1. Luholo lutshi akombeledi a Nzambi a mu tangua dikulu akhalele muheta ngolo?

 MBALA jiavula, Biblia yana fuanesa athu ana khala ya gujinginyina gudi Nzambi nu enya ngolo. Uvi matangua ako athu ene ana gudivua yaguleba. Fumu Dadivi wadivuile nji ngenyi. Matangua ako wakhalele gudivua ‘nu ngolo gifua mulundu,’ uvi matangua ako wakhalele ‘muvua woma.’ (Ngi. 30:7) Nyuma ya Nzambi yahanele Samsona ngolo jiavula, uvi wakhalele mujiya egi nga Nzambi gamuhanelego ngolo jiene, wakhalele naye ‘guleba nu gubua gifua athu agasue.’ (Manz. 14:5, 6; 16:17) Yehowa wakhalele muhana akombeledi enji agujinginyina ngolo.

2. Mukunda natshi mupostolo Phaula wazuelele egi wakhalele muthu waguleba uvi wakhalele nji nu ngolo? (2 Kolinto 12:9, 10)

² Mupostolo Phaula wakhalele nji mujiya egi wakhalele nu funu ya ukuateshi wa Yehowa. (Tanga 2 Kolinto 12:9, 10.) Wakhalele nu ukhashi gifua esue. (Gal. 4:13, 14) Matangua ako, yakhalele nji lamba gudi muene ha gukalagala ndaga jiabonga. (Roma 7:18, 19) Wakhalele muvua gikenene nu woma mukunda nu ndaga jiajiya gumubuila. (2 Kol. 1:8, 9) Uvi hakhalele Phaula waguleba, wakhalele nu ngolo. Luholo lutshi? Yehowa wakhalele gumuhana ngolo jiakhalele naye gumukuatesa ha gukolesela mu malamba.

3. Tuza muheta mvutu gu mihu itshi?

³ Yehowa wana laya egi mbawutuhana nji ngolo. (1 Phet. 5:10) Uvi ha guheta ngolo jiene, gudi nu ndaga tudi naye gutshita. Ha gufezegesa, moteur wajiya gukuatesa gamiyo ha guwenda. Uvi muthu udi muwendesa gamiyo gene udi naye gutshita ndaga jiko hagula gamiyo gene gawende. Luholo lumoshi nji, Yehowa wana khala hehi ha gutuhana ngolo tudi najio funu, uvi esue hakhetu tudi naye gutshita ndaga jiko ha guheta ngolo jiene. Itshi Yehowa watuhanele yana gutukuatesa ha guheta ngolo? Itshi tudi naye gutshita ha guheta ngolo jiene? Tuza muheta mvutu jia mihu  yene tangua tuza mulonguga luholo Yehowa wakuatesele akombeledi enji thathu a mu tangua dikulu: Profete Yona, Madiya gin’a Yesu nu mupostolo Phaula. Tuza nji mumona luholo Yehowa wana landula guhana ngolo gudi akombeledi enji a mu tangua dietu.

4. Luholo lutshi Yehowa wajiya gutuhana ngolo?

⁴ Yehowa wajiya gutuhana ngolo tudi najio funu gula tuamutoga najio mu gisambu. Yehowa wana hana mvutu gu isambu yetu, luholo luana gutuhana muene “ngolo jiabalega ngolo jia athu.” (2 Kol. 4:7) Tuajiya nji guheta ngolo tangua tudi mutanga Mbimbi yenji nu guyitangigiza. (Ngi. 86:11) Ndaga jiasonegesele Yehowa mu Biblia mukunda nu esue jiakhala “nu ngolo.” (Heb. 4:12) Gula tudi mutshita isambu gudi Yehowa nu tudi mutanga Mbimbi yenji, mbatuheta ngolo jiajiya gutukuatesa ha gukolesela, ha gukhala nu gusuanguluga nu ha gutagenesa inemo yakola. Tutalenu luholo Yehowa wahanele profete Yona ngolo.

