1. Ndaga jitshi jiajiya gututuma ha guzuela egi muthu udi nu khadilo dia khenda?

NDAGA jiajiya gututuma ha guzuela egi muthu udi nu khadilo dia khenda jidi: Gisemo, mutshima wabonga nu khadilo dia guhana. Tuajiya nji gutangiza gifezegeselo giahanele Yesu gia muenya Samaliya wa mutshima wabonga. Muthu yowu wa gifutshi giko “wamonesele khadilo dia khenda gudi” muenya Yuda wabetewe gudi nzangi nu watambudiwe ima. Muenya Samaliya ‘wavidile muenya Yuda khenda,’ wamukuatesele nu guzumba guagasue. (Luka 10:29-37) Gifezegeselo egi gidi mumonesa khadilo dia khenda dia Nzambi wetu. Khadilo diene diana monesa guzumba gua Nzambi. Wana gutumonesela nadio lusugu nu lusugu mu luholo luana gutukalegela muene ndaga.

2. Mu luholo lutshi luko muthu wajiya gumonesa khadilo dia khenda?

² Muthu wajiya gumonesa khadilo dia khenda mu luholo luko. Wajiya gutuna guhana ndola gudi muthu wakagala ndaga yabola. Yehowa wana gutuvuila diago khenda mu luholo elu. Muyimbi wa ngimbo wazuelele egi: ‘Muene ganago gutukalegela ndaga ha gutadila gubola guetu.’ (Ngi. 103:10) Uvi matangua ako Yehowa wajiya guhana ndola yakola gudi muthu wakalagala gubola.

3. Mihu itshi tuza muzuelela mu longo edi?

³ Mu longo edi, tuza muzuelela mihu eyi thathu: Mukunda natshi Yehowa wana gutuvuila khenda? Gudivua gutshi gudi mukatshi dia ndola nu khenda? Itshi yajiya gutukuatesa ha guvuila athu ako khenda? Tutalenu luholo Biblia idi muhana mvutu gu mihu eyi.

4. Mukunda natshi Yehowa wana monesa khadilo dia khenda?

⁴ Yehowa wana zumba khadilo dia khenda. Mupostolo Phaula wasonegele egi ‘Nzambi udi muenya khenda.’ Mu verse eyi, Phaula  udi muzuelela khenda jia Nzambi luholo Nzambi wana hana akombeledi enji ambiwe maji mu nyuma felela dia guya mujinga mu dilu. (Ef. 2:4-7) Uvi Yehowa ganago gumonesa khenda jienji phamba gudi Aklisto ambiwe maji mu nyuma. Muyimbi wa ngimbo Davidi wasonegele egi: ‘Yehowa wana monesa mutshima wabonga gudi athu agasue, khenda jienji jiana monega mu ima yagasue yafugile muene.’ (Ngi. 145:9) Luholo Yehowa wana zumba athu, wana guavila khenda tangua diagasue gula wamona egi udi nu gishina gia guyitshita.

5. Luholo lutshi Yesu wajiyile egi Yehowa udi Nzambi wa khenda?

⁵ Yesu wana jiya muabonga gubalega athu agasue egi Yehowa wana zumba guvila athu khenda. Yehowa nu Yesu ajingile hamoshi mu dilu ivo yavula gutuama egi Yesu aze ha mavu. (Ish. 8:30, 31) Matangua avula, Yesu wakhalele mumona Sh’enji muvuila athu khenda gula akalagala gubola. (Ngi. 78:37-42) Tangua Yesu wakhalele mulongesa, wakhalele muzuelela muavula khadilo edi dia Sh’enji.

