1-2. Itshi tuajiya gutshita ha gutanga nu gulonguga Biblia muabonga? Hana gifezegeselo.

 TANGIZA gale egi udi mutshigina gusumba inzo. Itshi udi naye gutala gutuama egi usumbe inzo yene? Mbawutala phamba foto idi mumonesa gutuama dia inzo yene ba? Ndo sha. Idi yadiago egi udi naye guya gu inzo yene ha guyitala muabonga, gungina mukatshi, gutala sugu jiayo jiagasue, nu gutala ima yagasue idi muene. Wajiya nji guta maga nu muthu mumoshi udi mujiya luholo yatungiwe. Yadiago, udi naye gukamba gujiya ndaga jiagasue jiatadila inzo udi mutshigina gusumba.

² Tuajiya nji gutshita luholo lumoshi tangua tudi mutanga Biblia nu guyilonguga. Muenya ndunge mumoshi udi muzuela egi Biblia idi gifua “inzo yakoma, yaleha, yatungiwe nu fondasio yakola.” Luholo lutshi tuajiya gujiya muabonga ndaga jidi mu Biblia? Gula udi guyitanga muphushi, wajiya gujiya phamba giamatshidia gia gisendeselo, yakotelesa egi “malongo aleba a gisendeselo a ndaga jia gijila jiazuelele Nzambi.” (Heb. 5:12) Gifua luholo muthu udi mutshigina gusumba inzo wana ngina mukatshi ha gujiya ndaga jiavula, aye nji udi naye gulonguga Mbimbi ya Nzambi ha guyikotelesa muabonga. Luholo luabonga lua gulonguga Biblia ludi, gukamba gujiya luholo malongo enji ana gudivua. Tshita ngolo ha gukotelesa ndaga wana tshigina, kamba nji gujiya mukunda natshi wana tshigina egi ndaga jiene jidi jia giamatshidia.

3. Ndaga itshi mupostolo Phaula wawambelele aphangi’enji Aklisto ha gutshita? Mukunda natshi? (Efeso 3:14-19)

³ Ha gukotelesa diago ndaga jiavula jidi mu Mbimbi ya Nzambi, tudi naye gulonguga ndaga jiko muabonga. Mupostolo Phaula wawambelele aphangi’enji Aklisto ha gulonguga Mbimbi  ya Nzambi muabonga hagula ajiya ‘gukotelesa muabonga gukoma nu guleha nu gitala nu jinga dia ndaga jia Nzambi.’ Ngenyi ‘ajiya gujiga miji’ nu gukhala nu gutshigina gukola. (Tanga Efeso 3:14-19.) Esue nji tudi naye gutshita luholo lumoshi. Tutadilenu luholo tuajiya gulonguga Mbimbi ya Nzambi muabonga ha gukotelesa malongo enji a ndando.

4. Itshi tudi naye gutshita ha gukolesa ufuta wetu nu Yehowa? Hana ifezegeselo.

⁴ Esue Aklisto tuanago gusuanguluga phamba ha gukotelesa malongo aleba a Biblia. Uvi nyuma ya Nzambi yana gutukuatesa ha gulonguga “ndaga jia Nzambi jinyi jiasuegewe.” (1 Kol. 2:9, 10) Wajiya gutshita ba recherche ajiya gugukuatesa ha gukolesa ufuta waye nu Yehowa. Ha gufezegesa, wajiya gutshita ba recherche adi mumonesa luholo Yehowa wakhalele muzumba akombeledi enji a mu tangua dikulu nu luholo ndaga jiene jidi mumonesa egi wana guguzumba. Wajiya nji gulonguga ha gujiya luholo Yehowa wakhalele mutshigina egi enya Isalele amukombelele nu gufuanesa ndaga yene nu luholo luana tshigina muene egi tumukombelele mangino. Nga ndo wajiya gulonguga muabonga profesi jiatagenesele Yesu tangua diakhalele muene ha mavu.

5. Mikanda itshi wajiya gukalegela ba recherche mu gulonguga guaye gua Biblia?

⁵ Athu ako ana tshigina gulonguga Biblia muabonga azuelediele ndaga jiazonda akhalele mutshigina gulonguga muavula diago. Wajiya gumona ndaga jiko athu ene azuelele mu galuanda “ Ndaga Wajiya Gutadila mu Gulonguga Guaye.” Wajiya nji guheta gusuanguluga gula udi mulonguga malongo ene mu mukanda Index des publications des Témoins de Jéhovah nu Guide de recherche pour les Témoins de Jéhovah. Gula udi mulonguga Biblia muabonga mbayigukuatesa ha gukolesa gutshigina guaye nu ‘mbawuheta ujiyi wa Nzambi.’ (Ish. 2:4, 5) Henyaha tutadilenu ndambo ya malongo a ndando a Biblia tuajiya gulonguga.