5. Mukunda natshi profete Yona wakhalele nu funu ya gikhesa?

⁵ Profete Yona wakhalele nu funu ya gikhesa. Wavuile woma wa guya ha fundo Yehowa wamutumine, hene wanginyile mu masuwa akhalele muya ha fundo diko. Gishina giene, muene nu athu ako akhalele mu masuwa ene atshiginyile gufua gu funji yakola. Gungima athu akhalele mutshita mudimo mu masuwa ene amubishidile mu kianga, ishui yakoma wamuminyile. Yona wakhalele mu vumo dia ishui, fundo dia woma diago. Udi mutangiza egi Yona wadivuile luholo lutshi? Wakhalele mutangiza egi mbawufuila muene ba? Watangijile egi Yehowa wamutunyile ba? Idi yadiago egi, Yona wavuile gikenene giakola.

6. Ha gutadila Yona 2:1, 2, 7, itshi Yona wakalegele ha guheta ngolo mu vumo dia ishui?

⁶ Ndaga itshi Yona wakalegele ha guheta ngolo hakhalele muene mu vumo dia ishui? Watshitshile gisambu gudi Yehowa. (Tanga Yona 2:1, 2, 7.) Yona watunyile gutumagela Yehowa, uvi wabalumuine mutshima nu wakhalele nu gutshigina egi Yehowa mbawutegelela gisambu gienji. Yona watangijile nji ndaga jiatangele muene mu Mbimbi ya Nzambi. Mukunda natshi tuazuela ngenyi? Handaga mu gisambu giatshitshile muene gidi mu Yona mukhapho 2, wakalegele mbimbi jia luholo lumoshi nu jinyi jidi mu mukanda wa Ngimbo. (Ha gufezegesa, fuanesa Yona 2:2, 5 nu Ngimbo 69:1; 86:7.) Idi yadiago egi Yona wakhalele mujiya Mbimbi ya Nzambi muabonga. Verse jiene jiamukuatesele ha gusha mutshima egi Yehowa mbawumukuatesa. Yehowa wahuluishile Yona; gungima Yona watshiginyile ha gutagenesa ginemo giamuhanele Yehowa.​—Yona 2:10–3:4.

7-8. Luholo lutshi phangi mumoshi wa gu Taiwan wahetele ngolo ha gukolesela mu malamba?

⁷ Gifezegeselo gia Yona giajiya gutukuatesa tangua tudi mutagana nu malamba avula. Ha gufezegesa, phangi Zhiming b wa gu Taiwan wakhalele mukata misongo yakola. Enya fami yenji akhalele nji gumumonesa lamba handaga wakhalele Temue wa Yehowa. Uvi isambu nu gulonguga guenji hakhenji guamukuatesele ha guheta ngolo. Udi muzuela egi: “Matangua ako gula ndaga jiangubuila, ngana guvua gikenene giakola; ngenyi yana gungulebesa muila ha gulonguga hakhami.” Uvi phangi muene galebelego muila. Udi muzuele egi: “Thomo, ngana kalagala gisambu gudi Yehowa. Gungima ngana tegelela ngimbo jia Ufumu. Matangua ako, ngana yimba ngimbo jiene mu dijui diatuluga uu nu tangua nguza gudivua muabonga. Gungima ngana sendesa giwa gulonguga guami hakhami.”

⁸ Phangi Zhiming wahetele ngolo jia gukolesela mu malamba mu ndaga jiakhalele muene mulonguga. Ha gufezegesa, gungima dia  guphandewa gu misongo yakola, munganga wamuwambelele egi luholo gakhalelego nu mahatshi avula, yakhalele mutoga egi amumbe mahatshi. Mu phipha ya gutuama egi amuphande, phangi Zhiming watangele lumene lua phangi mumoshi wa mukhetu waphendewe nji gifua muene. Phangi muene wa mukhetu wakhalele nu mahatshi azonda gubalega a Zhiming, uvi watunyile egi amuvutulago mahatshi; gungima wavuile muabonga. Lumene luene luakuatesele phangi Zhiming ha gusala yangujinginyina.

