1. Itshi Yehowa wajiya gutshita ha gutagenesa felela dienji?

YEHOWA wajiya gugubuisa yagasue atshigina ha gutagenesa felela dienji. Tufezegese gale. Yehowa wadibuishile Mulongeshi, Muwalaganyi, nu mubatshi wa mene jiabonga. Idi phamba ifezegeselo yazonda ya maluholo adibuishile Yehowa. (Yesh. 48:17; 2 Kol. 7:6; Gal. 3:8) Uvi matangua avula, wana gukalegela athu ha gutagenesa mafelela enji. (Mat. 24:14; 28:19, 20; 2 Kol. 1:3, 4) Yehowa wajiya gutuhana ndunge nu ngolo tudi najio funu ha gubua yagasue atshigina ha gutagenesa felela dienji. Tujimbilago egi jina dienji didi mukotelesa egi, wana gubuisa yagasue atshigina, ha gutagenesa felela dienji. Alongogi a Biblia ana guzuela egi, jina dienji didi mukotelesa ngenyi.

2. (a) Mukunda natshi matangua ako tuajiya gutangiza egi Yehowa gajiyilego gutukadigila ha gutshita ndaga? (b) Itshi tuza mu zuelela mu longo edi?

² Mukut’etu agasue tuana gutshigina egi Yehowa atukalegele ha gutagenesa felela dienji. Uvi athu ako ajiya gumona egi Yehowa gajiyilego guaakalegela. Mukunda natshi? Ana gumona egi ashigo gawo atagana mukunda nu ivo yawo, nu ujiyi wawo, nga ndaga jiawo jia lujingu. Athu ako ajiya gusuanguluga gutshita phamba ndaga ajiyagale nu gutangiza egi ashigo luko nu funu ya gutshita ndaga jiko. Mu longo edi, tuza mumona luholo Yehowa ajiya guhana muthu wagasue mukatshi dietu ima adi nayo funu ha gutagenesa felela dienji. Tuza luko mumona, ifezegeselo ya mu Biblia ya akombeledi a Yehowa a mala nu akhethu, luholo Yehowa ahanele nzala nu ngolo jia gutshita ndaga. Gugisugishilo, tuza mumona luholo lutshi tuajiya gutshigina egi Yehowa atutume.

3. Ha gutadila ndaga jidi mu Filiphi 2:13, luholo lutshi Yehowa ajiya gutuhana nzala ya gutshita ndaga?

³ Tanga Filiphi 2:13. * Yehowa wajiya gutuhana nzala ya gutshita ndaga. Luholo lutshi? Tuajiya guvua egi mu hungu mudi nu funu ya ukuateshi gifua, gukuatesa phangi mumoshi. Nga ndo akulu ajiya gututangela mukanda wakatuga gu biro ya filiale ha gutudijiga mafundo adi mutoga ukuateshi mu teritoire yetu. Tuajiya gudihula egi, ‘Luholo lutshi ngajiya gukuatesa?’ Ajiya luko gutuhana mudimo umoshi wakola sha. Uvi tuajiya gudihula gula tuajiya lume guwutshita muabonga. Luko, gungima dia gutanga verse mu Biblia, tuajiya gudihula egi, ‘Luholo lutshi ngajiya gukalegela verse eji ha gukuatesa athu ako?’ Yehowa mbaatushinjigago ha gutshita ndaga. Uvi gula muene wamona egi tudi mutangiza ndaga tuajiya gukalagala, wajiya gutuhana nzala ya gutshita ndaga jituatangiza.