6. (a) Hana gifezegeselo gidi mumonesa mukunda natshi ndaga jialayele Nzambi jiana tagenesewa? (b) Mukunda natshi tudi muzuela egi felela dia Yehowa mukunda nu athu nu mavu didi dia “ivo nu ivo”? (Efeso 3:11)

⁶ Tutadilenu ndaga Biblia yana zuela mukunda nu ndaga jialayele Nzambi. Ha gufezegesa,  tutadilenu ndaga Biblia yana zuela mukunda nu ndaga jialayele Nzambi. Yehowa gashigo gifua athu ana tomba njila imoshi ha guya fundo adi mutshigina. Yajiya gukhala lamba ha guheta ha fundo diene, gula gima gimoshi giakanga njila yene. Uvi ndaga jiana gutulaya Yehowa jidi gifua fundo didi mutshigina guya muthu. Yehowa wana gujiya muabonga fundo didi muya muene, wajiya gukalegela njila jia gudisha ha guheta ha fundo diene. Tudi muhana Yehowa mersi yavula luholo atshiginyile egi ‘felela dienji dia ivo nu ivo’ disonegewe mu Biblia. (Ef. 3:11) Yehowa wana tagenesa ndaga jiagasue jiana laya muene handaga walondele ima yagasue ha gutagenesa felela dienji. (Ish. 16:4) Ima yagasue yana tshita Yehowa mbayikhala mayilago. Ndaga jitshi Yehowa walayele? Usombegeshi utshi Yehowa watshitshile gale ha gutagenesa ndaga jiene?

7. Halumbugile Adama nu Eva, itshi Yehowa wakalegele ha gutagenesa felela dienji? (Matayo 25:34)

⁷ Nzambi wawambelele Adama nu Eva felela dienji mukunda nu ene. Waawambelele egi: “Vualenu ana mudivudise, zalesenu mavu nu muahinyine. Hinyinenu . . . ima yagasue idi nu monyo ha mavu.” (Gis. 1:28) Halumbugile Adama nu Eva, abatele athu malamba, uvi ndaga yene yakangelego Yehowa njila ha gutagenesa felela dienji. Wakambele luholo luko lua gutagenesa felela diene. Gungima, wazudile mbala imoshi desizio dia guhaga Ufumu umoshi mu dilu ha gutagenesa felela dienji mukunda nu athu nu mavu. (Tanga Matayo 25:34.) Gungima watumine Mun’enji ha mavu mu tangua diatagana ha gulongesa athu ndaga jiatadila Ufumu wene nu ha guhana monyo wenji gifua mulambu ha gutukula mu uhiga wa gubola nu gufua. Gungima wafuzumuine Yesu ha gubua Fumu wa Ufumu wenji mu dilu. Uvi gudi nu ndaga jiavula tuajiya gulonguga jiatadila ndaga jialayele Nzambi.

8. (a) Ndaga itshi yabalega ndando Biblia yana longesa? (b) Gifua luholo Efeso 1:8-11 idi guyimonesa, felela dia Yehowa didi itshi? (Tala gifuanesa holu dia gizula.)

⁸ Ndaga yabalega ndando Biblia yana longesa idi egi: Jina dia Yehowa mbadinemesewa tangua mbaditagenesa muene felela dienji mukunda nu mavu mu Ufumu wenji mbawutuamezewa gudi Klisto. Yehowa gajiyilego gusombegesa felela dienji. Udi gutuwambela egi mbawutagenesa ndaga jiagasue jialayele muene. (Yesh. 46:10, 11; Heb. 6:17, 18) Gualeha ndo, mbawubuisa mavu phaladiso hagula athu abonga mbaakhale nu ‘monyo ivo nu ivo.’ (Ngi. 22:26) Uvi Yehowa mbawukalagala nji ndaga jiko jiavula. Mbawubungisa nji akombeledi enji a mu dilu nu a ha mavu hamoshi. Ngenyi mukut’awo agasue mbaatumagela Yehowa Fumu wawo. (Tanga Efeso 1:8-11.) Tuana suanguluga diago luholo Yehowa wana tagenesa felela dienji.