6. Luholo lutshi Yesu wamonesele egi Yehowa wana vuila athu khenda?

⁶ Gifua luholo tuayimonele mu longo diabalega, Yesu wahanele gifezegeselo gia mona watotele ha gutukuatesa hagula tukotelese luholo Yehowa wana vuila athu khenda. Mona muene wabembele inzo yawo, wayile mu gifutshi giko, ‘wabolesele ima yenji mu gifutshi giene mu ndaga jia musonyi.’ (Luka 15:13) Gungima wabembele gutshita ndaga jia musonyi, wamonesele khadilo dia gudibulumuisa, wavutugile gumbo diawo. Ndaga itshi yakalegele sh’enji? Wayile gumuyamba muphushi, handaga Yesu wazuelele egi: ‘Hakhalele mona ndambo gualeha, sh’enji wamumonele, wavuile khenda, wayile phushi gumutagana, wamuyambele, wamuhanele beze nu gisemo giagasue.’ Sh’enji gamuvuishilego musonyi, uvi wamuvidile khenda, wamutotesele gubola guenji, wamuyambele mu fami. Mona muene wakalagele gubola guakoma, uvi luholo luabalumuine muene mutshima, sh’enji wazudile desizio dia gumutotesela. Tata adi muzuelela mu gifezegeselo gia Yesu udi Yehowa. Yesu udi gutumonesa egi Yehowa wana khala hehi ha gutotesela athu ana balumuna diago mutshima.—Luka 15:17-24.

7. Luholo lutshi khenda jia Yehowa jiana monesa egi wana khala nu ndunge jiavula?

⁷ Yehowa wana gutuvuila khenda handaga wana khala nu ndunge jiavula. Tangua diagasue Yehowa wana zula ba desizio mukunda nu gubonga guetu. Biblia yana zuela egi ‘ndunge jia mu dilu’ jiana khala ‘jia guzala pha nu khenda nu mabundu abonga.’ (Yak. 3:17) Gifua luholo mvuaji  wana zumba an’enji, Yehowa wana jiya egi tuana khala nu funu ya khenda jienji handaga tushigo athu atagana. (Ngi. 103:13; Yesh. 49:15) Ikhale tushigo athu atagana, khenda jienji jiana gutuhana felela dia monyo wa mayilago. Luholo Yehowa wana khala nu ndunge jiavula, wana vuila athu khenda gula abalumuna diago mutshima. Uvi ishigo mukotelesa egi wana hana njila gudi athu ha gulandula gukalagala gubola.

8. Itshi tudi naye gutshita gula muthu mumoshi wazula desizio dia gutshita ndaga yabola? Mukunda natshi?

⁸ Tangiza gale egi mukombeledi wa Yehowa mumoshi wazula desizio dia gukalagala uthambi, itshi tudi naye gutshita? Mupostolo Phaula wasonegele egi, ‘mukuatshigo ufuta’ nu muthu wa luholo elu. (1 Kol. 5:11) Athu anyi ana tuna gubalumuna mutshima, ana zolewa mu hungu dia Uklisto. Gutshita ngenyi guana bamba aphangi’etu a mala nu a akhetu nu guana kuatesa ha gulandula mikhuala ya Yehowa. Uvi athu ako ana tangiza egi gula muthu wazolewa mu hungu, idi mukotelesa egi Nzambi gamuvuidilego khenda. Ndaga eyi idi ya giamatshidia ba? Tuza muheta mvutu mu paragrafe jialandula.

9-10. Ha gutadila Hebelu 12:5, 6, mukunda natshi tuajiya guzuela egi guzola muthu mu hungu gudi mumonesa khadilo dia khenda? Fezegesa.

⁹ Gila ahana kominike mu gudibungisa gua mu hungu egi phangi mumoshi tudi mujiya nu tuana zumba “gashigo luko Temue wa Yehowa,” yana gutuhana diago gikenene. Mu tangua diene tuajiya gudihula gula yatogi diago egi phangi muene azolewe mu hungu. Uvi tuajiya gudihula egi: Guzola muthu mu hungu guana monesa diago khadilo dia khenda ba? Ayi, idi ngenyi. Guhana muthu ndola guana monesa khadilo dia ndunge, dia khenda nu dia guzumba. (Ish. 13:24) Muthu wajiya gusombegesa makalegelo enji gula wazolewa mu hungu ba? Ayi. Aphangi avula anyi akalegele gubola nu azolewe mu hungu azuelele egi desizio dia guzolewa mu hungu diaakuatesele ha gukotelesa egi akalegele diago gubola nu adi naye gusombegesa makalegelo awo ha guvutuga gudi Yehowa.—Tanga Hebelu 12:5, 6.

