LONGO DIA 41
Khala Wagujinginyina Gudi Yehowa mu Tangua dia “Lamba Diakola”
‘Zumbienu Yehowa, enue enya gutshigina enji agasue. Yehowa wana gubamba athu adi agujinginyina gudi muene.’—NGI. 31:23.
LUNGIMBO 129 Tulandulenu Gukolesela
NDAGA JIDI MU LONGO EDI *
1-2. (a) Gualeha ndo, mafumu a ha mavu awa mbaazuela itshi? (b) Mihu itshi tudi naye guhana mvutu?
TANGIZA gale egi mafumu a ha mavu awa azuela mbimbi tuana gunengena sendese mualeha egi tudi mu “guhuima nu ubambi.” Mbaadihala egi ahetesa diago guhuima ha mavu. Mafumu a ha mavu mbaatuma athu ha gutangiza egi, ene ajiya gumanesa milonga yagasue ya ha mavu. Uvi mbaashigo mujiya nga hazonda ndaga mbajibua gungima! Mukunda natshi? Biblia idi muzuela egi mu tangua diene, “gushiyiwa gua gisagumuisa mbaguaabuila, . . . mbaamonyigo njila ya gulengela.”—1 Tes. 5:3, NWT.
2 Tudi nu funu ya gujiya mvutu gu mihu eyi ya ndando: Ndaga jitshi mbajibua mu tangua dia “lamba diakola”? Itshi Yehowa adi gututoga ha gutshita mu tangua diene? Luholo lutshi tuajiya gudilondega mangino ha gusala agujinginyina gudi Yehowa mu tangua dia lamba diakola?—Mat. 24:21.
NDAGA JITSHI MBAJIBUA MU TANGUA DIA “LAMBA DIAKOLA”?
3. Ha gutadila Yatuwuwe 17:5, 15-18, luholo lutshi Nzambi mbaashiya “Babilone Yakoma”?
3 Tanga Yatuwuwe 17:5, 15-18. “Babilone Yakoma” mbayishiyiwa! Gifua luholo tuayimona gutuama, mafumu a ha mavu awa mbaashigo mukotelesa nga hazonda ndaga mbajibua gungima. Mukunda natshi? Handaga ‘Nzambi mbawumba matangi enji mu mitshima yawo ha gutagenesa felela dienji.’ Felela ditshi? Dia gushiya ikombelelo yagasue ya mambo, nu aklisto a mambo. * Nzambi mbawumba matangi enji mu mitshima ya “mbinga kumi” jia ‘shitu yabenga ya mu gishitu.’ Mbinga kumi jidi mafumu agasue a ha mavu ana gukuatesa ‘shitu yabenga ya mu gishitu.’ Shitu yene idi Organisation des Nations unies. (Yat. 17:3, 11-13; 18:8) Tangua mafumu awa a politike mbaabalumugila ikombelelo ya mambo, mbayikhala gisendeselo gia lamba diakola. Ndaga yene mbayikhala diago lamba mbadikuata muthu wagasue ha mavu.
4. (a) Itshi mbayituma mafumu a ha mavu ha gushiya ikombelelo ya mambo? (b) Itshi athu akhala mu ikombelelo yene mbaakamba gutshita?
4 Tushigo mujiya itshi mbayituma mafumu a ha mavu ha gubalumugila Babilone Yakoma. Giphungu giko mbaazuela egi, ikombelelo idi guaakanga njila ha guhetesa guhuima ha mavu, nu yana gudinginyisa tangua diagasue mu milonga ya politike. Nga ndo, mbaamona egi ikombelelo yazanguile gale umonyi wavula diago. (Yat. 18:3, 7) Yajiya gukhala egi tangua mafumu a ha mavu awa mbaaluisa ikombelelo, mbaashiyigo athu agasue a mu ikombelelo yene. Idi mumonega egi mafumu a ha mavu mbaashiya ikombelelo yagasue. Tangua ikombelelo eyi mbayishiyiwa, athu akhalele muene mbaakotelesa egi mafumu awo a ahuigile. Mbaakamba luholo lua gudikhaphumuna nu ikombelelo yene.
