LONGO DIA 41
Luholo Wajiya Gukuatesa Muthu Wana Longesa Biblia ha Gubatijiwa—Gitshinyi Gia Thomo
‘Enue mudi mukanda esue tuasonegele Klisto mu njila ya mudimo wetu wa gulongesa.’—2 KOL. 3:3.
LUNGIMBO 78 Toi qui enseignes la Parole de Dieu
NDAGA JIDI MU LONGO EDI *
Aphangi agasue a mu hungu ana gusuanguluga muavula tangua ana mona muthu alongesele ene Biblia muzula desizio dia gubatijiwa (Tala paragrafe 1)
1. Luholo lutshi 2 Kolinto 3:1-3 idi gutukuatesa ha gusuanguluga nu luendu lua gulongesa athu Biblia nu ha guakuatesa ha gubatijiwa? (Tala gifuanesa holu dia gizula.)
LUHOLO lutshi wana gudivua gula wamona muthu wana longuga Biblia mu hungu dienu wabatijiwa? Idi yadiago egi yana gugusuanguluisa lume. (Mat. 28:19) Gula aye wakhalele mulongesa muthu muene Biblia, idi yadiago egi wasuangulugile muavula habatijiwe muene! (1 Tes. 2:19, 20) Alandudi ahe-ahe anyi akatuga gubatijiwa, adi “mikanda ya gudidijiga” yabonga ishigo phamba mukunda nu athu a alongesele Biblia, uvi mukunda nu hungu diagasue.—Tanga 2 Kolinto 3:1-3.
2. (a) Muhu utshi wa ndando tudi naye gutadila nu mukunda natshi? (b) Gulongesa muthu Biblia guakotelesa itshi? (Tala mbimbi goshi’a diyiji.)
2 Idi ndaga ya waha ha gumona egi mu ivo eyi nguana yabadiga, mbeji yagasue tualongesele Biblia * gudi athu gubalega 10 000 000 ha mavu agasue. Mu ivo eyi, athu gubalega 280 000 akhalele mubatijiwa givo giagasue ha gubua Matemue a Yehowa nu ha gubua alandudi ahe-ahe a Yesu Klisto. Luholo lutshi tuajiya gukuatesa bamilio awa athu tuana gulongesa Biblia ha gubatijiwa? Uu nu mangino, Yehowa udi mulandula guhana athu tangua nu luendu lua gubua alandudi a Klisto nu guhuiminyina guagasue. Hene, tudi naye gukalagala yagasue ha gukuatesa athu ene ha gubatijiwa handaga tangua diasala diazonda!—1 Kol. 7:29; 1 Phet. 4:7.
3. Ndaga itshi yatadila gutuameza ulongogi wa Biblia tuza mutadila mu longo edi,?
3 Luholo mudimo wa gubuisa athu alandudi udi nu ndando yavula mangino, Hunji dia Akulu Atuameji, diana gutoga komite jia filiale ndaga tuajiya gukalagala hagula athu tuana longesa Biblia abatijiwe. Mu longo edi, nu anyi alandula, tuza mumona longo tuajiya guzula mu ekperianse ya avundji a njila, ba misionere, nu atadi-awendji. * (Ish. 11:14; 15:22) Adi mumonesa ndaga alongeshi a Biblia nu athu tuana longesa Biblia adi naye gukalagala hagula gulonguga guawo gua Biblia gubinge. Mu longo edi tuza mutadila ndaga thano muthu wagasue wana gulonguga Biblia udi naye gukalagala hagula akule mu nyuma nu abatijiwe.
KHALENU MULONGUGA PHOSO NU PHOSO
Wambela muthu wana longesa Biblia gula muajiya gukhala hashi ha gulonguga Biblia (Tala paragrafe 4-6)
4. Ndaga itshi tudi naye gujiya yatadila gulonguga Biblia nu athu mu gibatu gutuama dia jinzo jiawo?
4 Aphangi avula ana gulonguga Biblia nu athu agumagana mu molu gutuama dia jinzo jiawo. Ikhale gukalagala ngegi guakhala guawaha uvi matangua avula, maga a luholo elu akhala a gibatu nu yakhala lamba ha gulonguga phoso yagasue. Ha gulandula guta maga nu athu anyi adi musuanguluga gulonguga Biblia, aphangi avula ana guatoga nimero ya telefone yawo ha guatamega, nga guasonegela mesaje gutuama dia guya guatala ha guta n’enji maga a Biblia. Maga a luholo elu ajiya guzula mbeji jiavula, uvi anago guhana njila ha gusendesa ulongogi wa Biblia. Na yakotelesa egi muthu tuana longesa Biblia wajiya gudihana gudi Yehowa nu gubatijiwa phamba gula tudi muzula tangua nu ngolo jiavula ha gulonguga n’enji ba *? Ndo sha.
