1. Ndaga itshi Aklisto abatijiwe gale adi naye gulandula gukalagala?

WABATIJIWE gale ba? Gula idi ngenyi, wamonesele gu meso a athu egi udi nu gutshigina gudi Yehowa, udi nji nu nzala ya gukalagala mudimo hamoshi nu ulondegi wenji. * Yadiago, udi naye gulandula gukolesa gutshigina guaye gudi Yehowa. Udi naye gutshigina egi, Yehowa udi mulandula gutuameza ulondegi wenji mangino.

2-3. Mu luholo lutshi Yehowa adi mutuameza ulondegi wenji mangino? Fezegesa.

² Mangino, Yehowa udi mutuameza ulondegi wenji mu luholo ludi mumonesa makalegelo enji, mafelela enji nu mikhuala yenji. Henyaha tutadilenu makalegelo thathu a Yehowa tuajiya gumona mu ulondegi wenji.

³ Thomo, ‘Nzambi ana tomba-tomba ndo.’ (Makal. 10:34) Guzumba guatumile Yehowa ha guhana Mun’enji gifua ‘mulambu’ mukunda nu athu agasue (1 Tim. 2:6; Yone 3:16). Yehowa udi mukalegela akombeledi enji ha gulongesa lukuma luabonga gudi athu adi mutshigina lukuma luene, hagula ajiya guakuatesa ha guheta gubonga gua mulambu. Ya mbadi, Yehowa akhalago Nzambi wa lumuamua uvi wa guhuima. (1 Kol. 14:33, 40) Hene, akombeledi a Nzambi ashigo naye gumukalegela mu lumuamua, uvi adi naye gumukalegela hamoshi mu guhuima. Ya thathu, Yehowa udi ‘Mulongeshi Wakoma.’ (Yesh. 30:20, 21) Gishina giene ulondegi wenji wana kalagala ngolo ha gulongesa Biblia mu gudibungisa gua mu hungu nu mu mudimo wa gulongesa. Luholo lutshi hungu dia Uklisto dia mu siekle ya thomo dialanduile makalegelo awa thathu a Yehowa? Luholo lutshi akombeledi a Yehowa adi mulandula makalegelo  awa mangino? Luholo lutshi nyuma ya Yehowa yajiya gugukuatesa ha gumukombelela hamoshi nu ulondegi wenji mangino?

4. Ha gutadila makalegelo 1:8, mudimo utshi Yesu awambele alongeshi enji ha gukalagala? Ukuateshi utshi akhalele naye guheta?

⁴ Mu Siekle ya Thomo. Lukuma luabonga luakhalele mulongesa Yesu luahanele athu agasue felela. (Luka 4:43) Yesu wawambelele alandudi enji ha gulandula gukalagala mudimo wa gulongesa wasendesele muene uu nu mu ‘mafundo a gualeha a ha mavu.’ (Tanga Makalegelo 1:8.) Yadiago, akhalelego naye gukalagala mudimo owu mu ngolo jiawo hakhawo. Akhalele nu funu ya nyuma ya Nzambi, “mukuateshi” waalayele Yesu.—Yone 14:26; Zak. 4:6.

5-6. Mu maluholo atshi nyuma ya Nzambi yakuatesele alandudi a Yesu?

⁵ Alandudi a Yesu ahetele nyuma ya Nzambi mu Pantekote 33 ya T.D. Nyuma yene yaakuatesele ha gusendesa gulongesa lukuma luabonga. Gungima dia tangua diazonda, bamilio a athu atshiginyile lukuma luene. (Makal. 2:41; 4:4) Tangua athu asendesele guasagesa, ene avuilego woma, abembelego nji gulongesa, uvi atogele ukuateshi gudi Nzambi. Akombelele egi: ‘Kuatesa enya mudimo waye ha guzuela mbimbi yaye nu gikhesa giagasue.’ Ene azalele pha nu nyuma ya Nzambi, alanduile ‘gulongesa mbimbi ya Nzambi nu gikhesa giagasue’ —Makal. 4:18-20, 29, 31.

⁶ Alandudi a Yesu atagenele nji nu malamba ako. Ha gufezegesa, mutangua diawo, mikanda ya Mbimbi ya Nzambi yakhalelego yavula. Akhalelego nu mikanda yana kotelesa Biblia gifua luholo tudi nayo mangino. Akhalele naye gulongesa athu akhalele muzuela mazuelelo agudisha. Ikhale ataganele nu malamba avula, alandudi awa a gikhesa atangijilego nga hazona egi ajiyilego gutagenesa ginemo giene. Uvi ivo yazonda gungima, alongesele lukuma luabonga ha ‘mavu agasue.’ Kol. 1:6, 23.

