1. Mukunda natshi tudi naye guzumba Yehowa gubalega ima yagasue?

TUDI naye guzumba Yehowa gubalega ima yagasue handaga muene watufugile nu watuhuile monyo. (Yat. 4:11) Uvi, yakhalago ndaga yaleba. Ngatshima tuana guzumba Yehowa nu tuana gumunemesa, gudi nu ima yajiya gubua nu ndando yavula mu lujingu luetu, yajiya gutukanga njila ha gukombelela phamba Yehowa. Tudi naye gujiya luholo lutshi ndaga eyi yajiya gubuila Muklisto. Tukambenu gale thomo gujiya, guzumba Yehowa gubalega ima yagasue gudi mukotelesa itshi.

2. Ha gutadila Guzoga 34:14, itshi mbatukalagala gula tudi mukombelela phamba Yehowa?

² Yehowa “udi Nzambi wa fuwa.” Yakotelesa egi, tudi naye gumukombelela phamba muene. Gula tudi mukombelela phamba Yehowa, mbatumuzumba muavula gubalega ima yagasue. Mbatutshiginago egi muthu nga gima gimoshi, gizangule fundo dia Yehowa mu mutshima wetu.—Tanga Guzoga 34:14.

3. Ishina itshi yabonga tudi nayo yana gututuma ha guzumba Yehowa?

³ Tudi nu ishina yavula yana gututuma ha guzumba Yehowa. Tuana gusuanguluga nu makalegelo enji abonga. Tuana gujiya ima yana guzumba Yehowa nu ima ganago guzumba. Tuana gujiya felela dienji mukunda nu athu, nu tuana guditumagela. Yehowa watuhanele luendu lua gubua mafut’enji. (Ngi. 25:14) Ndaga jiagasue tuana gulonguga, jiatadila Mufugi wetu, jiana gutukuatesa ha gusuena hehi nu muene.—Yak. 4:8.

4. (a) Itshi Diabulu anakalegela hagulebesa guzumba guetu gudi Yehowa? (b) Itshi tuza muzuelela mu longo edi?

 ⁴ Mutuameji wa mavu awa udi Diabulu. Wana gukalegela guleba guetu, nu ima tuakhala nayo funu. (Ef. 2:1-3; 1 Yone 5:19) Felela dienji diakhala egi tuzumbe ima ya ha mavu awa muavula gubalega Yehowa. Tuzuelele ndaga mbadi Satana ajiya gukalegela. Thomo, wajiya gutuhuiga ha guzumba muavula umonyi, wajiya nji gutuhuiga ha gutomba ima yabola ya gudikenesela.

5. Mukunda natshi tudi naye gutema ha gutuna gubua mu muheto wa guzumba falanga?

⁵ Mukut’etu agasue, tuana gutshigina gukhala nu ndambo ya ima ya gudia, nu milele yabonga ya gusudiga, nu fundo diabonga dia gujinga. Uvi tudi naye gutema hagula tubuigo mu muheto wa guzumba falanga. Athu avula mangino ana “zumba mbongo” nu ima ya falanga. (2 Tim. 3:2) Yesu wajiyile egi alandudi enji ajiya gubua mu muheto wa guzumba falanga. Wazuelele egi: ‘Muthu gajiyilego gukhala muhiga wa mafumu mbadi, handaga mbawutuna mumoshi ha guzumba muko. Mbawujinginyina gudi muko, uvi muko ndo. Wajiyilego gukhala muhiga wa Nzambi nu wa umonyi.’ (Mat. 6:24) Gula muthu udi mukombelela Yehowa, uvi udi mutshita muavula ha guheta umonyi wa vula-vula, mbawubua mu muheto wa gukombelela mafumu mbadi. Muene wajiya guzumba ima ya ha mavu muavula gubalega Yehowa.