5. Ndaga itshi yazuelele Yesu mu Luka 14:27-33, tuajiya gukalegela ha gukuatesa athu tuana longesa Biblia?
5 Yesu wahanele gifezegeselo giakhalele mumonesa ndaga muthu adi naye gukalagala gula watshigina gubua mulandudi wenji. Wahanele giifezegeselo gia muthu udi mutshigina gutunga inzo yaleha nu gia fumu udi mutshigina guya mulua ita. Yesu wazuelele egi mutungi wa inzo ‘udi naye gukhala hashi, ha gujiya makuta guvula gutshi adi nawo funu’ ha gumanesela inzo yene. Luko, fumu muene ‘udi naye gukhala hashi ha gutangiza’ ha gujiya gula masut’enji adi mujiya ndaga adi mutshigina gukalagala. (Tanga Luka 14:27-33.) Luholo lumoshi nji, Yesu wakhalele mujiya gamba muthu udi mutshigina gubua mulandudi wenji udi naye gutangigiza muabonga ndaga adi naye gukalagala ha gubua mulandudi wenji. Gishina giene tudi naye guhana athu tuana longesa Biblia gikhesa ha gulandula gulonguga Biblia nu esue phoso nu phoso. Luholo lutshi tuajiya guyikalagala?
6. Ndaga itshi tudi naye gukamba gukalagala ha gulandula gulongesa muthu Biblia?
6 Wajiya gulehesa maga a Biblia nu muthu gutuama dia mufulo wa inzo yenji, gula udi gumutangela verse nga mbadi tangua mudi gudimona n’enji. Gula muthu muene wajidila nu maga enu, wajiya gumutoga fundo muajiya gukhala ha gulandula guta maga ene. Mvutu mbayihana muthu muene, yene mbayimonesa gula wana guzula gulonguga gua Biblia nu ndando nga ndo. Hagula gulonguga gua Biblia guye gutuama, wajiya guhula muthu wana longesa Biblia gula muajiya gusendesa gulonguga iphungu mbadi mu phoso. Uvi gudi nu ndaga iko ya ndando mudi naye gutshita yabalega gulonguga mbala mbadi mu phoso imoshi.
DILONDEGE MUABONGA GUTUAMA DIA GULONGUGA BIBLIA NU MUTHU
Dilondege kiawaha gutuama dia gulonguga guagasue nu wambelela muthu wana longesa Biblia luholo lua gudilondega (Tala paragrafe 7-9)
7. Luholo lutshi mulongeshi wa Biblia adi naye gudilondega muabonga mukunda nu ulongogi wagasue wa Biblia?
7 Aye mulongeshi udi naye gudilondega muabonga gutuama dia gulonguga Biblia nu muthu. Wajiya gusendesa gutanga ndaga muza mulonguga nu muthu muene nu gutadila verse. Kuata matangi a ndando mu muto. Tangiza muto wa lumene wa longo muza muzuelela nu tumito tua mene nu mihu nu ‘verse muza mutanga.’ Foto nu ba video ako ajiya gugukuatesa ha gukotelesa longo diene. Tangua udi gudilondega, tangiza muthu wana longesa Biblia. Dilondege mu luholo wajiya gumukotelesela ndaga mu luholo lua leba hagula ajikotelese nu ajikalegele.—Neh. 8:8; Ish. 15:28a.
8. Ndaga itshi Kolosai 1:9, 10 idi gutulongesa gu ndaga yatadila gukombela mukunda nu athu tuana longesa Biblia?
8 Tangua udi gudilondega, kombelela Yehowa mukunda nu muthu wana longesa Biblia mu ndaga adi naye funu. Toga Yehowa agukuatese hagula malongo a Biblia anyi mbawuya mulongesa athu akuate mitshima yawo. (Tanga Kolosai 1:9, 10.) Dihule egi: Gudi nu ndaga yajiya gukolela muthu ngana longesa Biblia ha gukotelesa? Gudi nu gima giajiya gukhala lamba gudi muene ha gutshigina ba? Jiya gamba, felela diaye didi dia gumukuatesa ha gukula mu nyuma nu gubatijiwa.
