshigina guaye tangua mbawumona egi Yehowa wahanyi mvutu gu isambu yaye.

7. Ndaga itshi muenya fami ya phangi Shirley watshitshile ha gumulebesa muila? Itshi ya mukuatesele ha gulandula gushila Yehowa mutshima?

⁷ Landula gukalagala ndaga jia mu nyuma. Tutadilenu luholo ndaga eyi yakuatesele phangi wa mukhetu Shirley wana khala gu Papouasie-Nouvelle-Guinée tangua diataganele muene nu malamba. b Fami ya Phangi Shirley akhalelego nu makuta, matangua ako yakhalele lamba ha guheta ima ya gudia. Muenya fami yawo mumoshi  watshitshile yagasue hagula phangi Shirley abembe gushila Yehowa mutshima. Wazuelele egi: “Wana zuela egi nyuma ya Nzambi yana gugukuatesa, na yana gugukuatesela giwa gui? Fami yetu idi mu uphutu uu nu mangino. Udi mulaba gubalegesa tangua diaye diagasue ha guya nu gulongesa.” Phangi Shirley udi muzuela egi: “Ngadihudile egi: ‘Nzambi wana gudisagesa diago mukunda nu esue ba?’ Mu tangua diene ngakombelele Yehowa, ngamuwambelele ndaga jiagasue jiakhalele mu mutshima wami. Ngalanduile gulonguga Biblia nu mikanda yetu, guya mu mudimo wa gulongesa nu mu gudibungisa gua mu hungu.” Gungima phangi Shirley wakotelesele diago egi Yehowa wakhalele gudisagesa mukunda nu fami yawo. Fami yawo yakhalelego mubanda nzala, akhalele nji nu gusuanguluga. Udi muzuela luko egi: “Ngakotelesele diago egi Yehowa wahanele mvutu gu isambu yami.” (1 Tim. 6:6-8) Gula aye nji walandula gukalagala ndaga jia mu nyuma, mbawushigo mubemba egi nga gima gimoshi gigukhaphumune nu Yehowa.

8. Ndaga jitshi jiana buila aphangi ana tuameza organizasio wa Yehowa?

⁸ Mbalagaji jietu jiana zuela ndaga jia mambo mu Internet mukunda nu aphangi ana tuameza organizasio wa Yehowa. (Ngi. 31:13) Aphangi ako ana mbiwa mu bologo nu ana guambila mambo egi adi mbundudi. Aklisto a mu siekle ya thomo ataganele nji nu malamba a luholo lumoshi, tangua ambidile mupostolo Phaula mambo nu amumbile mu bologo. Itshi Aklisto ene atshitshile?

9. Itshi Aklisto ako atshitshile tangua Phaula wakhalele mu bologo gu Roma?

⁹ Aklisto ako a mu siekle ya thomo abembele gukuatesa mupostolo Phaula hakhalele muene mu bologo gu Roma. (2 Tim. 1:8, 15) Mukunda natshi? Yajiya gukhala egi akhalele muvua musonyi handaga athu akhalele muzuela egi Phaula udi mbundudi ba? (2 Tim. 2:8, 9) Nga ndo akhalele muvua woma egi ene nji ajiya gusagesewa? Ikhale ngenyi nga ndo, tangiza luholo Phaula wakhalele naye gudivua. Wataganele nu malamba avula, wahagele  monyo wenji mu gingoza mukunda nu ene. (Makal. 20:18-21; 2 Kol. 1:8) Tushigo naye gukhala gifua athu anyi atunyile Phaula mu tangua dia lamba! Itshi tushigo naye gujimbila gula aphangi adi nu inemo mu ulondegi wa Yehowa adi musagesewa?

10. Itshi tushigo naye gujimbila gula aphangi adi nu inemo mu ulondegi wa Yehowa adi musagesewa? Mukunda natshi?

¹⁰ Tushigo naye gujimbila gishina tuana sagesewa nu muthu wana gutubatela usageshi wene. Mukanda wa 2 Timote 3:12 udi muzuela egi: “Athu agasue adi mutshigina gukhala ya gujinginyina gudi Nzambi mu gudivua nu Klisto Yesu mbaamonesewa nji malamba.” Hene, tushigo naye gudihula gula Satana udi musagesa aphangi adi nu inemo mu ulondegi wa Yehowa. Wana tshigina egi aphangi ene abembe gukombelela Yehowa nu gujinginyina guagasue. Wana tshigina nji gutuvuisa woma.​—1 Phet. 5:8.