4. Luholo lutshi Yehowa ajiya gutuhana ngolo jia gutshita ndaga?

⁴ Yehowa wajiya gutuhana luko ngolo jia gutshita ndaga. (Yesh. 40:29) Luholo lutshi? Wajiya gutuhana nyuma yenji yabonga itukuatesa ha gukadigila muabonga ndaga jiko tuana gujiya gale. (Guz. 35:30-35) Yehowa wajiya gutulongesa mu njila ya ulondegi wenji ha gujiya luholo tuajiya gutshita ndaga jiko. Gula ushigo mujiya luholo lua gutshita mudimo umoshi ngenyi, toga ukuateshi. Luko, wajiya gutoga ukuateshi gudi Sh’etu wa mu dilu hagula aguhue “ngolo jinyi jiabalega ngolo jia athu.” (2 Kol. 4:7, NWT; Luka 11:13) Biblia idi nu ifezegeselo yavula idi mumonesa luholo Yehowa ahanele mala nu akhetu nzala, nu ngolo jia gutshita ndaga. Hatudi mutadila ifezegeselo yene, tangiza luholo Yehowa ajiya gugukadigila ha gutshita ndaga jiatshitshile ene.

5. Luholo nu tangua Yehowa abuishile Moize muhuluishi wa enya Isalele, idi gutulongesa itshi?

⁵ Tusendese thomo nu Moize. Yehowa wabuishile Moize muhuluishi wa enya Isalele. Uvi, tangua ditshi amubuishile muhuluishi wa enya Isalele? Yakhalelego mu tangua diatangijile Moize egi udi watagana, ngungima dia ‘gulongesewa mu ndunge jiagasue jia enya Egypte ba.’ (Makal. 7:22-25) Gutuama egi Yehowa abuise Moize muhuluishi, wamukuatesele thomo ha gubua muthu wa gudibulumuisa nu watuluga. (Makal. 7:30, 34-36) Yehowa wahanele Moize ngolo jia guzuela nu fumu wakoma wa Egypte. (Guz. 9:13-19) Ndaga eyi idi gutulongesa itshi? Yehowa wana gutshigina egi athu adi naye gumukalegela mudimo, alandule makalegelo enji nu azegemene gudi muene ha guheta ngolo.—Fili. 4:13.

6. Luholo Yehowa akadigile Balezilayi ha gukuatesa Fumu Davidi ludi gutulongesa itshi?

⁶ Ivo yavula gungima, Yehowa watumine Balezilayi ha gukuatesa Fumu Davidi. Tangua Davidi nu athu enji akhalele mulenga Abasaloma, muna Davidi, “nzala nu guhuila nu luhungu” yaakuatele. Mu tangua diene, Balezilayi wakhalele muthu wagukula. Uvi wayile hamoshi nu athu ako, waabatele ima ya gudia, ngatshima yakambele guaabatela gufua. Balezilayi gatangijilego egi luholo akhalele muthu wagukula, Yehowa gajiyilego gumukadigila ha gutshita ndaga. Balezilayi wakuatesele akombeledi a Nzambi nu ima gakhalele nayo. (2 Sam. 17:27-29) Ndaga eyi idi gutulongesa itshi? Tukhale athu a gukula nga ndo, Yehowa wajiya gutukadigila ha gukuatesa aphangi’etu Aklisto a mu dimbo dietu nga a mu ifutshi iko adi nu lamba dia ima. (Ish. 3:27, 28;  19:17) Gula tushigo nu luholo lua guaakuatesa, tuajiya gumba musomonyi (musomo) ha guhana mago gu mudimo wa gukuatesa aphangi’etu adi mubuila malamba ha mavu agasue.—2 Kol. 8:14, 15; 9:11.