9. Itshi wajiya gutshita gula malamba agulebesa muila? (Tala nji gifuanesa.)

⁹ Gula udi mutagana nu lamba, wana guvua gikenene giakola giajiya gugulebesa muila ha guwambela Yehowa ndaga jidi gugusagesa ba? Nga ndo wana guvua guhuila ha gulonguga hakhaye ba? Gula idi ngenyi, ujimbilago egi Yehowa wana kotelesa muabonga ndaga udi mutagana najio. Hene gula watshita gisambu nga giahihia, wajiya gusha mutshima egi Yehowa mbawugukuatesa diago mu luholo luatagana. (Ef. 3:20) Gula ushigo nu ngolo jia gutanga nga gulonguga Biblia hakhaye handaga udi mukata, udi waguhuila nga ndo udi nu gikenene, wajiya gutegelela ba enregistrements a Biblia nga a mikanda yetu iko. Wajiya nji gutegelela ngimbo jietu nga gutala video imoshi mu jw.org. Yehowa wana tshigina gugukuatesa, mbawuyitshita gula udi mutshita isambu nu udi mukamba mvutu jia isambu yene mu Biblia nu mu ima iko yatuhanele muene.

10. Luholo lutshi aphangi’etu Aklisto ajiya gutukuatesa ha guheta ngolo?

¹⁰ Yehowa wajiya gukalegela aphangi’etu a mala nu a akhetu ha gutuhana ngolo. Ajiya nji ‘gutuhana diago gikhesa giavula’ tangua tudi mutagana nu malamba nga tangua tudi mutagenesa ginemo giakola. (Kol. 4:10, 11) Tuana khala nji nu funu ya mafuta tangua tuana tagana nu ‘malamba.’ (Ish. 17:17) Tangua tuana guleba muila, aphangi’etu Aklisto ajiya gutukuatesa nu gutuhana gikhesa ha gulandula gukombelela Yehowa. Tutadilenu luholo athu ako akuatesele Madiya gin’a Yesu.

11. Mukunda natshi Madiya wakhalele nu funu ya gikhesa?

¹¹ Madiya wakhalele nu funu ya gikhesa ha gukalagala gutshigina gua Yehowa. Tangiza gale luholo luadivuile muene tangua muanjelo Gabriele  wamuwambelele egi mbawuvuala mona. Wakhalele khenji gazudiwa ndo mu ulo, uvi wakhalele naye gumita vumo. Wakhalele khenji gasanselego nga mona mumoshi, uvi wakhalele naye gusansa mona wakhalele naye gubua Masiya. Wakhalele nji khenji gabungishilego muila nu yala mu monyo wenji, uvi wakhalele naye guwambela Yozefe egi udi nu vumo. Ginemo giene giakhalele giakola diago.​—Luka 1:26-33.

12. Ha gutadila Luka 1:39-45, luholo lutshi Madiya wahetele gikhesa?

¹² Luholo lutshi Madiya wahetele ngolo jia gutagenesa ginemo giakola ginyi muthu muko khenji gahetelego? Watogele ukuateshi gudi athu ako. Ha gufezegesa, wahudile muanjelo Gabriele ha gumuwambela ndaga jiko jiatadila guvualewa gua mona muene. (Luka 1:34) Gungima dia masugu azonda, wayile uu nu “gukhanda ya milundu,” ya gu Yuda ha guya mutala muenya fami yenji Elizabete. Wasuangulugile diago luholo luayile muene guene. Elizabete washimanele Madiya, gungima nyuma ya Yehowa yamukuatesele ha guzuela profesi yatadila mona wakhalele mu vumo dia Madiya; ndaga jiene jiamuhanele diago gikhesa. (Tanga Luka 1:39-45.) Madiya wazuelele egi Yehowa “watshita ndaga jiakola nu koko dienji.” (Luka 1:46-51) Yehowa wahanele Madiya gikhesa mu njila ya Gabriele nu Elizabete.