9. Ndaga jitshi mbajikalegewa mu masugu adi muza tuajiya gujiya gula tudi mutanga Biblia?

⁹ Tutadilenu profesi yazuelele Yehowa mu dihia dia Edene idi mu Gisendeselo 3:15. b Profesi yene yazuelele ndaga jiakhalele naye gukalegewa ha gutaganesa felela dienji; uvi ndaga jiene jiakhalele naye gubua ivo yavula gungima. Ha gufezegesa, Nzambi wawambelele Abalahama egi gungima dia indongo yavula, mujigulu wenji mumoshi mbawubua Klisto. (Gis. 22:15-18) Mu givo 33 G.Y., Yesu washiyiwe gifua luholo luazuelele profesi. (Makal. 3:13-15) Uvi gitshinyi gia gisugishilo gia profesi yene giatadila gushiyiwa gua Satana, mbagitagenesewa gungima dia Uhinyinyi wa ivo 1 000. (Gumo. 20:7-10) Uvi Biblia yana zuelela nji ndaga jiavula  mbajikalegewa tangua ulondegi wa Satana nu ulondegi wa Yehowa mbaadiluisa.

10. (a) Ndaga jitshi mbajikalegewa mu masugu adi muza? (b) Luholo lutshi tuajiya gudilondega? (Tala mbimbi goshi’a diyiji.)

¹⁰ Tangiza gale ndaga jiagushimana Biblia yadiangele guzuela. Thomo, ifutshi mbayizuela egi “tudi mu guhuima nu mu ubambi!” (1 Tes. 5:2, 3) Mu tangua diene, lamba diakola mbadisendesa mu gisagumuisa tangua ifutshi mbayishiya ikombelelo yagasue ya mambo. (Gumo. 17:16) Gungima dienji, yajiya gukhala egi mbatumona “Mun’a muthu muza mu matuta mu dilu nu ngolo nu lutumbu luakoma” mu luholo lua gushimana. (Mat. 24:30) Yesu mbawusophesa athu agasue, mbawukhaphumuna imeme nu khombo. (Mat. 25:31-33, 46) Uvi Satana mbawulandula gulumbugila Yehowa. Mbawutuma ifutshi ha gudibungisa ha guluisa akombeledi a Yehowa; Biblia yana tamega ifutshi yene egi Goga wa gu gifutshi gia Magoga. (Ezek. 38:2, 10, 11) Gungima Aklisto ambiwe maji mu nyuma anyi mbaakhala ha mavu, mbaaya mu dilu ha gudibungisa hamoshi nu Klisto nu anjelo ha gulua ita ya Alemagedona gu gisugishilo gia lamba diakola. c (Mat. 24:31; Gumo. 16:14, 16) Gungima Uhinyinyi wa Ivo 1 000 wa Klisto mbawusendesa.​—Gumo. 20:6.

11. Itshi yana gugujila mu matangi tangua wana tangiza monyo wa ivo nu ivo? (Tala nji gifuanesa.)

¹¹ Tangiza gale ndaga mbajikalegewa gungima dia Uhinyinyi wa Ivo 1 000. Biblia yana zuela egi Yehowa watufugile nu matangi a ‘gukhala nu monyo ivo nu ivo.’ (Mulo. 3:11) Tangiza nji luholo ndaga yene yajiya gukolesa ufuta waye nu Yehowa. Mukanda Approchez-vous de Jéhovah ha diyiji 319 udi muzuela egi: “Gungima dia gukhala nu monyo bamilio nu bamilio a ivo, mbatujiya Yehowa muabonga gubalega mangino. Uvi mbatukhala nu nzala yagulonguga ndaga jiko jiavula. . . . Monyo wa ivo nu ivo mbawukhala wabonga diago. Mbatukuata ufuta wakola nu Yehowa, mbatuheta nji gubonga guavula.” Uvi ndaga jitshi jiko tuajiya gulonguga tangua tudi mutanga Biblia?