7. Yehowa watumine Simeone ha gutshita itshi? Mukunda natshi ndaga yene idi gutukolesa?

⁷ Gu Yelusalema, guakhalele nu mukombeledi wa Yehowa wagukula. Jina dienji Simeone. Yehowa wamulayile egi, gajiyilego gufua gutuama egi amone Masiya. Idi naye gukhala egi laji diene diakhalele muhana Simeone ngolo handaga wakhalele munengena guza gua Masiya ivo yavula. Yehowa washimbigile Simeone mukunda nu khadilo dienji dia gutshigina nu dia gukolesela. Lusugu lumoshi, Simeone ‘watuamezewe gudi nyuma yabonga ya Nzambi,’ wayile mu tempelo. Wamonele Yesu hakhalele muene mona wa gitebe. Yehowa watumine Simeone ha guzuela profesi yatadila mona owu wakhalele naye gubua Klisto. (Luka 2:25-35) Simeone wadiangele gufua gutuama egi Yesu asendese midimo yenji ha mavu. Uvi wahanele Yehowa mersi luholo amuhanele luendu lua gumona Masiya. Simeone mbawuheta gubonga guavula mu masugu adi muza! Mu mavu ahe-ahe, Simeone mbawumona luholo uhinyinyi wa Yesu mbawubatela athu agasue a ha mavu gubonga. (Gis. 22:18) Esue nji, tudi naye guhana Yehowa mersi gu ginemo giagasue adi gutuhana mu mudimo wenji.

8. Luholo lutshi Yehowa ajiya gutukadigila gifua luholo akadigidile Barnabase?

⁸ Mu siekle ya thomo ya tangua dietu, yala mumoshi wa gisemo mu jina dia Yozefe watshiginyile egi Yehowa amukadigile ha gutshita ndaga. (Makal. 4:36, 37) Apostolo akhalele gumutamega egi Barnabase, yakotelesa egi ‘Muwalaganyi.’ Yajiya gukhala egi akhalele gumutamega ngenyi handaga wakhalele muwalagana athu muavula. Tufezegese gale. Tangua Shaula abuile Muklisto, aphangi avula akhalele muvua woma ha gusuena hehi nenji, handaga wakhalele musagesa Aklisto. Uvi, Barnabase wahanele Shaula ngolo nu wamukuatesele. Shaula wasuangulugile nu ukuateshi wa Barnabase. (Makal. 9:21, 26-28) Gungima, akulu a gu Yelusalema akhalele nu funu ya gutuma muthu ha guya mukolesa aphangi akhalele gu Antiokia ya gu Syrie. Nanyi atumine? Barnabase! Atombele muthu watagana. Mukunda natshi? Biblia idi muzuela egi, Barnabase “waakolesele ha gukhala agujinginyina gudi Fumu nu mutshima wagasue.” (Makal. 11:22-24, NWT) Mangino, Yehowa wajiya gutukuatesa ha guwalagana aphangi’etu Aklisto. Wajiya gututuma ha guwalagala athu anyi afuishile aphangi’awo akhalele muzumba. Yehowa wajiya gututuma ha gutamega nga guya mutala muthu udi mukata hagula tumuwambele mbimbi jia gisemo. Mbawutshigina egi Yehowa agukadigile gifua luholo akadigidile Barnabase ba?—1 Tes. 5:14.

9. Luholo Yehowa akuatesele phangi Vasily ha gubua mukulu watagana, ludi gutulongesa itshi?

⁹ Yehowa wakuatesele phangi mumoshi mu jina dia Vasily ha gubua mukulu watagana. Tangua Vasily abuile mukulu, wakhalele nu ivo 26. Wakhalele muvua woma egi gakhalelego watagana ha gukuatesa aphangi a mu hungu mu nyuma, nu anyi akhalele mutagana nu malamba. Uvi, wahetele formasio yawaha gudi akulu anyi akhalele nu ivo yavula, nu mu École du ministère du Royaume (EMR). Vasily wakalegele ngolo ha gubua mukulu watagana. Wasonegele ndaga jiazonda akhalele naye gutshita. Tangua akhalele gujitshita, woma wenji wasendesele guhua hazonda-zonda. Vasily udi muzuela egi: “Ndaga yakhalele thomo gunguhana woma, idi gungusuanguluisa henyaha. Gula Yehowa wangukuatesa ha guheta verse yabonga ha gukolesa nayo phangi mu hungu, yana  gungusuanguluisa muavula diago.” Gila walandula gifezegeselo gia Vasily nu watshigina egi Yehowa agutume ha gutshita ndaga, muene wajiya gugukuatesa ha gutshita ndaga jiavula mu hungu.