5. Itshi ya layile Yehowa mu ndaga yatadila lamba diakoma? Mukunda natshi?
5 Biblia ishigo mumonesa matangua guvula gutshi gushiyiwa gua Babilone Yakoma mbaguzula. Uvi tudi mujiya egi mbaguzudigo matangua avula. (Yat. 18:10, 21) Yehowa walayile egi ‘mbawuhihisa masugu’ a lamba diakola mukunda nu athu enji “atombele muene” nu mukunda nu guhuluga gua gikombelelo gia giamatshidia. (Mako 13:19, 20) Uvi itshi Yehowa mbaatutoga ha gutshita gu gisendeselo gia lamba dia kola uu nu gu ita ya Armaguédon?
LANDULA GUKOMBELELA YEHOWA
6. Gula tuakatuga mu ikombelelo ya mambo, itshi tudi naye luko gukalagala?
6 Gifua tuayimonyi mu longo diabalega, Yehowa udi mutoga akombeledi enji ha gukatuga mu ikombelelo ya mambo. Uvi, tushigo naye phamba gukatuga mu ikombelelo ya mambo. Tudi naye gulandula gukombelela phamba Yehowa. Tutalenu maluholo mbadi tuajiya guyikalagala.
Tubembigo khadilo dietu dia gudibungisa gua mu hungu, ikhale mu matangua a lamba (Tala paragrafe 7) *
7. (a) Luholo lutshi tuajiya gunemesa mikhuala ya Yehowa? (b) Mukunda natshi Hebelu 10:24, 25 idi muzuela egi tudi naye gudibungisa? Mukunda natshi idi nu ndando mangino?
7 Thomo, tudi naye gutumagela mikhuala ya Yehowa. Tushigo naye gulandula makalegelo abola a athu a ha mavu awa. Tushigo naye gukalagala uthambi nga ndaga jiko jia musonyi, gifua gudizula mu ulo nga gubungisa muila mala nu mala nga akhetu nu akhetu. (Mat. 19:4, 5; Lomo 1:26, 27) Ndaga ya mbadi idi egi, tudi naye gulandula gudibungisa nu aphangi’etu Aklisto ha gukombelela Yehowa. Tuana guyitshita mu Inzo ya Ufumu, nga mu jinzo jia aphangi’etu Aklisto, nga mu gisuegi gula yatoga ngenyi. Nga ndaga itshi yatubuila, tushigo naye gubemba gudibungisa nu aphangi’etu ha gukombelela Yehowa. Yadiago, tudi naye gulandula gudibungisa handaga ‘lusugu lua Fumu luasuena hehi.’—Tanga Hebelu 10:24, 25.
8. Luholo lutshi lukuma tudi mulongesa mangino mbalusombegesa mu masugu adi muza?
8 Mu tangua dia lamba diakola, lukuma tudi mulongesa mangino mbalusombegesa. Mangino, tudi mulongesa lukuma luabonga lua Ufumu, nu tudi mutshita ngolo ha gubuisa athu alandudi. Uvi mu tangua dia lamba diakola, mbatulongesa lukuma lua gusophesa ludi gifua mayi’a nzanza. Lukuma luene mbaluhana woma. (Yat. 16:21) Yajiya gukhala egi mbatulongesa egi gualeha ndo mavu awa a Satana mbaashiyiwa mayilago. Mutangua diene, mbatujiya muabonga lukuma luene nu mbatujiya nji luholo lua gulongesa lukuma luene. Mbatukalegela maluholo a gulongesa tudi mukalegela mangino ba? Mbatusombegesa maluholo etu agulongesa ba? Tushigo mujiya nga gima. Luholo luagasue mbatulongesa, mbayikhla luendu gudi esue ha gudijiga athu lukuma lua usopheshi wa Yehowa!—Ezek. 2:3-5.
9. Mafumu a ha mavu awa mbaakalagala itshi mukunda nu lukuma mbatulongesa? Uvi tudi musha mutshima egi itshi mbayikalegewa?
9 Lukuma mbatulongesa, mbalutuma mafumu a ha mavu awa ha gututunyisa gulongesa mayilago. Luholo tuana gushila Yehowa mutshima mangino mu mudimo wa gulongesa, mbatumushila nji mutshima mu tangua diene. Tudi musha mutshima egi Nzambi wetu mbawutuhana ngolo hagula tutagenese gutshigina guenji.—Mika 3:8.