7. Luholo lutshi akombeledi a Yehowa ajiyile ndaga jiakhalele guatoga Nzambi, ivo gubalega 100 yabalega gale? Luholo lutshi ayikalegele?

⁷ Mu masugu etu. Yehowa udi mulandula gutuameza nu guhana akombeledi enji ngolo. Wana tuameza nji akombeledi enji mu njila ya Biblia, inyi yasonegewe mu ngolo jia nyuma yenji. Biblia yana gutukuatesa ha gujiya mudimo wakalegele Yesu nu mukhuala wahanele muene alandudi enji ha gulandula gukalagala mudimo wasendesele muene. (Mat. 28:19, 20) Ivo yavula gungima, mu juillet 1881, zulunalu imoshi yazuelele egi: “Yehowa atutombelego ha gutumbuishiwa gudi ana a athu, nga gubua enya umonyi, uvi ha gukalegela ima yagasue tudi nayo ha gulongesa lukuma luabonga.” Mu 1919 azolele gamukanda, À qui l’œuvre est confiée mu anglais. Gamukanda gene gakhalele muzuela egi: “Gudi nu mudimo wakola wa gukalagala, uvi udi mudimo wa Fumu, muene mbawutuhana ngolo jia guwukalagala.”Yadiago, aphangi awa akalegele mudimo nu gikhesa giagasue handaga akhalele musha mutshima egi nyuma ya Nzambi mbayakuatesa ha gulongesa athu a maluholo agasue gifua luholo Aklisto a mu siekle ya thomo akalegele. Esue nji tuana landula gutshigina egi nyuma yene mbayitukuatesa nji.

8-9. Ba metode atshi ulondegi wa Yehowa wana kalegela ha gumuanga lukuma luabonga?

⁸ Ulondegi wa Yehowa wakhalele mukalegela ikadigilo yabonga ha gumuanga lukuma luabonga. Mukatshi dia ikadigilo yene tuajiya gutanga: Mikanda, “Photo-Drame de la Création,” phonographe, voitures équipées de haut-parleurs, radio. Uvi mangino, adi mukalegela ba ordinatere nu Internet. Ulondegi wa Nzambi udi mubalumuna mikanda mu mazuelelo avula gubalega mu tangua dia thomo! Mukunda natshi? Hagula athu a maluholo agasue avue lukuma luabonga mu zuelelo diawo. Yehowa ana tomba-tomba ndo. Wazuelele gale sendese mualeha egi, ‘Lukuma luabonga mbalulongesewa gudi athu a mu ifutshi yagasue, iphuta yagasue, mazuelelo agasue,  nu athu agasue.’(Yat. 14:6, 7) Felela dienji didi egi muthu wagasue avue Lukuma luabonga lua Ufumu.

⁹ Uvi matangua ako, yajiya gukhala lamba ha gulongesa athu ako, handaga ana gujinga mu jinzo tushigo nu luholo lua gungina. Ha gulongesa athu a luholo elu, ulondegi wa Yehowa wana kalegela maluholo agudisha ha gulongesa mu mafundo a athu avula. Mu 2001, Hunji dia Akulu Atuameji diahanele aphangi a gu France njila ya gukalegela ba tables d’exposition nu ba présentoir mobile ha gulongesela lukuma luabonga. Gungima, aphangi a mu mafundo ako asendesele nji gulongesa ngenyi. Yazolele diago mbuto yabonga. Mu 2011 programe ihe-ihe ya gulongesa gu présentoir mobile yakalegewe nji gu États-Unis, mu mafundo athu ana tshita midimo yavula mu dimbo dia New York. Mu givo gia thomo, aphangi akhaphele mikanda 102 129 nu mazulunalu 68 911. Athu 4 701 atogele ha gulonguga Biblia! Yadiago, Yehowa wana kalegela nyuma yenji ha gukuatesa mudimo owu wa ndando. Hene, Hunji dia Akulu Atuameji diahanele njila gudi aphangi agasue a ha mavu ha gukalegela ba tables d’exposition nu ba présentoir mobile.

10. Itshi tuajiya gukalagala ha gubua alongeshi abonga mu mudimo wa gulongesa nu gumuanga lukuma luabonga?

¹⁰ Ndaga wajiya gukalagala. Kalegela formasio ya mudimo wa gulongesa yana gutuhana Yehowa mu gudibungisa gua mu hungu. Khala mulongesa tangua diagasue nu hunji dienu dia mudimo wa gulongesa. Aphangi a mala nu a akhetu ajiya gugukuatesa ha gubua mulongeshi wabonga. Makalegelo awo abonga nji ajiya guguhana gikhesa. Landula gulongesa ikhale udi mutagana nu malamba. Gifua luholo verse yakuata longo edi idi guyimonesa, tushigo mutagenesa felela dia Nzambi mu ngolo jietu uvi mu ngolo jia nyuma yenji. (Zak. 4:6) Tudi nu gutshigina egi Yehowa mbawutuhana ngolo tudi najio funu handaga udi mudimo wenji tudi mukalagala.