11. Longo ditshi tuazula mu gifezegeselo gia Onesifolo? (2 Timote 1:16-18)

¹¹ Landula gukuatesa aphangi, khala nji ya gujinginyina gudi ene. (Tanga 2 Timote 1:16-18.) Muklisto mumoshi wa mu siekle ya thomo mu jina dia Onesifolo, gakalegelego ndaga gifua aphangi ako tangua Phaula wakhalele mu bologo. “Gavilego musonyi mukunda nu bologo dia [Phaula.]” Uvi wakambele Phaula, ha mumonele muene wamukuatesele. Onesifolo wahagele monyo wenji mu gingoza ha gukuatesa Phaula. Ndaga yene idi gutulongesa itshi? Tushigo naye gubemba egi woma wa athu utukange njila ha gukuatesa aphangi adi musagesewa. Uvi tudi naye gukhala gu khanda ya aphangi‘etu Aklisto nu gukamba luholo lua guakuatesa. (Ish. 17:17) Adi nu funu egi tuakuatese nu tuamonesele guzumba.

12. Gifezegeselo gia aphangi a gu Russie gidi gutulongesa itshi?

¹² Tutadilenu luholo aphangi a mala nu a akhetu a gu Russie ana kuatesa aphangi adi mu bologo. Tangua ana bata aphangi ako gu tribinale, aphangi avula anaya guene ha guahana gikhesa. Ndaga yene idi gutulongesa itshi? Gula aphangi adi nu inemo mu ulondegi wa Yehowa ambiwa mambo, akuatewa nga adi musagesewa tushigo naye guvua woma. Khala mukombelela mukunda nu ene nu gukuatesa enya fami jiawo. Kamba nji maluholo ako ha guakuatesa.​—Makal. 12:5; 2 Kol. 1:10, 11.

13. Luholo lutshi ndaga jiabola jiana zuela athu ako jiajiya gututuma ha gubemba gushila Yehowa nu organizasio wenji mutshima?

¹³ Enya fami yetu anyi ashigo Matemue a Yehowa, nga mafuta etu a mudimo nga a khalasa ajiya guzuela ndaga jiabola mukunda esue, handaga tuana longesa lukuma luabonga nu tuana tumagela mikhuala ya Nzambi. (1 Phet. 4:4) Ajiya guguwambela egi: “Ngana guguzumba, uvi gikombelelo gienu giana khala ndaga jiakola nu muana zuelela ndaga jikulu.” Ako ajiya guzuela ndaga jiabola mu luholo tuana kalegela athu ana zolewa mu hungu ndaga. Ajiya guzuela egi: “Guzumba guenu gudi gui?” Ndaga jia luholo elu, jiajiya gututuma ha gudihula gula mikhuala ya Yehowa yana khala diago yabonga. Tuajiya nji gudihula egi: ‘Yehowa wana gungutoga ndaga jinyi ngajiyilego gukalagala ba? Ulondegi wenji wana khala ndaga jiakola ba?’ Gula udi mutagana nu ndaga jia luholo elu, itshi yajiya gugukuatesa ha gusala ya gujinginyina gudi Yehowa nu mu organizasio wenji?

14. Itshi tudi naye gutshita gula athu adi muzuela ndaga jiabola handaga tuana tumagela mikhuala ya Yehowa? (Ngimbo 119:50-52)

¹⁴ Khala mutumagela mikhuala ya Yehowa. Yobo wakhalele mutumagela mikhuala ya Yehowa ngatshima athu akhalele muzuela ndaga  jiabola mukunda nu muene. Futa dienji mumoshi wabola wazuelele egi Yehowa mbagashigo gudisagesa mukunda nu Yobo ikhale watumagela mikhuala yenji nga ndo. (Yobo 4:17, 18; 22:3) Uvi Yobo watunyile ndaga eji jia mambo. Wakhalele mujiya egi mikhuala ya Yehowa idi yatagana, wazudile desizio dia guyitumagela. Gabembelego egi athu amukange njila ha gukalegela Yehowa nu gujinginyina guagasue. (Yobo 27:5, 6) Ndaga yene idi gutulongesa itshi? Ubembigo egi ndaga jiabola jiana zuela athu ako jigutume ha gudihula gula mikhuala ya Yehowa idi diago yabonga. Tangiza ndaga wataganele gale najio mu monyo waye. Khenji uhetele galego gubonga tangua watumagele mikhuala ya Yehowa ba? Zula desizio dia gusala mu organizasio wana tumagela mikhuala yene. Ngenyi ngatshima athu azuela ndaga jiabola jia luholo lutshi, mbawubembigo gukombelela Yehowa.​—Tanga Ngimbo 119:50-52.