DILONDEGE HANDAGA AKOMBELEDI A NZAMBI MBAALUISHIWA
10. Ha gutadila Luka 21:25-28, athu mbaadivua luholo lutshi mu tangua dia lamba diakola?
10 Tanga Luka 21:25-28. Mu tangua dia lamba diakola, athu mbaadisagesa muavula tangua mbaamona egi ima yagasue akhalele mutangiza egi mbayisala mayilago, yasendesa gushiyiwa. Ene mbaakhala nu “lamba,” mbaavua woma mukunda nu mionyo yawo handaga mbaakhala diago mu tangua diabola. (Sef. 1:14, 15) Mu tangua diene, idi yadiago egi lujingu lua akombeledi a Yehowa mbalukhala lamba diago. Luholo mbatulandula gutuna gungina mu ndaga jia ha mavu awa, mbatumona malamba. Yajiya gukhala egi mu tangua diene, mbatumona lamba dia ima.
11. (a) Mukunda natshi Matemue a Yehowa mbaahagewa meso? (b) Mukunda natshi tushigo naye guvua woma wa lamba diakola?
11 Mu tangua dimoshi ngenyi, yajiya gukhala egi athu a ikombelelo yinyi mbayishiyiwa, mbaavua khabu ha gumona egi gikombelelo gia Matemue a Yehowa giashiyiwego. Tuajiya gutangiza luholo mbaazuelela ndaga yene muavula, uu nu mu internet. Satana nu mafumu a ha mavu awa, mbaatuvuila khabu jiakola ha gumona egi phamba gikombelelo gietu giasala ha mavu. Uvi felela diawo dia gushiya ikombelelo yagasue ha mavu mbaditaganago. Hene, mbaatuhaga meso. Mu tangua diene, mafumu a ha mavu awa mbaabua Goga wa gu Magoga. * Mbaadibungisa ha guluisa akombeledi a Yehowa. (Ezek. 38:2, 14-16) Gutangiza ndaga eji jiagasue guajiya gusendesa gutuhana woma handaga tushigo mujiya diago luholo ndaga mbajikalegewa. Uvi tudi mujiya egi: Tuajiyilego guvuila lamba diakola woma. Mukunda natshi? Yehowa mbawutuhana malongo mbaatuhuluisa. (Ngi. 34:19) Esue ‘mbatuzumbula mito yetu’ handaga mbatujiya egi, ‘guhuluga guetu guasuena hehi.’ *
12. Luholo lutshi ‘muhiga wafubidila nu watema’ ana gutukuatesa ha gudilondega mukunda nu ndaga mbajibua mu masugu adi muza?
12 ‘Muhiga wafubidila nu watema’ udi gutukuatesa ha gudilondega hagula mu tangua dia lamba diakola, tusale agujinginyina gudi Yehowa. (Mat. 24:45) Muhiga wana gutukuatesa mu maluholo avula. Uvi tutadilenu phamba ndaga imoshi: programe ya asamble etu a masugu thathu sendese mu 2016 uu nu mu 2018. Ma diskur a asamble ene, atukuatesele ha gukolesa makalegelo nguana tudi nawo funu handaga lusugu lua Yehowa luasuena hehi. Tuzuelelenu gale makalegelo ene.
LANDULA GUKOLESA KHADILO DIAYE DIA GUJINGINYINA, DIA GUKOLESELA NU DIA GIKHESA
Sendese mangino, dilondege ha guhuluishiwa mu tangua dia “lamba diakola” (Tala paragrafe 13-16) *
13. Luholo lutshi tuajiya gukolesa khadilo dietu dia gukhala agujinginyina gudi Yehowa? Mukunda natshi tudi naye guyitshita sendese mangino?
13 Gujinginyina: Muto wa lumene wa asamble a masugu thathu a 2016 wakhalele egi: “Khala Wagujinginyina Gudi Yehowa!” Asamble awa atulongesele egi, gula tudi nu ufuta wakola nu Yehowa, mbatusala agujinginyina gudi muene. Tuamonele egi tuajiya gusuena hehi nu Yehowa gula tudi gumukombelela nu mutshima wagasue, nu gula tudi mulonguga Biblia muavula. Gukalagala ndaga eji guana gutuhana ngolo jia gubinga malamba agasue tuajiya gutagana nawo, nga malamba ene adi akola. Luholo mavu awa a Satana aheta gu gisugishilo, tudi naye gujiya egi mbatutagana nu malamba akola ajiya gulola gujinginyina guetu gudi Nzambi nu Ufumu wenji. Athu mbaatusegulula. (2 Phet. 3:3, 4) Avula mbaatusegulula handaga tuanago gudinginyisa nga mu ndaga imoshi ya ha mavu awa. Tudi naye gukolesa khadilo dietu dia gukhala agujinginyina gudi Nzambi sendese mangino, hagula mbatusale agujinginyina mu tangua dia lamba diakola.