11. Mu luholo lutshi Hunji dia Akulu Atuameji dia mu siekle ya thomo, akalegele mudimo hamoshi ha gubamba guhuima nu gudivua mukatshi dia akombeledi a Nzambi?

¹¹ Mu siekle ya thomo. Hunji dia Akulu Atuameji dia gu Yelusalema diakalegele mudimo hamoshi ha gubamba guhuima nu gudivua  mukatshi dia akombeleledi a Nzambi. (Makal. 2:42) Ha gufezegesa, mu givo 49 gia Tangua Dietu, Aklisto avula akhalelego gudivua gu ndaga yatadila gumbiwa gu mukanda. Uvi, nyuma ya Nzambi yakuatesele Hunji dia Akulu Atuameji ha guzuelela ndaga yene. Mudimo wa gulongesa wakhalelego naye guya gutuama gula hungu edi dialanduilego gudivua mukunda nu ndaga yene. Apostolo nu akulu akhalele enya yuda, uvi abembelego egi kutime jia enya Yuda nu malongo awo a awunganese matangi. Uvi, akambele malongo mu Mbimbi ya Nzambi nu atogele ukuateshi wa nyuma ya Nzambi ha guzula desizio diabonga. (Makal. 15:1, 2, 5-20, 28) Mbuto itshi ahetele? Yehowa washimbigile desizio diawo, guhuima nu gudivua guavutugile, mudimo wa gulongesa walanduile guya gutuama.—Makal. 15:30, 31; 16:4, 5.

12. Ndaga itshi idi mumonesa egi guhuima nu gudivua gudi mukatshi dia ulondegi wa Yehowa mangino?

¹² Mu masugu etu. Ulondegi wa Yehowa wakuatesele akombeledi enji ha gukhala mu guhuima nu gudivua. Mu 1895, zulunalu imoshi ya Français, Le Phare de la Tour de Sion et Messager de la Présence de Christ ya 15 novembre, yakhalele nu muto wa lumene umoshi wazogele mu 1 Kolinto 14:40 wakhalele muzuele egi: “Mu ginemua nu mu gudivua.” Longo diene diakhalele muzuela egi: “Apostolo asonegele hungu dia mu siekle ya thomo ndaga jiavula jiatadila gudivua. Idi ndaga yabonga ha gulandula gutumagela ndaga ‘jiasonegewe mu masugu a thomo mukunda nu gutulongesa.’” (Lomo. 15:4) Mangino, ulondegi wa Yehowa udi mukalagala ngolo hagula mahungu a Uklisto akhale mu gudivua nu guhuima gifua luholo akalegele mu siekle ya thomo. Ha gufezegesa, gula waya mu gudibungisa mu hungu diko, nga mu gifutshi giko, mbayikhadigo lamba gudi aye ha gujiya longo dia Inzo Yaleha ya Mutaledi muza mulonguga nu luholo diana tuamezewa. Idi yadiago egi mbawudivua gifua udi gumbo dienu! Phamba nyuma ya Nzambi yajiya gutukuatesa ha gubamba gudivua gua luholo elu.—Sef. 3:9.

13. Hagutadila Yakoba 3:17 mihu itshi udi naye gudihula?

¹³ Ndaga wajiya gukalagala. Yehowa wana tshigina egi akombeledi enji ‘ajinge hamoshi mu njila ya nyuma yenji nu mu guhuima.’ (Ef. 4:1-3) Dihule egi: ‘Ngana bamba guhuima nu gudivua mu hungu ba? Ngana tumagela athu ana  gututuameza ba? Gula ngudi nu inemo ya gutagenesa mu hungu, athu ako ajiya gungushila mutshima ba? Ngana nemesa tangua? Ngana khala mukuateshi wa athu ako? Nga ndo, ngana khala hehi ha gukalagala mudimo ba?’ (Tanga Yakoba 3:17.) Gula wamona egi gudi nu ndaga wajiya gusombegesa mukatshi dia ndaga jiene, toga Yehowa nyuma yenji ha gugukuatesa. Gula wabemba egi nyuma yene igukuatese ha gusombegesa umuthu waye, nu ndaga wana kalagala, aphangi’aye mbaaguzumba nu mbaaguzula nu ndando.

