1. Mukunda natshi yajiya gukhala lamba gudi esue ha gutumaga?

 MATANGUA ako yana khala lamba gudi aye ha gukhala nu khadilo dia gutumaga ba? Ndaga yene yabuidile nji Fumu Davidi, hene gakombelele Nzambi egi: ‘Ngukuatese ha gukhala nu nzala ya gugutumagela.’ (Ngi. 51:12) Davidi wakhalele muzumba Yehowa. Uvi matangua ako yakhalele lamba gudi muene ha gutumaga. Yana khala nji lamba gudi esue ha gutumaga. Mukunda natshi? Thomo, handaga tuana vualewa nu khadilo dia gushaga. Ya mbadi, handaga Satana wana gututuma ha gulumbugila Yehowa gifua muatshitshile muene. (2 Kol. 11:3) Ya thathu, handaga tudi mujinga ha mavu adi nu athu anago gukhala nu khadilo dia gutumaga. Biblia idi muzuela egi: “Nyuma yene yana khala gifua muhehe udi mutuameza athu agasue ana gulumbugila Nzambi.” (Ef. 2:2) Tudi naye gutshita ngolo ha gutuna gubua mu gubola, nu gutshita yagasue ha gutuna gulandula makalegelo abola a Satana nu mavu enji. Tudi naye nji gutshita ngolo ha gutumagela Yehowa nu athu ahanele muene ginemo gia gutuameza.

2.Gukhala “hehi ha gutumaga” gudi mukotelesa itshi? (Yakoba 3:17)

² Tanga Yakoba 3:17. Nyuma ya Nzambi yakuatesele Yakoba ha gusonega egi, athu atema ana khala “hehi ha gutumaga.” Mbimbi eji jidi mukotelesa itshi? Jidi mukotelesa egi tudi naye gukhala hehi ha gutumagela athu Yehowa wahanele ndambo ya ufumu. Uvi Yehowa gana tshigina ndo egi tutumagele muthu udi gututuma ha gulumbugila mikhuala yenji.​—Makal. 4:18-20.

3. Mukunda natshi yana khala nu ndando gu meso a Yehowa egi tutumagele athu anyi ahanele muene ufumu?

³ Yajiya gukhala ndaga yaleba ha gutumagela Yehowa uvi athu ndo. Handaga Yehowa wana tuameza mu luholo luatagana. (Ngi. 19:7) Uvi athu ana khala nu ufumu ashigo athu atagana. Ikhale ngenyi, Tata wetu wa mu dilu wahanele ndambo ya ufumu gudi mvuaji, mafumu a leta nu gudi akulu. (Ish. 6:20; 1 Tes. 5:12; 1 Phet. 2:13, 14) Tangua tuana guatumagela, tuana monesa egi tudi mutumagela Yehowa. Tutadilenu luholo tuajiya gutumagela  athu anyi Yehowa wahanele ufumu ngatshima matangua ako yajiya gukhala lamba ha gutshigina nu gulandula utuameji wawo.

4. Mukunda natshi mavuala avula ana tuna gutumagela mvuaji jiawo?

⁴ Mavuala ana balegesa tangua nu ana ako “anago gutumagela mvuaji jiawo.” (2 Tim. 3:1, 2) Mukunda natshi ana avula mukatshi dia ana ene ana tuna gutumagela mvuaji jiawo? Mvuaji jiko jianago gukalagala ndaga gifua luholo ana wambela an’awo ha gutshita, hene an’awo ana guamona egi adi enya mambo. Ako ana tangiza egi malongo mvuaji jiawo jiana guahana ana khala a ginono, ashigo nu ndando nu ana khala akola ha gunemesa. Gula udi muvuala, aye nji wadivuile gale ngenyi ba? Yana khala lamba gudi mavuala avula ha gutumagela mukhuala wa Yehowa udi muzuela egi: “Tumagelenu mvuaji jienu mu gudivua nu Fumu, handaga idi ndaga yabonga.” (Ef. 6:1) Itshi yajiya gugukuatesa ha gutumaga?