¹⁰ Ha gufezegesa, tangiza gale egi mubambi wa imeme wajiya egi gimeme gienji gimoshi gidi mukata. Wakotelesa egi gashigo naye gusaga gimeme giene fundo dimoshi nu imeme iko ya mu dinda dienji. Uvi tudi mujiya egi gimeme giana zumba gukhala fundo dimoshi nu imeme iko. Gula wagikhaphumuna nu imeme iko, giajiyilego gudivua muabonga. Uvi tudi mutangiza egi gula mubambi wa imeme wazula desizio dia gusaga gimeme giene fundo diko, idi mumonesa egi udi muenya ndaga jiakola-kola ba? Ndo sha. Handaga gula wagibungisa nu imeme iko, misongo yagio yajiya gukuata imeme iko. Gula wasaga gimeme giene fundo diko, ngenyi udi mubamba imeme iko yagasue.—Fuanesa nu Levi 13:3, 4.

11. (a) Mu luholo lutshi muthu wazolewa mu hungu wajiya gukhala gifua gimeme gidi mukata? (b) Muthu wazolewe mu hungu udi naye gukalagala itshi, ukuateshi utshi adi naye gumuhana?

¹¹ Gula Muklisto mumoshi wazolewa mu hungu, tudi naye gumuzula gifua gimeme gidi mukata. Handaga wabolesa ufuta wenji nu Yehowa, udi gifua muthu udi mukata. (Yak. 5:14) Gifua luholo muthu udi mukata misongo ya gisambugila wajiya guyihana athu ako, muthu wabolesa ufuta wenji nu Yehowa wajiya nji gubolesa makalegelo a athu ako mu hungu. Hene matangua ako yana khala nu ndando egi muthu wakalagala gubola azolewe mu hungu. Guzola muthu mu hungu guana monesa guzumba gua Yehowa gudi aphangi ako mu hungu, guajiya nji gukuatesa muthu wakalagala gubola ha gubalumuna mutshima. Gula muthu wazolewa mu hungu, wajiya guza mu gudibungisa, handaga guene guajiya muene guheta malongo ha gukolesa luko gutshigina guenji. Tuajiyilego nji gumutunyisa ha guzula mikanda mukunda nu gulonguga guenji hakhenji nga gutala emisio ya JW Télédiffusion^®. Gula akulu  amona egi muthu muene udi musombegesa makalegelo enji, ajiya gumuhana malongo mbala jiavula ha gumukuatesa hagula avutugile ufuta wenji nu Yehowa. Ngenyi wajiya guvutuga luko mu hungu. *

12. Ndaga itshi akulu adi naye gutshita ha gumonesa guzumba nu khadilo dia khenda gudi muthu yonu gabalumuinego mutshima?

¹² Tudi naye gujiya egi phamba muthu yonu gabalumuinego mutshima wana zolewa mu hungu. Akulu ana jiya egi adi naye gutangiza muavula gutuama dia guzola muthu mu hungu. Ana jiya nji egi Yehowa wana hana disipline ‘mu luholo luatagana.’ (Yel. 30:11) Akulu ana zumba aphangi awo a Aklisto, hene ana tshigina ndo gukalagala ndaga imoshi yajiya gubolesa ufuta wa aphangi ene nu Yehowa. Uvi matangua ako, ha gumonesa guzumba nu khadilo dia khenda gudi muthu wakalagala gubola, muthu muene udi naye guzolewa mu hungu.

13. Mukunda natshi Muklisto mumoshi wa mu hungu dia gu Kolinto wakhalele naye guzolewa mu hungu?

¹³ Tutadilenu ndaga mupostolo Phaula wawambelele Aklisto a mu siekle ya thomo ha gukalagala gula muthu gabalumuinego mutshima. Muklisto mumoshi wa gu Kolinto wakhalele mubungisa muila nu mukaji’a shenji. Ndaga ya musonyi diago! Mu ndaga ya luholo elu, Yehowa wawambelele enya gu Isalele egi: ‘Gula yala wabungisa muila nu mukaji’a shenji, ngenyi wahana sh’enji musonyi. Mukut’awo agasue muyadi adi naye gushiyiwa.’ (Levi 20:11) Mupostolo Phaula gawambelelego Aklisto a mu hungu egi muthu muene udi naye gushiyiwa. Uvi waawambelele egi udi naye guzolewa mu hungu. Ndaga eyi ya musonyi yakalegele muthu yowu yasagesele athu ako mu hungu, ako nji mukatshi diawo avuile musonyi wavula!—1 Kol. 5:1, 2, 13.