12. Luholo lutshi tuajiya gutangiza ndaga jia mu dilu? Hana gifezegeselo.

¹² Biblia yana gutumonesa ndaga jiazonda jinyi jiana kalegewa ha meso a Yehowa ‘gosa mu dilu.’ (Yesh. 33:5) Yana zuelela ndaga jia gushimana jiatadila Yehowa nu ulongegi wenji wa mu dilu. (Yesh. 6:1-4; Dan. 7:9, 10; Gumo. 4:1-6) Ha gufezegesa, tuana tanga ndaga jia gushimana jiamonele Ezekiele tangua ‘dilu diakangulugile nu hasendesele muene gumona vizio jia Nzambi.’​—Ezek. 1:1.

13. Ha gutadila Hebelu 4:14-16, ndaga itshi yana gugusuanguluisa mu ginemo giana khala nagio Yesu mu dilu?

¹³ Yesu udi Fumu nu Nganga-nzambi Wakoma mu dilu, henyaha tangiza gale ndaga jidi mukalagala muene mukunda nu esue. Wana gutukuatesa ha gusuena gu “nguasa ya ufumu ya Nzambi wana gutuvila khenda jiavula” tangua tuana tshita isambu nu ha gutoga Nzambi ha gututotesela nu ha gutukuatesa “mu tangua diabonga.” (Tanga Hebelu 4:14-16.) Tudi naye gutangiza lusugu nu lusugu ndaga Yehowa nu Yesu akalegele gale nu jinyi adi mukalagala mukunda nu esue mu dilu. Guzumba guawo mukunda nu esue guajiya gutukuatesa ha gukhala nu gikhesa mu mudimo wa gulongesa nu ha gukombelela Yehowa.​—2 Kol. 5:14, 15.

14. Ndaga itshi ya ndando tuajiya gutshita ha gumonesa egi tuana hana Nzambi nu Yesu mersi? (Tala nji ifuanesa.)

¹⁴ Ndaga iko yabelega ndando tuajiya gukalagala ha gumonesa egi tuana hana Nzambi nu Mun’enji mersi, idi gutshita yagasue ha gukuatesa athu ako ha gubua Matemue a Yehowa nu alandudi a Yesu. (Mat. 28:19, 20) Mupostolo Phaula watshitshile nji ngenyi ha guhana Nzambi nu Klisto mersi. Wakhalele mujiya egi gutshigina gua Yehowa gudi egi “athu a maluholo agasue ahuluge nu ahete ujiyi wa diago wa giamatshidia.” (1 Tim. 2:3, 4) Wadihanele muavula  mu mudimo wa gulongesa ha gukuatesa athu avula hagula wajiya “guhuluisa athu ako mukatshi diawo mu maluholo agasue.”​—1 Kol. 9:22, 23.

15. Ha gutadila Ngimbo 1:2, itshi yajiya gutukuatesa ha gukhala nu gusuanguluga?

¹⁵ Muyimbi wa ngimbo wafuanesele muthu udi nu gusuanguluga nu udi mubinga mu ndaga jidi mutshita muene nu muthu ‘wana suanguluga nu mikhuala ya Yehowa,’ nu muthu ‘wana tangigiza mikhuala yene phipha nu muanya.’ (Ngi. 1:1-3) Joseph Rotherham wana balumuna Biblia, wazuelele mukunda nu verse eji egi muthu wana suanguluga nu Mbimbi ya Nzambi udi naye “gutshigina utuameji wa Nzambi, ngenyi mbawukhala nu nzala yakola ya gukamba utuameji wene, gulonguga ndaga jiatadila Nzambi nu guzula tangua dia gutangigiza mu ndaga jiene.” Wazuelele luko egi “gula muthu wabalegesa lusugu nu gutanga ndo Biblia, idi gifua wabalegesa lusugu luenji lua gituhu.” Wajiya gukhala nu gusuanguluga tangua udi mutanga Biblia, gula udi mukamba gukotelesa ndaga jiagasue jia ndando jiazonda-zonda nu gukamba gudivua gudi mukatshi dia ndaga jiene. Mbawukhala nu gusuanguluga gula udi mutanga Mbimbi ya Nzambi muabonga diago!

16. Itshi mbatulonguga mu longo dialandula?

¹⁶ Giamatshidia giana gutulongesa Yehowa mu Mbimbi yenji giana khalago giakola ha gukotelesa. Mu longo dialandula, mbatutadila giamatshidia giko gia ndando giatadila tempelo yakoma ya Yehowa ya mu nyuma inyi yazuelele mupostolo Phaula mu mukanda wa Hebelu. Tudi gudifelela egi gulonguga ndaga yene mbagugusuanguluisa diago.