5. Mukunda natshi Yesu udi gifezegeselo giabonga gudi mavuala ana tumagela mvuaji jiawo? (Luka 2:46-52)

⁵ Wajiya guzula malongo atadila khadilo dia gutumaga mu gifezegeselo giabonga gia Yesu. (1 Phet. 2:21-24) Yesu wakhalele muthu watagana, uvi mvuaji jienji ndo. Uvi wakhalele guanemesa ikhale matangua ako akhalele mujimbila ndaga jiko nga tangua akhalelego gumukotelesa. (Guz. 20:12) Tutadilenu ndaga jiabuile tangua Yesu wakhalele nu ivo 12. (Tanga Luka 2:46-52.) Wayile nu mvuaji jienji gu Yelusalema. Uvi tangua akhalele muvutuga gumbo diawo, mvuaji jienji jiajiyilego egi Yesu wasalele gu Yelusalema. Yakhalele ginemo gia Yozefe nu Madiya gia gukamba gujiya gula an’awo agasue akhalele nawo. Tangua amonele Yesu, Madiya wamubalediele luholo luasalele muene gu Yelusalema! Yesu wakhalele naye gumona gubola luholo akhalele gumukamba, uvi waahanele mvutu yabonga nu ginemua giagasue. Ikhale ngenyi, Yozefe nu Madiya “akoteleselego ndaga jiakhalele muene guawambela.” Uvi muene walanduile “guatumagela.”

6-7. Itshi yajiya gukuatesa mavuala ha gutumagela mvuaji jiawo?

⁶ Mavuala, yana khala lamba gudi enue ha gutumagela mvuaji jienu gula adi mujimbila ndaga jiko nga ndo ashigo gumikotelesa muabonga ba? Itshi yajiya gumikuatesa ha guatumagela? Ya thomo, tangizenu luholo Yehowa wana gudivua. Biblia yana zuela egi, gula mudi mutumagela mvuaji jienu, mudi ‘musuanguluisa Fumu.’ (Kol. 3:20) Yehowa wana jiya egi matangua ako mvuaji jienu jianago gumikotelesa muabonga, nu ana gumihagela mikhuala yakola ha gutumagela. Uvi gula mudi guatumagela, Yehowa wana suanguluga.

⁷ Ya mbadi, tangizenu luholo mvuaji jienu jiana gudivua. Gula mudi guatumagela mbamuasuanguluisa nu mbaakhala nji gumishila mutshima muavula. (Ish. 23:22-25) Gutshita ngenyi guajiya gumikuatesa nji ha gukolesa ufuta wenu nawo. Phangi Alexandre wana jinga gu Belgique udi muzuela egi: “Tangua ngasendesele gukalagala ndaga mvuaji jiami jiakhalele gunguwambela ha gutshita, ufuta wami nu ene wakolele diago, tuakhalele nji nu gusuanguluga.” b Ya thathu, gula udi mutumagela mvuaji jiaye mangino, mbayigukuatesa mu masugu adi muza. Phangi Paulo wana khala gu Brazil udi muzuela egi: “Gutumagela mvuaji jiami guangukuatesele ha gutumagela Yehowa nu athu ako ana khala nu ufumu.” Mbimbi ya Nzambi yana monesa gishina udi naye gutumagela mvuaji jiaye. Yana zuela egi: “Ndaga jiagasue mbajiyila muabonga mukunda nu eye, mbawukhala nji nu monyo masugu avula ha mavu.”​—Ef. 6:2, 3.

8. Mukunda natshi mavuala avula ana tumagela mvuaji jiawo?

 ⁸ Mavuala avula akotelesele egi ana khala nu gusuanguluga tangua ana tumagela mvuaji jiawo. Phangi Luiza wana khala nji gu Brazil, thomo gakhalelego mukotelesa mukunda natshi mvuaji jienji jiakhalele gumutunyisa ha gukhala nu telefone; handaga wakhalele mumona egi athu agasue a mu gindongo gienji akhalele najio. Uvi gungima wakotelesele egi mvuaji jienji jiakhalele mutshita ngenyi ha gumubamba. Henyaha udi muzuela egi wakotelesele egi tangua diana tumagela muene mvuaji jienji, ganago gudivua gifua udi mu bologo handaga malongo awo ana khala nu ndando yavula. Matangua ako yana khala lamba gudi phangi Elizabeth wana khala gu États-Unis, ha gutumagela mvuaji jienji. Udi muzuela egi: “Gula ngakoteleselego muabonga mukunda natshi mvuaji jiami jiahagi mukhuala umoshi ngenyi, ngana zula tangua dia gutangigiza luholo mikhuala yawo iko yangukuatesele.” Phangi Monica wana khala gu Arménie udi muzuela egi wakhalele nu gusuganguluga tangua diagasue diakhalele muene mutumagela mvuaji jienji gubalega tangua gakhalelego guatumagela.