14. Luholo lutshi Mupostolo Phaula wamonesele khadilo dia khenda gudi muthu wazolewe mu hungu dia gu Kolinto? Mukunda natshi? (2 Kolinto 2:5-8, 11)

¹⁴ Matangua azonda gungima, mupostolo Phaula wavile egi muthu muene wasombegesele diago makalegelo enji. Muthu muene wavishile aphangi a mu hungu musonyi, uvi Phaula wawambelele akulu egi ashigo naye gukhala nu ‘ndaga jiakola-kola’ gudi muthu muene. Waawambelele egi: ‘Mudi naye gumutotesela nu mutshima umoshi nu gumukuatesa.’ Phaula waawambelele ngenyi ‘hagula muthu muene gavuigo gikenene giavula gubalega.’ Phaula wamuvidile khenda handaga wabalumuine mutshima. Mupostolo Phaula gatshiginyilego egi muthu muene  avue gikenene giavula mukunda nu gubola guakalegele muene. Gula ndo wajiya guleba muila ha gukamba ukuateshi hagula amutotesele.—Tanga 2 Kolinto 2:5-8, 11.

15. Luholo lutshi akulu ajiya guhana muthu wakalagala gubola ndola nu gumonesa nji egi adi gumuvila khenda?

¹⁵ Akulu ana monesa khadilo dia khenda gifua Yehowa. Gula idi mutoga egi ahane muthu wakalagala gubola ndola, adi naye gumuhana naye. Uvi ajiya nji gumuvuila khenda gula adi nu ndaga jidi guatuma ha gumuvuila khenda. Gula akulu amuhanelego ndola, idi mukotelesa egi ashigo gumuvuila khenda; uvi adi muhana njila egi ndaga jiabola jikalegewe. Phamba akulu adi nu ginemo gia guvuila muthu wakalagala gubola khenda ba?

16. Ha gutadila Ishima 21:13, Yehowa wana kalagala itshi gudi athu anago guvuila athu ako khenda?

¹⁶ Aklisto agasue ana landula khadilo dia Yehowa dia khenda. Mukunda natshi? Handaga Yehowa gajiyilego gutegelela isambu ya athu anyi ashigo muvuila athu ako khenda. (Tanga Ishima 21:13.) Gushigo nga muthu wana tshigina egi Yehowa atune gutegelela isambu yenji. Hene tudi naye gutuna gukhala enya ndaga jiakola-kola. Tushigo naye gutuna gutegelela phangi’etu wa Muklisto hadi muene mutagana nu lamba, uvi tudi naye gutegelela ‘gudila gua muthu udi mumona malamba.’ Tudi naye nji gulandula longo didi muzuela egi: ‘Muthu munu gashigo muvila athu ako khenda, mbaashigo gumuvila khenda tangua mbaamusophesa.’ (Yak. 2:13) Gujiya nu gudibulumuisa guagasue egi tuana khala nu funu egi athu ako atuvuile khenda, guana gututuma ha guavuila nji khenda. Tudi naye gumonesa khadilo dia khenda gudi muthu wakalegele gubola havutuga muene mu hungu.

17. Luholo lutshi Fumu Davidi wamonesele khadilo dia khenda?

¹⁷ Ifezegeselo ya mu Biblia yajiya gutukuatesa ha guvuila athu ako khenda nu ha gutuna gukhala enya ndaga jiakola-kola. Tutadilenu gifezegeselo gia Fumu Davidi. Wakhalele muvuila athu ako khenda. Saula wakhalele mutshigina gumushiya, uvi David wamuvuidile khenda handaga Nzambi watombele Saula ha gukhala fumu. Gakambelego guvutula gubola mu gubola.—1 Sam. 24:9-12, 18, 19.

18-19. Mu ba okazio atshi mbadi Davidi gamoneselego khadilo dia khenda?