15. Mukunda natshi athu akhalele muzuela ndaga jiabola mukunda nu phangi Brizit?

¹⁵ Tutadilenu gale lumene lua phangi wa mukhetu Brizit, wana khala gu Inde. Enya fami yenji akhalele muzuela ndaga jiabola mukunda nu gutshigina guenji. Gungima dia gubatijiwa guenji mu 1997, mulumi’enji mudimo wafile. Wazudile desizio egi muene nu mukaji’enji nu an’awo a akhetu adi naye guya mukhala gumbodia mvuaji jienji mu dimbo diko. Phangi Brizit wataganele nu malamba avula handaga mulumi’enji gakhalelego nu mudimo. Wakhalele naye gukalagala mudimo matangua avula ha gukuatesa enya fami yenji. Ndaga iko ya lamba idi egi, ha guya mu gudibungisa gua mu hungu wakhalele naye gutshita ba kilomentre 350. Enya fami ya mulumi’enji asendesele gumusagesa handaga wakhalele Temue wa Yehowa. Akhalele gumusagesa muavula hene azudile desizio dia guya mukhala fundo diko. Uvi, mulumi’enji wafile. Gungima mun’enji wa mukhetu wakhalele nu ivo 12 wafile nu misongo ya cancer. Enya fami ya phangi Brizit asendesele gumubela mukunda nu ndaga jiamubuidile. Azuelele egi malamba awa agasue amubuidile handaga wakhalele Temue wa Yehowa. Uvi phangi  wa mukhetu walanduile gushila Yehowa mutshima nu wasalele ya gujinginyina mu ulondegi wenji.

16. Gubonga gutshi phangi Brizit wahetele luholo wasalele ya gujinginyina gudi Yehowa nu mu organizasio wenji?

¹⁶ Luholo phangi Brizit wakhalele gualeha nu hungu, mutadi muwendji wamuwambelele ha gulongesa fundo diana jinga muene nu ha gutuamaza gudibungisa gumbo dienji. Thomo, wakhalele mutangiza egi yakhalele diago lamba ha guyikalagala. Uvi watumagele malongo amuhanele mutadi muwendji. Wakhalele mulongesa athu ako lukuma luabonga, mutuameza gudibungisa gumbo dienji nu gutshita gukombelela gua mu fami nu an’enji a akhetu. Gubonga gutshi ahetele? Phangi Brizit wasendesele gulonguga Biblia nu athu avula, ako mukatshi diawo abatijiwe. Mu 2005 wabuile muvundji wa njila wa tangua diagasue. Yehowa wakuatesele phangi Brizit handaga wakhalele gumushila mutshima nu wakhalele ya gujinginyina mu ulondegi wenji. An’enji a akhetu ana kalegela Yehowa nu gujinginyina guagasue. Mangino mahungu adi mbadi ha fundo diana jinga muene! Phangi Brizit wakotelesele egi Yehowa wamuhanele ngolo jia gukolesela mu malamba ataganele nawo.

17. Itshi tudi naye gutshita?

¹⁷ Satana wana gututuma ha gutshigina egi Yehowa gana gutukuatesa ndo mu tangua dia lamba, ulondegi wenji wana gutumonesa nji lamba diavula. Satana wana tshigina egi tuvue woma, tangua aphangi adi nu inemo mu ulondegi wa Yehowa adi mumbiwa mambo, musagesewa nga ambiwa mu bologo. Wana tshigina nji egi ndaga jiabola athu ana zuela mukunda nu esue, jitutume ha gubemba gushila Yehowa mutshima nu ulondegi wenji. Uvi, tuana jiya muabonga ndaga eji Satana wana kalagala ha gutuhuiga. (2 Kol. 2:11) Hene zula desizio dia gutuna mambo a Satana nu sala ya gujinginyina mu organizasio wa Yehowa. Jiya egi Yehowa mbagagubembegigo nga hazonda. (Ngi. 28:7) Ubembigo egi nga gima gimoshi gigukhaphumune nu Yehowa!​—Roma 8:35-39.

18. Itshi mbatumona mu longo dialandula?

¹⁸ Mu longo edi tuazuelela malamba athu anyi ashigo Matemue a Yehowa ajiya gutumonesa. Uvi malamba tuana tagana nawo mu hungu, ajiya nji gututuma ha gubemba gushila Yehowa mutshima nu ulondegi wenji. Luholo lutshi tuajiya gubinga malanga ene? Mbatuzuelela ndaga yene mu longo dialandula.