6. Mbimbi jiazuelele Yesu mukunda nu Aklisto a mu hungu dia gu Laodise jidi gutulongesa itshi?

⁶ Mu siekle ya thomo, Aklisto a mu hungu dia gu Laodise akhalele gudisunzula egi: ‘Ame ngudi muenya umonyi, ngudi nu ikumba yavula, ngushigo musubalela gima ndo.’ Uvi gu meso a Yehowa nu Yesu, akhalele ‘enya lamba,  enya gufua muila, phutu, ifofo, nu akhalele ithowa.’ Yesu gaahanelego lubelo handaga akhalele nu umonyi. Waabelele handaga guzumba guawo guakola gua umonyi guabolesele ufuta wawo nu Yehowa. (Yat. 3:14-17) Gula tuamona egi tuasendesa guzumba falanga mu mutshima wetu, tudi naye gulondega matangi etu mu phushi. (1 Tim. 6:7, 8) Gula ndo, mbatusendesa guzumba ima iko muavula gubalega Yehowa. Muene mbawutuna gukombelela guetu, handaga udi “Nzambi wa fuwa.” (Mikh. 4:24) Luholo lutshi falanga jiajiya gubua gima gia ndando yavula mu lujingu luetu?

7-9. Gifezegeselo gia phangi Davidi gigi gutulongesa itshi?

⁷ Tutadilenu gifezegeselo gia phangi Davidi wa gu États-Unis, wakhalele mutshitshi wakola wa mudimo. Phangi Davidi wakhalele mukulu mu hungu. Udi muzuela egi, wakhalele muzumba mudimo muavula. Amuhuile mudimo wabonga, wa falanga jiavula mu société yawo. Wajiyiwe mu gifutshi giawo giagasue mukunda nu mudimo wene. Phangi Davidi udi muzuela egi: “Matangua ako, ngakhalele mutangiza egi mudimo wami udi guhana gua Yehowa.” Uvi yakhalele diago ngenyi ba?

⁸ Davidi wasendesele gukotelesa egi, mudimo wenji wakhalele mubolesa ufuta wenji nu Yehowa. Udi muzuela egi: “Gula ngudi mu gudibungisa gua mu hungu nga mu mudimo wa gulongesa, ngakhalele mutangiza ndaga jia mudimo. Ngakhalele muheta falanga jiavula, uvi ngakhalelego nu gusuanguluga. Luko, tuakhalelego gudivua muabonga mu ulo wetu.”

⁹ Davidi wakotelesele egi udi naye gutomba itshi idi nu ndando yavula gu meso enji. Udi muzuela gamba: “Ngazudile desizio dia gulondega ndaga.” Davidi wolondegele programe yenji ya mudimo, walezele fumi’enji ndaga akhalele mutshigina gutshita. Itshi yabuile  gungima? Amukatuile gu mudimo! Itshi akalegele? Udi muzuela egi: “Mu lusugu lualanduile, ngatogele mudimo wa muvundji wa muhola wa tangua diazonda.” Ha guheta makuta agudikuatesa nawo, Davidi nu mukaji’enji akhalele mutshita mudimo wa guwevua jinzo. Mbeji jiazonda gungima, Davidi wabuile muvundji wa muhola wa tangua diagasue. Hangima, mukaji’enji wabuile nji muvundji wa muhola wa tangua diagasue. Phangi Davidi nu mukaji’enji atombele mudimo wa falanga athu avula ana gusegulula. Uvi mudimo wene wakhalelego nu ndando yavula gudi ene. Salere ya mudimo wawo wa guwevua jinzo, yajiya gungina iphungu kumi mu salere ya mudimo wawo wa thomo. Ikhale ngenyi, yana guaakuatesa mbeji yagasue. Ana gusha Yehowa ha fundo dia thomo. Akotelesele egi, Yehowa ganago gubemba athu ana gusha ndaga jia Ufumu ha fundo dia thomo.—Mat. 6:31-33.