9. Luholu lutshi athu ako ana tadila gutumagela mikhuala?

⁹ Athu avula ana jiya egi tudi nu funu ya “mafumu a leta,” tudi naye nji gutumagela mikhuala yawo iko. (Roma 13:1) Uvi athu ene amoshi ajiya gutuna gutumagela mikhuala iko handaga ashigo guyitshigina nga ndo adi mutangiza egi ishigo yatagana. Ha gufezegesa, tuzuelelenu ndaga yatadila gufuta gitadi. Mu gifutshi gimoshi gu Europe athu avula ana mona egi “ajiyilego gufuta gitadi gula ashigo mumona gishina mafumu a leta ahagela gitadi giene.” Gishina giene mu gifutshi giene athu anago gufuta itadi yagasue yana guatoga mafumu a leta.

10. Mukunda natshi tudi naye gutumagela mikhuala ikhale inyi tushigo mutshigina?

¹⁰ Biblia yana zuela egi baguvernema a athu ana monesa athu ako malamba, adi nji mu utuameji wa Satana, gualeha ndo mbaashiyiwa. (Ngi. 110:5, 6; Mulo. 8:9; Luka 4:5, 6) Yana zuela nji egi “muthu gashigo munemesa mafumu a leta, gashigo nji munemesa ulondegi wa Nzambi.” Yehowa wana bemba egi mafumu a leta alandule guhinyina hagula ndaga jikalegewago mu lumuamua, wana tshigina nji egi tuatumagele. Hene tudi naye guhana ‘athu agasue ima tudi naye guahana,’ yakotelesa egi gufuta itadi, guanemesa nu guatumagela. (Roma 13:1-7) Matangua ako tuajiya gumona egi mukhuala umoshi udi wabola, ushigo watagana nga ndo udi wakola ha gutumagela. Uvi tuana tumagela mikhuala ya mafumu ene handaga Yehowa wana gutuwambela ha guatumagela gula ndaga adi gututoga jishigo mushiya mikhuala yenji.​—Makal. 5:29.

11-12. Ndaga itshi Yozefe nu Madiya akalegele ha gutumagela mukhuala ikhale wakhalele wakola? Itshi yabuile gungima? (Luka 2:1-6)

¹¹ Tuajiya guzula malongo mu gifezegeselo gia Yozefe nu Madiya anyi atumagele mukhuala wa  mafumu a leta, ikhale yakhalele lamba ha gutshita ngenyi. (Tanga Luka 2:1-6.) Tangua Madiya wakhalele nu vumo dia mbeji hehi nu nage, mafumu a leta a awambelele ha gutshita ndaga imoshi ngenyi yakola. Fumu Auguste wambile mukhuala egi muthu wagasue wakhalele mu uhinyinyi wa enya Roma, wakhalele naye guvutuga mu dimbo diawo ha gusonegesa jina. Yozefe nu Madiya awendele njila yaleha ya bakilometre 150 ha guya gu Beteleheme, akhalele naye gubalegela mu mababa nu mu milundu yavula. Yakhalele diago njila ya lamba mukunda nu Madiya. Yajiya gukhala egi adisagesele mukunda nu sante ya Madiya nu ya mona wakhalele mu vumo. Itshi yakhalele naye gukalegewa gula nga misongo ya guvuala yamukuatele mu njila? Yajiya gukhala egi akhalele gudisagesa ha gubamba mona muene muabonga handaga muene wakhalele naye gubua Masiya. Ndaga yene yaakangele njila ha gutuna gutumagela mukhuala wa leta ba?

¹² Yozefe nu Madiya akhalele nu ndaga jiakhalele guatuma ha gudisagesa, uvi atumagele mukhuala. Yehowa waakuatesele mukunda nu khadilo diawo dia gutumaga. Madiya wahetele muabonga gu Beteleheme, wavualele mona nu sante yabonga; ndaga yene yakuatesele ha gutaganesa profesi ya Biblia!​—Mika 5:2.