10. Itshi yatshitshile Abigayile? Gifezegeselo gienji gidi gutulongesa itshi?

¹⁰ Fumu Saula wakhalele mukamba Davidi nu athu enji ha guaashiya. Hene, Davidi nu athu enji akhalele nu funu ya ukuateshi. Athu a Davidi atogele ima ya gudia gudi muenya Isalele mumoshi wakhalele nu umonyi. Jina dienji Nabala. Atogele ukuateshi gudi Nabala handaga abambele imeme yenji mu temu. Uvi Nabala wakhalele muthu wamina, gaahanelego nga gima gia gudia. Davidi wavuile khabu jiakola, wazudile desizio dia gushiya athu agasue a monzo ya Nabala. (1 Sam. 25:3-13, 22) Uvi, Abigayile mukaji’a Nabala, wakhalele mukhetu wabonga nu watema lume. Wamonesele gikhesa giakola, wafugamele Davidi, wamububidile hagula ashiyigo Nabala nu athu enji, gula ndo mbawukhala nu mukudi wa mahatshi awo. Watogele Davidi ha gusha ndaga yene ha mago a Yehowa. Mbimbi jia Abigayile jia gudibulumuisa nu ndaga jienji jia gutema, jiakuatele mutshima wa Davidi. Wakotelesele egi Yehowa watumine Abigayile. (1 Sam. 25:23-28, 32-34) Abigayile wakhalele nu makalegelo abonga hene abuile muthu wa ndando gu meso a Yehowa. Aklisto a akhetu adi mumonesa gutema, Yehowa wajiya guaakadigila ha gukolesa fami jiawo nu aphangi ako mu mungu.—Ish. 24:3; Tito 2:3-5.

11. Itshi yatshitshile ana Shaluma a akhetu? Luholo lutshi aphangi a akhetu ana gulandula gifezegeselo giawo mangino?

¹¹ Ivo yavula gungima, ana Shaluma a akhetu akhalele mukatshi dia athu atumine Yehowa ha gulondega ibayi (ibindji) ya Yelusalema. (Neh. 2:20; 3:12) Ngatshima sh’awo wakhalele mutuameji, ana Shaluma a akhetu atshiginyile ha gukalagala mudimo owu wakola wakambele guaabatela gufua. (Neh. 4:15-18) Ana akhetu awa akhalele agudisha diago nu manene a enya Tekowa, anyi ‘atunyine gudibulumuisa ha gutshita’ mudimo! (Neh. 3:5) Tangiza gusuanguluga guavuile ana Shaluma a akhetu tangua amanesele gutunga ibayi gungima dia masugu 52! (Neh. 6:15) Mangino, aphangi’etu a akhetu a bavolontere ana gusuanguluga guhana mago gu mudimo wa gijila wa Yehowa, gifua mudimo wa gutunga nu gulondega jinzo jia Yehowa. Ujiyi wawo, nu gusuanguluga, nu gudihana guawo guana gukuatesa hagula mudimo wene utshitshiwe kiawaha.

12. Luholo lutshi Yehowa ajiya gututuma ha gutshita ndaga gifua muatshitshile Tabita?

¹² Yehowa watumine Tabita ha gutshita ‘ndaga jiabonga’ nu guhana akhetu a gafunda ima. (Makal. 9:36) Tangua diafuile Tabita, athu avula amudidile mukunda nu khadilo dienji dia guhana nu dia gisemo. Uvi asuangulugile muavula tangua mupostolo Phetelo amufuzumuine. (Makal. 9:39-41) Lumene lua Tabita ludi gutulongesa itshi? Ikhale tudi athu agukula nga mavuala, mala nga akhetu, mukut’etu agasue tuajiya gutshita ndaga ha gukuatesa aphangi’etu.—Heb. 13:16.