10. Luholo lutshi tuajiya gubamba mitshima yetu?

¹⁰ Ikhale tudi nu makuta avula nga azonda, tudi naye gubamba mutshima wetu. Luholo lutshi? Ukudisago guzumba gua falanga mu mutshima waye. Ubembigo egi mudimo waye ukhale nu ndando yavula gubalega mudimo wa Yehowa. Luholo lutshi wajiya gujiya egi mudimo waye udi nu ndando yavula gubalega mudimo wa Yehowa? Mihu eyi yajiya gugukuatesa. Dihule egi: ‘Tangua ngudi mu gudibungisa gua mu hungu nga mu mudimo wa gulongesa, nganatangiza muavula mudimo wami ba? Ngana gudihula tangua diagasue gula mbangukhala luko nu makuta mu masugu adi muza ba? Falanga nu ima ya ha mavu awa, yana gungukambela milonga mu ulo wetu ba? Ngudi hehi ha gutshita mudimo athu ako ana gusegula uvi wajiya gunguhana tangua dia gudihana muavula mu mudimo wa Yehowa ba?’ (1 Tim. 6:9-12) Hatudi mutadila mihu eyi, tujiyenu egi Yehowa wana gutuzumba. Yehowa udi mulaya athu ana gumuzumba egi: ‘Ame mbangugubembigo nga hazonda, mbangugutunyigo nga hazonda.’ Gishina giene mupostolo Phaula azuelele gamba: ‘Ngina ya falanga imibalegago mu makalegelo enu.’—Heb. 13:5, 6.

11. Itshi yajiya gubuila muthu gula gatemenego gutomba ima ya gudikenesa nayo?

¹¹ Yehowa wana gutshigina egi tukhale nu gusuanguluga mu lujingu. Hene, gukena guajiya gutukuatesa ha gukhala nu gusuanguluga. Biblia idi muzuela egi: “Gima giabalega gubonga giajiya muthu gutshita gidi gudia, gunua nu gusuangulugila yahetele muene mu  mudimo wenji.” (Mulo. 2:24) Uvi ima yavula ya ha mavu awa ya gudikenesa nayo, yajiya gubolesa makalegelo etu. Yana gutuma athu avula ha gusendesa guzumba nu gutshita ndaga jiana gutuna Biblia.

12. Ha gutadila 1 Kolinto 10:21, 22, mukunda natshi tudi naye gutema gutomba ima ya gudikenesa nayo?

¹² Tudi mutshigina guzumba Yehowa gubalega ima yagasue. Hene, tushigo naye gudia ‘gu mesa a Yehowa nu gu mesa a bademo.’ (Tanga 1 Kolinto 10:21, 22.) Matangua avula, gudia hamoshi nu muthu guana gumonesa ufuta. Hene, gula tudi gudikenesa nu ima idi musunzula ndaga jia khuta, nu jia wanga, nu jia musonyi nu makalegelo ako abola, idi gifua tudi mudia longa dimoshi nu mbalagaji jia Nzambi. Gutshita ngenyi, mbagutubatela malamba, nu mbagubolesa ufuta wetu nu Yehowa.

13-14. Ha gutadila Yokoba 1:14, 15, mukunda natshi tudi naye gutema gutomba ima ya gudikenesa nayo? Hana gifezegeselo.

¹³ Luholo lutshi tuajiya gufuanesa ima ya gudia nu ima ya gudikenesa nayo? Tangua tuana gudia, tuana gutomba ima tuana gumba mu kano. Uvi, gula ima yene yangina mu vumo, tuajiyilego gutomba luholo yajiya gutshita mudimo mu muila wetu. Ima ya gudia yabonga, yana gutuhana ngolo mu muila. Uvi ima yabola, yana gutuhana misongo. Misongo yene yanago gumuenega lusugu lumoshi, uvi yana gumuenega gungima dia masugu.

¹⁴ Luholo lumoshi nji, tangua tuana gutomba ima ya gudikenesa nayo, tuajiya gutomba ima tuajiya gunginyisa mu matangi. Uvi gungima, ima yene mbayihinyina matangi’etu nu mutshima wetu. Ima yabonga ya gudikenesa nayo yajiya gutukolesa; uvi ima yabola yajiya gutubatela malamba. (Tanga Yakoba 1:14, 15.) Malamba ene ajiyilego gumuenega lusugu lumoshi, uvi mbaamonega haphelo gungima dia masugu. Hene, Biblia idi gututemesa egi: “Mudihuigigo: Nzambi gashigo mulelewa ndagaya ima yagasue idi muthu mukuna yene mbayimuna muene diago. Gula muthu udi mukuna ha gusuanguluisa ngina ya muila wenji, mbawumuna gufua.” (Gal. 6:7, 8) Idi nu ndando yavula egi tutune ima yagasue yabola ya gudikenesa nayo, yana gusunzula ndaga jiana gutuna Yehowa!—Ngi. 97:10.