13. Luholo lutshi khadilo dietu dia gutumaga diajiya gukuatesa aphangi’etu?

¹³ Tangua tuana tumegela mafumu a leta, esue hakhetu tuana heta gubonga, tuana kuatesa nji athu ako. Luholo lutshi? Ha gufezegesa, tuanago gutagana nu malamba ana buila athu ana tuna gutumegela mukhuala wa leta. (Roma 13:4) Tangua tuana tumagela mafumu a leta, yana guakuatesa ha gumona egi Matemue a Yehowa akhala athu abonga. Ha gufezegesa, ivo yavula yabalega gale, masuta anginyile mu Inzo ya Ufumu gu Nigeria mu tangua dia gudibungisa, akhalele mukamba mbundudi jiakhalele mutuna gufuta itadi. Uvi komanda wa masuta ene waawambelele ha guvutuga, wazuelele egi: “Matemue a Yehowa ana futa itadi muabonga.” Gula udi mutumagela mikhuala ya leta, udi mubamba lukuma lua Matemue a Yehowa; ndaga yene yajiya gubamba aphangi’etu mu masugu adi muza.​—Mat. 5:16.

14. Itshi yakuatesele phangi wa mukhetu ha ‘gukhala hehi ha gutumagela’ mafumu a leta?

 ¹⁴ Matangua ako yajiya gukhala lamba ha gutumagela mafumu a leta. Phangi wa mukhetu Joanna wa gu États-Unis udi muzuela egi: “Yakhalele diago lamba gudi ame ha gutumagela mafumu a leta handaga akhalele mumonesa athu ako a mu fami yami lamba.” Uvi Joanna watshitshile yagasue ha gusombegesa khadilo dienji. Thomo, wabembele gutanga ndaga athu akhalele mumba mu Internet jiakhalele muzuela ndaga jiabola mukunda nu mafumu a leta. (Ish. 20:3) Ya mbadi, watshitshile gisambu gudi Yehowa ha gumukuatesa ha gumushila mutshima ha fundo dia gusha mutshima egi baguvernema a ha mavu asombegese ndaga. (Ngi. 9:9, 10) Ya thathu, watangele malongo a mu mikanda yetu ana zuelela gutuna gudinginyisa mu ndaga jia politike. (Yone 17:16) Mangino Joanna udi muzuela egi luholo luana nemesa muene mafumu a leta nu guatumagela, yana gumukuatesa ha gukhala mu guhuima nu gusuanguluga.

15. Mukunda natshi yajiya gukhala lamba ha gutumagela utuameji wana gutuhana ulondegi wa Yehowa?

¹⁵ Yehowa wana gututoga ha ‘gutumagela athu ana gututuameza’ mu hungu. (Heb. 13:17) Ikhale Fumu wetu Yesu udi muthu watagana, uvi athu ana tomba muene ha gututuameza ha mavu ashigo athu atagana. Matangua ako yajiya gukhala lamba ha guatumagela gula atutoga ha gukalagala ndaga imoshi tushigo mutshigina. Ha gufezegesa, lusugu lumoshi mupostolo Phetelo nji gatumagelego muphushi ndaga amuwambelele ha gutshita. Muanjelo wamuwambelele ha gudia shitu jinyi Mukhuala wa Moize wakhalele muzuela egi jidi jia usala, uvi Phetelo watunyile mbala jitatu! (Makal. 10:9-16) Mukunda natshi? Handaga gakhalelego mukotelesa ndaga jiene amuwamebelele ha gutshita. Ndaga jiene jiakhalele jiagudisha nu ndaga jiakhalele mukalagala muene mu monyo wenji. Gula yakhalele lamba gudi Phetelo ha gutumagela muanjelo, matangua ako yajiya nji gukhala lamba gudi esue ha gutumagela athu ashigo atagana!

16. Ikhale mupostolo Phaula watangijile egi ndaga amutogele jidi jiakola ha gutumagela, itshi yakalegele muene? (Makalegelo 21:23, 24, 26)