9. Luholo lutshi mulongeshi wajiya gukuatesa muthu ana longesa Biblia ha gudilondega mukunda nu gulonguga? Kotelesa.
9 Felela dietu didi egi, gula tudi mulonguga Biblia nu muthu tangua diagasue, mbayimukuatesa ha guhana Yehowa nu Yesu mersi mukunda nu ndaga akalegele nu mbawukamba gujiya ndaga jiavula. (Mat. 5:3, 6) Ha guheta gubonga gua gulonguga, muthu tuana longesa Biblia udi naye gudihana muavula gu ndaga adi mulonguga. Ha gumukuatesa ha gutshita ngenyi, mumonese gubonga mbaaheta gula udi gudilondega gutuama dia gulonguga guagasue nu gutanga longo muza muzuelela nu gutangigiza luholo ajiya gukalegela ndaga jiene. Luholo lutshi wajiya gumukuatesa ha gudilondega? Londegenu hamoshi longo mbamulonguga ha gumumonesa luholo yana kalegewa. * Mumonese luholo lua guheta mvutu gu mihu nu luholo ajiya gusonega matangi a ndando mbaamukuatesa ha guwunguluga (guyabuluga) mvutu. Muwambele ha guhana mvutu mu mbimbi jienji. Gula wakalagala ngenyi, mbayigukuatesa ha gujiya gula wakotelesa muabonga ndaga mualonguga. Gudi nu ndaga iko udi naye guwambela muthu wana longesa Biblia ha gukalagala.
MULONGESE LUHOLO LUA GUTA MAGA NU YEHOWA LUSUGU NU LUSUGU
Longesa muthu wana longesa Biblia luholo lua guta maga nu Yehowa (Tala paragrafe 10-11)
10. Mukunda natshi gutanga Biblia lusugu nu lusugu gudi nu ndando? Ndaga itshi muthu wana gulonguga Biblia adi naye gukalagala ha guheta gubonga gua gutanga guenji gua Biblia?
10 Gula tuakatula gulonguga Biblia phoso nu phoso, gudi nu ndaga iko ya ndando muthu udi mulonguga Biblia adi naye gukalagala lusugu nu lusugu. Udi naye guta maga nu Yehowa. Mu luholo lutshi? Gula udi gumutegelela nu udi muta maga n’enji. Ha gutegelela Nzambi, udi naye gutanga Biblia lusugu nu lusugu. (Yosh. 1:8; Ngi. 1:1-3) Muwambele luholo lua gukalegela “Programe ya lutango lua Biblia” idi mu jw.org. * Mukuatese ha gudihana mu gutanga guenji gua Biblia nu ha gutangigiza ndaga Biblia yana gulongesa mukunda nu Yehowa nu luholo ajiya gukalegela ndaga jiene mu monyo wenji.—Makal. 17:11; Yak. 1:25.
11. Luholo lutshi muthu wana longesa Biblia wajiya gujiya gukombelela hakhenji? Mukunda natshi idi nu ndando egi akombelele Yehowa tangua diagasue?
11 Kuatesa muthu wana longuga n’enji Biblia ha guta maga nu Yehowa mu njila ya gisambu lusugu nu lusugu. Kombelela nu mutshima waye wagasue gu gisendeselo nu gu gisugishilo gia gulonguga guenu. Tanga jina dia muthu wana longesa Biblia mu isambu. Tangua adi mutegelela isambu yaye, mbawujiya luholo ajiya gukombelela Yehowa Nzambi nu mutshima wenji wagasue mu jina dia Yesu Klisto. (Mat. 6:9; Yone 15:16) Gutanga Biblia lusugu nu lusugu, (gutegelela Yehowa) nu gukombelela (guzuela nu Yehowa) mbagukuatesa muthu wana longesa Biblia ha gukhala nu ufuta wakola nu Nzambi! (Yak. 4:8) Gula wakalagala ndaga eji lusugu nu lusugu, mbajimukuatesa ha gukula mu nyuma, ha gudihana nu ha gubatijiwa. Uvi ndaga itshi iko yajiya gumukuatesa?