14. (a) Ndaga jitshi mbajisombegesa mukunda nu aphangi adi mutuameza ulondegi ha mavu? (b) Mukunda natshi mbayitoga egi tukhale agujinginyina mu tangua diene?
14 Mu tangua dia lamba diakola, gudi nu ndaga mbajisombegesa mukunda nu aphangi ana gutuameza ulondegi ha mavu. Mu tangua dimoshi ngenyi, Aklisto agasue ambiwe gale maji mu nyuma mbaabungishiwa mu dilu ha gulua ita ya Armaguédon. (Mat. 24:31; Yat. 2:26, 27) Yakotelesa egi, mbatukhadigo luko nu aphangi a Hunji dia Akulu Atuameji ha mavu. Uvi, thundu yakoma ya athu mbayikhala ya gulondega muabonga. Aphangi a mala adi atagana, adi mukatshi dia imeme iko, mbaatuameza ulondegi. Mbatumonesa egi tudi agujinginyina gudi Yehowa gula tudi mutumagela aphangi ene, nu tudi mulandula utuameji wawo handaga mbawukatuga gudi Yehowa hakhenji. Tudi naye guaatumagela gila tuatshigina guhuluishiwa!
15. Luholo lutshi tuajiya gukolesa khadilo dietu dia gukolesela? Mukunda natshi idi nu ndando ha guyitshita mangino?
15 Gukolesela: Muto wa lumene wa asamble a masugu thathu a 2017 wakhalele egi: “Ubembigo!” Asamble ene atukuatesele ha gukolesela. Tuamonele egi, tuajiyilego gukolesela phamba mu tangua ndaga jidi muyila muabonga. Tuajiya gukolesela phamba gula tudi musha mutshima wetu gudi Yehowa. (Lomo 12:12) Tubuitshigo mutshima gu mbimbi jiazuelele Yesu egi: ‘Muthu wakolesela uu nu gu gisugishilo, mbawuhuluishiwa.’ (Mat. 24:13) Laji edi didi mumonesa egi, tudi naye gusala agujinginyina gudi Yehowa nga tuatagana nu malamba a luholo lutshi. Gula tudi mukolela malamba etu agasue mangino, gutshigina guetu mbagukola gutuama egi lamba diakola disendese.
16. Itshi yajiya gutukuatesa ha gukhala nu gikhesa? Luholo lutshi tuajiya gukolesa khadilo dietu dia gikhesa sendese mangino?
16 Gikhesa (ngolo): Muto wa lumene wa asamble a masugu thathu a 2018 wakhalele egi: “Khala nu Gikhesa!” Asamble ene atukuatesele ha gujiya egi, ishigo gutema guetu nga makalegelo etu ako ajiya gutubuisa athu a gikhesa. Luholo lumoshi nu khadilo dia gukolesela, ha guheta gikhesa, tudi naye gushila Yehowa mutshima. Luholo lutshi tuajiya gukudisa khadilo dia gushila Yehowa mutshima? Gula tudi mutanga Biblia nu tudi mutangigiza luholo Yehowa ahuluishile akombeledi enji a mu ginono. (Ngi. 68:20; 2 Phet. 2:9) Tangua mafumu a ha mavu awa mbaatuluisa mu tangua dia lamba diakola, mbatukhala nu funu ya gikhesa nu gushila Yehowa mutshima gubalega mangino. (Ngi. 112:7, 8; Heb. 13:6) Gila tudi mushila Yehowa mutshima sendese mangino, mbatuheta ngolo tudi najio funu ha gubinga uluishi wa Goga. *
SHA MATANGI’AYE MU GUHULUGA GUAYE
Gualeha ndo, Yesu nu masuta enji a mu dilu mbaashiya mbalagaji jia Nzambi mu ita ya Armaguédon! (Tala paragrafe 17)
17. Mukunda natshi tushigo naye guvua woma wa Armaguédon? (Tala gifuanesa gidi holu dia gizula.)
17 Gifua luholo tuayimonyi mu longo diabalega, avula mukatshi dietu anajinga monyo wawo wagasue mu masugu a gisugishilo. Uvi tudi luko nu felela dia guhuluishiwa mu tangua dia lamba diakola. Ita ya Armaguédon mbayikhala gisugishilo gia gisugishilo gia mavu awa. Uvi, tushigo naye guyivuila woma. Mukunda natshi? Handaga idi ita ya Yehowa. (Ish. 1:33; Ezek. 38:18-20; Zak. 14:3) Tangua Yehowa mbaahana njila, Yesu Klisto mbawutuameza masuta a Nzambi ha gulua ita. Muene mbawukhala hamoshi nu Aklisto ambiwe maji mu nyuma nu ba milio ya anjelo. Mbaadibungisa ha guluisa Satana, nu bademo enji, nu masuta a ha mavu awa.—Dan. 12:1; Yat. 6:2; 17:14.