¹⁶ Mupostolo Phaula wakhalele ‘hehi ha gutumagela’ ndaga jiagasue akhalele gumuwambela ha gutshita, ikhale matangua ako wakhalele mumona egi ndaga jiene jidi jiakola ha gutumagela. Aklisto anyi akhalele enya Yuda avuile ndaga jiabola athu akhalele muzuela mukunda nu Phaula egi wakhalele mulongesa “athu a ifutshi iko egi atune mikhuala ya Moize.” Akhalele nji muzuela egi gakhalelego nji munemesa Mukhuala wa Moize. (Makal. 21:21) Akulu a gu Yelusalema amuwambelele ha guzula mala ako nguana akhalele mutshita mudimo mu tempelo ha gudiphelegetesa hamoshi nawo gifua luholo Mukhuala wakhalele mutoga, ha gumonesa egi wakhalele mutumagela Mukhuala wa Moize. Uvi Phaula wakhalele mujiya egi Aklisto akhalelego luko mu uhinyinyi wa Mukhuala wa Moize. Gakalegelego nji nga ndaga imoshi yabola. Uvi wakalegele mbala imoshi ndaga amutogele. “Mu lusugu lualanduile, Phaula wayile nu mala ene ha gudiphelegetesa nawo gifua luholo mukhuala wakhalele mutoga.” (Tanga Makalegelo 21:23, 24, 26.) Luholo Phaula watumagele ndaga amuwambelele, yakuatesele aphangi ha gukhala mu gudivua.​—Roma 14:19, 21.

17. Malongo atshi tuajiya guzula mu eksperianse ya phangi Stephanie?

¹⁷ Yakhalele lamba gudi phangi Stephanie ha gutumagela ndaga jiakhalele muzuela aphangi akhalele nu inemo mu gifutshi giawo. Muene nu mulumi’enji akhalele nu gusuanguluga ha gukuatesa mu hunji dia zuelelo diko. Uvi Betele yakangele hunji diene, awambelele phangi muene nu mulumi’enji ha guvutuga mu hungu dia  zuelelo diawo. Phangi Stephanie udi muzuela egi: “Ngasuangulugilego nga hazonda. Ngakhalelego mutangiza egi hungu dia zuelelo dietu nji diakhalele nu funu ya alongeshi avula.” Ikhale ngenyi, Stephanie watumagele desizio diene. Udi muzuela luko egi: “Gungima ngakotelesele egi desizio diazudile aphangi diakhalele diabonga. Tuabuile gifua mvuaji mukunda nu aphangi avula a mu hungu diene anyi enya fami jiawo akhalelego Matamue a Yehowa. Henyaha ngana longuga Biblia nu phangi mumoshi wa mukhetu walebele mu nyuma. Ngana khala nji nu tangua diavula dia gulonguga hakhami. Ngudi nji muabonga handaga ngudi mujiya egi ngakalegele yagasue ha gutumagela ndaga jiagasue atuwambelele.”

18. Gubonga gutshi tuana heta gula tudi nu khadilo dia gutumga?

¹⁸ Tuajiya gulonguga ha gukhala nu khadilo dia gutumaga. Yesu “walongugile luholo lua gutumaga” mu ndaga jiagasue, ikhale mu tangua dia gusuanguluga nga “mu malamba amonele muene.” (Heb. 5:8) Esue nji mbala jiavula tuana longuga ha gukhala nu khadilo dia gutumaga tangua tuana tagana nu malamba. Ha gufezegesa, hasendesele misongo ya coronavirus, atutogele ha gubemba gudibungisa mu Jinzo jia Ufumu nu gubemba gulongesa inzo nu inzo, yakhalele lamba gudi aye ha gutumagela ndaga yene ba? Khadilo diaye dia gutumaga dia gubambele, diamikuatesele ha gukhala mu gudivua mu hungu, diasuanguluishile nji Yehowa. Mukut’etu agasue tuakotelesa egi tudi naye gudilondega ha gutumagela malongo mbatuheta mu tangua dia lamba diakola. Gutumagela malongo ene mbagutuhuluisa!​—Yobo 36:11.

19. Mukunda natshi tudi naye gukhala nu khadilo dia gutumaga?

¹⁹ Mu longo edi tuamonyi egi, khadilo dia gutumaga diana gutukuatesa mu maluholo avula. Uvi tuana tumagela thomo Yehowa handaga tuana gumuzumba nu tuana tshigina gumusuanguluisa. (1 Yone 5:3) Gushigo nga nu gima tuajiya guhana Yehowa mukunda nu ndaga jiagasue jiatukalegele muene. (Ngi. 116:12) Uvi tuajiya gumutumagela nu athu ana gututuameza. Tangua tuana guatumagela, tuana monesa egi tudi athu atema; handaga gutshita ngenyi guana suanguluisa Yehowa.​—Ish. 27:11.