MUKUATESE HA GUKUDISA UFUTA WENJI NU YEHOWA
12. Luholo lutshi mulongeshi wajiya gukuatesa muthu ana longuga n’enji Biblia ha gukudisa ufuta wenji nu Yehowa?
12 Tuana gutshigina egi muthu tudi mulongesa Biblia ajiye Yehowa. Uvi ndaga jidi mulonguga muene jidi naye nji gukuata mutshima wenji hagula ajikalegele mu monyo wenji. Yesu walongesele athu ndaga jiavula; athu ene akhalele nji musuanguluga gujiya ndaga jiavula gudi muene. Uvi athu akhalele gumuhata handaga malongo enji akhalele diago mukuata mitshima yawo. (Luka 24:15, 27, 32) Muthu wana longesa Biblia udi naye gumona Yehowa egi wana khala diago guene, wajiya gukuata n’enji ufuta, gumuzula gifua Shenji, Nzambi wenji nu Futa di’enji. (Ngi. 25:4, 5) Tangua udi mulonguga Biblia nu muthu, mumonese makalegelo abonga a Nzambi. (Guz. 34:5, 6; 1 Phet. 5:6, 7) Longo diagasue dia Biblia mudi muzuela n’enji, mumonese makalegelo a Yehowa haphelo. Kuatesa muthu wana longesa Biblia ha gusuanguluga nu makalegelo a Yehowa gifua: Guzumba, gisemo, nu khenda ji’enji. Yesu wazuelele egi, ‘mukhuala wa thomo wabalega gukoma,’ udi ‘guzumba Yehowa Nzambi waye.’ (Mat. 22:37, 38) Kuatesa muthu wana longesa Biblia ha guzumba Yehowa nu mutshima wenji wagasue.
13. Hana gifezegeselo gidi mumonesa luholo lua gukuatesa muthu tuana longesa Biblia ha gujiya makalegelo a Yehowa.
13 Tangua udi muta maga nu muthu wana longesa Biblia, mumonese haphelo ndaga yana gugutuma ha guzumba Yehowa. Gutshita ngenyi guajiya gumukuatesa ha gujiya egi muene nji wajiya gukudisa ufuta wenji nu Nzambi nu gumuzumba. (Ngi. 73:28) Ha gufezegesa, wamonele gale ndaga imoshi yana monesa guzumba gua Yehowa, ndunge jienji nga nduedi nu ngolo jienji mu mukanda wa gulongugila Biblia nga mu verse imoshi yakuatele mutshima waye ba? Gula idi ngenyi, wambela muthu wana longesa Biblia ndaga yene. Mukuatese ha gujiya egi ndaga yene idi mukatshi dia ndaga yana gugutuma ha guzumba Tata wetu wa mu dilu. Gudi nu ndaga iko athu agasue tuana longesa Biblia adi naye gukalagala ha gukula mu nyuma nu ha gubatijiwa.
MUKUATESE HA GUZA MU GUDIBUNGISA GUA MU HUNGU
Kuatesa muthu wana longesa Biblia ha guza mu gudibungisa gua mu hungu gula luholo ludi guene! (Tala paragrafe 14-15)
14. Ndaga itshi Hebelu 10:24, 25 idi gutuwambela yatadila gudibungisa gua mu hungu yajiya gukuatesa muthu tuana longesa Bilbia ha gukula mu nyuma?
14 Mukut’etu agasue, tuana tshigina egi athu tuana longesa Biblia akule mu nyuma nu abatijiwe. Ha guakuatesa, tudi naye guahana gikhesa gia guza mu gudibungisa gua mu hungu. Alongeshi adi nu eksperianse ana guzuela egi, athu tuana longesa Biblia anyi ana guza mu gudibungisa gua mu hungu ana kula muphushi mu nyuma. (Ngi. 111:1) Alongeshi ako ana kotelesela athu ana longesa Biblia egi ha gulonguga muabonga Biblia, adi naye guya mu gudibungisa gua mu hungu. Tanga Hebelu 10:24, 25 hamoshi nu muthu wana longesa Biblia, hangima mumonese gubonga mbagaheta gula udi muya mu gudibungisa gua mu hungu. Mutalese video yana zuela egi, Ndaga tshi jiana balega mu Inzo ya Ufumu? * Kuatesa muthu wana longesa Biblia ha guzula desizio dia guya mu gudibungisa gua mu hungu phoso nu phoso.