18. (a) Yehowa udi gutulaya itshi? (b) Luholo lutshi Yatuwuwe 7:9, 13-17 idi gugukuatesa ha gusha mutshima egi Yehowa mbawutuhuluisa mu masugu adi muza?
18 Yehowa udi gutulaya egi: “Iluilo yagasue mbaakalegela ha guguluisa, mbayibingigo.” (Yesh. 54:17, NWT) “Thundu yakoma” ya akombeledi a Yehowa mbayihuluishiwa “mu lamba diakola.” Gungima, mbaalandula gumukalegela mudimo wa gijila. (Tanga Yatuwuwe 7:9, 13-17.) Biblia idi gutuhana ishina yavula ya gusha mutshima egi Yehowa mbawutuhuluisa mu masugu adi muza! Tudi mujiya egi Yehowa wana ‘gubamba enya gutshigina.’ (Ngi. 31:23) Athu agasue ana guzumba Yehowa nu ana gumutumbuisa, mbaasuanguluga ha gumona luholo muene mbaamonesa egi jina dienji didi dia gijila.—Ezek. 38:23.
19. Felela ditshi diawaha tudi nadio mukunda nu masugu adi muza?
19 Tangiza gale luholo mbimbi jidi mu 2 Timote 3:2-5 jiajiya gusonegewa gula jidi muzuelela athu mu mavu ahe-ahe, ashigo nu uhinyinyi wa Satana. (Tala galuanda gadi muzuela egi “ Mu Mavu Ahe-ahe, Athu Mbaakhala . . .”) Phangi George Gangas, * wago wakhalele mu Hunji dia Akulu Atuameji, wazuelele mukunda nu verse eji egi: “Mavu mbaakhala luholo lutshi tangua athu agasue mbaakhala diago aphangi! Gualeha ndo, mbamukhala nu gusuanguluga guavula ha gujinga mu mavu ahe-ahe. Mbamujinga ivo nu ivo gifua muana jinga Yehowa. Mbamujinga mayilago.” Tudi lume nu felela diawaha sha!
LUNGIMBO 122 Dindamanenu, Dijigamesenu!
^ par. 5 Tudi mujiya egi gualeha ndo, athu agasue mbaamona “lamba diakola.” Mu tangua diene, itshi mbayibuila akombeledi a Yehowa? Itshi Yehowa adi gututoga ha gutshita? Makalegelo atshi tudi nawo funu ha gusala agujinginyina gudi Yehowa mu tangua dia lamba diakola? Tuza muheta mvutu jia mihu eyi mu longo edi.
^ par. 3 UKOTELESHI WA MBIMBI: Aklisto a mambo adi athu ana guzuela egi ana gulandula Klisto, uvi anago gulongesa athu ha gukombelela Yehowa mu luholo luana gutshigina muene.
^ par. 11 UKOTELESHI WA MBIMBI: Mbimbi Goga wa gu Magoga (nu jina dienji diahihia, Goga) jidi mukotelesa egi, gudibungisa gua ifutshi ha guluisa akombeledi a Yehowa mu tangua dia lamba diakola.
^ par. 11 Ha gujiya muavula ndaga jiagasue mbajikalegewa gutuama egi ita ya Armaguédon yisendese, tala mukhapo 21 wa mukanda Le Royaume de Dieu en action! Ha gujiya ndaga jiavula jiatadila uluishi wa Goga wa gu Magoga, nu luholo Yehowa mbaahuluisa akombeledi enji mu Armaguédon, tala w13-F 15/7 diyiji 3-8, nu w15-F 15/7 diyiji 14-19.
^ par. 16 Asamble a masugu thathu a 2019 akhadi nu muto wa lumene egi: “Guzumba Guana Guhua Ndo!” Atutshiginyisa diago egi tuajiya gukhala mu guhuima, mu ubambi wa guzumba gua Yehowa.—1 Kol. 13:8.
^ par. 19 Tala longo didi muzuela egi, “Ses œuvres l’accompagnent” mu Inzo Yaleha ya Mutaledi ya 1 décembre 1994 (ya français).