13. Luholo lutshi Yehowa akuatesele phangi Ruth wakhalele muenya sonyi? Itshi gazuelele gu gisugishilo?

¹³ Phangi mumoshi wa mukhetu mu jina dia Ruth wakhalele muenya sonyi. Wakhalele mutshigina gubua misionere. Hakhalele muene galenge, wakhalele musuanguluga guya inzo nu inzo ha guhana athu trakte. Wazuelele egi: “Ngakhalele musuanguluga muavula nu mudimo wene.” Uvi, guta maga nu athu gu mifulo yawo nu guaawambela ndaga jia Ufumu wa Nzambi yakhalele lamba gudi muene.  Ngatshima phangi Ruth wakhalele muenya sonyi, wabuile muvundji wa muhola nu ivo 18. Mu 1946, wanginyine mu khalasa dia Gileade. Hangima, amutumine gu Hawaii nu gu Japon. Yehowa wamutumine ha gumuanga lukuma luabonga mu ifutshi yene. Gungima dia ivo 80 mu mudimo wa gulongesa, phangi Ruth wazuelele egi: “Yehowa wakhalele gunguhana ngolo tangua diagasue. Wangukuatesele ha gukatula musonyi. Ngakotelesa diago egi, Yehowa wajiya gukuatesa muthu wagasue wana gumushila mutshima.”

14. Ha gutadila Kolosai 1:29, itshi tudi naye gukalagala gula tuatshigina egi Yehowa atubuise atshitshi a ndaga?

¹⁴ Sendese mualeha, Yehowa wana gubuisa akombeledi enji atshitshi a ndaga jiavula. Uvi aye, Yehowa mbawugubuisa nanyi? Hagula agubuise mutshitshi wa ndaga jiavula, udi naye gudihana nu mutshima wagasue. (Tanga Kolosai 1:29.) Gula wadihana lume, Yehowa wajiya gugubuisa mulongeshi wabonga nu wa gikhesa, muwalaganyi watagana, mutshitshi wabonga wa mudimo, futa dia gushila mutshima, nga gima giko gidi nu funu ha gutagenesa felela dienji.

15. Ha gutadila 1 Timote 4:12, 15, itshi aphangi a mavuala adi naye gutoga Yehowa?

¹⁵ Gula udi phangi wa yala wa muvuala udi hehi nu gutagenesa ivo 18, itshi wajiya gukalagala? Tudi nu funu yavula ya aphangi a mala adi nu ngolo, ajiya gutshigina gubua akuateshi a mudimo ha gukuatesa hungu. Mu mahungu avula, akulu adi avula gubalega akuateshi a mudimo. Wajiya gutshigina gudihana ha guheta inemo iko mu hungu dienu ba? Aphangi ako a mala ana guzuela egi: “Ngana suanguluga gami gukhala phamba mulongeshi mu hungu.” Gila aye nji wana guzuela ngenyi, toga Yehowa agukuatese ha gukudisa nzala ya gutshita ngolo ha gubua mukuateshi wa midimo, nu aguhue ngolo jia gutshita yagasue ha gumukalegela mudimo. (Mulo. 12:1) Tudi nu funu ya ukuateshi waye!—Tanga 1 Timote 4:12, 15.

16. Itshi tudi naye gutoga Yehowa? Mukunda natshi?

¹⁶ Yehowa wajiya gugubuisa yagasue atshigina ha gutagenesa felela dienji. Hene, mutoge ha guguha nzala ya gutshita mudimo wenji, nu ha guguhana ngolo udi najio funu. Ikhale udi muvuala nga muthu wagukula, kalegela tangua, nu ngolo, nu ima yaye iko ha gutumbuisa Yehowa mangino. (Mulo. 9:10) Gula waheta luendu lua gutshita ndaga jiavula mu mudimo wa Yehowa, utunyigo handaga udi mutangiza egi ushigo watagana ha guwukalagala. Mukut’etu agasue tudi nu luendu lua gukalagala yagasue ha gutumbuisa Sh’etu wa guzumba!