15. Kado gatshi gatuhanele Yehowa?

¹⁵ Akombeledi avula a Yehowa ana gusuanguluga gutala JW Télédiffusion^®, televizio yetu ya mu internet. Phangi wa mukhetu Marilyn wazuelele egi: “JW Télédiffusion yanangukuatesa ha gukhala nu gusuanguluga. Nganatala ima yagasue handaga yagasue idi yabonga mukunda nu ame. Gula ngudi gudivua hakhami nga waguleba, nganatala madiskur ana gunguhana ngolo. Yana gungukuatesa ha gusuena hehi nu Yehowa nu ulondegi wenji. JW Télédiffusion yasombegesa diago monyo wami.” Aye nji, wana guheta gubonga gua kado aga gakatuga gudi Yehowa ba? JW Télédiffusion yakhala nu emisio yana guzoga mbeji yagasue; yakhala nji nu video nu programe jia gutegelela, nu ngimbo jiana gukolesa. Wajiya gujitala nga gujitegelela tangua diagasue watshigina.

16-17. Mukunda natshi tudi naye gukalegela muabonga matangua tuana gubalegesa ha gudikenesa? Luholo lutshi tuajiya guyikalagala?

¹⁶ Tudi naye gutema mu ima tudi mutshita nga mutala ha gudikenesa, nu guvula gua matangua ima yene idi gutuzula. Gula tuatemenego, yajiya gutuzula tangua diavula tuajiya gukalegela ha gutshita ndaga jia mu nyuma. Athu avula ana gumona lamba dia gujiya guvula gua matangua adi naye gubalegesa ha gudikenesa. Phangi mumoshi wa ivo 18 mu jina dia Abigail wazuelele egi: “Gutala televizio guana gungukuatesa ha gubalegesa tangua  gula ngakatuga gu mudimo. Uvi gula ngatemenego, ngajiya gubalegesa matangua avula gutuama dia televizio.” Phangi Samuel udi muzuela egi: “Matangua ako, nganatala tuvideo tuazonda-zonda mu Internet. Ngana sendesa gutala phamba imoshi. Gungima, nganaza mumona ngabalegesa gale gami matangua thathu nga nguana nu gutala video jiene.”

¹⁷ Luholo lutshi wajiya gukalegela muabonga matangua udi naye gubalegesa ha gudikenesa? Thomo, kamba gujiya guvula gua matangua wana gubalegesa ha gudikenesa. Mu phoso ya mudidi, sonega guvula gua matangua wana gubalegesa gu televizio, mu internet nu tangua udi mukena nu telefone yaye. Gula wamona egi udi mubalegesa matangua avula, londega programe yaye. Kalegela tangua diavula ha gutshita thomo ndaga jiabalega ndando, gungima mbawuheta tangua dia gukena. Hangima, toga Yehowa agukuatese ha gulandula programe yaye. Ngenyi, mbawuheta tangua nu ngolo udi najio funu ha gulonguga Biblia hakhaye, ha gutshita gukombelela gua mu fami, ha guya mu gudibungisa gua mu hungu nu mu mudimo wa gulongesa. Gula washa Yehowa ha fundo dia thomo, wajiya giwa gusuangula nu tangua udi mubalegesa ha gudikenesa.

18-19. Luholo lutshi tuajiya gumonesa egi tuana guzumba Yehowa muavula gubalega ima yagasue?

¹⁸ Gungima dia gusonega ndaga jiatadila gisugishilo gia mavu awa a Satana nu mavu ahe-ahe adi muza, mupostolo Phetelo wazuelele egi: “Enue mafut’ami, hamudi munengena ndaga eji, kalagalenu yagasue hagula amisange aphelegeta, ashigo nu gujimbila, nu mu guhuima.” (2 Phet. 3:14, NWT) Gula tudi mutumagela lubelo elu, nu tudi mutshita ngolo ha gusala aphelegeta mu nyuma nu mu matangi, mbatumonesa egi tuana guzumba Yehowa gubalega ima yagasue.

¹⁹ Satana nu mavu enji mbaalandula gututuma ha guzumba muavula ima ya ha mavu awa gubalega Yehowa. (Luka 4:13) Uvi, tubembigo nga gima gimoshi gizangule fundo dia Yehowa mu mutshima wetu. Tuzulenu desizio dia guzumba Yehowa muavula gubalega ima yagasue!