13. Ndaga itshi yabuile gungima tangua phangi wa mukhetu watogele ukuateshi gudi aphangi a mala nu akhetu?

¹³ Gifua Madiya, aye nji wajiya guheta ngolo gudi aphangi Aklisto. Phangi wa mukhetu Dasuri gu Bolivie wakhalele nji nu funu ya ukuateshi. Tangua minganga yawambelele sh’enji egi wakhalele nu misongo yakola, guakhalelego nji nu gihemba gia gusaga misongo yene, Dasuri wakhalele mutshigina gukhala hehi n’enji. (1 Tim. 5:4) Uvi yakhalelego ndaga yaleba. Udi muzuela egi: “Matangua avula ngakhalele gudivua ya guleba diago.” Phangi Dasuri watogele ukuateshi ba? Thomo, gatogelego ukuateshi. Udi muzuela egi: “Ngakhalelego mutshigina gusagesa aphangi. Ngatangijile egi, ‘phamba Yehowa wajiya gungukuatesa mu malamba ene.’ Uvi gungima ngakotelesele egi gukamba gukhala hakhami, gudi gifua ngudi mukamba gumanesela malamba ene ame hakhami.” (Ish. 18:1) Phangi Dasuri wazudile desizio dia gusonegela mafuta enji ako, gungima waakotelesele ndaga jiakhalele mutagana najio muene. Udi muzuela luko egi: “Aphangi Aklisto angukuatesele diago muavula. Akhalele gutubatela ima ya gudia, akhalele nji gungutangela verse jia Biblia jianguhanele gikhesa. Ngudi nu gusuanguluga guavula ha gujiya egi tushigo esue hakhetu. Tudi mukatshi dia fami yakoma ya Yehowa, aphangi’etu Aklisto ana gutukuatesa mu luholo luatagana, ana dila nu esue tangua tudi mumona malamba, ana gutuhana nji gikhesa ha gulandula gukombelela Yehowa hamoshi nawo.”

14. Mukunda natshi tudi naye gutshigina ukuateshi wa akulu?

¹⁴ Yehowa wana kalegela akulu ha gutuhana gikhesa. Akulu adi kado gatuhanele Yehowa ha gutuhana ngolo nu gikhesa. (Yesh. 32:1, 2) Hene tangua udi muvua gikenene, wambela akulu ndaga jidi gugusagesa. Tangua adi gugukuatesa, tshigina ukuateshi wene. Yehowa wajiya guakalegela ha guguhana ngolo.

15. Felela ditshi Aklisto agasue adi nadio?

¹⁵ Ndaga jialayele Yehowa jidi mu Biblia jiajiya gutuhana felela nu ngolo jia gulandula gumukombelela. (Roma 4:3, 18-20) Aklisto ako adi nu felela dia guya mujinga mayilago mu dilu, uvi ako mbaajinga mayilago mu phaladiso ha mavu. Felela diene diana gutukuatesa ha gukolesela mu malamba, ha gulongesa lukuma luabonga nu ha gutagenesa inemo yetu mu  hungu. (1 Tes. 1:3) Felela diene diakuatesele nji mupostolo Phaula.

16. Mukunda natshi mupostolo Phaula wakhalele nu funu ya gikhesa?

¹⁶ Mupostolo Phaula wakhalele nu funu ya gikhesa. Mu mukanda wasonegele muene Aklisto a gu Kolinto, wadifuanesele nu mabungu a wuma. Wakhalele “musagesewa,” gakhalelego nu “gima gia gukalagala,” akhalele ‘gumumonesa lamba’ nu ‘gumubuisa mu mavu.’ Monyo wenji wakhalele mu gingonza. (2 Kol. 4:8-10) Mupostolo Phaula wasonegele mbimbi eji tangua diakhalele muene mu voyage yenji ya thathu ya mudimo wa gimisionere. Gungima dia gusonega mbimbi jiene, watagenele nu malamba avula. Tangua diakhalele muene mu njila yene mbundudi jiamusagesele, amukuatele, abundugile mu kianga, amumbile mu bologo.