¹⁸ Uvi mu matangua ako Davidi gamoneselego khadilo dia khenda. Ha gufezegesa, tangua Nabale wamushingile nu watunyile guhana Davidi nu athu enji ima ya gudia, Davidi wavuile khabu, wazudile desizio dia guya mushiya Nabale nu enya fami yenji agasue. Uvi Abigayile, mukaji’a Nabale wakhalele nu gisemo, wakhalele nji nu khadilo dia guhuiminyina. Wayile muphushi muhana Davidi ima ya gudia. Hene, Davidi gashiyilego Nabale nu enya fami yenji.—1 Sam. 25:9-22, 32-35.

¹⁹ Lusugu lumoshi, profete Natana wawambelele Davidi egi muenya umonyi mumoshi watambudile phutu gimeme gienji gimoshi ha gimoshi giakhalele muene muzumba muavula. Davidi wavuile khabu jiavula, wazuelele egi: ‘Ngudi mudiloga mu jina dia Yehowa egi muthu watshitshi ndaga inyinyi udi naye gufua!’ (2 Sam.  12:1-6) Davidi wakhalele mujiya Mukhuala wa Moize muabonga. Gula muthu wakuya gimeme giangane, wakhalele naye gufuta imeme nguana gudi fumi’a gimeme. (Guz. 22:1) Uvi ndaga yazuelele Davidi yamonesele egi wakhalele muenya ndaga jiakola-kola. Natana wahanele gifezegeselo giene ha gumonesa gubola guakoma guakalegele Davidi! Yehowa wavuidile Davidi khenda jiavula gubalega, uvi Davidi muene hakhenji gavuidilego muthu wakuyile gimeme khenda mu gifezegeselo gia Natana!—2 Sam. 12:7-13.

20. Longo ditshi tuajiya guzula mu gifezegeselo gia Davidi?

²⁰ Tangua diavuile Davidi khabu jiavula, wazudile desizio dia gushiya Nabale nu enya fami yenji agasue. Gungima, wazuelele luko egi muthu yonu wakuyile gimeme mu gifezegeselo gia Natana udi naye gushiyiwa. Davidi wakhalele muenya gisemo, uvi mukunda natshi wakolesele ndaga gudi muthu wakuyile gimeme? Tutadilenu ndaga yatumine Davidi ha guzuela ngenyi. Davidi wakhalele gudisagesa mukunda nu gubola guakalegele muene. Gula muthu udi mukolesa ndaga gudi athu ako, idi mumonesa egi gashigo nu ufuta wabonga nu Yehowa. Yesu wawambelele alandudi enji egi: ‘Bembenu gusophesa athu hagula enue nji musophesewago; handaga luholo mudi musophesa athu ako, luene mbaamisophesa nji.’ (Mat. 7:1, 2) Hene, tudi naye gukalagala ngolo hagula tukhadigo enya ndaga jiakola. Tudi naye nji gukhala ‘enya khenda’ gifua Nzambi wetu.

21-22. Mu maluholo atshi tuajiya guvuila athu ako khenda?

²¹ Tushigo naye phamba guvuila athu khenda, uvi tudi naye nji gutshita ndaga jiko. Athu ana khala nu khadilo dia khenda, ana kalagala ndaga ha gukuatesa athu ako. Mukut’etu agasue tuajiya gukamba luholo lua gukuatesa athu adi nu funu ya ukuateshi mu fami yetu, mu hungu dietu nga athu ako. Tuana khala nu ba okazio avula ha gukuatesa aphangi! Udi mujiya phangi mumoshi udi nu funu ya ukuateshi ba? Tuajiya gumuhana ima ya gudia nga gumukuatesa mu luholo luko. Tuajiya nji gukuatesa phangi wavutudiwa mu hungu ha guheta mafuta ajiya gumuhana gikhesa. Tudi naye nji gulongesa athu ako lukuma luabonga ha guakuatesa. Gukalagala ndaga eji mbagumonesa egi tudi muvuila athu ako khenda.—Yobo 29:12, 13; Lomo 10:14, 15; Yak. 1:27.

²² Gula tuajiya egi gudi nu aphangi adi nu funu ya ukuateshi, tuajiya gutshita yagasue ha guakuatesa. Gula tudi muvila athu ako khenda, mbatusuanguluisa Tata wetu wa mu dilu; ‘Nzambi wa khenda jiagasue’!