Mihu Yana Guhula Athu Ana Gutanga Mikanda Yetu
Gula tuakatula mana nu tunjila, enya Isalele akhalele nu ima iko ya gudia mu mavu a luselenga ba?
Enya Isalele akhalele mudia mana muavula mu ivo 40 akalegele mu mavu a luselenga. (Guz. 16:35) Yehowa waahanele nji tunjila mbala jiyadi. (Guz. 16:12, 13; Lutang. 11:31) Uvi enya Isalele akhalele nji nu ima iko ya gudia.
Ha gufezegesa, matangua ako Yehowa wakhalele mutuameza akombeledi enji ha ‘fundo dia guhuluguga’ diakhalele nu meya nu ima ya gudia. (Lutang. 10:33) Mukatshi dia mafundo ene a guhuluguga guakhalele nu fundo akhalele mutamega egi Elima. “Fundo diene diakhalele nu tu ito tua mita 12 nu samba 70. Atungile phundo yawo guene, hehi nu meya.” Idi naye gukhala egi jiakhalele samba jia mabundu a date. (Guz. 15:27) Mukanda Plants of the Bible wana zuela egi, samba jiana haga mabundu a date jiana kula mu mafundo avula a gudisha, . . . mabundu enji ana diwa muavula mu mavu a luselenga; “jiana kuatesa athu avula ha guheta ima ya gudia nu maji nu fundo dia vule.”
Yajiya gukhala egi enya Isalele amaganele ha baba diakoma, mangino fundo diene diana tamegewa egi Feiran. Fundo diene didi mukatshi dia baba diana tamegewa egi Feiran. a Mukanda Discovering the World of the Bible udi muzuela egi baba diene diana “khala guleha bakilometre 130. Didi dialeha, diabalega gubonga nu diajiyiwa mukatshi dia mababa a gu Sinayi.” Mukanda wene udi muzuela luko egi: “Gula muthu wakatuga fundo baba diene diana tagana nu kianga, wawenda ba kilometre 45, mbawuheta ha zanga dimoshi diabonga diana tamegewa egi Feiran Oasis. Gula wakatuga holu dia baba didi nu zanga diene uu nu gu kianga, hadi bametre 610. Didi zanga diabalega gubonga, didi nu ba kilometre 4,8 didi nu samba jiavula; hene athu ana guditamega egi Edene ya gu Sinayi. Sendese mualeha, athu ana guya guene ha gutala samba jiavula jiana haga mabundu a date.”
Samba jia mabundu a date gu mababa a Feiran
Tangua enya Isalele akatugile gu Ejipitu, azanguile pate nu malonga a gubudila pate yene. Yajiya nji gukhala egi azanguile mbuto nu maji. Idi yadiago egi ima yene yakhalelego naye gushipha muavula. Ayile nji nu “imeme nu ngombe, ayile nu shitu jiavula diago.” (Guz. 12:34-39) Luholo lujingu luakhalele lamba mu mavu a luselenga, idi naye gukhala egi shitu jiavula jiafuile. Yajiya gukhala egi Enya Isalele akhalele mudia shitu jiko. Yajiya nji gukhala egi jiko ajihanele milambu, ahanele nji milambu yene gudi nzambi jia isongo. b (Makal. 7:39-43) Uvi enya Isalele abambele shitu jiko gifua muayimonesele Yehowa gudi akombeledi enji tangua atunyile gumutumagela egi: ‘An’enu mbaabua abambi a imeme mu mavu a luselenga ivo 40.’ (Lutang. 14:33) Yajiya gukhala egi shitu jiene jiakhalele guahana miliki nu misunyi ya gudia, uvi ima yene yakhalelego yavula hagula athu 3 milio ajiya gudia mu ivo 40. c
Fundo ditshi enya Isalele akhalele muheta ima ya gudisa shitu jiawo nu meya a gujinuisa? d Yajiya gukhala egi mu tangua diene, mvula yakhalele munoga muavula, mayiji akhalele nji muzoga mu mavu a luselenga. Étude perspicace des Écritures, Volume 1 yana zuela egi ivo 3 500 yabalega gale, “meya akhalele avula mu mafundo enya Isalele akhalele mukhala gubalega luholo ana khala mangino. Mangino luholo mababa avula aleha a gimigina ana khala guene mu mafundo tumita tuakhalele mubalega, idi mumonesa diago egi mu tangua dikulu mvula yavula yakhalele munoga yakhalele muzola tumita tuazonda-zonda.” Ikhale mvula yakhalele munoga muavula uvi mavu a luselenga akhalele temu dia gimigina, diakhalelego nu muangu nu mitshi, diakhalele nji fundo dikuatesa woma. (Mikh. 8:14-16) Gula nga Yehowa gakhalelego guahana meya mu luholo lua gushimana, nga enya Isalele nu shitu jiawo akhalele naye gufua.—Guz. 15:22-25; 17:1-6; Lutang. 20:2, 11.
Moize wawambelele enya Isalele egi Yehowa wakhalele guahana mana ha gudia ‘ha guamonesa egi muthu gana khalago nu monyo phamba mukunda nu mapha uvi mukunda nu ndaga jiagasue jiana zoga mu kano dia Yehowa.’—Mikh. 8:3.
a Tala Inzo Yaleha ya Mutaledi ya 1 Mai 1992 diyiji 24-25, ya Français.
b Biblia yana zuela egi enya Isalele ahanele milambu ya shitu gudi Yehowa mu mavu a luselenga mbala jiyadi. Mbala ya thomo yakhalele tangua akhalele mutomba nganga-nzambi; mbala ya mbadi yakhalele mu tangua dia Wano wa Pake. Ndaga jiene jiagasue jiakalegewe mu givo 1512 G.G.Y., yakhalele mu givo gia mbadi gungima dia guzoga guawo gu Ejipitu.—Levi 8:14–9:24; Lutang. 9:1-5.
c Tangua enya Isalele akhalele mutshigina gutagenesa ivo 40 mu mavu a luselenga, atambudile shitu jiavula gu ita. (Lutang. 31:32-34) Ikhale atambudile shitu jiene, uvi akhalele mulandula gudia mana uu nu tangua anginyile mu Mavu a Gutendelela.—Yosh. 5:10-12.
d Gushigo nga nu gima gimoshi gidi mumonesa egi shitu nji jiakhalele mudia mana, handaga Yehowa wawambelele enya Isalele ha gunona mana phamba mu guvula guakhalele naye gudia muthu nu muthu.—Guz. 16:15, 16.