15. Itshi tuajiya gukalagala ha gukuatesa muthu tuana longesa Biblia ha guza mu gudibungisa gua mu hungu phoso nu phoso?
15 Itshi wajiya gutshita gula muthu wana longesa Biblia khenji gajilego mu gudibungisa gua mu hungu, nga ana guza ndo muavula? Muwambele nu gisemo giagasue ndaga mualonguga mu gudibungisa gua mu hungu phoso yabalega. Gula muthu muene wamona luholo wana suanguluga nu ndaga muana longuga mu gudibungisa, wajiya guzula desizio dia guza. Muhane Inzo Yaleha ya Mutaledi nga Mukanda wa Gukalegela mu Gudibungisa mudi mukalegela mu gudibungisa. Mu monese ndaga mbamulonguga mu phoso idi muza, muhule ha gujiya gula gitshinyi gitshi giamusuanguluisa. Ndaga mbajivua muthu wana longesa Biblia nu jinyi mbaamona giphungu gia thomo mu gudibungisa, mbajimusuanguluisa gubalega ndaga akhalele muvua, nga gumona mu ikombelelo iko. (1 Kol. 14:24, 25) Mbawumona athu ako adi nu makalegelo abonga, ajiya muene gulandula nu ajiya gumukuatesa ha gukula mu nyuma nu ha gubatijiwa.
16. Ndaga itshi tudi naye gukalagala ha gutuameza athu tuana longesa Biblia ha gubatijiwa? Itshi mbatuzuelela mu longo dia landula?
16 Luholo lutshi tuajiya gulonguga Biblia nu muthu ha gumutuameza uu nu gu gubatijiwa? Tuajiya gumukuatesa ha guzula gulonguga guenji nu ndando, gula tudi gumukuatesa ha gulonguga phoso nu phoso nu ha gudilondega gutuama dia gulonguga guagasue. Tudi naye nji gumukuatesa ha guta maga nu Yehowa lusugu nu lusugu, nu gukolesa ufuta wenji n’enji. Tudi naye gumukuatesa ha guza mu gudibungisa gua mu hungu. (Tala galuanda ha diyiji 12 : “ Ndaga Athu Tuana Longesa Biblia Adi Naye Gukalagala ha Gukula mu Nyuma nu ha Gubatijiwa.”) Longo dia landula mbadizuelela ndaga thano alongeshi a Biblia adi naye gukalagala ha gutuameza athu ana longesa Biblia ha gukula mu nyuma nu ha gubatijiwa.
LUNGIMBO 76 Dis, qu’est-ce que tu ressens?
^ par. 5 Gulongesa muthu ndaga imoshi guakotelesa gumukuatesa ha “gutangigiza mu luholo luko nga gumukuatesa ha gutshita ndaga mu luholo luhe-luhe.” Mukhapho wetu wa givo 2020 udi mu Matayo 28:19, udi gutukuatesa ha guzula nu ndando mudimo wetu wa gulongesa athu Biblia nu ha guabuisa alandudi a Yesu Klisto abatijiwe gale. Mu longo edi nu anyi alandula, tuza mumona luholo tuajiya gudihana muavula mu mudimo owu wa ndando.
^ par. 2 UKOTELESHI WA MBIMBI: Gula udi mukalegela Biblia ha guta maga nu muthu tangua diagasue, idi mumonesa egi udi mutuameza ulongogi wa Biblia. Gula wa longuga Biblia nu muthu iphungu mbadi, nu udi mujiya egi mbamulandula gulonguga n’enji, wajiya gumutanga gifua muthu wana longuga n’enji Biblia mu rapore yaye.
^ par. 3 Mu malongo awa, mudi nji nu malongo ako a ndando azudiwa mu longo, “Dirigeons des études bibliques qui favorisent les progrès” dinyi diakhalele muzolewa mu Mudimo wa Ufumu, sendese mu juillet 2004 uu nu mu mai 2005 ya Français.
^ par. 4 Referanse eyi idi mutadila athu tuana longesa Biblia a mala nu a akhetu.
^ par. 9 Mutalese video ya minuta nguana idi nu muto wa lumene egi: Apprenons à nos étudiants a se préparer. Mu JW Library®, ngina ha MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILES.
^ par. 10 Ngina ha LA BIBLE ET VOUS > OUTILS D’ÉTUDE DE LA BIBLE.
^ par. 14 Mu JW Library®, ngina ha MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
