Ha gutshita mudimo wa gulongesa muabonga Athu Akhalele Mulonguga Biblia akhalele nu funu ya gikhesa. Akhalele naye gulongesa ‘lukuma luabonga’ gudi athu agudibulumuisa nu gulongesa ‘lusugu lua khabu jia Nzambi’ gudi athu abola.

Phangi J. H. Hoskin wakhalele mujinga gu Canada. Wakhalele mulongesa nu gikhesa ikhale watagenele nu umbalagaji mu gifutshi giene. Mu gisendeselo gia 1921 wadimonele nu mulongeshi wa gikombelelo gimoshi. Phangi Hoskin wamuwambelele egi: “Tudi naye guta maga a Biblia muabonga ikhale tushigo gudivua mu ndaga jiko, tuajiya gusugisa maga etu mu guhuima. Tuajiya nji gukhala mafuta.” Uvi muthu muene watunyine genji. Phangi Hoskin udi muzuela egi: “Tuazuelele n’enji phamba minuta yazonda, gungima muthu muene wakangele gijidigo mangololo diago. Yajiya gukhala egi vitre yakoma ya gijidigo giene yamuanganele.”

Muthu muene wabalediele phangi Hoskin egi: “Mukunda natshi wajiyilego guya mulongesa athu anyi ashigo Aklisto?” Phangi Hoskin wahenele tedie, wakatugile genji. Hakhalele muene muya wasendesele gudizuelela egi: ‘Ngamonele gifua muthu muene udi Muklisto, hoho ndo!’

Tangua muthu muene wakhalele mulongesa mu gikombelelo giawo mu lusugu lualanduile, wazuelele ndaga jia mambo mukunda nu phangi Hoskin. Phangi Hoskin wazuelele egi: “Muthu muene wawambelele athu egi khenji amonele muthu mumba mambo akoma mu dimbo diawo gifua ame, ngudi naye gushiyiwa.” Uvi phangi Hoskin walanduile gulongesa, wakhalele muta maga nu athu avula. Wazuelele egi: “Ngakhalele musuanguluga gulongesa mu dimbo diene muavula. Athu ako asendesele guzuela egi: ‘Tudi mujiya egi udi mukalagala mudimo wa Nzambi,’ akhalele gunguhana ima ngakhalele nayo funu.”

Ha gukuatesa athu akule mu nyuma, Athu Akhalele Mulonguga Biblia akhalele muzola programe imoshi mu zulunalu yakhalele mutamegewa egi Âge d’Or. * Programe yene yakhalele nu mihu yatadila mavuala. Mvuaji jiakhalele guyikalegela ha guta maga nu an’awo. “Akhalele muhula an’awo mihu yene ha guakuatesa ha guheta mvutu mu Biblia.” Programe yene yakhalele nu mihu yakhalele mulongesa malongo aleba a Biblia, gifua: “Biblia yana  khala nu mikanda guvula gutshi?” Yakhalele nji nu mihu yakhalele mukuatesa mavuala ha gutuna guvua woma mu mudimo wa gulongesa, gifua: “Aklisto agasue adi naye gutagana nu malamba ba?”

Guakhalele nji nu mihu ya Biblia nu mvutu jia jiajiya gukuatesa athu anyi akhalele mutshigina gujiya ndaga jiavula jia mu Biblia. Mvutu jiene jiakhalele mu volime ya thomo ya mukanda Études des Écritures. Mihu yene yakhalele mukuatesa diago athu avula, uvi Âge d’Or ya 21 decembre 1921 yazuelele egi mbaashigo luko muzola mihu yene. Mukunda natshi?

Aphangi akhalele mutuameza akotelesele egi athu akhalele nu funu ya gujiya malongo a Biblia mu luholo luabonga. Mu novembre 1921, azolele mukanda La Harpe de Dieu. Athu anyi asuangulugile nu mukanda wene asonegewe majina hagula ene nji asendese gulonguga. Mukanda wene wakuatesele athu ene ha gujiya “felela dia Nzambi dia guhana athu monyo wa ivo nu ivo.” Luholo lutshi akhalele guwukalegela?

Gula muthu watshigina mukanda, akhalele gumuhana karte diazonda diakhalele mumonesa mafundo a gutanga. Mu phoso yakhalele mulandula, akhalele gumuhana karte diko diakhalele nu mihu yavula yatadila ndaga jiatangele muene. Karte diene diakhalele nji mumonesa fundo dia gutanga mu phoso yalandula.

Akhalele mukalagala phoso 12. Uvi phoso yagasue athu akhalele mulonguga akhalele muheta bakarte ahe-ahe gudi aphangi a mu hungu diakhalele hehi nu ene. Matangua avula, athu akhalele mutuma bakarte ene akhalele athu a gukola nga athu anyi akhalelego nu luholo lua gulongesa inzo nu inzo. Ha gufezegesa, Anna K. Gardner, muenya gu Millvale, Pennsylvania, gu États-Unis wazuelele egi: “Tangua mukanda La Harpe de Dieu wazogele, wahanele phangi’enji wa mukhetu Thayle yonu wakhalele muwenda mu lamba, mudimo wavula wa gutumila athu bakarte akhalele nu mihu phoso nu phoso.” Gula muthu wamanesela gulonguga, phangi wa mu hungu dimoshi wakhalele muya gumutala ha gumukuatesa ha gujiya ndaga jiavula jiatadila Biblia.

Gu gisugishilo gia givo phangi J. F. Rutherford watumine mikanda gudi mahungu agasue. Wasonegele egi “givo egi mudimo wa gulongesa lukuma luabonga lua Ufumu wakalegewa muavula nu wakuatesa athu avula gubalega ivo iko.” Gungima wazuelele luko egi: “Tudi nu mudimo wavula wa gukalagala luko. Tudi naye gukolesa athu ako ha gutshita mudimo owu wa ndando.” Yadiago Athu Akhalele Mulonguga Biblia akalegele ndaga jiazuelele phangi Rutherford. Mu 1922 alongesele lukuma luabonga lua Ufumu nu gikhesa giagasue gubalega ivo iko yagasue.