14. Ha gutadila Kolosai 1:9, 10, luholo lutshi Yehowa walongesele akombeledi enji a mu siekle ya thomo?

¹⁴ Mu siekle ya thomo. Yehowa wana zumba gulongesa akombeledi enji. (Ngi. 32:8) Wana tshigina egi akombeledi enji amujiye, amuzumbe nu ajinge mayilago gifua an’enji aguzumba. Ajiyilego gukalagala ngenyi gula muene gaalongeselego. (Yone 17:3) Yehowa wakalegele hungu dia Aklisto a mu siekle ya thomo ha gulongesa akombeledi enji. (Tanga Kolosai 1:9, 10.) Nyuma ya Nzambi nga ‘mukuateshi’ walayele Yesu, yakuatesele alandudi enji. (Yone 14:16) Nyuma yenji yakuatesele alandudi ha gukotelesa Mbimbi ya Nzambi nu guwunguluga (guyabuluga) ndaga jiagasue jiazuelele Yesu nu jiakalegele muene jinyi tuana tanga mu ba evanjile. Ujiyi wene wakolesele gutshigina gua Aklisto a mu siekle ya thomo, waakuatesele nji ha guzumba Nzambi, Mune’nji nu athu ako.

15. Mu maluholo atshi wana mona gutagenesewa gua ndaga ya zuelele Yehowa idi mu Yeshaya 2:2, 3?

¹⁵ Mu masugu etu. Yehowa wazuelele egi; ‘mu masugu a gisugishilo’ athu a ifutshi yagasue mbaaza gu mulundu wenji, yakotelesa egi mbaadibungisa hamoshi nu akombeledi enji a giamatshidia hagula a alongese njila jienji. (Tanga Yeshaya 2:2, 3.) Tudi mumona luholo profesi yene idi mutagenesewa. Gikombelelo gia giamatshidia gidi giabonga gubalega ikombelelo yagasue eyi ya mambo. Malongo ana longesewa mu  gikombelelo giene gia giamatshidia ana katuga gudi Yehowa! (Yesh. 25:6) Yehowa wana kalegela “muhiga watema nu wafubidila,” ha gutuhana ima ya mu nyuma yavula mu maluholo agudisha. Mukatshi dia ima yene tuajiya gutanga: Mikanda, badiskur tuana tegelela nu video. (Mat. 24:45) Tuana gudivua gifua futa dia Yobo, Elihu yonu wazuelele egi: ‘Mulongeshi mutshi udi gifua Nzambi?’—Yobo 36:22.

16. Ndaga itshi wajiya gukalagala ha gukula mu nyuma?

¹⁶ Ndaga wajiya gukalagala. Nyuma ya Nzambi mbayigukuatesa ha gukalagala ndaga udi mutanga, nu udi mulonguga mu BIblia. Kombelela Yehowa gifua muatshitshile muyimbi wa ngimbo. Wazuelele egi: ‘Oo Yehowa, ngulongese ndaga ngudi naye gukalagala. Mbanguwenda mu giamatshidia giaye. Nguhane mutshima umoshi ha guvua woma wa jina diaye.’ (Ngi. 86:11) Landula gutanga nu gulonguga Biblia nu mikanda iko yana gutuhana ulondegi wa Yehowa. Yadiago, felela diaye dikhadigo phamba dia guheta ujiyi wa Biblia. Udi naye gutshigina giamatshidia nu gukalegela ndaga jiene mu monyo waye. Nyuma ya Nzambi yajiya gugukuatesa ha gukalagala ngenyi. Udi naye nji gukuatesa aphangi aye a mala nu a akhetu nu guahana ngolo. (Heb. 10:24, 25) Mukunda natshi? Handaga adi mukatshi dia fami yaye ya mu nyuma. Toga nyuma ya Nzambi ha gugukuatesa ha guhana ba komantere jiabonga mu gudibungisa nu ha gudilondega muabonga tangua udi nu devuare. Gula udi mukalagala ngenyi, mbawumonesa Yehowa nu Yesu egi wana zumba ‘imeme’ yawo ya ndando.’—Yone 21:15-17.

17. Mu maluholo atshi wajiya gumonesa egi wana kuatesa ulondegi wa Yehowa nu gutshigina guagasue?

¹⁷ Gualeha ndo, phamba ulondegi owu udi mutuamezewa gudi nyuma ya Nzambi mbawusala ha mavu. Hene, khala mutshita mudimo nu gikhesa giagasue hamoshi nu ulondegi wa Yehowa. Khala mulongesa lukuma luabonga gudi athu agasue ha gumonesa egi wana guazumba gifua Nzambi. Landula guzumba guenji tangua udi mukamba guhuima nu gudivua mu hungu. Landula gutegelela Mulongeshi waye Wakoma tangua udi mulonguga ndaga jiagasue jia mu nyuma jiana gutuhana muene. Ngenyi, mbawukhadigo nu woma tangua mavu awa a Satana mbaashiyiwa. Uvi, mbawukhala nu gikhesa nu mbawulandula gukalagala mudimo hamoshi nu aphangi aye a gujinginyina mu ulondegi wa Yehowa.