17. Ha gutadila 2 Kolinto 4:16-18 itshi yakuatesele Phaula ha gukolesela?

¹⁷ Phaula wahetele gikhesa gia gukolesela luholo luakhalele muene muhaga meso mu felela dienji. (Tanga 2 Kolinto 4:16-18.) Wawambelele Aklisto a gu Kolinto egi ikhale ‘muila wenji wakhalele mubola,’ uvi gabembelego egi ndaga yene imulebese muila. Wakhalele muhaga matangi mu gubonga guakhalele naye guheta muene mu masugu adi muza. Felela dienji dia gujinga ivo nu ivo mu dilu diakhalele “lutumbu luabalega gukoma,” diamukuatesele ha gukolesela mu malamba agasue ha guheta gishimbigo. Phaula wakhalele mutangiza felela diene, hene ‘mutshima nu matangi’enji akhalele mubua ihe-ihe lusugu nu lusugu.’

18. Luholo lutshi felela diahanele phangi Tihomir nu enya fami yenji gikhesa?

¹⁸ Felela mukunda nu masugu adi muza diahanele phangi Tihomir wa gu Bulgarie gikhesa. Ivo yazonda gungima galenge genji wa yala Zdravko wafuile gu aksida. Phangi Tihomir wavuile gikenene giakola. Ha gukolesela mu lamba diene, muene nu enya fami yenji akhalele mutangiza gusuanguluga mbaaheta tangua athu mbaafuzumuga. Udi muzuela egi: “Tuakhalele muzuelela fundo mbatutagana nu Zdravko, ima ya gudia mbatumulondela, athu mbatutamega mbala ya thomo tangua mbadifuzumuga muene, nu ndaga mbatumuwambela jiatadila  masugu a gisugishilo.” Phangi Tihomir udi muzuela egi gutangigiza felela diene guakuatesele ha gukolesela nu gunengenena tangua Yehowa mbawufuzumuna phangi’awo.

19. Itshi wajiya gutshita ha gukolesa felela diaye? (Tala nji gifuanesa.)

¹⁹ Luholo lutshi wajiya gukolesa felela diaye? Ha gufezegesa, gula udi nu felela dia gujinga mayilago ha mavu, khala mutanga nu gutangigiza mene jia Biblia jiana monesa luholo phaladiso mbayikhala. (Yesh. 25:8; 32:16-18) Khala mutangigiza luholo lujingu mbalukhala mu mavu ahe-ahe. Tangiza egi udi mu mavu ahe-ahe. Nanyi mbawumona? Matululu a luholo lutshi mbawuvua? Mbawudivua luholo lutshi? Ha gujiya luholo phaladiso mbayikhala, khala mutala ifuanesa idi mu mikanda yetu nga ndo tala video jia ngimbo gifua Le monde nouveau, Idi Hehi ha Guza, Imagine ce jour. Gula tudi muzula tangua dia gutangigiza felela dietu dia gujinga mu mavu ahe-ahe, mbatumona egi ‘malamba tudi mutagana nawo adi azonda, adi nji mukunda nu tangua diazonda.’ (2 Kol. 4:17) Felela diatuhanele Yehowa diajiya gutukuatesa ha gukolesela mu malamba ene.

20. Luholo lutshi tuajiya guheta ngolo ikhale tudi gudivua yaguleba?

²⁰ Ikhale tangua tudi gudivua yaguleba ‘Nzambi mbawutuhana ngolo’. (Ngi. 108:13) Yehowa watuhanele gale ima tuana khala nayo funu hagula tuajiya guheta ngolo. Hene, gula udi nu funu ya ukuateshi ha gutagenesa ginemo gimoshi ngenyi, ha gukolesela mu lamba udi mutagana nadio nga ha gukhala nu gusuanguluga, tshita gisambu nu mutshima umoshi gudi Yehowa, longuga nji Biblia ha gukamba utuameji wenji. Tshigina ukuateshi udi guguhana aphangi a mala nu a akhetu. Khala muzula tangua dia gutangigiza felela diaye mukunda nu masugu adi muza. Ngenyi, Nzambi mbawuguhana ‘ngolo jiavula jiajiya gugukuatesa ha gukolesela mu malamba nu guhuiminyina nu gusuanguluga guagasue.’​—Kol. 1:11.